اقلعى عينك اختاه فانتى حجر عثرة

حذر الداعية السعودي الشيخ محمد الهبدان من ذهاب المرأة وحدها للتسوق دون محرم لها وذلك اتقاء للشرور والمعاصي، وقال الهبدان إن المرأة التي تريد العفاف لن تخرج إلى السوق متبرجة واضعة "ماكياج السوق"
ألا هو فى مكياج للسوق ومكياج للزيارات العائلية ومكياج للفسح وكدا يعنى

لفتنة الناس و"تدفع مبلغا ماليا أحيانا لتجميل منطقة العينين وتذهب للباعة وإلى الشباب ونحو ذلك وتزداد المأساة إن رأيتها متبرجة برفقة زوجها".
هو الموضوع كله انك عايزها توفر فلوس المكياج ؟؟؟ لاء شيخ إقتصادى الحقيقية .. وتزداد مآساتك لأن المسرفة المبذرة راحت اشترت مكياج وكمان ماشيه مع محرم ياللهول كان المفروض يقطع رقبتها على طريقة قطع رقبة ميكى ماوس علشان راحت اشترت مكياج بفلوسه

قال إن أغلب الأنقبة التي في السوق"لا يصح ارتداؤها"..الإسلام يأمرنا بإزالة الأذى عن الطريق فأيهما أعظم أحجر يزال أم فتنة من إمرأة مسلمة تفتن شابا يحترق ويتفجر شهوة وليس لديه زوجة يقضي وطره فيهاولتعلم الأخوات أن كل من فتن بها، فستحمل وزره وما ترتب على ماقام به من أعمال بسببها

يااااه للدرجة المرأة أذى وكمان حجر يترمى على جانب الطريق طيب الحمد لله وشهد شاهد من اهلها اصلى لما كنت بقول عليهم شبه اكياس الزباله المرمية على جوانب الطريق كان بيجى لهم صرع .. دلوقتى الشيخ الداعية العلامة .. قال عليها حجر عثرة وأذى والمفروض بقى انها تعور لها عين من عينيها علشان فتنة الرجالة وشهوتهم المتأجهه طول النهار والليل .. قاعدين فى الشوارع يبصوا على اكفان ماشية ومش قادرين يا حرام يمنعوا شهوتهم باستمرار الشهوة متأججه .. اصله بيتكلم عن حيوانات مش عارفين يتحكموا فى غريزتهم .. طيب يا داعيه يا علامة لما هى فتنة .. ليه ربنا خلق ليها عينين ؟؟؟؟
ولما هى كلها على بعضها عورة .. ليه ربنا خلقها من الاساس .. هو ربنا بيخلق حاجه وحشه ؟؟؟
طيب امبارح غطيتها والنهارده بتغطى عين من عينيها وبتشوه الخلقة التى خلقها الله عليها بحجه إنهاا حجر عثرة وتسبب أذى ليك .. معلشى بقى هى لما بتمشى فى الشارع جسمها بيتهز وساعات بتعمل صوت وهى ماشية .. مش فى فتوى كدا من فتاويك اللوزعيه انت واخوانك تحرم خروجها من البيت خالص .. علشان الراجل مش يتفتن بمشيتها أو إعادة الوأد مرة تانية .... علشان الحيوان الغلبان اللى لا بيتكلم مع زميلاته فى شغل ولا بينام ولا بيشرب ولا قادر يعمل حاجه من اشتعال الشهوة ليل نهار جواة .. انتوا مش بتفكروا غير فى الجنس وبس ؟؟ مش بتفكروا فى انها انسان وبنى آدم من حقه حياة كريمة .. ربنا كرم الانسان .. ولم يفرق فى تكريمه بين رجل وامرأة .. وانتوا شهواتكو سيقاكو قدامها وكل كلامكو الجنس والمرأة .. الا مافى واحد فيكو يا مدعين التدين افتى بزيادة الانتاج ولا الحث على العمل وقال العمل عبادة ولا حسن المعاملة .. وقال الدين المعاملة .. الا كل كلامكو مرأة وجنس وتفرقه عنصرية ... ليس عليهم حرج .. لما واحد مش يفكر غير بنصه التحتانى يبقى يستحق الشفقه لانه شاذ وواجب العلاج ..

ومن نقاب الممرضات اللى بيدخلوا على المريض كالاشباح يقضوا على اجله لنقاب الاذاعه والتلفزيون .. طيب اذاى جهاز اعلامى بالحجم ده يسمح بدخول امثالهم حتى وان كانت تعمل عمل ادارى ؟؟؟؟
الا يعلم بوجود هذه الاشياء رئيس اتحاد الاذاعه والتلفزيون ؟؟؟
من الواجب حظرهم حتى وان كانوا يتعدوا على اصابع اليد الواحدة

Comments

كفاية قوي خلقة ربنا فيكو يا بنات وانتو حلوين أصلا يبقى ليه كده تزودو الحلاوة وبعدين احنا نلزق انتو أحرار بأه بس مفيش وحده تقول ده بيبصلي هههه على فكرة كلامك صح عشان الشيوخ السعوديين أحيانا بيزودوها أنا لما كنت في السعودية كنت مقتنع ان تغطية الوجه واجبة بقول جميع العلماء وفرض يعني فرض طلع فيها أقول والموضوع مش زي ما قالولنا..خير ربنا يستر علينا جميعا..معلش لو طولت عليكي
الازهرى said…
العزيزة قطة الصحراء

لاول مرة احجز اول تعليق ودا معناه ان حظى حلو النهاردة


راجع تانى
شق القمر said…
تعرفى يا قطه
انا نفسى اسال اسئلة كتيرة اوى
بس الاول هقولك انتى كتبتى بنرفزه ودا مكنش فى صالحك فى اسلوب الكتابه
لكن على نفس المنوال هقول ليه الشباب تفكيره كله استوقف على الفتنه وبس
كان الحياة مفيهاش غير كده
احنا مش كده
ولا بنات آدم وحوا كده
ملهمش ذنب انهم بنات
وملهمش ذنب ان ربنا خلق فكرهم يمكن يعلو فكر بعض الاولاد
ربنا خلق المتعه بين زوج وزوجه فى الحلال
انتم خليتم البنت تخاف ابوها وتخاف اخوها وتخاف كل مذكر فى الحياة
خلتونا نخاف .. منكم لله
وبرده فى نفس الوقت .. فى بنات عايزه تتلم
فى بنات هى اللى بتثير مفاتنها
ودا عيب اوى
مش الحل اننا نكون ورا انقبة
ولا اننا نغطى وشنا ونبقى اشباح

***********

فى دكتورة فى كليتنا بتدخل قسمها بتخلع النقاب
الكل بيتكلم عنها بكلام مش لطيف
مع انى دايما بقولها شكرا مع انى مكلمتهاش ابدا
لانها فاهمه انه لا فرض ولا سنه
وفاهمه انها تخلعه وترفعه لمن تشاء
وهى دلوقتى ادام ولادها وفى صرح علم
عن نفسى بقف ادام دكاترة منقبات مبعرفش بتكلمنى ولا بتكلم مين
وادام زميلاتى معرفش هما بيضحكوا ولا عبوسين
نفسى الناس تعيش الامان ونفسى متبقاش عنيكم على المفاتن وتشغلوا بالكم بيها وتحاولوا ترسموها حتى عالبنت المنقبه اللى هى شبح زى ما انتى قلتى قطه
البنت بتمشى فى حالها مبتقصدش افتتان حد وتلاقى دا يقولها كلمه ودا كلمه
عشان الحقيقة هما اللى ناقصين
معلش
ماهو مفيش مدينة فاضلة حتى ولا فى السعوديه اللى هى اصلا بتفرض النقاب
ربنا يسترها
عزيزتى الموضوع شائك

ولكن انا لا احب التطرف فى الدين
فالمعقول والمناسب والذى يجبر الجميع على النظر اليك بأحترام هو بألتأكيد المناسب لك

يعنى ومن الآخر كل مازاد عن حده انقلب الى ضده

والاخ الشيخ محمد الهبدان يبدوا انه اصبح فاضى .والفاضى يعمل ايه.....؟

تحياتى والسلام
romansy said…
اولا احنا ديننا دين يسر وليس دين عسر
يعنى مش لازم التشدد لدرجه التطرف
وصدقينى مش عارف اقول ايه اكتر من كده
على العموم
ربنا يهدى الجميع
لما فيه الخير
ROSA E OLIVIER said…
Wonderful!...and for you...

"love is the one who masters all things."

Mawlãnã Rumi.
ريما said…
مرحبا عزيزتي
والله عجبني هالمقال كتير فعلا ناس مش عارفه تعمل ايه علشان تشوه الدين هما بيفتكروا انهم بطبقوا الدين والدين الصحيح ليس له علاقه بكل ما قيل ويقال من فتاوي لا تخدم سوى مصالح فئه ضيقة الرؤيا تهدم ولا تبني ...
الاسلام عزز من مكانة المرأه ورفعها واوصى بها خيرا
رائع كلامك وكتابتك
اتمنى لك التوفيق
عارفه بجد بحس ان البنات الى منقفبه دى مش لابسه النقاب كنقاب لكن هى لابساه عشان تدارى العار ؟
kochia said…
هو بغض النظر عن التفاصيل
خير الامور الوسط
والست طيعا فتنة والمفروض والتبرج والسفور حرام
وفي نفس الوقت غض البصر واجب
والذنب بين الاتنين اذا حصل غلط
ده رايي

تحياتي
مؤمنه said…
السلام عليكم ورحمة الله بركاته
تعليقى هو
ما تزعليش نفسك وما تتعصيبيس وما ترميش حد بالتطرف مهما بدر منه

دى وجهة نظره

والكل محاسب امام الله
نعمل الى ربنا ورسولنا امرنا بيه كفتيات ولا ندعبس فى اوراق اخرى
والسلام عليكم ورحمة الله وبركاته
ABOALI said…
سيدتى سيدة الصحراء
توجد سلبيات كثيرة فى مجتمعنا احيانا نشرها يفتح ابواب كثيرة للخلاف
والامام على يقول ليس كل ما يعرف يقال
ولا كل ماقيل حضر اهله ولا كل ما قيل جاء اوانه
لذا اسمحى لى فى قلم شخصك الكريم الا يعرض دائما كل ما يثير الخلاف
ان كان من يلبس النقاب مرتاح لذلك فاتركيه فى حاله وان كان من يلبس غيره مرتاح فاتركيه فى حاله الله يتولى الجميع فى النهاية
لاتصفى هذا بالخطء والثانى بالصواب تقبلى الحياه كما هى تضم كل الالوان
اهم شيىء فى لباس المراءه ثلاثة اشياء فضفاض لا يشف غير ملفت للنظر
فقط يا سيدتى
ان جعل مايثير الخلاف مجالا للمسجالات لهو امر سنحاسب عليه
من اخطء فعليه ان يتحمل خطئه
والذى افتى ان اصاب له اجران وان لم يصيب فله اجر الاجتهاد ولكن كل ذلك سيدتى بشروط
هناك اشياء جميلة وفى الدين ايضا وكثيرة
ارجو ان تعملى لها زوم كما تفعلى على العكس


الود والمحبة وتبادل الافكار هو الاساس بدون تحيز
هذا رايى


تحياتى
Eman said…
التطرف هو مجاوزة حد الوسط سواء بالسلب أو الايجاب

يعني في بنات صراحة لبسهم صعب أوي (كاسيات عاريات فعلا ) وبيشوهوا الحجاب أصلا
وفي بنات بيلبسوا خيم وماشيين لا تعرفي وشهم من قفاهم ، وبجد مش عارفة بيعملوا ايه في الحر ده

المفروض الاعتدال في المنتصف ، وربنا ادلنا المخ أننا نعرف لبسنا ده ملفت ولا لأ

أما بالنسبة لمدعوا التدين دول فربنا يرحمنا من فتواهم و العك اللي طول النهار يقولوه ، وتعصبهم الغريب ضد المرأة بجد مجتمع غبي

علي رأيك هما مثلا حيوانات بينساقوا خلف شهواتهم؟؟؟ فين الجزء الانساني يعني
ابو احمد said…
بنتى العزيزه المتألقه
متتصوريش أنا فرحان بيكى أد إيه
تحياتى وصادق مودتى
banouta masreya said…
انا زهقت من البلاوى اللى بقراها كل يوم و اخرها الفتوى بتاعت النقاب ابو عين واحدة
يا راجل ده حتى اكثر الشيوخ تشددا قالوا ان تغطية الوجه فى قولان و انه مش فرض قوم تفرضه و تزود عليه كمان ليه هو ربنا لو كان عايزنا نتنقب كان هيشق عليه يقول كده فى كتابه؟..استغفر الله العظيم
بصى هى عموما الهرتلات اللى من النوع ده ان دلت على شيء فهى بتدل على عقلية قائلها..كائن مهووس بالجنس و مش شايف قدامه غير فتن تمشى على قدمين
لو كل الستات اتنقبت و ما لقاش قدامه اللى يبصلها هينقل على اى كائن تانى اخره تاء مربوطة و اهى اى انثى و خلاص
بجد قرفت و زهقت من التخلف و العقول المتحجرة..كاننا ما اتخلقناش غير عشان يتفرجوا علينا ..كاننا بالهيافة دى عشان يكون كل تفكيرنا فى لفت النظر و "اثارة الفتن "
ربنا يلطف بيه و بينا
Anaza3lan said…
طيب حضرتك متعصبه ليه يا قطة ؟؟ كل شئ فيه الوحش وفيه الحلو

عشان نعيش في استقرار نفسي بينا وبين بعض يجب اننا نناقش اي حاجة من رؤية شخصية مش موضوع تدين او غيره .

اللي الانسان شايفه صح لنفسه يعمله .. ولا يحق لغيره انه يعترض عليه . هي عايزه تبقي منقبة اوك براحتها وهي عايزه تبقي متبرجه برده براحتها

اللي شايفاه صح تعمله .. وفي الاخر متلومش غير نفسها

وشكرا ليكي
شوفي ياقطتنا الهيافه ليها ناسها
فيه ناس بتشغل مخها في الهيافه و فهي ناس بتشغلها مخها فيما يفيد الناس و ده الفرق بينا و بين الغرب انهم بيحاولوا يطوروا من نفسهم و هنا لسه بيطوروا في اخفاء المرأه لحد ما يقعدوها في البيت و يمكن بعد كده يطلعوا فتوي بقتلها لو خرجت من بيتها
قريت الخبر بتاع مواصفات النقاب و الصراحه مش عايزه اقول كلمه يعاقب عليها القانون
المجانين في نعيم بجد
محبتي ياجميله
اه نسيت ياقطتنا اعلق علي موضوع المنقبات اللي بيدخلوا مبني الاذاعه و التليفزيون و علي يدي و قدامي بشوفهم و مش عارفه ازاي امن التليفزيون سايبهم كده مع انه ممنوع دخول المنقبات المبني لكن تلاقي الامن بيعدوا من جنبها و لا كأنهم شايفينها مش بقولك اهمال و تسيب
و حدث و لا حرج في العيادات تلاقي منقبات جايبين ملفات ستات زمايلهم في تحايل واضح عشان يكشفوا عليهم و حصلت قدامي يعني غش و تزوير
blackcairorose said…
قطة

الف تحية وتهنئة واشكرك كثيرا على تهنئتك عندى فى المدونة وعذرا لتأخيرى فى الرد لاسباب خارجة عن ارادتى

ومن ناحية تانية اسجل اعجابى بمثابرتك فى الكتابة فى هذه الموضوعات، والتى اصبحت من يأسى منها ومن أصحابها فقد فقدت تماما الامل فى امكانية أن يكون للعقل صوتا لدى هؤلاء الاشخاص حتى لول كان صوتا ضعيفا
يا قطه
هو شاف ان الوضع الاقتصادى سئ قال اوفر شويه من الفلوس
بس
وياسلام طلع النساء كلهم حجر
يعنى هما اللى وقعم على الناس فى حادثة الدويقه
ههههه
spellz said…
طبعآ تقلع عينها لأن الحيوان انسان ميزه الله بوجود الذيل و عدم الطمع

لأن حتى الثور في موسم التزاوج لو البقرة مش عايزاه بيحل عنها و مش بيتحرش بيها

و من هنا نثبت ان الحيوان الراقي اصله انسان

ما علينا انا مش فاهمة الناس دي بتفكر اذاي

يروح يشوفله شغلانة يساعد بيها امته بدل ما هو فاضي يطلع فى خطب عجيبة
اصلآ الفقه و الدعوة المفروض يبقو اشياء تطوعية جنب الشغل مش شغلة ياخدوا عليها فلوس و كل ما تحبس المرأة اكتر منزلتك تزيد و الفلوس كمان

حسبي الله !!
Sherif said…
عزيزتى قطة

اقول ما قلته سابقا .. رغم انى لااحب الجدال فى هذا الموضوع

يقول المولى فى خطابه للرسول شخصيافى سورة الاحزاب

لا يحل لك النساء من بعد ولا ان تبدل "
"بهن من ازواج ولو اعجبك حسنهن

فبالله عليكى كيف يعجب الرسول حسنهن ان كن منقبات؟

شئ غريب ان يزايد احد على الرسول شخصيا .. حتى وان صدقت النيات فى التقرب لله .. أقول لمن يريد لاتفرض رأيك على غيرك .. وافعل مايحلو لك .. لكن لاتهدد سلام غيرك بالثبور وعظائم الأمور

ليرحمنا الله من هؤلاء الذين يجيدون النقل .. ولايتدبروا شيئا

الحديث عن الحجاب وليس النقاب فيه جدل كبير .. فاذا كان فريضة على النساء المؤمنات فلماذا لم يفرض على الاماء المؤمنات .. السن نساءا؟

الا يثرن الفتنة وقد كانوا روميات وفارسيات ومصريات وغيرهن ممن هم أحلى من بنات المدينة حتى لقد قال فيهن عمر بن الخطاب لخالد ابن الوليد كف عن ارسالهن فقد بارت بنات المدينة؟

آسف للإطالة .. كما اعتذر لمن لن يجد اجابة لهذه التساؤلات
Abu Shahin said…
فعلا المجانين ف نعيم

احب اقولك بقى فتوى تانية والعهدة على مصطفى صاحبى ( الراوى) انه قالى ان فى شيخ سعودى اقتى وقال ان النقاب بتاعنا ده حرام

تسالونى ليه

اقول لكوا عشان مبيين العينتين

النقاب الشرعى من وحهه نظر سيادته انه يبين عين واحدة ويدارى التانية

بجد الواحد مابقاش عارف يعمل ايه م الناس الهطلة دى
والمشكلة انك تلاقى ناس بتصدقهم وتمشى وراهم

بس فى حاجة ف اخر البوست وقفتنى

اذا كنا بنعترض انا وانتى على اللى لابسين نقاب و شايفين انهم ناس متخلفة .. بس ده ما يخليناش نجور على حقوقهم ف الحياة
كل واحدة تلبس اللى هى عايزاه وتمارس حياتها زى ماهى عايزة دون قيود او شروط .. تشتغل ف الاذاعة والتليفزيزن .. تدخل نوادى براحتها
الى ان ينير الله عقولهم مرة اخرى ويعرفوا ان اللى بيعملوه ده هطل ومش اسلام ولا حاجة

تحياتى
عمو عصام said…
عزيزتى قطه الصحراء..سعيد جدا بأفكارك وطموحاتك فى مواجهة من يريدون للمرأه أن تكون مجرد وسيله لإشباع رغبات زوجها الذى إشتراها بماله لهذاالغرض ولذلك يريدون أن يضعوا نقابا ليس على وجه المرأه فقط بل علىعقلها أيضا .أكررتحياتى وأتمنى تواصلك مع ميجو ومشمش لتقارب الأفكار
oRiGiNaL HeArT said…
معلش بس ممكن تكبرى الخط شوية
مش عارفة اركز خالص
صفا said…
انتى عارفة احسن حل مع الناس دى تجاهلهم لان بالطريقة دى هنرجع لوئد البنات
والله حاجة تحرق الدم
Desert cat said…
كاتب مصري
شرفت حضرتك
Desert cat said…
الازهرى
ترجع بالسلامه ان شاء الله
Desert cat said…
شق القمر
اعمل ايه بس يا جميل ماهم محتارين يعملوا ايه ولا ايه فى المرأة .. شوية عورة وشوية تتغطى وشوية سبب الفتنة .. والله انا بيصعب عليا الرجاله المحترمين اصل مش كلهم زى الشيخ اللى دائما مثار على نفسه
اللى شايف فى البنت اللى قدامه فتنةربنا امره بغض البصر مش قاله البنت الفتنة اتحرش بيها وعاقبها على فعلها .. ربنا موجود هو اللى يحاسب الكل هو يحاسبها بانه يتحرش بيها ليه
كمان المنقبة بتتعاكس واللى حصل فى العيد من سنتين واللى حصل كمان السنة دى فى شارع جامعه الدول كان فى منقبات يعنى تغطية الوجه مش حجه لمنع التحرش كمان مش حل الحل انى اقلع جذور المشكلة مش اهرب واتخفى زى الاشباح
تحياتى
Desert cat said…
وميض ابتسامة
الفاضى يألف كلام
الشيخ انا مشفقه عليه لانه تقريبا مش بيقدر يتحكم فى غريزته علشان كدا بيحاول جاهدا باخفاء النساء
بكره يطلع لنا بفتوى للوأد
تحياتى
Desert cat said…
romansy
ربنا يتقبل دعائك
تحياتى
Desert cat said…
ROSA E OLIVIER
This meant
Mercy
Greetings
Desert cat said…
ريما
بالفعل ريما وكل من نصب نفسه وصى على الدين يصدر اوامر ويسندها اليه علم الدين الصحيح وكيف كرمها ما اهانها هذا الشخص بهذا الكلام
اشكرك جدا ريما
تحياتى
Desert cat said…
صوت من مصر
وانهى عار يا محمد
دى بتكون متغطية ومختفيه وواقفه صوتها مسمع ميدان التحرير كله
Desert cat said…
kochia
والله الى شايف نفسه ضعيف والست بتفتنه مش يخرج من بيته علشان يتقى الفتنة
تحياتى
Desert cat said…
مؤمنه
عليكم السلام ورحمة الله
انا مش زعلانة خالص على فكرة انا زعلانة علي الشيخ وامثاله
Desert cat said…
ABOALI
بالظبط توجد سلبيات كتير منها الشباب والرجالة المتحرشين اللى مش سايبين اى واحده فى اخرها تاء تانيث ماشية فى حالها .. الحل هنا هو فضح كل ماهو مشين وكل ماهو قبيح وكل ما هو يضر بالمجتمع والاخرين لان غض الطرف عنه جبن .. او كمثل النعامة التى تدفن راسها فى التراب .. وبكدا السلبيات تزيد وهنيئا لشيوخ الفتة بفكر سلبى جاهل وهنيئا لمجتمع ذكوري يستحل محارم الآخرين
حل اى مشكلة يبتدى بالمواجهه وقلعها من جذورها يا فندم مش بدفن الراس فى التراب
مقولة على ابن ابى طالب لا تنطبق على هذا الموقف حاشا لله ان كان على سلبى او كان جبان او كان يسكت عن اهانة آخرين
ليس كل ما يسمع قال كالاشعات التى تطق على الآخرين وما شابه
بالنسبة لما اكتب فهقولك كلامى ده مرة واحدة وفهمته مش فهمته مش هكررة تانى
المكان ده اسمه مدونتى الشخصية .. يعنى انا حرة اكتب فيها اللى بيعبر عن رأي اللى عاجبه اهلا وسهلا بيه يرد ينقض يشتم يعمل اللى هو عايزة واللى مش عاجبه فى اختراع اسمه علامة اكس فوق على اقصى اليمين .. إنما حد يفرض عليا اكتب ايه ومش اكتب ايه ابسط رد من تدخل فيما لا يعنيه نال ما لا يرضيه فرض الديكتاتورية ده هناك فى بيتك على مراتك او اولادك انما اوعى تفكر مرة تانية تفرض على حد مش يخصك ولا يعرفك اى حاجه تانى

مرة تانية من الواضح انك مش قريت البوست لمحته او مريت عليه مرور الكرام لانى لا غلطت حد ولا قولت على حد تانى صح .. فمش تقولنى كلام انا مش قولته
من الواضح ان حضرتك مش عارف الفرق بين الفتوى التى تلقى بصاحبها فى النار سبعين خريفاً وبين الاجتهاد
الذى يثاب عليه المخطأ والمصيب

شرفت حضرتك
Desert cat said…
Eman
ماهو للاسف يا ايمان امة الوسطية لا تعرف الوسطية
يا عزيزتى انا فى اول ايام العيد شايفه شاب كبيره اوى 25 سنة عامل دقن طولها مترين وجارر وراه مراته اللى ماشية تقع فى هدومها وياريت النقاب بيعن واحده دى متغمى عنيها خالص وساحبها من ايدهها جاررها وراه .. فكرت انى اطلع الموبايل واصورهم والل لكنى خوفت منه ومن نظره عينيه الجاحظه وتكشيرة عن انيابه وهو ماشى فى الشارع
حاجه اخر انقراف يعنى
Desert cat said…
ابو احمد
دكتورنا العزيز
بشكر حضرتك جدا لكلماتك الطيبة
مودتى واحترامى
Desert cat said…
banouta masreya
حبيبتى الشيخ ده وامثاله عندهم شذوذ
وعقلهم الفذ مش بيفكر فى حاجه فى الدنيا غير الستات
النهارده غمى عنيها بكرة يقولك حلال وأدها اصلها بتمشى فى الشارع
يبقى نخلص من عارها بقى
شرفتينى جدا يا قمراية
Desert cat said…
Anaza3lan
انت حر مالم تضر
فين الحرية الشخصية فى اللثام
يعنى ايه هى حرة تغطى وشها وتسرقنى وانا ماشية فى الشارع يعنى ايه تلبس نقاب وقاعدة جنبى فى المواصلات وانا مش عارفه ده راجل ولا ست ؟؟
يعنى ايه تلبس نقاب وتدخل مستشفيات تخطف اطفال
يعنى ايه تلبس نقاب وتدخل معايا توليت فى اى مكان عام وانا مش عارفه الشبح ده راجل ولا ست
Desert cat said…
صديقتى الغاليةاجندا حمرا
غرب ايه يا جميل بس دلوقتى هو الشيخ ابو اثارة مستمرة ده مش وراه حاجه غير انه يشتم فى الغرب اللى الطفل عندهم عقله يوزن مليون من عقل الشيخ المثار ده وازاى يدفن المرأة هو التأخر والجهل متفشى من شوية
محبتى يا قمراية
Desert cat said…
اجندا حمرا
يا اهلا بالقمر مرة تانية
انا اشك ان المسؤلين فى المبنى يعرفوا اساسا لان المنقبات اللى بيدخلوه عملهم ادارى المشكلة فعلا فى الامن المفروض يكون فى موقف حاسم
بالنسبة للافعال المنافية للى ورا قطعه القماش مش فى الملفات اللى فى العيادات بس .. ده بقى شعار الانحراف هو النقاب .. خلق كل قطعه قماش مشروع منحرفه او منحرف
تحياتى يا جميل
Desert cat said…
Dear blackcairorose
حمد الله على سلامتك يا جميلة
وان شاء الله كانت اجازة سعيد
والف سنة وانتى بكل خير
والله يا حبيبتى العقول اللى بتسمح لامثال هذا الشيخ يلعب فيها ويستخدمها بيدق جعلتنا فى مؤخرة الامم
والغريب ان كل يوم الفضائيات تطل علينا بمهبول جديد من امثال الشيخ هبلان ده كدا
الله يعافينا مما ابتلى به غيرنا
شرفتينى يا جميل
Desert cat said…
محمد صالح
اه شيخ اقتصادى خايف على الميزانية
اللى وقع فى الدويقة صخور لكن النساء حجر اذى وامطاة الاذى عن الطريق صدقة
يبقى من الواجب اماطة الشيخ هبلان من الفضائيات علشان ناخد الصدقة
تحياتى
Desert cat said…
spellz
فلوس البترودولارات جعلت من هؤلاء المرتزقه العواطلية اصحاب مهن
الحكاية سهله وبسيطة ومش مكلفه للغاية هو يحفر زبيبة ويلبس جلابية ويحفظ ايه وحديث للاستشهاد بيهم وقت اللزوم
وفى ظرف 6 شهور بالكتير يكون مليونير
والعبط يصدقوا الخرف بقى
تحياتى
Desert cat said…
Dear Sherif
بعد انتهاء غزوة أحد ذهبت سيدة للرسول تاسله عن إبنها الذى كان مشترك فى الغزوة ولم يعد ولم تعلم انه قتل ولم تعلم عنه اى شيئ وكانت هذه السيدة منتقبة فنزع عنها عمر النقاب وقال لها ويحك اتغطى وجهك وانتى تجلسى امام رسول الله ؟؟
فلو كان فرض فكيف لعمر ان يخالف فرض الله
عمرو بن الخطاب كان يضرب الأمة التى تضع غطاء على راسها ؟؟
هل الفرض يفرق بين الحرائر والإيماء ؟؟؟
ألا يعلم امثال هذا الشيخ الهبلان ان الظروف تتغير والعصر غير العصر
فلا يوجد ما يسمى بان النقاب فرض
ولا الحجاب
شرفتنى جدا
مودتى واحترامى
Desert cat said…
Abu Shahin
ماهى فتوة مصطفى اللى بناقشها يا احمد هقولك تانى
انت حر مالم تضر
انت لو راكب مواصلة ايه عرفك اللى جنبك واحد ولا واحدة
يا عزيزى الجرايد رصدت اكثر من 20 حادث فى شهر واحد بطلها النقاب
سرقة وخطف وزنا
واخرهم الشاب العاطل الذى ارتدى النقاب ودخل حمام سيدات فى نادى مشهور يصور اجسادهن بكاميرا المحمول ولولا ارتياب احداهن فيه وتم القبض عليهم لكان الان صورهم على الانترنت للغائد والعائد
ليس فى الاختباء حرية شخصية يا عزيزى
تحياتى
Desert cat said…
عمو عصام
يا ألف أهلاً وسهلاً بحضرتك شرفت مدونتى جدا
متابعه كل ردود حضرتك عند ميجو ومشمش ومن موقعى هذا انشادك بعمل مدونة
:)
عزيزى امثال هذا الشيخ لم يروا فى المرأة سوى أنها سلعة يشتريها بالريالات تطبخ وتمسح الحمام واخر الليل تضاجع مولاها كى تنجب العيال
لذلك هو يفت فى طبق فتة كبيير منها يستفيد استفادة مادية ومنها حصر المرأة بلا تعليم ستات بلا وجع قلب هما يزاحموه فى الشغل وفى السوق وفى الاماكن العامة ليه
بلكونة ميجو ومشمش دى بلكونتى المفضلة من زمان ده انا حتى مش بحب شاى العصارى غير هناك
:)
مودتى واحترامى
Desert cat said…
oRiGiNaL HeArT
حاضر من اول البوست اللى جاى هكبر لك الخط
من عنيا
Desert cat said…
صفا
يا جميلة الناس دى قاعدة تفت فى الفضائيات
يعنى انا هتجاهلهم وانتى وغيرنا فى جهله كتير بيسمعوا لهم
شرفتينى يا جميله
ABOALI said…
المكان ده اسمه مدونتى الشخصية .. يعنى انا حرة اكتب فيها اللى بيعبر عن رأي اللى عاجبه اهلا وسهلا بيه يرد ينقض يشتم يعمل اللى هو عايزة واللى مش عاجبه فى اختراع اسمه علامة اكس فوق على اقصى اليمين .. إنما حد يفرض عليا اكتب ايه ومش اكتب ايه ابسط رد من تدخل فيما لا يعنيه نال ما لا يرضيه فرض الديكتاتورية ده هناك فى بيتك على مراتك او اولادك انما اوعى تفكر مرة تانية تفرض على حد مش يخصك ولا يعرفك اى حاجه تانى

مرة تانية من الواضح انك مش قريت البوست لمحته او مريت عليه مرور الكرام لانى لا غلطت حد ولا قولت على حد تانى صح .. فمش تقولنى كلام انا مش قولته
من الواضح ان حضرتك مش عارف الفرق بين الفتوى التى تلقى بصاحبها فى النار سبعين خريفاً وبين الاجتهاد
الذى يثاب عليه المخطأ والمصيب


كلام القطط

عندما تعرق الكلمات تظهر لها روائح
وعندما عرقت كلماتك
اظهرتك عصيبتك
وتحيزك السافر لرأيك
وانانية مفرطة فى دعم كل ما تكتبيه
ولكم ستكونى سعيدة بأن يهتف لك الجميع
ايه الموضوع الهايل ده
ايه الجمال ده
وستجدى غيرك كثيرون يطربونك بأجمل الالحان واعذبها
وستكونى سعيده ايضا لاءنى لن اقرء لك
ولكنى يا سيدتى لست ممن تعرق كلماتهم
سأعلق على ماتكتبيه ولك الحق ان تحذفيه ولكن كلماتى لن تحذفيها من ذهنك
فأنا لست الحزب الوطنى يهلل على ماهو ليس غالى ولا نفيس


تحياتى
Desert cat said…
ABOALI
الحقيقة يا فندم انا ردى مش عصبى خالص
انا بتكلم من منطلق انى صاحبة مكان وعاملاه علشان اكتب فيه اللى انا عايزاه
زى بيتى كدا الونه باللون اللى انا عايزاه
اغير فرشه فى الوقت اللى انا عايزاه
ومش من حق الجيران يفرضوا عليا لون معين ولا وقت معين لتغيير ما اشاء فى بيتى
وللاسف كمان نظرتك مش فى محلها بالمرة ان لازم الى يدخل هنا يهلل ويقولى برافوا احسنتى
لسبب بسيط جدا
انك لو رجعت للبوستات السابقه وشوفت الكومنتات
هتلاقى معارضين وهتلاقى اللى بيهدد وهتلاقى اللى بيتوعد وهتلاقى اللى بيشتم وهتلاقى اللى عمل اكونت مخصوص مشابه لاكونتى ونفس الصورة الرمزيه
يوووووووووه حاجات كتييييييير
وكلها موجودة عيانا بيانا للجميع
يعنى ادلتك باطلة ايها العزيز
طبعا تشرف فى اى وقت معارض او ناقض مش لازم تكون مؤيد
بالعكس انا احب جدا اللى يتناقش
لكن اكره جدا اللى يفرض عليا حاجه اعملها فى املاكى الخاصة
شرفتنى جدا
انا مندمجة اوى معاكى
واذ فجأتن افطس على روحى من الضحك
فى حتة ان الراجل مابيفكرش غير فى نصه التحتاني


بصى يا قطقوطة
الشيخ ده
بيقول انهم عثرة

هو مش بيقول على المنقبات وبس
لا هو بيقول على الحريم كلهم


وبعدين انا معرفش حكاية انك قلتى انهم زى اكياس الزبالة

انتى بجد قلتى عليهم كدة

طب ليه كدة

انا شايفة ان كل واحد حر فى لبسه

هى عايزة تلبس نقاب وتغطى نفسها بالكامل هى حرة

واحدة تانية عايزة تمشى عريانة هى حرة
لكن ماجيش اشبه اللى غطت نفسها
بانها كيس زبالة

امال اللى عرت نفسها خالص دى تبقى ايه
دى تبقى الزبالة نفسها مثلا؟


انا عن نفسى
مش بحب النقاب
بحس انه حاجز بينى وبين المنقبة


لكن كمان مابحبش البنت اللى لبسها خارج عن كل عرف وتقاليد
مش مشكلة انها تكون مش محجبة

بس على الاقل تكون حشمة ومتبنش مفاتنها



يعنى خير الامور الوسط



سلام يا قطقوطة

اختك خيخة

Popular posts from this blog

قميص دهشور

كل تحرش وانتوا طيبين