ألف مبروك ياباشا على البراءة !!!

من كل قلبى وكليتى وكبدتى وجميع اعضائى صدقنى ببارك لك على البراءة
انت اتظلمت معانا كام سنة والناس بتقطع فى فروتك وانت هربان بره البلد
ويقولوا ممدوح اسماعيل
قصدى ممدوح باشا اسماعيل قاتل اكتر من الف واحد
انا شايفه انك طالما اخدت براءة
ترفع عليهم قضية رد شرف لانهم شهروا بيك وسوأو سمعتك
شايفه طالما انك اخدت براءة
ترفع قضية وتطالب فيها بتعويض للسفينة اللى بوظها الرعاع وغرقوا فيها
وتطالب اهاليهم بدفع تعويض مادى وادبى عن قلة ادبهم وموتهم فى عبارتك اللى بسببه اتأذيت نفسيا وماديا





لما يموت اكتر من الف بنى ادم فى عرض البحر واللى تسبب فى موتهم ياخد براءة
يبقى اسمه اييييييه ؟؟؟؟
اه الف هنا وشفا للسمك





لما تكون دى مناظر ناس بدل ما تستقبل اولادها بالاحضان
رايحه تستقبلهم فى صناديق .... وفى النهاية القاتل ياخد براءة
لما الناس اللى نجيت من الغرق يتهربوا من مستشفيات الغردقة وسفاجا واهاليهم مش يعرفوا عنهم حاجه يبقى اسمه ايه ؟؟؟؟
لما طبيب يفقد اسرته قدام عينيه زوجته واولاده وفى الاخر القاتل ياخد براءه يبقى ده اسمه ايه ؟؟؟؟
لما مصرى يتهان بره بلده مش يشتكى لانه فى بلده مش ليه تمن
لما مصرى يغرق وهو هربان من بلده يدور على شغل اهله مش يشتكو ؟؟؟ لانه طماع رايح يدور على لقمة عيش حلال
لما مصرى يتسجن فى بلد تانية وحقوقه تضيع مش يشتكى ... ماهو فى بلده وجبه شهيه لسمك القرش ومالوش تمن ..
فى ستين داهيه دم المصريين الجرابيع اللى مالهومش تمن
المهم البهوات الكبار يعيشوا
مش مهم اطفال اتيتمت وستات اترملت وامهات اتحرق قلبها ... المهم براءه البهوات الكبار
اتكتموا يا مصريين مش حد يفتح بؤه
لاننا فى نظر حكومتنا ولا حاجه ... فى نظر قضاءنا ولا حاجه
لما اسرائيل تسلم اسرى قصاد رفات يبقى احنا حقيقى كلالالالالالاب ولا حاجه
الف مبروك يا ممدوح باشا
والف اهلا وسهلا بالقضاء الشريف النظيف العفيف
اللى بيدين القتيل ويبرء القاتل
مرحبا بقانون سكسونيا فى بلدنا ام الدنيا

Comments

احنا في بلد البطاطس
ازيك يا قطه الحراء
مدونتك حلوه جدا
وياريت تنروينى بالزياره

تحياتى
dr.lecter said…
يلعن ابو دي بلد

يلعن ابو دي بلد

يلعن ابو دي بلد

باقولها اهو حسبي الله ونعم الوكيل حسبي الله ونعم الوكيل

والله البلد دي عمر مهايبقي فيها خير اقسم بالله العظيم البلد دي اللي بيحصل لها حلال فيها

ايها المصريين البلد دي هتبقي مقبره لكم اطفشوا منها والله اطفشوا

انا مش عاوزز اموت في البلد دي ودمي يروح هدر

حرام عليكم ياناس بجد

1032 بني ادم ماتوا بسبب التستر

هتروحوا من ربنا فين

جفت الاقلام وطويت الصحف

لا حول ولا قوه الا بالله
يا ستميت اتوبيس ماشي
شايلين انفار
ايه يعني حتي يموت مليون
او كل الكون
ده العمر اصلا مش مضمون
والناس اعمار
احمد فؤاد نجم
الحمد لله خبطنا
Anonymous said…
طيب وانتى زعلانه ليه الى خد براءه باشا من ضمن البشوات اللى انت بتدافعى عنهم واللى ماتوا من الرعاع اللى انتى بتهجميهم يا سمو البرنسيسه
micheal said…
تحيا جمهورية المهلبية الشعبية
أعتقد اننا من الأفضل أن نناقش أحوال نادي الزمالك و الانتخابات فيه لان ده أكيد أهم من موضوع العبارة
تحياتي
لا حول و لا قوة الا بلله
ربنا اكبر من الكل...
هو العادل
يمهل ولا يهمل
افوض امري الى الله ان الله بصير بالعباد
مدونتك هايلة جدا
اما بخصوص براءة ممدوح اسماعيل فدا طبيعى انتى كنتى متخيلة انه هياخد حكم كان هانى سرور خد حكم البلد دى بتاع عز وسرور ومبارك وابنه وعائلتة بالكامل وطظ فى الشعب المصرى هو دا قانون عائلة مبارك لا تحزنى كثيرا
وعلى فكرة الغريبة ان لقيت معلقين مدونتك زعلانيين اوى هما لية كانوا متخيلين انه ممكن ياخد حكم وهو محمى فى عهد مبارك
تحياتى لكى مرة اخرى على مدونتك اللطيفة والجميلة
فى القلب said…
حقيقى أتخنقت عايزه حل
Blue Nile said…
بجد اكتئبت
رواح الابرياء مالهاش تمن في بدنا
الله يرحهمهم و يكون فى عون أهاليهم
و يكون فى عوننا احنا كمان
انا ساعات بقعد و أقول لنفسى
طالما احنا كدة كدة محدش شايفنا
و محدش حاسس بينا
و قيمتنا كل يوم بتقل عن اليوم اللى قبله
يبقى الناس ازاى تخلف عيال علشان يتعاملوا كدة ؟
عامة انا من دلوقت و انا عامل حسابى انى لو مسافرتش برة البلد ... مش هتجوز
تحياتى
البلد دي كوسة يعني مش شيئ جديد يا رب لو الشعب كلو مات بردو الي اتسبب في كده هياخد براءة..
أصلهم كلهم عصابة واحدة هو في حد بيحاسب ويسجن أخوه أهو دول كلهم اجتمعوا وتآخوا على الكوسة والسلطة..يسرقوا البلد وكلوا يشيل من على كلو ويغطوا على بعض ..والشعب يا عيني مسكين..لأا فيه حيل لا يجي شمال ولا يمين..
كل ودي لكِ
Misrdream said…
لا لا لا
هدي نفسك يا قطه
ارجعي معايا بالزمن لورا كده
وتصوري المشهد بتاع العباره ده
فى زمن ناصر بتاع الانقلاب
ايام مكان لينا كرامه ومكناش كلاب
كان عمل ايه فى ممدوح اسماعيل
متزعليش نفسك قوي وممكن تكون خطه حلزونيه من حكومتنا الرشيده علشان يرجع ممدوح ويحس بالامان وبعدين يقفشوه زي فيلم بوند الاخير
اقعدوا بالعافيه
MEDUS said…
صديقتى قطة الصحراء
ليس لى تعليق الا ان اقول لا حول ولا قوة الا باللة و حسبنا اللة ونعم الوكيل
الاغنية معبرة جدا جدا ومتناسبة مع الموقف اشعر اننى انسان احب مصر جدا زى كل المصريين لكن مش فاهم كل اللى بيحصل دا لية؟؟ ولمصلحة مين؟؟ حاجات كتير فى حياتنا اتسببت فى حيرتنا.. وادينا عايشن راضيين جايين ورايحين.. وتستمر الحياة والمعاناة
نحتاج للحظات مراجعة مع النفس
ومازال الامل موجود فلا يأس لان اليأس يعنى الموت ونحن مازلنا احياء
Anonymous said…
ده لنك مدونة واحد ملحد اسمها الباحث عن الله
www.elbahesofgod.blogspot.com
تم اختراقها وحذفها خالص من النت حتى جربى ادخليها
فاحذرى
قريبا سيتم اختراق مدونتك
amr said…
النائب العام طعن ياستي.... ادعي ان ربنا يحاسب اللي كان السبب...... في امل في ربنا
Desert cat said…
غمض عينيك
هى خلصت مرحلة البطاطس وبتحلى بالكوسة دلوقتى
Desert cat said…
الامبراطور
انا الحمد لله كويسه
يشرفنى يافندم ازور مدونتك
تحياتى
Desert cat said…
dr.lecter
النائب العام طعن فى الحكم يا دكتور
دعواتك يحصل حاجه تنصف الاهالى
والشعب كله
Desert cat said…
محمد حلمي مخلوف
والله معبرة على الوضع الحالى فعلا
Desert cat said…
Anonymous
اه تصدق نسيت
انا اعتذر لبلشوات
وفى داهيه الرعاع
مبسوط كدا
اكيد مبسوط
Desert cat said…
micheal
عبارة مين وميتين ايه
خلينا فى الاهلى
فاز امبارح 2/0
اشمعنا الاهلى والزمالك مش لعب غير امبارح
ليه مش كان اول امبارح
او النهارده مثلا
Desert cat said…
واحدة مفروسة
الجميع بيغلى من جوا
طيب والحل
ماتش الاهلى والزمالك
ممكن يهدى الناس شوية
لا املك سوى ترديد دعائك
افوض امرى لله انه بصير بالعباد
Desert cat said…
كريم البحيرى
ابتسم يا اخى فنحن فى عصر الاستهبال
القاتل ياخد براءة
والقتيل اهله ياخدوا اعدام

متشكرة جدا على الاطراء
وسعيدة ان مدونتى نالت اعجابك
تحياتى
Desert cat said…
فى القلب
ماهما حلوها على طول يا جميله
فى نفس يوم الحكم
ماتش للاهلى والزمالك
وبلاها خنقة
Desert cat said…
Blue Nile
ولاحد فى البلد دى ليه تمن
احنا اللى نستاهل
Desert cat said…
مهيج الجماهير
عيال ايه بقى اللى نفكر نجيبهم
اذا كان الكبار بياكلهم السمك ولا حد بيسال فيهم
Desert cat said…
كاتب مصري
اصلا الموضوع باين من اوله
علشان ايه قضية جنايات تتحول جنح
وتنظر كمان فى محكمة سفاجا
علشان معظم اهالى الغرقانين صعايده وهيكون المسافه عليهم بعيده
ومش حد هيروح
وبالتالى من حق ممدوح اسماعيل ياخد براءة مش ياخد ليه
هو المدعين موجودين اساسا
Desert cat said…
Misrdream
مين اللى قالك ان اللى حصل ده ومازال بيحصل مش تبعات لانقلاب ناصر
لو كان حصل فى عهده كان زمان اهالى الغرقى اللى كسروا المحكمة امبارح مرميين فى المعتقلات وحمزة وصلاح نصر طالقين عليهم الكلاب البوليسيه
Desert cat said…
Dear MEDUS
انا كمان اتسائل نفس الاسئلة
بس ياترى هنلاقى حد يجاوب
طيب يغششنا الاجابه
تحياتى
Desert cat said…
Anonymous
يا مرعب
Desert cat said…
amr
قريت خبر الطعن امبارح يا عمرو
ربنا يساعده

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز