ثـــــورة ولا انـقــــــلاب ؟؟؟؟؟

قررت الخروج من عزلتى ... قررت التمرد على ذاتى ... ولكن !!!!!!! وماذا بعد لكن ؟؟؟ لا ادرى
كنت اهرول بقوة وكانى تاخرت عن موعد مهم واود الالحاق به ... وعندما سالت نفسى .. هو انا بجرى كدا ليه ؟؟؟ كانت الاجابة الصامته .. انتى بتشغلى نفسك باى حاجه .. ولما مش لاقيتى حاجه قولتى تبذلى مجهود فى المشى باقصى سرعه ... وصلت منزلى مارست كل طقوسى اليومية بتمعن شديد ودقة متناهيه .... لا لشيئ فقط اريد إعمال عقلى ... اريده ان يتناسى ما قد كان لذلك قررت أرهاقه دون رحمة ... اتى صباحى مسرعاً غير ما كنت متوقعه تماماً ... ولا ادرى كيف حدث ذلك ... يمكن ارهقت عقلى كثيرا لذلك تناسى عامل الزمن ... تذكرته انه فقط من يستطيع أن يحتوينى فى مثل تلك المواقف كنت اسير فى طريقى اليه بسرعه وببطء لا احد يسير فى الشارع غيرى كنت مستمتعه جدا لذلك عندما كانت تسرع خطوتى رغما عنى انهرها كى لا تفعل ذلك مرة اخرى فانا اريد استنشاق عبير الصباح باكمله واود الاستمتاع بكل لحظة تشعرنى انى املك هذه الدنيا وحدى ... انانية اعلم ... ولكن اهلا بكل انانية العالم فى سبيل لحظة شعور بالحرية والامتلاك معا ... وصلت اليه ... اول ما رآنى اشاح بوجهه عنى ... يااااه للدرجة دى مش طايقنى ... زعلان منك علشان مش بتسالى ... طيب ما تسال انت ؟؟ ومين قالك انى مش بسال .. ابتسمت .. طبعت قبلة على وجنتيه اشعرتنى بحنان العلم كله .... نظر لى وابتسم ابتسامة ودوده واخذ يدى بين راحتيه وضغط عليها بكل قوته التى فى الحقيقة تساوى قوة طفل عمره شهرين ... ثم باغتنى بسؤاله ... فيكى ايه ؟؟؟ هو لازم يكون فيا حاجه علشان اجى ... اه انتى مش بتجيى هنا غير لما بتكونى بتدورى على نفسك .... غاصت عيناى فى ارضية الغرفه وصمت أو بمعنى ادق توهت ... تركنى داخل متاهتى ولم يقطع عليا صمتى ... وحينما طالت اللحظات نظرت اليه وجدت نظره احتواء لا مثيل لها داخل مقلتيه ... انا جاية اشرب معاك شاى ... هقوم اعمله .... داعبنى بكلماته ... معقول بقيتى بتعرفى تعملى شاى ؟؟؟ هتعلم فيك ... لا انا مش ناقص ادوية زيادة .... هو انتى اصلا بتعرفى تشربى نفسك كوباية ميه ... خلاص يا سيدى روح اعمله ... تسللت الى غرفه مكتبه امسكت برواية الاجنحه المتكسرة لجبران خليل جبران ... وحينما رآها .. ابتسم ابتسامه ذات مغزى .. اشمعنا دى اللى اخترتيها ... عادى وقعت فى ايدى .. ولا جاية علشانها ؟؟؟؟؟ لاء جايه علشانك .. طيب عينى فى عينك كدا ... لم اقوى ولكنى نظرت فى الرواية .. طيب ما تسمعينى بتقرى ايه ... اندفعت بدون تفكير .. واجبت .. تاهت خطاى عن الطريق .. ماذا أرى رحل المكان !!! مضى حمام الحى يخبط فى الظلام ... برق عينيه ... انتى متأكده ان الكلمات دى فى الرواية ؟؟؟؟ لاء مش فى الرواية ... امال جبتيها منين ؟؟ دى حالة هلوسة ما تاخدش فى بالك ... قولى لى فى ايه قلقتينى عليكى اوى ؟؟؟ فيه انى قررت اعمل انقلاب ؟؟؟
طيب بما اننا فى ذكرى ثورة يوليو ما تعملى ثورة احسن ... لا انقلاب هعمله على نفسى لكن الثورة بتكون ضد المستعمر ؟؟؟ حاولى توضحى ... زى مثلا عندك ثورة 19 اقدر اسميها ثورة .. وثورة الفرنسيين .. لكن ثورة يوليو دى اسميها ثورة انا بناء على ايه ؟؟؟ هى كانت ضد الحاكم ولا ضد المستعمر ؟؟؟؟ ما الحاكم برضه كان مستعمر ... لاء معلشى فى فرق انا قصدى المستعمر الانجليزى او الفرنسى او اى مستعمر .. لكن فاروق كان حاكم بصرف النظر كان ظالم او عادل ولو انى متاكده من تزوير صفحات التاريخ اللى صورته خمورجى وبتاع نسوان ... اصل لو قارنا بين مصرنا دلوقتى ومصر على ايامه شتان .. شوف الفرق بين الشوارع والنظافة والشعب نفسه والرقي .. ده حتى الفلاح كان اسلوب كلامه راقى لانه يحكمه ملك من اسرة ملكية مش شوية رعاع .... كانت مصر بخير وثرواتها محفوظة مش بتتباع للقطاع الخاص بابخث الاثمان ... ناصر واصحابه بدؤوا بالانقلاب ومعاه بدؤا بتبديد ثروات البلد مرورا بالرئيس المؤمن وصولا للرئيس المبارك واديك شايف الحال ..... لا معلشى انتى .. ناصر بنى السد العالى ... واعاد للعرب كرامته ؟؟؟ ناصر بنى السد العالى من خير مصر ... ناصر عاد للعرب كرامته .. مش الاولى انه كان يعيد لمصر كرامتها واذكرك بهزيمة 56 وصديقتها 67 اللتان تضاهيان هزيمتنا حاليا بقتل التطور الاجتماعى والاقتصادى ؟؟؟
طيب ان كان على ثورة يوليو فهى حصلت والملك اللى انتى معجبه بيه مشى وكل ده اصبح امر واقع ... لكنى ملاحظ انك لحد دلوقتى مش اتكلمتى فى اللى تاعبك انتى شخصياً ... لاء مفيش انا كدا استريحت خلاص ... انتى جاية ليه ؟؟؟؟ هو كدا وخلاص !! يعنى ايه كدا وخلاص ... يعنى انا ماشيه ... انتى جايه الساعه 6 الصبح علشان تفكرينى بالملكية وتحكى لى على الثورة هو انتى اعصابك تعبانه من سنة 52 اللى مش كنتى موجودة فيها اصلا لحد دلوقتى ودلوقتى بس استريحتى ؟؟؟؟ انا شايف معاكى برضه انك لازم تقومى تروحى والزيارة الجاية بلاش تبقى فى اكتوبر

Comments

السلام عليكم ورحمة الله وبركاته
اسعدنى انى اكون اول تعليق

بوست مميز ويدعو للتفكير والتامل

تحياتى
هههههههههههه حلوه اوي لكن بجد انتي رحتي ليه الساعه 6 الصبح العاع هيفضلوا موجودين استعجلتي ليه
فى القلب said…
بجدأستمتعت جداً

أفكار متلاحقه قوه فى الصوره تشد حوار عالى
وكلنا شوق للزياره الجايه
ماهو برضه معاه حق
حد يروح لحد الساعة ستة الصبح و يقوله انا عاوز اعمل ثورة ؟؟
هههههههههههههههههههه
عامة بوست جميل
و على فكرة انا سايبلك واجب عندى فى مدونتى ياريت تشرفينى و تاخدى الاسئلة من هنا
تحياتى
Heart Beat said…
الصديقة العزيزة جدا
Desert Cat

الله يرحم الملك فاروق ... و الله ساعات انا بقول ان جلالته مات من حسرته ... تخلي الشعب عنه و طرده من بلده على ايدين افراد من الشعب

و مع تتابع الوزراء و اسمائهم الكبيرة و كونهم شخصيات محترمة زي النحاس باشا الا ان ماحدش فيهم جت له الجراءة انه يطرد الملك

بس بقى اما المصلحة الشخصية بتكون هي الهدف ... دول مش يطردوا الملك و بس دول يولعوا في البلد و يقولوا اصل الشعب مش عاجبه الملك عشان كده الشعب حرق القاهرة

جلالة الملك فاروق قبل اي شيء فهو انسان يخطأ او يفعل الصواب ... زيه زي اي حاكم في الدنيا

لما الفساد يكبر و ماتنفعش السيطرة عليه يبقى لازم يحصل انقلاب ... انقلاب على الفساد و على الوضع الراهن و تغييره الى الافضل

انما تحصل ثورة و الناس تفتكر ان الوضع هايتغير ... و تلاقي اللي حصل هو نفس سيناريو الثورة الفرنسية...يعني انقلاب الوضع رأسا على عقب ... الملك يبقى مجرد من اي سلطة و العسكري يبقى رئيس و لواء ... كان لازم النتيجة هاتكون سيئة و اللي لسه متتابعه لغاية دلوقتي و لسه طبعا ياما هانشوف

لما الانسان يعمل انقلاب على ذاته يبقى ده معناه انه بدأ يعرف كم الاخطاء اللي بيرتكبها و انها لازم تتصلح ... ده اسمه انقلاب ... تحويل الامر من الشيء لنقيضه

انا اتكلمت كتير معلش

تحياتي
Anonymous said…
ديزرت كات
مش عارفه هكون ضيفه خفيفه ولا ايه اكيد انتى فاهمه قصدى
احنا معشناش ايام الملك ولا ايام عبدالناصر علشان كدا منقدرش نحكم عليهم والحياة من بيهم او من غيرهم هتكون ازاى
كلامك فى الجروب واضح وداخله فى الموضوع على طول
كلامك هنا يحمل اكثر من اتجاه واكثر من معنى الله وحده العالم بقصدك
بس لانه يحمل اكثر من معنى دفعنى للرد والتعبير بانك قوية جدا حتى فى اختيار كلماتك وكمان فى اختيار رواياتك
اصل مش اى حد يقرا لجبران وكمان الاجنحه المتكسره
no comment
بحبك من كل قلبى
ريهام
نونو said…
احلى قطة
بوستك طببعا تحفة وجمييل
ورقيق
وطببعا مش لاقية كومنت اقولة من جمال تعبيراتك
احلى قطة بجد
بصراحه بوست جميل جدا
وافكاره هايله بجد

مدونتك من المدونات اللى بسعد بالوجود فيها
استمتعت بقرائة البوست دا
mohra said…
اعترض على كل كلام الراويه باستثناء تسميه حركه 23 يوليو انقلاب لانها فعلا انقلاب و هذه ليست سبه بالمناسبه و اكرر اعتراضى الكلام مغلوط و ليس معنى ان الملك فاروق لم يكن سيئا للدرجه التى اشيعت عنه ان الملكيه افضل باى حال من الاحوال

و لا ننسى ان التاريخ يكتبه المنتصرون
fire bird said…
جميل جدا

ان يقوم الانسان كل فترة

بعمل انقلاب على نفسه

مش اى حد يقدر يعمل كده

بوستك جيلوتعبيراتك سلسة ومنمقة
gehad said…
بعيدا عن اختلافك او اتفاقك مع ناصر
انا شايف فى نقاشك مع احمد عبدالمنعم ووائل عباس انك متحيزة جدا لوائل مع ان وائل لسانه زالف
هو كان كفايه عليه واحد فيكو يعنى يا اما انتى يا وائل انما انتوا الاتنين كدا الواد الله يرحمه
ياريت تخلى الصداقة بينكو حاجه واختلافكو مع اى طرف اخر حاجه تانيه ولا انتوا ما صدقتوا تمسكو فى واحد ناصرى
جميعنا يعلم مدى كره الليبراليين لعبدالناصر لكنى شايف ان احمد مالوش ذنب فى كرهكو او حبكو ليه انتوا انتمائكو علمانى او ليبرالى هو انتمائه ناصرى المفروض الكلام او الاختلاف يكون
بعيد عن الجرابيع والرعاع يا استاذه حنان
Desert cat said…
فارس بلا جواد
شرفت اول تعليق
ميرسى جدا على كلامك
تحياتى
Desert cat said…
مثلية تبحث عن ذاتها
الاجمل من البوست هو ردك
والله انا لو اعرف الرعاع هيمشو ويسيبوا لنا البلد ده انا اروح الساعه 4 ولا اى ساعه المهم يبقى فى تغيير فى البلد
تحياتى
Desert cat said…
فى القلب
ميرسى اوى على ذوقك
بالنسبة للزيارة اللى جايه فانا شايفه انها ممكن تكون فى تحرير سيناء يوم عيد ميلادى يعنى
علشان ميكونش فى اى اعتراضات على اى حاجه حصلت اصلى بحب نفسى اوى
تحياتى
Desert cat said…
مهيج الجماهير
اولا ميرسى جدا على الواجب
وانا رحت فعلا وشوفته
بالنسبة للزيارة فهى كانت غير محسوبه والله لا تقريبا اللى بيحصل فى الفترة الاخيره ده كل غير محسوب
تحياتى
Desert cat said…
Heart Beat
صديقتى الغالية احلى دقة قلب

الشعب كان مغلوب على امره فى الفترة دى اعتقد ... شوية عساكر سموا نفسهم الظباط الاحرار وهما لا ظباط ولا ملوخيه
انقلابهم كان على البلد كلها مش على الملك بس ... لانهم السبب فى التخلف والغباء اللى الناس فيه دلوقتى ... الاهداف المزعومة اللى قالوا عليها موجودة فى وقتنا الحالى وبشكل مقزز جدا ... حنقول ايام الملك كانت اسره واحده بتنهب فى البلد .. دلوقتى كل مسؤل بينهب فى البلد احسبى بقى عدد الاسر اللى بتنهب فينا

انتى طولى وخدى راحتك
المدونة مدونتك
المهم سيبك انتى
انا مبسوطة جداااااا
عارفه ليه ؟؟
:)
اكيد عارفه
Desert cat said…
ريهام
انتى ضيفه خفيفه جدا
وطبعا تشرفى البلوج فى اى وقت
بس ارجو منك تلتمسى لى ولو عذر واحد
بالنسبة لايام الملكية او ايام ناصر
قارنى بين القاهره وشوراعها بلاش من خلال التاريخ لان تصوير التاريخ مش دايما صح ... وقارنى بين توابع الثورة اللى احنا عايشينها لحد دلوقتى
اقطاعيين موجودبن .. احتكار موجود ... فساد منتشر ومتفشى .. نهب وسرقه موجود ... وزاد كمان التخلف والجهل

زى ما قولت لك فى الاول تشرفى فى وقت
مودتى
Desert cat said…
نونو
ميرسى يا جميل
اخجلتم تواضعنا
:)
تحياتى
Desert cat said…
مواطن زهقان
ميرسى جدا لذوقك
وسعيدة ان المدونة نالت اعجابك
تحياتى
Desert cat said…
mohra
اعترضى زى ما تحبى
كلمة انقلاب حضرتك شيفاها مش سبه طيب لما هى مش سبه ليه الـ 28 عسكرى اللى سمو نفسهم فيما بعد بالظباط الاحرار سعوا جاهدين واعوانهم لقلبها لكلمة ثورة .. مع ان الثورة بيقوم بيها الشعب مش 28 شخص عينوا بعضهم فيما بعد لواءات ... الثورة لو فشلت مفيش مشكلة ... لن الانقلاب لو فشل العقاب محاكمه واعدام .... فعلا كلمة انقلاب مش سبه ...
حضرتك من خلال كلامك مش اجزمتى ان كل ايام الملك كانت خراب ودمار يعنى كان فيها حاجه كويسه طبعا بناء على كلامك .. طيب لصالح مين تزوير التاريخ وتصويره بتلك الصورة البشعه
.. بتعترضى على الرواية حقك .. طيب هى هزيمة 56 ونكسه 67 مش حصلت ؟؟؟
هى الرقابة على الصحف وعدم السماح لاى معارضه مش حصلت ؟؟؟
نهب اموال رجال الاعمال ..
دفع تعويضات لملاك الأسهم فى شركة قناة السويس تفوق ثمن أسهمها في البورصه و نالت إسرائيل حق الملاحة في مضيق تيران و إنتعشت إقتصاديا و تمرنت على الحرب مع مصر لتعود في 67 و تطبق الخطه نفسها لضرب الجيش المصرى وتدمير مصر بشعبها ماديا ومعنويا مش حصل ؟؟؟
فعلا التاريخ يكتبه منتصرون
تحياتى
Desert cat said…
fire bird
الواحد لو عمل انقلاب على نفسه كتير ممكن يدور له بعد كدا على محتل
انما يحاول من فترة للتانية يعمل مهادنة مع نفسه
اشكرك جدا
تحياتى
Desert cat said…
gehad
بص يا جهاد ياريت تفرق بين نقاشات الفيسبوك والمدونة
يعنى مش تدخل الدنيا فى بعضها
انا مش كنت حنشر ردك لانك ذكرت فيه وائل واحمد يعنى ممكن تروح تقول لكل واحد الكلام اللى انت عايزه
لكن اللى دفعنى لنشره انك خصيتنى معاهم بالكلام
فحبيت ارد عليك
اولا احمد هو اللى بدأ بالغلط ولو راجعت الحوار من الاول هتلاقى ان وائل كان بيتكلم محايد تمام ومش وجه كلام لاى حد بعينه ... واحمد فى اخر رد ليه هو اللى شتم وائل ... انا مش متحيزة لوائل انما انا اتحيزت لمنع التهريج ومواصله النقاش بادب وعقل

باقى كلامك مش هرد عليه لانه كالعادة
معارضه لشخصى وخلاص
gehad said…
انا رديت هنا ومرديتش عند محمد عشان ما ازيدش الوضع سوء
لان اى كلمة من اى طرف تانى كانت اكيد هتولع الدنيا
كلمة رعاع وجرابيع انتى بتكرريها كتير قولتيها فى جروب ظباط الشرطة واحد بيحكى حادثه حصلت له تدخلى انتى تقولى دى المعاملة المطلوبة للرعاع والجرابيع والظباط ولاد ناس يمكن نسيتى ردك دخلتى قولتيها فى جروب محمد البسيونى وقولتيها فى النقاش اللى كان بينكو فى النوت
مش قاصد اهاجمك انتى شخصيا انما تكرارك للكلمة كتير معناه انك انسانة مغرورة وبتبصى للناس من فوق مع انك عايشه فى وسطهم ولو انك شايفه نفسك احسن منهم وكل اللى حواليكى رعاع وجرابيع الحل انك تسيبيهم وتروح تعيشى فى وسط الليديهات والبهوات وتسيبى مكانك فى الشغل وفى السكن وفى المواصلات للرعاع والجرابيع
Misrdream said…
اجابة سؤالك
*هيه ثوره موش انقلاب على حاكم لان حتي الحاكم الشعب بيختاره موش بتورث ليه
*بالنسبه لمصر النضيفه ايام الملك فاروق
انا عن نفسي بحب بورسعيد الوسخه ايام مقاومة العدوان الثلاثي
*السد العالي اللى اتبني من فلوس مصر
موش من فلوس ناصر كويس ان فى حاجه من فلوس مصر اتعمل بيها حاجه لينا بدل ما تتصرف على حفله زي بتاعت افتتاح قناة السويس
* بالنسبه لكل اللى بيكرهوا ناصر وثورته اللى اسمها انقلاب فى نظركوا فى انتظار انقلابكم ضد جمال مبارك لما يورثنا وساعهتا هسميها ثوره موش انقلاب

تحياتي لخربشتك يا قطه
Goddess said…
This comment has been removed by the author.
Miso soup said…
الهروب من وقت للتاني مفيد لاستمرار المواجهة
mohra said…
هو كان انقلاب لكن اغلبيه الشعب كان بيأيده و طبيعى ان الاعلام يحاول يسميه ثوره دعايه اعلاميه يعنى
اما حرب 56 ماقدرش اسميها هزيمه و الا كانت سينا تحت الاحتلال من ساعتها ايا كان سبب انسحاب القوات المعتديه فده لا يعنى انها هزيمه لان فى الحرب بتستخدم كل اسلحتك حربيه او دبلوماسيه
و بعدين حتى لو فاروق لم يكن الاسوأ فده لا ينفي انه كان سكير و ذو نزوات صحيح كان بيحب مصر لكن كان بيحب عرشه اكتر ...كان فى ايام المللك مشكله اسمها الحفاء يعنى الفلاح ماكنش راقى و لا حاجه
الملكيه نظام ديكتاتورى يضع اى بلد تحت رحمه شخص لمجرد انه الملك
التعذيب كان موجود من قبل الثوره و ده مش دفاع عن التعذيب فى زمن الثوره لكن الناس مش بتتغير بين يوم و ليله و الثوره ماقامتش لترويج التعذيب اسا سا و لكن ده احد مساوئ الحكم فى مصر من ايام الفراعنه و حتى يومنا هذا
الحل مش فى مهاجمه الثوره اللى كان ليها اهداف مهمه كفايه ان نص اللى بيعلقوا على هذه التدوينه اتعلموا بفضل الثوره
اما موضوع 67 و اللى مانقدرش ننكر انه هزيمه بس ممكن نرد و نقول 48 كانت هزيمه و 73 كان نصر بس ده ما يبقاش كلام موضوعى
كلامك عن تعويضات اسهم قناه السويس مبالغ فيه للغايه
ما تقارنيش بين ايامنا ديه و بين ايام الثوره لاننا بعدنا جدا عن اهداف الثوره و اظن ان احنا دلوقت ملكيين لكن بدون القاب

اخيرا الاختلاف فى الرأى لا يفسد للود قضيه
تحياتى
Desert cat said…
gehad
ممكن تلقى نظرة يا جهاد على المجتمع من حولك علشان تشوف انا مدى الهمجية اللى بتحصل من الرعاع والجرابيع
اما اسيب مكانى فى السكن والشغل وكل الاماكان اللى ذكرتها دى علشان جربوع مثلا ؟؟؟
يعنى بدل ما نضف البلد نملاها برعاع وجرابيع ؟؟؟
Desert cat said…
Misrdream
برضه يا احمد مش ينفع غير ان يكون اسمها انقلاب
كل اللى بيحكمك اسمه حاكم سواء ملك او رئيس اسمه حاكم
ناصر بنى السد العالى من فلوس مصر
ماعندك دلوقتى المدن الجديده ومن فلوس مصر
تحياتى
Desert cat said…
Goddess
هاى يا جميل
اولا ميرسى جدا على شكل التمبلت ذوقك عالى فيه
ثانيا لا فاروق ولاناصر ولا الرئيس المؤمن ولا المبارك فارقين معاهم
لكن انا بتكلم ان فاروق كان بيحب البلد .. كان منضفها ... كان فى تقدم واضح ورقى بارز
انما ناصر ده كان ايه ؟؟؟
عسكرى صح ..
طيب بدأ بالانقلاب هو والـ 27 عسكرى اللى معاه أزاى ؟؟؟
عارفه ازاى
لو رفتى علاقته بـ ستيفن ميد
هتوضح لك الحقائق
مودتى
Desert cat said…
Miso soup
الهروب احيانا بيكون حل مؤقت
لكن الاهم من الهروب هو انك تواجه قرارك بنفسك
تحياتى
Desert cat said…
mohra
اهلا وسهلا بيكى
طيب يا مهره هو كان انقلاب بين 28 عسكرى والامر تم بينهم فى سرية ... يبقى الشعب كان بيأيده إزاى ؟؟؟؟؟

حرب 56 مينفعش نسميها هزيمة .. طيب ممكن نسميها برضه نكسة
وكل اسلحه حربية او دبلوماسية متدنيش الحق انى اروح اتحالف مع جيفر سون كافري مثلا وامحى اى منشور مكتوب فيه عبارة الاستعمار الانجلو أمريكي واكتفى باستخدام الاستعمار البريطانى لتيم ما اتمنى ؟؟؟
وبعد ما انول ما اتمنى مش مهم البلد خليها تحت الاستعمار هو جديد عليهم مثلا ده شعب رعاع
فاروق كان سكير وبتاع نزوات بناء على ايه ؟؟؟
كتب التاريخ
طيب ليه دكتورة لميس جابر لما حبت تعرض المسلسل بتاعها اترفض من التلفزيون المصرى 4 مرات
واتعرض على الفضائية ونجح
مش اعتقد ان ده اسمه تزوير فى التاريخ اللى بيدونه اشخاص يعنى يدونو اللى على مزاجهم ويتناسوا اللى على مزاجهم برضه ؟؟؟
...يمكن الفلاح كان حافى لكن معاملته على الاقل كان فيها رقى ... مكانش فى الالفاظ وقواميس المصطلحات المخترع حديثاً .. بدليل اننا فى ظل الغوغائية والهمجية الموجودة دلوقتى بنتفاجأ كل يوم بمصطلح جديد كله دلالات متخلفه وايحاءات غبية .. ايام فاروق كان معروف يعنى ايه رجوله ... لكن دلوقتى ساد الرعاع
التعذيب كان موجود من قبل الثورة معقول ؟؟؟
طيب لما هو موجود من قبل الثورة ليه ناصر استورد ادوات تعذيب للسجون ؟؟؟
الا مدير السجن الحربى وقتها حمزة البسيونى كان اسمه ملك التعذيب واستمر فى تعذيبه الى ان مسك السادات الحكم وقبض عليه .
ليه ناصر ارسل ضباطه للتدريب على وسائل التعذيب وكافة طرق التعذيب فى المانيا ...
الا مفكرش يبعتهم يتعلموا ويدرسوا هناك على الاقل نص الناس اللى ردت هنا بالعربى فى التدوينة كانت ردت بالالمانى وادينا كنا اتعلمنا لغات
بالنسبة لكلامى عن تعويضات اسهم قناة السويس فهو من مراجع بالمناسبة وتاريخيه لو حضرتك عندك ما ينفيه انا فى انتظاره

اتفق معكى جدا ان الاختلاف فى الراى لا يفسد للود قضية
شرفتينى جدا
واتمنى دوام التواصل
مودتى
مؤمنه said…
السلام عليكم ورحمة الله وبركاته
ثوره ولا انقلاب مش مهم المهم فى تغيير هيحص هو دى المهم
ربنا معاكى
ربنا يرحم الملك فاروق
والسلام عليكم ورحمة الله وبركاته
اممممممممممم

لا هى ثورة مش انقلاب

هى ثورة عشان نجحت

ولو كانت فشلت كانو هيقولو عليها ارهاب وكان زمان جمال عبد الناصر ارهابى ومتطرف دلوقتى

بس هو القدر بقى

انا اتمنى انى كل مصرى يعمل ثورة على ذاته ويغير منها
ماعلينا

مدونة جديدة بفكرة جديدة هدفها
تكريم افضل من دون الشعر الرومانسى

فى بلوجر سمتها

الرسائل الرومانسية

ده لينكها اتمنى الزيارة وابداء الرأى فى الفكرة

http://romantic-messages.blogspot.com/

تحياتى وتقديرى
mohra said…
مازال عندى كلام كتير و عندى رد لكل كلمه قولتيها و انت كمان هيكون عندك رد على اى كلمه هاقولها احنا على طرفى نقيض انت متحامله للغايه على الثوره و مناصره للملك فاروق و انا باحمد ربنا ان الثوره قامت و زعلانه اننا بعدنا عن طريقها كتير
الحوار مش هايجيب نتيجه على ما اظن
و فى النهايه انا ضد الملكيه على طول الخط حتى لو كان فاروق ملاك نازل من السما مش موقف شخصى ضده
تحياتى
قصاصه said…
بوست رائع يا حنان مع اختلافى فى التحليل لكن تشكيلك للحظه النفسيه وتوضيحك للفكر الداخلى فوق الرائع تحياتى
مبدئيا يا قطتي
صباحك سكر

تعالي بقى انا طبعا فطست على روحي من الضحك انتي بتعملي حاجات شبهي لي أوقات غريبة بتجيلي فيها أفكار تؤرقني مع نفسي كده :)
23 يوليو هو انقلاب عسكري مش ثورة بس الشعب كان مضغوط ساعتها ..

الفكرة ان الملك كان موجود ومعاه الإحتلال

لكن فعلا لما قريت التاريخ الف مرة عرفت إن الملك كان أرحم من الحالي

عبد الناصر بالنسبالي اختلف معاه ومااكرهوش

يعني سياسته كانت مش سياسة هو كان بيحكم بمنطق الكبير مش بالسياسة

لكن على الرغم من اختلافي التام معاه لكن هو كان بيفكر في العروبة ..

...
بس يا جميلة البوست هاااااااااايل فعلا ..
أهلا desert cat

مشكلتك ايه بالظبط ؟؟
التعريف ثورة أم إنقلاب؟؟ ام ما أتى فيما بعد؟!!

طيب انتى شايفاه إنقلاب؟ هل الإنقلاب ده كان على حكم شرعى سليم ؟او حاكم جماهيرى محبوب؟؟
حاكم ليس أصلا منتمى إلى عامة هذا الشعب
حاكم اصله خواجة وشه أحمر.. والجد الرابع ليه ألبانى..(مع تقديرى لبعض أفراد الأسرة العلوية)
يعنى مطلوب سيادتك مثلا إننا نفضل تحت رحمة خواجات ييجوا يتعلموا فيناويحكمونا مرة باسم الاستعمار ومرات باسم الدين والإسلام ,ويورثونا !!

وبعدين ماشفتكيش يعنى ذكرتى الشعب دوره ايه فى الموضوع .. يعنى الشعب بيحب فاروق المعظم ولما الجيش اتحرك قالوا لأ احنا بنكرهه؟!!

يعنى شايفك مطلعة الشعب من حساباتك..
اللى عاشوا الفترة دى كانوا برضه مستنيين حاجة هتغير الوضع , كان الوضع ملتهب غير مستقر,,وكان فى سخط عام على الحاكم والوضع كله...

الجيش برضه اتهزم من عصابات إسرائيل فى 48 ومش عارف ليه ماذكرتيهاش رغم انها أس البلاوى,, ومسكتى بس فى 56 و67 وكأننا قبلها كنا زى الفل,,

وأنا واثق برضه إن ناصر لو تجنب الحروب كان زمانك بتتهميه بانه ماعملش حاجة علشان فلسطين!!

وبعدين برضه لو شفتى أفلام الخمسينات والستينات بعدالثورة كنتى هتلاقى الشوارع النضيفة والتاكسيات اللى تشاوريلها تقف, والتعامل الذوق,, وجماليات كتير,,,

والمجارى ماظهرتش إلا فى أفلام السبعينات!! (ملحوظة ليس إلا)

اما حكاية الرعاع فماعرفشى حضرتك تقصدى مين تحديدا,, لأنى قريتها فى التعليقات لكن ماوصلتش للمصدر..

بس ياريت تتجنبى التعليقات الطبقية دى لأنها مبالغ فيها شويتين وبتفقد الإنسان حياديته!!

ماحدش اتولد ملك ولا كتابة D:

تحياتى وإحترامى
ثورة و انقلاب
جميل ان الانسان يثور على نفسه و يحاول يطرد الاشياء الخطأ (المستعمر)و يحل محلها افكار سليمة ايجابية

---
لا اظن اني ممكن احط ايدي في بق سمك القرش و لا انقذه لانه في الاصل مؤذي يعني مثلا انا ارحم قطة او كلب او عصفور لكن لا يمكن ارحم نملة عمالة تقرص فيا و مجنناني
---
كنت اتمنى في حلقة طهقانة و السكرتيرة ان تذكروا اسمي الحقيقي(عبير عبد الشافي)و استغربت قوي انكم ذكرتم اسم الزميلة العزيزة بنت القمر الحقيقي و كانت احد المعلقين و لم تذكروا اسمي
--
اتمنى تزوروا مدونتي الثانية كلبوزة لكن سمباتيك
http://kalbozza.blogspot.com
مع جزيل الشكر

اوروفوار
Desert cat said…
مؤمنه
عليكم السلام ورحمة الله وبركاته
فعلا مش مهم المسمى المهم انه يحصل تغيير ويكون للاحسن
مش تغيير يسلبنا حريتنا
مودتى
Desert cat said…
مدحت محمد
هو علشان نجحت لازم يكون اسمها ثورة
الثورة معروف اللى بيقوم بيها الشعب يا مدحت مش كام شخص
ولو كان الانقلاب فشل كان زمان عبدالناصر تم اعدامه
اصل ايماهم مصطلح ارهاب تقريبا لسه مش كانوا عارفينه
الف مبروك المدونة الجديدة
:)
تحياتى
Desert cat said…
mohra
انا مش متحامله على الثورة لانها من الاساس مش ثورة
انا متحامله على تبعات انقلاب ناصر
عموما مفيش حد ملاك كلنا بشر حتى جلاله الملك فاروق اللى انا فعلا بكن له شخصيا كل احترام حتى بعد مرور كل هذه السنوات على وفاته
الله يرحمه
تحياتى
Desert cat said…
قصاصه
اختلف معايا براحتك
بس زى ما قولت لك قبل كدا خلى الاصابات تيجى فى الرجل بلاش فى العقل
:)
ميرسى جدا لكلامك
احتراماتى
Desert cat said…
د\أسماء علي
صباح الفل يا دكتورة

طبعا صدفة جميلة وسعيدة جدا اننا نتشابه فى مواقف

طبعا كلامك ان الانقلاب وتبعاته انا متفقه معاه انا كمان اختلافى مع ناصر مش شخصى لكن اختلافى مع ادارته لدولة وهو كان الزعيييم
:)
شرفتينى جدا يا جميل
دمتى بكل ود
Desert cat said…
عمرو (مواطن مصرى)
عمرو اهلين

بالظبط مشكلتى ما هى اتى فيما بعد بالفعل

الملك فارق كان محبوب يا عمرو لكن مشكلته انه كان موجود فى وقت الانجليز كمان موجودين فيه

بالرغم من كل اللى ذكرته وانه جده كان البانى الا انه كان بيحب مصر ويكفى انه كان ملك مصر والسودان ويكفى انه محبوب فى الوطن العربى كله
الملك فاروق كان بتاع نسوان وخمورجى ولنفرض .. ما عبدالحكيم عامر كان صاحب برلنتى
وصلاح نصر كان صاحب سعاد حسنى
وصديقهم الكبير اوى اوى ناصر شايف وعارف وساكت ...
لو جينا قارنا الوضع المالى لمصر كانت مداينه اكبر دولة فى العالم ... بعد الانقلاب الميمون بقينا مديونين لطوب الارض ...
ايام الملك مصر كانت الدولة الام ... بعد الانقلاب الميمون مصر مكروهه بين كل البلاد ... وليس ببعيد الصحفى الكويتى اللى شتمنا فى جريدة الوطن فى مقالين متتالين لاء وكمان سعر المصرى بسعر غساله كورية ... ولو قولت لى دى حاله فرديه هقولك ادخل على اى صفحه شات واتكلم مع عيل من بلاد الخليج وشوف رد فعله هيكون ايه عن المصريين ...

اقولك انا مش ذكرت الشعب ليه
لان حريق يناير 52 كان قبل انقلاب ناصر النار استمرت فى شارع فؤاد 3 ايام ... مش حد اتحرك
لان الجميع كان له هدف من استمرار النار دى تحرق الاخضر واليابس

الملك كان راضى عن الحريق لاثبات عجز الوزارة الوفدية عن إدارة البلد

الوزارة الوفدية كانت راضية عن الحريق لاقلاق الملك

ناصر ورجالته كانوا راضين عن الحريق
لرغبتهم فى إشاعة الفوضى وكمان مبرر قوى للانقضاض على الحكم
عايز الشعب يعمل ايه وبلده كانت بتولع من كام شهر وكل واحد من المسؤلين مش هامه البلد اللى بتولع علشان عايز يهز صورة التانى وخلاص

بالنسبة لهزيمة 48 عندك عدد جيش مصر وسوريا ولبنان والعراق كان 21 الف ... مقارنة بقى بجيش اسرائيل كان 65الف إذن هما المقارنة ظالمه ولا وجه لأى مقارنة .. بخلاف الاسلحه الفاسدة .. بصرف النظر كمان عن الخيانة اللى حصلت فى الوقت ده ... اذن لا وجه لمقارنة 52 ، 67 بـ 48

ولو ناصر كان تجنب الحرب مع فلسطين مكنتش اقدر اتكلم لانه رئيس مصر مش فلسطين
بالنسبة للشوارع النضيفه والذوق وراح فين بعد الخمسينات ؟؟؟؟
لو مش ناصر واعوانه استولوا على اموال رجال الاعمال ووزعوها بلاش الرعاع علشان مش تزعل
كان بقى حالنا كدا
العيل اللى فى جيبه جنيه بيتنطط بيه على خلق الله وهو فى الاخر تلاقيه عواطلى ومش بعيد يكون مستلف الجنيه اللى فى جيبه

كلمة الرعاع اه انا كررتها .. وقصدى بالرعاع او الجرابيع او اى تعريف ليهم المرتزقه اللى قبلوا على نفسهم فلوس حرام ... اخدها ناصر من ناس تعبت وشقيت علشان تكون ثروة وهو وزعها عليهم بدون وجه حق وبدون تعب او مجهود بذلوه ... يعنى واحد صايع او خمورجى او ايا كان مش تعب ولا اشتغل ولا بذل اى مجهود واخد شقى واحد ممكن يكون مش كان بينام ليله علشان يكون مستقبل ليه ولاولاده

اتفق معاك ان مش فى حد اتولد ملك ولا كتابه
لكن فى حد تعب واجتهد لحد ما كون ثروة
وفى الاخر جه حد استولى عليها

احترامى وتقديرى
Desert cat said…
bastokka طهقانة
اهلا وسهلا بيكى يا جميله
بالنسبة لاجابة سؤالك انا نقلت الكومنت كله فى مدونة البرنامج
بالنسبة لعدم ذكر اسم حضرتك الحقيقى
فحضرتك مش قولتيه اصلا غير بعد ما الحلقة اتسجلت وبعد كمان ماعرفنا حضرتك بمعاد اذاعة الحلقة
بالنسبة لبنت القمر كانت كاتبه اسمها الحقيقى فى بوست قديم قبل اذاعه الحلقة
اتمنى اكون وضحت لحضرتك
مودتى
قطتى الجميله
عامله ايه
مرسى لسؤالك عليه وانا غايبه
شوفى يا ستى انا قلتلك قبل كده انى يساريه
نفسى احس بالعدل فبلدنا احس ان المواطن المصرى عايش حياه انسانيه مش حياة القطط والكلاب الضاله
انا بحب عبد الناصر عارفه ان فيه حاجات كتير عملها كانت غلط
بس انا شايفه انه كان بيحب مصر
بيحب المصرى
وده يشفعله عندى
كفايه ان لا اولاده ولا مراته قرفوا المصريين فى عيشتهم
كمان مصدقه انه لو كان عاش اكتر من كده كانت مصر بقيت احلى من كده
ميهمنيش هى كانت ثوره ولا انقلاب
يهمنى انهمكنش غرض شخصى
طولت عليكى
تحياتى
على فكره فى بوست فيه صورتى انا وجوزى
تعالى شوفيه
Desert cat said…
قلوب بتغنى
تصدقى بالله لا اله الا الله سيدنا محمد رسول الله
ان انا كنت حالا بفكر ادخل مدونتك

ايا كان انتمائك او اتجاهك
مختلفين او متفقين
مش هيقلل ابدا من حبى واحترامى ليكى
جايه حالا اشوف الصورة
:)
تحياتى يا جميل
انا بضم صوتى لصوتك
انا بحب الملك فاروق
على الاقل ايامه الجنيه كان له قيمة
و بعدين كان هو صاحب البلد و مفيش حد بيسرق نفسه
يعنى ما كنش بيسرق البلد لانه عارف انها اولا و اخيرا فلوسه
ــــــــــــــــــــــــــــــــ
اما بقى اول البوست جامد جداااا
و الله حتة رومانسى موووز موووز موووز
و البوست كله جامد
الله عليكى
تحياتى
اسلام
Desert cat said…
مواطن مصرى نايم
وهو التدهور الاقتصارى واننا ندين للى يسوى واللى ميسواش ده من شوية
ماهو كل واحد بيقلب اللى يقدر عليه
لدرجة ان الناس مش لاقيه رغيف العيش
الله يرحم ايام الملكية والملك نفسه

اما اول البوست
فميرسى جدا جدا على الموووووز
شرفت البوست والمدونة كلها

تحياتى
nody_1987 said…
يا قطتى
يخرب عقلك بتهاجمى الناصرجيه وقبل كده الاسلامجيه
يا بنتى حرام عليكى نفسك
ها يهدروا دمك
هههههههههههههههههههههه
احيكى على ثاقفتك وقراءتك للتاريخ المحترم
انا يا حبيبتى سهرت اتفرج على التلفزيون ليله 23 يوليو
وجالى مغص من الى شفته
ال يا ختى عبد الرحمن الابنودى بيقول ان كل المناضلين الى بيقفوا يتظاهروا عند نقابه الصحفين مستنين
ناصر
شفنتى والنبى
وماتزعليش لو اى واحد ناصرى زعلك يا قمر
دول زى اليهود بالظبط فى تزوير التاريخ


تحياتى
Desert cat said…
nody_1987
هما ممكن يقعدوا فعلا يهددوا ويتوعدوا لكنهم مش يقدروا يهدروا دم ناموسه
بالنسبة لكلام الابنودى ضحكتينى والله يا نودى
قال مستنيين ناصر قال
تمخط الجيل فولد فأرا
أهلين بيكى

موضوع حب المصريين والعرب للملك فاروق ده محل شك شوية,, وماينفعش يذكر على انه مطلق كده..

كونه بيحب مصر لا يستقيم مع كلامك عن رضائه عن حريق القاهرة, نكاية فى الوفد...

وضع مصر ماكانش مهين فى عهد الثورة او بمعنى أدق فى عهد جمال بالعكس, كان المصرى محل الانظار فى أى مكان بيروحه, وكان العرب بيتعلموا من المصريين كل شىء,, واحنا عايشين انهاردة على حس صورة المصريين الطيبة اللى موجودة من عهد جمال عبد الناصر,,

فرجاء عدم خلط الأوراق بما نحن عليه الآن,, الصورة السيئة والوضع المهين اللى احنا فيه مابتداش الا مع سنين السبعينات القبيحة وعودة المصريين من الخليج محملين بأفكار البدو,,,
قبل كده كانت مصر بتبعت مهندسن ومدرسين للدول العربية كنا بنسيب فيهم أثر ونرجع زى ماحنا من غير مانربى دقوننا ولا نمسك المروحة والفيديو واحنا راجعين...


ناصر ماكانش له ايام حريق القاهرة أى يد يقدر يتدخل بيها فى حريق القاهرة سواء بالرضى أو بالرفض,, ولذا فكلامك عن رضائه عن حريق القاهرة من قبيل التخيل ليس إلا...

_شايفك بتلتمسى العذر للجيوش العربية فى حرب48 رغم انها أسهل الحروب على العرب من حيثضعف العصابات اليهودية والتى كانت بمثابة جيش غير نظامى , ولم يكن الوضع قد استقر بعد بالنسبة لاسرائيل ,,
ولم تذكرى مسئولية الملك عنها, ومررتى على عنصر الخيانة سريعا!!!

الثروة اللى وزعها ناصر على الفلاحين والفقراء وبنى لهم القطاع العام هى حق أصيل للمصريين
, لأن دى أصلا ثروتهم هم وليست ثروة الخواجات اللى هنجوا مع الارستقراطية المصرية وعملوا مايشبه الاقطاع ,,

وبرضه اللى انتى قلتى عليهم عواطلية هم اللى كانوا بيشتغلوا فى ضياع الأثرياء ,يعنى ثروات الأثرياء من عرقهم هم ...

وقبل الثورة برضه كان أى كتكوت طلع لقى أبوه عنده أطيان كان بيبقى جاهل ويحس انه بنى آدم ويتنطط على خلق الله علشان ثروة أبوه وأعتقد هنا يكون وصف هؤلاء المناسب أكثر من الرعاع بكتير!!!!

_حصر الثروة فى فئة ما ليس معناها أنهم قد اجتهدوا فيها ولكِ مثال فى احمد عز الآن ,,برضه هييجى يوم وهتسمعى ناس بتقول عليه شقى وتعب فى تكوين ثروته!!!!!!!!

تحياتى وإحترامى
وصفك لاحاسيسك عالى جدا وعميق
واتأثرت بية جدا
والاغنية كمان جميلة اوى
ربنا يسعدك

دومت بخير
dr.lecter said…
ممتنع عن قول ابداء رايي في الثوره وتوابعها لكن زي مافي ناس قالت ده كان انقلاب عسكري مش ثوره كان حركه فرديه مش بموافقه جميع فئات الشعب

وبس كده علشان ماحدش يرميني بكلمتين
مياووووووو
عاملة ايه

اولا احب ان اسجل اعجابي بالحكاية واعتقد ان شأنها شأن كل الحكايات ليس لها مراجع

اما عن قصة الثورة ومالها فهي قصة كبيرة جدا علي ان يتم ابداء الرأي فيها مرسلا وفق تصورات وايحاءات لسنا متأكدين من صحتها

لكن علي الاقل اريد ان اقول ان ما اود - ونود كلنا -ان نراه الان كنا نستطيع ان نراه بعد الثورة


عمال يحصلون علي حقوقهم ويحيون بكرامتهم
فلاحين يمتلكون اراضي منذ قرون ويحصدون من خيرها
علماء تهتم بهم الحكومة وتوفر لهم كافة السبل لابداعهم
ونظام يحكم ينوب عن شعبه في عدم بيع القضية الفلسطينية وتكفينها معرضا للكرسي من تحته للزلازل (لا احد ينوب عنك الان)ه
ومعدل نمو للاقتصاد يتعدي 6%وهذا بعد النكسة لا قبلها (ونحن نشهق فرحا اذا ما تعدي 2%ه)ه

عموما ما اتحدث فيه هو الاولويات لكل عصر..وبعد ان رايت من هذا العصر ما يكفيني ذهبت للضريح الكائن في منشية البكري وقرأت الفاتحة باخلاص..لاني لا اتمكن من تقبيل رأس صاحب الضريح !ه
سمراء said…
لمستني كلماتك
يبدو اني ايضا احتاج الى ان اقوم بانقلاب علي نفسي
وثورة على اوضاعي
وانتفاضة ضد المعرقلين لنموي وسعادتي
اتمني لك ولي النجاح
سمراء
Desert cat said…
عمرو (مواطن مصرى)

اوكى موضوع حب المصريين مش هتكلم فيه على المطلق .. بالرغم من انه كان جده البانى وكانت مربيته انجليزيه الا انه اتعلم العامية المصرية حباً فى مصر ... بالرغم من انه من اسرة مالكه والمفروض انه له بروتوكلات بيتعامل على اساسها الا انه كسر كل البرتوكولات الملكية ... فاروق كان بيمشى فى الشارع براحته وكان بيشارك المصريين حفلاتهم ... مش بيتحرك فى مصفحه فى وسط حراسه مشدده ... اعتقد ان كان له شعبيه مش عملها اى رئيس منتخب ده اذا كان ناصر اساسا حد انتخبه غير صحابه الـ 27 عسكرى ..

ما الوفد كان بيحب مصر .. وناصر واصحابه عملوا الانقلاب وقالوا علشان بنحب مصر مش حد فيهم اتحرك ليه ؟؟؟
ناصر مش كان ليه ايام حريق القاهره لكن كان ليه فى الانقلاب
يعنى الشهور القليله اللى سبقت الانقلاب كان مش يملك ولما خطط هو واصحابه للانقلاب كان بيحبها ويملك شيئ ؟؟؟

مصر بدأت فى الإنحطاط الحضارى والإقتصادى من بعد الملكية ...
الجنيه المصرى كان بيساوى 4$ دلوقتى الجنية المصرى قيمته كام ولا ايه ؟؟؟
احترام الشعب احنا فين منه ؟؟ تفتكر لو كان الملك اخد قرار ورئيس الحكومة اعترض عليه كان ممكن يتنفذ ؟؟ طيب من بعد الثورة كان الاراء بتتنفذ ازاى ؟؟ كان ناصر بياخد رأى شعبه ولا رأى عبدالحكيم عامر وصلاح نصر ؟؟؟
طيب لما كان بيحترم شعبه .. ليه سجن محمد نجيب بتهمه انه ضد الثورة .. ليه امر طيار حربى بضرب النار على طلبه بيتظاهروا ضده ؟؟؟
مش المفروض انه بيحب الشعب وبيحترمه

ايام الملكية تفتكر كان فى مصرى يسيب ارضه ويسافر دول الخليج علشان يرجع بدقن وجلابيه مينى وفيديو ومروحه ؟؟؟؟

انا مش بلتمس عذر لـ 48 لانى مش قولت مبرر
لكن انا قولت حقيقه
عدد الجيوش كان لا يقارن ازاى هتقارن 21ألف بـ 65 ألف ده كدا ظلم بين
الخيانة انا مريت عليها لانها كانت من الدول العربيه ومش ينفع احدد اى دولة عربيه لاننا كلنا وقتها كنا فى الهوى سوا يعنى مقدرش اقول فاروق اللى كان خاين وهو كان يتمتع بحب مصر هخونه ليه ؟؟؟

ثروتهم منين يا عمرو
ايام الملك كان الغنى غنى من الاجداد والفقير فقير من الاجداد ... يبقى ثروة الفلاحين منين ؟؟؟
مش معنى انه فلاح اشتغل فى ارض لمدة 10 سنين مثلا يبقى من حقه يشارك صاحبها عليها .. ده قانون اللصوص يا عزيزى

يبقى ازاى ناصر يدى نفسه حق يسلب تعب ناس وحقهم ويوزعه على شوية رعاع

طيب من ايام الانقلاب الميمون مش موجود إقطاع ؟؟؟
مش موجود احتكار ؟؟
مش دى كان من ضمن اهداف الانقلاب ؟؟
ازاى احلل مال ناس تعبت واخده لنفسى واقول ده حقى اصلى اشتغلت فى اراضيهم

وقبل الانقلاب ما عندنا نموذج الملك فاروق اهوه ابوه كان ملك
وكانت مربيته انجليزية وبالرغم من كدا مش كان بيتنطط على خلق الله
وكان بيشارك الناس حفلاتهم واجتماعاتهم

الاهو عمرك سمعت عن ملك عمره 17 سنة
ده دلوقتى الواحد بيكون عنده 30 سنة وتلاقيه مش قادر ياخد قرار لنفسه

انا مش حصرت الثروة فى فئه
لان الفئه دى مش اخدت فلوس حد وقالت دى حلالى اصلى اشتغلت فى ارضهم

مودتى واحترامى
Desert cat said…
احلام اليقظة
ميرسى يا جميله
ده انتى اللى احساسك عالى علشان كدا حسيتى بكلمات الاغنية وبالكلمات اللى كتبتها
مودتى
Desert cat said…
dr.lecter
يا دكتور اتكلم براحتك
ده حتى لسه مش خصخصوا الكلام
الله اعلم بكره بقى اللى جاى
ماحنا لسه فى توابع الانقلاب
تحياتى
Desert cat said…
تايه في وسط البلد
انا شايفه معاك العمال اللى واخدين حقهم ومتمتعين بكافة حوافزهم مش فى اعتصامات ولا اضرابات ولا اى حاجه ابدا
كمان الفلاحين اللى اخدوا الارض الزراعية من اصحابها بدون وجه حق وبعد ما كان القطن المصرى طويل التيله بقى قطن بيدود فى الارض وهو اخضر .. والقمح بقينا بنستورده ورغيف العيش مش لاقيينه... والفلاح جرف الارض اللى مش تعب فيها طبعا وجت له على المرتاح وبنى عليها بيت مش اقل من 3 ادوار وراح بلاد الرمال راجع لنا بدقن وجلابيه مينى
مش تنسى وانت فى الضريح تقرى الفاتحه وتقول لمولانا الشيخ امانة من قطة الصحراء
:)
تحياتى
Desert cat said…
سمراء
اجتماع 3 كلمات الاعتراض لو نفذناهم واحنا مؤمنين من جوانا بالتغيير هنتغير
ربنا يوفقنا جميعا
مودتى
DESERT CAT

أهلا بيكى تانى للرد على كلام سيادتك D:

مشاركة فاروق فى الإحتفالات لإفتتاح أو إحتفالات دينية كانت عملية بروتوكولية بهدف إستعراض الانتماء الدينى له وبهدف التقرب من الشعب التقرب المعنوى لكسب أرضية ودى نقطة موجودة من أيام الحاكم الفرعونى ابن الإله اللى كان بياخد الكاهن جنبه لتأييده وحتى أيامنا الحالية من وجود شيخ الأزهر وبابا الأرثوذكس بجوار الرئيس فى المناسبات الرسمية بهدف إثبات الشرعية وتأييد السماء (لعبة قديمة يعنى)


_ثانيا لم يعرف عن عبد الناصر ركوبه مصفحة وأراكى تخلطين كثيرا بين ناصر ومبارك فى المظاهر والسوكيات..

صور بالعشرات لعبد الناصر فى عربات مكشوفة يمكن لأى فرد بمسدس صناعة يدوية أن ينال منـه لو أراد,, حمل الشعب السورى لسيارة ناصر فى دمشق فى حادثة مشهورة للجميع,, لم يكن بعيدا عن العامة...لم يعرف عن عبد الناصر ولا رجال الثورة مع عدم تقديرى للبعض منهم اتخاذ المواكب الفخمة..

_ مالعبد الناصر وحريق القاهرة,, أتراه كان يملك سلطة سياسية يمنع بها حريق القاهرة أو حتى يعلم بأمره,, هو كان يعد لإنقلاب كما تحبى القول دائما ,, أتريدينه يخرج بمجموعته ليقول هاأنا ذا فلتمسكوا بى؟!!! وكيف له أصلا أن يعلم بمؤامرات هى فى الأصل مسئولية الحكومة والقصر والإنجليز؟؟!!
كم أنتى تحمليه ماليس له؟!!!

تتحدثين عن شعبية عبد الناصر ..
وقبول عبد الناصر لدى الشعب لم يأخذه حاكم فى العصر الحديث..
أعتقد انكِ شاهدتى جنازته أم ترى قد دبر خروج الجماهير فى جنازته بعد وفاته .. كما سبق واتهموه بتدبير مطالبة مابعد التنحى بالاستكمال؟!!

يؤخذعليه بالطبع معاملته لنجيب ولا يبرؤه منها منصف ,, مهما قيل عن نجيب وأنه قد يفسد الأمر ,,إلا أن ما عومل به يحسب ضد عبد الناصر كأشياء أخرى أيضا ...

_برضه بتخلطى بين سفر المصريين فى الخمسينات والستينات للدول العرربية وماحدث فى السبعينات ومازال يحدث من هجرات,,

فى عهد ناصر كان المصريين هناك لأهداف غير المروحة والفيديو,, كنا نعلم العرب كل شىء منذ المدرسة وحتى الجامعة , كنا نبنى لهم ونخطط لهم ونضع لهم دساتيرا وقوانينا مازالوا يسيرون على نهجها حتى اليوم... وهذا أيضا ياسيدتى كان فى عهد عبد الناصر..

_ الجنيه المصرى بلغ فى عصر عبد الناصر 4 دولارات وحتى وفاته كان الجنيه أعلى من الدولار..

_ قانون اللصوص ياعزيزتى أن تعطى الباشوات ذوى الدم التركى المهنج بارستقراطية مصرية مصطنعة,, اراضى المصريين.. وثروات بلادهم وياخذوا موضع العزيز فى أرض ليست لهم اعتقد أن تلك الأراضى هى ملك لنا وليست لمن إحتلوا أرضنا..

ليس هناك أجداد ياسيدتى لكى يكون لهم ميراث يوزع على الأحفاد!!

_مرة أخرى.. من هم هؤلاء الرعاع من وجهة نظرك؟!!!

الفلاحين الذين توزعت عليهم الأراضى مثلا؟؟!!
أنوء بك عن تشبيه غاية فى السوء والتخبط..

(آه سمعت توت عنخ ىمون كان عمره 17 سنة لما مات!!)

_ وبعدين مين قالك إن ملك فى سن ال 17كانت بمزاجه؟؟!!

ماهى نتيجة لوفاة أبيه فؤاد سنة1936 واتزنقوا فى توليته , وقالوا نعمل لعبة ونحسب ميلاده بالتاريخ الهجرى علشان نكبره شوية , فرفض النحاس باشا الأمر لأسباب تتعلق بالحفاظ على مدنية الدولة...

ماهو عيل برضه والحاشية اللى حواليه بتمشى الأمر, يعنى مش علشان انه نابغة يعنى..
ودى أصلا فضيحة ونفس الأمر حصل مع الملك حسين ملك الأردن , وليها ميراث مملوكى ,, لأن الحكم كان الهدف فلابد من تولية الابن فى حالة وفاة الملك (غالبا بالقتل) وعلشان كده وصل لحكم مصر أطفال فى عمر السنتين و8 سنين فى العصور المجيدة!!!!!!!!!!

تحياتى
لا طبعا ثورة
بس حبيت اقولك كده
مش عايز اشد عليكي عشان اناعارف ان اعصابك تعبانة من سنة 52
Desert cat said…
عمرو (مواطن مصرى)
اهلين يا فندم للرد على سيادتك برضه

وده معناه انه كان بيشارك المصريين بصرف النظر عن الهدف
الملك فاروق فى زيارة ليه لبورسعيد فى القطر اهل بورسعيد قعدوا ينتظروه فى الشمس لحد ما وصل علشان يشاوروا له متخيل ؟؟؟ لدرجه ان الصحف الامريكية تغنت بالحدث
مقارنة بموقف مشابه لناصر فى زيارة ليه فى القطر للاسكندرية لحضور حفل انقلاب يوليو اللى جمله وسماه ثورة كان مدبر ليه حادث اغتيال ...

حدث تانى للملك فاروق لما عمل حادثه بعربيته الشعب حزن عليه جدا وعندما اذيع الخبر بين الشعب ان الملك بخير اقاموا احتفالات وتغنوا له .. اذن الموضوع خالى من الاهداف ... اصل هدف ايه اللى هينشده ملك وهو غصب عن اى حد حاكمهم

ثانيا اتفق معك لم يركب عبدالناصر مصفحه لأنه يرتدى الحماية الكافيه
وهى قميص واقى ضد الرصاص
ودعنى اذكرك بخطاب المنشية الذى تاخر موعد القاؤه لتاخر الطائرة التى بها قميص عبدالناصر الواقى للرصاص
وهو نفس يوم المسرحية الهزلية التى مسلها عبدالناصر امام الناس بانه اطلق احدهم عدة اعيرة نارية والجميع انفض من حوله وهو وقف صامد مش خايف من الرصاص

اعتقد ان من يهتم بالبلد ويتغنى بحبها ويخطط لعمل الانقلابات لاجلها اعتقد مش يهون عليه يشوفها بتتحرق 3 ايام ورا بعض
يا عزيزى حريق القاهره كان الفرصه الذهبية لعبدالناصر
لأنه بعد الحريق أعلن الملك الأحكام العرفية وفرض نظام منع التجول ليلا وأظلمت القاهرة أطول فترة في تاريخها وبقي الظلام حتى يوليو
وفي هذه الفترة أحكمت خطة قلب نظام الحكم بين الضباط وبين السفير الأمريكي وقد سنحت لهم فرصة الاظلام ليلا مع منع التجول أن يتحركوا دون رقيب ولا حسيب
إذ أن سيارات الجيش والأمن هي التي كانت تتحرك باسم القانون العرفي

انا شوفت جنازته فى التلفزيون بصراحه لكن اللى سمعته بعد كدا ان اللى كان مش بتلبس اسود مش كانوا بيخرجوها من بيتها يوم جنازته

مش هتكلم فى نقطة محمد نجيب لانها خير دليل على حبه لنفسه وعلى حجر حرية الرأى وكتم الأنفاس والرقابة على الصحف حتى يومنا هذا

اعتقد من بعد الملك فؤاد الاول النهضة التعليمية ماتت
وبالتالى سفر المصريين لتعليم وخلافه ما هى الا اكذوبة من صفحات التاريخ المزور

اصدقك القول فعلا ان عبدالناصر استولى على امول الاجانب فقط اذا كان صادر القصر وكل من كان يعمله فيه او ينتمى اليه
وانما هو استولى على جميع اموال رجال الأعمال وجميع الأغنياء بما فيهم مصريين اباً عن جد

مرة أخرى.. اجيبك الرعاع هم من قبلوا على انفسهم اموال حرام استولى عليها عبدالناصر بدعوى عمل سياسى
الرعاع هم مجموعه من العواطلية وجدوا نفسهم بين يوم وليله من اصحاب الاملاك التى هى بكد وجهد رجال اعمال ورثوها او اشتروها
قولى انهى نهضه حصلت فى مصر من بعد الفراعنه وبعد انجازات الملوك والاثار التاريخيه المعروفه

اوافقك انه لم يصل للحكم بمزاجه وان هناك من كان يعاونه ولكنهم كانوا يعاونوه باخلاص لانهم يحبو مصر
ولا قتلوا ولا سرقوا اموال غيرهم ولا عملوا المستحيل خوفا على العرش

مودتى
Desert cat said…
ساعد نسرين الايمن
ههههههههههههه
يا سيدى خد راحتك
Desert cat

كلاكيت رابع مرة

شعبية عبد الناصر لا خلاف عليها بين من عاصروا وشاهدوا ونقلوا الحدث ولحسن الحظ كان عشرات التسجيلات التليفزيونية سجلت وقائع إحتفاء الجماهير بـه.. اما كون النساء أجبرن على لبس السواد فهذا كلام لم أسمع به من قبل ممن عاصروا فترة وفاته ,, وقد كان لى من الأقارب من كانوا يقومون بتولى تأمين جنازته كجنود غير الذين عاصروا الحدث ولم يقل لنا أحدا أن الحزن كان بالأمر!!
الجنازة كانت شعبية وخروج الجماهير كان طبيعيا,, وإليكى 4 مقاطع نادرة(متكاملة) تعرض الأمر منذ وفاته وحتى دخوله المقبرة وشاهدى الحزن من الشعب حتى صغار ضباط الجيش الذين يبكون عليه بلا أدنى تصنع..

http://www.youtube.com/watch?v=ZlnxJd-7wVo

http://www.youtube.com/watch?v=vhNLoNkUJm4

http://www.youtube.com/watch?v=ypESG-4JjZc

http://www.youtube.com/watch?v=eLAWN0CjkZU


_قميص واقى؟!!
اعتقد ان القميص الواقى هذا لا يكفى لحماية باقى البدن وأوله الرأس مثلا !!!
وإلا ماكنا رأينامواكب الرئيس الحالية أشبه بكتيبة حربية!!


ومش فاهم الحقيقة كان مطلوب من عبد الناصر يعمل ايه فى موضوع حريق القاهرة هو لم يكن دولة ولا كان لديه جهاز استخبارات ولا كان لديه جهاز أمنى ينبؤه بهذا الأمر!!

وحتى لو كان يعلم حضرتك بتتكلمى وكأنه مسك الحكم وأصبح له حق التحرك بقواته وهو ضابط جيش ليس إلا ,,اى منطق يقول أن يخرج ضابط من وحدته العسكرية بمجموعة جنود لينفذ أمر ما بلا اوامر عسكرية,,
ده بفرض خاطىء انه يعلم بموعد الحريق اللى انتى نفسك ذكرتى رضاء الملك عنه , وبعدين بقى الملك وطنى فى نفس الوقت !!!

سفر المصريين لتعليم العرب أكذوبة!!!
..
يعنى دى مش من التاريخ البيزنطى علشان تبقى محل شك وتكذيب من حضرتك!!!

_يعنى خليتى حاشية الملك بيحبوا مصر وخليتى الفلاحين رعاع لأ وعواطليةكمان, يعنى قعدوا سنين ياكلوا من خير غيرهم وبعدين بقوا ملاك,,

نفيتى الفساد والتلفيقات السياسية وصراعات الكراسى والحكومات اللى بتعد 3 أيام وتمشى وتربيطات الملك والحكومات, وحريم الحاشية وفضائح القصر و مغامرات الملك نفسه ,, وحرب 48 اللى منطقية جدا مع فساد الأحوال تبقى هزيمة و
بقى المشكلة أن الفلاحين رعاع , اعتقد أن الرعاع دول هم اجدادنا والتشبيه غير مقبول بالمرة ومرفوض تماما!!

تحياتى
Desert cat said…
عمرو (مواطن مصرى)
كلاكيت رابع مرة

بالنسبة لحب الشعب لناصر ومظاهر وفاته قولت لك انا شوفتها فى التلفزيون ومش شوفتها فى الحقيقه لسبب بسيط
انه لما مات انا كنت لسه فى علم الغيب
بالنسبة لاجبار الستات ارتدائها للون الاسود فدى انا سمعتها بالفعل من اللى كانوا موجودين ايام ناصر
اعتقد ان المصريين اللى حبوا الملك فاروق هما نفسهم اللى حبوا ناصر هما نفسهم اللى حبوا السادات واللى مازالوا يتجرعوا العذاب الوانا بفعل حكم ديكتاتورى بدأ بعد انتهاء الملكية مباشرة كى لا تقول انى اخلط الاوراق ... عند اى مناسبة تجد التهليل والتصفيق واخترناك وبينهم وبين انفسهم التافف ...

ميرسى جدا على لينكات اليوتيوب
بالنسبة للقميص الواقى فهو اعتقد ان فيه الكفاية
لان السادات يوم ما انضرب بالنار وهو يلقى خطابه كان لا يرتدى قميصه الواقى والا كان اللى حاصل ماكان
عارف ليه لان بيكون حواليه حرس وبالتالى تصويب الرصاصه فى الرأس يحتاج تركيز اكتر وامر ليس بالهين على محترف النيشان وهو حواليه كل الرؤس دى
-- حريق القاهره انا مش قولت هو السبب فيها او يعلم بتدبيرها او التآمر بشأنها
لكن النار استمرت 3 ايام ياترى هو واصحابه مش كانوا يقدروا يطفوها ؟؟؟
ولا كله كان صاحب مصلحة
بالمناسبة انا مبرأتش الملك بدليل انى ذكرته موقفه السلبى مع وزارة الوفد ومع ناصر

سفر المصريين للخارج بسببه تخلى ناصر عن السودان ... يعنى بعد ما كان الملك فاروق ملك مصر والسودان .. ناصر تخلى عنها فى سبيل ارسال اهل بلده عمال فى دول الخليج ...

انا مش ذكرت حاشية الملك لوحدها يا
انا قولت لك ان ناصر استولى على اموال الاغنياء جميعا بما فيهم مصريين
لو كان استولى على القصر الملكى والحاشية كنا قولنا معقول وجميل
انما استولى على اموال الاغنياء بما فيهم مصريين ... وده معناه سرقه وسطو ونهب لاموال مش امواله ولا حقه ولا حق اى واحد اخدها بعد كدا ومش هقول رعاع علشان مش ازعلك
مش علشان اجدادنا ...

مودتى واحترامى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز