خايفيـــن لـيــــه

لاء بجد خايفين ليه او قلقانين من أيه
لو انتوا على حق مرعوبين اوى كدا وعمال تبعتوا رسايل للناس فى الخفاء علشان ايه ؟؟؟
مش بتقولوا ان النقاب فرض وناقشنا فرضيته وجبنا تفاسير وانتوا بدل ما ترودا على تفاسير ايات وتردوا الحجه بالحجه والدليل بالدليل شتمتوا وسبيتوا وقذفتوا وهددتوا
من ايه الرعب ده كله ؟؟؟؟
من ايه كل القلق ده ؟؟؟
مش المفروض انكو على حق هو برضه اللى على حق بيخاف كدا ويروح يبعت للناس رسايل فى الخفاء ويلموهم يمكن يعدلوا عن موقفهم ورأيهم
أظن كدا وضح أوى مين اللى على حق ومين اللى على باطل
مين اللى بيتكلم فى العلن وبأسمه وبشخصيته ومش بيخاف من لومة لائم ومين اللى بيتخفى وبيتدارى زى ماهو متعود يتخفى ورا قطعه من القماش فى الحياة العامة علشان يتسكع ويترمى فى الشوارع زى اكياس الزباله
أظن المتابعين جيدا لمدونتى
شافوا موضوع لا من شاف ولا من درى واكيد كمان فى ناس تابعته بالردود وفى ناس ايدتنى وناس عارضتنى وناس شتمتنى وناس هددتنى ده كله مش مشكلة
المشكلة بقى فى الناس اللى ايدتنى
أيوا متستغربوش مشكلة بجد
اصل ازاى وليه يأيدونى وليه حد يدخل يقولى اه كلامك صحيح بس مش تعممى وليه حد يقولى الموضوع حلو
الناس دى كلها انا اسفه يا جماعه بعتذر لكو كلكو واحد واحد
كل اللى وصله رساله من منقبة او من انصار النقاب تحمل فى طياتها العتاب انه جه رد عندى انا اسفه جدا
كل اللى جت له رساله عتاب من منقبة او من انصار النقاب زى استاذ فارس قديم انا اسفه جدا
كل اللى منقبة او حد من انصار النقاب دخل عنده بغير معروف وقاله حسبى الله ونعم الوكيل زى استاذ محمد فوزى
بالرغم من انه مكانش مأيدنى ده دخل لامنى على استخدام بعض الكلمات
انا اسفه جدا
كل اللى وصلت له رساله ومقالش ان حد بعت له رساله يقوله فيها حسبى الله ونعم الوكيل فيك او شتمه او لامه او عاتبه برضه اسفه جدا
ولكل اللى لسه هيوصل لهم ولكل اللى مش وصل لهم خالص ولا هيوصل لهم ولشعب مدغشقر الشقيق اسفه
تحياتى لكم جميعا

Comments

و انا و انا
انا عاوزهم يدخلوا يشتمونى
اصلى بحب ارد على الناس دى اوووووى
و شعب مدغشقر بيبعت لك السلام
تحياتى
eslam
funckydoctor said…
ممم
من حق الكل ابداء الرأى لكن بتحضر
لك نحياتى
HANY YASSIN said…
السلام عليكم
النقاب مش فرض لان مفيش اية
الحجاب مش فرض لان مفيش اية
اى حد عنده معلومة زيادة ممكن يعرفنا بيها
موضوع رائع وسؤال مهم
خالص الاحترام والتقدير
هانى
MATRIX said…
نوعا ما يكون صحيح
......................
انا زعلان جدا من حضرتك انت موش بتزورينى خالص وانا كنت حالف مخشش هنا تانى ..بس دفعت 30جنيه لانى مقدرش اعمل كدا
Abo 7anf said…
السلام عليكم
ازيك يقطه
مهو النقاب مش فريضه
من زمان قلنا انوا البعض بيتاخذوا تدين
والبعض ملتزم بيه
اما البعض بتاخذوا لاغراض اخرى
زيه زى اى حاجه ممكن يساء استخدامها
سنووايت said…
الرأي والرأي الأخر
كل واحد من حقه يقول رأيه ومن غير ما يغلط في حد
كل واحد وله تفكيره
ومتدايقيش نفسك اوى
عادى بتحصل فى كل مكان
تحياتى
علاء
blue-wave said…
انتى ماغلطتيش علشان حد يهاجم
انتى قولتى وجهة نظر وسمحتى للى عندة وجهة نظر مخالفه انه يقولها
غريب موقف الناس دى بصراحه
lastknight said…
بتتأسفى على أيه يا قطة الصحراء ؟ أن رساله وصلتنى من شخصيه مجهوله و خلتنى أكتب متفق مع رأيك فى التعميم مع تذكير بعدم الخروج عن حدود الأدب .. بالعكس .. رسايل الناس دول بتثبت رأيك و رأيى .. الناس دى مابتعرفش لا تناقش و لا تواجه .. مالهمش غير حاجه من أتنين .. أما التهديد و العنف أو .. العمل السرى .. بأرسال رسايل مخفيه كأنهم بيدبروا انقلاب
شوفى يا قطه .. أكرر أنا متفق معاكى و أعتقد أنا ضفت أسبابى فى مدونتى.. يمكن لو عندى عتاب عليكى فهايكون فى الأسلوب الساخر اللى تناولتى به قضيه بهذه الدرجه من الخطوره .. لكن مسألة الرسايل اللى وصلتنى .. ماتعتذريش عنها أطلاقا بالعكس دى كانت فرصه أنى أكتب رأيى بالتفصيل
ربنا يخليكى و توجعى قلبى كمان و كمان .. و مايهمكيش من حاجه مادمتى قادره تتكلمى ف النور .. و أهلا باللى يتكلم معانا فى النور .. و يسعدنى لو حد أثبت أن عندى غلطه .. ساعتها اشكره أنه نبهنى و أرجع عن غلطى .. لكن اللى يستخبى و يلف و يدور .. معلش بقى .. ينسى
أول مرة أدخل واعلق عندك رغم إنى أعرفك من أول مادخلت التدوين,, يمكن تكونى شفتى تعليقاتى قبل كده فى مدونات أخرى,,

لكن كل شىءبأوان ...

ياستى ,, النقاب ليس هو المعركة أو محل النزاع فى حد ذاته , لكنه مجرد سلاح قبيح يسهل به تخويف البسطاء ليس إلا,,,

وهو شقيق سلاح الختان مكرمة وابن عم صوت المرأة عورة,وقريب ونسيب كل من الغناء قرآن الشيطان والثعبان الأقرع, وعذاب القبر , والنساء أكثر أهل النار,, ومصافحة المرأة زنا ,,وتعدد الزوجات سنة ,, واللحية واجبة والجلباب القصير , والزى الإسلامى والسواك فى جيب الجلباب ايتيكت,, والعمامة تزيدك هيبة,,والإسلام هو الحل و الإخوان المسلمون و فلوس البترول حلال وأحيانا الدولار وقناة الناس وفتاويها البلهاء وقناة تاخذك إلى الجنة و أدخل الجنة بميسيج و الهاتف الإسلامى , وتوبى تلاقى عريس,, وتأديب الزوجة بالضرب ,, والنساء ناقصات عقل ,وإرضاع الكبير ومش مهم الصغير, وشرب الصحابة لبول النبى, واوعى تتكلم عن البخارى لتخش النار , كل اللى قاله صح حتى لو تحدث عن فضلات الرسول وأن مكانها لم يعد هو المراحيض أو الخلاء بل أفواه أصحابــه,,
هو برضه صح , فالمهم السند و كل من روى عنهم لا يأتيهم باطل من بين أيديهم ولا من خلفهم,,,
والخلافةالإسلامية المطلوب إعادتها,ومرشد الجماعة, ويحكمنا حاكم ماليزى مش مهم طالما مسلم ,, وطظ فى مصر كما قال مهدى عاكف,, والصحوة الإسلامية بقول سلامو عليكم فى التليفون بدلا من آلـو ,, وختام المكالمات الجنسية ب لا إله إلا الله( راجعى تحقيقات وتسجيلات النيابة فى قضية يوسف عبد الرحمن وراندا الشامى فى قضية بنك التنمية الشهيرة)

والمرتشى يكون عنده زبيبة صلاة , ومابيفوتش فرض,, بس درج مكتبه مفتوح للجميع , فهذى نقرة وتلك نقرة,,

أتريدين المزيد من مظاهر الصحوة الإسلامية وأسلحة المعركة الفتاكة ,,أم كفى ؟؟؟

نسيت أن أقول لك ,,لماذا النقاب؟ النقاب هو أقوى سلاح لأن المرأة هى المجال الخصب والقضية التى لم تحسم , ومجال اللعب فى الدماغ مفتوح ووالطبقات الفقيرة وقليلة التعليم متوفرة والحمد لله , وعشرين جنيه هدية وشنطة ياميش رمضان نحجبها والنقاب هدية على الشنطة,, ونكسب عنصر جديد فى صفنا , حتى لو كان مجرد عدد بمعرفة محدودة فلا يهم ,, المهم إثبات الذات وانهم موجودون, والدعوة منتشرة بفضل الله تعالى
وسلميلى على مصر..
ازيك يا نونو؟؟
انا عرفت بالموضوع من عند فارس الحقيقة نظرا لانقطاعى فترة طويلة وحركات كدة

شوفى

اللى نعرفه عن الاسلام الصحيح
هو مبدأ أساسى وهام

وجادلهم بالتى هى أحسن

وكمان

ولا تكن فظا" غليظ القلب فينفضوا من حولك

هاتى لى نفر واحد من اللى بيدّعوا أنهم أتباع قال الله وقال الرسول عمل معاكى كدة؟؟؟؟؟؟؟؟

أعتقد أن الأخلاق والمبداىء والتدين لا يتجزأ

مينفعش أتدين على سطر وأسيب عشر أسطر وأطلق للسانى العنان ينهش فى خلق الله بلا سبب ولا بيــّنة

التديـــن لا يتجـــزأ

مش قلت لكم؟؟

أحلااااا مالشرف مفيـــــــــــش

وش بيغمز

.........

ضعيف الحجة دائما عالى الصوت سليط اللسان


.........

بأسجل اعتراضى على الموديريشن
بلاش خصمك يحس بضعفك أو خوفك
أنتى أقوى من كدة بكتيــــر

تحياتى
Heart Beat said…
الصديقة العزيزة جدا

قطقوطة

اذا كانوا الناس دول تواصلوا مع مدونين اخرين عن موضوع انتي اللي كاتباه

كان من الافضل انهم يتواصلوا مع صاحبة الشأن مش يدخلوا يشتموا او يهددوا و بعدين يراسلوا اشخاص تانية عن موضوع تدوينتك

يعني اللي عايز يوضح وجهة نظره المفروض يتكلم مع صاحب الشأن ... مش يشتمه في بيته و بعدين روح عند الجيران يتكلم بمنتى الهدوء و لا كأنه شتم او هدد او حتى ان الكلام ماعجبوش كان المفروض يتواصل مع صاحب الشأن

لكن كونهم يتجنبوا مثل هذه الاعمال يبقى هم مش عايزين يتناقشوا في اي حاجه ... هم عايزين بس يشهدوا ناس تانيه على كلامك ... مع ان الاتنين المدونين اللي وصلتهم رسايل... علقوا عندك و الامر ماكنش محتاج تشهير مثلا بتدوينتك

يبقى هم مش عايزين يتناقشوا زي ما بيقولوا ... الامر ده مستبعد بسبب اللي عملوه

اما عن اللي بينتقد اللي بيأيدوكي فالناس دول سيبك منهم ... اصل غريبة انهم يكونوا متضايقين من ان في حد بيايدك الا اذا كانوا بيغيروا منك و عايزين كل اللي بيعلقوا عندك يشتموكي او يطردوكي من مدوناتهم زي اللي بيحصل معاهم
momken said…
شوفى ياستى انا ليا رائى

النقاب والحجاب والايشارب
والجيب شيرت
والمايوة
والمينى جيب

كلها هدوم
وكل واحد حر يلبس ايه
مينفعش الى لابس كاب ينكر الى لابس باروكه لان دى حريته
والى لابسه كات تنتقض الى لابسه مينى جيب
هى مالها هى حريتها

لكن الاصل فى الاشياء
ان كل زى بيدل على صاحبه
اما الان فهذا طبعا خطاء
وخطاء اكبر اننا نلوم على حد لبسه
لان دى فى الاخر ازواق

مش هتكلم من ناحيه الدين انا جردت الموضوع من الدين خااااالص

تحياتى
momken said…
هى تعليقاتى بتروح فين
بحس انى علقت قبل كده
وبحس انها مش موجوده
تحياتى
egyboy said…
أنا بصراحه أول مره أجى مدونتك ومش فاهم الموضوع اوى بس على قد ما فهمت المفروض أن كل واحد عايز يقول رأى يقوله باحترام ويبدى الأسباب اللى دفعته لكدا مش يكلم كدا وخلاص

سلاااام
مصطفى
ناو ناو
التدوين كان فيه كتير من الملامح العقلية في نقض النقاب

واريد ان اقول انك يمكن ان تضمي بعض اراء المعتدلين والاكاديميين الاسلاميين والتي تبين ان كل هذه المظاهر المستحدثة ليست الا وارد الوهابيين فقط

ناو ناو
هفضل اقول برضه
مش معنى ان الحراميه بيلبسوا الشراب ف وشهم
نقول لا الشراب حرام وغلط عشان الحراميه بيلبسوه
لا العيب ف الحراميه مش ف الشراب

مع الفارق طبعا
ان النقاب زى دينى

واعزرينى يا قطه اذا اخذت عليكى بعض الكلمات التى من الممكن تكون سبب اثاره الناس ومعارضتهم للبوست
لا وهى
زى اكياس الزباله
بيتخفوا
حطيين حته قماشه
اعرضى رأيك براحتك من غير ذكر عبارات تؤذى الاخريين
شكرا
Desert cat said…
مواطن مصرى نايم
هما هيدخلوا لك انونيمس يا اسلام
مش تستعجل جايييييين
وساعتها ابقى ادينى خبر
تحياتى
Desert cat said…
funckydoctor
من حق كل واحد يبدى رأيه
لكن انصار اكياس الزبالة رافضين ابداء الرأى خالص هو فرض يعنى فرض
تحياتى
Desert cat said…
HANY YASSIN
هما مش هندهم آيات يا هانى
هما عندهم الكلانشكوف والسيوف واللسنة الطويلة
لكن تابدل حجه بحجه ومنطق بمنطق
مرفوض مرفوض مرفوض يا ولدى
تحياتى
Desert cat said…
MATRIX
انا يا ماتركيس كنت مشغولة والله
لكن حا ضر ها اجى لك فوريره
علشان ادفع لك ال30 جنيه على الاقل
تحياتى
Desert cat said…
Abo 7anf
ماهو احنا مفيش بالنسة لنا مشكلة لاننا عارفين ان النقاب مش فريضة
لكن المشكلة فى بيفرضوه بالعافية
لاغراض الله اعلم بيها بقى
تحياتى
Desert cat said…
سنووايت
صح يا سنو
بس انت تدخلى تقولى رايك
يترفع عليكى السيوف
تحياتى
Desert cat said…
عايش ولكن
انا مش متضايقه والله يا عالاء
انا سعيدة جدا بافعالهم اللى بيعملوها زى الفيران وهما مستخبيين فى جحور
تحياتى
Desert cat said…
blue-wave
لاء يا دكتور ماهو المفروض انهم يقولوا النقاب فرض نقول امين
يقولوا ارضاع الكبير فرض نقول امين
المفروض يعنى اننا نلغى عقولنا
يا اما كدا يا اما تلاقى السيوف والالفاظ الاللى كلها ادب وذوق علشان نعرف اخلاقهم كويس مترمية عليك من كل ناحية
تحياتى
Desert cat said…
lastknight
استاذى العزيز اشكرك جدا لسعه صدرك وسلامة قلبك من اى وجع
ماهو برضه اللى بعت او بعتت رساله للاستاذ محمد كانت من مجهول
والشتيمة وقلة الادب اللى جاتنى من مجهول
مش المفروض انهم بيدافعوا عن حق وفرض
هو اللى بيدافع عن حق وفرض بيستخبى برضه ويتكلم بلسان مجهول ويكلم الناس فى الخفاء كانه بيسرق او بيحرض على جريمة
اشكر حضرتك جدا جدا
احترامى وتقديرى
Desert cat said…
عمرو (مواطن مصرى)
يا ألف اهلاً وسهلاً بحضرتك
انا فعلا شوفت كومنتات لحضرتك فى مدونة العزيز دكتور ضياء النجار
احترم رأى حضرتك جدا واقدره
ولكن يا سيدى الفاضل كيف تجرؤ وتقول هذا الكلام على النقاب
انه فرض والفروض مفيهاش نقاش
يعنى مش اصلى ولا اصوم ولا وازكى ولا اعمل اى حاجه انا بس احط قطعة قماش واكفن نفسى بالسواد وانا هدخل الجنة على طول باذن الله
وببركة سيدنا الشيخ اللى قاعد طول اليوم فى قناة الناس يرهب ويخوف من عذاب القبر وميمنعش كل 5 دقايق اعلان عن اللحاف الاسلامى على اساس يعنى اللى يتغطى ببطانية يبقى كافر
والحبة الزرقا والحبة الصفرا اللى هتخلى الحياة فوحلئى
وعسل السدر الجبلى وحبة البركة اللى بيشفى باذن الله من كل الامراض ومريض السكر ياخده من هنا ويقوم زى الحصان مفيش سكر ولا غيره
طيب افرض فعلا فى حد على اد عقله وبطل ياخد انسولين واخد العسل ده وجت له غيبوبة سكر مات فيها
يبقى حكمه ايه ده ... مكن يطلعوا له فتوى انه مات وهو بيجاهد فى سبيل الله ؟؟ ممكن ليه لاء
خلاص مصر المنارة بقت مصر الوهابيين والسلفيين واكياس الزبالة المترمية فى الشوارع
سعيده جدا بتشريفك
احترامى وتقديرى
Desert cat said…
شـــــهــــروزة
شهروة فى بيتنا يا مرحبا يا مرحبا
لو راجعتى الكومنتات يا حبيبتى هتشوفى المهازل اللى فيها
بدئا من شيتمة مرورا بسب وقذفا وانتهائا بالتهديد
لو عندهم الشجاعه فعلا مكانوش دخلوا بغير معروف كان لما الاخت اللى بتجمع بيناتى قولت لها ضيفينى عندك وانا اديلك كل بياناتى كانت ضافتنى لكن دى راحت وقالت عدو لى زى ميكون انا اللى طلبت بياناتها
بالنسبة لقفل التعليقات فده مالوش اى علاقة بالشجاعه من عدمه
لان الشتيمة بنزلها واى حاجه بنزلها لكن له علاقة بحد مش عايزاه يحلم يشوف له حرف فى مدونتى وبالرغم من انى طردته منه الف مرة لكن بيجى ولحد النهارده وحياتك
متغيبيش تانى بقى
تحياتى
Desert cat said…
Heart Beat
صديقتى الغالية جدا جدا
احلى دقة قلب
يا حبيبتى الناس دى احنا مش عارفينهم مين اصلا
يعنى انا بكتب فى مدونتى لما بعتوا لاستاذ فارس معروف مدو نته وعنوانها واستاذ محمد فوزى نفس الموضوع وهما الوحيدين اللى مجهولين
يعنى معقول انا هكون بدافع عن مبدأ وعندى الحجة والدليل وادخل فى بيتك اشتمك واهنيك وانا حاطة على وشى حتة قماش مثلا ولا انتى عارفانى مين
وفى نفس الوقت اروح لصحابك او اللى مايدينك واتكلم معاهم وانا متخفيه برضه
يبقى كدا المشكلة فى مين بالظبط والغلط فين
فى اللى معروف عنو انه وسهل الوصول ليه ولا اللى بيتخفى كانه بيحرض على اعمال اجرامية

تحياتى يا جميله
Desert cat said…
momken
انت صح يا مؤمن فى النهاية ازواق
بس مجيش علشان حطيت قطعة قماش على وشى يبقى اعين نفسى وصى والحاكم بامره على شئون الناس
واقعد افتى فى الصغيرة والكبيرة فى المواصلات والشوارع وصفافيح الزبالة على راى اللمبى
تحياتى
Desert cat said…
momken
والله التعليق موجود فوق ده مباشرة
انا بس احيانا مش بكون اون لاين
لكن صدقنى كل تعليقاتك منورة يا فندم البلوج
Desert cat said…
egyboy
يا فندم حضرتك شرفت المدونة جدا
واعتذر اذا كنت دخلت لاقيت ضرب نار
بس لا تقلق سيعود الهدوء من جديد
تحياتى
Desert cat said…
تايه في وسط البلد
يا اهلا يا اهلا باللى مش تايه خالص
يا فندم التدوين وكل مواقع النت وكل الناس اللى عندها عقل وبتفكر عارفه ان النقاب مش فرض ولا الحجاب حتى وانما الناس اللى لاغيه عقلها عايزة تفرض علينا حاجات بالعافية

تحياتى
Desert cat said…
بنت مصريه
انتى لو راجعتى اصلا ردى على الموضوع السابق كنتى لا قتينى راده على نفس الجزئية دى وقولت قطعة القماش اللى بتتحط على الوجه ماهى الا اداة للتخفى ثم مين اللى قال لحضرتك ان قطعة القماش دى والشكل الاسود الكئيب اللى على هيئة اكياس الزبالة المترمية فى الشوارع ده زى اسلامى
حضرتك عندك القرآن والسنة بلسان عربى واضح وصريح وكمان عندك كتب التفاسير تقدرى تقرى فيها وتفهمى نفسك بنفسك
ولو مش فاضية دلوقتى تقدرى ترجعى لرد الأستاذ عمرو مواطن مصرى
بصراحة كافى ووافى لمن يفقهون
فالدين الاسلامى براء من اى جرم ينسب اليه وهل هناك اكبر من جرم اغتيال الانسانية وجعل المراة تضع قطعه قماش على وجهها وتتكفن بالسواد حتى لا تفرق بينها وبين كيس الزبالة الاسود مع الاعتذار طبعا لكيس الزبالة
Anonymous said…
معفوله نظل مائة سنه نناقش نفس المواضيع
ونناقش هل نتبع العقل ام ماتركه السلف؟ اكتر من مائة سنه منذ الشيخ محمد عبده ووقوفه الى جانب العقل والتفسير العقلانى للنص الدينى مما يدفع بالمسلمين الى الأمام غى مواجهة التقليديين الجامدين مثل تلميذه رشيد رضا الذى ثيل عنهم انهم بقفون عقبه امام تطور حياة المسلمين بل يسيؤون الى الأسلام وهو دين دينامى عملى وليس استاتيكيا غير قبل لأستيعاب العصر كما يريد له الجامدون
تصوروا ندوه من 85 سنه اقيمت فى كلية الحقوق عن الحجاب وهل هو ضرورى ام لا وكان هناك مؤيد ومعارض ...نظل نناقش نفس المواضيه لمائة سنه؟؟؟؟
انظروا الفرق بيننا وبين دوله كالصين
....الغرب اذل الصين واستعمرها فاحتفظ الصينيون ببقايا مبنى كان العرب قد هدمه ايام ضعفهم واليوم اقاموا امامه مبنى للبحث العلمى والتكنولوجى بالذات امام هذا المبنى الذى يذكرهم بضعفهم
اما الكابتن بن لادن وامثاله فقد ردوا على مافعله الغرب بقتل 3000 برىء معارض لسياسات خكوماتهم
دون اى ذنب
هذا هو الفرق بين عقليه ودمويه طائشه مجنونه لا تحقق شىء
Anonymous said…
اكذوبة ان الكلفته تمنع التحرش اقراوا ماتقوله ريم فى مدونتها من السعوديه وبالتالى فالمرض فى شخصيةاعمق مما يتصور دعاة الكلفته السذج وكانهم حلوا المشكله
كل هم الولاد بقى السعي انهم يبقو شباب الكول وده المسمى اللي يطلق على الشباب دول بتوع الجينز الساقط ولو اني

بحس بالامان اكتر في المول الللي مليان بشباب الكول اكتر من الشاب السعودي التقليد لسبب انه شاب الكول مش

بيدايق او يعاكس الا اللي عايزة وتدي اشارة غير كدة بيسيبك في حالك اما التاني فمصيبة والله لو ماشية زي

الخيمة ممكن يعاكسك
Desert cat said…
Anonymous
كما هو معروف ومعهود ان المجتمعات المغلقة هى اكثر مجتمعات للانحلال والشذوذ يعنى مش بالكلفتة
بالعكس دى الانسانة المتكفنة دى اكتر واحده بتتعاكس لان البلاوى السودة اللى بترتكب من خلف قطعة القماش اللى بتحطها على وشها جعلتها محل انظار الجميع
تحياتى
قطقوطتي الحلوه

معلش ياقمر النت ربنا يسامحهم بتوع الخدمه بقه لسه يادوب راجعالي و شكلي فاتني مواضيع كتيره حلوه منك

شوفي ياقطتنا انا رأيي ان الشتيمه و قله الأدب حجه الضعيف استحاله يكون موقفي قوي و اسيب اللي عرض الفكره و ابتدي اهاجم شخصيته مثلا او اللي بيعلقوا عنده او اجري عليهم و اقولهم ده كذا و كذا و هئ هئ هئ ده بيمسح تعليقي
دي سوري حجه الضعيف
القوي المؤمن بأفكاره عمر مايهزه اي كلام بل بالعكس بيتناقش مع اللي بيختلف معاه لكن فيه ناس خلاص مخها اتقفل و ياتوافقيها في كلامها ياتبتدي تهاجم و تهدد و لا يهمك ياقمر
موضوعاتك عشان بتجيلهم علي الوجع بتزعلهم و بيسيبوا الموضوع و يمسكوا في صاحبه و لا يهمك ياقمرايه كلنا بنحبك و بنحب موضوعاتك و ربنا يكتر من امثالك اصحاب العقول اللي بتفكر بجد

تحياتي ليكي و مع حبي ياعسل
Zika said…
انا بدخل البلوج ده لسبب واحد اللي هو اني معجب جدا بثقتك في كلامك
وكمان بتدافعي عن رايك لحد اخر لحظه
يارب تفضلي كده علي طول
ومش هابطل ادخل المدونه دي مهما اختلفت معاكي
تحياتي يا قطه

Popular posts from this blog

قميص دهشور

كل تحرش وانتوا طيبين