Desert Cat Search
قطه الصحراء: طيب ما احنا اغنياء اوى اهوه

Saturday, May 17, 2008

طيب ما احنا اغنياء اوى اهوه

دخلت المصريون والاقى فى وشى الخبر ده
جمال مبارك وأحمد عز وحسين سالم يشاركون في فعالياته .. 20 مليون دولار تكلفة استضافة مصر لمنتدى دافوس و10 ملايين للحراسة والتأمين
امال ايه بقى
الشعب عمال يعيط والناس مش لاقيه تاكل ليه
بتطلعوا اوشاعات على الحكومة يا شعب منك له ليها ليه
من كام يوم قريت خبر فى المصرى اليوم انهم بيرحلوا كل العمال المصريين اللى فى جنوب سيناء وشرم
يعنى قطع ارزاق العمال علشان ايه
خايفين على وفد منتدى دافوس احسن عينيهم تقع على مصرى ياااااى المصرى اصبح حاجه وحشه اوى مينفعش حد يشوفوه احسن اللى يشوفوه ممكن يجى لهم عمى فى عنيهم
المصرى اللى عنده استعداد يعمل اى حاجه علشان لقمة العيش حتى يرمى نفسه فى المحيط للسمك مش مهم بترحلوه من بلده
وتقطعوا عيشه
علشان تصرفوا ملايين الدولارات علشان الوفد اللى جاى واللى هى برضه من جيبوهم وجيوب اهاليهم من ضرايبنا ومن الرسوم اللى بتخترعوها لنا كل يوم ... انتوا ايه معندكوش دم
انتوا مش حاسين ان كدا بقى اوفر اوى والوضع زاد عن حده بشكل مبتذل
مبتسمعوش عن الناس اللى مش لاقيه رغيف العيش
الناس خلاص بقت ماشيه تكلم نفسها
ارحموا من فى الارض يرحمكم من فى السماء

85 comments:

سومه...مجنونه فى بلد عاقل said...

انا الاول هييييييييييييييييييييييييييييييييه
بطلى حقد يا كات وسيبى الناس تاكل بقسماط
سومه_87

A.SAMIR said...

اتكلمي للصبح
برضة مفيش فايدة
مفيش فاااااااااااااااايدة
تحياتي

gehad_fci said...

هي وصلت لحد كدا
طيب ع الله يجيوا الشرقيه هلغم الحدود بتاعه الشرقيه
او نطلع عليهم العيال بتوع كفر الزقازيق يكلوهم

الهي وهما بيتكلموا في دافوس دا يجيلهم اعصار توسونامي
علي فكره عاملين اعلانات عن المنتدي دا كتير اوي
وبتاع الماليه بطرس غالي يقولك احنا في ركب التقدم والحضاره والازدهار الاقتصادي
في عز ماحنا الاجره بتاعتنا تضاعفت والبنزين والسولار في الهوا طار
ربنا يأخذهم كلهم اخذ عزيز مقتدر
تحياتي

Sharm said...

اغنيا ايه بس وطي صوتك .. دي فلوس سالفينها .. طب و حياة علاولاو سالفينها

صوت من مصر said...

انا عن نفسى مالتى ملياردير

فاتيما said...

إحنا من ناحية أغنيا ..لأ إحنا اغنيا جدا
المصيبة إن كل ما حد ييجى يكبش و يحمل و بعدين يهرب
ييجى اللى بعده يكبش و يحمل و يهرب
و اللى بعديه و اللى بعديه ...
إيه أمة لا إله الا الله دى اللى عمالة تعبى و تشيل دى
و رغم دا كله الخير موجود و لسه مخلصشى يا قطة ...
ربنا يفرجها على الناس اللى بتقولى عليهم و ماشيين يكلموا روحهم

بنوته مصرية said...

اول كومينت

اه والله عندك حق

ربنا علي المفتري

واحدة مفروسة said...

ايه ياقطه
بتزومى ليه يا وحشه
ماهو انتى مش فاهمه و لا ايه
امال همه زودوا قبل ما ناخد العلاوه ليه
اكيد يا حبة عينى كانوا عايزين يعزموا الناس و معذورين فى قرشين
واحنا ساعدناهم
بس خلاص



افوض امرى الى الله ان الله بصير بالعباد


على فكره بقى لو عاوزه تصيفى فى مارينا...روحى لوحدك...انا مش عاوزه آجى معاكى ياختى

مش حركة نقص منى لا سمح الله
لأ اصل مافيش مايو على مقاسى و انا بحب العوم
ههههه

WhItE HeArT said...

مش عارف انا اول تعليق وله لا

عموما لو اول تعليق يبأه مبروك عليا

ولو مش اول تعليق حظ اوفر المرة اللي جايه


هنقول ايه بس منهم لله بجد حاجة بقت تزهق والناس ساكتين وبيرضو بأي حاجة بطريقه غريبة

تقبلي تحياتي

الربان said...

تحياتي

نحن في حاجة الي ترشيد الانفاق الحكومي
الحكومة مبذرة...مواكب و سيارات فارهة
و مكاتب 10 نجوم...

تعرفي ان رئيس تحرير الجمهورية الاسبق كان مكتبه 100 متر مربع...و كان الحمام
50 متر مربع به جاكوزي....
وان له غرفة نوم بالجريدة....و لن اكمل كفاية كدا....حتي لا يظن أحد اننا بنقر او حسد .

تحياتي و تقديري

.:.-=- ELGaZaLy-=-.:. said...

مش عارف اية الحقد بتاعكم دة...

ايوة يا ستى اغنياء بيحوش من مصروفة الراجل
انتى بتحوشى من مصروفك...

Desert cat said...

سومه...مجنونه فى بلد عاقل
انا مش بحقد يا سومة
انا بقر بس
ربنا يجعل القر من نصيبهم وياثر فيهم

Desert cat said...

A.SAMIR
ماهو انا لو ما اتكلمتش ممكن يجرى لى حاجه
فقولت افضفض معاكو بكلمتين
يمكن حد يدعى دعوة فى ساعه استجابة وتيجى الفايده
تحياتى

Migo Mishmish said...

ما هو الناس اللي زي حضرتك هما اللي جابونا ورا من القر
يعني نخليهم يحطوا شعار للمؤتمر "قل اعوذ برب الفلق" علشان تستريحي
او "يكتبوا ما تبصليش بعين رضيه بص للي اندفع فيا"
يا بنتي المؤتمر معمول في شرم الشيخ والاكل هناك غالي قوي
يعني يرضيك يبقى الاكل اورديحي
عيب يا قطه ما تقوليش كدة احنا عندنا ضيوف وحكومة تأكل مال النبي وتحلي بما بقى مع المؤمنين
Love,
MishMish

Desert cat said...

اقولك يا جهاد انت تطلع عليهم العيال بتوع كفر ابو حسين
عيال جدعان ورجاله اوى خد كلامى ثقه ده انا شيفاهم بعنيا
هههههههههههه
بطرس بيقول ايه
مين
فين
ركب تقدم هو فين التقدم ده
يكونش كانت ركبه واجعاه ولما مشى خطوتين حس بالتقدم
ربنا يرحمنا من الناس دى بقى
تحياتى

Desert cat said...

Sharm
اه سافلينها يا احمد من جيوب الغلابة
يعنى سلف دون رجعه
تحياتى

Desert cat said...

صوت من مصر
اللى عطاك يعطينا

Desert cat said...

فاتيما
ماهو البلد بقالها 7000 سنة عمال تتسرق ولسه برضه فيها خير
بس رايح فييييييين
رايح جيوب البعدا يا حبيبتى
ربنا يفقرهم ويغنى الناس اللى ماشيه تكلم فى نفسها
نورتينى يا ام يوسف

Desert cat said...

بنوته مصرية
هعتبرك اول كومنت يا رودى
ربنا على كل ظالم
نورتينى يا جميله

Desert cat said...

واحدة مفروسة
ااااه انا دلوقتى بس فهمت
هما زودوا العلاوة فى اول 5 علشان ياخدوها اضعاف مضاعفه فى نص 5 علشان المنتدى يتعمل فى اخر 5 اه يا ولاد المفترية جهم 5 قرود لما يتنططوا على الاكل اللى هياكلوه
ويبوظوه ليهم
مارينا مين يا اختى انا مبروحشى مارينات ولا الكلام الفاضى ده
احنا هياخدونا هناك عندهم شرم مباشره على ان الجو هناك حلو وبتاع يادوب تجهزى شنطتك بقى
نورتينى يا جميله

مثلية فقط said...

ما في وجه للمقارنة بين الحكومة و شعبها
و لا وجه و لا عين و لا أذن حتى

الحكومة عايشة بكوكب أو بمجرة و الناس عايشين ميتين بأرض مصر

عم يصرفو يمين شمال شرق غرب على هؤلاء الصعاليك مدمني الخمور
ليش ؟
وين الفايدة ؟
شو راح يستفادو ؟
غير أنو أصحابهم الصعاليك مدمني الخمور راح يردولهم الزيارة و الضيافة بإحدى المنتجعات السويسرية أو واحدة من كباريهات باريس ... كلو من جيوب المساكين

عفوك ربي
أي متى راح تنتهي المهزلة

Desert cat said...

WhItE HeArT
ماهو انا اللى مضايقنى ان الناس مكتومة مش عارفه لحد امتا هينصبوا على بعض وياكلوا فى بعض
وساكتين على الظلمة الكبار امتا هيتحركوا مش عارفه بصراحة
ربنا يتولانا

شرفت البلوج

ايوية said...

والله ياقطة انا عندى اقتراح للحكومة المبجلة يمكن تقدر تجيب مصاريف المنتدى العالمى
مزاد كبير قوى
تبيع المصريين الى هناك بدل متحلهم من بلدهم واهو الحكومة ترتاح واحنا يمكن نلاقى حد كويس يشترينا
وبيع شعبك بيع شعبك شوف الشارى مين

اهو ده عيبه said...

ازيك يا قطتى

يدونى ياختى نص مليون واستضيف المنتدى ده فى بيتنا

ولما احنا شعب مقرف كده وريحته وحشه ووشنا يقطع السياحه من البلد ما يدونا قرشين كويسين ونوعدهم نسيب البلد باللى فيها ونمشى

ونبقى كده ريحنا واستريحنا

Desert cat said...

الربان
استاذى العزيز لو كل مسؤل نظر بعين الرأفه لطفل من أطفال الشوارع اللى مش بيشوفوهم بس بيسمعوا عنهم لان عظمة موكبه وهو معدى فى الشارع تمنعه من انه يشوف المناظر دى وكمان عينه تبص على الفقرا والستات الغلابة المفترشات الطريق بيبعوا درة او اى حاجه تجلب لهم مصدر رزق شريف او طفل يوقفه فى اشاره كان عرف انه البذخ اللى هو فيه ده من دم الناس دى وعرقهم يمكن وقتها كان استحرمه على نفسه وحس بتانيب ضميره انما هيشوف كل ده فين والدنيا كلها بتتقفل علشان موكب معاليه المهيب يعدى علشان كدا حاسين ان التبذير اللى بيبذروه على نفسهم حق مكتسب خليهم يزيدوا فى طغيانهم وحقنا موجود عند ربنا
احترامى وتقديرى

Desert cat said...

.:.-=- ELGaZaLy-=-.:.
بصراحة لاء انا مش بعرف احوش من المصروف
اصل انا اللى بيدلهم المصروف بتاعى كله يحوشوه هما بمعرفتهم
يعزموا رؤساء وسفراء ياكلوهم على حسابنا
مش مسمحاهم بصراحة
تحياتى

Desert cat said...

Migo Mishmish
تصدقى يا مشموشة راح من بالى موضوع الاكل الغالى اللى فى شرم ده
لاء ليهم حق يرحلوا المصريين وينضفوا المنطقة
شوفتى البجاحه بيرحلوا المصريين من بلدهم
من بلدهم
من بلدهم
علشان يستقبلوا اغراااب
وكمان بياكلهوم اكل غال ومن فلوسنا احنا
حار وناار
نورتينى يا جميله

Desert cat said...

ايوية
هما لو ضامنيين يا يويو انهم يلاقوا حد يشترى مكانوش اتاخروا لحظة
انما عارفين اننا مش هنجيب ربع جنيه حتى طمنينى على نتيجة الامتحانات
حتظهر امتا

Desert cat said...

اهو ده عيبه
ازيك يا دولى
اولا الف مبروك
ثانيا هما لما يدولنا فلوس ويرحولنا من البلد هيزودوا ارصدتهم فى بنوك سويسرا ازاى
وهيصرفوا المصاريف اللى بالهبل دى على معازيمهم فى شرم وفى الغدقه وفى كل المدن الساحلية ازاى ؟؟
هما يا حبيبتى عارفين ان الشعب مش لاقى ياكل
وبالرغم من كدا بيرفعوا الاسعار والضرايب وكل حاجه ممكن تجيب لهم فلوس
عارفين ان الناس هتزعل وتضايق وتهرى وتنكت فى نفسها بس فى النهاية خرس هيبيعوا بيوتهم وكلاويهم والكبد والقوانص بتاعتهم واى حاجه ممكن تتباع علشان يدفعوا لهم
وهما يرفوا بقى على اصحابهم ويخرجوا ويتفسحوا وكدا يعنى
نورتينى يا جميل

Desert cat said...

مثلية فقط
اولا شرفيتنى جدا
المهزلة مش ممكن تنتهى طول ما احنا شايفين وساكتين على الوضع ده والمهازل من حوالينا
وفعلا زى ما قولتى هما ياخدوا من جيوبنا ويصرفوا على صحابهم وصحابهم يردوا لهم الزيارة باحسن منها وتتكرر العزومات والضحية هو الشعب
لنا الله
نورتينى وشرفتى البلوج

اجندا حمرا said...

قطتنا العسل اللي دايما موضوعاتها في الصميم
:)

ححكيلك ياقمر حكايه ايام ماكنت بشتغل في مستشفي حكومي

ماما سوزان كانت حتزور المستشفي ديه و طبعا الحمامات هناك كانت في حاله يرثي لها و هي كانت زارت المستشفي دي اعتقد قبل كده و طبعا بهدلت الدنيا لما لاقت الحمامات مش ولابد (اصلها كانت عايزه تدخل)
المهم عشان ماطولش عليكي عملولها حمام خصوصي اتكلف الوف متلتله يعني تدخل الحمام مش عايزه تخرجي منه رخام ايه و تبرابيزه و حركات حاجه كده ولا الخيال تروحي بقه لحمامات بقيه المستشفي حاجه تقرف و توجع البطن
الفلوس بتظهر في الأوقات دي لكن غير كده مفيش ميزانيه
الواحد اتخنق بجد

تحياتي ليكي و محبتي ياقمرايه

واحد مصرى said...

القطة العزيزة المتمردة
لأ يا ستي ما بيسمعوش عن الناس اللي
مش لاقية العيش و مش ناويين..و على رأي الاخوة اللبنانيين زملائنا في المهجر دايما لما يتعجبوا من شيء يقولوا (العمى...شو)

بس اللي عندنا يتقال لهم العمى و الطرش و هدية من عندي بأقولهم أتفوووووو

دمت بألف بخير

ملك الكبدة said...

يعني برضه يرضيكيان سمعة مصر تتوسخ من منظر العامل الفقير اللي شغال في شرم ولا يرضيكي ان حد يبص بصة مش ولا بد لاي واحد من الضيوف يجرح محاسيسه

يا بنتي افهمي بقى

شعار القائمون على مصر

مصر شمعة تحترق من اجل الاخرين

Heart Beat said...

Dear Desert Cat

و الله يا قطة اذا كان على الفلوس ... دي بحر مالوش اخر ... انتي بس اطلبي اللي انتي عايزاه من الحكومة يجي لك لحد عندك

بس المهم ان تتوفر فيكي الشروط التالية

ان تكوني من اعضاء الحزب الوطني
ان تكوني من اللي مابيدخلش في اللي مالوش فيه
ان تكوني ممن يطبقون شعار سمعا و صاعة يا ريس
ان تكوني ممن يطبقون شعار ... انا ماشوفتش و لا سمعت حاجه
ان تكوني على دراية تامة ان مافيش حاجه اسمها ازمة عيش و ان الاسعار دي ازمة دولية
و لسه في شروط تانية بس مش فاكراها دلوقتي ... لكن لو انتي شاركتي في اول طلعة جوية و باب الحرية او حد من قرايبك يبقى يا هناكي يا سعدك بقى

تتوقعي ايه من حكومة عايزه تبعت ستات مصر يشتغلوا خدمات في دول الخليج ...تتوقعي ايه من حكومة كل شهر تغرق ولادها في البحر و تأكلم للسمك

لازم يقرفوا من العامل المصري الغلبان

اصل شرم الشيخ دي مش في مصر ...دي بلد تاني جوا مصر ... لازم سكانها بقى مايبقوش مصريين ...لآزم يكونوا بيشتغلوا في حديد عز

تحياتي

Miso soup said...

يا ستي البلد بلدهم يعملوا اللي هما عايزنه و احنا مجرد ضيوف ... بطلوا بقي حقد و لو ان اكرام الضيف واجب .. مش كده و الا ايه (علي راي الله يرحمه)!!! ١

سمراء said...

احتمالات كثيرة
الاول : ممكن يكون دة كرم حاتمي يعني حد يقولك اجي عندك وتقولى له لا حتي لو هتدبحي الحصان اللي حلتك
الثاني : نرمي شوية ملايين هترجع لنا مليارات دي سياح وجية البلد وده يعني رواج سياحي واقتصادي
الثالث : عيني عينك كدة علشان عارفين ان الناس اللي بتقولى عليهم هيموتوا من الجوع معدهمش غير انهم يكشفوا راسهم ويدعوا عليهم زي الولايا
تحياتي
سمراء

محمد صالح said...

والله انا بتفق مع ملك الكبده
لان شكل العامل الكحيان فى شرم مش هيعجب الناس اللى العامل عندها بيشرب سيجار من كوبا(تعبير مجازى)فهيتقرف ويرجع من معميعه لما يشوف العامل بتاعنا وكمان الحكومه المبجله الرشيده بتاعتنا مقبضهم وصرفه دم قلبنا عليهم

Son of Egypt said...

ازيك يا قطه علقت قبل كده على مدونتك ودعيتك لمدونتى ومش زورتينى انما ده اخر كومنت ابعته ليكى وانا بس هقولك زى ما الناس بتقولى خلى بالك من نفسك
وإن كنتى عايزه تعرفى بيقولوا كده ليا ليه التفضلى زورى مدونتى وانتى تعرفى
السبب

وجهة نظري said...

كان بدال ما يدفعوا 30 مليون دولار في الهبل إلي مش حايجيب نتيجه، كانوا إشتروا بيهم 2 والا 3 مليون طن قمح بدل ما إحنا بناخد معونات قمح من الإمارات دلوقتي

لو موصلكيش الخبر، رئيس دولة الإمارات إبن الشيخ زايد بعت هديه مليون طن قمح لشعب مصر الغلبان الشحات إلي مش لاقي ياكل عيش حاف حتي

ربنا يا ياخدهم يا ياخدنا

شـمو نشـادر said...

بلدهم يا كات ..
هو انتى كنتى فكراها بلدنا ولا ايه ؟! ..
دى بلدهم من زمان اوى ..
خليهم يرحلو العمال ..
اصل اكيد العمال منظرهم مش هيبقى فوتوجونيك قدام الوفود الاجنبيه ..
معلش .. خييييييييييير .. انما للصبر حدود ..
احييكي ع المدونه الأموره ..
وعازمك على فنجان قهوه فى مدونتى المتواضعه ..
تحياتى ..
أسامة أمين

مواطن مصري said...

هههه

بطلو حقد
بقى
ابن الريس و لقى مصلحة
هنحقد علية

مش كافية ال 33مليار دولاؤ بتوع الاحتياطي

bastokka طهقانة said...

مش كان اولى يتبرعوا بالفلوس دي لبناء كام فرن للغلابة و اهو كان يبقى ثواب يمكن يمسح من سيئاتهم
بس اقولك ربنا بيطغيهم اكتر و اكتر علشان ميفضلش عندهم و لا حسنة يوم القيامة

احنا غلابة قوي
اوروفوار

Tamer Nabil said...

ياسلام على العز واكل الوز

قمال فى اشاعة بتقول ان الحكومة مش معاها فلوس تصرف على البلد وبتشحط علينا

عجايب

تحياتى

blackcairorose said...

قطة

فيه حاجات كتيرة ممكن نشوف انها بتكلف والمردود بتاعها محدود او مش مطلوبة اساسا طالما بنعانى من حالة اقتصادية سيئة زى مهرجانات السينما والمسرح مثلا او اية احتفالات او مؤتمرات مثلا الخ

يمكن الحاجات دى تكلف الملايين فى وقت تعانى فيه الاغلبية من الغلاء

بعض هذه التظاهرات قد تكون مفيدة وبعضها لا بس يتبقى اننا نرشد ونغربل المفيد من غيره

وعموما مصر فيها خير وفيها فلوس، المسألى زى ما قلتى مش فقر ولكن.....

Rania said...

ما قلنا قبل كدة يا قطة
مشكله مصر ان مفيش وسط
الغنى قوى و الفقير قوى
الى عنده شقق و فيلل و شاليهات
و الى معندوش اوضة و صاله يقعد فيها
و فى الاخر محسبوبين من دول المجاعات
و امريكا بيتدينا معونات
اخر معونه كانت 20 ملييار دولار لينا و للفلبين
اصلنا وحشين و عندنا مجاعه
و تيجى تتكلمى على الاقتصاد
يقولك
لالالا اوعى الا الاقتصاد
اقتصاد مصر ماشى فله
طب فييييييييييييين يا بشر
فين الفلوس دى

الله اعلم

تحياتى

عاليا حليم said...

تعرفى انى عينى دمعت من البوست ؟

اقولك أيه ؟ المصرى هو الى عمل فى نفسه كده

Desert cat said...

اجندا حمرا
صاحبة اجمل مواضيع من ارض الواقع
الجميلة اجندة
البلد فيها فلوس ومليانه خير بس بيسختسروها فى ناسها
بدليل ان الفلوس بتظهر وقت زيارة المسؤلين
وبتظهر فى استضافتهم للرؤساء والملوك ومليارات الدولارات
انما تيجى على المصرى يبقى مرتبه 150 جنيه ويبوس ايده شعر ودقن هو يطول مش كفاية مستحملينه فى بلده اللى حامل جنسيتها كمان عايز يقبض مرتب
نروتينى يا اجمل اجندة

Desert cat said...

واحد مصرى
هديتك مقبولة يا ايهاب
وانا كمان بضيف لهم عليها هديه مماثله
واى حد عايز يهادى يتفضل
تحياتى

Desert cat said...

ملك الكبدة
اه على رايك يا ملك
البهوات والبشوات اللى جايين مش بيشوفوا الحاجت اللى اسمها عمال مصريين دى خالص
هما بيشوفوا فى مصر الاهرامات والفراعنه ومبارك
غير كدا ميعرفوش ولا لو شافوا العمال المصريين هتبقى فضيحه
تحياتى

Desert cat said...

Heart Beat
صديقتى الغالية جدا
احلى دقات قلب
الشعب كله مسلوب الاراده ولا هو عارف يبقى وطنى ولا عارف يبقى معارضه
علشان كدا مش لاقين رغيف العيش
عمال غلابة سايبين اهاليهم ورايحين يدورا على اكل عيشهم يرحلوهم من بلدهم
علشان الوفد ...
فى بلد محترمة بتعمل كدا فى شعبها
ربنا يخلى اونكل حسين سالم للحكومة وجيمى احنا كدا ضمنا ان الشعب يترحل على اقرب محيط
نورتينى يا جميله

Desert cat said...

Miso soup
اكرام الضيف واجب فى حالة لو اهل البيت لاقيين ياكلوا
انما اهل البيت بتيجى لهم معونه
ونوجب مع الضيوف بملايين الدولارات
ده يبقى صاحب البيت بخيل اوى على اهل بيته ويستاهل ال؟؟
كدا يعنى
ههههههه
تحياتى

Desert cat said...

سمراء
والله يا سمراء الضيوف نضايفهم على قدنا مش بذخ وترف على الضيوف وندبح لهم الحصان اللى حيلتنا
واهل البيت بياكلوا فراخ ميته بفعل انلفونزا الطيور
فعلا لا نملك سوى ان ندعى عليهم فى ساعه مغربية
نورتينى يا جميل

Desert cat said...

محمد صالح
وجهة نظر برضه
بس كان ممكن الموضوع يتحل
ويجوا على نفسهم شوية ويصرفوا لكل عامل لبس شيك يليق بمقام الضيوف ولو ياخدوه منهم حتى بعد ما الضيوف يمشو
لكن من الواضح ان قطع العيش بقى مزاج عند حكومتنا من اول تخصيص القطاع العام لحد ترحيل العمال من شرم
تحياتى

Desert cat said...

Son of Egypt
يا سلام انا اجى لك على عنيا يا فندم انت بتقول ايه بس
تلاقنى انشغلت فى حاجه والله
لكن حاضر ها اجى اشوف الموضوع بتاع حضرتك
يارب دايما مشرفنى بزيارتك

Desert cat said...

وجهة نظري
للاسف شوفت يا فندم الخبر فى بلوج استاذ الربان
حكومتنا الغير رشيده تصرف ملايين الدولارات على ضيوفها وشعبها يجى له اعانات من الخارج
فضيحة نظام وشعب انتهكت كرامته
ولا عزاء للكرامه
تحياتى

Desert cat said...

شـمو نشـادر
انا كنت عايشه فى وهم انه طالما شاهادة الميلاد والبطاقة الشخصية مكتوب فيها الجنسية مصرى يبقى من حقنا انها تكون بلدنا
لكن طلع حبر على ورق والعمل بيه غير سارى
يشرفنى زيارة مدونتك
احترامى وتقديرى

Desert cat said...

مواطن مصري
هو ابن الريس لاقى مصلحه واحدة بس
ده ربنا فاتحها عليه من وسع
عقابلنا يارب
تحياتى

Desert cat said...

bastokka طهقانة
بتقولى ايه بس يا طهقانه
هى مصر برضه فيها غلابه
علشان يتبرعوا لهم بفرن عيش
مصر فيها عشوائيات ودول يستاهلا الابادة علشان مش يعملوا لهم صداع اكتر من كدا مش فرن عيش
نورتينى يا جميله

Desert cat said...

Tamer Nabil
اشاعات بقى يا تامر
الحكومة المصرية غنية لدرجة ان بيجى لشعبها معونات
تحياتى

Desert cat said...

blackcairorose
مصر كفاية عليها دخل قناة السويس والسياحة لو يوزعوها على الشعب بالعدل وباقى الموارد ياخدوها هما مكانش فى ازمة
انما الطمع وحش ومكوشين على كل حاجه
وسايبين الناس تغنى ظلموه
نورتينى يا جميله

Desert cat said...

Rania
مسمعتيش يارانيا عن طن القمح اللى اتبرعت لينا بيه الامارات
شوفتى المهازل وصلت لفين
حكومة بتصرف ببذخ وشعب عايش على المعونات ولسه البقية تاتى
تحياتى

Desert cat said...

عاليا حليم
اسفه يا عاليا على اى ضيق نفسى سببته لك الكلمات
لكن والله حاجه تحرق الدم
واحنا فعلا اللى بسكوتنا وخضوعنا ارتضينا باى حاجه تتعمل فينا
تحياتى
وكل سنة وانتى وعندليبات بالف خير

لورنس العرب said...

احنا أجدع ناس نصرف على الهجص

tamer.sala7 said...

طيب انتي بتقولي دافوس ومنتدي اقتصادي وبوش موجود يعني لازم يحصل كدة خدي عندك بقي نواب المجلس الموقر شاغلين نفسهم بأيييييييه ؟؟
ارواح ودينا
حلي الفزورة تكسبي خروف بمبي من عند ابي

ايوية said...

معقول يا قطة كمان مبقاش لينا سعر حتى شوال دقيق من الى منتهى الصلاحية طيب
ربا يخليكى على سوالك النتيجة فى شهر 8 انشلء الله

Desert cat said...

لورنس العرب
احنا اجدع ناس تقول معاييش ووقت الهجص يبان ملايين
تحياتى

Desert cat said...

tamer.sala7
يا تامر دى التافهه فى تبهى صورها
متحطش فى بالك
تحياتى

Desert cat said...

ايوية
هما لو لاقيين مننا فايده كانوا باعونا من زمان يا يويو
انما سايبنا كدا لحد ما نزهق وننتحر انتحار جماعى
يارب يا حبيبتى تظهر نتيجتك على خير وان شاء الله تنجحى باعلى تقدير وتحققى ما تتمنى
محبتى يا جميله

Miso soup said...

لا يا قطة انتي فهمتي التقسيمة غلط ... اهل البيت (مش النبوي) هما العائلة الحاكمة و الحاشية .. احنا بقي يا ريت يعتبرونا ضيوف مش خدم

Desert cat said...

Miso soup
لما تلبس الاسموكن
وتشترى شوز من امريكا والدول المتقدمة
وتتكلم انجليزى يا مرسى
وقتها هيعتبروك ضيف ويصرفوا ملايين الدولارات كمان

Miso soup said...

لا يا قطة انتي بقيتي outdated
دلوقتي محدش بيلبس اسموكن ممكن بدل ايطالي او حتي ممكن تمشي كاجوال و الجزم كمان لازمن و لابد تكون طلياني و الاهم من ده كله ان يكون في حسابك بالبنك رقم لا يقل عن السبع اصفار (لو عملة صعبة ( و لو ان صعبة ده بقت نسبية يعني لو انا مصري فالجنيه مبقاش سهل)) و لا تقل عن تمن تسع اصفار بالمصري ... ها انتي معاكي كام صفر بقي!!!! ١

Desert cat said...

Miso soup
والله لو متوفرة فيك كل المواصفات دى
ادينى رقم تليفونك وعنوانك
علشان اجيب بابا ونيجى نتقدم لك
وعد ما تبقى قدام امر واقع
وقتها هقولك اان عندى كام صفر

Miso soup said...

هههههههها تبقي مش تعرفي انتي الاول انا عندي كام صفر!!!!!!!!! :)

Desert cat said...

Miso soup
ما انا قولت لو متفره فيك كل المواصفات اللى ذكرتها اعلاه
ساعاتها الاصفار هتبقى بالكم مش بالكيف

Miso soup said...

خلاص سيبيني افكر ههههههها :) .. (علي فكرة بالكم يعني كام صفر .. وبالكيف يعني اخضر و لا احمر و بحلوقي .. بس نصيحة انا لو منك اهتم بالكيف (مش اللي في الدماغ) و الكم)) ١

Desert cat said...

Miso soup
ايه ده هو علشان انا اللى ها اجى اتقدم لك تقولى افكر
ده انا هرحمك من تعب تحديد الميعاد وتبقى جاى خايف انك تترفض وفى النهاية عموما من باب الديمقراطية هسيبك تفكر لمدة 10 دقايق 10 دقايق وثانية هسحب طلبى وانت الخسران
انا حسبتها بالكم علشان من السهل نغير للكيف فيما بعد
اما لو انت تملك الكم والكيف فى وقت واحد يبقى اشطه خالص يعنى

Miso soup said...

خلاص طالما انتي حسبتيها بالكم خلاص خليهم ١٠ برضه بس يا ريت يكونوا ١٠ ساعات و انتي بقي الكيف مش هايفرك معاكي .. اه احسن ده قرار مصيري :)

Desert cat said...

Miso soup
لالالالالالالا
انا كلمتى لا يمكن تنزل الارض ابدا
ولا اقولك تنزل المرة دى
خد لك عشر سنين انا مش مستعجله

Miso soup said...

١٠ سنين لااااااااا ده انتي بعتي القضية خالص

Desert cat said...

Miso soup
بقولك ايه
ارسى على بر احسن هغير رائي
عشر ساعات دى مينفعش
هو اما 10 دقايق واللى فات منهم دلوقتى 9 دقايق يعنى باقى قدامك دقيقه او عشر سنين وانت الجانى على نفسك بقى

Miso soup said...

لا لا لا لا خلاص لا ١٠ و لا ٩ خلاص خلاص انا موافق :) ١

Desert cat said...

Miso soup
ايوا كدا
كان لازم يعنى تشوف العين الروز
علشان توافق

Miso soup said...

اللللللله هيا روز ... دا انا بحب اللون ده موووووت

Desert cat said...

ههههههههههه
اى خدمة

Miso soup said...

ميرسي كتير