صباحو خناقات ... بركاتك يا علاوووة

من امبارح عمال ادفع فى المواصلات الضعف ... الصبح قبل ما اركب لاقيت السواق بيقولى الاجرة دوبل يا اوستااااذه .. مش رديت عليه اصلى بامانة على الصبح لما برد على حد يبقى ربنا يكفيه شرى وشر اللى بقوله وبالتالى علشان معملش مشاكل بفضل قلة الرد بدل ما ابتدى اليوم بقسم ولا مستشفى .... وانا مروحه بالليل مناااااااااحه فى الميكروباص واحد شكله راجل وقاعد يقول انا هخلى العيال الكبيرة تبطل دراسة ... الواد الكبير فى اولى جامعه يقعد كلهم لحد الاعدادية ويقعدوا فى البيت انا هجيب له مواصلات منين الواد عايز مواصلات بس للزقازيق عشرة جنيه طيب واخواته الباقيين ياخدوا ايه وياكلوا منين اذا كان مرتبى كله على بعضه 400 جنيه ابص جنبه على حد يرد عليه مش لاقيه اتارى الراجل طلع قاعد بيكلم نفسه .... قولت اكسب فيه ثواب وارد انا علشان الناس متاخدش عنه فكرة انه اتجنن ولا حاجه وقولت له هو ده الحل يعنى انك تقعد ولادك من التعليم علشان تعرف تعيش .... قالى امال عايزانى اعمل ايه معنديش اى مصدر دخل غير وظيفتى ... انتى ابوكى هيعمل ايه وانا اعمل زيه ... قولت له انا ابويا مش هيعمل حاجه اصل للاسف انا اخر حاجه عنده والكبار كلهم عندهم بيوت ومنهم الى سابوا البلد وهجو منها خالص وانا الحمد لله بشتغل وبصرف على نفسى وبالتالى ابويا مش عامل ولا هيعمل .... قالى طيب انتى واحده عيشتها كويسة بتبصى علينا احنا ليييه ما تخليكى فى نفسك ومش تتحشرى فى حياة الناس ... قولت له تصدق انا غلطانة انا اللى استاهل انى حبيت اساندك واوسيك فى الوكسة اللى البلد كلها فيها دى ... مش عارف تتشطر على اللى خلوك تكلم نفسك جاى تتشطر عليا انا .... شعب مش بيجى غير بزيادة الاسعار صحيح .... الصبح جاية فى الميكروباص .... قاعده قدامى واحده ست دفعت له الاجرة القديمة اللى متعودين عليها قالها الاجرة جنيه يا ست قالت له مش هدفع غير نص قالها طب انزلى ... قالت له مش نازلة ومش هدفع غير نص ... راح مفرمل وقالها مش شغل عافية هو كل حاجه سعرها زاد وانتى مش احسن من الناس دى كلها قالت له يابنى انا نازلة قريب وبعدين انا راكبة الصبح بنص جنيه .... رد واحد من اللى قاعدين ورا قاله يا سيدى اطلع وانا هدفع لك الفرق متاخرين على اشغالنا ... راحت الست قالت لاء محدش يدفع لى حاجه انا هدفع نص جنيه بس .... راح السواق مسمع للجميع الشخرة اللى هيا اللى تصحى الميتين بامانة ربنا يعنى حاجه كدا مستوردة اتخن شنب فى بلاد الانجليز ما يعرف يعملها ... ويلللللللللله كله هينزل انا مش شغاااااااال انا مش بتاع شغل يعلن ام دى بلد بنت تييييييييييت ... يلعن دى حكومة بنت 60 تييييييييييت ... كل واحد دفع اجرته ياخدها انا مش شغال انا طافحه من امبارح ... انا روحت للدكتور بالليل علشان زورى وجعنى من المناهده مع الناس طول النهار حتى الدكتور ابن التيييييت رفع سعر الكشف ....... والله كان هاين عليا انزل اطبطب عليه واقوله معلشى والف سلامة عليك ياريس لاء بلاش ياريس احسن يدينى بضهر ايده ... الف سلامة عليك يا هندز .. بس قولت اشوف اخرتها ايه الاول ... والناس تتحايل عليه ويقولوا له متاخرين يابنى وواحدة ست قاعده تقوله حرام عليك انا مقدرش ااقف على رجلى اصلا انا رايحة للدكتور وده اللى طالع عليه البلد بنت التييييت والحكومة بنت 60 تييييت وانا اضحك والله ما كنت عارفه انا بضحك على ايه بس طلبت معايا ضحك مسخرة مسخرة يعنى ولا كانى كنت مش فى وعييى ولا حاجه .... ولد شاب واقف بيقولى انتى بتضحكى علينا ولا على اللى بيحصل لنا قولت له بضحك على نفسى .... وانت ايش اخششك بينى وبين نفسى والخاشش بينى وبين نفسى خشران .... وكل ده والناس عمال تتحايل على السواق وهو لسانه ربط على شتيمة البلد والحكومة وفى الاخر مفيش حل بقى قضيناها تكاتك .. ولسه بركب التوكتوك لاقيته بيقولى ها اخد 4 جنيه يا ابله قولت له ياعم اطلع اربعين عفريت لما يركبوك انت واللى رفعوا الاسعار ..... على فكرة انا دفعت 4 جنيه على مسافه هتاخد بالظبط 10 دقايق مشى .... طيب ايه هنفضل كدا ناخد على قفانا .... انا دمى محروق على الـ 4 جنيه اللى دفعتهم وكمان مش عندنا سجاير
حد شاطر وحلو كدا يبترع ولو بعلبة سجاير كيلو باترا انا راضية باللى مرسوم عليها فشة بايظة بس الاقيها بلدنا مفيهااااااااااااش
والدوفى دوف اللى عندى بح مفييييييييييش
بركاتك يا علاووووووة
تحديييييييييييييث
علشان ايه اقعد انا نص ساعه مش عارفه ادخل البلوج بتاعى
كل لما اجى افتح المدونة الاقي رساله فيما معناها منعطلكيش تعالى بعد نص ساعه
واسال كل اصحابى على الماسنجر مدوناتهم بتفتح وشغالة وزى الفل
ويعنى كدا الناس تشمت فيا وتقعد تقولى هنجيب لك عيش وحلاوة وحلاوة من غير عيش اصله مش موجود
طيب والنبى لو فعلا ظنون الناس اللى كانت بتتريق عليا دى صح يبقا الاخوة اللى قاعدين لى هنا هشششششششش يهوونا حبة
انا لا انا عاملة ثورة فى البلوج علشان اقلب نظام الحكم ولا منزله افلام سكس علشان تتفرجوا عليها وفى الاخر تقولوا بتبوظ اخلاق الشباب انا واحدة غلبانة بتيجى تفك عن نفسها بكلمتين
فى حاجات تانية تستاهل اهتمامكو اكتر منى ... وتستاهل تقفلوها نص ساعه ونص قرن كمان

Comments

معقوله انا اول تعليق
لا انا كده مخضوضه انا حخرج و ارجع تانى اصلى بخاف اكون لوحدى
الحمد لله ماطلعتش اول تعليق ...قطقوطه حاجبه التعليقات و الله اتخضيت....و من الخضه نسيت كنت حقول ايه
مش مهم بلاش كلوباترا يا قطقوطه ديه كلها نشارة خشب ياماما و قش رز....اشربى معسل...
...بصى بقى انا خلاص ماليش نفس اتكلم جد لانى مفروسه فرسه سوده من ساعة الزفت العلاوه اللى ماكانش ليها لازمه...قال و امبارح وزير الاستثمار يقولك ارباح الاستثمار مش عارفه كام ملياااااار
يخبر اسود و مهبب امال زودتو النيله الاسعار ليه....انا زهقانه و مفروسه على الااااااااخر
Tamer Nabil said…
باين عليها هتولع اكتر

وكل يوم هتولع

ربنا يحازى اللى كان السبب

قوللى امين ياقطة

تحياتى
gehad_fci said…
هههههههههههههههههههه
يخربيت دي علاوه طيب الناس اللي شغاله في القطاع الخاص هما اللي هياخدوا علي قفاهم تقولش يعني زودوا العلاوه 100%دول هما يداوب تلاتين يعني مش حاجه
انصحك زي مانا هعمل كدا ان شاء الله تجيبي عجله بدل الشحطته بين الميكروباصات والتاكسيات او موتوسيكل ولا بلاش احسن بيستهلك بنزين
علي فكره الاسعار ثابته علي بنزين 80 يعني لو الميكروباصات بتاعتكوا قديمه يبقي الراجل بيضحك عليكوا
وابقي سلميلي ع العلاوه
تحياتي
Desert cat said…
انتى بالفعل اول تعليق
واول تعليق نور وزاد شرف بحضورك الجميل
Desert cat said…
واحدة مفروسة
هو انا لاقيه كيلو باترا بقش رز ولا حتى بسنابل القمح
والله شكلى كدا هقضيها معسل وخلاص
هو شكل الراجل الوزير ده كان طالع يغيظنا
شايف الدنيا بتغلى وجاى يغيظ الشعب
منهم لله
Desert cat said…
Tamer Nabil
اميييييين يا تامر
امييييين
Desert cat said…
gehad_fci
انا قدمت على قرض للشحاتين علشان اشترى بيه عجلة تنفعنى فى الايام المهبةة دى
ربنا يسترها يا جهاد
appy said…
انا عن نفسى همشى اخانق فى كل بتوع الشرطه والجيش ومش هخلى حد يشوف طرف رخصتى ويبقوا يوونى هيعملوا ايه
ما هو ده اللى قولنا للحكومه الغبيه بنزين يا غجر يعنى كل حاجه لانه النقل كله ربنا يأخدهم يا رب اقلبهم كلهم فى اتوبيس سياحى سواقه يكون اعمى ويروحوا المستشفى محدش يلحقهم
يا رب خلصنا منهم بقى
وبطل ضحك بدل ما الناس تشدك من شعرك وتفك الحجاب بتاعك
الضرب فى الميت حرام عااااااااااااا
اصلى من امبارح بضحك وبعيط نيهاهاهاها
ههههههههههههه
هههههههههههه
بجد دنيا بقت مسخرة
وانا من امبارح طالبة معايا ضحك
وماشى اتفرج على الناس فى الشوارع والخناقات والسرقة بالاكراه
وده حال البلد بنشطر على بعض
وحسبى الله ونعم الوكيل
بس بجد انا فرحان ان السجاير زادت
وفرحان فى اللى بيدخنوا
طبعا انتى لا
تحياتى يا قطة
خرطوشه من عندي ولا تزعلي نفسك.

إيه يعني الاجره زادت والا الراجل حيطلع عياله من التعليم.... مش عايزين تستحملوا أبدا يا أغنيا علشان الفقرا؟؟

الراجل المفتري عنده عيال بيتعلموا؟؟ شوفتوا الغنا الفاحش إلي هوا فيه؟ مش عايز يضحي ومش عايز يصدق إن في ناس تانيه ميعرفوش يعني إيه مدرسه أصلا

إنتوا بجد شعب متدلع ومش عايزين ابدا تخرجوا من عنق الزجاجه... خليكوا كده تستاهلوا

وبعدين بقي الراجل دا لازم يتحول للمدعي الإشتراكي... منين بياخد 400 جنيه؟؟ هاا؟ شوفتي الإفترا؟ ومش عاجبه الكلب... إخص عليه

بس والنبي أمانه عليكي توصلي لـ آبي .... متعمليش في نفسك كده يا أختي، متاخديش كل حاجه علي أعصابك.... يا عيني، البنت إتجننت
قطتنا الجميله

صباحو عسل انشاء الله
لسه قاريه ان سواق ميكروباص فتح دماغ راكب بالمفك لما الراكب بيأوح في تمن الأجره

صعب عليا و الله الراجل اللي ناوي يطلع ولاده من الجامعه و المدرسه بس معذور حيعمل ايه يعني؟حيأكلهم منين؟ربنا ينتقم من اللي كانوا السبب
بس مالوش حق طبعا يزعق فيكي كده
يعني ذنبك انك عايزه تصبريه في بلوته؟راجل ناقص بصحيح
معلش ياقطتنا و لا تزعلي نفسك

السجاير و النبي ياختي ماتكلميني عنها
دأحنا حنشوف ايام
سودا بعيد عنك و عن السامعين

السجاير يااوختي زادت المستورده زادت في العلبه 2 جني بحالهم شوفتي؟طب حننفس عن طاقتنا و غلبنا في ايه بقه؟

لسه واحده زميلتي بتقولي كانت في المجمعات الاستهلاكيه بتاعت الحكومه و كان بيحكلها البياع هناك ان اورزقي بتاع كوشوك جه ليله الحادثه الشنيعه بتاعت زياده الأسعار قبل ماترتفع يعني و اخد منه خراطيش سجاير بحوالي 4 الاف جني عشان يستفيد من زياده الأسعار 3 اضعاف

و كلو واحد و شطارته بقه

ربنا يتولانا ياختي
و من عندي و لا تزعل ياقمر خرطوشه مستورد تيجي لحد عندك كمان
:)
فاتيما said…
تعرفى يا قطة الراجل دا فعلا عنده الف حق يكلم روحه ّا كنت أنا من دلوقتى و يوسف لسه موش معايا عمالة بفكر لما يرجع هدخله مدرسة منين و اصرف عليه و امال لو كان عندى ولدين تلاتة كنت عملت إيه فى روحى منت همشى زى الراجل دا أكلم نفسى برضو ...
متلوميش عليه رده عليكى كدا هوه موش دارى بروحه يا ولداه
و ربنا يسترنا جميعاً و ميفضحناش أكتر من كدا بقى
Miso soup said…
طب و بعدين ... اهو عمال تييييييييييت تييييييييييت تييييييييييت و احنا كلنا عمالين نعمل تييييييييييت تييييييييييت تييييييييييت من اول امبارح .... طب و بعدييييييييييين
والله والله الناس ماشيه تكلم نفسها واكيد انتو شيفين لان هما مبيشفوش
وانا جاى من الشغل فى المكروباس المشروع بالاسكندرانى يعنى
راجل ورايا كدا شكله غلبان كان بيقول ايه بيقول
ان احمد عز قالهم لازم ندى فلوس لمحدود الدخل انتم عندكم عربيات مكروباس بميت الف جنيه متزودوش الاجرة علشان الناس الغلابه فهمتو حاجه المهم الراجل دا اكلم شويه كلام من خنقته انا كان هيجيلى شلل ونزلت فى نص السكه مقدرتش استحمل
الناس بقا شويه جهل على تخلف عشش فى عقولنا عل فقر واميه فى كل شىء على مجتمع هرس الناس طحن الناس دمغها بقت كنافه بجد بسمع تعليقات فى الشارع تخلينى هتشل وانا ماشى
قطتي

اربعه جنيه في توك توك
ليه ماله اتوبيس احداشر ولا ماكونتيش لابسه الكوتشي


سلاموووووووووز ياقمر

وزة
tamer.sala7 said…
طيب انتي بتقولي الراجل شخر للركاب انا كل ما امشي في حتة عمال اشخر لأي حد في اي وقت حتي المدير بتاعي في الشغل شخرتله علشان منزلي خصم قولتله يعني هي المشرحة ناقصة قتله
والله عندنا ناس اتهبلت بس حنعمل ايه غير اننا نعلنها بأعلي صوت كلنا ضد الحكومة
Desert cat said…
appy
آبى فى حالة هذيان
نياهاهاهاها
اهدى كدا صلى على النبى
متعمليش فى نفسك كدا يا حبيبتى انتى غالية عندنا يلعن ميتين الحكومة على اللى اخرهم انا عن نفسى مش اخترت حد والله العظيم طوعيت على الدنيا لاقيتهم كدا
نفسى يبقى لى حق الاختيار يا جدعان
انا لو شوفت الست الىل مصدعانا ليل نهار باخترناه وقرفنا معاه محدش يلومنى على اللى هعمله فيها ساعتها
ده شكلى انا اللى فى حالة الهذيان ان الشعب كله يهذى ويكلن نفسه عاجبك كدا يا بابا حسنى
Desert cat said…
همس الاحباب
فرحان ان السجاير زادت وفى اللى بيدخنو
طب لما اشوفك يا خاااااااالد
احسن لك تستخبى اليومن اللى جايين
Desert cat said…
وجهة نظري
يعنى اعتبر ده وعد هتبعت لى خرطوشة بجد انا دلوقتى بتلكك على اى حاجه حتى لو بعتلى سجارة واحدة مقبولة
هما شكلهم هيرجعونا لايام الملكية تانى هو احنا لسه هنرجع ما احنا رجعنا وخلاص
ميتعلمش غير ابناء البشوات والبهوات
والباقيين يااااى فلاح خرسيس تعليم ايه عايز يتساوى بابناء البشوات اهو ده اللى ناقص كمان كفاية اوى انهم بيحنوا علينا وسايبينا عايشين فى وسية ابوهم
Desert cat said…
اجندا حمرا
حبيبة قلبى اللى مشرفانى
ولسه يا جميلة ياما هنشوف
ناس تفتح دماغ بعضها بمفكات وناس تشخر لنا وتنزلنا من الميكروباصات ومش عارفين والله لسه هنشوف ايه تانى
بصى يا اجندة انا لو اتوفر عندى حاجه هبعتها لك بس الحقينى انتى باى حاجه دلوقتى اختك بتلعب فى الوقت الضايع
ههههههههههههههههه
تسلمى لى يا جميلة
Desert cat said…
فاتيما
انا مش بلوم عليه والله انا بلوم على الظروف الزفت اللى حطتنا كلنا جوا مركب واحد
كل الناس دلوقتى مش عارفه كف ايديها من ضهرها
منه لله اللى منه السبب واللى عمل فينا كدا
تحياتى ليكى يا أطيب قلب فى الدنيا
Desert cat said…
Miso soup
ما اهو كلنا هنفضل نقول تييت لبعض لحد ما نخلص على بعض وميبقاش فى شعب ولا تيييت ويحكموا هما نفسهم بقى
Desert cat said…
رامى اشرف
طيب وبعدين يا رامى هنفضل نزل من نص الطريق كدا وانت تاخدها مشى للبيت وانا ادفع اربعه جنيه فى التوكتوك
ماهو يا الاستقلال التام يا الموت الزوؤام وعاشت جمهورية البتنجان حرة مستقلة
Desert cat said…
انين الحزن
مفيش يا حبيبتى لا اتوبوس ولا حتى حماروس
الجميع اعلن غضبه علينا وبالتالى بقينا لقمة سائغة فى افواه الجميع
ايدك بقى على نص العلاوة اللى وعدتينى بيه
Desert cat said…
tamer.sala7
البلد كلها بقالها يومين ماشية تشخر لبعضها
الا الشخارات اللى بالكهبا اسعارها زادت هى كمان ولا ايه النظام
يعنى هى ناقصه مديرك كمان يخصم
انت مش تشخر له وبس انت تحطه على خاذوق من خواذيق الحكومة اصل العملية نقصاه هو كمان
اسال سؤال

طيب السواق و غللا الاجرة

الدكتور الحلنجي غللا الفيزيتا لييييييييييييه

هو شغال بالجاز برضه

حاجة تانية

الست اللي بتحكي عنها معاها حق

و عن نفسنا في الاسكندرية المحروسة فوجئنا بالسادة المنافيخ ضباط المرور بيقولوا للسواقين غللوا الاجرة و ده كان في ميدان محطة مصر

بعد خناقات مع السواقين اكتشفنا كدة

ايه الحل

ايه الحل

الركاب عملوا حاجة ظريفة جدا

4 بريبيز عربية اتدغدغوا عيانا بيانا في وضح النهار الساعة اتنين الضهر رجعوا الاجرة زي ما كانت

لكن يا فرحة ما تمت خدها الغراب و طار

قصدي السواق

تاني يوم الامن المركزي بقى و ايه الشرطة كلها مجندة لخدمة و حماية



اوعى دماغك تروح لبعيد و تفهمي غلط

لحماية السواق الحرامي الناهب

و بناء عليه قررت اشتغل نصاب في الفترة الجاية

لان الحكومة عندنا مش بتحمي غير الحرامية و توظيف الاموال و المحتكرين

و بتحميهم من الشرفاء المفترسين
يا قطه تقعدى نص ساعه علشان التامين عصفوره كبيره زيك فى امن الدوله لازم يتامن اى مكان حتوصله فكانت نص ساعه تامين
عاتى يعنى
Heart Beat said…
Dear Desert Cat

ooopsss

ايه بس كل التييييتت ده

ما هو من زهقه احسن ما كان يروح ينتحر

اصل الحكومة دي تخلي الواحد يخرج عن شعوره

يعني مثلا زي ما يرد عليكي و يقول و كمان بتقولي صباح الخير و بقية الحوار الشهير ده

مافيش اودامه غير انه يشتم الحكومة و البلد و الناس و اي حد يعدي اودامه

كويس بقى انك ماكلمتيهوش و هو متعصب كده

معلش ماتزعليش و كل توكتوك و انتي طيبة

و كل زيادة و شعب مصر كله بخير

اصل هو ده المطلوب ان الشعب اللي كان بيطالب بالزيادة من كام يوم و اضراب و مظاهرة و الكلام ده كله

هو نفسه اللي يخرج برضه في مظاهرة و يعمل اضراب و يقول بلاش الزيادة اللي جابت لنا الكافيه دي و غلت الاسعار علينا

يعني الحكومة عايزه تجنن الشعب و تطلعنا اودام العام مالناش كلمة

او مش عارفين احنا عايزين ايه بالظبط من الحكومة

ربنا على الظالم و المفتري
انا معلقتش على موضوع الزياده علشان انتى عارفه راى احنا شعب
تيت تيت تيت تيت اهلى
لحسن حد يفهمنى غلط
ماهي دي غلطتك انك مش بتعرضي افلام سكس

بالك لو بتعرضيها كان زمانك تبصي للشاشة و اول ما البلوج ييجي في بالك

تفتح على طول ده الهلس اما الجد فهو الاتي

واحد حقود و حيوان او مجموعة من الحاقدين عملوا فلااج على البلوج بتاعك و تلاقي لسوق حظك حد من بلوجر كان بيفحصها في النص ساعة دي

عشان كدة مانفعشي تدخليها

و بعدين ولا يهمك

كفارة
كاميليا said…
حمد لله على السلامة

انا قلبى فعلا وقع
لما لاقيت المدونة مش بتفتح

ربنا يحفظك يارب
ويحميكى

تحياتى وحبى
أنا حر said…
عايزة ثورة يا بلادي
تحياتي
ken kemp said…
يا جماعه ليه كل الشجب ده دى حكومه بنت حلال و عايزه ترفع الحاله الصحيه للشعب لو خدتو بالكم اسعار السجاير عليت عشان نبطلها و البنزين غلى عشان نتمشى مش المشى رياضه يا جماعه.
somaa mahaba said…
لالا عادى يا قطه موضوع المدونه مبتفتحش فى كل فتره قطع طاقه عن المدونه بالترتيب والدور....فدا عادى بيحصل مع وعند الكل
ثانيا المواصلات ضربت ضاربه سوده 25 فى الميه زياده لما خلونا نشد فى شعرنا
الراجل بتاع المرور بيوقلنا ادعوا للريس واحد قاله ربنا ياخده رد الظابط قال اميييييييييييييييييين ادعوله تانى
ابقى فوتى شوفى موضوع معارض اللى مبيفهمش هندى دا عشانكم
تحياتى ليكى سومه_87
cenotaph said…
كويس ان مفيش سواء ميكروباص ضربك بالمفك زي ما حصل
ابو احمد said…
جلا جلا
جلا جلا
فتح لى عينك
ياولا
جلا جلا
بص ف ايديك
هتلاقى بيضه مقشره
افتح ايديك
تلاقيها فاضيه مقشفره
جلا جلا
ريسنا جه يمسى عليك
اهو جى اهه
فتح عينك
جايب عديه
جايب علاوه
شايف ياعم
شايف الغلاوه
فتح ودقق
وشوف وحقق
تلاقيها طارت زى الحمامه
مفضلش ليك غير الندامه
بس اتبسطت وعشت كام
تحلم بانك بتاكل حمام
شفت المعزه
شفت الغلاوه
غمض عينيك
فتح عينيك
معدتش فارقه
عدت عليك
جلا جلا
جلا جلا
e7na said…
هدية الثمانين
الخازوق المتين
وشكرا
Fantasia said…
يخرب عقلك يا قطة, ضحكتيني وأنا مش عايزة

يا حبيبتي مافيش حد عنده ضمير. هو بتاع الميكروباص دا المفروض يعني بيحط بنزين 90؟ ماهو بيحط بنزين 80 ودا ماتغيرش سعره. حتى لو كان بيحط 90 فالزيادة فيه 30% مش 100% عشان ياخد اجرة دوبل

لا حكومة ولا شعب عندهم ضمير يعني م الآخر, كله حاطط ايده في جيب التاني. وبعدين دا وقت تقشف يا قطة. احنا داخلين على مجاعة, يعني تاخديها كعابي, مش تدفعي 4 جنيه في 10 دقايق مشي. دا حتى المشي مفيد للصحة يا أوختشي, والحكومة خايفة على صحتنا عشان كدة رفعوا تمن السجاير

بس ايه حكاية انك ماعرفتيش تدخلي ع البلوج بتاعك دي؟ أصلها حصلت معايا كتير وكنت فاكرة ان بلوجر هو اللي فيه مشكلة
Eldebug said…
هههههههههههههههه
والهى احنا عندنا سواقين الميكروباصات دول ملايكة
ههههههههههههههههههه
انا جيت اركب ميكروباص الصبح فالراجل قال للناس الاجرة زادت فالناس زرجنت .. راح مطلع علبة حلويات جيولا ومدى لكل واحد حلوياته ... الناس كلها دفعت الاجرة وكان هاين عليها تديله زيادة

.......................
نخش فى الجد بقى ... انتى عارفة انا اكتشفت حاجة فى البلد دى كنت واخد بالى منها من زمان بس كنت عامل نفسى عبيط ... وهيه ان احنا بلد كلها استغلالية ... يعنى كل واحد بيستغل اللى تحت منه ... واللى يقدر يمص دم غيره مابيقولش لا

يعنى سواقين الميكروباصات بمناسبة الكلام عنهم مثلا ... بدل مايقللوا ارباحهم مراعاة للظروف اللى البلد ماشية فيها لا اللى بيعملوه انهم بياخدوا ارباحهم وبيحاولوا يزودوها كمان وبكده الازمة بتترحل فى الاخر خالص عارفة فين ... عند الراجل اللى بياخد 400 جنيه اللى دخل فيكى شمال ده ... عند الراجل المستهلك اللى مش لاقى حد يمص دمه
Heart Beat said…
Dear Desert cat

يا ستي مايهمكيش من التعطل اللي حصل للمدونة ده

بتحصل ساعات في احسن المدونات

ساعات النظام بتاع البلوجر بيتعطل شوية كده و بيرجع تاني

لا تقلقي يعني لا سياسة و لا ثورة و لا حاجه

و الا كان اولى يعملوا كده مع المدونات ايها بتوع المحظور

ماتقلقيش من حاجه زي دي
Soooo said…
على فكره
الحوار اللي حصل معاكي تقريبا حصل مع كل الناس
يعني البلد شكلها على شوك الانفجار
فاضل لها ربع وشك مثلا

عموما
انا عن نفسي باجهز ورقي وناوي اهاجر على تفاهنا العسل
تيجي معايا مِحرم؟؟؟؟




سلاموووووووووووووز
بسم الله
مش بعيد بعد ايام نسمع زي اللي بيحصل في لبنان الان بيحصل في مصر هنا
لنا الله
الربان said…
تحياتي

هذا ما كان يجب ان ينتبه اليه من رفع
سعر البنزين و السولار...و المشاكل التي
ستأتي من وراء هذا الارتفاع كثيرة...منها الخضر و الفواكه...لان الفلاح يستخدم السولار في ماكينات الري
و ايضا منها الافران...التي ستنتهز الفرصة لرفع الاسعار لان الكثير منها يعمل بالسولار...

لكن أيضا هناك من استغل هذا الارتفاع لصالحه بدون وجه حق.
مثلا كان فيه اعلان عن بيع فيلات في مجمع
و القسط الشهري كان مبلغ (XXXXX)بعد
ارتفاع الاسعار المالك رفع قيمة القسط
الشهري الف جنيه مرة واحدة...لماذا؟
لا اعرف.

يعني الحكومة...و الاستغلاليين علي جماهير
الشعب الكادح...
ربنا يلطف بنا و يهيء لنا من امرنا رشدا...

تحياتي و تقديري
Migo Mishmish said…
يتهيألي في المولد كان لازم نأخد نشيد الزعيم: هشتكنا وبشتكنا يا ريس دانت رئيس والنعمه كويس
ونعملة اوبريت كبييييييييييييير قوي وممثلين فيه يأخدوا ادوار الحكومة ويمسكوا خوازيق كبيرة ويرجوا ورا الممثلين اللي عاملين دور الشعب
وبعد ما يرفعوهم عالخوازيق لا مؤاخذه يولعوا فيهم علشان يحطوهم في التورته اللي معموله من الدقيق المدعم
Love,
MishMish
Desert cat said…
ملك الكبدة
الدكتور الحلنجى غلا الفيزيتا علشان البنزين غلى وهو عنده عربيه واسعار السلع غليت على حس البنزين وعايز يعرف يعيش وبالتالى هو كمان لازم يغلى
والله احنا كلنا معانا حق الا هو الحكومة مش شايفه الناس اللى بتتخانق مع بعضها والناس اللى مش لاقيه تاكل من برجها العاجى انا حاسه انهم مش ساكنين معانا فى مصر
Desert cat said…
رئيس جمهوريه نفسى
على رايك والله ياريس
اذا كان الموضوع كدا بقى انا عايزة انزل اتمشى شوية فى الساحل وبما انك الريس قولهم يامنوا لى الطريق
Desert cat said…
Heart Beat
حبيبتى الجميلة التييت دى انتشرت اوى فى الفترة الاخيرة
كل البلد بقت ماشية تقول لبعضها تييييت بدون اى اسباب
تقولى للواحد صباحو فل ان شاء الله تلاقيه بيرد امشى من وشية الساعه دى بدل ما اخلى اليوم تييييت
هههههههههههه
على رأى واحد صاحبى كان بيقولى هما عايزين الناس تمشى مش شايفه بعضها كل واحد يبقى مشغول ومحتاس فى حاله وبس
بس بينى وبينك احنا اللى خرس علشان كدا نستاهل
نورتينى يا جميله
Desert cat said…
رئيس جمهوريه نفسى
هههههههههههه
لا متقلقش انا واخدة بالى
غلاء الاسعار حاجة تحرق الدم والعيش كمان بدا يرجع تانى لعادتة القديمة تخيلى اجى اكل عيش الاقى فى بلاوى اشى طوبة وكيس بلاستيك مش الحكومة ماقيش حاجة جاية معاها شاطرين بس فى اللت والعجن بس
وتحياتىلكى
Desert cat said…
ملك الكبدة
طيب ياملك ربنا يخليك لينا
وتكتشف لنا الاخطاء المنيلة دى
Desert cat said…
كاميليا
الله يسلمك يا كامى
تسلمى لى يا جميلة
Desert cat said…
أنا حر
وانا زيك يا احمد
Desert cat said…
ken kemp
ما انا برضه قولت كدا
بس الناس مش مقتنعه
بنقولهم يا جماعه توفير للصحة بيقولوا لاء انا بنحب الامراض المستوطنة
والحكومة هتدلعنا
اهى دلعتنا اخر دلع
نياهاهاهاها
Desert cat said…
somaa mahaba
يعنى انا كنت اول واحدة فى الطابور علشان كدا المدونة بتاعتى اتوقفت نص ساعه
طيب كويس
كل الناس دلوقتى بتقول للريس فكك منا يا ريس احنا شعب غلباوى وانت صحتك على ادك
انا شوفت الموضوع يا سومة وعلقت
محبتى يا جميله
Desert cat said…
cenotaph
طيب ويرضبنى بالمفك ليه ده انا مسالمه واللى بيقولوا عليه بدفعه وانا حاطة شكولاته فى بؤى انا اقدر اعارض
ولسه ياما هنشوف
الناس ليها حق تكلم نفسها اصل اللى عنده عيال ده هياكلهم ويعلمهم منين
وبعدين الكل معزور لان الزيادة علينا كلنا
ما عدا طبعا الناس اللى مش فارقة معاها ولا بيقعدوا يحسبوا يا ترى المليون هيكفينى لاخر الشهر ولا لا ؟
tamer.sala7 said…
مالها الصين
ضحكت علينا وباعتلنا عربياتها
و هما ماشيين على عجل
المشكلة ان احنا اشترينها بالقسط
فدلوقتي حندفع القسط ولا نحط بنزين
Misrdream said…
فى البدايه مبروك على المدونه
متاخره جدا بس انا وصلت متاخر
ثانيا مجهود رائع ومنسق ومدونه عالميه
تحياتي
Zerox
Desert cat said…
ابو احمد
ااااااااااه يا ابو احمد
احسن وصف والله لحالنا
Desert cat said…
e7na
هدية قيمة فعلا هدية العام التمانين خوذئه التمانين مليون
تحياتى
Desert cat said…
Fantasia
ياحبيبتى يارب دايما البسمة منورة وشك
البنزين الـ 80 مش موجود اصلا يا فانتا علشان كدا الناس بتضطر تمون 90
وفعلا زى ما قولتى كل واحد بينتهزها فرصة ويمد ايده فى جيب التانى السواقين والتجار وكل واحد يرفع الاسعار على حس العلاوة اللى هى مش علاوة اساسا
بالنسبة لقفل المدونة كانت بتفتح ببوكسى عادى لكن مش كانت بتفتح بايبيهات انا لحد دلوقتى السبب مش واضح قدامى عموما خدى بالك بقى
تحياتى ليكى ونورتينى يا فانتا
Desert cat said…
Eldebug
طيب هما فين الناس اللى بيدوا شكولاته دول وانا اروح اركب معاهم
بالظبط زى ما قولت كل واحد بيرحل الازمة على غيره واحد سواق توكتوك كان واقف مبسوط وبيقول يارب اللتر يبقى بخمسة جنيه اهو كل على قفا الراكب وانا مالى
ربنا يرحمنا ويريحنا من الاستغلال
Desert cat said…
Heart Beat
ربنا يطمن قلبك
مدونات المحظور عمال يبرطعوا فيها ويشتموا ويسبوا فى خلق الله انما تيجى عند الحكومة طاطى راسك طاطى طاطى
Desert cat said…
Soooo
اجى معاك محرم لتفاهنا العسل
طب ما اجى معاك محرم لعباس العقاد
المهم يكون مكان بعيد عن لاظوغلى وخلاص
Desert cat said…
أحمد سعيد بسيوني
واله انا اتمنى يا احمد انه يحصل النهراده قبل بكره
تحياتى
Desert cat said…
الربان
ماهو دلوقتى يا استاذى بقى اى حد بيرفع سعر اى حاجه ولما تتكلم معاه يقولك اصل البنزين سعره ارتفع طيب ده علاقته ايه بالبنزين
كل واحد بيرفع الاسعار بمزاجه لما الناس قربت تموت جماعه بارتفاع ضغط الدم
احترامى وتقديرى
Desert cat said…
Migo Mishmish
هههههههههههههههههههههههه
انا متخيلة منظر الاوبريت يا مشمش
واله هم يضحك وهم يغم النفس
نورتينى يا مشموشه
Desert cat said…
رئـــــيسـة حزب الأحلام
مش لوحدك
العيش دلوقتى فعلا مدعم يا جماعه احنا الىل ظالمين الحكومة مدعم بالطوب واعقاب السجاير وبالرمل كمان
Desert cat said…
اهو ده عيبه
ماهى الناس اللى مش فارقه معاها الملايين دى من جيوبنا احنا
يعنى لو نقص هيعرفوا يعوضوهم برضه يبقى يفرق معاهم فى ايه
Desert cat said…
tamer.sala7
انا شايفه اننا نرجع لهم العربيات ويدولنا مكانها رغيفين عيش
Desert cat said…
Misrdream
ياااااااااه
مش معقول
مش قادرة اصدق عنيا
ازيك يا احمد
انا عذراك اوى فى موضوع مبروك على مدونة عمرها سنة وشهرين
المهم انك نورتها
tamer.sala7 said…
لو عايزة عيش روحي لأي نائب من بتوع مجلس الشعب وهو حيتصرف ولو عايزة تعرفي ازاي راجعي البوست الاخير كويس
Desert cat said…
tamer.sala7
روحت وشوفت وقلبى وجعنى وجيت
مش مسامحه فى اى جنيه ادفعه ليهم
Che_wildwing said…
يادوب بالمرتب تجيب 10 لتر بنزين وتولع في نفسك وفي العيال بالمرة
gehad_fci said…
ايه يا ام القطاقيط الكلام دا
ايه اللي قفل المدونه بتاعتك ؟؟؟
ليكون الناس اللي بيعملوا هاك ههههههه
ياخبر ياقطه
معقوله مدونتك ماتتفتحش دأحنا نعمل مظاهره و تضامن عشان يفتحوهالك

المهم الحمدلله ان كلو بقه تمام دلوقتي
هو كده البلوج سبوت دايما بيهبل و له شويه حركات نص كم

و حاجه كمان مش عايزين نشمت العدوين فينا كمان حيلاقوا فين موضوعات يكتبوا عنها لو اتقفل واحد من اهم بلوجات المنطقه و اللي اساسا معمول عنه بلوج مخصوص
:)) نورتي البلوج سبوت تاني ياقمرايه
Desert cat said…
Che_wildwing
ماهو يادوب الـ 10 لتر فعلا
تحياتى
Desert cat said…
gehad_fci
لاء اللى قفلوها كانوا بيعلموا ائح
لسه بتعذب القطط يا جهاد انفيك من محافظة الشرقيه كلها واقعدك برضه فى الزقازيق
Desert cat said…
اجندا حمرا
اه يا سمسمة
المدونة فضلت نص ساعه كاملة الانجليز محتلينها ومش عارفه ادخلها
الناس بتاعة البوستات كانت ممكن تموت من القهره اصل هيكتبوا على مين تانى لو دى اتقفلت حتى لو اتقفلت مش هحرمهم منى ابدا ولا من رخامتى وهعمل لهم بلوج تامى وبرضه اسمه قطة الصحراء
هههههههههههه
ربنا ميحرمنيش منك ولا من سؤالك يا جميله
Salma Amer said…
هم يبكي وهم يضحك بجد
ضحكتني وانا مفروسة ومش قدرة اضحك
ناس بطلع دلوقتي غلبها في بعض اصلها حتعمل اية
ربنا يزيح عنا يارب
تحياتي لك
micheal said…
عشان كدة بتشائم لما أسمع خبر علاوة
:)
تحياتي
Desert cat said…
Salma Amer
يارب دايما سعيدة ومبسوطة
وربنا يريح الجميع ويخفف عنهم الهم اللى هما فيه
تحياتى
Desert cat said…
micheal
كلنا بقينا بنتشائم والله
تحياتى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز