يا تحترمها .. يا تحترمية .. يا تتركوه للى يعرفو يلتزموا بيه

عجبت لكم التناقضات ... اللى منتشرة حوالينا فى جميع الأماكن سواء فى الشارع او فى العمل وحتى فى النت
من فترة قريبة اوى راكبة مواصلات ومروحة بيتنا .... وعلى رجلى شنطتى وكتاب ليوسف إدريس ... يعنى مش كان كتاب عن الجنس ولا عن كيف تقدمين إغراءات لابن الجيران من البلكونة لسمح الله ... شوية والحاجة اللى قاعدة جنبى عمال تبرق لى من تحت الخيمة اللى هى لابساها ... وانا لا عارفه اللى جنبى ده راجل ولا ست ولا فى ايه ... بلاش نظلم الناس بقى ... احسنى الظن فى الناس يا قطة ... بعد فترة صمت وترقب .. اخيرا نطقت .. وطلعت واحدة ست ... ظهر الحق .... الله عليكى يا مصر .... ايه دخل مصر فى الموضوع دلوقتى ما علينا ...لاقيتها بتسالنى وكأنها امين شرطة فاتح لى محضر ... ايه الكتاب اللى معاكى ده ... اممممم سمعتى حضرتك عن كاتب اسمه يوسف ادريس ... اكيد سمعتى لانه بلدياتنا يعنى ... طيب بدل ما تقرى حاجه ليوسف ادريس بتاعك ده ولا حتى يوسف عفريت وتدفعى فيها فلوس ... مش اولى فلوسك دى تروح لخدمة الاسلام ... ها .. نعم يا حاجه فى ايه سيادتك ... انا قصدى يعنى تشترى كتب اسلامية وأديكى بتعرفى أمور دينك .... طيب وهو مين اللى قال لسيادتك انى مش عارفه امور دينى .. اتناقشتى معايا مثلا ولاقيتنى أبيض يا ورد .... ولا عملتى لى اختبار والنتيجة طلعت صفر ... لاقيتها بتقولى انا مش قصدى بس خسارة تدفعى فلوس فى كتب ملهاش اى لزوم ومفيهاش اى افادة انما تدفعى فلوس فى حاجه تفيد دينا وتفيد المسلمين ... وهو دينا قال مش نقرا غير فى الاسلام وبس ... يعنى منقراش فى الادب والعلوم والهندسة والطب .... راحت ساكتة خالص .... شوية ولاقيت نفس النظرات الاولانية ... نعم سيادتك المرة دى فى ايه ... راحت ماسكى ايدى .. قولت لها عيييييييب ده انا اهلى لو عرفوا حاجه زى كدا يقطعوكى .... انا محدش يمسك ايدى ولا حتى رجلى شيلى ايدك .... ايه الضوافر اللى انتى عاملاها دى .. انتى مش عارفه ان فى شيطان تحت كل واحد منهم .. هو مين اللى قالك الكلام ده ... الشياطين بتكون فى الأماكن اللى فيها ناس خبيثة ... وبتتدخل فى شئون غيرها وحاطة مناخيرها فى كل حاجه ... لاقيتها انفعلت وأنتى هتقاوحى كمان فى دى .. ده انتى انسانة غريبة .... توبى انتى وامثالك من اللى بتنشروا فكر مسموم وثقافة الغرب الكافر .. الميكروباص كله بص علينا لان الست الشيخة كانت قاعدة تخطب فى الميكروباص مش تتكلم .... انا فضلت ابص لها وساكتة خالص لحد ما خلصت .... كان ردى ونعم النقاب اللى انتى لابساه ومحترماه .... هو مش المفروض إن انكر الاصوات ؟؟؟ مش المفروض ان حضرتك بنقابك ده مراية لغير المسلمين وقدوة للمسلمين ... لما يشوفوكى قاعدة تصرخى فى مواصلة بالشكل ده وعمال تكفرى فيا انا وامثالى اللى انتى مش عارفاهم يبقوا مين اصلا ... ومدية نفسك حق دخول الناس الجنة من عدمة بخلاف انك مطلعة على النوايا والعياذ بالله هيتقال عليكى ايه يا ست الشيخة .... قالت لى انا بدعو للاسلام لكن انتى بتدعو لايه ... قولت لها الرسول كان بيدعوا للاسلام بالشكل ده ؟؟ الصحابة ؟؟ أمهات المؤمنين ؟؟ وقفت الميكروباص ونزلت فى ستين داهيه تاخدها هى واللى زيها واللى هما كتير اوى اوى ومنتشرين اكتر فى عالم النت .... وبيتكلموا وبكل بجاحة .... تلاقى الواحد بيتكلم فى موضوع عادى تدخل لك البت او الواد .. وتشتغل يا كافر يا زنديق ... هتدخل جهنم وبئس المصير .... حسبى الله ونعم الوكيل .... شوية ويدخل واحد ماسك سيف او كلانشكوف فى ايده ... يسيب الحوار ولا هو عارف اصلا الموضوع بيتكلم عن ايه ... وعمال يقل ادبه ويشتم فى صاحب الموضوع وانت او انتى كافر انت بتتكلم كدا ليه .. انتى بتردى على اختى فى الله بالشكل ده ليه .. ده انا لو شوفتك بتتكلمى معاها كدا تانى ... هفجرك وافجر المنطقة اللى انتى ساكنة فيها كلها ... ده انا ههدر دمك .... دفاعا عن الاسلام .... ده انا هجيب لك ابو رجل مسلوخة لاخذ حقوق الاسلام منكو ... اختى المنقبة .. جزاكى الله خيرا علشان مش رديتى على الاشكال دى ... تدخل اخته المنقبة .. جزاك الله خيرا اخى فى الله .. انا وانت هندخل الجنة انما الاشكال الكافرة الصابئة دول هيدخلوا النار ونطلع لهم لسانا واحنا فى الجنة ونقولهم يا كفرة ..... اخوها فى الله يرد عليها يقولها بصرة .. انا وانتى يا اختى فى الله هندخل الجنة ونعيش فى النعيم .. وهما يدخلوا النار جزاكى الله خيرا اختى .. جزاك الله خيراً أخى .... ياخى جتك نيلة انت واختك لما تنيلكو ... كلاكيت تانى مرة .. واحد من المتأسلمين .. فاتح مدونة مخصوص لمهاجمة الناس .... وقاعد يلف على النت ويشوف مين مش عارفه بيكتب ايه ومين بيقول ايه ... ويروح يشرحه فى بوست عنده ويقول اصله مسيحى بس بيكتب باسم حد مسلم .. ولما يتضح له فعلا ان الشخص مسلم يقول لاء اصله مأجور .. بيقبض من جهات ممولة ... طيب انت ياعم الشيخ ... بتعمل كدا ليه حتى لو هو زى ما بتقول ... عمرك شوفت الرسول او اى حد من الصحابة شاف شخص على حد قولك بيهاجم الاسلام ... راح فاتح بلوج علشان يهاجمه .. ولا على ايامهم مكانش فى نت ولا بلوجات ... ومع التطور التكنولوجى اتطور كمان الدين ... الا عمرك ما كتبت موضوع يخص الاسلام او طريق الهداية والرشاد او غيرة وغيره يا شيخ يا متاسلم " ادعو الى سبيل ربك بالحكمة والموعظة الحسنة ... " مش بفتح بلوجات ومهاجمة المسلمين وغير المسلمين ... معلشى بقى انت كدا بتوضح لنا ان كل الملتحين اللحية الملخبط و المنفرة دى - وأنا باقول كل - دول جهلة والله أعلم ليه اتجهوا الاتجاه ده ... لان كلواحد فيهم عنده سبب غير التانى جواه هو - بس مش الالتزام - ممكن يكون زهق من العيشة أو عدم قدرة على التكيف مع الواقع اللى هو عايشه أو صدمة عاطفية آه والله معظمهم دى اسباب اتجاههم للحية والزاوية اللى تهم - مش اتجاههم للاسلام ... أولاً الاسلام مش بالنقاب او باللحية يا متأسلمين .... فى النهاية مش كل واحد ملتحى او واحدة منقبة ننسبهم للاسلام لان فعلا معظم اصحاب الاخلاق السيئة منهم ملتحين ومنقبات لاسباب شخصية آخرها الالتزام

الاسلام ألتزام .. والالتزام افعال لا مظاهر فارغة
مش كل منقبة محترمة .. والنماذج كتير اوى .. مش فاكرين الحادثة الشهيرة الشخص اللى كان بيلبس النقاب ويروح يقابل زوجة فى حضور زوجها ويبيت معاها كمان ... أى واحدة عايزة تروح لواحد شقته بتلبس النقاب وبعدها اياكشى تلطع له المريخ مش الشقة بس هو حد عارفها ... كان فى حادثة شهيرة اوى من قريب فى احد المساجد منقبة سرقت شنط السيدات اثناء صلاتهم .. ونعم النماذج ... وهنروح بعيد ليه ما المناظر دى منتشرة على النت بكل اسفاف وقبح .. تتكلم عن الاسلام وعن الحجاب وهى لسانها عايز قطعه ... قاعده تكفر فى البنات وتهزر مع الشباب وفى الاخر تقوله جزاك الله خيرا اخى فى الله
عايزة تلبسى نقاب .. عايز تعمل لحية ... يبقى يا اما تبقى مراية لغير المسلمين وقدوة للمسلمين .. يا اما تروح تلعب كوتشينة انت واختك فى الله ... وتسيبوا الالتزام لأهله والدين لخير من يمثله

Comments

DantY ElMasrY said…
عاوز أسألك على حاجة :
مابتلاحظيش انهم بيخنفوا شوية وهما بيتكلموا
تقريبا درجة الخنف تتناسب طرديت مع قوة الإيمان
لاحظى كمان الخنف عند اليهود لما يطلعو فى السينما
الله يرحمه عباس فارس
appy said…
كما قلت من قبل وسأقول هذه المونه قد تكون ممسوحه او مشنوقه او مبتور الكى بورد بتاعها هههههههههه
بس يا نونا طبعا هما فيهم وده شوفتى يعنى المتشددين لدرجه تزهق وبيكون نفسى اخنقهم بس انتى عارفه انا محدش بيقدر يجى جنبى علشان انا برمى قلل ههههههههههههه

اما بقى الاخ اللى فاتح مدونته يشرد للنا فبعيد عنك يا اختى يا حبيبتى ده مفلس فكريا والله ساعات بيصعب عليا يا عينى بجد تصدق ببقى نفسى اقوله معلش ولا حاجه مش بقدر
اقول طيب اديله هيتات او بمعنى اوضح رؤوس مواضيع يكتب فيها زى حصه التعبير اقول يمكن اكبر من تفكيرة ههههههههههه
ربنا يهدى يا نونا وفعلا الواحد يا يعمل بالالتزام ده يا بلاش ربنا يهدى الجميع

قلل بقى هاااااااا
بصى ياقطة انا الى ارفه
ان حوا لما حاتيجى وتقف قدام ربنا يوم القيامة
ربنا مش حيحاسبها
انتى كنتى بتقرى كتب ايه
او حيحاسبها لى هى غطت اد ايه من جسمها

لما لما حيحاسب ادم وحوا
حيحاسبهم على اعمالهم
لموا خير ولا عملوا شر
حيحاسبهم على لون قلبم
لسة ابيض ولا سودته الدنيا
حيحاسبه على ايمانه قوى ولا ضعيف ولا ضاع مع الماضى الى راح

ياحنان الانسان مش بلبسه او مظهره
او بثقافته او بشهادته
او بطريقة لبسه او بطريقة كلامه
الانسان الى بجد
ويتقال عليه انسان
هو الى بيعمل الى ربنا قاله عليه
الانسان الى يبقى عايز يدخل النة ويدخل الناس ماه
مش يطفش الناس بكلامه الى زى المرزبة

ياله ربنا يهدىهم
ويصلح احوالهم


تحياتى
بجد كلامك مظبوط وانا اؤيدك فيه بس انا حكى حاجه لاصغننه انى شوفت واحده ست لابسه نقاب وايدها باينه ورجليها كمان ولابسه كاعب عالى طب فايده النقاب ايه مش عارف
قطة الصحراء
انا باخد عليكى نقطه واحده هو ان الست المنقبه اللى كانت معاكى فى الميكروباص انتى قلتى عليها انا مش عارفه هى راجل ولا ست وكمان ان الست اللى عايزه تروح لواحد شقته او اى مكان بتلبس نقاب
يعنى هى لو عايزه تروح له من غير نقاب مش هتعرف النقاب ملوش دعوه اللى عايز ينحرف هينحرف الوسيله ساعتها مش المشكله
انما انا متفق معاكى فى ان اللى عايزه تلبس نقاب لازم فعلا تتإأكد انها هتقدر تكون صوره او مريا للمسلمات لان فعلا انا بسمع منقبات فى الشارع صوتهم عالى وده طبعا غلط
وفى الاخر اكيد مش كل منقبه كويسه زى ما اكيد فيهم كتير كويسيين ونفس القياس لاصحاب اللحيه
تحياتى ليكى
الساحرة said…
قطتي اكيد في ناس كتير زي ما انتي بتقولي لبسينه تدين او مربين ذقنهم
وهماميعرفوش عن الدين حاجه

بس في ناس

قدوة فعلا يعرفون اموردينهم جيدا

وخير مثال لذلك استاذنا الكبير عصفور


من يومين بفتح باب شقتي ولقيت اخت من المنقبات قدام باب الشقه

طبعا انا كنت هموت من الخضه وهي قعدت تتاسف وفي الاخر قعدت تضحكك كنت متغاظه منها جدا
هههههه
بجد مش عارف اعلق واقول ايه
ربنا يرحمنا ويتوب علينا
بس بجد انتى موعودة ولا حظك كده
وهى ما لاقيتش حد غيرك يعنى
ولا دى مقصودة
تحياتى ليكى وربنا معاكى
Desert cat said…
DantY ElMasrY
وكمان درجة الخنف بتكون حسب طول اللحية
يمكن كل لما اللحية تطول او النقاب بياثر على الجيوب الانفية
هذا والله اعلم
Desert cat said…
appy
يا حبيب قلبى هو حد اصلا يقدر يقولك تلت التلاتة كام
هما العرايشية بيلعبوا فى البلد ولا ايه دول كانوا ولعوا فيهم نفر نفر
بالنسبة لموضوع التعبير
هههههههههههه
انتى عليك تبيهات تجنن
ربنا يشفيه
نورتنى يا جميل
Desert cat said…
زعيم كمورا مورا
يازعيم انا عارفة ومدركة تاماما ان الايمان فى القلب مش فى اللبس
الدين افعال لا مظاهر
بالعكس ده المظر لما يكون ملتزم والافعال لا تنتمى للدين كدا يسيئ ليه
بس هتقول لمين بقى
تحياتى
Desert cat said…
صوت من مصر
يااااااه المظاهر دى منتشرة يا محمد
وكمان هى كدا كمان تعتبر متدينة شوية
ده انا مرة شوفت واحدة لابس جيبة لازقة على جسمها وجاكيت قصير ولافة طرحة وحاطة النقاب فوق الطرحة
تخيل المنظر واحكم عليها ياترى دى تبقى ايه بالظبط ؟؟؟
تحياتى
Desert cat said…
بحبك يامصر
تاخد عليا ايه يا فندم
انا فعلا هعرف منين اذا كان اللى جنبى ده راجل ولا ست
الا هو حضرتك مش سمعت قبل كدا خالص عن الراجالة اللى بتلبس نقاب بغرض السرقة او خلافه .. ده حتى من كام يوم مصر كلها سمعت عن الراجل اللى لبس نقاب ووقف فى طابور الستات علشان يجيب عيش ؟؟؟ طيب بزمتك انت لو شوفت واحدة قريبتك بلاش قريبتك جارتك او معرفة حتى ولابسه نقاب وطالعة عند واحد استغفر الله العظيم استغفر الله العظيم هتعرفها ؟؟
يبقى بيستخدموه استخدام سئ ولا لاء
فكر الاول فى الموضوع السئ ده يا فندم وبعدها عليا اللى تحبة حتى لو ايصال امانة
تحياتى
Desert cat said…
الساحرة
يا حبيبتى كلنا بنشوف فى الشارع اللى لا يتخيله عقل
بس هو استاذكو عصفور بيلبس نقاب ؟؟؟
معلشى اصل الموضوع بقى عادى يعنى النقاب مش مقصور على الستات بس دلوقتى
نورتينى يا جميله
Desert cat said…
همس الاحباب
مش عارفه والله حظهم العاثر بيوقعهم فى طريقى انا
الظاهر البلاوى كل لما تبعدها عنك تلاقيها بتتحدف عليك وبتقع فى طريقك
من كام يوم كنت واقفة مكان ما فى القاهره باستنى آآبى تيجى تاخدنى قوم ايه شوفت عربية شبه عربيتها جاية من بعيد افتكرتها هى وتبص الاقى فيها ايه ده والعياذ بالله واحد قاعد دقنه واصلى للفرامل تحت
قولت ياربى هو انتوا فى وشى كدا باستمرار الله يحرقكوا
وبعدها مباشرة جت آآبى حكيت لها اللى شوفته قعدت تضحك وقالت لى قدرك تقعى فيهم فى كل مكان
شوفت بقى ان هم زى البلاوى بيتحدفوا علينا من كل صوب وحدب .. فى الشوارع وفى الشغل وكمان فى النت
تحياتى
هو فى ستات فعلا اسأت للنقاب واظهرته بصوره مختلفه عن مضمونه
وفى رجال اسأو للحيه واظهروها بمظر المتشدد
لكن هناك امثله كثيره جدا تحافظ على امور دينها دون تشدد
جعلنا الله واياكى من المحافظين على اسلامنا دون تشدد
ايوية said…
والله العيب مش عليهم العيب على الى بيسمع منهم ومش يحاورهم او يرد عليهم بالعقل طبعا مش بالخناق زيهم وهما هيسكتوا ومش هيكمولوا مناقشة لانهم فاضيين من جوا ومش بيعرفوا يرضوا
امثله السيدات اللاتى امتهن النقاب بعد ارتدائهن له امثله كثيره جدا
ويجب ان تعاقب السيده التى ترتدى النقاب وتفعل الفاحشه او تسرق او تقوم باى عمل مخالف
ويكون عقابها مضاعف
لانها بذلك تزرع بذره الشكوك فى النقاب
ولا يخفى عليكى يا قطه
ان بين المنقبات شواذ
وبين الملتحين شواذ
وبين المسيحيين شواذ
وبين اليهود شواذ
وبين عبده البقر شواذ
ولكل قاعده شواذ
ولكننا لن نقبل بشواذ النقاب لانه صوره للاسلام
فلذلك يجب ان تبتر المتنقبات المسيئات للنقاب
ويمكن فعل ذلك باى منقبه تضبط وهى متستره بالنقاب فى اى جريمه او مخالفه
nody_1987 said…
السلام عليكم ورحمه الله وبركاته
ببجد البوست كويس اوى
انتى بتناقشى ظاهره غبيه انتشرت فى المجتمع
انا بقى ها قولك على تجريبتى الشخصيه مع المنتقبات
انا بحكم انى بدرس لغه عربيه بقالى اربع سنين
القسم واحنا دلوقت فى اخر سنه بقى معظمه منتقبات
ومعظمهم الا من رحم ربى منتقبات با الجهل
تخيلى انهم بيعاملوا الغير منتقبات انهم اقل منهم وبيتكلموا بتعالى معانا مره واحده فيهم قالت لى روحى التزمى الاول بالاسلام وتعالى بعدها اتكلمى عنه
والى قالت هو انتى بتصلى؟ وكأن الدين بقى حكر عليهم
دا غير الكتب الى بيقروها مجهوله الهويه
شفت مره كتاب منهم فيه فتاوى لواحد عمرى ما سمعت عنه
تصورى الشيخ ده عمال يمدح فى واحد مارضيش ان ان مراته وهى عندها الم الوضع انه يولدها دكتور
وفضل يلف على دكتوره ست لغايه ما لقاها والنتيجه لتاخر الولاده ان الجنين نزل مشوه
شوفتى الجهل وصل لغايه فين
ولا الملتحين الى معانا الى هاجوا على الدكتور وهو بيشرح رساله لابو العلاء المعرى
واتهموه ابو العلاء بالجهل
اقولك ايه ولا ايه بس
ده اسمه عهر فكرى
اسفه على الاطاله
nonni said…
عندك حق والله فى كل اللى أنتى قولتىه فى ناس كتير اوى من المنقبين دول تحسى ان هدفهم الوحيد فى الحيا أنهم يكفروا الناس وخاصة فى المساجد يوم ما الواحد يروح يصلى فى مسجد يخلو الواحد يحلف ما يرحش يصلى تانى ده من كتر اللكلام اللى بيقولهولك انتى حطه ميكب صلاتك باطلة ،حجابك ده مينفعش و غييييييره كتيره
لكن اللى علينا نعمله ندعيلهم ربنا يهديهم


مسنيه زيارتك.........
HafSSa said…
و في الاخر زعلانين ان فلم جريت فيلدرز
بيشوه صورة الاسلام
طيب هو جابوا منين
من بيتنا؟؟
ما هو من القرف و قلة الادب اللي بنعمهلا باسم الاسلام

موقفك ده فكرني بموقف مشابه عديت بيه من كذا سنة
كنت مسافرة و بقرا رواية الحرافيش لمحفوظ و فضل اخ برضو يلف و يدور و رمالي كتاب اذكار المساء و السهرة و قالي مش بالذمة ده ابركلك من الهبل اللي بتقريه و كنت حولع فيه لولا اني احترمت سنه و قلت خلاص
حتنز لالمرة دي
لكن المرة الجاية و لا ممكن ابدا


نييياو
الاسلام ألتزام .. والالتزام افعال لا مظاهر فارغة


هى دى الجمله المظبوطه

زى بالظبط ع الكفه الاخرى

ف بنات بشعرهم وميكب ولبس وبتاع

وماشاء الله عندهم كمية ايمان سبحانك ربى

وبيصلوا واخلاق وبجد قمة ف الادب

فعلا المظاهر مبدلش ع النيات ولا ع اللى جوا البنى ادم

وف الاخر ربنا اللى هيحاسبنا جميعا

ومفيش ف ايدنا غير الدعوه بالحسنى

تحياتى يانونا
أسوأ حاجة ان الواحد أو الواحدة يربي دقنه او تلبس نقاب وميعرفوش ازاي يخاطبو الناس ويكلموهم بالحسنى

المشكلة فعلا ان الصنف ده بيفتكر نفسه هو بس اللي صح وبقية المجتمع اللي على غير نهجه كلهم غلط

للأسف دول اللي بيبعدو الناس اكتر ما بيقربوهم للدين
----------

يا قطة انتي متعرفيش تتكلمي في موضوع إلا لما تزعقي كده؟
انا بحس انك متعصبة جداااا وانتي بتتكلمي

يعني انا من رأيي ان زي منتي مدايقة من اسلوب البنت اللي كلمتك
يبقى متعمليش زيها
عبري عن رأيك بهدوءء
مفيش لزوم للعصبية لأن بتخليكي تخرجي عن شعورك وتقولي كلام وتعمميه
ولا ايه رأيك؟
بجد مش عارفة اقولك ايه ..

كلامك مضبوط والله بس مش كلهم بردو

بس فى ناس منهم منتهى الوحاشة اللى فى الدنيا

انا لمست الموضوع ده بنفسي ... تلاقيها بتقول جزاك الله خيرا ويا اخى ويا اختى وكلام فارغ اصلا وتيجي تحكيلي عن خروجها مع الشباب .. ساعتها قطعت علاقتى بيها تماما
نفسي الناس تفهم الدنيا والدين صح بقي

ربنا يهديهم
ونسيت اذكر شيء كمان .. اللى هو الاسدال
بصي انا بحترم رغبة الناس فى الاحتشام مقولتش حاجة ... بس ميشوهوش صورة الزى اللى هم لابسينه عشان يحتشموا ده ...
يعنى تروحى على قصر النيل تلاقي نص البنات اللى واقفة هناك مع شباب لابسين اسدالات
فعلا شيء محزن ومخزى جدا
الربان said…
تحياتي

اقدر تماما مدي حزنك مما حدث... و هو له جوانب عدة...اسمحي لي ان اتطرق الي بعضها.

# النصيحة تكون في السر ...اما ان كانت في العلن فيسموها ( فضيحة) ..يعني
من اراد النصح فيكون همسا و ليس علنا.

# الحكم بالكفر..و الخروج عن ملة اللإسلام منهي عنه شرعا...رب العباد فقط هو الاعلم و الارحم بالعباد...خلقهم و يعلم ضعفهم.

# لم يكلف جميع المسلمين بالتفقه في الدين
و إلا لتركوا الحياة الدنيا و علومها..
بل التفقة في الدين يكون لفئة محددة
اما المسلمين عامة فعليهم دراسة العلوم
الدنيوية...و عليهم النبوغ فيها...و هذا لا يتعارض بالطبع مع الاخذ بعلوم
دينهم كل علي قدر طاقاتة.

# لقد كان صلي الله عليه و سلم يسابق
عائشةعليها السلام... الا نتعلم من هذا
ان نأخذ من الحياة الدنيا نصيبنا دون
أثم او افراط...

الغلو في الدين أفه...و ينفر الناس
يل ريتنا نعرف اننا امة وسط...

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ هَلَكَ الْمُتَنَطِّعُونَ (1) قَالَهَا ثَلَاثًا.
التنطع: هو التعمق في الشيء والغلو فيه، ومجاوزة الحد في قول أو فعل.


ال الله تعالى : [ وَابْتَغِ فِيمَا ءاتَاكَ اللَّهُ الدَّارَ الآخِرَةَ وَلا تَنْسَ نَصِيبَكَ مِنَ الدُّنْيَا وَأَحْسِنْ كَمَا أَحْسَنَ اللَّهُ إِلَيْكَ وَلا تَبْغِ الْفَسَادَ فِي الأَرْضِ إِنَّ اللَّهَ لا يُحِبُّ الْمُفْسِدِينَ ](77) سورة القصص

ارجو ان يترك الناس كل في حاله طالما لا
يأتي باثم..او منكر...
فلا نكفر و لا نحرم ...و لا نغالي في الدين
و لا نتشدد...


تحياتي و تقديري...و ان شاء الله تكوني
أكملتي كتاب الدكتور يوسف ادريس..لعلك بعد ذلك تعطينا نبذه عنه
فتفيدينا....
Desert cat said…
الساحرة
معلشى مش عايزة اسيب اصل الموضوع وادخل فى نقاشات جانبية علشان كدا حذفت الرد
حضرتك موضحتيش مين المقصود فى البداية وبالتالى الموضوع عادى يعنى مفيش اى مشاكل
صباح الفل يا جميل
Anonymous said…
يا شيخة اتقي ربك وبلاش كدب بقى
حسبي الله ونعم الوكيل
انتي ليه بتكدبي خصلة صح
Desert cat said…
عبده الرايق
بالظبط كدا ياريق
هما كمان ياريتهم بيسيئوا للدين بالتشدد وبس
الا بافعال وتصرفات لا تمت للدين باى صلة
تحياتى
Desert cat said…
ايوية
تعرفى يا ايوية
هما لما يتزنقوا فى حوار تلاقيهم بيكفروكى مباشرة
زى الحمارة اللى راده عنده تحت باسم انونيمس
داخله تكدبنى مباشرة بدون اى نقاش او فهم
نورتينى يا يويو
Desert cat said…
فرنسا هانم
اتفق معاكى بنسبة 150 %
نورتيى يا فرنسيس
Desert cat said…
nody_1987
الاغرب بقى يا نودى انك تلاقى البت ولا الواد من دول قاعد فى المدرج وماسك المصحف وعمالي يقرأ بصوت عالى الآيات القرآنية التى تحث على الجهاد والقتل
شوفت الارهاب الفكرى بتاعهم وصل لحد فين ؟؟؟
تحياتى
Desert cat said…
nonni
هههههههه
فكرتينى بواحدة وانا كنت بصلى التراويح فى رمضان فى المسجد بعد ما خلصنا لاقيتها جاية تقولى انتى بتسجدى غلط ... قولت لها بسجد غلط ازاى ؟؟ انا عمرى ما سمعت ان فى حاجه اسمها سجود غلط ... نورينى ربنا يكرمك
قالت لى ابقى بصى على المصلين من حواليكى واسجدى زيهم
انما طريقة سجودك دى ربنا مش هيتقبل صلاتك
.... كنت هجيبها من شعرها بس رجعت افتكرت انى فى مسجد ولازم احترمه .. انتى يا بنى ادمة هتدخلى بينى وبين ربنا امشى يابت من هنا بدل ما اهزئك .. مكانتش تعرف انها وقعت فى شر اعمالها
نورتينى يا جميل
تحياتى
Desert cat said…
HafSSa
انا مش عارفه اصلا مين يا حفصة ادالهم الحق فى عمايلهم السودة دى والغريب انك تلاقى الواد او البت من دول بيتكلم وكأنه منزل برساله وهيفرضها عليكى يعنى هيفرضها
وفى الاخر مش بعيد يطلعوا تنظيم
نورتينى
Desert cat said…
د/اجدع بنوته
صح كدا يا دكتورة
انا ممكن الاقى بنت مش محجبة لكن باخلاقها افضل من واحدة لابسه نقاب وقاعدة تضرب كف بكف مع واحد زميلها ولا مغطية وشها وصوتها جايب من اخر الشارع
ده انا ساعات بشوفهم لابسين النقاب وعنيهم فيها كحل وايلاينر وايشادوا ايشى خيال ياناس
تحياتى
Desert cat said…
آلام وآمال
انا ببقى عايزه اقولهم زمن الرسل انتهى ده حتى الرسل والانبياء مش كانوا بيعملوا كدا خالص
كان قولهم ليناً
وبعدين يا محمود
انا مش بكتب بعصبية ولا حاجه
هههههههههههه
والله انا قاعدة على مكتبى وفى كامل قوايا العقلية
ثم انا مش عممت انا بس ذكرت امثلة واظن كلنا سمعنا عنها مش انا بس
ولا اييييييه
تحياتى يا باشا
Desert cat said…
كفايـة طيبـة
طبعا تستاهل تقطعى علاقاتك بيها لانها انسانة منافقة
وواخدة الدين مظهر
تحياتى
Desert cat said…
كفايـة طيبـة
الاسدال ده جه انتشر فترة انتشار النار فى الهشيم
وكانت كل واحدة تلاقيها لابسه الاسدال ولابسه البنطلون الجينز والكوتشى الابيض وماشية رافعه الاسدال لحد فوق الركبة
تقريبا بتعمل شو

نورتينى يا نونو
Desert cat said…
الربان
استاذى العزيز
انا استغرابى كان لطريقة كلامها واسلوبها الفج فى الحوار
كانت بتتكلم وكأنها موكلة من رب العباد وبصوت عالى ومنفر جدا
طبعا من خلال الكلام مع سيادتها ادركت تماما انها لا تفقه شئ عن الدين سوى النقاب اللى هى لابساه
وبالفعل الدين مامرش بالتفقه فى الدين فقط
بدليل
" اطلبوا العلم ولو فى الصين "
إن شاء الله أحاول ألخص الكتاب
بس انا هبقى أيه جنب شرح حضرتك وطريقة تلخيص الكتب بطريقة سهلة وبسيطة توصل للمتلقى بسرعه وسهولة وبكل إفادة
احترامى وتقديرى
ودائما ما تسرنى أرائك
تحياتى
Desert cat said…
Anonymous
قليلة الأدب
طبعا انا استنتجت انتى مين بخلاف انى جبت الايبيهات وقارنتها وطلعت بالظبط
يا سافلة يا مدعية التدين تحاورى فى صميم الموضوع
انما تدخلى تكدبينى او تكفرينى زى عادتك يبقى مش هديكى غير بالجزمة
son's egypt said…
السلام عليكم
طبعا العيب ليس في النقاب اللي الست لابسه العيب في الشخصية اللي تحت النقاب
يمكن هي حاولت توصل كلام بشكل خاطئ شويه
لكن ليه نعمم الموضوع
انا معاكي في كلام النت انه كتر فلي كل واحد يتكمل عن الدين
يمكن تكون ظاهرة سلبية لانه مش كل واحد عرف كلمتين يفضل يقولها
ومش من الممكن ان انسان يكفر انسان تاني ابدا
monaliza said…
انا معاكى ان فيه كتير بيسيئوا للاسلام سواء منقبات او محجبات ولكن مش معنى كده انهم كلهم كده ذى مافيه الحلو فيه الوحش
وليه احنا بنحط المنقبة والملتحى تحت الميكرسكوب وليه بنعتبرهم واجهة للاسلام مع ان برضه المحجبات واللى مش مربين ذقنهم بس مسلمين برضه واجهة للاسلام
ده من وجهة نظرى سلوكيات فرد وسلبيات تنشأ من بيئته وشخصيته
أما عن ماحدث معك فلكى كل الحق في غضبك منها لعدة اسباب منها الصوت العالى انا لو مكانك كنت فكرتها بتتخانق معايا ههههه
ده غير انا حسيت انها عايزة تتكلم معاكى بدافع النصح وخلاص مش بهدف تانى غير انها تبين انها عملت معجزة فى خروجتها يعنى من اول اعتراضها على ماتقرأى لغاية ضوافرك مش بقوللك بجد انا لومكانك كنت فكرتهاا بتتلككلى عشان تتخانق معايا ههههه
بس تعرفى ممكن تكون عايزة تنصح بجد بس مش عارفة او معندهاش اسلوب جذب للاخرين
ربنا يهدينا جميعا ويجعل افعالنا تحبب الناس فى ديننا
دواير said…
بصراحة بجد أحلى كلمة قلتيها...(عايزة تلبسى نقاب .. عايز تعمل لحية ... يبقى يا اما تبقى مراية لغير المسلمين وقدوة للمسلمين .. يا اما تروح تلعب كوتشينة انت واختك فى الله ... وتسيبوا الالتزام لأهله والدين لخير من يمثله)......فعلا المفروض الدين ما يبقاش مظاهر وبس...وفي نفس الوقت مش المفروض الناس تعتبر ان الحجات زي اللي حصلت معاكي دي قاعدة...ويقعدوا يقولوا ماهي دي محجبة وشوفوا عاملة ازاي..وه ملتحي وشووفا عامل ازاي.....لان الناس دي فيها الكويس وفيها الوحش..ومش معنى اني الاقي واحدة محجبة او اوحد ملتحي وبيتصرف كده يبقى العيب في الحجاب أو اللحية....لأن فيه جملة جميلة أوي بتقول....(يقاس الرجال على الحق....ولا يقاس الحق على الرجال)...موضوعك جميل
oceaneyes said…
النماذج المستفزة دى موجودة ومنتشرة بشكل اصبح منفر وبشع اوى بجد

والمشكلة انهم بيفسروا الدين على مزاجهم ..بياخدوا منه اللى يمشى مع مزاجهم وتفكيرهم ..وبيسيبوا اللى ممكن اوى يكون متعب ليهم ..

ربنا يهدى الجميع ان شاء الله

وهدى نفسك كدة يا نانا ..وان شاء الله خير ..وبلاش تنفعلى من ناس ما يستاهلوش


تحياتى


:)
mohamed hesham said…
نيااااااااو نياو ...

السلام عليكم ...

موضوع جيد وبوست لمس الواقع كثيرا ً ، أنا متفق مع حضرتك في حاجات كتير منه ...

المشكلة ان حتى الشخص الكويس اللي عايز للناس الخير بيسلك طريقة سيئة في التعبير تزهق اللي قدامه ... يعني "ما كان الرفق في شئ إلا زانه، وما نزع من شئ إلا شانه" ... دي حاجة

ثانيا : النصيحة على الملأ اهانة واحراج بصراحة .

ثالثا : هذا لا يمنع ان فيه ناس مربية دقنها التزاما حقيقيا (وده قليل لكنه موجود) ...

رابعا : ما هي مقترحاتك لتغيير هذا الوضع ... أو تصحيحه .

والسـ ختام ــلام
osama said…
النقاب ليس فرضا ولا سنة ولا فضيلة
النقاب زي عربي لبسته المرأة في الصحراء ، وانتقل مع الثقافة وأقحم في الدين/ لذلك الترابط الحادث بين النقاب والدين ترابط قائم على العادة وليس له اصل البته في الاسلام...
وبسبب الهجمه النفطية في 20 سنه الاخيرة ، انتشر مع العائدين من دول الخليج، والتمويل السعودي... ذاك الفكر الوهابي المكفر ...

اي انسانه على وجه الارض ترتدي ما تشاء اذ هي التي ستحاسب على هذا الرداء ، بما فيه النقاب ، لكن كما قلت نسبته للدين من عدمه نسبه باطلة...
الانسان هو الانسان واذا ربطنا مجازا النقاب بالدين الشكلي (اكرر مجازا) فان الشكل ليس له دخل قط بشخصية الانسان الحقيقة فهي لن تصبح كريمه اذا ارتدت النقاب ولن يصبح هادئا اذا اطلق اللحية.. اذ بسيط امر الشكليات...لكن الاصعب هو بناء القلب هو الجوهر ...
الاصعب ان تملك نفسك عند الغضب .. ام ان تطلق لحيتك..
قطعا ان تملك نفسك عند الغضب...
نقطة اخرى .. يجب علينا الا نعمم فالتعميم يعمي / فمنهن من يرتديه ويلتزم بآدابه اقصد قطعا الآداب التي فرضوها على انفسهن والتي قلت مرارا ليست في الدين بل ثقافة صحراء نفطيه....

اذا حق لي ان اهمس ناصحاً اذا سمحت: ان تهدئي من انفعالك عليهم بصفه عامه، حتى لا نكون مثلهم.. علما اني عانيت من هذا الفكر كثيرا

دمت بكل ود...
خالص تحياتي
Heart Beat said…
عزيزتي

اعتقد كده ان الشخص الانونيموس اللي علق و قال تعليق غريب ذكر فيه حاجه عن الكدب

ده مثال للسطحية و المخ الفاضي ده على اعتبار انه في مخ شغال و بيستنتج يعني

هو/هي عرفوا منين ان في كدب في الموضوع ... يعني بيرموا الناس كده بكلام سخيف مش عارفين عنه اي حاجه

مش ده رمي بالباطل برضه و حرام كمان و لا المحرمات بتكون على الناس بس و هم لأ كالعادة يعني

و بمنتهى الجبن داخلين انونيموس ... يعني ماعندهمش الشجاعة حتى على المواجهة من خلال المدونة طيب في العالم الواقعي بقى الناس دي عايشه ازاي

بس انتي ردك فكرني بمشهد من مسرحية المتزوجون لما لينا ردت على نفيسةو قالت لها قليلة الادب انتي

في ناس منقبات و من اصحاب اللحى قمة في الاخلاق و احترام الناس و احترام الزي اللي هم لابسينه و في ناس منهم على العكس تماما من اي صفة ليها علاقة بالاخلاق و الاحترام

مش عارفه ليه للاسف النموذج السيء منهم بنشوفه و نقابله كتير
و دايما بينصبوا نفسهم قضاة و يحكموا على غيرهم بأي شيء ممكن يجي ع البال المهم انهم يفرضوا اللي هم عايزينه و خلاص ... مع ان الدين الاسلامي عمره ما نادى باللغظلة في القول و لا العنف في الفعل لكن هؤلاء فسروه بشكل يرضي اهوائهم الشخصية و بس

اما عن من اللي بيوظفا نفسهم لمراقبة الغير و التلصص عليهم و بالتالي فتح مدونات هدفها فقط الادعاء على غيرهم بما ليس فيهم فدول بشبهم بالقائمين على الصحافة الصفراء اللي لا عندهم لا مبادىء و لا اخلاق و لا ضمير و معجونين بمية الكدب و التدليس ... ناس فاضية ماعندهاش احساس بالمسئولية عن اي حاجه عشان كده قاعدين بس يكتبوا مواضيع طويلة تيجب صداع عن ناس احسن منهم

يمكن بيعملوا كده غيرة و استفزاز و لفت نظر ليهم عشان هم زي ما بيتقال عليهم مهمشين و ماحدش داري و لا حاسس بيهم فقرروا لفت الانتباه ليهم بالصورة دي

سيبك منهم ربنا يشفيهم من الامراض النفسية اللي عندهم دي او يريحنا منهم خالص

بس الدليل على فشلهم هو ان ماحدش بيسأل فيهم خالص مهما لفوا على مدونات تانية و قالوا و عادوا ... خلاص المدونين عرفوهم و عرفوا ان كلامهم فارغ مابيفدش في اي حاجه

هو فعلا الدين التزام و الالتزام فعل مش كلام في الهوا و بس

لكن مين يفهم و يسمع

تحياتي و سامحيني على التطويل ده
fatima said…
قطتى الحلوة
إيه الحكاية ؟؟
الناس دى مستقصادكى ليه؟؟
قطم رقابيهم و مدوناتهم
أنا معاكى جدا
عارفة لما كنت فى الجامعة- دا كان سنة 1920 - كان بتوع الاخوان بيعملوا الانشطة بتاعتهم و واحد فيهم لطيف كدا كان بيوزع الورق بتاعهم اللى بيبقى فيه نصايح و حاجات كدا ...
كان بييجى يوزع الورق على الولاد اللى قاعدين بس و يعدينا احنا البنات ...طبعا أياميها كانت اختك زيك كدا ... متقدرش تسكت و تسيل فى نفسها ... رحت مكلامه عشان أحرجه ..و قولتله احنا برضو عندنا عقل و بنعرف نقرا ... متدينى ورقةانا كمان ... من غير ما يبصلى قالى خدى من أخيك اللى قاعدة معه دا ..و جرى بسرعة ... أخد لك الورقة من زميلى و أبص فيها يا قطقوطة ..ز
الاقيها عن الحجاب و عذاب السافرات و هكذا ...
الله !!!
طب بتديها لزميلى ليه ؟
ما المفروض تدهيلى انا ...
كنت ساعتها موش محجبة ...
طب ما انا الأولى بالنصيحة ...
لكن تحسى انهم موش ناضجين فكريا على الاطلاق
و شايلين رسالة أكبر منهم بكتير ...
و بعدين الدين سلوك
موش مظاهر خالص
و معلشى بقى حظك معاهم كدا ...
بس دا معناه انك من نوعية الناس المعتدة بروحها و دا بيستفزهم قوى
تحياتى يا قطتى الحلوة خالص
القطه الشقيه
الواحد مش عارف يبتدي منين
الأغنيه في الجون و بحبها جدا
انتي يابنتي موعوده دائما كده
:)الله يكون في عونك بجد من الناس الرزله ديه سواء في الحقيقي و لا علي النت

التصنع بقه سمه العصر ياقطه و ادعاء التدين بقه مفيش اكتر منه اليومين دول

الناس بقه كلامها كتير و افعالها قليله

تلاقي الواحد او الواحده من دول عامل نفسه شيخ او شيخه و نازل نصايح و هو او هي مابيعملش كده اساسا
طب بتنصح ليه ؟ماتنصح نفسك الأول؟
و طبعا ضيفي علي كده ان كل واحد فاكر نفسه انه ابو العريف و بقيه الناس مش فاهمين حاجه
كل واحد عايز يمشي التانيين علي مزاجه هو و بس و لو مامشيوش يبقي الأحكام جاهزه و مفيش اكتر من التكفير اليومين دول
مع ان في الاخر مش البني ادم هو اللي حيحاسب غيره لكن تقولي ايه في العقليات اللي من النوعيه دي؟

كمان الشاب الظريف اللي اشرتي له اللي كل مايضايق من حد يقوم فاقعه بوست حاجه فعلا غريبه و بشتغرب ليها
اد كده فيه خواء فكري؟

النقاش و الحوار المحترم بيجبر اللي قدامنا انه يحترمنا لكن لما ادخل و اشتم او اتكلم بأسلوب مش ظريف يبقي ازاي تجبرني اني احترمك؟
و لو حد ساندك في موضوع مثلا يبقي بيهللولك و لو حد هاجمك يبقي هو ده الصح
طب ماهو اي موضوع في الدنيا بيحتمل الاختلاف في الرأي و الاتفاق برضه ايه المشكله في كده؟

موضوع جامد ياقمر و خاللي العقول الفاضيه في نعيم
:))
فعلا عندك حق
و بوست رائع بجد
تحياتى ليكى
ههههههههههههه
ايه دة ياقطة هما البنى اديمن دول لسة موجدين
تصدقى انا افتكرت ان جتلهم مصيبة اخدتهم ولا اخدوا الشر وماتوا
اتاريهم لسة فيهم النفس اهو
ولسة بيعرفوا يقاوحوا ويشتموا

لو تسمحيلى بس ياقطة عايز اقول للبتاعه دى حاجة
ماشى



ياشيخة انتى اتقى الله
وبلاش افترى على خلقه

مالك كدة داخلة فيها شمال
وكأنها فضحتك
ولا قالت على مكان الموكنة بتاعتكم

اهدى شوية مش كدة

وكنا بتقولى عليها كدابة لي
هو انتى كنتى الى كنتى راكبة معاها
ولا انتى من ضمن الى هى تقصدهم

مهو اصل هما دول بس
الى ممكن الشيطان يلعب فى قولهم ويدخلوا يقله فى ادبهم
انما انتى ادخلة تشتمى كدة
من غير ميبقى ليكى حق
اهو انتى كدة بقى بقيتى هبلة
شكل الهبل خصلة عندكم صح

طب بالله ليكى ياشيخة
خدى هبلك دة وروحى مكان تانى
يمكن تلاقى ناس عندهم نفس الخصلة دى

فتحطى هبلك على هبلكم وتعملوننا منتخب قومى ندخل بيه كاس العالم
بدل محنا من سنة 90 مدخلناش

يمكن تيجى من الهبل

وياريت تقولى للشيطان بتاع الانتى
انه ميؤمركيش انك تدخلى هنا تانى
لحسن انتى كدة بتلعبى فى عداد عمرك

ودة غلط على الهبل عللاى فكرة
مكن يقلب معاكم بعقلانية ولا حاجة
وانتوا بتكرهوا الحاجات دى
فادى نصيحة ايزة تخدي بيها خديها مش عايزة
يبقى اخبطى داماغك انتى والاهبل الى جنبك فى اقرب حيطة
وياريت متدخليش هنا تانى
عشان هنا مكان محترم للناس المحترمة انما انتى مكانك هناك
عارفة هناك دة
اكيد طبعا عارفاه
بصى لو مش عارفاه
روحى لاى ظابط من بتوع الاداب دول عارفاهم دول
اكيد طبا صح
انتى بص اسئليه
هناك دة يبقى فين
هو حيقولك على طول
وممكن كمان يطلع راجل جنتل وكمل
ويوديكى معاه
مهو اصله كل يوم هناك
بياخد صحابك وبتاع
وبيعزمهم عنده
بيعيشيهم بقى وبيشربهم الحلو كله
وبيفرجهم على تليفزيون الوان
يعنى بيظبطهم
بس اكيد انتى عارفه يعنى
يعنى اكيد انك اتعزمتى هناك مرة
مش صح برده


ياله ماعلينا
معلش ياقطة دخلت رديت كدة
بس نعمل ايه بقى
هى طلبت معايا كدة حنعملها ايه
اضربها مثلا


لا مش اضربك انتى ياهبلة لا
انا قصدى على حاة تانية
شوفتى انتى بتاخدى الكلام على نفسك ازاى

دنا حتى حبيتك من اول شتمة وبفكر اروح اكلمك الظابط لحلح
ياخدك معاه العزومة الجاية
بس انا اقصد حاة تانية القطة فهماها

اخلعى نفسك انتى بقى من الكلام
ومتخافيش انا مبضربش حريم
انا بضرب رجالة بس


المهم
اسف مرة تانية ياقطة انى دخلت ورديت كدة من غير مخبط لى الباب
معلش بقى
منتى كمان الى سيباه متوارب
املك ايه يعنى
انا دخلت لاقيت الباب متوارب ولقيت لمة جوه وناس عماله تزعق
قولت لما ادخل اشوف فى ايه
واخر تانى
بس لما لاقيت الاخوة الهبل دول
رجعوا تانى
فمكنش ينفع انى اخرج من غير مدخلى جون واحد على الاقل

ياله
ربنا يهدى كل ضال
ويغفر لكل عاصى

تحياتى ياقطة
Foxology said…
والله عندك حق فى كل اللى قلتيه

كفاية مظاهر بجد كفاية ازدواجية الواحد زهق وبقى بيدور على نفسه جوة المجتمع المزدوج ده حاجة تقرف والله

ربنا يرحمنا برحمته
خبيب said…
أخطأت في تصرفها بالتأكيد
وقبل ذلك أخطأت في فهمها
ولذلك قيل : "إن منكم منفرين" !!

ويبقى أن نقابها شئ وتصرفها شئ آخر

فقد نفهم أن نعتبر النقاب "مظهرا" للسلوك ، لكنه ليس بالتأكيد "سلوكا" في حد ذاته

وبالتالي لا علاقة بينه وبين تصرفات الفتاة

"الفتاة المنتقبة" مصطلح مثل "الفتاة اللي لابسة نظارة" تماما ، مظهر خارجي ، وإن كان الأول لشرع والثاني لطب

لا نستطيع أن نقول أن كل البنات اللي لابسين نظارات سيئات الخلق أو ناقصات الفهم ، أو أنه ينبغي عليهن جميعا أن يكن قرآنا يمشي على الأرض لمجرد أنهن يرتدين النظارات

ولا يصح أن نلوم النقاب على سلوكها .. إذ - مثلا - كيف نلوم السكين على دم القتيل ؟؟

---

حقا ينبغي أن يدركن أنهن لا يمثلن أنفسهن فحسب بل الناس تحكم على الإسلام - للأسف - من خلالهن

بيد أن تفكيرنا نفسه ينبغي أن يتغير ، فنحكم على المناهج من خلال أفكارها لا من خلال أتباعها

فكما أن من أتباع الإسلام محتشمات ، فمن أتباعه من أظهرت كل شئ لكل الناس

فحاشا لله أن نحكم أن الإسلام دين يدعو للعري مثلا !!
Desert cat said…
son's egypt
يافندن انا معممتش الموضوع
بدليل انى كاتبة فى العنوان يا تحترمها يا تحترمية يا تتركوه للى سعفروا يلتزموا بيه يعنى فعلا فى ناس بتلتزم فيه
احترامى وتقديرى
Desert cat said…
monaliza
لا معلشى انا اختلف معاكى فى موضوع ليه نحطهم واجهه للسلام
اولا احنا مش بنحطهم تحت الميكرسكوب لان مش احنا اللى فرضنا علي المنتقبة لبس النقاب او الملتحى اللحية وقاعدين نراقب افعاله وتصرفاته
انما هو اعطى نفسه شكل الالتزام بارادته فمعلشى مش هبقى انا بنقابى واجهه للاسلام وافعل انا عكس مظهرى
فى الحالة دى المظهر بيفرق كتير جدا
لو حضرتك قابلة انسانة لبسها عادى وصدر منها اى تصرف غير لائق ختقولى ربنا يهديها
انما لما تلاقى واحدة ملتزمة خارجيا ادخليا متهى الحقارة انتى نفسك ستشمئزى
وبالتالى بالفعل هى بمظهرها وجهه للاسم فاما تلتزم او تسيبه بقى للى يعرف يلتزم بيه
الاسلام يا عزيزى الاشكال دى اللى شوهته
تحياتى
Desert cat said…
دواير
بصى يا جميلة فى حاجه انا بتكلم فيها معينة
معنى انك لبستى النقاب او الحجاب عموما
المفروض ان حضرتك او حضرتك يا ملتحى المفروض تكون ملتزم
ويبقى اخلاقك فى احسن صورة
علشان على الاقل تبقى قدوة غير الملتزم او وجههة مشرفى للاسلام
لانك بنفسك اخترت انك تكون واجهه
فاما انك تعرف تحترمها ياما تبعد وتسيبها للى يعرف
ومش اقول دى مش مقياس لاء مقياس ونص
الاسلام مش ناقص تشوية
كفاية اللى الغرب بيعملوا فينا بسبب الناس دى
تحياتى
Desert cat said…
oceaneyes
يا حبيبتى انا هادية
بس من الواضح من اغلب الردود ان النموذج ده منتشر جدا
ربنا يعافينا
تحياتى
Desert cat said…
mohamed hesham
بالفعل يا محمد وهو ده اللى قصدته فعلا ان النصيحة على الملأ فضيحة ده لو كانت بتنصح اصلا
او كانت نصيحتها على صواب
بخلاف ان بالفعل فى ناس متزلمة بس بصراحة القلة القليلة
تحياتى
Desert cat said…
osama
العزيز اسامه
جميعنا يعلم ان النقاب ليس فرضا
ولكن فى ظل انتشار الفكر الوهابى اصحبت المنتقبة رمز للدين
ينظر اليها على اساس انها العالمة ببواطن الأمور فتجد الصدمة الحقيقة فى افعالها وتصرفاتها
وحينما تسمح لنسفها بالتحدث مع الاخريات وكانها مرسلة من رب العالمين
وواجب عليها فرض هداية من حولها
انا معممتش فى كلامى انا بس عرضت بعض النماذج
احترامى وتقديرى
Desert cat said…
Heart Beat
انا كنت بقول المفروض محدش منهم يعتب هنا بقى علشان كل لما يتكلموا بيثبتوا لنا اكتر مدى جهلهم
انما ازاى لازم يعرفوان اكتر ما احنا عارفين
انا ملقتش حاجه تنفع ابدأ بيها رد عليها غير قليلة الادب
هههههههههههه
المهم يا حبيبتى كمان اسلوب تعاملهم الغبى سواء فى المساجد او فى الجامعات كمان تلاقى الواحده منهم تدخل و لا تلقى السلام و بس الى شاطرين فيه تعالوا اللقاء الى فى الجامع او يعلقوا على اى حاجه يشوفوها بغض النظر عن انهم هما فعلا من جواهم ملتزمين بالدين وبتعاليمة ولا لاء
ده انتى تلاقى البت من دول مكونة فوق عينيها الوان الطيف السبعة
ولو رفعت البرقع اللى على وشها تلاقيها عاملة زى البلياتشو وفى الاخر تقولك الدين
جتكو نيلة
نورتينى يا جميلة

و برضه الاخوه الملتحين حدث و لا حرج00يعنى كجلمود صخر بجد 00ايه ده؟؟
Desert cat said…
fatima
ام يوسف الجميلة
والله اما انا عارفه بمشى اتكعبل فيهم
تحت جزمتى وعلشان اان مبصدق اشوف حد منهم بدوس على طول
ولا بيهمنى
يا حياة قلبى الموقف اللى بتحكيه ده موجود كتير جدا
دى نماذج والعياد بالله
عايزة الحرق
ثم انا المفروض انى حبيت اتكلم معاكى او اوجه لك نصيحة يبقى اوجه لك النصيحة فى حاجه تستاهل فعلا
بخلاف ان هى مالها بتكوينى الشخصى هو مين فينا اللى هيتحاسب
فى الحالة دى بقى اللى بيقع تحت ايدى منهم بخلى يومه اسود وبعمل فيه زى اللى نزلت من الميكروباص كدا
محبتى ليكى يا احلى ام يوسف
Desert cat said…
اجندا حمرا
حبيبتى ابدأى الكلام زى ما تحبى
يا حببتى انتى لو بصيتى حواليك هتلاقيهم مرمين فى كل الشوارع وفى كل مكان
ده انا من فترة كنت فى الزقازيق شوف واحدة قاعدة جنب واحد على الكورنيش وحاطة ايدها جوا جيب البنطلون
هو يا اما بتقلبه يا اما بتجيب حاجه بقى من جوه جوه الجيب
حاجه تقرف بامانة
اتفضلى الاغنية بقى ما تغلاش عليكى
محبتى يا ارق اجندة
Desert cat said…
مواطن مصرى نايم
اشكرك جدا
شرفت حضرتك المدونة
Desert cat said…
زعيم كمورا مورا
يا زعيم رد براحتك
المدونة مدونتك
الباب متوارب او مفتح او مقفول حتى اكسره وادخل
ده الجهله بيدخلوا يقلوا ادبهم ويمشوا يبقى انت صاحب المكان مش تدخله ودى تيجى
Desert cat said…
Foxology
انت عارف الناس دى المفروض انها تكون مراية الناس تشوف فيها الاسلام الصحيح
لكن للاسف هما اللى بيشوهوا بافعالهم وتصرفاتهم اصبح دلوقتى لما تشوف واحدة صوتها عالى او بتسرق او بتتنيل على عينها ... بتبص الا ول على مظهرها وللاسف بتكون مقياس لكل المسلمين

تحياتى
Desert cat said…
خبيب
لا معلشى فى فرق بين الفتاة المنتقبة والفتاة اللى لابسة نضارة
الفتاة المنتقة اصبحت مظهر اسلامى مراية غير المسلم بيبص فيها
كذلك الملتحى ... ودائما تصرفاتهم بتكون محسوبة عليهم نهم المفروض خير من يمثل الاسلام فى سلوكهم وتصرفاتهم وافعالهم
انما اللى لابسه نضارة ممكن يكون عنيها وارمة ولا حاجه وبتداريها
لو هنقارن فى الحالة دى بواحدة لابسه نقاب يبقى المقياس هنا بقى اللى لابسة نقاب دى اما حرامية او واحدة مش كويسة بتتستر فيه وفى كل الحالات مسيئة للاسلام
ثم مثال السكين والدم اللى حضرتك ذكرته مش فى محله بالمرة
لان انا مبلومش النقاب على اللى لابساه انا بلوم على اللى لابسه النقاب اوضح لسيادتك اكتر
السكين ملوش علاقة بالدم لان السكين اداة استخدام انا هنا هنا هلوم اللى استخدم السكين .... يبقى المثال هنا خطأ لأنى بالفعل بلوم على اللى لابسه النقاب لانها استخدمته خطأ سواء فى سرقة او نصب او فعل فحشاء
لكن هو حضرتك ضربت المثال ده ليه
وعايز تقولنى كلام انا مش قولته ليه انا جبت سيرة النقاب فى حاجه ؟؟ ده حتى العنوان واضح وباين للاعمى قبل البصير انا بقول يا تحترمها يا تحترميه يا تتركوه للى يلتوم بيه يعنى اولا انا معمتتش يعنى فعلا فى ناس بتحترموه
ثانيا هو انا بقول النقاب ده وحش واللى بيلبسها بتكون وحشة مقياسا على كلامك بقى الغير منطقى بالمرة
اصلك بتقولى السكينة والدم هى السكينة دبحت لوحدها مثلا ... ولا النقاب راح لبسها لوحده
لما تيجى ترد تانى ابقى اقرى الموضوع وترد يا اما ما تردش خالص وده اللى انا بحبذه
Nsreen Bsunee said…
طبعا انتى عارفه رأيي كويس

الخلاصه ان انا فعلا ضد النقاب انا باعتبره مظهر مستفز جدا جدا جدا خاصه لو انتى فى دوله فيها غير المسلمين
يعنى اللى بيسافرو اوروبا ومصممين يلبسو النقاب طيب عايزين ايه بيستفزو الناس
بيغيظوهم مثلا
طيب ما يروحو يعيشو فى السعوديه ولا ايران ويلبسو نقاب براحتهم

يعني تخيللى كده واحد راح السعوديه ولبس لبس حاخام يهودي
يبقي مستفز ولا مش مستفز

المنقبات بقي عندنا فى مصر حاجه كده تفقع المراره بجد
تلاقيها معهاش ابتدائيه ومنصبه نفسها ام المؤمنين
مش عارفه مين دخل فى دماغهم انهم لما يعملو العبط بتاعهم ده هما كده بيجاهدو فى سبيل الله
ربنا يشفيهم او يتوب علينا منهم يارب
:)
Desert cat said…
Nsreen Bsunee
طبعا انا متفهمة وجهة نظرك كويس
اولا النقاب مش فرض دينى
زى ما تفضل وذكر اسامة ده لبس بدو الصحراء
كمان دى نشر للفكر الوهابى
نيجى بقى ونتكلم عن الى بتلبس النقاب انا عموما مش بكون عارفاها رايحة ولا جاية ولا ايه الكيس الاسود اللى ماشى قدامى ده بمعنى ان بالفعل منظرها مقزز
ومش معنى ان كل واحد حطت على وشها قطعة قماش سودة يبقى كدا الاسلام بيشر منها ... وتمسك فى ايديها صقوك الجنة وتقعد تكفر وتاسلم براحتها
الالتزام بالادب والاخلاق وحسن المعاملة مش بحتة القماش السودة اللى مغمية بيها نفسها ... ولون ساعات حتة القماش دى بتدارى بلاوى ... يعنى ممكن تكون واحدة وحشة ولابسها علشان متاذيش عيون الناس بس او احد الامثلة اللى ذكرتها فى البوست
نورتنى
محبتى يا ريناااا
blackcairorose said…
قطة

بغيب يومين تلاتة ارجع عندك والقاكى الدنيا مولعة

بصى بجد بحب اسلوبك وكلامك وخفة دمك

وكمان جرائتك فى طرح الموضوعات اللى انت مقتنعة بيها بطريقة دوغرى

المهم سبب دخولى النهاردة انى قريت ان الاخوان قرروا ميشتركوش فى الاضراب، معرفش الخبر ده صح ولا لأا، لكن قلت ادخل اشوفك كاتبه ايه فى الموضوع لول

وتسلمى
Desert cat said…
blackcairorose
يا حبيبتى انتى تنورى فى اى وقت المدونة تحت امرك
بالنسبة للمتأسلمين فده العادى
انهم يقوموا القومة وبعدين يقولوا لك احنا حننسحب
هو الاضراب هيجى من وراه اصلا اى مصالح
لو كان من وراه مصلحة او منصب او اى حاجه كان زمانهم متصدرين القائمة
تحياتى
بداية النقاب مش فرض , واللي عاوز يلبسه دي حرية شخصية , بس بلاش اسلوب اللي مش معانا يبقي علينا , يعني لو ملبستيس النقاب تبقي مش المسلمين ..

وبالنسبة لحكاية المنقبة دي , لو كان المسلمين اللي عملوا اعظم حضارة عرفها التاريخ بيفكروا بطريقتها مكنش الاسلام انتشر وساد العالم علي مدي قرون وكانوا بالكتير مجموعة من البدو يعيشون في الخيم ...

طبعا مش كل الملتحين بضيق الافق ده ..

مع خالص تحياتي
Desert cat said…
الفارس الملثم
طبعا المعروف ان الاسلام فى القلب والدين المعاملة
" لو كنت فظا غليظ القلب لانفضوا من حولك "
لكن للاسف مين يطبق الكلام ده
كل واحده لبست النقاب او واحد عمل دقن يبقى كدا خلاص قاضى وجلاد
تحياتى
soska said…
مش عارفة اقولك ايه على البوست الجريء الخطير اللي بجد عجبني جدا ومن كتر ماهو عجبني مش عارفة اعبر اقول ايه انتي قولتي كل اللي لازم يتقال و فشيتي غللي و غل ناس كتير
جزاك الله خيرا يا أختي:)))
somaa mahaba said…
يا ختىىىىىىىى لو وقعك حظك الاهبل واتناقشتى معاهم
الغريبه فى ناس بتقول كلام مش مقنعه بيه وفى بنات بيلبسوه عشان يتجوزا اه والله زى ما بقولك كدا
وتساليها تقولك اصل الاخوه كتير
طبعا من اول الحجاب المحترم (مش بتاع البناطيل الساقطه ولا البيرمودا ابو بوط)وحتى النقاب دا مسؤليه على عاتق المسلمه
ليا خاله لو قعدتى معاها تحبى النقاب فعلا من كتر جمالها فى الطبع والدين
للاسف الشديد تعمل بعض الجماعات على جمع الجهلاء فى الدين والعلم وبث فكر وثقافه ودين خاطىء
حتى انهم لا يعرفوا اصول الدعوه
تحياتى ليكى سومه_87

Popular posts from this blog

قميص دهشور

كل تحرش وانتوا طيبين