اشمعنا ده محدش جاب سيرته


فين المواقع المخصصة نفسها لشتيمة ظباط الشرطة ... وفين البلوجات اللى مبتصدق بلطجى يرمى بلاه على اى واحد فيهم وتشتغل تلفيق اتهامات كاذبة ..... ما هو بقت اسهل حاجه تحصل دلوقتى والبلطجى يخرج من القضية انه يروح يقول الظابط حط السيخ المحمى فى اللامؤخذه .... الملازم اول محمد عاشور ... معاون مباحث بمركز القناطر الخيرية
... لانه ظابط ملتزم وشايف شغله كويس فى البداية مسجل خطر أتهمه انه عذبه وانتهك عرضه على غرار قضية عماد الكبير اللى بقى قدوة لكل البلطجية وتجار الكيف .... وبتقرير الطب الشرعى خرج منها براءة ... مالقوش طريقة يزيحوه من طريقهم بيها ابلغوه عن صفقة اسلحة واغتالوه ..لصالح مين قتله هنادى سليمان المسجل الخطر ... وبعدها انتحر او نحر فى النهاية بلطجى وخلصنا منه عقبال الباقى ... ربنا يسلطهم على بعض ... . للدرجة دى تجار المخدرات والاسلحة والبلطجية ظهروا وشموا نفسهم واللى يقف فى طريقهم اما يتهموه باغتصابهم أو يخلصوا عليه ما هى خلاص بقت مولد وصاحبه غايب .... كل واحد يدخل يخربش نفسه ويعور نفسه ويخرج يقولك اصل الظابط الناقص اللى بيجرب نفسه فينا الاول قبل ما يتجوز اغتصبنا وانتهك عرضنا ... ...
فى رقبة مين دم محمد عاشور ..... فين اللى رايحين جايين يدعوا على الشرطة ؟
فين اللى مخصصين نفسهم لمهاجمتهم
ياترى الالسنة دى فين دلوقتى من محمد عاشور ؟؟؟
مش ذنبهم انهم ولاد ناس ... مش ذنبهم انهم بينضفوا البلد من البلطجية ... مش ذنبهم انهم بيشوفوا واجبهم .... انما الذنب ذنب اللى مش عايزهم موجودين ... ذنب اللى بيخالف القانون وكانه عايش فى غابة مش عايز حد يقوله انت بتعمل ايه .... ذنب اللى ليه عندهم حاجه ومطالهاش ... ذنب القلوب السودة .... ربنا يحفظهم جميعا
محمد عاشور شهيد الواجب
الى جنة الخلد ان شاء الله

Comments

هييييييييييييييه
اول تعليق
سمعت قصته فى برنامج البيت بيتك
وحزنت عليه جدا
وكان حزنى
على كلام اخوه عنه
قال
اخويا اتقتل مرتين
مره لما اتهموه بانتهاك عرض المواطن والصحف هللت وكبرت الموضوع
ومره عندما قتل برصاصه القاتل
يابنتى مهما الناس دى كدة
تبقى معانا وفى صفنا
حنروقك وحتبقى تحت حمايتنا
وواحد من رجالتنا جوه
حتلعب علينا وحتحط عينك علينا وحتصدعنا فى شغلنا
حتبقى لعبت فى عداد عمرك

ربنا يرحمه ويصبر اهله
لا حول ولاقوة الا بالله

دمه ف ذمة ربنا

مات شهيد

للاسف ان الوحش لما ظهر

بلع الحلو

لسه ف ظباط ماشيين بشرفهم

ولسه ظباط ضميرهم صاحى

بس مجرد مايبقى وسطهم واحد وحش

اووووووووف

الشعب بيشمشم ع وقعهه للحكومه

لكن لو الحكومه م بكره وزعت ع كل واحد كيلو لحمه

هياكله ويرجع يشتم ف اللى خلفوه

بمعنى اصح دايما الناس بتدور ع الغلط

وبتتعاطف مع المظلوم بقى

شعببببببب بيحقد ع السلطه

حتى لو السلطه جت باست رجل ابوه

تحياتى ع البوست
بلدنا فيها الحلو زى ما فيها الوحش
فيها سلبيات وفيها ايجابيات
فيها الشريف المحترم وفيها ......
المهم هو مات شهيد والى جنة الخلد
واكثر الله من امثاله الشرفاء
بس اللى يغيظ ان السيىء بقى اكتر من الكويس
فى زماننا
تحياتى خالد
مش عارف ليه مش مقتنع بان الشرطه فى خدمه الشعب حتى لو كان طابط محترم
Desert cat said…
عبده الرايق
مبروك عليك اول تعليق
Desert cat said…
عبده الرايق
ومش سمعت كلام والدة وهو صوته مش طالع وبيقول خلاص محمد راح
الله يرحمه
Desert cat said…
زعيم كمورا مورا
بعنيهم طبعا
هيطلع لهم الف محمد عاشور لحد ما البلد تنضف من اشكالهم
Desert cat said…
د/اجدع بنوته
بالظبط كدا يا دكتورة
المفروض الضابظ يشوفه بيسرق يقول يا حرام ده عواطلى غلبان اسيبه يقلب قرشين علشان يروح يشترى بيهم بانجو ويتكيف
ولما يقبض عليه يبقى ده ظابط ابن تلاتين فى تسعين
Desert cat said…
همس الاحباب
صح انا موفاقك يا خالد ان بلدنا فيها سيئ كتير جدا
خد عندك
العواطلية اللى ماليين الشوارع
وتجار المخدرات
والحرامية والنصابين والمرتشين
واخرهم العيال اللى مش متربية اللى رايحة جاية فى الطرق والمواصلات تتحرش بالناس
مش كدا ولا اييييييييييه
Desert cat said…
صوت من مصر
عارف انت مش مقتنع ليه
اصل مهما اللى هيفكروا لك تشتغل فين وازاى
ومش هما اللى هيقفوا مكانك فى طابور العيش علشان تجيب عيش
ومش هما اللى هيحلوا لك ازماتك
وبالتالى مش مهم انت تقتنع
المهم انه فيهم ناس كتير جدا جدا محترمين وفيهم ناس كل همهم كشف الجريمة والعقاب حتى لو كانت حياتهم الثمن
قولت لى حضرتك بقى يا سيدى دورك ايه فى المجتمع
وعملت ايه علشان تنميه
؟؟؟؟؟
معلش يا نونا

البقاء لله

تعيشى وتفتكرى

والله الواحد زى ما بيزعل من النوعيات السيئة

بيزعل اوى على الناس الشريفة

تسلم ايديك

أحمد
Desert cat said…
Ahmed Al-Sabbagh
صح كلامك يا احمد
بس الاهم ان النوعيات الوحشة تخلينا منلغيش دور النوعيات الكويسة
تحياتى يا احمد
mnoon said…
يابخته مات شهيد
ربنا يرحمنا إحنا
اللى لسه عايشين
فى الدنيا دى
خليكى فاكره إن السيئه بتعم
والحسنه بتخص
علشان كده محدش إفتكره
تحياتى إليكى
Desert cat said…
mnoon
معلشى يا منون قانون الحسنة تخص والسيئة تعم ده للى بيبرر لنفسه فعل خطأ
مش معنى ان واحد ضربنى اروح انا الم اهله واشتغل فيهم ضرب ما هى السيئة تعم بقى
ولما نقف قدام ربنا يوم الحساب مش هيحاسب كل واحد على حساناته والسيئات يوزعها على باقى العباد
ده كلام رجعى بيتقال للتبرير مش اكتر
كل واحد حساناته تخصه وسيئاته برضه تخصه
تحياتى
هيا بقت كدا خلاص .
بلدنا بيحكمها شوية رجال اعمال بيظبطو كل حاجه ليهم .كل اعضاء الوطنى فى مجلس الشعب اغلبهم رجال اعمال ولو مش رجال !اهو عز بيسوقهم.وتجار المخدرات والسلاح بقا ليهم كلمه وخربت !!!!!!!!!!!!!!!!!!1
monaliza said…
ربنا ع الظالم سواء كان ظابط وبيستغل سلطاته او بلطجى وبيتبلى ع الناس
"وما ربك بغافل عما يعمل الظالمون"
والله انا حاسس انك بتلعبى بيا وفى الاخر هتطلعى مخطوبه لضابط شرطة
وساعتها هيبقى المشروع قطة الداخلية مش قطة حدوتة

شوفى يا سيتى اول حاجة محدش بيدخل كلية الشرطة غصب عنه ولا مكتب التنسيق بيرميه هناك عشان مجموعه
بالعكس دول بيحفوا ويجيبوا وسايط الدنيا كلها عشان يقبلوهم
واللى عايز يبقى ظابط اكيد عارف انه مش هيقعد فى مكتب مكيف ويجبولوا مزة من استار اكاديمى تبقى سكيرتيرة والذى منه
يبقى الكل عارف انها شغله خطر والطبيعى ان يبقى فى ضحاية
المفروض نقدرهم ونحترمهم بس ده ميخليناش نبرر المصايب اللى بيعملها ظباط تانية والسيخ المحمى فى اللامؤخذة
معلش طولت عليكى بس ده من عشمى
EmY said…
هايقتلوكي قريب بتدافعي عن الشرطه يا قليلة الادب
انا دايما مع ان الحكومه ليها ايجابيات زي ما ليها سلبيات ولازم نشوف الاتنين
الشرطه فيها ناس محترمه جدى و ناس زباله التعميم وحش

تحياتي
semsem said…
اليقاء لله

فى الجنه ان شاء الله
حسبنا الله ونعم الوكيل

الواحد حاسس انه عايش في غابه والبقاء فيها بيكون للاقوى

مش قادرة اتصور انسان بني ادمين يكون منزوع منهم الرحمه للدرجة دي

حسبنا الله ونعم الوكيل

وربنا يرحمه و يصبر اهله يارب ويجعل مسواه جنه الفردوس باذن الله

وربنا قادر ينتقم من كل ظالم

فصبر جميل

ارق تحيه لفكرك ولحروفك البراقه اختي الغاليه

تقبلي مروري
ابن المقفع قال ايه
ان المعايب تنمى والمعاذير لا تمنى
لو كنتوا ذاكرتوا كويس فى العربى فى الثانويه العالمه كنتوا وفرتوا بوستات كتير ههههههههههههههه
الله يرحمه يارب
shreen said…
تصفيق حاد يا قطة الصحراء
لزئيرك المرتفع فى هذه الكلمات

نعم اين ذهب اصحاب مدونات وصحف الشتائم فى الضباط ؟

لقد نطقت حقا
كل واحد بلطجى يخرج يقول اصل انا اعترفت علشان الضابط حط السيخ المحمى فى لا مؤاخدة

بجد انت عقليه متميزه
قدرت تقرى ما بين السطور
وتميزى الحق من الباطل

قليل جدا الناس اللى بتوصل للحقيه بعقلهم بس

مش عن طريق نشوف مين اللى بيهللل ونهلل معاه

ده يا بنتى بقت موضه كل واحد يتقبض عليه او يعترف

يقول الضابط اصله عذبنى

ويوصل الامر للجرايد
والناس تهلل وتقول تعذيب ويا عينى حرام الراجل مظلوم اجبروه على الاعتراف

وفى لحظه ظهور تقرير الطب الشرعى
يا اما ما حدش يجيب سيره

يا اما يقولوا
اااة رشوا الدكتور
علشان يزور التقرير

كأن العالم تحول لمجتمع من الملايكه والضباط هما الوحوش اللى فيه

فى تجاوزات اه من بعض الضباط بس مش بالصوره اللى الخلق دول عاوزينها توصلنا

كان الله فى عونه وعون اسرته

تحياتى لك على عقليتك المتميزه القادره على قراءه ما بين السطور

كل الاحترام والود لك
تصدقي مبحسش إن فيه رجالة في البلد إلا لما أسمع خبر استشهاد واحد من الشرطة..مهما كان فيه أفعال بطولية و إنسانية عملها ناس تانيين ..لما شردي يأدي عمله صح بحس بالرجولة بجد..الله يرحمه ..أكيد كان راجل طيب..
و الفاتحة على روحه هوا و محمد المتناوي الله يرحمه.
عزيزتي قطة الصحراء،

نعم يوجد من ضباط الشرطة من يموت فداء للواجب و الشرف ، و منهم من يختفي خلف الموتوسيكل كضابط حادث الاقصر لو تذكريه، منهم من يلفق له المسجلون قضايا و منهم من يفعل الافاعيل بالناس فعلا ، و نسبة الفساد زادت بهم كما زادت في كل فئات المجتمع

لكن و لا شك ، لو كانت قصة الضابط محمد عاشور دقيقة بهذه التفاصيل فهو شهيد ندعو له برحمة الله و تكريمه حق علينا و على الدولة

تحياتي و تقديري
kaed said…
العزيزة قطة الصحراء واللة
عندى شوية ظروف كدة فى الدكتوراة مطينة عيشتى شوية اليومين دول
أسف جدا للإنقطاع الطويل
أوعدك قريب جدا حتشوفنى منور تانى
فعلا يانانا عندك حق
انا كنت بقراء تدوينه عند دكتور حر
عن التعميم فى الحكم
هو غلط اننا نعمم فى الحكم عن اى شىء
زى مافى الصالح فى الطالح
وزى ما فى الحلو فى الوحش
وانا عن نفسى قابلت ظباط ممتازين اخلاقيا هنا فى السويس
ايه ؟؟؟؟؟؟؟؟؟
لا
خالتك فرنسا مش وش سوابق
لكن ظروف عملى تمكننى من التعرف عليهم

ولكن
وما ادراك ما لكن
الوحش فيهم غلب الحلو
معلشى ده رايى

اما عن الضابط محمد فهو شهيد
وهو الان فى سعاده ما بعدها سعاده
سعاده الشهداء بلقاء ربهم
الربان said…
تحياتي و تقديري

رحم الله الفقيد...و بدون شك ما عند الله
خير مما يجمعون...او من ذكرهم في الدنيا
و قد يكون الاسم سقط سهوا او التحديث للموقع متوقف او متأخر.

ما أود ان اقوله أيضا اننا بحاجه ماسه الي اعادة النظر في الاستراتيجية الامنية...و ايضا في دعم اجهزة الشرطة
بالاجهزة الحديثة التي تعينهم علي اداء
عملهم...و بحاجة الي تقدير رجل الشرطة
و حمايته لامن المجتمع...فمازالت رواتب
صف الضباط و الضباط متدنية..

تحياتي و تقديري و تحية و دعاء الي روح الشهيد...اسكنه الله واسع رحمته و فسيح جناته.

و دائما موضوعاتك مميزة.
الغاليه قطه الصحراء

جزاكي الله كل خير انك خصصتي موضوع لشهيد الواجب

فيه كتير زيه و للاسف لما ناس بتتكلم عن ظباط الشرطه بيتناولوا النماذج السيئه لكن دايما الكويس بيتنسي

دايما الناس بتعتبر ان اللي بيشوف شغله واجب عليه و مايستحقش عنه تقدير و لا شكر حتي لكن اللي مابيشوفش شغله يبقي لازم نفضل ندي في كلام

ربنا يرحم شهدائنا و يجعله في ميزان حسانتهم

تحياتي و تقديري لكي صديقتي العزيزه
قطه الصحراء
اقولك ايه انى بشوفهم يوميا بيوقفوا سواقين مكيروباص بالعبيط وانزل يلا وطلع الى فيه النصيب
ولا لما بيروحوا الفرن عشان يعملوا اى حوار ولا يشتروا عيش مبيدفعوش ومش بيقفوا فى طابور
بس فعلا مثلا انا اعرف امين شرطه وصديقى بس محترم جدا فوق كميه اى احترام
وبصراحه مش كلهم لكن الاغلبيه حاتم ؟
والى مش بيحب حاتم مش بيحب مصر
وعموما انا شكلى خنقتك صح ؟
قطتي

انا اول مرة اسمع الحكايه دي

بس بجد صعب عليا اوي الله يرحمه
ويصبر اهله يارب


سلاموووووووز ياقطه

وزة
appy said…
يا خائنه يا مشفلحه انتى تدافعين لقد تكهربتى يا قطه
ههههههههههههه
لا بجد البقاء لله انا سمعت ومن الحاجات يا ختى اللى فقعت مرارتى الشلاليه اللى على مصراوى متفهميش دول قاعدين يشتموا فى البلدوالشرطه والشعب مفيش غير فلسطين الا كويسه والمصرين زباله المهم من ضمن اللى غظنى واحد بدل ما يقول البقاء لله يقولك وسعت من الدخليه قوى يعنى ايه رايح من غير ما يأمن نفسه واكيد الداخليه اللى قتلت التانى شوفتى الجهل والكرههوالعمى وصل بينا لغايه فين اننا دلوقتى بندافع على المجرمين جتهم القرف الشلاليه دو بجد ربنا ينتقم منهم قرفونى اوعى بقى انا ماشيه
ربنا يصبر قلب والديه
استنى يبقوا يقابلونى بقى لما واحد يتسرق ولا يتقتل والظابط يعمله محضر ويمشيه وبعدين يقعد المحضر ياخد راحته خليهم يزهقوهم ويشتموا فى الكويسين فيهم وياخدوهم فى الرجلين لغايه لما تخرب
ما قولت لكى اوعى سيبنى ايه الرخامه دى انا ماشيه سلام
والنبى فى صوت هنا خانيقنى لاخر مرة بس ابقى خلى بالك منه هههههههههههههه على فكرة الظابط بتاع المرور مش بيأخد رشوه هما الناس دى مش بتعرف تفرق ما بين الامين والظابط ههههههههه هما مش دول اللى هجمونى لما قولت مفيش رشوه وبلاش قالوا لا عادى دلوقتى بقت حرام على الامناء اللى بيأخدوا 250جنيه
قولت لك سيبنى اوعى احسنلك باى بقى
قطة الصحراء

بالتاكيد اسلوب التعميم خطأ قاتل واكيد مش عشان مثلا في اطباء شايفين الطب تجارة يبقي كل الاطباء سيئين او في محامين فاسدين يبقي الامر ينطبق علي كل المحامين

بس اسمحيلي انتي لو عملتي استطلاع عند غالبية المصريين وطبعا في كتير منهم مش بيدخلوا علي النت عن رجال الشرطة وتعامل البوليس معاهم اتجدي اراء شديدة السوء وطبعا ده يبين ان في مشكلة كبيرة واكيد النظام الامني ورجال الشرطة بيتحملوا جزء كبير من الانطباع ده عنهم
Nigro said…
This comment has been removed by the author.
MerMaid said…
لا حول ولا قوة الا بالله

الله يرحم الجميع
و فعلا التعميم من الجانبين سيء جدا

تحياتي ليكي
Desert cat said…
تــــايه ومش تـــايه
طيب مجلس الشعب كل اللىف يه رجال اعمال وعز بيسوق تجار المخدرات والسلاح احنا فين دورنا للتصدى للناس دى ؟؟؟
Desert cat said…
monaliza
صح ربنا ينتقم من كل واحد ظالم
Desert cat said…
حــدوتـــة
عيييييييب قال بتلعبى بيا قال
ده نا قطة كلمتها واحدة هى قطة حدوتة يعنى قطة حدوتة
ده انا حتى حددت الاسم وكلمت لك بلوج سبوت المفروض تشوف المعاد اللى يناسبك علشان تقابله قصدى علشان تعمل عليه البلوج
بص يا سيدى كل مكان فيه الحلو والوحش وانا مش بنكر ان الداخليه فيها ناس عايزة الحرق بس برضه فيها نماذج كتير جدا محترمة وبتراعى ربنا كويس فى العباد اللى بتتعامل معاهم
Desert cat said…
EmY
ما انا عارفة انى فى الهدف للقتل ابقى اقرى على روحى الفاتحة الهى يكرمك
كل مكان فيه الحلو والوحش والله العظيم اان مقتنعة جدا بكدا بس انا رافضه التعميم دى كل الحكاية ... ابقى اسالى عنى يا ايمى
Desert cat said…
semsem
ان شاء الله
Desert cat said…
قبلة الحياة
بالظبط هو ده القانون المتبع فى عرفهم البقاء للأقوى ربنا يرحمه ويريحنا منهم
تحياتى حبيبتى
Desert cat said…
بطوط حبوب
معلشى يا بطوط اصلنا مخلصين ثانوى من زمان فالواحد نسى
الله يرحم الجميع
تحياتى
Desert cat said…
shreen
لا فض فوكى
كل مكان فيه تجاوزات واكتر بكتير كمان من أقسام الشرطة ولو الإعلام سلط عليها الضوء كانت هتبقى الفضايح اكتر بكتير من التجاوازت الحاصلة فى جهاز الشرطة
لكن موضة الاعترافات تحت التعذيب اللى انتشرت فى الاخر اصبحت سبوبة لكل صحفى ارزقى عايز يعمل خبطة صحفية من غير ما يتبين الحقيقة .. واصبحت موضوع ثرى لموضع عايز يزيد من عدد الزوار
وبالتالى اصبح عامة الناس لما بيشوفوا امين شرطة يكرهه لمجرد انه ينتمى للداخلية ما الاعلام والصحافة والمواقع الالكترونية قايمة بالواجب وسايبة الفساد الادارى والرشوة والغلاء والمواضيع اللى تهم المواطن العادى مش المواضيع اللى تهم المجرمين والخارجين عن القانون
شكر واحترام لكل حرف من حروفك
دمتى بكل حب
Desert cat said…
أحمد المصري
مواقفهم الحلوة كتير وبتتكرر كل يوم يا احمد
بيقبض على تاجر مخدرات وبيقبض على حرامى وبيقبض على نصاب وبيقبض على قاتل وبيقبض على مغتصب وبيخلص المجتمع من مخاطر الناس دى كلها
لكن الناس مش بتشوف ده الناس بتدور على السيئ وتعممه
الله يرحمه ويرحم المتناوى
Desert cat said…
Dr. Eyad Harfoush
انا مش معترضة يا دكتور ان فيهم اللى بيعذب وفيهم اللى بيلفق قضايا
بس اعتراضى على التعميم فقط لا غير
احترامى وتقديرى
أم أحمد said…
انا عندي جار ضابط شرطة آية في الأخلاق
يعني مش كل الضباط فاسدين ولازم نهاجمهم
احنا شاطرين اوي في الهجوم والتعميم يعني لما يكون فيه ضابط اساء لمواطن يبقي كل الضباط مسيئين
لأ مش كلهم ...وفيه منهم ولاد ناس برضه
Desert cat said…
kaed
ان شاء الله الظروف تخلص بخير يا دكتور
واشكرك جدا ان حضرتك افتكرت تزورنى فى وسط مشغالك بجد سعيدة جدا بزيارتك وتشريفك
ربنا معاك ويوفقك وترجع تنورنا تانى
تحياتى
Desert cat said…
فرنسا هانم
صح يا فرنسا انا ما انكرتش ان فى وحش بس فى حلو انا اللى بيضايقنى فعلا هو التعميم
الله يرحمه
Desert cat said…
الربان
استاذى العزيز انا اللى ثار اندهاشى انى فعلا ملقتش حد متكلم عنه لكن لما حدثت قضية اسلام نبيه وطبعا شتان بين المثالين بس لاقيت الجرايد بتنشر والمدونات بتكتب وحقوق الانسان شغالة الله ينور والمواطن العادى كمان رايح جاى يتكلم فى الشارع .... ومازال الحديث لحد النهارده عن اسلام نبيه مستمر ولن ينتهى ... استشهد المتناوى اتكلم عليه اتنين تلاته وتناسوه تماما مع انه عمل عمل بطولى يتحسب لكل جهاز الشرطة ما هو تعميم بتعميم بقى ... استشهد محمد عاشور الخبر اتكتم عليه وكانه انضرب بالنار وهو بيغتصب واحدة ولامؤاخذه فى الكلمة ... على حد قول حضرتك يمكن الموقع لم يحدث بعد او الاسم سقط سهوا ... لازم نلتمس لهم عذر برضه ...
يارب دايما عند حسن ظن حضرتك
إحترامى وتقديرى
Desert cat said…
اجندا حمرا
بالظبط كدا يا اجندة
اللى يشوف شغله يبقى ده واجب وفرض عليه ... واللى ميشوفش نفضل نديله فى كلام .. طيب ما يعمموا نظريتهم دى على جميع الفئات ... ما هم بيروحوا مصالح حكومية ونفس الناس اللى بتتكلم دى بنفسها هى اللى بتطلع فلوسها من جيبها بكامل رضاها تديها رشوة للموظف علشان يخلص لها شغلها ... ما انت بتقاوم الظلم والفساد بقى يبقى من الاولى انك تقاوم نفسك اولا ثم اللى بترشيه وبعدها ابقى اتكلم عن اخطاء الناس وتجاوزاتهم
دمتى بحب يا جميلة
Desert cat said…
صوت من مصر
حضرتك كدا دخلت الدنيا فى بعضها
يعنى الشرطة على المرور على التموين
اولاً اللى بيقف وبياخد من السواقين فلوس ده مش ظابط ده امين شرطة ... ولو كام سواق تكاتفوا مع بعض وعملوا فيه مذكرة شوفه هيتجازى او على الاقل هيتنقل من مكانه ولا لاء .. بس احنا اللى شعب سلبى بندفع ونقول نمشى مصالحنا .. طيب مشى بقى بس مش تشتكى بعد كدا ... بالنسبة للى بيحصل فى فرن العيش ده برضه مش شرطة ... ونفس الحوار لو اتعمل فيه مذكرة وتصعدت لرؤساءه شوف ايه اللى ممكن يجرى له ... والدليل قدامك الظابط لما مجرم بيتهمه بالتعذيب بيتحقق معاه وبيدخل نيابة وسين وجيم ... واهوه مجرم اللى مشتكى مش مواطن عادى .... ثم حضرتك بتقول تعرف امين شرطة كويس ورجعت قولت مش كلهم .. طيب ما انا كمان بقول مش كلهم .. بس مش ننكر دور الكويسين يعنى هما مش محتاجين مننا شكر لانهم اكبر من انهم يحتجوها هما بيعملوا الواجب واللى بيمليه عليه ضميرهم علشان عارفين ان فى رب موجود
تحياتى
Desert cat said…
انين الحزن
الله يرحمه ويرحم جميع شهداء الواجب
تحياتى
Desert cat said…
appy
مصراوى ده خليه فى جنب لوحده كل لما ادخله الاقى ناس قاعده تشتم فى بعضها ... فى موضوع فلسطين سابوا الموضوع الاصلى وشتموا بعض وفضلوا يتهموا بعض بالعمالة ... فى مقتل بونظير بوتو ... برضه اشوفهم بيقولوا ايه الاقيهم بيقولوا لبعض انت بتدافع عنها علشان موزة .. موزة ايه الست اد جدتك منك ليه وتقول موزة .. طيب .. بالنسبة لمحمد عاشور كويس انهم قالوا ان الداخلية قتلت التانى مش قتلت محمد عاشور ... ولا الكامين اللى اتعمله كان بترتيب من الداخلية ... الناس بقت بتكره نفسها ... وبترمى تهم فى الباطل وخلاص ....
استنى مش تشمى لازم تشربى حاجه ...
الصوت اللى خانقك ده يا قلبى معلشى مش واخد باله من ابعاد الموضوع اساسا .. هو المفروض كل فئات الشعب مطالبة تشتم فى الشرطة واللى يتشدد لها كمان ... اصلهم ناس كخة ... هما المسؤلين عن البطالة وهما المسؤلين عن الرشوة والفساد .. المفروض يدوروا على المواطن من اول ما يتولد ويتولوا تربيته ورعايته لحد ما يجوزوه ... استنىبس لازم تشربى حاجه مش تمشى دلوقتى
اذا كنا مش قادرين نميز بين امين الشرطة والظابط ... يبقى من حق الناس تدافع عن المجرمين والحرامية وتشتم فى اللى بيحميهم منهم
هههههههههه
Desert cat said…
الفارس الملثم
بالظبط يا فارس كلامك صح
للاسف لو امين شرطة بياخد رشوة اللى بيدفع بيلعن ابو الشرطة باللى فيها وياخد انطباع ان كلهم كدا فى حالة اننا نفسنا فى ايدينا الحل ... اصل امين الشرطة المرتشى ده مش رئيس نفسه فى رؤساء اكبر منه وممكن ياخد حقه برضه بالقانون ... هما عارفين انطباع الناس عنهم فيهم اللى بيتقى الله وبيراعى ضميرة وفيهم برضه اللى يستحق الحرق ... ربنا يعافينا
تحياتى
Desert cat said…
Nigro
هما مش ملايكة يا محمد دول بشر ولما يتعامل كل يوم مع قاتل وسارق ومغتصب بالاضافة لانه كمان مش مهيئ له يعيش كويس بس ده مبرر انه يقتل ويعذب وانا عارفه ان النماذج السيئة موجودة بس فيهم برضه الكويسين والكويسين جدا كمان الله يرحمه
تحياتى
Desert cat said…
MerMaid
الله يرحمه ويرحم جميع موتانا
نورتينى ميرميد
Desert cat said…
أم أحمد
صح يا ام احمد وبالظبط ده اللى انا عايزه اقوله
دمتى بكل ود
وعيد ميلاد سعيد يا جميل
semsema said…
بصى يا قطة
الظابط ده على عينى وراسى هو وكل اللى زيه وربنا يرحمه ويجعل مسواه الجنة
بس بالنسبة للناس اللى بتدعى على الشرطة بصراحة هم مالهومش ذنب
لانهم ياما شافوا الويل من الظباط والصولات وغيرهم انا معاكى ان فى ظباط كويسين بس الوحشين دلوقتى كتروا اوى وبقوا جبابرة ومافيش حد هامممهم
وانتى عارفة اللى بيتلسع من الشربة بينفخ فى الذبادى
Foxology said…
محدش جاب سيرته علشان الوحش غطى على الحلو وبقى هو الأغلبية العظمى اللى عاملة زى السحابة السودة اللى بتحجب الشمس فى عز الضهر

موضوع البلطجية والعصابات ده من زمان ومن زمان اوى كمان ووجوده دلوقتى دليل على ان الأمن مش مستتب ولا حاجة وان السوس بينخر وعمال ينخر فى كل حاجة
أنا حر said…
شهيد مش محتاج نكتب عنه لأنه ادى دوره وأدى الواجب المفروض عليه
شهيد هيفضل في تاريخنا زي غيره من الابطال اللي مش هيتنسوا ابدا بس اعذري الناس اللي بتهاجم الشرطة احنا بنخاف قوي لما نحس ان اللي مسئولين عن حمايتنا هما سبب رعبنا
تحياتي
Anonymous said…
يا قطة يا بتاعة الظبابيط قاعدة تخربشى فى اى حد يجيب سيرتهم فى اى مكان ولا كأن حبيب العادلى هو اللى مخلفك
انا اصلا مش بقبلهم بس شكلى هحب العيال الظباط دول اصل شكلهم مكيفينك على الاخر
Desert cat said…
semsema
سمسم انا هرد على كلامك كلمة كلمة
بتقولى الناس اللى بتدعى عليهم مالهومش ذنب
يعنى ايه مالهومش ذنب صحيو من النوم لقيوا نفسهم بيكرهوهم كدا لله فى لله واشتغلوا دعاوى عليهم
.........
شافوا الويل من الظباط والصولات وغيرهم
هو احنا عايشين فى غابة ده المجرم اللى عنده 14 سابقة لما اشتكى محمد عاشور الله يرحمه اتحقق معاه ودخل نيابات
ولولا تقرير الطب الشرعى جه فى صالحه كان زمانه اخد عقوبة
واخد بالك انت مجرم وعنده 14 سابقة مش مواطن عادى ماشى فى الشارع ...
طيب ما تتقوا الله فى افعالكو وتصرفاتكو وهما يبقوا حلوين وكويسين
Desert cat said…
Foxology
الوحش غطى على الحلو
يعنى لو عندك اخ حرامى او ابن عم وانت انسان اخلاقك كويسة
اجى انا لما اشوفك فى الشارع احدفك بالطوب علشان قريبك وحش
؟؟؟؟؟؟؟؟
الامن مش مستتب
بدليل المتناوى ومحمد عاشور وغيرهم من الشرفاء اللى يضحوا بارواحهم علشانك وعلشان غيرك
صح
طيب دى ناس ماتت علشان تحميك
انت بقى عملت ايه على الاقل علشان تحمى نفسك ؟؟؟؟
Desert cat said…
أنا حر
هما بالفعل مش محتاجين انك تكتب عنهم مش علشان ده واجبهم وأدوه إنما علشان هما ماتوا ابطال بيدافعوا عن ناس مش وراها غير شتيمتهم طول النهار .. ناس لما حد بيقولها بخ فى اشلارع بيجروا عليهم هما اول ناس يعيطوا لهم وياريتهم بيشكروهم على حمايتهم ليهم وده اقل واجب
اللى مش مفهوم واحد محترم ومراعى ربنا وضميره هيخاف ليه ... ما هو مش بيخاف ويترعب منهم غير اللى على راسه على بطحة ...
عموما هما مش مستنيين من حد كلمة شكر وبعد كدا لما يروح له مجرم هيبقى يساله تشرب ايه يا حبيبى شاى ولا نسكافية
اجيب لك معاه كيك يا عمرى
المهم انك تكون مبسوط
ها بقى قولى انت سرقت طبعا المجرم هيقوله مسرقتش
هيروح الظابط قايله طيب اسفين للازعاج يا حياتى فى رعاية الله وخد بالك من نفسك وانت ماشى
بس بعد كدا لو بيتك اتسرق او اخوك اتقتل مش تروح تشتكى لهم
برضه تحياتى
Desert cat said…
Anonymous
هما فعلا مكيفينى جدا
علشان بيمسحوا بكرامه واحد زيك الارض ومخلينه يمشى زى الجزمه اللى لابسها
اللهم اسكنه فسيح جناته
إن كان محسنا فتقبل حسناته
وإن كان مسيئاً فتجاوز عن سيئاته
اختي الغالية
الخير في وفي أمتي إلى يوم الدين
ومثلما يوجد ظباط غير اشراف قاسيين القلب
يوجد الكثيرررررررر اشراف طيبيوا القلب مرهفي المشاعر
ولكن ما اقوله في النهاية
ان حرامي اقوله يا استاذ ؟!!! ولا اقوله يا حرامي
علشان كده لازم الحرامي يتعامل بالبهدله
اللي يقطع الطريق عليا وعلى اختي وامي وابويا المسن يتعمل فيه كده
اللي يسرق محفظة فيها مرتب اول شهر لأب عنده عيال وابنه يتعالج يتعمل فيه كده
اللي تقتل جوزها عشان حتة عيل فرفور ماشية معاه يتعمل فيبها كده
اما الاشراف فهم اهل للإحترام
وياما دخلنا القسم ومحصلشي اي شئ وحش
momken said…
طبعا وقبل اى كلام الله يحم الملازم اول/ محمد عاشور وان يدخله مدخل الشهداء

تانى حاجه نيجى بقى لكلامك

طبعا انتى متنكريش اى زى ما فيه ناس محترمه فيه ناس جزم صح؟؟؟؟

طيب تفتكرى حضرك محمد عاشور هو بس الى يعرف تجار المخدارت والسلاح الى فى القناطر؟؟؟

مع انه لسه ظابط صغنون وجديد
طيب فين الظباط الى اقدم واكبر منه

نقيب وائد ومقدم وعقيد وعيمد ولواء
كل دول ميعرفوش حاجه ياحرام
ناس فى حاجه
طيب مش شايفين شغلهم

ولالالا ولا بيقبضوا من التجار دول
ولا مشركين التجار دول وبينصصوا معاهم
ولا بيترمخوا على التجار دول مقابل شويه مرشدين منهم وتفويت كام قضيه فشنك

سيدتى دم الشهيد محمد عاشور فى رقبه زملاء الرتشين والهباشين
الى منهم ناس كانت عارفه انه هيتصفى او على الاقل بيتهدد

مش فى رقبه الشعب الى فضح محمد نيه وامثاله

عاوزك تروحى قسم شرطه تعملى بلاغ علشان تعرفى يعنى امين شرطه مش ظابط

تحياتى
Desert cat said…
عابد الرحمن
احترامى وتقديرى لردك القيم
انا مش فاهمه الناس اللى بتدافع عن المجرمين دى بدافع ايه ؟؟؟
طيب يسيبوا الحرامة والنصابين واللى قاتلين علشان الناس تتبسط يبقى كل واحد يتحمل مسؤلية نفسه
ما هى بنظريتهم بقى هتبقى غابة وربنا يستر
احترامى وتقديرى
Desert cat said…
momken
تفتكر حضرتك لو اتخانقت مع واحد فى الشارع وضربته واخدت حقك منه ... بس التانى مش سايب حقه و عايز يخلص منك .... هيروح يستدرج والدك علشان يقتله ولا يستدرجك انت ... هو تاره مع مين فيكو انت والدك ... وفى حالة لو قتلك هنقول اصل والده واخد رشوة علشان يسكت وسيسب القتل يقتل ابنه براحته ... ما هى دى مقياس لدى
.... وعلى فكرة انا جربت دخلت القسم قبل كدا .... وعرفت افرق كويس اوى بين الظابط وامين الشرطة ... اسكت هقولك مفاجأة ... دول كمان قبضوا على الحرامى اللى كان سرقنى اه والنعمة ... ورجعوا لى الموبايل بتاعى ... كونك روحت هناك ومش عرفت تميز بينهم ... دى مش غلطتهم ... غلطة الذنب اللى رحت علشانه
تحياتى
قطة الصحراء
من الواضح ان معظم التعليقات بترفض فكرة التعميم وانا معاهم غلط فعلا نعمم ونوصف الداخليه كلها بإنها فاسده اكيد فيهم ناس محترمه بس المشكله ان الناس اللى بتتكلم على الداخليه وفسادها ماهما عايشيين فى البلد دى برده وبيشوفوا بعنيهم الفساد والبلطجه من الداخليه
اما بخصوص الظابط من اعتباره شهيد او لا دى مسأله يحكم فيها المولى عز وجل ان كان ظابط شريف يقوم بواجبه وقتل فهو ان شاء الله شهيد ومكانه مع الانبياء والصدقيين
اما اذا كان من الفسده المتجبرين فطبعا وصف شهيد لا ينطبق عليه

انا مليش عداوه معينه مع ظباط الشرطه ولا صداقه معينه مع ظابط شرطه ولكن العقل يقول ان كل مهنه فيها المحترم وغير المحترم
Desert cat said…
بحبك يامصر
طيب ما هو ده اللى انا اقصده
ان فعلا كل مكان فيه الحلو والوحش بس التعميم مرفوض
HoNdA said…
لا حول ولا قوة الا بالله ربنا يرحمه ويغفرله انا اول مرة اسمع القصه دى
انا اتخضيت اما لمحت اسم هنادى

اصل ده اسمى هههههههه
Desert cat said…
HoNdA
ههههههههههههههههه
لاء متتخضيش
ثم شتان بين الاسمين يا حبيبتى
نورتى البلوج
السلام عليكم ورحمة الله وبركاته

قبل ما أعلق
:
في بوست جميل عند دكتور حر علي مشكلة التعميم

مفيش حاجة اسمها كل أصحاب المهنة الفلانية كويسين ..ولا كلهم وحشين

في حاجة اسمها أن الأخلاق مسألة معيار شخصي
بتفرق من انسان لانسان

والانسان المنصف بيتحيز للحق في كل قضية علي حداها بغض النظر مين المتهم فيها ومين المدعي عليه

لكن اطلاق الاحكام العامة سواء لصالح او ضد فئة معينة بحيث تشمل الفئة كلها بدون استثناءات تعصب ملوش داعي

ده مش معناه اني بقول مفيش تجاوزات أو انها حالة فردية.. وفي نفس الوقت مش معناه اني بعمم التجاوزات دي بحيث تبقي شئ لابد منه في اي ضابط شرطة

لانها ولا هي حالة فردية ولا هي قاعدة عامة لازمة لكل افراد الشرطة

وفي قضية زي دي طبعا مفيش عاقل هيقف ضد الضابط اللي قتل من قبل شوية بلطجية ويشمت فيه لمجرد أنه ضابط..

بالعكس.. موقفه يرثي ليه .. ولو صح الخبر هو قتل مرتين فعلا.. لانه اتهامه في عرضه او بانتهاك عرض اشد من قتله

وختاما ربنا يرحمه

وربنا يرينا الحق حقاً ويرزقنا اتباعه ايا كان هذا الحق
انا طبعاً منكرش ابداً ان فيه رجال شرطه بيضحوا بحياتهم فى سبيل الواجب
بس للأسف - و محدش يقدر ينكر - الظباط الفاسدين كتروا و بقوا اكتر من الكويسيين
الله يرحمه و يصبر أهله و ينتقم من الى كان السبب
شكراً ليكى
تحياتى
ايوية said…
ربنا يرحمة ويرحمنا
المشكلة يا قطة ان الحلو محدش بيجيب سيرتة انما الوحش ياة نملا الجرايد والمدونات بية
ياريت نظهر شوية من الحلو الى فى بلدنا
تحياتى
سنووايت said…
مهو احنا مش فالحين غير في تصديق التراهات ورمي الناس بالباطل
ربنا يرحمه ويغفر له
والشرطة زيها زي اي مهنة فيها الكويس وفيها الوحش لكن احنا ما بنصدق
انا اللي كل يوم بيزيد احترامي ليكي ولكتباتك بجد
قطتى حبيبتى
طبعا انا علقت على الموضوع ده
وكان لى تعليق عند مهندس مصرى
وحبيت اكتبه عندك
لان الله يعلم مدى معزتكم عندى انتم الاتنين

------
مهندس مصرى اخى العزيز
قطه الصحراء اختى العزيزه
احيانا بتوصل طريقه الحوار والنرفزه اكتر من كده بكتير بين الاخوات وبعضها
لدرجه ان ممكن اخين او اختين يمسكوا فى خناق بعض بالايدى
ويرجعوا تانى اخوات
مين الغلطان ؟؟؟؟؟؟؟؟؟؟؟
مهندس مصرى ولا قطه الصحراء ؟؟؟؟؟؟؟؟
الاتنين كبار وناضجين وعاقلين واذكياء ويكفى وصولهم الى هذا المكان
وتلك المكانه بين المدونين
مش هينفع نعقد محكمه ونحاكمهم
ونغلط واحد عن التانى
لالالالالالالالالالالالالالا
مفروض الاتنين يفكروا
ويراجعوا كلامهم ويقرروا
لو واحد حس انه غلطان فالاسف والاعتذار من مكارم الاخلاق
والله اننا اول من سيهلل له
ولو الاتنين مش شاعرين ان فيهم واحد غلطان
نسيب الموضوع دلوقتى
والايام بيننا
فى هذه الامور لا يفيد طرق الحديد وهو ساخن

06 مارس, 2008 01:17 ص
مع انى ما اعرفوش
بس اكيد الشرطة فيها ناس كويسه وانا اعرف منهم ناس زى الفل وفيه ناس مش كويسه
بس حتى لو تجار المخدرات وقتالين القتوله واتمسكوا لازم يتعاملوا كبنى ادمين
لازم يتحافظ على حقوقهم وعقابهم لربنا وللقضاء والشرطه مش جهه لتقيم الحدود
والمتهم برئ حتى يتحكم عليه
ولا ايه
يعنى لما ظبوط ما يسواش تلاته مليم يضرب قاضى ولا يعتدى على مواطن بدون وجه حق نعمل معاه نسافله ونديلوه بونبونى ولا نطالب بحقنا المدنى وحق المجتمع اللى صرف على الظبوط ده لحد ما خلاه راجل ملوا هدومه عشان فى الاخر الظابط ده يجى يطلع مله اللى جابوا ابو الشعب
الظابط الكويس ارفع ليه القبعه وانحنى احتراما
الظابط السادى الفاشى النازى
مش هرفعله القبعه
وبس وتحياتى يا قطة
روح ياجميل أقرا تعليقى عند المهندسمصرى ع الخناقة اللفظية بتاعتكوا ومين يا بنتى قال أن محدشأفتكرة الكل أتكلم ع الشهيد وكرمة ربنا يرحمة ويرحمنا
معادنا مستمر وخلى أبى كمان تقرا تعليقى جننتينى عاوزة انام ودماغى فيها الف حاجة وأضطريت اعلق عند مهندس مصرى عشان جننتينى انتى وهو وأبى يال هنام بقة سلام
تحياتى
Desert cat said…
القلم السكندري
الاحكام العامة على فئة معينة من الناس بتجعل الصالح فيهم يتخاذل
ما هو كدا كدا متاخد فى الرجلين بقى
ومش يبقى انا اللى عمال اهين فى شخص محترم ولما يسرق اجرى اشتكى منه
بس برضه لا يقذف بالطوب سوى الشجرة المثمرة
تحياتى
Desert cat said…
شريف طلال
بص يا شريف الفاسد بيتعاقب وياخد جزاؤه بدليل البلاغات اللى بيتقدم بيها مسجلين الخطر والظباط بيتحقق معاهم
المهم احنا مش نسكت على الفساد تحياتى
Desert cat said…
ايوية
علشان اللاغلبية اتعودوا يمثلوا دور المظلومين المطحونين
بقا يجيبوا سيرة الحلو ليه
ربنا يرحمنا من العقليات دى بقى
نورتينى يا ايوية
على فكرة انا بدخل مدونتك بلاقيها تقيييييييييله
خفيفها شوية علشان خاطرى
Desert cat said…
سنووايت
بالظبط يا دكتورة
ما بنصدق نشوف اى حاجه علشان الارزاقية ياكلوا عيش
تحياتى ليكى
Desert cat said…
عابد الرحمن
يارب اكون دايما عند حسن ظن حضرتك
خالص مودتى
Desert cat said…
فرنسا هانم
فرنسيس الغالية عندى اوى
ربنا يحفظلك عقلك وقلبك الطيب
اموااااااااااه
نقطة الحليب في كوب حبر اسود مش للأسف مش هتعمل زي نقطة الحبر الأسود اللي بتود كوب الحليب..

ربنا يرحمه ويصبر أهله
وينصر كل مظلوم ويهد كل ظالم
Desert cat said…
حدوتة مصرية--ياسر شمس الدين
لا حول ولا قوة الا بالله هو حضرتك داخل شمال كدا ليه
لو كنت راجعت ردودى كنت لاقيتنى بقول ان زى ما فى الحلو فيه الوحش
مش معنى انك لاقيت واحد وحش ترفع السكينة على الجميع
وهعيد المثال اللى ضربته تانى
لو انت انسان كويس واخواك جه اتخانق معايا
مش هدخل انا اضرب فى كل البيت علشان خاطر اخوك هضربه هو لوحده
علشان هو اللى قل ادبه مش باقى البيت
تحياتى
Desert cat said…
كلاكيت تانى وتانى
هقابله بكره
ان ان
ريحى نفسك يا نونو ومتجادليش
ده ناس بتقول كلام مرسل وخلاص
سلامة دماغك يا حبيبى
و الله زى ما فى كل مكان الكويس و الوح
برده فى وزاره الدخليه الكويس و الوحش لكن للاسف الوح هو الكتير

و الكتير اوى

و هو ده اللى خلى الحلو مش يظهر
Desert cat said…
محمد مارو
طيب ما هى برضه مش غلطة الوحش
دى غلطتك انت لانك سكت عليه لحد ما سبته يطفو على السطح
اصل كل رئيس له مرؤس وتقدر تخد حقك بالقانون زى المجرمين اللى بيتعبوا دلوقتى سياسة الظابط اللى عذبه وبيدخله نيابات
السلام عليكم
الله يرحمه ونحسبه على خير ولا نذكى على الله احدا

بس انتى مقلتيش ليه ان الاخوان هم السبب ؟؟؟؟؟؟؟؟؟؟؟؟
Desert cat said…
النجم القادم
ولا تزعل نفسك
الله يرحمه
والاخوان هما السبب
يهمنا انبساطك
oceaneyes said…
هما الناس النضيفة اللى عندهم زمة فى الزمن ده لازم يتعمل فيهم كدة ..

اصل مافيش حد عايز غيره يبقى كويس ..الكل عايز الكل يبقى وحش

حسبى الله عليهم


ان شاء الله شهيد وعلى جنة الخلد بإذن الله
Desert cat said…
oceaneyes
ما هو دايما الناس النضيفة بتكون عقبة فى طريق اللى عايشين بطريقة غير سوية
وبالتالى بيطبقوا قانون الغاب
الله يرحمنا منهم
تحياتى ليكى

Popular posts from this blog

قميص دهشور

كل تحرش وانتوا طيبين