عملوها الرجالة ... عملوها الوحوش

اولاً حمد الله على سلامة المنتخب المصرى اللى رفع راسنا فوق
والف مبروك علينا جميعا فوز مصر والف مبروك علينا ابو تريكة والف مبروك علينا الجهاز الفنى بقيادة حسن شحاتة اللى استحق وبكل جدارة لقب المعلم .... بالرغم من انى ماليش فى الكورة بس حسيت انى فرحتى غير طبيعية .... خرجت انا وصحابى وشجعنا
الشارع كان مليان وكل الناس فرحانة صغيرين وكبار رجالة وستات ... عمو اللى فى العربية وجنبه زوجتة وورا اولاده كلهم بيشجعوا ... حتى الحاج الكبير هو وزوجته الحاجه ماشيين قدامنا وبيدوا تلكسات كتيييييير .... والله الفرحة احساس جميل والناس زى ميكون كانت مستنية اى حاجه علشان تنطلق ... لفينا فى البلد كلها وقدام مجمع الشرطة كانت ناس كتير والله والامن كانوا واقفين يتفرجوا ومبسوطين ومادوش حد على قفاه ولا اى حاجه ... ورجعنا كلنا تانى وتيييييت تيييييت مصررررر ... مش عارفه انا ايه الحب الجارف اللى طلع من قلوب الناس كلها دى ... واللا الناس هى اللى كانت بتتلكك علشان تطلع الكبت اللى عندها ولا فى ايه بالظبط ... واللى لفت نظرى اكتر ان الشباب اللى بيقفوا يعاكسو فى الشارع مشغولين وكانوا لما يشوفوا بنت سايقة العربية مش يرخموا عليها ومياحولوش يزنقوا عليها ... البنات اللى كانت بتنزق على بعضها بس ... واحنا ماشيين كانت قدمانا عربية شبهت عليها وكنا هنكسر الفانوس بتاعها بس رجعنا قولنا احنا فى ليلة مليانة بالفرح بلاش الأذية ..... ننسى شغل الشياطين ده يوم واحد بس وبعد كدا نرجع له .... عموما انا من جوايا كنت فرحانه ايه السبب وليه مش عارفه يمكن علشان كنت شايفه كل الناس فرحانين فقولت اشمعنا انا ... بس كنت كل لما اسال حد انت فرحان ليه ... كان يقولى علشان انا مصرى ... ومصر هى اللى فازت فلازم افرح ... نفس الجواب من اشخاص مختلفة ... وقتها عرفت قد ايه احنا بنحبها ... ومهما حصل لنا برضه فراحنين بيها وليها ... كل اللى اقدر اقوله انى بجد فخورة بكونى مصرية .... ماهى صحبتى من الامارات ... كانت بتابع المباريات كل يوم وكل يوم الاقيها مغيرة النيك نيم بتاعها على الماسنجر .. شوية الفراعنة ركبو الافيال ... وشوية تانية عملوها الوحوش ... وشوية تالتة المصريين اهمه .... كنت كل لما اسلها ليه كدا ... تقولى انا بحب اسمع اوى نانسى وهى بتقول شربت من نيلها وعلشان كدا بغنى لها ... وانا شربت من نيلها يا نانا وبجد بحن لها .... رجعت بيتنا ببص على الموبايل لاقيت عليها 32 مكالمة لم يرد عليها طبعا مكنتش سامعة ... كانت ماهى وسارة بيتصلوا بيا علشان يقولوا لى مبروك وانا مش سمعت خالص طبعا هسمع ازاى وانا فى المهرجان اللى كنت فيه ده ..
بس لاقيت منهم الماسجات دى ...

الله عليك يا ابو تريكة .. الله عليك يا زيدان وحسنى ومتعب ... الله عليكو يا رجالة مصر .. الله عليكى يا مصر ... حقك يا حبيبتى تفخرى بانك مصرية ... من قلبى بحبك يا مصر

ودى رساله تانية

مبروك فوز ملوك الجدعنة ... مبروك فوز الفراعنة


Egypt We
Woooooooooooooooooooooooooooooooooooooowe Won

طبعا فخورة بانى مصرية .... يارب دايما النصر لمصر

أول لما الماتش خلص كل واحد مسك فى ايده علم مصر وطلع يجرى فى الشارع

حريق القاهرة .... لاء دى مش حريقة دول بيعملوا صواريخ


الولاد سابو الكراسى وكانوا بيقفوا فوق العربيات اصل كلها كانت بالمنظر ده تقريبا العربيات كانت ماشية لوحدها من غير سواق

متجمعين عند النبى إن شاء الله


الصوردة دى بقى اهداى للجميلة Heart Beat


دى بقى الاختراع الخزعبلى اللى اسمه توكتوك جبته لك لحد عندك


اللى معاه صواريخ بقى ميفرقعش فى المدونة

كفاية النار اللى فيها

Comments

white Angel said…
مبرررررررررررووووووووووك علينا كلنا الكاس

فعلا عملوها الوحوش

بوست جميل لكن الصور مش واضحه اوي
ما علينا
شكرا علي المجهود

عقبال صور فرحك
هههههههههههه


تحيايي
Desert cat said…
white Angel
علشان كان بالليل والدنيا زحمة
اما صور فرحى ان شاء الله انتى اللى حتصوريها لى بس مش تنزليها فى البلوج .... نزليها على مصراوى
هههههه
فعلا والله وحوش
عمله المستحيل فى زمن كل حاجة فيه بقت مستحيل
بس تصدقى اول مرة بجد اشوف الناس فرحانة بالشكل دة
حتى البطولة الى فاتت الى اتلعبت على ارضنا الناس كانت فرحانة اه بس مش بالطريقة دى
دى الناس لغاية النهاردة
بيهنه بعض
والى يعرفك والى ميعرفكيش بيقولك مبروك
حتى ستات البيوت البسيطة
الى متعرفش هى ايه الكورة اساسا
ماشية تهنى بعد
مبروك يام محمد
الهل يبارك فيكى يام فاروق عقبال ولادك ياختى
مع انى مش عارف ايه علاقة ولادها بالموضوع
بس اهى فرحانة
عشان بس سمعت ان حصلت حاجة حلوة لمصر والله ما فى اجمل ولا احلى ولا اطيب واخلص
من الشعب المصرى
الف الف الف مبروك لكل مصرى بيحب مصر بجد
ومش مهم بقى ليه فى الكورة ولا ملهوش
المهم انه بيحب مصر وعايز يخلصلها
مبروك ياقطة
بجد الفرحه مش سايعانا احنا فرحانيين من قلبنا فرحونا الوحوش فرحونا الرجاله كلهم من اول حسن شحاته الى عامل التدليك والملابس كهم رفعوا راسنا
Heart Beat said…
ربنا يخليكي ليا يارب

انا متشكرة جدا على التوكتوك كان نفسي فيه من زمان
i owe one dear

بالنسبة بقى للكأس الافريقي السادس ... ما تتصوريش انا سعيدة به اد ايه مش بس عشان فوزنا بس لاني شايفه في فرحة من الدول العربية بشكل لم يسبق له مثيل لدرجة اني مستغربة الاشادة و الاهتمام اللي فاق الوصف ده لمصر و للمنتخب المصري

يعني عندك قناة ام بي سي و مكافأة صاحبها الشيخ وليد للفريق المصري و كذلك المليون جنيه من الشيخ صالح و قنوات ايه ار تي و تكريم الشيخ محمد بن راشد المكتوم للفريق في دبي

و اتصال الرؤساء و الملوك العرب بالرئيس مبارك لتهنئته

و هنا و بعد المباراة و لاول مرة تحصل الاقي عربيات ماشية في وسط الشوارع الكبيرة و المعروفة هنا و اللي فيها شايلين علم مصر و اهل البلد كانوا اكتر من المصريين نفسهم و بيلفوا الشوارع دي كلها و بيهتفوا بإسم مصر

و يوم مباراة ساحل العاج كنت بسمع التشجيعات في وسط هدوء الليل هنا بصوت عالي جدا

و اصدقائي في الكويت برضه حكوا لي على الاستعدادت اللي تمت في الكويت العاصمة من اهل الكويت نفسهم عشان يتفرجوا على المباراة

و تاني يوم المباراة مافيش حد دخل مكتبي من اهل البلد هنا الا اما قالي لي مبروك و انهم فرحانين جدا بالفوز ده

ده غير كل الجرايد اللي بتصدر هنا كتبت مقالات كبيرة في صفحة الرياضة عن مصر و الفريق المصري

و منهم مقال عجبني جدا النهارده كتبته صحفية رياضية قالت فيه ان الفريق المصري لعب بروح مصر و كأنه كان بيقول انا مصري قبل اي شيء و الوطنية و حبهم لمصر بكل ما فيها هي اللي خلت الفريق المصري يفوز و ياخد الكاس... مافيش حد فيهم اتكسف و لا خبى فرحته بفوز مصر و كل المصريين قدروا يخلوا الدنيا كلها تفرح معاهم و تشجعهم

معلش طولت عليكي بس التشجيع اللي شوفته هنا للفريق المصري و التهاني الجميلة بالفوز و اللي بتحصل لاول مرة خلتني احس اني فخورة جدا بالانجاز ده و لاقتني برد عليهم و اقولهم انا مصري و ابويا مصري بسماري و لوني مصري

و اشكرك على التوكتوك و انتي بس شوفي عايزه ايه من هنا و انا اجيبه في التو و اللحظة ... حلوة في التو دي مش كده
والله الفرحه مش فى الشوارع دى فى قلوبنا وجوه قلب تكتك كل مواطن
أنونيمس said…
مبروك
والبوست اللي فات ضحكني مووووت
مبرررررررررررررروك عليكم والف الف مبروك لمصر
الف مبروك يا بشرية

الف الف مبرووووووووك
fatima said…
قطتى الحلوة
الف مبروك و يا ريت نفرح عشان نجاحنا فى مجالات أخرى مع الرياضة
الفرحة حلوة قوى و بقت عزيزة
عقبال ما نفرحلك انتى كمان دايما
تحياتى وحبى يا قطة
Soletoo said…
desert cat ;
enty feen ya bet enty wa7ahstany gamed bgad walhy
3omoma2marouk l masr
el botolah elt fatet ana kont be2adeya fel 2estad a2a o blawn weshy o 7arakat
yall wa7ashetny y fandm
speak 2 usoon inshaa allah
salamoza
Desert cat said…
زعيم كمورا مورا
الناس مبتصدق نفسها تفرح وخلاص
طول السنة مقضينها حرقة دم والاسعار بترتفع والمصارؤيف بتزيد مصدقوا يضحكو شوية
وبعدين هى ام فاروق مين وداها عندو دى بتاعتى انا
Desert cat said…
بحبك يامصر
طبعا عملوها الوحوش وفرحوا شعبهم والشعوب المجاورة كمان
Desert cat said…
Heart Beat
انت بس تؤمر يا جميل
وانا مش عايزة من عندك غير سلامتك يا قمر
بالفعل زى ما قولتى كدا اصل اختى برضه مقيمة عندك وكنت بكلمها على النت امبارح ووصفت لى الناس كانت فرحانة ازاى ... وبتقولى انا فرحانة اوى ولما راحت الشغل الصبح كان كل زميلاتها بيقولوا لها مبروك
يارب دايما الناس كلها فرحانة لينا وبينا
محبتى يا جميلة
Desert cat said…
صوت من مصر
التكتك بتاع المواطنين يومها مكانش بيدق بشكل طبيعى
ده كان بيجرى زى المجنون
هههههههههههههه
Desert cat said…
أنونيمس
الله يبارك فيك
البوست اللى فات
كنت اعمل ايه بس
ما هو انا بتفرج على الناس ونفسى ابقى معاهم وطنط واقفه تقولى مش عارفه ايه
وهو ده وقته برضه
Desert cat said…
الحبر ابقى من الحب
الله يبارك فيك
Desert cat said…
ابن حـجـر الـعـسـقـلانـى
الله يبارك فيك يا بشمهندس
عقبال لما نقولك مبروك يوم الفرح كدا
Desert cat said…
fatima
احلى ام يوسف فى الدنيا
احساس الفرح جميل
يارب دايما كل الناس فرحانة
وانتى تحققى اللى بتتمنيه وتعيسى مبسوطة على طول
Desert cat said…
Soletoo
حبيب قلبى
اخبارك ايه يا بنتى وحشانى
معلشى بقى فى 2010 نبقى كلنا فى الاستاد ونشجع مع بعضضينا كدا
بس ربنا يدينا طول العمر بقى
Zika said…
مبروك
الف مبروك
Desert cat said…
Zika
مبروك لكل المصريين
مبروك لينا النتماء و الحب الى اجتاح قلوبنا بس يا رب يدوم ان شاء الله حتى فى احلك اللحظات

عرض الصور جميل اوى

تحياتى
يا ناس يا مكبوتة

هى دى الحدوتة

حدوتة مصرية


مبروك علينا الفرحة
Desert cat said…
واحد مش فاهم حاجة
الناس عندها شيزوفرنيا مش كبت بس
الكل كان واقف فرحان ومظأطط
Desert cat said…
عاليا حليم
اهو الانتماء ده بقى يا عاليا اللى انا مكنتش متخيلاه
وعمرى ما تخيلت ان الشعب ممكن يتجمع على حاجه واحدجه كدا
طبعا الاجمل من الصور يا جميل هو تشريفك البلوج
Soooo said…
بصي انا مش هعلق على المكسب والفوز والفرحه لان كل الناس قالت كل اللي يتقال
انا عايز اقولك ان اسم مصر بجد واخد مكانه جوا كل واحد مننا
مكانه غريبه
ساعات بنبقى متغاظين من الاسم
لكن لما بنفكر نلاقي ان الغيظ مش من الاسم
الغيظ والغضب والحزن .. على اللي ماسكين دوله بالاسم ده



ملحوظه
معايا صواريخ .. عايزه؟؟؟؟




سلامووووووووووز
جاية تصيف عقبال عندك
لا وكمان جاية لابسة علم مصر
قال ايه عشان لما تنزل البحر السمك يعرف انها مصرية
ياسلام شوفتى الاصالة والفخر
الست فخورة انها مصرية

الله عليكى يام فاروق
ربنا يديك الصحة يارب

والف الف مبروك

وعقبال فاروق
ألف مبروك عليكى و على كل المصريين
و يا رب دايماً منتصريين بس مش فى الكوره بس يعنى
تحياتى
Nigro said…
This comment has been removed by the author.
هتسمعى ازاى صوت الموبايل فى اللحظه دى
محدش كان مهتم بحاجه غير الفوز
كان ليه طعم جميل
مبروووووووووك
ليكى
ولمصر كلها
ولسواق التوك توك كمان
أنا حر said…
مبروك الكاس وأكيد فرحة الناس دي هتتكرر طول ما في انتصارات في اي مجال خصوصا ان الناس نفسها تنسى بالانتصارات بعض المنغصات اللي بتعكر مناخ المجتمع المصري
تحياتي
الربان said…
تحياتي

مبروك علينا كلنا...الفوز جميل خاصة حين
يأتي بجدارة و عن استحقاق...

و الاجمل من كاس البطولة روح الفريق و العزم و التصميم علي الفوز, حقيقي شيء يفرح مصر و اولادها و احبائها اينما كانوا...

ياريت كل واحد منا يؤدي واجبه تجاه
مصر بنفس الروح و العزيمة....

الف مبروك للجميع.

تحياتي و تقديري
Desert cat said…
Soooo
بالظبط كدا الغيظ من اللى ماسكين البلد
بس حقيقى ول مرة اكتشف ان كلنا متجمعين على حب البلد دى وان لها مكانة كبيرة اوى كدا فى قلوب الجميع
انا مش عايزة صواريخ يا سو
الاقيش معاك بمب ؟
Desert cat said…
زعيم كمورا مورا
هههههههههههه
تصيف هى من الناس اللى الدنيا عندها ماشية بالمقلوب
ومالوا ياباشا تصيف تصيف محدش واخد منها حاجه
Desert cat said…
شريف طلال
الله يبارك فيك
ويارب دايما النصر لمصر
Desert cat said…
Nigro
الله يبارك فيك مش متاخرة ولا حاجه
لما انت بيجيى لك انهيار عصبى انا يجى لى ايه ده اكتر شئ بكرهه فى حياتى
ده اللى عرفت على ايديه معنى الكره ربنا ياخدهم بقى
Desert cat said…
فرنسا هانم
حبيب قلبى الف مبروك عليكى وعلى مصر كلهاااااا
Desert cat said…
أنا حر
الناس نفسها تفرح علشان كدا مصدقت فوز المنتخب علشان تبقى فرحة عامة
Desert cat said…
الربان
تعرف حضرتك انا فرحتى بفوز الفريق مكنتش اد فرحتى بالشعب وانا حاسه بحبهم للبلد الاحداث الاخيرة اللى حصلت وكلها اسوء من بعضها خلتنى افكر لو حصل حاجه للبلد دى محدش هيتحرك لكن بعد فوز المنتخب واللى شوفته لاقيت ان بلدنا بخير ومهما حصل برضه بنحبها وبنحب ترابها واى حاجه عليها اسم مصر
يارب دايما عظيمة يا مصر
احترامى وتقديرى لحضرتك
والله احنا شعب غلبان وفرحتة ديما قليلة عشان كدة هو بيتلكك عشان يفرح
بعدين احنا شعب عندة احساس انه مش واخد حقة وانه يستاهل احسن من كدة وفى ناس فقدت الامل والثقة وفةز ذى اللى عمله الفريق ده بيرجع الثقة ديه من تانى وبيقول ان لسة فى امل وان احنا لو اتحطينا على الطريق الصح محدش هيقدر يوقفنا
انا لو من الحكومة اصرف لكل لاعب مليون جنية عشان قدروا يشغلو الناس عن الاسعار والفساد والعيشة السودة اللى هما عيشنها
مبرووك على المصريين كلهم
اخيرا لاقينا حاجه نفرح بيها وكلنا نتجمع فى الفرح

تحياتى ليكي
Desert cat said…
حــدوتـــة
طبعا شعب غلبان
الناس طول عمرها مطحونة فى شغل واسعار غالية وبلاوى زرقة مصدقوا يفرحوا شوية
Desert cat said…
حبة حاجات (ايمان)
الله يبارك فيكى يا ايمان
يارب نفضل متجمعين
مش يبقى لحظة وانتهت

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز