عــلامــة اســتفهــام ؟؟؟

أفقت من نومى دون ان اشعر بكسل كل يوم ... أنظر إلى عقارب الساعه .. إنها الثامنة والنصف صباحاً ... وهذا معناه انى لم أنم سوى ساعتين فقط .... أهذا أرق أم نشاط ... فليكن ما يكون .... طوال الاسبوع الماضى قبل نومى اقرر فى الصباح ساذهب لاستكمال الاقرار الضريبى ... واصحى من النوم متاخرة كالعادة ... وأأجل ليوم آخر ... أظن دلوقتى الوقت المناسب .... دخلت المأمورية .. على غير العادة فى كل عام .. نظام ملفت للنظر بشكل واضح .... فالمأمورية متقسمة لجان ... فهذا مخصص للسيارات .. وهذا للأشخاص .. وذاك للعقارات ... قبل كدا كان كله رز بالخلطة مع بعضه ... كل الموظفين قدامهم اجهزة كمبيوتر وبيخلصوا مصالح المواطنين بسرعة ... لم أستغرق سوى عشر دقائق فقط ... مليت الإقرار ووقعت عليه واتسجل على الكمبيوتر ونزلت وانا مش مصدقة .... معقول انا فى مصلحة حكومية ومعقول خلصت بالسرعة دى ...... إنه النظام لو إتبعناه فى كل شئ لأنجزنا ووفرنا معظم وقتنا اللى ضايع فى انتظار ... المشوار بعيد شوية من مأمورية الضرائب للشغل ... فضلت إنى أمشية .... لأنى بجد ماليش نفس للشغل ... عايزة اقعد لوحدى دخلت أحد الأماكن أشرب نسكافية وما اظنش انى ممكن اقابل حد يعرفنى هنا يقطع عليا خلوتى ... مسكت النسكافية بين يدى انظر اليه فى تحدى هل يمكن فصله عن اللبن بعد ان امتزجا سوياً .... وأجدنى أتسائل فى حدة أيمكن أن أنتزع من تعمق بداخلى بعد أن اصبح جزء من عقلى وقطعة من قلبى ... اااااه ياربى ساعدنى .... اشعر بنظرات من حولى تخترقنى ... انقل نظرتى من مج النسكافية اليهم وكأنى أتسائل هو شكلى مش من هنا ولا حاجه ؟؟؟ ... ولا علشان قاعدة لوحدى ؟؟؟... طيب انا ليه عاملة مشكلة .. وليه شايفة علامة الاستفهام .... انا مقتنعة ان كلنا بشر وكلنا بيمر بحالة من اللاوعى .... فمن الحمق الا اتجاوز طالما انا مقتنعة من داخلى ... ومن الظلم الا اغفر .... فالله سبحانه وتعالى بيغفر الذنوب فمن اكون بجوار عظمته ... افقت على صوت اعرفه جيداً ... إنها سارة ... ازيك بتعملى ايه هنا ايه قاعدة لوحدك ليه .... انا كويسة ... سورى يا سارة مضطرة امشى ... انا اسفه لو ضايقتك ممكن اسيبك لوحدك وامشى انا بس شوفتك حبيت اسلم عليكى ... لا يا جميل انا كنت ماشية خلاص .... رحت الشغل مع انى كنت قررت ما ارحش ... الوقت لا يمر .... لسه مفيش حل لعلامة الاستفهام المرسومة امام عينى ... بعد وقت كبير دخل صديقى الودود اون لاين .... وبدون ما احكى تفاصيل لاقيته بيقولى الحياة سهلة ... وكانها العصا السحرية التى القى لى بها ... فعلاً الحياة سهلة بس محتاجين نحبها .... اسدل الليل ستارة .... اتفقت مع الدقائق على قتل الوقت ... فلن اشعر به متثاقلاً لأنه سوف ينتهى .... تعمدت التأخير ... نفسى امشى فى شارع لوحدى .... دخلت فى طريق طويييييل..... لا يوجد به سواى الجو اكثر من رائع .... حسيت انى عايزة اجرى .... عايزة اصرخ باعلى صوت من غير ما حد يسالنى مالك ... او يتهمنى بالجنون ... وفجأة أسرعت فى خطوتى ... وكلما اسرعت فى خطوتى اكثر كلما احسست بالراحة .... وأخيراً وجدت إجابة لعلامة الإستفهام .... محتاجة أتنفس حرييييييييييييييية

Comments

اول تعليق

استني بقه اروح امخمخ واجي تاني ياقطتي

وزة
انتي بتجيبي الحوار النفسي العميق ده منين ؟
بجد انتي موهوبة
في ايه مش عارف بس موهوبة و خلاص

و ما تنسيش الضرايب مصلحتك أولاً
و ياريت تدي فاتورة لكل واحد داخل يأجر نت ساعة عندك زي ما الإعلانات بتقول
:)
هههههههه
ايه ياقطه الجو الجامد بتاع الحريه دا
واللبن الا عايزة تبعديه عن النسكافيه

بس عارفه بكون نفسي زيك كدا بالظبط لما يكون الجو حلو بكون عايزة الشارع يبقي مش فيه حد غيري

بس نعمل ايه في الحرية الا مش عرفين نخدها دي كمان

علي فكرة انا بحب اسلوبك اوي وانتي بتحكي بحس انك قاعده معايا

وبنشرب نسكافيه بس انتي اللبن وانا النسكافيه بما انك قطه بقه

سلامووووووووز ياوبوسي

وزة
الساحرة said…
عاوزة اتنفس حريه
جمله اعجبتني تصلح لكتابه بوست عنها
حوار جميل
انتي هايله
تحياتي
الخنقه اكتر شئ دافع للابداع
ولما بتبقى النهايه عايزه انفس حريه
يبقى هوه ده الابداع
صح ولا ايه؟؟؟؟؟
Anonymous said…
ماهى المسئلة كلها فى ايدينا احنا
احنا الى بنخلى الحياة سهلة واحنا الى بنخليها صعبة
لو الواحد رضا من جواه برزقه الى ربنا كتبهوله
مش حتحس بصعوبة الحياة
ولو الواحد اتصالح مع نفسه
بجد وغفرلها الى فات
وبدء مع نفسه صفحة جديدا
يودع فيها المشاكل ووجع الدماغ والصداع اليومى
وبدء حيحس باحلاوة الحياة
ساعتها حيحس انه عايش

بس بجد ياقطة برافو عليكى
انك قدرتى تجوبى على السؤال
الى لناس كتير كانت بتسئله لنفسها
وانا واحد منهم

الحاجة الى فعلا احنا محتاجنها
اننا نتنفس الحرية
ساعتها حنحس اننا عايشين


تحياتى ياقطة
بجد الحريه اصبحت شىء مفقود فى الزمن لكن اذا ارادتها ستكون معك دون جدال
معلش هما الحراميه الى فى البلد مش حاسين بحريه
الاحلام حلوة برضه
بس في كلام بيقول
قبل ما تحلم فوق ... أحلم وانت فايق
قبل ما تطلع فوق .... انزل للحقايق
للرشوة والكوسة والمحسوبية والتعليم الفاشل والاسعار المولعة والمرتبات المتدينية وزحمة المواصلات
عادي يعني
oceaneyes said…
احلى حاجة فعلا الحرية وانك تكونى حرة

وفعلا الحياة حلوة جدااااااااا


وكويس انك خلصتى من موضوع الإقرار الضريبى ده


وخدى بالك كويس من نفسك



تحياتى


:)
فلسفه نفسيه عميقه

وكلمات عقلانيه دقيقه
اللبن لايمكن فصله عن النسكافيه
ام
من يدخل القلوب
من الممكن ان يخرج منها
اذا اراد هو
فاهمه ؟؟؟؟؟؟
افهمك مع انى عارفه انكى ذكيه وهتفهمى
لو واحد دخل قلبنا وحبيناه جدا
واراد الخروج من قلبنا سيخرج
وكيف يريد الخروج؟
لو اساء لنا
او فقد مصداقيته
يبقى ممكن قوى يخرج من القلب

بس
خلاص
وفعلا الحياه سهله
تحياتى لقطتى الجميله
امواااااااااااااااه
بالنسبه لموضوع الاقرار انا معملتهوش وشكلى مش ناوى على انى اعمله السنه دى يتاجل عادى
على فكره يا قطه اسلوبك عالى بس بيعلى قوى الفتره دى وخصوصا فى الحوارت النفسيه
اتنفسى حريه اصرخى ابكى اعملى الى انتى عايزه تعمليه بس اهم حاجه لاقى نفسك
النهاردة كانو مستضيفين وزير المالية
وقال ان فيه تطور فعلا حصل ف المصلحة
طبعا مكنتش مصدق
بس انتي كده اكدتيلي
ربنا يصلح الأحوال

-------
حلوة الحالة دي على فكرة
الربان said…
تحياتي

ما أجمل الحرية...ما أجمل الانفاس حينما
لا يكون هناك من يعدها علينا.

تعرفي انني اشعر بالحياة و بالراحة بعد الهروله.... المشي و الهروله يعيدوا الي
اتزاني و نقاء نفسي.

يمكن لان في المشي و الهرولة متنفس بحرية لي
كما يكون لاخرين.


تحياتي و تقديري.
appy said…
يا نهار يا نونا اتجنيتى بدرى معلش بصى تعالى فى القاهرة الجديدة واجرى براحتك وربنا يهدى بتوع المصالح الحكوميه ويبقوا منظمين فى الشغل
السؤال الرخم بقى بتاع كل مرة واللى تقريبا ببقى عارفه اجابته مين صديقك العدود ده ههههههههههههههههه
فعلا الحياة سهله بس احنا مكلكعين
السلام عليكم ورحمة الله وبركاته

كلنا عاوزين نتنفس حرية
MoodyLicious said…
هى سهلة بس اللى حوالينا بيصعبوها علينا لدرجة ان بيقتلوا فينا احساسنا بيها
فمن الحمق الا اتجاوز طالما انا مقتنعة من داخلى ... ومن الظلم الا اغفر .... فالله سبحانه وتعالى بيغفر الذنوب فمن اكون بجوار عظمته


ما اروعك يا قطقوطة
لما كتبتى الكلمات دى
لو كل الناس تحط الكلمات دى فى دماغها
الحياة على راى صديقك اللدود هتبقى سهلة

تحياتى ليكى
اختك خيخة
ربنا يطمئنك انا اروح اقدم الاقرار الضريبى قبل الزحمة
الحياة سهلة اسلوب رائع
بس مش ملاحظة انك بتكلمى نفسك كتير اليومين دول
وبتتخانقى معاها وده مش كويس يا قطة خليكى ريلاركس وعديها ناس لبعضيها
تحياتى
Nigro said…
This comment has been removed by the author.
صباحو يا قطتى
عارفه احساسك انك عاوزه تقعدى لوحدك شويه من غير ما حد يعرفك
اعتقد انه تعبير عن رغبتك فى عدم تدخل الاخرين فى شؤن اخرى فى حياتك اهم من الجلوس منفرده
او على الاقل ده احساسى انا
نفسى الناس تخليها فحالها ومتنحشرش فحياتى من غير دعوه
عموما سواء كان ده قصدك او لا
فدى امنيه ليه
اشطات
Desert cat said…
انين الحزن
منورة اول تعليق يا وزة
Desert cat said…
مهندس مصري
بجيبه من التلاجة
لاء احنا نتكلم جد شوية
انت تروح مصلحة حكومية وتحس ان الوضع مقلوب عكس ما انت متخيل تماما
يعنى بدل ما تقعد ساعتين تلاتة قول اربعه تقعد 10 دقايق بس وتمشى بعد كدا انزل وانت مش مصدق وبعدها بقى تقلب زى ما تقلب
يارب نفضل كدا على طول
Desert cat said…
انين الحزن
والله يا وزة انا انا احترت كتير فى نظرية اللبن والميسكو فيه ده
فقولت افصلهم عن بعض بس معرفتش اوقع بينهم بصراحة ... طلعوا واخدين بعض على حب
هو فى احسن من الحرية يا حبيبتى
تحياتى
Desert cat said…
الساحرة
كن جميلا ترى الوجود جميلا
وانتى كدا بالظبط
محبتى ليك يا قمرة
Desert cat said…
بطوط حبوب
طالما انت شايف كدا يا دكتور يبقى كلامك صح
تحياتى
Desert cat said…
Anonymous
الحياة سهلة جملة مكونة من كلمتين لكنها مفيدة جدا خصوصا فى الحالات اللى الواحد بيكون وصل لمرحلة من مراحل الياس ... بس انا بشكر الظروف وبشكر صديقى الانتيخ على كلمتة الجميلة
اما اجابة السؤال فتقريبا كلنا من الكبت اللى عايشينه محتاجين نتنفس حرية
شرفت البلوج
تحياتى
Desert cat said…
صوت من مصر
بايدينا نغير من نفسنا لو احنا عايزين
بالنسبة للحرامية بصراحة مش قابلت حد منهم علشان اعرف منه احساسه ايه
بس على ما اعتقد انهم مبسوطين على الاقل فلوسهم بتزيد والناس بتموت من الجوع
عادى يعنى
Desert cat said…
عابد الرحمن
والله يا فندم انا شايفة كل الحاجات دى وانا اكتر واحدة بتعرض عليها بس مش هتسفيد حاجه لم ااقعد ابص لهم ودمى بيتحرق يبقى الحل انى افكر فى التغيير للافضل يمكن اقدر أثر فى اللى حوليا ونقدر نعمل حاجه مفيدة
تحياتى
Desert cat said…
oceaneyes
ميرسى يا جميلة ربنا يخليكى ليا
انتى كمان خدى بالك من نفسك
اشهد الله انى احبك جدا فى الله
دمتى بكل حب يا قمر
Desert cat said…
فرنسا هانم
انتى عارفه الاجمل من البوست اللى عجبك ايه هو ردك
بجد حسيت فيه بعقل وحكمة فعلا مش تطلع غير من رئيسة جمهورية
اكبر بوسة فى الدنيا لاحلى فرنسا
اموااااااااااه
Desert cat said…
رئيس جمهوريه نفسى
وهو التهييس اللى انا فيه ده من شوية يا ريس
ما هو علشان لاقيت نفسى فا احنا الاتنين مش قادرين نتفق ... فبيطلع الكوكتيل ده شوية نضرب بعض شوية نتخانق وشوية نحضن بعض اوووى وندوب فى بعض زى النسكافيه كدا
تحياتى
Desert cat said…
آلام وآمال
لاء هو فعلا فى تطور
لو كل وزير حاول ينظم بالشكل اكيد هنتقدم .... يارب يجعلها عدوى وتنتشر ياااارب
تحياتى
Desert cat said…
الربان
استاذى العزيز
بالفعل مع الهرولة وخصوصا لما يكون الجو جميل .... الانسان تنتابه حالة من الشجن مع حالة الرضا بالنفس ...
احترامى وتقديرى
Desert cat said…
appy
متأكدة يا أأبى انى لو جيت القاهره الجديدة وجريت وصرخت وطلعت كل المواهب المكبوتة اللى جوايا مش هيدفونى بالطوب ... طيب ولا هيتصلوا بالعباسية ... خلاص استنينى انا جايه لك حااالا
وبعدين اانتى تانى يا لولو بتسالى على ايمووووووووو
بقولك الاقيش عندك .... كابتشينو
ههههههههههههههههههه
اموااااااااااااه
Desert cat said…
خمسة فضفضة
عليكم السلام ورحمة الله وبركاته
كلنا محتاجين فعلا بس يارتى طلبنا موجود
او نعرف ننفذه
Desert cat said…
MoodyLicious
يبقى احنا مش نديلهم فرصة يقتلونا فينا احاسيسنا
مش مهم اللى حوالينا
المهم احنا عايزين ايييييه
Desert cat said…
بت خيخة وأى كلام
ربنا خلقنا مختلفين علشان لما نقابل الشخص الوحش نعرف قيمة الحلو
دمتى بكل حب يا ام شيكو
Desert cat said…
همس الاحباب
اه طبعا روح اعمل الاقرار وفى بطنك بطيخة صيفة وكنتالوب شتوى كمان
بالنسبة لنفسى مش اتخانق معاها بدل ما اتخانق مع حد تانى مالوش ذنب
والله ربنا يعدى الايام دى على خير
تحياتى
Desert cat said…
Nigro
هو كان مصالحة للذات اكتر منه هدوء نفسى
تحياتى
Desert cat said…
قلوب بتغنى
هو ده بالظبط قصدى
لكن للأسف ليس كل ما يتمناه المرء فى بلدنا تحديداً بكون ماشية او فى مكان او بشترى حاجه الاقى واحدة جاية تسلم عليا فى ناس كتير بكون عارفاهم وفى ناس بكون فاكراهم وناسية اساميهم طبعا لما بتكونى فى مكان شغل واكتر رواده بنات بتكونى معروفة بينهم شوية ودى ساعات بتكون مشكلة خصوصا فى حالة الهروب اللى بحس بيها ساعات واحيانا كتير بتكون جميلة اوى وبتفرحنى لما الاقى واحدة جاية تسلم عليا بحس بنعمة ربنا فى محبة الناس
...
شكلنا متفقين
اشطاااات
Foxology said…
علامة استفهام اجابتها انك عاوزة تتنفسى حرية

بوست رائعة بجد ... اجمل ما فيها ان الحياة فعلا بسيطة وفكرتنى بأغنية لباند بحبه اوى اسمه (بلاك تيما) باند مصرى ليه اغنية اول كوبليه فيها بيقول ...

انا عندى سر ..عندى سر خطير .. السر ان الحياة لازم تتعاش واللى يكرهها مايستهلهاش

شكرا للبوست :)
الغريب يا قطه انى مرين بالحاله دى وملقتلهاش حل بس عادى بنتخانق ونتصالح ونضرب بعض بس اهم حاجه انها جنبى فى كل الاحوال
Desert cat said…
Foxology
مشكلتى بقى انى معنديش أسرار حتى اسأل آآبى كدا وهى تقولك
طبعا حل علامة الاستفهام انى عايزه اتنفس حرية
نفسى بجد كل واحد ربنا يهدية كدا ويخليه فى حاله ويعيش ويسيب الناس تعيش فى سلام
ربنا يهدى الجميع
تحياتى
Desert cat said…
رئيس جمهوريه نفسى
طالما جنبك فى كل الاحوال يبقى محلولة
يعنى مش محتاجة حلول
بس انا اعتقدت انها جنبك انتى كمان بصى يا قطه اتنفسى حريه وعيشى حريه وخديها قاعده الانسان عامل زى العمله المعدنيه كل مجموعه من الناس بتشوفها من ناحيه واحده بس يعنى مش حتتفق عليكى اتفقى على نفسك مع نفسك وثقى انك صح وعيشى واتنفسى حريه
Desert cat said…
رئيس جمهوريه نفسى
انا الحمد لله ثقتى بنفسى تفوق كل الحدود
وطالما أنا صح والناس اللى بتحبنى اكتر بكتير اوى من اللى بتكرهنى
وبالتالى لا ابالى بآراء ضعاف النفوس او المرضى النفسيين .... بمعنى بحطهم جنب الحيط واعدى
تحياتى
أنونيمس said…
وانا كمان نفسي ف نفس من انفاس الحريه
يا ترى نلاقيها فين ونلاقي انفاسها فين؟؟
السلام عليكم

الموضوع في تقلبات مزاجية كتيرة يا قطة
وفي علامات غستفهام كتيرة
يمكن تكوني جاوبتي عنها في اخر سطر...بس انا شايف غنها مش إجابة منطقية او مناسبة للموضوع


علي العموم اسلوبك جميل


دمتي في خير

سلام
نانا مش عارف في ايه

من البوست اللي فات مش عارف اسيب كومنت

انتي مالك يا بنتي

فين المرح

اكيد في حاجة صعبة ده احساسي و يا رب يكون خايب

تحياتي
تمر said…
عينى عليكى بردة

ايه دا كله

بس بجد مش عارفه اقولك ايه بجد

غير ربنا يوفقك

تحياتى ليكى ووحشنى تعليقى
عاوزة رأىى بصراحة
أتنفسى حب عشان دة اللى أنتى محتاجاة وبتدورى بخطواتك المسرعة علية
Anonymous said…
لقد كتبتِ قصتنا جميعا

بسرد جميل و دافئ جدا

شعرت انني كنت معك ..أو مكانك

في تلك اللحظات

أنا أيضا ..بدّي اتنفّس حريّة

لا تقطع عـنـّي الهـوا

و لا تزيدا كتير عليّي

أحسن ما نوقع سوا

ـ أحيلك الى جوليا بطرس

و اشكرك شكرا جزيلا على زيارتك لمدونتي

المهجورة .بحبك يا لبنان .
على أمل ان تزوريني في مدونتي الاّيلة للسقوط في هذا العنوان

joe75.jeeran.com

جو غانـم
mnoon said…
ساعات الواحد
بيحس انه حزين
وبدون اسباب مقنعه
ويحس ان مفيش حاجه فى الدنيا
ممكن تكون سبب انه يخرج من مود الكأبه
ويحس ان الابتسامه بعيده
قوى عليه
وبعدين تحصل حاجه بسيطه
قوى قوى
تكون سبب فى انبساطه
وإنشكاحه على الاخر
انا شخصيا بمر بالحاله دى كتيير
اروح بقى اكمل لف فى المدونه الجميله دى
سلااااااام
بداية انا بيعجبني جدا العمق اللي في مواضيعك , انتي في اسلوب رشيق بتقدري تطرحي التساؤلات والحيرة اللي بتدور في نفوسنا بجد احييكي علي اسلوبك

كلنا دايما بتيجي علينا لحظات بنتمني اننا نصرخ بملئ حناجرنا وكلنا علي فكرة بنبقي علي شعرة بين العقل والجنون

ملاحظة اخيرة: اول مرة من فترة اسمع عن حاجة ايجابية في البلد بخصوص كلامك عن مصلحة الضرائب

تقبلي مروري
سنووايت said…
النظام راحة وجمال ما بعده جمال بجد لو كل حاجة في حياتنا بنظام كانت حاجات كتيراوي اختفت

يمكنك فصل المزيح في حالة واحدة فقط "بعد تحللهم داخل الجسم" دا مش رأي علمي بحت علي فكرة :)

الحريــــــــــة هي أغلي ما يمتلكه الانسان في حياته الحرية من كل شيء ومن كل تفكير ومن كل ضغط نفسي وعصبي

بوست رائع
لا حول ولا قوة إلا بالله
ادى اخرت القاعدة قدام الكمبيوتر كتير
يامه نصحتك وقولتلك بس انتى ولا هنا

مصلحة الضرائب بيعملوكى كويس عشان هيخدوا منك فلوس لولا كده كان زمانك كاتبه موضوع عن القهر الحكومى وتوابعه النفسيه على المواطنين
اصل محسوبك شغال فى مكتب محاسبة وفاهم الليلة ماشية اذاى
خدى بالك من نفسك سلالالالام
son's egypt said…
السلم عليكم
فعلا النظام بيهل علينا حاجات كتيرة وبيوفر الوقت والجهد
ولكن بالنسبة لحالة الزهق والواحد بيكون في اوقات مش عاوز يكلم حد ده طبيعي لاننا بشر وممكن في اي وقت نمل من اي حاجة
عايزة اتنفس حريييييييييه
كلمه جامده جامده جامده
تصدقى اكتشفت انا انا كملن عايزة اتنفس حريييييييييه
بجد صديقك دة طلع راجل بيفهم
فعلا الحياة سهلة جدا جدا يعنى
والانسان عاشها ببساطة حيحبها
وحيعيش سعيد وراضى
وحتى لو قلبت اى حد مشكلة كبيرة وعويصة
سهلة ياخد يوم اجازة من الحياة كلها
ويعد على جنب مع نقسه وحيحلها
امال ربنا خلقلنا العقل ليه
مش عشان نعرف نعدى العقبات الى بتقبلنا فى حياتنا
هى الحياة سهلة اه
بس سهلة للى يفهمها
بس الى حيعقدها حيبقى بيصعبها على نفسه



مسكت النسكافية بين يدى انظر اليه فى تحدى هل يمكن فصله عن اللبن بعد ان امتزجا سوياً


لا سؤال فى الجون صحيح


بصى بما ان شغلى كله معتمد اساسا على اللبن
فانا بأكدلك انك
حتى لو لقيتى طريقة تفصليهم عن بعض
برده حيفضل جزء من اللبن على النسكافية
عارفة ليه
عشان اللبن لما بيمتزج مع حاجة
بيبقوا جزء واحد
حاجة واحدة
يعنى

دة رئى عموما مش عارف بقى اذا كان صح ولا لا

بس بجد بوست رائع ياقطة
تحياتى
صح كلنا محتاجين نتنفس حريه
بالحريه بس الواحد يحس انه عايش
أنا حر said…
كل ما اتنفسنا حرية اكتر كل ما انتعشنا اكتر واتحلت علامات الاستفهام اللي في دماغنا
حلو قوي البوست
تحياتي
osama said…
يااااااااااااااه
نعم اتنفس واستنشق حرية ... اعبئ صدري هواء نقياً غير مكبوتاً وغير مراقب غير مكمم ...

جميل ما خطه قلمك...
دمت بكل ود...
خال تحياتي
مش عارفة بقالك بوستين متغيرة يا كات

حاسة ان دماغك مشغولة

لذلك البوست بيطلع عميق

وفيه معانى كتير يمكن مناقشتها

بس اسلوب حلو اوى

ساعات فعلا بنحس اننا عايزين نعمل حاجات كتير او حتى منعملش حاجات كتير من غير ماحد يسالنا ليه ولا ازاى ولا نبقي عايزين حد يعلق اصلا على تصرفاتنا
بس بنكتشف اننا طالما عايشين وسط الناس يبقي اكيد مش هتبقي حرة بطريقة مطلقة وبمزاجك بطريقة تلقائية هتلاقي نفسك فى حاجات مش بتعمليها حقنا لتعليقاتهم فقط

مش عارفة حاسة انى هيست شوية فى التعليق ده ..:D
بس هو ده اللى انا عايزة اقوله :D

دمتى بحرية :)
blackcairorose said…
عبرتى عن لحظة كلنا متهيألى بنحسها ولكن مش كلنا نقدر نعبر عنها بالشكل الحلو واللى يوصل الى جوانا زى ما عبرتى انتى يا كات

وخالص الود
مشمش said…
جميلة جدااا انتي والكلام
احسن حاجه الحريه يا كات
لو قعدنا نتنفس حريه
هتتعود الرئتين بتوعنا عليها
وهنرفض اى كتم لحريتنا
طول العمر
انا عايز كمان اتنفس حريه
Desert cat said…
أنونيمس
نلاقيها فى الشئ اللى بيسعدنا
دايما شوف ايه اللى بتحبه واعمله ولا يهمك آراء الآخرين طالما انت صح
وعارف ان اللى بتعمله مش فيه حاجه غلط ولا بياذى حد
تحياتى
Desert cat said…
الراقص مع الذئاب
يمكن من وجهة نظرك الاجابة مش منطقية او مناسبة للموضوع بس على الاقل مناسبة ليا انا شخصيا
تحياتى
Desert cat said…
ملك الكبدة
خير يا سيادة الملك
اطمن على شئون رعيتك احنا بخير والحمد لله على الاقل دلوقتى
ما فات قد مات
اشكرك جدا لاحساسك الجميل
تحياتى
Desert cat said…
تمر
ايه اخبارك
ربنا يوفقنا جميعا
انتى كمان وحشتنى اوى مواضعيك
تحياتى
Desert cat said…
كلاكيت تانى وتانى
لاء بصراحة انا مش محتاجاه
ده انا حتى بدوس عليه تحت رجلى
عمرك شوفتى حد بيدوس على النعمة
هههههههههههههه
اصلى مش بحب اوجع قلبى لانه اغلى ما املك
Desert cat said…
Anonymous
جو
اشكرك جدا على كلماتك الجميلة ويشرفنى زيارتك
Desert cat said…
mnoon
منوووووون منورة البلوج يا قمر
وربنا يبعد عنك كل كىبة يا جميلة
Desert cat said…
الفارس الملثم
انا شخصياً اول ما شوفت النظام اللى فى الضرايب وخلصت على طول كان هيغمن عليا بس تماسكت الحمد لله
اشكرك جدا
يسعدنى جدا حضورك
Desert cat said…
سنووايت
ياريت النظام اللى حصل فى الضرايب ده يتعمم فى كل مكان واحنا كمان نبتدى بنفسنا وساعتها هتكون خطوة ايجابية لافضل
الحرية حجه جميلة ربنا ينعم علينا جميعا بيها
دمتى بكل حب
Desert cat said…
حــدوتـــة
معلشى بقى ادى اخرة اللى ميسمعش كلام عمو حدوته بيهيس كدا
تفتكر هيدفعونى كام طالما كانوا مريحينى على الاخر كدا اكيد هدفع مبلغ وقدره صح
اصل الدفع على اد الراحة
هههههههه
Desert cat said…
son's egypt
بالظبط كدا النظام جميل فى كل حاجه
الزهق ربنا يبعدنا عنه وخصوصا انا زهقى ممكن اقتل حد واقول ما اعرفوش بعد كدا
Desert cat said…
مدونه من اجل الحب
اتنفسى يا حبيبتى اللى انتى عايزاه
سيبك من الدنيا وبلاويها
Desert cat said…
زعيم كمورا مورا
طبعا كل صحابى بيفهموا هو انا برضه بصاحب اى حد
هو ممكن فعلا فصل اللبن لاء ما اظنش اى حاجه لازم تسيب اثر حتى لو فصلناها غصب عنها
تحياتى يا زعيم
Desert cat said…
بحبك يامصر
بالارادة نقدر نتنفس اللى احنا عايزينه
تحياتى
Desert cat said…
أنا حر
الاجمل رد حضرتك
تحياتى
Desert cat said…
osama
من اجل الحرية تتحطم كل القيود
وعتبر جميع الجسور والسدود
احترامى وتقديرى
Desert cat said…
كفايـة طيبـة
لاء انتى مش هيستى انتى اتكلمتى بعفوية جميلة واحساس عالى
بجد بفرح اوى لما بشوف ردودك
دمتى بحب يا جميلة
Desert cat said…
blackcairorose

احساسك العالى هو اللى حس ان البوست حلو
تحياتى
Desert cat said…
مشمش
ميرسى جدا
Desert cat said…
عبده الرايق
اتنفس يا فندم ولا تسمح لحد يوقف فى طريقك
مودتى
ايه دة انا مش قصدى حاجة على فكرة
انا بس بقولك ان صحابك راجل بيفهم
يعنى فاهم الحياة صح
وعشان كدة عارف يعيشها
هو دة كل الى قصده
مش قاصد حاجة تانية



لا بتسيب اثر بس تقريبا مبيبقاش باين
اثر بسيط اوى
يكاد يكون معدوم
يغنى مبيأثرش
بمعنى اصح
دة رئى عموما

واسف لو كنتى فهمتى كلامى فى الاول غلط
فعلا الحياه سهلة

احيكي علي الفلسفة دي

هوني علي نفسك اختي مفيش شئ في الدنيا يستاهل

لكي مودتي
رودي
Desert cat said…
زعيم كمورا مورا
لا حول ولا قوة الا بالله
انت بس ايه اللى وصلك انى فهمت الكلام غلط
والله ابدا
تلاته بالله العظيم ابدا والنعمة ابدا
انا حتى راجعت ردى ولا قيته عادى
ايه يازعيم ما تروق كدا
ممكن بقى مج نسكافية حلو كدا من غير لبن
علشان مش نحتار فى فصله بعد كدا
ههههههههههههه
Desert cat said…
بنوته مصرية
صح يا رودى احنا لو فكرنا فى الدنيا هنلاقيها مفيهاش حاجه مستاهله
تحياتى يا جميل
لا ماليش فى المستورد الحقيقة
لو واحد شاى فى امريكانى
سكر بره
يابقى تمام اوى
وعملتى معانا احلى واجب هههههههههههههههه

ومن غير لبن

بس ياريت المرة الجاية متسئليش
هى البيضة الاول ولا الفرخة

ماشى
Desert cat said…
زعيم كمورا مورا
ماشى يا سيدى علشان مش ازعلك بس
الفرخة الاول ولا البيضة
عزيزتي قطة الصحراء،
يالها من مدونة شديدة الشعبية ، مش حسد و لا حاجة و الله ، فقط أردت أن أقول أنني لا أتعجب من شعبيتها و رواجها ، فهي مؤهلة للحصول على الموقع الثاني مكرر بين ما رأيت من مدونات في درجة الصدق الشعوري في الكتابة و انسياب الكلمات و العبارات بحرية من الكاتب، وفقا لإحساسي الشخصي طبعا ، فلست ناقدا و لا مؤهلا لتقييم الاخرين

تحية و تقدير للصدق و الحرية في الكتابة ، تحياتي
Desert cat said…
Dr. Eyad Harfoush
رأى أفخر وأعتز بيه من انسان عظيم
احترامى وتقديرى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز