فى فرق بين انك تبقى متهم ومجنى عليك

الموضوع اللى هتكلم فيه ده انا اتكلمت فه من زمان اوى اول ما حصل وهو حصلى تقريبا يوم 9/4/2007 التاريخ ده لن انساه طالما حييت .... مش علشان كان يوم شم النسيم ... لانى من الطبيعى اليوم ده بيكون يوم عادى جدا بالنسبة لى مش من هواه الاحتفال او الخروج فيه ... انما اتسرقت فيه وانا فى الشارع ...
اه والله الحرامى اللى معندوش دم سرقنى وانا واقفه فى وسط 10 اشخاص واكتر
كان بالليل وكنت راجعه بيتنا وواقفه بركب الميكروباص ولسه هدخل لاقيت توكتك جاى من وروانا كلنا داخل فينا زى الحيوان الضال بالظبط انا وقعتى جت تحت الميكروباص وكان جنبى راجل كبير التوكتوك عدى على رجله كسرها وده اللى عرفته فيما بعد ... وجرى ... انا لحد دلوقتى مش عارفه ان شنطتى اتسرقت لان الوقعه كانت جامده عليا وكنت حاسه فى ضهرى بالم رهيب ... لاقيت شاب جاى يقولى انا اسف ملحقتوش وبعدين هو دخل جنينة وانا خفت ادخل وراه لانه اكيد مسلح ... ولما سالته هو اصلا بيجرى وراه ليه لاقيته بيقولى ما هو سرق شنطتك ... الناس اللى كانت واقفه جنبى ونالهم ما نالهم كل واحد متلخبط فى نفسه والراجل اللى رجله اتكسرت مش قادر يقف من شدة الالم ... كام من الوقت عدى عليا بالشكل ده الله اعلم بس كنت حاسه انى عايشه فى عالم تانى بس اول ما استوعبت الموقف دخلت اقرب مكتب اتصالات واتصلت باخويا جالى هو وخالو ووقتها مش معايا ولا مليم لان كل فلوسى وحاجتى كانت فى الشنطة ... فضلت واقفه فى مكتب الاتصالات لما اخويا وخالو وصلوا وعلشان بطاقتى وكان فى اوراق خاصة بالسيبر بتاعى فى الشنطة فكان لازم اعمل محضر علشان اعرف اطلعها تانى ... رحنا القسم علشان نعمل محضر ... طلعنا مباشرة عند رئيس المباحث واللى سمع لى بكل هدوء واتكلم معايا بمنتهى البساطة ... فى نفس الوقت دخلت ست تانية علشان تعمل محضر لانها اتسرقت وبنفس الطريقة ... واحنا قاعدين هناك جه امين شرطة بيقول لرئيس المباحث ان فى بنت جايه تعمل محضر بخصوص سرقه شنطتها بتوكتوك ... كدا بقينا 3 فى وقت واحد ... وقتها راح منزل مخبرين فى كل المنطقة اللى احنا اتسرقنا فيها ... بعد يومين بالظبط مسكو الحرامى .... طبعا فلوس مفيش اوراق اترمت فى البحر بالشنطة .. بس القسم اتصل بيا فى البيت لانى كنت كاتبه رقم البيت فى المحضر علشان اروح اتعرف على موبايلى ... لان الحاجه الوحيدة اللى رجعت من شنطنا كلنا كانت الموبيلات بس لان الحرامى مكانش لحق يتصرف فيهم ... بالمناسبة نسيت اقول ان الحرامى بتاع التوكتوك ده من اول ما بدأ يسرق لحد يوم ما اتمسك كان سارق 25 شنطة ... واللى عرفته انهم كانوا اكتر من واحد .... طبعا لما رئيس المباحث سالنى انتى لو شوفتى الحرامى هتعرفيه قولت له لاء لانى مشفتوش انا كنت واقعه فى الارض ... فى ناس تانية اتعرفت عليه ... لما واحد زى ده يلف فى البلد يسرق بالاكراه ويكسر فى رجلين الناس و يكدر الامن العام ويرتكب كل البلاوى دى فى يومين المفروض يتقدم له عصير فريش فى القسم ولا يكافؤه ... انا دخلت القسم كنت باتعامل بمنتهى الذوق والاحترام بالمناسبة رئيس المباحث مش قريبى ولا من عيلتى ... ولا فى بينى وبينه سابق معرفه .... بس فى فرق بين انك تكون داخل القسم متهم وبين انك تكون مجنى عليك
المسروقات اتعرضت على النيابة واتصلوا بينا تانى علشان نروح نستلم موبيلاتنا ... وقتها كانت معانا بنت بتعيط كانها فى جنازة ... عارفين ليه لان شنطتها كان فيها الف وخمسمية جنيه ومرجعوش ... قالت انا مش عايزه الشنطة ومش عايزه الموبايل انما الفلوس دى ربنا وحده عالم انا جايباهم ازاى وهقعد كام سنة تانية لحد ما احوشهم ... لفيت السبع لفات على ما طلعت بطاقتى واوراقى من تانى مع ان كان معايا صورة المحضر .... بس كلنا عارفين الروتين ... كانت عندى مشكلة فى الضرايب بخصوص السيبر ومش عرفت اخلصها لان مكانش معايا بطاقة ودفعت 150 جنيه بدون وجه حق ... حاسه بألام محدش يقدر يتحملها فى ضهرى وطالعه نازلة القسم وكل شوية استدعاء شوية علشان اتعرف على موبايلى وشوية علشان اتعرف على الحرامى اللى مشفتوش وشوية علشان استلم الموبايل ... انا لو كانوا حكمونى على الحرامى ده كنت فجرته... لانى تعبى الجسمانى مكانش يجى صفر على الشمال قد تعبى النفسى ... 20 يوم اعمل علاج طبيعى اكتر من شهرين حاسه ان كل الناس اللى بتقابلنى حتأذينى اللى جاى من ورايا هيخبطنى بحاجه اللى جاى من قدامى اللى جاى من جنبى المهم ان كل الناس دى مؤذية
الراجل اللى رجله اتكسرت جنبى وقت حادثة السرقة طلع عامل بسيط فى جراج
وفضلت حاسه بذنبه وما استريحتش غير لما اخويا اخدنى ورحنا زورناه ...
احنا مش عايشين فى غابة ... انا معملتش للحرامى ده حاجه علشان اتأذى بالشكل ده ولا اى واحده من اللى سرقهم عملوا له حاجه الراجل البسيط اللى رجله اتكسرت مش عمله حاجه ... يبقى لازم يكون فى قانون ولازم يكون فى ظابط شرطه علشان يحميك ...
هنا احنا لما اتسرقنا روحنا فين ؟؟؟
مش روحنا لهم
مين اللى قبض على الحرامى ... اللى أذانى وأذاى غيرى ولو كان أستمر فى المجتمع أكتر من كدا يا ترى كان حيأذى كام واحد
الناس اللى بتشتم فيهم كل شوية والتانية وهاجمونى بشدة انا مش حشتم ظابط ولا امين شرطة ولا حتى مخبر لان محدش فيهم أذانى .. بالعكس دول رجعوا لى حقى وقبضوا على اللى أذانى ... يبقى اكرههم ليه ... انت بتكرههم حد فيهم أذاك .. والله شوف نفسك خالفت القانون فى أيه أو غلطت فى أيه ... او أذيت مين وراح عمل فيك محضر وبناء عليه جرى لك ما جرى لك ...
انا مش حالة شاذة فى المجتمع .. اتسرقت والحرامى اتقبض عليه ... لاء بتحصل كتير .... مش حاله شاذة إنى أتعامل فى القسم باحترام وبكل ذوق .. لاء كلنا كنا بنتعامل هناك معاملة واحده .. لاننا مش متهمين ..
لما اغلط فى حد يبقى اغلط فى حد غلط فيا مش عاملنى باحترام
لما اعادى حد يبقى اعادى اللى أذانى مش اللى رجع لى حقى
لما احب افضح .. يبقا افضح الحرامى اللى سرقنى .. مش اللى قبض عليه
زى ما المجتمع فيه حرامية وفيه مهندسين وفيه تجار مخدرات وفيه علماء ومثقفين
جهاز الشرطة كمان فيه ظباط كتير جدا محترمين ... مينفعش اساوى بين اسلام نبيه والمتناوىومينفعش اساوى بين الظابط اللى قتل المواطن وبين رئيس المباحث اللى قابلنى فى القسم
ومينفعش اساوى بين الحرامى اللى سرقنى وبين احمد زويل ...

تعليقات

راسي
لكن برضه لاننكر ان فيه ماشي كلامك صح وعلى عيني وعلى راسي

لكن لما تشوفي خبر زي اللي نزل على مصراوي من كام يوم
تحسي بأيه

وغيره وغيره وغيره

عارف ان الصوابع مش زي بعضها

عموما الف سلامه عليكي
وربنا يعوض على اللي راح
‏قال Desert cat
الله يسلمك يا استاذ اسكندرانى
لما اشوف خبر زى اللى نزل على مصراوى من كام يوم اتاكد من حقيقة الواقعة
الموضوع ده كان فى شقه والظابط ده مجهول الهوية المسدس اللى كان فى ظهره لا يعنى بالضرورة انه ظابط شرطه
هو من امتا ظباط الشرطة بيعذبوا فى شقق
على اساس انه القسم مفيهوش مكان يقلعها فيه ؟

مودتى
بصي يا بنتي كل كلامك مضبوط
بس فيه 3 أراء دلوقتي
رأي بيقول ان أغلبية ضباط الشرطة صيع و بلطجية و بيفتروا على خلق الله الغلابة
و ده رأي غلط
و رأي بيقول انهم ناس محترمين و كل البلاوي اللي بنسمع عنها منهم دي حوادث فردية و تعبر عن أفراد و لا تعبر عن جهاز الشرطة
و ده برضه غلط

و الرأي التالت الصحيح بيقول إن أغلبية ضباط الشرطة كويسين بس فيهم نسبة مخيفة بالنسبة لجهاز حيوي زي ده فيهم نسبة بتتجاوز سلطاتها
الأغلبية كويسين ماشي
بس عدد اللي بينتهكوا القانون فيهم زاد عن المعدلات الطبيعية القديمة من 20 سنة مثلاً
و الرقابة عليهم سواء من تفتيش الداخلية أو من النيابة العامة و القضاء متراخية
بدرجة تخلي اللي عايز منهم يتجاوز القانون يتجاوز و محدش رقيب عليه غير ضميره
و ده غلط
لأننا مش ملايكة
و السلطة الطلقة مفسدة مطلقة
لابد من تدريبهم على إحترام القانون و تشديد الرقابة عليهم و توفير الظروف الملائمة لحياتهم بشكل طبيعي و أداؤهم واجبهم على أكمل وجه
راجعي بوست العميد قطري الأولاني عندي
و أهوا ده كان عميد شرطة و كان مفتش في تفتيش الداخلية
‏قال Coca
في 2007 حصل هجوم جامد علي الشرطه واتحطت تحت الميكروسكوب فبان التجاوزات والاهانات اللي بتحصل
ودي قاعده عامه ان اي مجال في الدينا فيه الكويس وفيه الوحش مفيش حاجه وحشه خالصه ولاالعكس
لان اللي بيدخل كليه شرطه مش بالضروره يكون انسان سادي وعنيف وبيستغل كونه في الشرطه لفرض عافيته عليالناس اكيد اكيد في منهم المحترم
وفي فيهم اللي فاهم انه لحمايه الشعب مش لترهيبهم ولا ايه
تعرفي بقي انا البوست دا اثر فيا جدا
واللي حصلك وحاجه كمان سرحت فيها البنت اللي ضاع منها ال 1500 جنيه اللي هتاخد كاااااااااام سنه علشان تحوشهم تاني
يالا ربنا يرحمنا بوست جامد يا قطه كالعاده
‏قال غير معرف…
القطة الأليفة:
تحياتى اولا
وثانيا
هناك فارق شاسع بين الشخصية الحقيقية او الانسانية لضابط الشرطة كأنسان خارج عمله وداخل عمله فهو داخل عمله ينفذ اوامر سواء كانت تتفق مع ذاتيته ام لا
لذا فقد تجدى اكثرهم من مرتادى الطبيب النفسى بعد الخدمة وبمجرد خلعه البدله الميرى تجديه اسرع من يصاب بالاكتئاب
فهو متلقى لاوامر ينفذها سواء كانت تتفق مع ادميته ام لا
‏قال فرنسا هانم
طبعا الناس بتختلف عن بعضهم
ومفيش زى اسلام بيه كعب الغزال
لان ده حاله لوحده
سيبك انتى
من الموبايل والشنطه والفلوس
اهم حاجه ضهرك كويس
يبقى كل حاجه تتعوض
‏قال زعيم كمورا
ربنا رحيم على ديما على عباده
ومزى مخلق الانسان الضعيف قدام الشيطان
برده خلق الانسان القوى الى يقدر يقوله لا
مهما كانت المغربات الى قدامه
متنسيش ان رجال الشرطة بشر
ومحدش معصوم من الخطاء
وزى مبيقوللوا الشيطان شاطر
بس زى مبيعرف يضحك على شوية ناس معندهم عقل ولا دين وسود من جوه
برده فيه ناس لسة ايمانها هو الى بيماشيها
ناس بيضة من جوه
ومش مستعدة انها تبيع ضميرها ولا انسانيتها ولا رحمتها
مهما بلغت الاغرات
لسة الدنيا فيها خير
وخير كتير كمان
بس احنا نبص عليه
وسلامة ضهرك ياقطة
وربنا ينتقم من عمونا الروتين دة الى وجعلك دماغك
‏قال Ahmed Al-Sabbagh
عااااا

انا بجد هعيط

مش عارف ليه البوست ده أثر فيا اوى كدة

عااااااااا

انا مش عايز اعيط

وصعبت عليا اوى البنت بتاعة الالف وخمسميت جنيه عاااااا

بس بقى انا همشى

عشان بدأت ادمع بجد


ومش قايل تحياتى
‏قال الربان
تحياتي

أحييك انك كتبت هذا البوست الايجابي ، لان جهاز الشرطة به من الشرفاء الكثيرين...و ايضا به من هم دون ذلك و لكنهم قله...اقول هذا لان لي من الزملاء و الجيران من يعمل بالشرطة...و معرفتي بهم من زمن طويل من ايام الدراسة بالابتدائي...

لكننا اعتدنا علي ان نتذكر السء و نتجاهل الحسن... و المثل يقول كلما كان الثوب ابيض كلما ظهرت به البقعة و إن صغرت ...

تحياتي... و الف سلامة لك...و ربنا يعوض علي الجميع.

مع خالص التقدير
‏قال Empress appy
ايه ده ايه الكلام الكبير ده لا بجد دا انا هجيلك لغاية عندك لازم بجد واديكى بوسه كبيررررررررة قوى بجد مش علشان بتدافعى الناس دى مش محتاجه حد يدافع عنها اصلا وكل مهنه فى الدنيا فيها الحلو والوحش ومش عاوزة اسمع حد يقولى انهم المفروض يبقوا حدوة اقصد قدوة لانهم مينفعش يكونوا قدوة اولا لانهم بشر زيينا بالظبط مش فياكين فضائيه ثانيا النوعيات الغالبه اللى بيتعملوا معاه والحوادث والقتل والاغتصاب بتغير فى حياتهم شويه بس مش معنى كده انهم قتاليت ولا فامبير لا دول بش والناس اللى غاويه فرقعه هى اللى دايما تعادى النجاح وانتى وضحتى والله يا بنتى انا دخلت القسم اكتر من مرة ومرة منهم علشان شقتى كانت هتتسرق والظابط قعد ليه امين شرطة كل يوم تحت البيت من الساعه10 بالليل للساعه8 الصبح لانه كان حاسس انى خايفه والشقه متسرقتش بس انا رحت اشتكيت ليه ان مفيش عربيات دوريات ولا حد واحنا فى القاهرة الجديدة يعنى مدينه لسه جديدة وبرضه علشان محدش يفهم غلط مكنش علشان جمال عنيه لان له مهمه تانيه غير القبض كمان يمنعوا الجريمه والامين ده وواحد تانى اللى كانوا بيقعدوا عند البيت او فى المنطقه كلها كانوا بيأمنوها فعلا لغايه لما زودوا الدوريات يعنى لما بيكون فيه شكوى الناس دى بتسمع مش لازم نهجم وبس عليها
‏قال Heart Beat
زي ما قلنا قبل كده كل مهنة و فيها الكويس و فيها الوحش

عندنا بس مبدأ السيئة بتعم و الحسنة بتخص من المبادىء الاساسية

عشان كده بعض الحوادث اللي اتكشفت و كانت على ايدي ظباط للاسف طبعا

الحوادث دي خلت يكون في عندنا شك ان الجهاز الكبير ده و اللي هو جهاز الشرطة يعني في ناس بتتصرف بالسادية و التحقير ده

و تبدأ صور افلام زمان زي الكرنك مثلا و غروب و شروق و ربطها بين الصور و الحوادث بتاعت الايام دي نقول دي الحكاية مش بس اليومين دول و لا حاجه

اعتقد بس الفرق بيكون زي ما بنقول كده ان اللي اتعرض لموقف سيء مع ظابط اكيد الموقف جه هايفضل صورة في باله على طول و بالتالي هاياثر على فكرته بالنسبة لكل الظباط

و اللي اتعرض لموقف كويس اكيد الفكرة هاتكون كويسه

بس في المواقف اللي زي دي الاعتدال بيكون الاختيار الصحيح يعني مش معنى ان في ظابط تسبب في اذى لشخص يبقى كل الظباط وحشين و برضه مش معنى ان ظابط تعامل بإنسانية مع شخص تاني يبقى كل الظباط كويسين و مواطن زي عماد الكبير ده مفتري و بيتبلى عليهم

اعتقد ان من الافضل هو الحكم على الشخص بافعاله هو مش بأفعال غيره

المهم ان ضهرك يكون خف خلاص و الموبايل يكون رجع لك سليم

اما بقى البنت اللي اتسرق منها الف و خمسمية جنيه فربنا يتولاه برحمته و ان شاء الله يكون رزقها المبلغ ده

و يكون الرجل اللي اصيب بكسر في رجله حالته اتحسنت دلوقتي
عزيزتي
حمد الله على سلمتك وربنا لطف
كلامك مزبوط وانتي اكيد عارفة انه اي جهة عمل او اي شغلانة
يبقا فيه الكويس والوحش والمعروف ايضا انه في ناس مهما كانت نوع شغلها بتستغل ده عشان تحقق مصالح ليها
وانا معاكي انه مش محتاجين وسطة ولا معرفة عشان ناخد حقنا ونتعامل كويس
بس الناس بقت كارهة الحكومة واللي بيمثل الحكومة اللي هما زي رجال الشرطة

ربنا يهدي الجميع

تحياتي
الف سلامة علييكي يا نانا وربنا ما يوريكي تانى الى شفتيه

وما نقدرش ننكر ان وجود جهاز الشرطة هام فى حياتنا .. بس للاسف الى انتى حكيتيه يعتبر وبشكل حاد حالات فردية .. لان الاسواء كتير ومن غير ما نفترى عليهم .. وده عنيينا وفى الشارع وفى كل مكان الى ماديين اديهم للخلق والا هيازونا

بس تعرفى انا حاسة ان امريكا هى الى ورا الموضوع ده

وربنا يعوض عليكي .. وما تشليش شنط بعد كده .. لان الى حصل اكيد مش هيبقى اخر مرة طول ما احنا زى ما احنا

والله يلعن ابو الظروف الى جابتلنا التوك توك ببلاويه

تحيياتى واعتذر للاطالة
‏قال Unknown
السرقه بقت عادية جدا و في كل حته لأن خلاص الحرامية مش لاقيين ياكلوا
لما توصل ان الحرامي يسرق غطى البلاعه يبقى فيه حاجه غلط في البلد
‏قال MerMaid
قطة الصحراء
ايه ده ؟؟؟؟؟؟؟؟؟؟؟؟؟؟؟؟؟
انتي من فاقوووووووووووووووس؟؟؟؟؟؟؟؟؟؟؟؟؟
مش معقول ...فاقوس فيها مدونين يا ولاد
لولولولولولولولووللول لللللللللي

انا حاسة انك زعلتي مني والله....بس انا كمان حاسة اننا هنكون صحاب

لاني انا كمان يبعد عني مركز فاقوس خمس دقايق بس يالتكتك و انا مخدتش بالي من النقطة دي الا دلوقتي
--------------------------------
انا عارفة و متاكدة ان فيه ظباط كويسن وكل حاجة ..بس انا بيصعب علية قوي الناس اللي بتتعب مع ظباط الشرطة أكيد في معاملة تانية غير دي
كل انسان بيغلط و كل انسان ممكن يرتكب جريمة و طبعا لازم يتعاقب
بس مش احنا اللي نعاقبه...مش ظابط الشرطة ولا انا ولا انتي اللي نعاقبه
القانون اللي بيحكم عليه انه يدخل السجن مدة قد كذا مناسبة للجريمة اللي ارتكبها..يبقي الظابط يسلم الشخص ده للمحكمة سليم ..ولا يضربه ولا يشتمه علشان يعترف ولا اي وسيلة تانية.
ظابط الشرطة فقط للقبض علي المتهم و التحقيق و استقبال الحالات اللي بتدخل المركز زيك كدة لما دخلتي تقدمي بلاغ
لكن كون ان ظابط يضرب واحد ولا يعتدي عليه حتي بالسباب ده مش من حقه
و مش من حق اي حد انه يعمل كدة مهما كانت سلطته.لان كلنا بني ادميين و لنا حقوق وواجبات و علينا برضه حقوق وواجبات
-----------------------------------
نقطة تانية : طبعا مش حاجة كويسة انه ياخد ميكروباص و يطلع بيه بدون وجه حق الا انه ظابط شرطة
الميكروباص ده عليه اقساط و فاتح بيوت
لكن لو كان بيديله اجرة ...يبقي مفيش مانع...وده اصلا مبيحصلش .

طبعا انا مش عاوزة البلد تبقي سوق ولا حاجة ..بالعكس والله انا نفسي البلد دي تبقي كويسة بس هي اصلا مش هتتغير ....

==================================
اتمني برضه انك تشرفيني في مدونتي حالة سعادة و شوية كلام
و متزعليش مني
و اتمني نتقابل في مرة
قوليلي بس السيبر فين وانا هاعدي عليكي
:)))
بجد والله يشرفني مقابلتك
‏قال Desert cat
مهندس مصري
طبعا رايك احترمه جدا
وفى نقطة قولتها محتاجه اركز عليها
اللى هى المفروض انهم يتوفر لهم ظروف ملائمه لحياتهم
مش شغل 18 ساعه فى الـ 24
دمت بود
‏قال Desert cat
coca
الطبيعى يا كوكا ان كل مكان فيه الحلو والوحش بس الناس فى بلدنا ام الدنيا الناس بتلغى عقلها
عايزين يخترقوا القوانين من غير حساب ولا عقاب
اصل الظباط وحشين
انا البنت دى معرفش عنها حاجه دلوقتى الله اعلم بيها
قدر الله وما شاء فعل
محبتى يا ساسو
‏قال Desert cat
newborn@mail2me.com
ههههههههههههه
مش للدرجة دى يعنى
هما مش بياخدوا اوامر ينفذوا فيها حكم الاعدام فى الناس
ولا هما وحوش آدمية متحركة للدرجة دى
دول مهما كان بشر زينا يعنى

احتراماتى
‏قال Desert cat
فرنسا هانم
حبيبتى انا الحمد لله دلوقتى كويسه جدا كمان
وطبعا كل حاجه بتتعوض
محبتى
‏قال Desert cat
undertaker
ما هو ربنا خلق لنا عقل نميز بيه برضه وفى كلمة اسمها اعوذ بالله من الشيطان الرجيم لو قولناها بيتكسف على دمه وبيبعد
بس شخص الجريمة بتجرى فى دمه اكيد لازم يكون له رادع
ولازم يكون فى عقاب
الله يسلمك يا زعيم
دمت بود
‏قال Desert cat
Ahmed Al-Sabbagh

كنت قربت تصعب عليا واسلف ربع جنيه تشترى كلنكس
لكن اسلوبك يخلينى ارجع فى كلامى
من غير شرفت البلوج
‏قال Desert cat
الربان
طالما موجود الخير فاكيد موجود الشر
لكن للاسف البعض طبيعته ترفض النظر لنصف الكوب المليان
وتفضل البقاء على النصف الفارغ
دائما ما تسعدنى ردودك
واتشرف دائما بحضور حضرتك
احترامى وتقديرى
‏قال اسامة يس
اختي الكريمة / قطة الصحراء
الأمر ليس مع من او ضد من ...

الانسان من المفترض ان يكون ضد اي شر أياً كان المسؤول عنه ....
وهناك فرق بين الشخصية المعنوية (كجهاز شرطة) وبين ضباط الشرطة كأفراد
قطعا ليس كل فرد من افراد الشرطة سيء .. لكن الذي نتساءل عنه هل التعذيب في اقسام الشرطة ممنهج ومتعمد لارهاب الشعب ... كنا زمان نحتمي في الضباط ونسمع في الأفلام يا شويش يا بوليس الذي يهرول ليحميك...
الآن وبصدق ودون ان نجتي اثما كما قلتي في موضوعك شوف انت عملت ايه لا معملناش يخشى اي شاب ان يقترب من البوكس لأنه سيصفع على وجه اثناء اخراجه للبطاقة دون وجه حق... هذا ما يحدث دون ان نتشدق بمن ولمن.. نحن نقول لا للتعذيب من قبل اي فرد او اي جهه...

ثم وليكن هذا اللص فعل ما فعل السؤال القانون هو المسؤول ام الشرطي الشرطي مسؤول عن ضبه لا عن تعذيبه .. والقانون مسؤول عن العقوبة.. هذا في اسوء الفروض... ستقولين يطبطبوا عليه يعني أقول لا لكن على اقل تقدر لا يعذبوه لان قانون التعذيب قانون بربي سادي اقصي من اي تشريع انساني رشيد....
ناهيك عن العذابات المتواصلة من قبل رجالات امن الدولة لكل من يشتم فيه رائحة معارضة من اي نوع ولا دا كمان مش ارهاب للبشر ...

عزيزتي ان آهات وعذابات الناس في اقسام الشرطة اصدائها في كل الآذان فأرجوك راجعي نفسك في هذا الرأي ...

ولك مني خالص الود والتقدير والتحية
...
‏قال Desert cat
appy
والله انا اللى نفسى اشوفك
وابوسك بوسه اكبر
يا حبيبتى فى حاجه اعرفيها كدا
اللى يهاجم واحد ويحقد عليه اوى كدا اكيد انسان وجودهم بيسبب عائق فى حياته او انه اتمسك فى مصيبة قبل كدا
او لو بيكرههم كدا من غير اى اسباب يبقى ده بقى مريض نفسى المفروض يشوف حل لمشكلته
الطبيعى ان اى بلاغ بيتقدم لهم طبعا بيعملوا تحرياتهم و بيتحركوا لمنع الجريمة
ذى اللى حصل معاكى واللى حصل معايا ولو حصل مع اى واحد فى الدنيا

مستنياكى قريب اوى
ومش هقبل اى اعذار
محبتى يا قمر
‏قال Desert cat
Heart Beat
تعرف ان ردك المختصر ده لخص ما اعنيه تماما
بالنسبة لضهرى الحمد لله كويس وبتنطط براحتى كمان
البنت معرفش عنها حاجه ولا اى حد اعرف عنه حاجه لان حالتى النفسية مكنتش تسمح لى بالتعرف على حد
الراجل اظن انه بقى كويس

دمتى بود يا جميل
‏قال Desert cat
Amy,me??
الله يسلمك
الحمد لله على كل شئ
الناس بقت بتكره نفسها
علشان كدا بقت بتكره اى حاجه تمثل الحكومة
ربنا يشفيهم

دمتى بود
‏قال Desert cat
بنوتة من وسط البلد
الاول حمد الله على سلامتك
وحشانى
بالنسبة لامريكا هى اللى سلطت الحرامى عليا فعلا اصل بوش حس انى عايزه ارشح مكانه
ههههههههههههه
هو ايه اللى بيحصل منهم فى الشارع يا اختى
بيحافظوا على الامن العام
بينضفوا الشوارع من البلطجية
بيلموا المشتبه فيهم
يمكن غلطانين علشان بيعملوا كدا
الله اعلم
مش ينفع مش اشيل شنطة تانى
لانى صاحبة شغل وفى حاجات كتير بحتاجها ولازم تكون معايا على طول
متغبيش علينا تانى بقى
نورتينى يا جميل
‏قال Desert cat
Mohamed_sobhy84
هى بتحصل عندكو برضه موضوع غطا البلاعه ده
اصلها حصلت عندنا كتير
وبرضه كابلات التليفون
بس لما الشرطة تقبض على الناس دى بيبقوا غلطانين فى نظر الناس
والله غريبه
‏قال Desert cat
MerMaid
وفاقوس ميبقاش فيها مدونين ليه وهى مليانه مثقفين وعقول نامية
اصلها مدينة كبيرة وفيها ناس محترمين اوى ومن الطبيعى ان الناس دى يكون فيها مميزات كتير
ثم انا مش زعلانه من حضرتك ولا حاجه
طالما بتتناقشى فى حدود الموضوع وبذوق يبقى الف اهلا وسهلا بحضرتك فى اى وقت
بالنسبة للظباط بقى
من الواضح ان حضرتك برضه واقفه عند نقطة معينة وهى التعذيب
لو كنتى قريتى البوست بالكامل ووصلتى لاخره كنتى هتعرفى انه ضد التعذيب بكل انواعه لانى قارنت بين شخصيات محترمة وبين شخصيات عايزه الحرق
بالنسبة للظابط اللى بياخد ميكروباص ويطلع يعمل حملة تنفيذ احكام .. عرفتى ازاى حضرتك انهم مش بيدفعوا فلوس للسواق ... اتعمل معاكى موقف قبل كدا زى ده ولا حاجه ...
ممكن فى الحال دى اصدق ... اصل اللى اعرفه من خلال سواقين انهم بياخدوا حقهم واكتر بل بالعكس بينتهزوها فرصة ويوقولوا دى فلوس حكومة ناخد براحتنا
ولعلمك حملة تنفيذ الاحكام مبتطلعش غير بالليل وفى اوقات متاخره جدا والسواق بيفضل معاهم للصبح وفى الحالة دى بياخد فلوسه الضعف .. اللى اعرفه ان فى ناس بتسترزق كويس اوى من خلال الموضوع ده ...
فى نهاية رد حضرتك بتقولى انك مش عايزه البلد تبقى سوق بس مش هتتغير
طيب وهى هتتغير ازاى اذا كنا احنا بنهاجم اللى عايزين يغيروها
وكل حاجه بيعملوها هما بطلجية وصيع حتى لو الحاجه دى لمصلحتنا
للاسف
الناس اتعودت على الهرجلة
ومخالفة القانون فى كل حاجه
علشان كدا على حد قولك مبقاش ينفع تصليح

دمتى بود
‏قال Desert cat
osama
طيب كويس ان حضرتك مش بتقول كلهم زى بعض
بس اى شاب يخشى يقترب منهم فدى صعبه شوية اصل عندنا مجمع الشرطة فى مكان حيوى والناس رايحه جاية من قدامه
ومحدش بينضرب على قفاه او بيتاخد ولا حاجه... وكمان مجمع المحاكم برضه فى مكان حيوى اكتر منه وبرضه الناس رايحه جاية ومفيش اى انتهاكات من دى بتحصل ... يمكن علشان بلدنا مش بشوف فيها كدا
طيب ما انا بنزل القاهره كتير وبشوف بوكس دايما واقف فى رمسيس والناس رايحه جاية من جنبه طبيعى جدا
وسواء امين الشرطة او الظابط او غيره هو مش عفريت او بعبع ده انسان وبنى ادم وعنده احساس ولو اتعور حينزل منه دم زينا بالظبط اه والله ... هما ناس مش جايين من كوكب تانى علشان يشتغلوا فى الشرطة .. بالنسبة للى بيحصل فى امن الدولة ما فى ليبراليين وفى وفد وواخدين راحتهم انما لو قصدك الارهاب الارهاب اللى بجد بقى .. فانا مستناش لما واحد يجى يفجر نفسه فى وسط شارع ويقتل فى الابرياء ويخرب فى البلد وافضل ادعى على الشرطة .. لو كنت ناسى افكرك بحادث الازهر وعبدالمنعم رياض .. وخليج نعمه ليس ببعيد ... اراجع نفسى فى راى ... يعنى اقف اسقف لبلطجى او حرامى او تاجر مخدرات والعن فى الشرطة باللى فيها
دلوقتى التعذيب انا ضده بكل المقاييس إنما مش ضد امن البلد بصراحة ..
مش بدل ما نحارب الناس اللى بتحمينا
نحارب البلطجية اللى بيسرقوا بالاكراه وبيغتصبوا فى عز الضهر
نحارب الفساد الادارى
مش احارب اللى اى مصيبه بتحصل بيكون هو اول واحد بيجرى عليها علشان يشوفها ويعمل تحرياته على الواقعه
لا يحدف بالطوب غير الشجرة المثمرة
والهجوم القوى ده خير دليل

تحياتى
‏قال MerMaid
خلاص يا سيدتي الفاضلة

------------------
كل سنة وانتي طيبة

و دمتي بود :))

كان نفسي نتعرف و نتقابل
:)
انا حستدل بايه من القران بسيطه جدا فى تحريم الخمر والميسر
( يسلونك عن الخمر والميسر قل فيهما اثم كبير ومنفع للناس واثمهما اكبر من نفعهما ويسلونك ماذا ينفقون قل العفو كذلك يبين الله لكم الايت لعلكم تتفكرون )
صدق الله العظيم
بالقياس نتدبر الحاجه الى احنا عايزين ننقده دى نشوفها منافعها اكتر وا ضررها لو نفعها اكبر من ضررها يبقى خلاص محدش يتكلم لو العكس نلغيها
بمعنى مش علشان اسلام نبيه والف زى اسلام نبيه اهدر دور الشرطه فى المجتمع المصرى وااقول انى كل الشرطه كده
نقيس كل حاجه بنسبتها علشان نكون موضعين فى حكمنا
الشرطه موجوده فى مصر من 100 سنه ظهرت حالات فرديه فى التعذيب ننسى دورها فى المجتمع لا طبعا بس نكون حيادين فى احكامنا
‏قال oceaneyes
ازيك يا قطقوطة ؟؟؟

عاملة ايه يا جميل ؟؟

يارب تكونى بخير وبصحة وسلامة يارب

معلش يا جميل مش هاقدر ارد على البوستات اللى فاتت ولا اللى هاتيجى بعد كدة لمدة 3 اسابيع

اصلى بعيد عنك عندى امتحانات

اهق اهق اهق اهق


بس اول ما اخلصها هاجى ارد على كل اللى فاتنى ان شاء الله


هاتوحشينى كتير اوى


وابقى طمنينى عليكى يا قمر


تحياتى

:)
‏قال اسامة يس
اختي الكريمة/ قطة الصحراء
لا اظن ان من وضع اللينكات لا للتعذيب ووو في مدونتك انا
اظن انه انت...

سعيد بالتواجد هنا وان اختلفت الآراء...
عزيزتي قطة الصحراء

كل سنةوانتي طيبة ياقمر والسنة اللى جاية بقى تريحيني من القطة دي ابوس ايديك يعني هههههه

ان شاء الله السنة اللى جاية تبقى احلى واجمل وتكوني محققة فيها كل اللى بتحلمي بيه يارب وقلي لكل اللى تعرفيهم بقى كل سنة وهما طبيبن يالا بقى لو تعرفي كتير انتي اللى حتتعبي بقى انا ماليش دعوة هههههههههههه

تحياتي ياجميل
و الله يا أخت هريرة أنا أختلف معاكى .. خصوصا إن أنا عيشت تجربة حصلت لواحدة قريبتى بنتها اتخطفت .. و لما ولاد الحلال رجعوها لأمها ... الشرطة تدخلت بشكل يخلو تماما من الإنسانية .. لا مجال إنى أحكى الحكاية دلوقتى

المهم ... عندى ليكى جواب

إحضر حالا لاستلام جايزتك فى استراحة الكاشفة

الهيئة المصرية العامة للبريد
‏قال Desert cat
رئيس جمهوريه نفسى
كلنا عارفين دور الشرطة فى المجتمع يا محمود واولهم الناس اللى بتهاجم دى
واتحدى لو واحد منهم بيته اتسرق او اتهجم عليه بلطجى فى الشارع مش هيكون اول مكان يجرى عليه اقرب قسم
كلامك منطقى جدا
دمت بود
‏قال Desert cat
oceaneyes
ازيك انتى
اخبارك ايه
انا كويسه يا حبيبتى
المهم انتى ابقى طمنينى على اخبار امتحاناتك
ربنا يوفقك
‏قال Desert cat
osama
طيب يا فندم ما كدا حضرتك المفروض تكون اتاكدت انى ضد التعذيب وده انا نوهت عنه فى البوست وكمان فى ردى بالاعلى على حضرتك
طيب افكرك تانى انى قولت انى ضد التعذيب ...............
دلوقتى التعذيب انا ضده بكل المقاييس إنما مش ضد امن البلد بصراحة
....................
الجملة دى كانت فى ردى الاول على حضرتك

كويس اوى انك اخدت بالك من اللينكات اللى فى المدونة

يا استاذ اسامه انا مؤمنة جدا بان من عذب يُعذب ومن قتل يُقتل
بس جهاز الشرطة مش كله سلبيات ومش كلهم بيعذبوا انام انا فى ايجابيات كتير جدا بس يمكن علشان الالام سلط عليهم الاضواء فالناس خلاص ثبتت فى عقلهم السلبيات وبس
انا بتكلم هنا عن الايجابيات والحاجات اللى انا شوفتها من الجهاز اللى حضراتكوا بتهاجموه وبشده

سعيدة بتواجدك
دمت بود
‏قال Desert cat
كلام من القلب
حاضر انا السنة اللى جاية هيريحك من القطة واحط لك مكانها اسد
كل سنة وانتى بالف خير يا جميل
انا هقول لكل معارفى كل سنة واهما طيبين
وانتى كمان تعملى كدا

happy new year
محبتى يا جميلة
‏قال Desert cat
ابن حـجـر الـعـسـقـلانـى
اتخطفت وتدخل الشرطة كان يخلو من الانسانية
طيب ازاى اذا كانت هى كانت مجنى عليها
الا اذا كانت البنت مش مخطوفة بقى والموضوع كان حاجه تانية
عموما حتى لو حاجه تانية غير الخطف مينفعش تدخلهم الخالى من الانسانية

وبما انا ليا عندك جايزة مش جبتها هنا معاك ليه
لازم اتكلف مصاريف مواصلات واروح انا
عموما جاية حالا اصلا
‏قال Unknown
كل شوية كنت باقول لنفسي هي دي قطة الصحرا، اللي جت عملت خناقة عشان باقول مصر مش زفت، ولا واحدة تانية
طب ما انت أهو بتقولي زي إن لسة فيها ناس محترمين، سواء كانوا من الشرطة ولا من غيرهم، المهم إنك بتقولي نفس الكلام، وبتردي الحقوق للناس، وبتطلبي من الناس إن ما حدش يلوث سمعة المجموع بذنب الأفراد، أومال كنت بتتخانقي ليه بقى

ده مش عتاب ده دعوة مني إنك تزوريني يوم الخميس الجاي عشان بأقفل المدونة وانت اول واحدة تعرفي
جدعة يا اطؤطة
بوست جامد وبيخلينا نشوف اللى حوالينا صح
كل سنة وانتى طيبة
اختك خيخة
‏قال Desert cat
يوميات عيل مصري
انا فاكرة الخلاف ده وتقريبا كنا مختلفين حول النظام المصرى عموما
ووقتها انا مكانش وجه خلافى على التعميم من عدمه .. انما كان وجه خلافى على ان مصر المدينة الفاضلة
حتى وان اختلفنا فى الرأى فدائما وأبداً احترامى لحضرتك كشخص
بس ليه حضرتك تقفل المدونة
عموما اشكرك على الدعوة وساكون اول الحاضرين كما كنت اول المدعوين
احترامى وتقديرى
وعام سعيد على حضرتك
‏قال Desert cat
بت خيخة وأى كلام
ام شريف القمراية
كل سنة وانتى اسعد من السنة اللى قبلها
عام سعيد عليكى ان شاء الله
اولا الحمد لله على سلامتك
ثانيا انتى لية حطة فى دماغك ان الناس بتكرة الشرطة وضباط البوليس الناس بتكرة الظلم والافترة محدش يقدر يقول ان كل الظباط وحشين ولا ظلمة بس محدش يقدر ينكر ان فى مشاكل كتير بتحصل فى الاقسام
انتى قولتى انك لو اتحكمتى فى الحرامى دة هتفجرية ودة عشان اللى عامله فيكى
بس بالنسبة للظابط مش من حقة يعمل فيه اى حاجة مهما كان اذى الناس هو شغلته يقبض عليه ويسلمة للنيابة ودة يتم بكل ادب واحترام وذى ما اتعامل معاكى يتعامل معاه وهو ده العدل

المشاركات الشائعة