ظابط يعتدى على مواطن حتى القتل

هو بالرغم من ان الحادثة حصلت فى بلدنا
والقتيل اتنقل مستشفى فاقوس العام اللى هو بينى وبينه اقل من 10 دقايق الا انى مش عرفت الخبر ده غير من على النت
وبما انى فضولية زيادة عن اللازم فحبيت اعرف ابعاد الموضوع
وبما ان المستشفى متلغم امن جوه وبره والمرور من قدامه صعب حتى مش الدخول اصل السيد مدير الامن مشرف البلد هنا فالدنيا متلخبطة
تضاربت الاقوال ان سواق النقل من المنصورة وناس تانية قالت لى لالالالالالالا
ده هو من الشرقية وكان فى طريقه للاسماعيليه
يا جماعه ارسو على بر احنا دلوقتى ميهمناش اسمه ولا لونه ولا جنسه احنا يهمنا الانسان قصدى القتيل .. ..
وخدت جنب و قعدت وربعت على الرصيف تحت السجر يا وهيبة لحد ما يتفاوضوا مع بعض ويرسوا على بر ويقولوا لى الراجل ده منين ولا هويته ايه بالظبط
لاقيت واحد اد والدى جاى هو انتى بتشتغلى فى الهدف ... قولت له يالهوى ده انا سمعت انها قفلت من زمان حتى لو مش قفلت انا ماليش علاقة نوهائى بشغل الصحافة ... قالى امال محامية ... قولت له اعتبر .. قالى وعايزه تعرفى ايه ... قولت مين الراجل اللى جوه ده وايه اللى حصل ... عمى الحاج استهبل وقالى ما جوا رجاله كتير انتى تقصدى انهى راجل جوا
قولت له بتاع الحادثة اللى الظابط قتله ... لاقيته بيقولى صلى ع النبى ونظام انه هيحكى لى حدوته ... انا قولت اخد لى تعسيلة على ما يخلص بس لاقيت ان عنده معلومات ... الراجل ده طالع رايح بورسعيد قوم الظابط موقفه فى الكمين وسحب رخصه وقاله اركن على جنب ... ده قعد يقاوح مع الظابط ومستعجل ومش عارفه وراه الديوان ومش ينفع يتاخر ... الظابط كبرت فى دماغه وقاله طب انت جاى معانا بقى .... القتيل اللى جوه كبرت فى دماغه اكتر وقاوح مع الظابط ... قوم الظابط اتهور عليه .. يعنى يابنتى لو كان سمع الكلام دلوقتى وركن له على جنب شوية مش كانت الامور هديت والموضوع اتلم .. طبعا الكلام ده على لسان الحاج اللى ادانى المعلومات الهى يكرمه ... قولت له اه والله بس الشيطان شاطر ولعب فى دماغهم هما الاتنين
معلشى يعنى الناس اللى عمال تدعى على الظباط والناس التانية اللى بتقول لاء الظباط دول محترمين وانا منهم بس مش كلهم لكل قاعده شواذ ... يعنى مش اجى على واحد زى اسلام واقول عليه محترم لانه مهما بلغت بيه قوته مش يحط العصاية يعنى فى الامؤخذه .... المفروض انه لكل فعل رد فعل يعنى ظابط المرور ما ارتكبش الحمق اللى عمله ده الا اذا كان فعل السواق قوى معاه مش معنى كلامى انى بدافع عن الظابط لاء هو غلطان وستين الف غلطان لان مهما وصل الامر مش يوصل للقتل يعنى لازم يتحاكم
بس انت كمواطن انت كمان ليك دور لازم تقوم بيه مش اطلع عينه فى حوارات ملهاش اى لزوم واقول اصل كل الظباط ولاد ستين فى سبعين .... ده ظابط بيحميك ... واقف فى الشارع فى الفجر فى عز الشتاء مش علشان يرخم عليك مش مزاج عنده يقوم من تحت البطانية فى التلج ده علشان يوقفك فى الشارع رخامة ... الظابط ده بتكون انت فى اى مناسبه فى وسط عيلتك وأهلك ولو مسافر آخر الدنيا بتكون حريص كل الحرص على حضور المناسبة دى فى وسط عيلتك هو معندوش حاجه اسمها كدا ... معندوش حاجه اسمها ان النهارده العيد لازم اكون فى وسط اهلى ... الظابط ده بيطلع مأمورية لمطارده تاجر مخدرات او قاتل او غيره بيبقى يا قاتل يا مقتول .. واحد خارج وعارف انه ممكن يرجع جثه يعنى ماشى وشايل حياته على كف ايده ما اظنش ان اى حد يقدر يستحمل كدا . ... مين يقدر يتحمل ضغط اعصاب ومعاملة مع عتاولة من المجرمين واشكال مختلفة من البشر اللى قاتل واللى سارق واللى نصاب واللى تاجر مخدرات ... ما هو من الطبيعى المجرم مش هيدخل القسم ينهار بقى ويعترف لوحده بمجرد ما يشوف الظابط قدامه ... دول اجابتهم بتكون جاهزة على اى سؤال او اتهام يتوجه له ... بيقولوا بيعلموهم فى الاكاديمية الظلم والبلطجة والاجرام وانا موافقة .... انهم بيعلموهم كدا بس برضه بيعلموهم ازاى يقوموا بواجبهم وازاى يبقى راجل ويواجه الموت ... وازاى لما يتكلف بمأمورية لمطاردة عصابة او قاتل او ايا كان يواجهه بشجاعه حتى لو كانت حياته حتبقى ثمن لأداء
. واجبه ... وبعد كل ده بيتقال عليهم بلطجية وظلمة انا موافقه ان فيهم بس مش كلهم لكن للاسف شعبنا الحنون بيطبق قانون الحسنة تخص والسيئة تعم ..... كام ظابط قاتل ومجرم فى كام قسم على مستوى الجمهورية ... 5 - 10 بس ده مش معناه انى اجمع معاهم المحترمين اللى واجبهم فوق كل اعتبار
ربنا يحفظهم جميعا
بالنسبة للى حصل بقى عندنا الموضوع متكتم عليه تكتيمة سودة ولا حد قادر يفتح بؤه والمستشفى ما زال تحت الحصار والقتيل داخل المستشفى

تعليقات

‏قال Soooo
اي مهنه في الحياه فيها الكويس وفيها الوحش
لكن لما يكون الوحش ده المفروض انه يكون كويس
يبقى هنا .. اسلوب تعجب

المشكله الاكبر مش في الظباط ولا الداخليه
المشكله في ان فعليا مافيش حاجه اسمها مصر ولا مصريين

لو اي مجرم او اي ظابط حط في دماغه ان اللي بيسرقه او اللي بيقبض عليه او اللي بيعذبه او اللي بيتعذب منه ده مصري زيه زيه .. اقسملك بالله العظيم مش هنحتاج لوزارة الداخليه اصلا

وياريت توافينا باخر التطورات



سلاموووووووووووز
‏قال Desert cat
Soooo
تعرف يا سو احنا بنتعامل مع بعض كان بينا تار بايت وبين يوم وليلة اصبح كل اللى جوة القسم مظلومين ومقبوض عليهم افترى بسبب شوية ظباط مش عارفين ربنا ... طيب ايه الدافع اصل الظابط عنده حب الانتقام وحينتم منه ليه لاء اصل الظباط مرضى نفسيين والله وجهة نظر عقيمة جدا
طبعا انا متفقة مع كلامك 100% إننا نتعامل كلنا كمصريين الظابط ده مش على راسه ريشه علشان اخاف او اترعب منه طالما انا صح هخاف ليه ولا اخاف من ايه ... بس انا كمواطن برضه المفروض ان عليا حقوق وواجبات لو كل واحد اتعال فى حدود حقوقه وواجباته مكانش بقى ده حالنا
بالنسبة للقتيل اللى جوا المستشفى اى تطورات ان شاء الله هنقلها لكو
تحياتى
اولا نتفق على حاجه بحكم انى محامى اكتر تعاملى مع المركز وضباط الشرطه وانا محامى ليه 7 سنين الحمد لله دخلت ااقسام كتير رد مراكز يعنى واتعاملت مع ضباط ووكلاء نيابه وقضاه
عايز نتفق كمان انى العمل العام والاحتكاك مع الجمهور ليه متطلبات خاصه مش بتوفر عند كل الى بيمتهن العمل العام واهمها ضبط النفس وسعه الصدر الخ
ورغم انى فى كل المهن الكويس والوحش بس التسليط الاعلامى على الضباط اكتر بسبب الى بيحصل فى اقسام الشرطه رغم انى المحامين كمثال فيهم نصابين وانا بعترف بده والاطباء فيهم عالم عايز الحرق والمستشارين فيهم المرتشى بس التركيز على ضباط الشرطه فى منهم الى عايز الحرق بس فى منهم المحترم والاختلاف بينهم التربيه فى البيت وثقه الضابط بنفسه وكونه مش بيعانى من عقد النقص
لو حسبناها بشكل اكثر دقه حصلت الحوادث بتاعت التعذيب فى الواد الجديد العمرانيه قسم الهرم ومحرم بك وكمان نقول 10 اقسام او نقط شرطه تانى بس كام قسم او نقطه شرطه تانى محصلش فيها حاجه ولو عرفنى انى فى طبقا لاخر احصائيه حوالى 3 مليون فرد امن فى مصر نقول فيهم 100 الف واحد عذب ما بين اتعرف وما بين لا نعرف النسبه الباقيه قد ايه
ومش حنقول انى السئيه نعم والحسنه تخص لانى محدش افتكر الضابط الى مات وهو بينقذ فتاه من الاغتصاب ومحدش بيفتكر الى اتقتل فى الحرب ع الارهاب حاليا ياريت منخدش حد بذنب حد
‏قال Desert cat
رئيس جمهوريه نفسى
تعرف المشكلة فى ايه
إن اللى بيدخل القسم بيطلع يقولهم انا مظلوم والظابط ابن اللى واللى اخدنى حبسنى وعذبنى وبهدلنى طيب يا حضرة البرئ ما هو الظابط مش شافك فى منامه مثلا انك بتعمل حاجه غلط وقام راح جابك من بيتكوا علشان يحقق الرؤية ما اكيد فى بلاغ متقدم او اتمسكت بححاجه تدينك
بس برضه ده ميمنعش ان بيبقى ليهم سقطات
انما مش نقف ليهم على الواحدة
ما الوزراء اللى هما اكبر منهم مليانيين سقطات مزروعات مسرطنة ودم فاسد الناس بتتكلم يومين وتتنساهم
وزى ما ذكرت يا محمود
الظابط اللى اتقل وهو بيدافع على بنت هو كمان راح طى النسيان
تحياتى
‏قال son's egypt
السلامعليكم
مشكلتنا هنا في مصر ان الواحد مش بيعرف الحقيقية فين بالضبط وحنسمع الف حكاية للقصة
فالحقيقية بتهوه وفي الاخر مش بنوصل لحاجة معينه
‏قال مراقب مصري
القتيل اللى جوه كبرت فى دماغه اكتر وقاوح مع الظابط ... قوم الظابط اتهور عليه...

واضح طبعا إن الظابط مظلوم والحق على القتيل اللي جوة

القتلى دول ما بقاش عندهم أي أخلاق على الإطلاق
‏قال محمد صالح
والله من الاخر عشان نعرف الحقيقه منين نستعير جهاز كشف الكذب من المخابرات ونريح دمغنا مصر ينقصها حاجه واحده الا وهيا الوطنيه...الوطنيه مش فى الاغانى ولا فى الحروب المووطنيه نحققها لما ينجح مجتمعنا
‏قال ENAS
أية التناقض العجيب دا أنا لو فضلت

أطلعلك التناقضات مش هخلص تقريبا كل

الموضوع هجبلك مثال من اللى انتى كاتباة:

بيقولوا بيعلموهم فى الاكاديمية الظلم والبلطجة والاجرام وانا موافقة .... انهم بيعلموهم كدا بس برضه بيعلموهم ازاى يقوموا بواجبهم وازاى يبقى راجل ويواجه الموت ... وازاى لما يتكلف بمأمورية لمطاردة عصابة او قاتل او ايا كان يواجهه بشجاعه حتى لو كانت حياته حتبقى ثمن لأداء

ودا من أية بقى ازاى يعنى يعلموهم

البلطجةوالأفترى على الناس دا بقى تبع

أنهى قانون ولا منطق الغريبة أنك بتأكدى

دا وبترفضيةوبعد كدا تقولى مهو برضة بيتعلموا

أزاى يأدوا واجبهم ويقبضوا على تجار

المخدرات أنتى كمان مش عايزاهم يعملوا

كدا دا شغلهم وهم اللى أختاروا من

الأول محدش ضرابهم على أيديهم عجبهم

يشتغلوا بالقانون ومع مبدأ المتهم

برىء حتى تثبت أدانتة وأنهم مش

القانون فى قاضى بيحكم بمدة عقوبة

ماعجبهمش هنفضل كدا نفضحهم دايما شوفتى بقى مدى التناقض فى كلامك

عجبت لك يازمن
‏قال AHMED SAMIR
الموضوع ابسط من البساطة
انت سحبت رخصتي..وانا بقاوح معاك زي ما بتقولي..ماتسيبني اتكلم وماتردش عليا
ليه الضابط يرد فتبقى كلمة في حدوتة في خناقة
يبقى اكيد الضابط غلطان برضة
على فكرة
صحيح ان لكل قاعدة شواذ
بس شذوذ القاعدة هنا ان يبقى ضابط الشرطة كويس
تحياتي
‏قال معتزعادل
منطق عجيب يا اختي الي بتتكلمي من خلاله
يعني ايه معلش ممكن تفهميني القتيل اللى جوه كبرت فى دماغه اكتر وقاوح مع الظابط ... قوم الظابط اتهور عليه

هو معلش يعني الظابط ده شغلوا يقتل في الي يتعصبوا عليه المفروض ان الظابط مهمته حفظ الامن والامان مش قتل الناس في الشوارع ده حسب ما القانون الي بنتبعه

بس انت ممكن تقنعيني ان الي قتل محمد طفل شها مظلوم ؟؟؟ الي قتل ناصر تلبانه مظلوم الي لا مؤاخذه يعني لبس المقشه لعماد الكبير مظلوم ؟؟

منطق غريب مهما كان الخطأ الي اقترفوه هل من حق الظابط او اي رجل امن الحق في الاعتداء عل اي مواطن لم تثبت عليه الادانه اولا وحتي لو ثبتت عليه الادانه مش من حقه ان يكدره كل الي ليه انوا يقدموا للعداله

بس امثال الظباط الي انت تعرفيهم وبتكتبي عنهم وبتحاميلهم شويه الفشله والبلطجيه اولاد اللوائات الفاسدين والي امه وابوه مدلعينه معرفهوش ربنا ومعرفوش انه كما تدين تدان وكما قتل يقتل

ومعلش مهما كان قتيل فاقوس عمل مش من حق الظابط انوا يضربه لحد الموت ده منطق الحيوانات مش منطق الحفاظ علي الامن
‏قال زعيم كمورا
بقى بالزمة دة سبب يخلى ظابط يقتل بنى ادم
فيها ايه يعنى لما الراجل يقوله سيبنى امنشى عشان مستعجل
او حتى بحج فيه وقاله كلمتين على الماشى
بصراحة انا مش مقتنع ان دة السبب
اكيد الراجل دة عمله حاجه
كبيرة
هى الى نرفزته وخلته يكحوره بالشكل دة
وحتى لو الراجل مات وفيها ايه يعنى
ماهو ممكن اى واحد كان مكانه كان ممكن يضرب الراجل لغاية ميموت
محدش يعرف ايه الى حصل بالظبط عشان يخلى الظابط يعمل كدة
وكمان دة ظابط كمين
يعنى فكشة
كل شغلته انه يوقف العربيات ويفتشها
بس
يعنى معندهوش من السلطة الى يخليه يفترى على الخلق
وهو مطمن
زى بتوع اقسام الشرطة
انتى عارفه انا الى نرفزنى فى الموضوع كله
انك قولتى ان الناس مكتمة على الموضوع عندكم ولا كان حاجه حصلت
ياسلااااااااام
اهو هو دة الشعب المصرى
ولا بلاش
الأخت قطة الصحراء
انا عايز اسأل سؤال هما ليه يدخلوا كلية شرطة ؟
ده الضرب ده الواحد بيتعلمه بالففطرة والسفالة وقلة الأدب برضه بنكتسبها من البيئة مش محتاجين اننا نروحلها كلية
يعني حضرتك بتقولي انك معاهم انهم يتعلمو البلطجة والظلم طيب هي البلطجة والظلم محتاجين كلية ؟؟
طب على كدة بقى اي واحد بلطجي بيكون معاه بكلريوس من كلية الصياعة تخصص بلطجة واجرام ؟
يعني بوضوح اكثر البلطجية اللي في الشوارع اتعلموا فين ؟
بإختصار انا مش هاحرق كتير
هو يعني ايه ظلم ؟؟
ويعني ايه تعذيب ؟؟
ويعني ايه واحد شتمني اقوم قاتله
انا لا انكر ان فيه ظباط محترمين ولا انكر ايضاً ان هما بيسهرو علشان يحمونا( رغم ان ده مبيحصلش غير في المناطق الراقية جداً ) لكن كل ده بيقبض عليه مرتبه عني لو معملوش هايكون مقصر
لكن اللي البيه مبيقبضش عليه ولا مش من حقه انه يشتمني او يضربني او يقتلني او يظلمني
وياريت يلغو كلية الشرطة بقىمادام هي اللي بتعلم الظلم والبلطجة ويجيبوا لهم دكاترة في البلطجة والظلم من الجبل بدل المصاريف اللي بتتصرف على تعليمهم

بقول ايه قاسم السماوي قالها كلمة حكمة
( جتنا نيلة في حظنا الهباب )والمفروض الحكومة والداخلية تتخلص مننا وتسمنا علشان تريح جناب الظباط
سبحان الله على البشر
‏قال فرنسا هانم
انا لسه عارفه الخبر ده منك انتى
لكن
الظابط فى النهايه انسان
والقتيل ايضا انسان
ولا نستطيع الحكم
قبل
ظهور الحقيقه كامله
رفعت الجلسه
معلش احب اقولك موضوع الحسنة تخص والسيئه تعم ده مش فى حياة ناس واهدار كرامة ناس
ولما نقول الحكومة فاسدة منقولش اصل فى ناس كويسة وتمام وبتاعة ربنا
ولا كمان لما نقول الدعارة مهنة زبالة منقولش اصل فيهم الغلابة وبنات الناس والظروف والجوابات
عارفيين ان فيه ظباط تمام بس لمنا بنتكلم عن مهمنه مش بنتكلم كشخص بنتكلم كجهاز كامل
وبدل التعب ده احب اعرف قسم شرطة مش بيحصل فيه اى اهانة لاى حد كل الاقسام فيها اهانات وظلم وناس تلبس قواضى مظلومه فيها وحاجر لاقل سبب
انتم مش بتشوفوا الا اللى مات جسديا لاكن فيه ميات من الاهانة ماتوا حسيا
مش بس بتوع السياسة الحرميه والصيع وبنات الليل اخر بهدلة بتحلهم الناس دى غلطت تاخد جزئها وبس والجزاء واحد المهم اهانة الانسان تسوى كتير قوى
ولو كنتى غلبانه شويه انتى واهلك كنتى عرفتى من اقل سبب ممكن يحصلك ايه انتى واهلك لو زعل منك اميين شرطه مش ضابط
سلام
لا شك أن أي تجمع بشري في الدنيا فيه الكويس والوحش

والكويس والوحش دي بترجع لبيئة النشأة اكتر من أي حاجة تانية

يعني لو واحد اتربي 18 سنة علي مبادئ وقيم مش ممكن 4 سنين يمسحوها من عنده تماما

لكن هختلف معاكي في أن التعذيب وخلافه من تجاوزات حالات فردية

يمكن لو قلنا أنه بيكون الطريق الوحيد قدام ناس كتير منهم يا إما يضحي بالمواطن يا إما يضحي بنفسه يكون أقرب للواقع




تحياتي
‏قال Empress appy
حبيبتى والله كان نفسى اشوفك اصلى اتجنيت فى عقلى ورحت من القاهرة لعندكم الهم يا قطتى ان مش الظابط والله اللى ضربه الراجل بتاع المحجر اللى على طريق هو اللى ادخل فى الخناقه وضرب الراجل بحجر فهمتى وانا عاوزة حق البنزين بقى علشن كده كتيرررررررررر
‏قال Empress appy
على فكرة الخناقه محصلتش فى نفس مكان الكمين بتاع الظابط السواق ركب العربيه ومشى والظابط كان وراه ووصلوا لمكان فيه محجر مش عارفه اسمه ابقى روحى اسالى علشان انا كنت تعبانه وراجعه من الشغل وبعدين الراجل بتاع المحجر هو اللى ضرب السواق
وانا مقلاتش انى الى يغلط ما يتعقبش وما قلتش انى كل الضباط مش محترمين ولا العكس انا بس حبيت ااقول انى اساس التفكير العلمى انى بحط نسب لكل حاجه علشان ااقدر اوضح انا صح ولا غلط
اذا فرضنا انى فى عيله انسان اى ما كان شخص حرامى هل اتعامل مع العيله كمنظمه كامله انها حراميه ما هى العيله وحده وحده
عن قرب لاننا بننسى انى الانسان بشر كان ليه جار ضابط شرطه وكان ماسك فى قسم البدارى محافظه اسيوط يمكن فى ناس تفتكر يوم ما انضرب القسم الضابط ده رغم فرق السن الى بينا كنا اصحاب قوى خد فتره يعانى من مشهد استشهاد زميل ليه قدام عنيه ومع كتر الضرب الى كان شغال مقدروش يعملو ليه حاجه
واقسم بالله صراخ امه لحظه ما بلغوها خبر اصابته وصراخها لحد دلوقتى مش بيتنسى
موضوع تلفيق القضايا انا محامى وبتيجى ليه قضايا كتير وبشوف فى المحاكم قضايا اكتر بس احب اوضح كمثال فى قضايا المخدرات بتكون البراءه لاجراءت مش لانى المتهم مش بيبيع مخدرات وبعدين معلش فين الضابط الى ماشى فى جيبه مخدرات بيلفق بيها قضايا للناس
ملحوظه اخيره لو كنت تسمع عن واحد اسمه امجد حسين ده كان اتوقف فى كمين الزعفرانه طريق القاهره الغردقه واتعذب بطريقه مهينه بجد لدرجه انه باس احذيه عساكر الكمين غير التهديد با غتصاب خطيبته امجد حسين ده خريج جامعه امريكيه ووالده راجل اعمال كبير واحد بالصفات دى اعتقد انه عالى قوى وليه اتصالاته ومش غلبان يحصل كل ده ليه
الرابط بتاع الموضوع كامل اهو على موقع محايد لا حزب وطنى ولا اخوان
http://masr.20at.com/newArticle.php?sid=8843
عادي
بس فعلا كل مهنة فيها الحلو والوحش وياما برضه مظلومين كتير دخلو القسم والضابط ابن وال هو اللي كان مزاجه يحطة في الحبس
هي بلدنا كده
تحياتي ليكي
‏قال Desert cat
son's egypt
عليكم السلام ورحمة الله وبركاته
بالظبط ده اللى حاصل عندنا دلوقتى
كل واحد بيالف قصة شكل ويحكى
تحياتى
‏قال Desert cat
مينا زكري
هههههههههههههه
يا مناااااااااااا
انا نفسى مش عارفه ايه ابعاد الموضوع
انا بحكى اللى سمعته
وكل شوية اسمع قصة شكل
انا لا بدين القتيل ولا القاتل لسبب بسيط انى مشوفتش حاجه
‏قال Desert cat
محمد صالح
طيب لو حد سلفلك الجهاز ابقى ادينى خبر
اصلى بدور عليه من زمان
احنا كلنا محتاجين نتعامل كبنى ادمي ونبدأ بنفسنا
تحياتى
‏قال Desert cat
ENAS
هو حضرتك مسؤله لجنة المنقاضات اصل الرد كله مفيهوش غير كلمة تناقض وفى الاخر نفضحهم
عايزه تفضحى مين حضرتك
اللى لو حرامى سرقك فى الشارع بتجرى عليهم تشتكى لهم وتفتحى محضر وتدلى باوصافه
او بلطجى اعترض لك فى الشارع بيكون هما اول ناس تلجأى لهم
هو فعلا زمن العجايب
‏قال Desert cat
A.SAMIR
والله يا فندم انا لا شوفت الموضوع ولا كنت حاضره وقت الخناقة
انا سمعت قصة من بين الف قصة اتألفت حوالين الموضوع ده
واللى البلد كلها دلوقتى ملهاش سيرة غيره
ابقى تعالى بنفسك بقى شوف الحقيقة فين وانشرها لنا
‏قال Desert cat
معتزعادل
والله العجيب مش منطقى فى الكلام
العجيب ان حضرتك داخل تكيل لى كم الاتهامات اللى فى الرد دى
لانى مقولتش انى كنت شاهد عيان
انا قولت انا سمعت القصة من احد الاشخاص
ولو كنت حضرتك تكرمت فعلا وقريت البوست كنت عرفت انى مش بحامى للفاسدين وى اللى بيتعاملوا بمنطق الحيوانات انا بحامى للناس المحترمة اللى موجودة بكثرة فى الاقسام واللى انتوا مغمضين عينكو عليهم
لان الشعب اتعود على الاستبداد والهوان فالبتالى لما فكرتوا تتكلموا اول فتشتوا فى سجلات الظباط مع ان اللى اكبر هما اللى مالين البلد فساد
انا مش بقول نغمض عنينا عن الفاسد لاء بس بما انك عارف ربنا وعارف من قتل يقتل كنت اولى بحضرتك عرفت ان عدد رجال الامن اللى فى بلدك وفيهم كام واحد فاسد وبيعذب وكام واحد شريف ويستاهل وسام الشرف
ولا المتناوى مات واسمه اتنسى ولا يمكن كان فاسد هو كمان وكان بيجرى ورا الميكروباص علشان يغتصب البنت معاهم
انتوا مش محتاجين تغيروا الفساد انتوا محتاجين تتغيروا من جواكو الاول وتنفضوا قلوبكو علشان تعرفوا تغيروا من حواليكو
فى الحالة دى من حق حضرتك والاستاذه اللى قبلك تتكلم وتقول نفضح
‏قال Desert cat
undertaker
والله انا من وقت ما الحوار ده حصل وانا مش عارفه اصل الحكاية ايه انا كل نص ساعه اسمع رواية مختلفة
بالفعل لازم يكون حاجه كبيرة حصلت تخلى الظابط يعمل كدا
ما هو مش واحد مجنون واقف فى اشارة يقتل فى خلق الله
تحياتى
‏قال Desert cat
محمود الششتاوي
ايه الكلام اللى بتقوله ده
هو حد حكى لحضرتك على البوست وانت جاى ترد من خلال الحكاية اللى سمعتها ولا ايه
اصلى مش شايفه انى قولت كلام زى ده
يا فندم انا لما قولت بيتعلموا البلطجة والظلم فى الشرطة فده كان بناء على كلام حضراتكو اللى ماليين بيه المدونات
فانا رايى بقى طالما انتوا شايفينهم بلطجية يقى ماشى هما بلطجية بس بيحميك انت وغيرك من بلطجية الشوارع
وبيحمى ولادك من تجار المخدرات
الظباط دول ولاد ناس ومتربيين وعارفين ربنا وبيعرفوا يتعاملوا كويس مع بنى ادمين
بس مع البنى ادمين اللى بيعرفوا يحترموا نفسهم
مش اللى بيبقى بيسلم عليهم وبيضحك لهم ومستخبى ورا اسم مستعار ويقول نفضحهم
لما هما ناس وحشين اوى كدا ياااااى
لو بيتك اتسرق متبقاش تجرى عليه
المرتب اللى بتتكلم عليه
ميجيش حاجه فى بهدلته فى الشوارع ومخاطرته بحياته علشان ناس بتنكر
‏قال Desert cat
فرنسا هانم
طبعا كلامك صح
هو لحد دلوقتى اصلا محدش عارف ايه الحقيقة
القصص اللى اتالفت كتير والروايات متضاربة
والله وحده اعلم
‏قال Heart Beat
كل مهنة و فيها الكويس و فيها السيء مش بس الظباط مثلا

احنا بس اللي انطبع في عقلنا صورة الظابط السيء لان الامثلة على كده كتيرة

لو الصحافة او الاعلام عندنا بينشر او يتكلم عن الظباط الكويسين و اللي فعى بيأدوا واجبهم بصورة مشرفة بنفس الاسلوب و الشكل اللي بتكلموا فيه عن الظباط السيئيين اكيد ماكنش الانطباع العام عن الظباط ان كلهم سيئيين

زي عنوانين الجرايد مثلا لما تكتب عن موضوع زي ده تلاقي عنوان كبير بيقول وفة مواطن على يد ظابط

يجي واحد متسرع يقرا العنوان ده و تلاقيه نزل شتايم في الظابط و الظباط كلهم

لكن لو استنى شوية و قرا التفاصيل مثلا هايلاقي ان المواطن ده كان بيحاول يغتصب بنت مسكينة او كان بيحاول يسرق شقة مثلا

انا بقول كده على سبيل الافتراض يعني و كمثال ان الاعلام هو اللي بيوجه تفكيرنا للاتجاه اللي هما عايزينه

في مواطنين كتير برضه فاكرين نفسهم فوق القانون و دول برضه يستحقوا الحرق لما يجي ظابط كويس و يقبض على واحد فيهم عشان يريحنا منه مش برضه ده نسميه ظابط عنده ضمير و بيخدم بلده و لا هايبقى مفتري بيقبض على المواطنين

نعرف اصل الحكاية و ايه اللي حصل بالظبط و بعدين نبقى نحكم
‏قال Desert cat
القلم السكندري
طيب احنا كدا متفقين ان كل مكان فيه الحلو والوحش
ومتفقين ان اى حاجه بترجع فى النهاية للتربية والنشئة
طيب ما هو يبقى احنا برضه مش مختلفين ان التجاوزات حالة فردية
لان انسان متربى وعارف اللى ليه من اللى عليه
سواء بقى ظابط او سواق هيتعامل حسب الاخلاق والنشئة اللى نشأ عليها
تحياتى
‏قال Heart Beat
بس برضه ده مايمنعش ان في تجاوزات كتيرة جدا بتحصل من الظباط و استغلال رهيب للسلطة اللي في ايديهم

ساعات بحس ان كلهم او كتير منهم جايين من نفس البيئة عشان يعني بتكون تصرفاتهم واحدة

يعني في منهم اللي عايز يطلع ظابط عشان شكله الاجتماعي و مش مهم بقى يخدم البلد و لا لأ

و في اللي عايز يطلع ظابط عشان ينتقم من اللي بهدلوه قبل كده منهم او عشان ثأر شخصي تاني

و في منهم اللي فعلا عايز يخدم بلده و دول للاسف بينقرضوا يوم عن التاني، المفروض نتمسك بالشوية الكويسين الباقيين دول قبل ما يتمحوا خالص
‏قال Desert cat
appy
تصدقى بقى انا زعلانة منك
ازاى تبقى جنبى والمسافة بينا اقل من 10 دقايق ومش تخلينى اشوفك
انا برضه سمعت نفس الموضوع ده
بس مش عارفه فين الحقيقة
حق البنزين بقى لما تيجى فاقوس تانى
بجد لو جيتى تانى
حاولى تكلمينى
‏قال Desert cat
appy
حبيبتى اصلا السواق ده من دكرنس
وهو اساسا سواق نقل
رايح الصالحية يجيب من هناك رمل تقريبا يعنى مش كان رايح بورسعيد ولا بتاع
وهو من امتا بيكون فى مرور فى المحاجر او شون الرمل والظلط
ما هو اكيد كان فى فعل علشان الظابط يمشى وراه للمحجر
عموما انا علشان الردود اللى فوق دى مش ساكته ولازم اجيب لك تفاصيل الموضوع بالظبط
حتى لو رحت سالت القتيل نفسه عن اللى حصل
‏قال Desert cat
Heart Beat
ما هى المشكلة يا حبيبتى اننا بنضخم الحدث
يعنى خلينا فى اخر حادثة واللى هى محور كلامنا دلوقتى
محدش عرف اصلا ايه تفاصيل الموضوع الحقيقة ولا القاتل الظابط ولا عامل المحجر وبالرغم من كدا الاتهامات تتوالى عمال على بطال للظابط فى اعتقادى لو كان الظابط اللى اتقتل كان كل الناس عملت من السواق بطل قومى اصله قل ظابط مرور
بيقولوا محاسين انهم بيتعاملوا بدونية
اللى استنتجته من خلال الردود ان الشعب هو اللى حاسس بالدونية
وزى ما قالت فرنسا المفروض قبل ما نصدر احكام نعرف حقيقة الموضوع
الناس ناقصها ثقافة الوعى والادراك
طبعا ردك فيه الخلاصة
مودتى
‏قال Desert cat
Heart Beat
حبيبتى ردك الاخير ده اللى هو علشان شكل اجتماعى او حد بهدله مينطبقش على الظباط لانهم من الطبيعى بيكونوا ولاد ناس
ومعنى انهم ولاد ناس يعنى شكلهم الاجتماعى كويس
ده قبل ما بيدخل الاكاديمية بيتهرى كشوفات وفحوصات ده غير فى حاجه اسمها كشف هيئة وده بيجى فيه الجد السابع عشر
يعنى هو اصلا داخل الاكاديمية بشكل اجتماعى كويس جدا ولو كان اصلا دخل قسم شرطة او ارتكب اى حاجه مخله مكانش دخل الاكاديمية من اساسه
مودتى
‏قال Heart Beat
تصدقي عندك حق فعلا

حكاية الشكل الاجتماعي دي مش لايقه خالص

هما فعلا بيكونوا داخلين كلية الشرطة بعد مجموعة كبيرة من كشوف الهيئة

طيب لما هما كويسين كده اجتماعيا يعني

ليه بس كتير منهم بيستقوا علينا بعد كده

المهم سيبك انتي .... اكيد هايكون عندك الخبر اليقين اصل انا مابحبش اني اعرف الاخبار دي الا من مصادر مؤكدة لاني زهقت بقى من الجرايد و كلمة سمعت او بيقولوا لك ان .....

و هانستنى نعرف اذا في اخبار عندك عن الحقيقة و لا شيء غير الحقيقة
‏قال Desert cat
شاب نفسه يحقق حلمه
الظابط مزاجه يحطه فى الحبس على اساس ان بينهم تار بايت
يعنى هو مش كان متهم فى اى حاجه
ولا المفروض انه يتحجز لما يتعرض على النيابة
لكن الظابط مصدق يشوف واحد ماشى فى حاله وبدون اى اسباب راح جابه حاجزة
‏قال Desert cat
Heart Beat
ما انا مش بدافع على اللى بيستقووا بعد كدا
انا فى كلامى قولت المفروض رجل الشرطة يعرف واجباته وياديها والمواطن العادى يعرف اللى ليه من اللى عليه ويعمله
لو الشرطى اخطأ ياخد جزاؤه ولو المواطن اخطأ يتحاسب
لكن تعملى ايه فى كل واحد عايز يظهر شوية تلاقيه عمال يرزع ويقولك اصلهم وفصلهم
بدون اى علم او دراية
المهم انهم يقولوا بنتكلم فى حق
حق ايه وانت بتنكر جهد وتعب واحد علشان واحد تانى استغل سلطته بشكل خاطئ
اللى حصل عندنا لو سمعت اى اخبار من الطبيعى انى هنشرها
تحياتى
القرع لما إستوى قال للخيار يا لوبيا

الاخت نو نو إيه حنية القلب الزيادة اللى نزلت عليكى مرة واحدة دى

عشنا وشوفنا الشرطة بقى ليها صوت فى وسط المدونين
‏قال Desert cat
عبدالرحمن فارس
ردا على كيلو القرع اللى انت داخل عليا بيه
هقولك الكتوكوت مش بيعرف يكدب على الفرخة اصل هى اللى فاقساه
علشان كدا ظباط الشرطة حيفضلوا طول عمرهم سد فى طريق اللى يفكر يخترق القانون
وبالمناسبة حنية قلبى مش غريبة فى للناس الشرفاء واللى فى طريق الحق
مش اللى بيوزعوا منشورات
وبيتهموا الناس بباطل
واللى يخلى لكدابين الزفة صوت بين المدونين
يبقى من الاولى يكون لظباط الشرطة صوت
‏قال Tamer silit
بالتأكيد لكل قاعدة شواذ

لكن ماذا عندما يصبح الشذوذهو القاعدة فعلا

بالتأكيد كل ما قاله الرجل وجهة نظر صحيحة

لكن ايضا هذا لا يعطى الحق لائ شرطى انت يتعامل كما يريد مع اى انسان وكانه فوق القانون او المحاسبة

لا يعطيه الحق ان يتخذ قرار بايقاف اى شخص واتخاذ اجراء دون ان تكون هناك تفسيرات لهذا الاجراء

عامة من الطبيعى ان نصل لهذه النقطة وهذا التفكير وهذه الافعال بعد 25 عاما من قانون الطوارئ كانت السلطة المطلقةفيها لجهاز الشرطة
‏قال Empress appy
جبت اسم الراجل اللى محجوز دلوقتى علشان هو اللى ضرب الطوبه وجت فى السواق ومش بيجامل الظابط علشان محدش يقولى بيجامله الخناقه اتحولت بين الراجل ده والسواق ومحدش بيكون قصده يقتل وانتى فى مكان عارفه الخناقات لما تقوم تكون عامله ازاى وابقى شوفى جريده عيون الشرقيه يوم 1/1 ولسه فيه خناقه عندكم ميت فيها اتنين صح ولا انا غلطانه بس والله ما رحت تانى لما اروح هقولك وبعدين انا اصلا نصى المنصورة والتانى العريش يعنى متبهدله بين المحافظات لما اروح المنصورة هعدى عليكى وعلشان خاطرك انزلك مخصوص بس 2 لتر بنزين الله يخليكى وعلى فكرة الظابط جرى وراء السواق لما خبط القرطاس ومشى بالعربيه بتاعت المرور مكنش عامل الكمين يعنى قدام المحجر فهمتى واسالى فى القسم ولو حصلك حاجه هناك اوعى تكلمينى واسألى فى المحجر بس ده ممكن تكلمينى ههههههههه
ماشي أنا ممكن أفترض إن أغلبية ضباط الشرطة كويسين
بس لما يبقى فيه السنة دي بس طبقاً لتقارير مركزي هشام مبارك و النديم لحقوق الإنسان أكتر من 400 قضية تعذيب و تعويض ضد التعذيب
و 20 حالة تعذيب منهم ماتت
يبقى ده عدد يخوف
صحيح عدد ضباط و أفراد الشرطة طبقاً لآخر تعداد معلن هو 550 ألف ضابط و صف ضابط و جندي
بالإضافة لـ 550 ألف أمن مركزي
يعني لو حسبنا الـ 400 قضية بالنسبة للمليون و ميت ألف دول كلهم مش حتطلع حاجة بس برضه عدد 400 كبير و يخوف
‏قال Desert cat
تامر سليط
انا متفقة معاك ان مش علشان ظابط يمارس مهامة بقتل الناس
والمفروض انه من قتل يقتل
لاننا مش فى غابة وسلطته مش يدله الحق يتحكم فى حياة البنى ادمين
بس فى الحالة دى احنا حكمنا على الظابط من غير منعرف ايه ملابسات الموضوع
وفى النهاية طلع القاتل شخص كان واقف فى مسرح الجريمة
هو الظابط هيقتل بحجر على اساس انهم كانوا بيلعبوا عسكر وحرامية
تحياتى
‏قال Desert cat
appy
حلو اوى موضوع الراجل يجامل الظابط
انا اسمع انه ممكن يجامل الظابط يعزمه على كوباية شاى
على غدا
يوصله مكان
انما يتحمل عنه جريمة قتل
ليه يعنى ده لو الظابط ده ابنه مش هيعمل كدا
طبعا مينفعش حد يقول ان الراجل ده بيجامل الظابط اصلها مش جاية خالص
المهم انتى تشرقينى فى اى وقت واناهعتبر ده وعد
ومتخافيش على البنزين هجيبلك 3 لتر مش اتنين بس
مودتى
‏قال Desert cat
مهندس مصري
انا مش ممانعه يا فندم اننا نتكلم عن التعذيب وكمان نهاجم اللى بيعذبوا
انما مينفعش اساوى مثلا المتناوى باسلام ونبيه ولا هبقى انا كدا ظالمة ومش بدور على حق
بالشكل ده هتكون المسالة تار ومحتاجه اصفيه لانى مش شايفه فيهم اى حد شريف
انا علشان اهاجم يبقى من حقى اهاجم اللى ارتكب الجريمة مش اللى كل اللى بيشتغل ظابط يبقى منحرف وسادى
دمت بود
موضوع الشرطة واللى بيحصل من الظباط ده لازم نقف كلنا قدامه والموضوع مش حاله فردية ده نظام ماشى وكتير من الظباط بيستخدموا التعذيب وكتير من روئساء الظباط دول عارفين ان دة بيحصل فى الاقسام بتاعتهم وموافقين على كده
احنا حاطين فى دمغنا ان المفروض الظابط يبقى عنيف وجامد من كتر تعامله مع المجرمين بس ده مش مبرر للتعذيب لان هو مش مسمحله حتى يعذب المجرم تخيلى ده يعنى لو قبض على واحد مثلا قاتل او واحد اغتصب طفلة فى افظع من كده المفروض الظابط يقبض عليه ويسلمه للنيابه من غير ما يعذبه ولا يلمسه حتى لان دى مش شغلته تصورى ده اللى المفروض يتعمل مع المجرمين يبقى ايه اللى يتعمل مع الناس العاديه
اسف لو طولت عليكى
‏قال Desert cat
حــدوتـــة
حضرتك فهمت من البوست انى موافقه لى التعذيب وانى بشجع الظابط اللى بيعذب
ده اللى حسيته من الرد بتاع حضرتك انا رافضه التعذيب عموما وقولت وكررت فى البوست ان اللى بيعذب المفروض انه يتحاكم
وزى احنا من حقنا نحاكمهم من حقنا منجمعش كل جهاز الشرطة فى سلة واحده ونقعد نشتم فيهم ونعدد فى مساؤهم
انا بقول المحترم نحترمه ونقف قصاد اى اساءه تتوجه له
واللى بيستغل سلطته او يخترق القانون يتحاسب
احنا كمان لينا واجبات من المفروض اننا نتبعها ومنتعدهاش
ومش اروح اتاجر فى المخدرات ولما يتقبض عليا اقول اصل الظابط ابن ستين فى سبعين ده بيلفق تهم او بيعذب
احنا محتاجين نعرف احنا واجبنا ايه ونتعامل معاهم ويتعاملوا معانا ازاى
تحياتى
‏قال د/اجدع بنوته
سيبك انتى اول حاجه عرفتا انك م الشرقيه

بلدياتى يعنى .. وده شرف كبير ليا

الموضوع وبالرغم م انى م نفس بلدك اهو مسمعتش اى حاجه عن الموضوع ده

واضح التكتيم عامل عمايله اوى

الموضوع نفسه .. لا انا مش معاكى اوك الظابط بيتعب
وبيحميك وبيقف ف البد وانت نايم وكل ده

بس سورى دول مفروض يكونوا اكتر ناس عندهم ثبات انفعالى يعنى

مش يجى يستجوبه ميرضاش المجرم يتكلم

يروح الظابط منفعل ويخليه يعترف باى طريقه بقى

مادى زى دى

مهما السواق كان قاله مش مبرر انه يقتله يعنى

مش مبرر خالص خالص كمان

ربنا يرحم الراجل بقى ويكون الظابط ده خد عقاب اللى عمله ده

ولو انى اشك
‏قال Desert cat
د/اجدع بنوته
لا حول ولا قوة الا بالله
ههههههههههههه
هو انتى شيفانى داخله اسقف للظابط اللى قتل السواق
ولا بشجع اللى بيعذب
يا حبيبتى راجعى البوست كويس
هتلاقينى بقول كل واحد ليه حقوق وعليه واجبات
يعنى لو كل واحد نفذ اللى مطلوب منه كنا بقينا فى غنى عن كل الهرج والمرج ده
فى النهاية كلنا بشر
والمفروض ان مفيش حد فوق القانون
مش اجيب شوية قطاعين طرق واتعاطف معاهم
واقول اصل الظابط يبقى سفاح المعادى

مودتى
‏قال MerMaid
عزيزتي قطة الصحراء

لا أري من جانبك سوي تعصب لرجال الشرطة الكرام العظام اللي ولا بيعبروا حد ولا بتاخدي منهم حق ولا باطل ...
ده اولا
ثانيا انا بعذرك

لان حوالي نصف ظباط الشرطة من محافظة الشرقية ..وواضح ان حضرتك لكي صلة وطيدة بأحد منهم ...والله أعلم
انا قرات البوست و أقدر وجهة نظرك و لكن أيضا كما ذكر الاخوة اللي علقوا قبلي انه ده مش سبب يستحق علشانه الراجل القتل ...و بعدين هو فين القانون اللي بيحاسب الظباط دول؟؟
اسلام نبيه ؟؟اللي هتك عرض عمادالكبير و اخد تلات سنين سجن
و كمان في نقض و طعن و استئناف؟؟
اولا مصر لا يوجد بها عدالة سوي للكبار اللي اكلين البلد
ثانيا فيها وسطات وكوسة علي حساب القانون ...
ثالثا ..انا مش مهم عندي الظابط كويس ولا وحش ولا مريض نفسي ولا نيلة
انا المهم عندي و عند باقي الناس انهم يعاملونا كبني ادمين
و بعدين انتي بتشوفي ان الظباط بيعاملوا الناس الغلابة معاملة كويسة؟؟
والله انا اكاد أجزم انهم ولا بيعبروهم
بدليل الحملات اللي طول النهار بتشيل الناس بياعين السوق الغلابة من السوق
وقال ايه بينضفوا البلد
و لما ينزلوا يقفلوا محلات الدواجن ؟؟
ليه؟؟ خايفين علينا من الانفلونزا؟؟
يعني هو الظابط والداخلية مقاطعين الفراخ؟؟
لا طبعا ....دي كلها سياسات تصب في النهاية لمصلحة الكبار اللي اكلينها والعة
و الحقيقة معلش متزعليش من المدونين اللي علقوا عندك ...لاني حسيت انك اتضايقتي
لكن صدقيني حاجة تحرق الدم والله
وانتي عارفة اللي مالوش ظهر بينضرب علي بطنه
و احنا ناس غلابة ملناش ظهر في البلد دي
البلد دي بتاعة اللي عندهم واسطة و فلوس و امين شرطة
----------------------
فكرتيني اقولك علي امناء الشرطة اللي واخدين معهد معرفش فين اراضيه و بيطلعوا عين اي واحد مواطن غلبان علشان ياخدوا منه جوز جنيهات
----------------------
انتي بتتكلمي عن شعب تاني يمكن
مش علي الفئة المطحونة من الشعب اللي بيروحلها اي ظابط ياخد ميكروباص يلف بيه علي البلاد يجيب اللي عليهم احكام
------------------------
انا والله لا أقصد مهاجمتك ابدا لكن ده اللي جوايا بجد و من قرفي من اللي بشوفه
---------------------
كل سنة وانتي طيبة
متزعليش من كلامي ارجوكي
:))
‏قال MerMaid
عفوا

اطلت عليكي و عدت مرة أخري

انا فاهمة من البداية ان انتي عاوزة ان احنا نخترم الظابط سواء بقي كان كويس ولا وحش طالما في الخر بنروح نجري عليه و نشتكي له

الحقيقة انتي موضحتيش كدة في البوست كويس

و اعتقد ان الباقيين مفهموش كويس زيي
-------------
يمكن يكونوا الظباط دول ليهم حياة ادمية عادية زينا كدة
لكنهم بيتعاملوا في شغلهم معاملات سيئة مع الناس الغلابة

و اكيد مش محتاجة امثلة يعني
:)))
‏قال Desert cat
MerMaid
اولا انا مش زعلانه من الناس اللى علقت عندى ولا حاجه
الناس دى شرفتنى ورأيهم على عينى وراسى من فوق
ثانيا لو نص ظباط الشرقية من محافظة الشرقية زى ما حضرتك ذكرتى يبقى كويس جدا ان بلدنا هى اساس امن البلد وحاجه افتخر بيها
ثالثا انا لو ليا علاقة بحد فيهم ما اعتقدش ان دى تهمه يحاسب عليها القانون
طبعا حضرتك بتتكلمى بعصبية انا مش عارفه ايه الداعى ليها

ثم من امتا ظباط الشرطة بيروحوا اسواق وبيهاجموا الناس اللى بتبيع امال هى اسمها اسواق ليه .. فى فرق بين يبقى فى بياع فى سوق وبين ان بياع يجى فى وسط شارع نضيف مخصص لمرور الناس والعربيات ويفرش ويقعد يبيع .. ولا تحبى البلد كلها تبقى سوق ... انا مش موافقه انه يضرب اللى مخالف القانون لكن مينفعش انه يسيب البلد سايب فى السايب اللى عايز يبيع فى قلب شارع يتفضل واللى عايز يسرق براحته ...
وبرضه مش شايفه غلط لما ياخد ميكروباص وينزل يجيب اللى عليهم احكام .. والله دى تبقى شهاده فى صالحه انه راجل شايف شغله وبيجيب الخارجين عن القانون والمحكوم عليهم غيابى علشان ينفذوا الاحكام اللى عليهم ...
شرفتى المدونة
‏قال Desert cat
MerMaid
بالنسبة لردك انى عايزاكى تحترمى الظابط سواء كويس او وحش طبعا رايك غلط
انا فرقت بين مين اللى يستحق الاحترام ومين ميستحقوش
ثانيا مش ده المقصود من البوست فعلا زى ما انتى فهمتى بالظبط يعنى مش سهو منى انى موضحتش
لانه من الطبيعى انسان محترم مش محتاج انى اقول هما محترمين من عدمه
انما المقصود اننا بشر واننا مش زى بعض
زى ممكن تلاقى عندك جار نصاب ومرتشى .. ممكن فى نفس العمارة تلاقى جار تانى مثال للأخلاق
سعيدة بردك

المشاركات الشائعة