يسقط التعليم .... ومرحبا بالأمية

لما يتفضل ويتكرم علينا الإعلام بحل مشكلة البطالة بإعلان زى اللى بيبهرنا بيه من وقت للتانى دون حياء او حفظ لماء الوجه ...
لما الدولة تخلى مسؤليتها وتقول للطلبة سيبكو من التعليم والكتب والجامعات وكل واحد يتعلم له حرفة تنفعه واهو يجمع منها القرشينات اللى حيتجوز ويفتح بيت بيها بلا تعليم بلا ثقافة بلا ارف ....
لما أحلام الولاد والبنات المصريين تترسخ فى الفلوس والزواج معلشى يعنى يا حضرات المسؤلين على هذه المهزلة الإعلامية ده إسمه إلغاء لفكر الملايين من الشباب وتكسير لطموحات من لهم طموح فى تحقيق حلم انه يكون عالم او خبير فى مجال ما ...
ممكن اعرف مين اللى اداكو الحق تتكلموا بلسان كل الشباب وتحددوا لهم طموحاتهم اللى تتمثل فى حرفة وكام ملطوش وبنت يتجوزها
يا حضرات المسؤلين على هذا الإعلان اللى بيصور الشاب خريج الجامعة فاته القطر وأنه لا لاقى شغل ولا عارف يتجوز والولد الصنايعى الكسيب اتجوز ومعاه شوية قرشينات ... متناسين يعنى أيه طبقة علماء ومثقفين مع إحترامى طبعا للحرفيين وأكيد ان الثقافة مش بالتعليم الجامعى لكنه ضرورة لابد منها ...
لو تناسينا دور الجامعات المصرية فلو زال حتى يومنا هذا حيا الملك عبدالعزيز لكان ذكرنا
وعجبى على دى بلد ...
ولا يمكن علشان الحال أتبدل والسيدة وزيرة القوى العاملة تحمل الشهادة الإعدادية فأصبحت مقياس ومثال يحتذى به ... أليست الست الوزيرة المثقفه من تعاقدت لتسفير بنات مصر خريجين الجامعات للعمل كخادمات للسعودية وكانها تطلع لهم لسانها وتقول انا وزيرة بالاعدادية اما انتوا خدامين بمؤهل جامعى ....
لو كانت تحمل مؤهل كان اصبح ده تفكيرها ..... وخير دليل على ثقافتها وحسن إداراتها للوزارة مشاكل العمال اللى مبتنتهيش وعمال المحلة ليسوا ببعيد
بعد ما كنا بنسال الطفل الصغير نفسك تطلع ايه ياحبيبى لما تكبر ويقولك دكتور ولا مهندس
مش تتعجب ولا تندهش دلوقتى لما تسأله ويقولك نجار قد الدنيا ... مع احترامى
السيد المسئول عن هذا الإعلان المهزلة بكل ما يحمله من معانى بالله عليك كفى واحفظ لنا شئ من الكرامة مصر فيها شباب وعقليات مش كل همها تتجوز وتكسب فلوس ...
مصر فيها شباب مثلهم الاعلى زويل والباز
ولا مصر اللى خرجتهم مش هتخرج عقول غيرهم ؟؟
مصر فيها شباب مثلهم الاعلى نجيب محفوظ والمنفلوطى
ولا ده كان زمن وولى ؟؟
مصر اللى اى مطرب عربى او مطربة عرى بتحب تنشهر بتيجى مصر ترعاها
اولى بيها ترعى عقول ولادها وتنميها
مصر اللى بتصرف مليارات على لاعبى الكورة ومهرجانات لا تثمن ولا تغنى من جوع
اولى بيها تفيد شبابها .... كنت زمان بسمع ان التعليم هو سلاح المستقبل
دلوقتى الحرفة هى السيد السائد فى المجتمع
وليذهب العلم والعلماء الى الجحيم
فمرحبا بالحرف اليدوية والف اهلا وسهلا بالامية

Comments

oceaneyes said…
يا سبحان الله

ايه اللى بيحصل وبيجرالنا ده ؟؟؟؟

بجد احنا بقينا حاجة تكسف اوى ..دلوقتى العيل اللى بيتولد بيبقا شايل هم نفسه يمكن كمان من قبل ما يجى للدنيا دى ..فى البلد دى

...

كل تفكير الشباب دلوقتى ..الوظيفة والبيت اللى هايفتحه ..واللى هايتجوزها

ده حتى البنات ..قليل اوى اللى تلاقيهم بيفكروا فى المستقبل والدراسة والثقافة

...

واصلا من زمان ووزارة التربية والتعليم فى الانعاش ...ومش هاقول انها بين الحياة والموت لانها دخلت فى غيبوبة طويلة اوووووووووووووى من زمان

وشكلها مش هاتطلع من الغيبوبة دى


وبعدين ما هى خربانة خربانة


فرقت فى ايه بقا


؟؟؟؟؟
انت تقصدى تقولى إن الحكومة ما عندهاش خطة حقيقية لتوظيف الشباب؟؟

و تقصدى تقولى إن الحكومة مش مهتمة بينا و لا بمصالحنا ؟؟

انت تقصدى إن الحكومة بتعمل اعلانين تلاتة سد خانة عشان ضميرها (اللى مش موجود) ما يوجعهاش ؟؟

انت تقصدى تقولى إن الحكومة خنقت المواهب و هجرت خيرة أبناء البلد لبرة ؟؟


تقصدى تقولى إن الناس يئست من العيشة فى البلد لدرجة إن المخاطرة بالغرق فى البحر بقت أهون عليهم من العيشة هنا ؟؟

انت لو تقصدى الكلام دة يا هريرة يبقى أنا هابلغ عنك أمن الدولة ييجوا يبوظوا ليكى الجاك بتاع روتر الإنترنت من عندك عشان ما تنشريش كلام خطير زى دة

لأنك كدة هاتخلينا نفقد الثقة فى حكومتنا حبيبتنا اللى بتجيبلنا اللحمة البتلو و هاتخلينا نقول عليها حكومة وحشة مش قد المسئولية

و قد أزمر من بنجر
مهى الحكومه عايزة كدة
مش عايزة يبقى فيه حد متعلم
كفايه اوى ان الواحد يعرف يفك الخط
عشان محدش يعرف حاجه ويفضل كل شويه يوجع دمغهم
وكمان عشان لما يقولوا حاجه
الشعب يصدقهم لانهم ميعرفوش حاجه

الحكومه دى غريبه اوى
لسه فاكرة الشعب زى بتوع زمان
ميعرفوش ان الجيل الى طالع جيل عارف وفاهم ومذاكرهم وكله فى التمام
مش ناقص له غير فرصه
هى فرصه لو جت حيمسكوها بأديهم وسنانهم ومش حيسبوها
وحيعلموهم
ازاى ان المصرى ينام ينام ووقت ميصحى
اوعى وشك والبركان
بس تصدقى مزعلنى اوى الملمين الى راحوا ف اعلان محدش اساا حيتفرج عليه
والكل حيتفرج على الكليبات وييجوا عند اعلان ويغير المحطه
وحرام مهياش نقصه يعنى
البلد قربت تفلس
وحضرتهم عايشين على اننا لسه فى عصر
الفراعنه والبلد لسه بخيرها
هههه شكلهم لسه ميعرفوش انهم خلصوا على خيرها وقضوا عليها
ياله ربنا يسامحهم ويتولانا برحمته
Sola said…
hgi ya 2a7la ketaah sa7raweya fel 3alam kolo,lol
nice begeinig huh
anyway i've no idea about that commercial so i'll appriciate if u told me whats is it about
the other thing youth in egypt dont think they only think about el hash wel bango,thi sis what i find when i was in university,they only think about sex ,chating,internet ,not everybody but the majioruty,and to me i think if u wanna be somthing u'll be whatever the maltimedia say,even whatever el 7ayawan ely masek el balad say also,its the person him self
mawdo3 gamed ya so3'anan bas yaret el commercial
salaaam
e7na said…
مش عاوز حد يفكرنى بالتعليم


انا داخل هنا علشان انسى
ديزرت
مش طلعت الاعمال اليدويه حلوة والتعليم كخه واهالينا ضحكوا علينا وعلمونا ربنا يسامحهم
ابقي اقري اخر بوست عندي
هتتأكدي انه انضحك علينا
تحياتي
ديزرت
مش طلعت الاعمال اليدويه حلوة والتعليم كخه واهالينا ضحكوا علينا وعلمونا ربنا يسامحهم
ابقي اقري اخر بوست عندي
هتتأكدي انه انضحك علينا
تحياتي
Esmat said…
صباح الخربشة يا قطة
برده كده حرام عليكى طيب إستنى اجيب حبيتين بندول علشان اعرف اكلمك

بصى يا قمر اللى مسكينا دول مش بنى ادمين
معندهمش مخ
الدنيا كلها عندها نظام واهداف إلا إحنا
الريس قال فى برنامجه الانتحابى إنه حيشغل الشباب- الوزراء إحتاروا
وسألوا هوه حدد حيشغلهم إيه؟
ردوا عليهم وزراء تانييين قالوا لا
أوم إيه قالوا حنحطوهم فى اى حتة المهم إن أخر السنة نقول شغلنا كذا الف قولى كذا مليون شاب
مش مشكلة نوع تعليمهم ولا شغلتهم
فهمتى حاجة علشان انا مش فاهمة

وإدعى لى يا قططتنا الجميلة مسافرة الجمعة بالليل
وإيه متوترة جدا جدا
سلام يا قمر ويا رب ديما فى خير
Esmat said…
اه يا حبى نسيت
التاج إنشاء الله لما ارجع حشيله على طول
و ربنا ما يحرمنى منك ولا من تاجاتك
وسلام كبيير ليكى
osama said…
قد يصاب الانسان بحيرة امام امر ما .. قد يصاب بثورة .. بتبلد حتى بلا مبالاة .. اما ان يصاب بحالة من هؤلاء جميعا في ذات الوقت فهو امر غريب والأغرب ان تشعر أنك لم تر الاعلان لا لضعف في بصرك ولا حتى في بصيرتك ولكن لأن اللاوعي والوعي معاً عجزا عن ترجمة المشهد ...
هل تصلح هذه الحالة التي انا عليها لترجمه شعور ما...
دمت بكل ود..
خالص تحياتي
Desert cat said…
oceaneyes
هحكى لك حاجه حلوة اوى
ابن اخويا عنده سنتين
ومامتى ومامته كانوا قال ايه بيتكلموا هيدخل الحضانة امتا يمكن يهدى شوية اصله شقى
كان ردى عليهم انتوا تصبروا على الواد لما يكمل الخمس سنين بعد كدا تشوفوا له سباك ولا ميكانيكى يشتغل عنده
ال دى توجيهات الحكومة الرشيدة لينا
على رايك خربانه خربانه
مودتى
Desert cat said…
ابن حـجـر الـعـسـقـلانـى
الا هو لسه فى حكومة فى البلد يا فندم
يعنى الناس اللى قاعده على كراسى وباصه علينا من فوق عايز تفهمنى انهم مشغولين بينا
عايز تفهمنى انهم مش قاعدين لتحقيق اغراضهم ومطامعهم الشخصية
وازاى ولادهم يكونوا افضل ناس ويتعلموا فى مدارس لغات ويكملوا فى الجامعة الامريكية
علشان الشعب كله يبقا خدام سيادتهم
الناس دى لو شالغه نفسها او بتفكر ربع ساعه بس فى اليوم فى الشعب او عندها خطة
مكانوش فكروا مجرد التفكير فى اعلان سيكوباتى زى ده
يدل على مدى تخلف وجهل وغباء صاحب
فكرته
تحياتى
Desert cat said…
رئيس جمهورية كمورا مورا
هو اساسا تعليمهم مبقالش اى لزوم
بس بدل ما يفكروا فى الشعب ومستقبل الشباب
بدل ما يعملوا اعلانات توعية لمحو الامية
اصبحوا بيهدوا كل حاجه فى البلد
المستقبل والشباب وبيدعونا للتخلف والامية
تحياتى
Desert cat said…
Sola
hi dear
ma7o el7yawan ely mask elbalad how elly fdmr feaha o fe shbabha
lna allah
ma7bty
Desert cat said…
e7na
هما جابوا لنا حل احسن للنسيان
البلد مليانه بانجو
تحياتى
Desert cat said…
بنت القمر
انا لسه جاية من عندك يا حبيبتشى ودموعى مغرقه خدى
الله يسامحهم اهالينا
كنا طلعنا خدامين بمرتب 2000 جنيه فى الشهر
ده احنا لعنا ظالمين الحكومة واتارى همهم مصلحتنا
اعاااااااا
محبتى
Desert cat said…
Esmat
حبيبتى انتى عايزياهم يشغلوا نفسهم ويقعدوا يفكروا ويخططوا ويحطوا اهداف علشان شوية رعاع زينا
مش كفاية مستحميلنا فى عزبتهم كمان بنطلب منهم تعليم
ده احنا شعب مفترى صحيح
ان شاء الله توصلى مصر بالف سلامة
مصر هتنور بيكى وباسرتك الجميلة
وكل سنة وانتوا طيبين وفى اسعد حال
ابقى طمنينى لما توصى بالسلامة يا حبيبتى
محبتى
Desert cat said…
osama
للاسف ده واقعنا المرير
اصبحت تنتابنا حالات يصعب تعريفها فى الطب النفسى
بدأو ببث الجبن فينا بفتح معتقلاتهم وزنازينهم
مرورا بتكميم افواهههنا
والآن محو ثقافتنا وما يمكن بداخل ذاكرتنا
حيتل وألاعيب تصعب على اكبر الشياطين
احترامى وتقديرى
Desert cat said…
Esmat
طبعا التاج هينور بيكى ان شاء الله تسافرى وترجعى بالسلامة
بوسة كبيرة اوى ليكى
DamnGirl said…
شكرا اوي على البوست دا وفشيتي خلقي
واصلا دا مش في مصر بس عشان امين التعليم عندنا ماعندوش ابتدائية اهو كتر خيرهم وحطلكم وحدا عندها اعدادية احسن من غيركو بالاخر
وفعلا الضغوطات اللي بالبلد بتخلي شبابنا يتجه لتعليم حاجة ثانية غير انه يقضي عمرو يدرس ويدرس وبالاخر يقعد تحط الحيطا يا اما ينحرف ياما يشتغل بورشة
كان اختصر الطريق من الاول وراح اشتغل بورشة اهو على الاقل كان كسب خبرة
بس حتى ولو
العلم هو العلم والعلم هو سلاح المستقبل حتى لو الزفت الحكومة حاولت تحطم طموحات الشباب فاكيد مش رح تنكسر
وشكرا الك على البوست
Fantasia said…
yaah ya cat, danty tele3ty moftaresa awi.. danty bahdelty el7okooma kolaha w elli 3amalo el2e3lan w elset elwazeera elmokaf7ah. sharakteehom 7'ales :)
bossy ana mafeesh 7ad mo3ared 2addy.. ana she3ary f el7ayah "ana 2a3tared". bas lel7a2 ya desert cat elmawdoo3 dah maloosh da3wa b elnas elli gebty serethom f elpost bta3ek.
ya3ni elbatalah waqe3 w mawgooda. homa m2aloosh l7ad seeb wazeftak w ta3ala eshta3'al 3amel.. homa by2olo lelli 2a3ed 3al 2ahwa w elli 2ahloh lessa byesrefo 3aleeh. w dol mo3zamhom mo2ahelat motawasetah, aw 7'ereegeen ma3ahed 3alyah, aw 7'ereegeen game3at fi ta7'asosat mafeesh leeha talab fi soo2 el3mal, w elli mt7'arageen bta2deer ma2bool menhom kaman.
lazem elnas di teshta3'al ay 7aga badal el2a3da f elbeet aw elmoot f elba7r. da wad3 mawgood mesh homa elli wagadooh.
f elne7ya eltanya elmasane3 elli btefte7 di 3ayza 3emala w mesh la2ya.. y2felooha ba2a 3alashan kol wa7ed 3amel beeh w howa mesh la2y yakol? tayeb yesha3'alo elmasane3 di l3'ayet m yela2o sho3'l tani. wala yeb2a moot w 7'arab dyar?
ama elset elwazeera 3eisha 3abd elhadi, f hya malhash zanb en ra2ees elwezara e7'tarha tkoon wazeera. hya malha? homa 3arfeen enha ma3ahash 3'eer el2e3dadyah, w ma3 zalek e7'tarooha mn been nas kteer awi ma3ahom doktorah. kanet terfod ba2a elwezara w t2olohom la2a, ana asly ma3a e3dadya? w ba3deen beeny w beenek, el2e3dadya el2adeema bta3et elwazeera, a7san mn elbakalryoos bta3 delwa2ty. adeeky enty shayfa 7al elta3leem ahoh.
w mawdoo3 el7'adamat da bardo malhash da3wa beeh. el7'adamat dol byroo7o kedda kedda yeshta3'alo f elso3oodya, laken makanshy leehom ay 7o2oo2 henak. byroo7o bardo 3alashan elfa2r w 3adam wogood forset 3amal fi masr.. ya3ni mesh hya elli 2aletlohom ta3alo asha3'alkom henak. kol elli 7asal enha 3amalet etfa2 been elwezarah w been elgehah elli mas2oola 3an el3emala f elso3odyah 3ala 7o2oo2 wad7a lelbanat elsha3'alat elli byeshta3'alo henak, 3alashan el7okooma elso3oodya teb2a moltazimah b mora3at 7o2oo2 elsha3'alat dol.
mawdoo3 el2edrabat bardo malhash da3wa beeh.. hya malha? di syasaya ektesadyah 3ama leldawla, ma7toota mn seneen 2abl hya mtet3ayen. eldawla btbee3 sharekat w masane3 elqeta3 el3am, w el2darah elgdeeda elli btemsek elmasane3 di btzaha2 el3omal 3alashan yemsho.. leeh? 3alashan enty 3arfa en elqeta3 el3am feeh 3emala zayda. ya3ni elmakanah elwa7da f elmasna3 wa2ef 3aleeha 5 bysha3'alooha.. w ya reet bysha3'alooha kowyess. maho mal el7okooma ba2a. 3alashan kedda masane3 kteer 7'esret. laken lama elmasane3 di 2eshtaraha elqeta3 el7'as kan lazem yshoof 7al f el3emala elzyada, ya 2ema hye7'sar. nafs elmawdoo3 fi elmasane3 elli lessa htetba3.. el3emala elzyada bt7'awef elmostasmer elli gy yeshtery, 7'osoosan enoh byeshtery elmasna3 b el3omal elli feeh.
ya3ni di moshkella taba3 wezaret el2estesmar aslan, w mashroo3 el7'as7'asah. 3eesha malhash da3wa b el2edrab elli el3omal bye3meloh. laken bt7awel 3ala 2ad mte2dar tela2y 7olool towafa2 been el3omal w el2edarah. l2nha mas2oola 3an el3omal, laken hya malhash da3wa en elbalad btbee3 elmasane3 elli byeshta3'alo feeha el3omal dol.
argo ykoon elmawdoo3 wade7 delwa2ty. asl ana se3bet 3alaya elwazeera elsara7a. ya3ni ahlaha tala3ooha mn elmadrasa, w elset eshta3'alet bardo, w kaf7et l3'ayet m e7'tarooha wazeera. 7aram ntarya2 3aleeha 3alashan m3ahash 3'eer el2e3dadyah. w ma3a zalek elset bardo m3amaletshy 7aga 3'alat fi sho3'laha. 7'effy 7'arabeeshek 3aleeha showya ya cat alla yekremek. t7yaty ya 2amar.
انتي لسة قاعدة هنا عاملالي فيها زعيمة بلوجريات مصر

بطلي دلع و قومي اشتغلي قبل القطر مايفوتك

كفاية قطر واحد هيفوتنا كلنا " الزواج " لازم نلحق قطر الشغل

ليا ملاحظة

ماحدش لاحظ ان القطر اللي في الاعلان موش في مصر اصلا و شكله غريب؟؟؟؟؟؟؟؟؟

المهم يللا يا بلوجر انت و هو و هيه كل حي يمسك التليفون و هيلاقي البشغل كله تحت رجله

قريبا جدا ملك الكبدة يطلق خدمة منافسة

اتصل بملك الكبدة يجيبلك فلوس على طول من غير شغل ولا قطر و لا كلام فاضي و اللي فاته قطر الشغل ياخد قطر ملك الكبدة
محمد الجرايحى said…
الشباب هم نصف الحاضر وكل المستبقل
هذه العبارة هى الشعار الذى تتمثله كل الأمم المتحضرة
والتى تعرف تمام المعرفة أن قوتها فى قوة شبابها
لذلك لاتبخل عليهم وتجعل منهم بؤرة اهتماماتها
فى صناعة المستقبل تبدأ بصناعة الشباب

أما هنا فى مصر الشباب هم آخر من تفكر فيه الحكومة إذا فكرت

لأن لديها أمور أخر أهم ولها الأولوية
تأمين كراسيها.. تأمين مستقبل الأبناء والأحفاد
جمع أكبر رصيد ممكن بالبنوك
وأكل أكبر جزء ممكن من الكعكة

وليذهب الجميع إلى ......

محمد الجرايحى
مدونة الرسالة
http://mmm1962.jeeran.com/
Desert cat said…
DamnGirl
يعنى دور الحكومات العربية اصبح مقصور على توجيه الشعب للعمل فى اى مجال
ومش مهم خلق جيل ثقافى
ومش مهم شباب حماة المستقبل
ومش مهم اى حاجه
المهم الكرسى ولا شئ بعد الكرسى
والله حالنا بقى صعب جدا
مودتى
Desert cat said…
Fantasia
ايه ده يا جميل
هى كل الحكومة مالها ومش ذنبها
امال ذنب مين
ذنبنا احنا الشعب المفترى اللى ربنا هيدخله النار علشان بنفترى على حكومتنا العاقلة اللى موفرة لنا العيشة المستريحة واحنا بنتبطر عليهم
الحكومة مش قالت نسيب التعليم ونروح نشتغل ... تفسرى بايه قعده الشاب الجامعى اللى ايده على خده والقطر فاته ...
هو انتى شوفتى الاعلان ؟؟؟
اصل لو شوفتيه كنتى قدرتى تحلليه وعرفتى ابعاده ..
سيادة الوزيرة حاملة الشهادة الاعدادية اللى من وجهة نظرك افضل من بكالريوس دلوقتى .. طيب ازاى هل لو اللى فى مكانها حامل مؤهل عالى وعنده ثقافة فن الادارة كان بقى فى المشاكل دى كلها مش كان زمان ليه خططه واهدافه ... بس على كلامك من ناحية افضل فهى افضل بصراحة لانها بقت وزيرة انما حامل البكالوريوس عواطلى قد الدنيا ... وازاى يا جميل ملهاش دعوة بتسفير خادمات السعودية ... هى حضرتها برضه مش وزيرة القوى العاملة والهجرة لو مش مهى المسؤله الاولى امال مين المسؤل عم عبده بتاع البطيخ ... ثم فين المصريات اللى بيروحوا يشتغلوا خدمات وحقوقهم ضايعه .. عموما المصرى حقوقه ضايعه فى كل مكان فى بلده وبره بلده ... وكان من باب اولى جابت حقوق المهندسين والدكاترة والمدرسين اللى السفارة بره مش بتعترف بيهم اصلا ولو حد جرى له حاجه وراح السفارة يقولوا له اصلك حالة فردية ... فردية مين وفوزية مين يادى النيلة مش بتشوفوا السفارات التانية لو عيل من عندهم جرى له حاجه اللى بيحصل ؟؟ ... يبقى تقولى لى بتسفر خدمات علشان تجيب حقوقهم ...
هى مالها تتعين فى الوزارة .. فى دى فعلا هى مالها اصل الكوسة اللى غرقت البلد خلت حامل الاعدادية وزير وحامل الدكتوراه غفير وعجبى .. انها الكوووووووووسه
وبرضه مالها ومال عمال المحلة
افكرك برضه بالوزارة اللى حضرتها مسؤلها عنها اسمها القوى العاملة والهجرة
يعنى العمال دول مسؤليتها ونص كمان
يا جميل ده اول شعار رفعوه عمال المحلة كان اسمه لا يا عيشه مالكيش حق لن نتنازل عن حقوقنا يا لصوص
تفتكرى هما عمال ومش عارفين مين المسؤل عنهم وكان بينددوا بيها فى شعاراتهم اصلهم بيحقدوا عليها ؟؟؟
وما شوفتيهاش فى البيت بيتك لما قالت تصريحها العظيم انه تم صرف 20 يوم للموظفين والمفروض انهم مش يطالبوا باى حاجه تانية ... لما هى مالها ومش مسؤليتها كانت بتقول التصريح العظيم ده ليه .. سد خانة بدل السيد المسؤل عنهم اصله مكانش فاضى يصرح ...... ولما الوضع زاد عن حده ونسبة الخساره تعدت ال4 مليار جنيه اجتمعت بالعمال هى والجبلى علشان يشوفوا طلباتهم ايه ... كانت بتتعب نفسها ليه وتروح تعرف مطالب العمال ... ولما هى مالها بالعمال قاعده فى الوزارة بتعمل ايه اساسا اذا كان العمال دول هما شغلتها الاساسية ...
كل الحكومة طلعوا ابرياء ..
ومش ليهم دعوة باللى بيحصل وهما مالهم ..
طيب غلاء الاسعار ايه رايك فيه ومين المسؤل عنه
والكهربا
والسلع الاساسية اللى كل يوم والتانى فى زيادة رهيبة
الحكومة مالها برضه وبنفترى عليها ...
اصلنا شعب وحش مفترى افاق
اسعدتنى مناقشتك
تحياتى يا جميل
Desert cat said…
ملك الكبدة
طب كويس والله انك هتوفر فرص عمل وتدى الشباب فلوس من غير شغل ولا تعب وموفر لهم خدمة الديلفرى كمان
ده انت محصلتش
بالنسبة لى انا بشتغل
ايوا بشتغل نفسى
هو فى احسن من كدا شغل
ربنا يتولانا
تحياتى
Desert cat said…
محمد الجرايحى
للاسف من يبحث عن التقدم والرقى
يجعل لنفسه اهداف وخطط
بيكونوا عارفين ان المستقبل يتمثلف ى الشباب لذلك بيوفروا لهم كل سبل النجاح والتقدم
للاسف
احنا امة ضحكت من جهلها الامم
تحياتى
بلد بتاعت شهادات صحيح يا قطه انتى لسه فاكره انى فى حد نفسه يطلع دكتور جامعى ولا مهندس ولا اى حاجه ليه اتجن البلد الى فيها دكتور الجامعه بياخد 3لاف جنيها شهريا فى مقابل محاضرات وابحاث والخ
وفى المقابل ماتش مكسب للاهلى ب100 الف جنيه اه والله 90 دقيقه ب 100 الف جنيه احسبى بقاء الدقيقه بكام انا لو الواد ابن اخويا او ولدى مستقبلا ان شاء الله قلى دكتور ولا مهندس ولا اعرفه عايز يطلع يا يغنى (يعنى سعد الصغير والعمده صوتهم احسن منه ) يا يلعب كوره غير كده ولا اعرفه قال تعليم قال
شفتى لو اتفتحت فى الكلام كنت حنسى ميعاد القطر تووووووووووووووت
أنونيمس said…
تصدقي بالله
الكلمتين اللي قولتيهم دول كانوا محشورين ف زوري

بس مش مشكلة ان الوزيرة معاها اعدادية المشكلة انها فاشلة سياسياً

في دول الوزرا فيها أفل تعليم من الست الوزيرة لكن لهم قدرات سياسية تخليهم أحسن من أساتذة الجامعة
وكل ميسر لما خلق له
Fantasia said…
ya cat ya moftaryah :)) tala3teeny bdafe3 3an el7okooma? howa ana 3alashan 2olt elset di malhash zanb ab2a 3agabany el7okooma bardo?
ya setty ana 2oltelek hya mas2olyetha el3omal bas, laken elsabab elli el3omal 3amalo bsababoh el2edrab malhash da3wa beeh. bernameg el7'as7'asah maloosh da3wa b elqowah el3amlah.. w elqowah el3amlah malhash da3wa b el7'sa7'asah. el3omal hykalemo meen? mafeesh 2odamhom 3'eer elwezarah elma3nyah b sh2oonhom, tab3an. laken hya elwezarah di elli kanet ba3et elmasane3 elli homa sha3'aleen feeha?
w ba3deen tani elsha3'alat byroo7o yeshta3'alo zy elmohandeseen w eldakatrah w elfawa3lyah.. kolohom tale3 3enhom 3alashan lo2met el3eesh w mesta7meleen. w 3arfeen kol elbalawy bta3et nezam elkafeel w elzeft, w bardo byroo7o. yeb2a n7awel nesa3edhom wala nesebhom yewla3o badal homa elli 3ayzeen kedda? elset kattar 7'erha ebtadet b elsha3'alat elli malhomshy ay noo3 mn el7o2oo2, w kanet bte7salohom balaway. elnas elli byeshta3'alo 3andohom kano bya7'do menhom elpasporat, w y3amloohom aswa2 mo3amla, w yemna3oohom yenzelo agazat, w sa3at kaman feeh menhom banat bytem e3'tesabhom.. ya3ni di naw3eyet mashakel aktar kteer mn elli byshoofoh doktoor aw mohandes aw 7ata farash. w koon en el2awlawyah teb2a lel3'alaba w ad3af eldo3afa2, f di 7aga to7sab lwezaret elqowah el3amla mesh 3aleeha.. ya3ni law kanet sabet elmawdoo3 zy mkan, yeb2a a7san? ana mesh fahma begad!
ya 2otety el3azeeza, elmafrood elmas2olyah taqa3 3ala as7abha el7a2ee2yeen, mesh elnas el3'alaba elli f elwesh. ya3ni kam wazeer ta3leem, w ta3leem 3ali, 7'arabo elta3leem, w homa sabab batalet el7'erigeen. w kam wazeer maleyyah 7'arab elektesad l3'ayet m elnas efta2aret w m ba2ash feeh foras 3amal. da 3'eer 3'yab elta7'teet, w elt7'abot fi et7'az elqarar, w elfashal fi 7al elmashakel 2abl estef7alha, w elhaykal el2edary elmotarahel f eldawla kolaha, w 3'yab mabda2 elsawab w el3eqab, w 3'yab elreqaba 3ala gawdet el2ada2.. w w w
yeb2a nseeb elmasayeb elsooda di kolaha w nemsek f 3eesha? hya di elli 7'arabet masr ya3ni? 3alashan esmaha 3eesha maslan? wala 3alashan set? wala 3alashan mesh medaryah wara 7ad? wala 3alashan mesh btedfa3 floos lelsa7afyeen zy m nas tanya bte3mel? wala 3alashan set malhash dahr wala wasta? wala 3alashan mesh fasda w mesh btesra2 wala bterteshy? wala 3alashan ma3aha e3dadya? wala 3alashan e7na dayman ne7eb neegi 3al 3'alban zalim aw mazloom?
ya cat 7'arbeshelna f elnas el7aramya elli 7'ado floos el3'alaba.. aw elkam wazeer elli de7ko 3aleena bshehadat myenfa3sh 7ata nbelha w neshrab mayetha.. aw btoo3 el7asanah elli ma7adesh byshoof weshohom 3'eer f el2ente7'abat.. aw elli bysharaboona mayyah molawasa tgeblena amrad eldonya.. aw elli by3'ara2o 2alafat f el3abarat w yehrabo.. aw elmasharee3 elwahmyah elli byet3emelaha da3aya b malayeen w ma7adesh yesma3 3anha 7aga ba3d kedda.. tayeb 3al 2a2al el2e3lan elli meza3alek dah bysha3'al nas begad.
t7yaty leeki ya a7la cat.
Desert cat said…
رئيس جمهوريه نفسى
كان زمان بلد بتاعة شهادات
كان زمان علشان تروح تتقدم لواحدة يقولوا لك مؤهلك ايه
دلوقتى بيتقالك تملك ايه
دلوقتى فعلا الحل هو سعد الصغير وبعرور
ولا عزاء للشهادات
تحياتى
Desert cat said…
أنونيمس
انا استدليت بالوزيرة كنموذج على عدم وعيها وقلة ثافتها سياسيا ولا يعننى ماذا تحمل من مؤهلات
تقريبا كلنا فى مركب واحد
ومش قادرين نلحقه من الغرق
تحياتى
Desert cat said…
Fantasia
عزيزتى فانتزيا
من تانى هقولك انا بلقى بمسؤلية العمال على الست الوزيرة لان ده تخصصها بالقى بمسؤلية اهانة البنات المصريات بعملهم كخادمات فى الخارج عليها لانه خير دليل على فشلها فى ادارة عملها
السيدة الوزيرة فاشلة ثقافيا اذان من الطبعى انها تكون فاشلة سياسيا
الست الوزيرة من يوم ما مسكت الوزارة وهى كلها مشاكل مبتنتهيش وانا مبلقيش اللوم عليها لانها ست
ما فى ستات كتير فى مناصب هما مؤهلين ليها وعندهم دراية بادارتها احسن من اتخن شنب
وهنروح بعيد ليه ما كانت عندنا آمال عثمان شوفى مسكت الشئون الاجتامعية اد ايه وقارنى بين المشاكل اللى حصلت لوزارتها وبين مشاكل السيدة الوزيرة عائشة وهتلاقى الناتج صفر على الشمال
عزيزتى انا مش بهاجم السيدة الوزيرة فى شخصها لانها متخصنيش شخصيا اولا هى كانت مثال باستشهد بيه ثانيا قرراتها غير منطقية ولا قوية الحجة او البنيان ... انما جميعها قرارات هامشية تشوبها المغالطات والتسفيه من قدرعقول الشباب ..
بتقولى لى علشان مش بتسرق ولا بترتشى ... لما عمال المحلة يتنهب حقهم ويتبهدلوا فى الشوارع فى صيام رمضان .. كان علشان كرمها الزيادة معاهم وحبوا يعبروا عن حبهم الشديد ؟؟؟
تانى بتقولى هى مالها ودى شركات مخصخصة كان من الاحرى انهم نددوا باسم مالك الشركة بعد الخصخصة .. كان من الاحرى انها مش تدخلت لا من قريب ولا من بعيد لسبب بسيط شئ ميخصهاش .. دى كانت ممكن تبهدلهم كمان فى المحاكام مش بيسؤا سمعتها ويقولوا واكله حقوقهم ... وكانت هتكسب بجدارة .. ده ابراهيم عيسى لما قال انه سمع ان الرئيس توفى متبهدل فى محاكم ونيابات وامن دولة ومحاكمات عسكرية وبلاوى
فما بالك بتهمة فى الشرف وهى انها مش بتدى العمال حقوقهم دى لو اتكلمت بس كانوا كلهم راحوا ورا الشمس .. ولا علشان قلبها طيب ومش مطاوعها
يا عزيزتى
التعليم بايظ وكلنا عارفين ..
الصحة متدهورة وكانا عندنا بلاوى زرقه فى جسمنا
مش نيجى بقا على مصدر الدخل كمان ونقول هى جت على الوزيرة ولا علشان واحده ست
بكررها لك تانى مش علشان واحده ست
انما علشان هى فقيرة سياسيا
معندهاش دراية بفن الادارة
محتاجين مسؤلين عندهم وعى ثقافى ووعى سياسيى والاهم وعى دينى يمكن يتقوا الله فينا
بالنسبة للاعلان وفر فرص عمل لمين ومين اللى اشتغل بسببه
ده بيقولك سيبوا التعليم وروحوا اشتغلوا
هو مجرد توجيه مش اكتر
انما مش قال فى فرص عمل يا شباب فى مصنع كذا وعنوانه كذا
او شركة كذا وصاحبة فلان الفلانى
نسيت نقطة الشغالات السعوديات
انا معاكى اننا متبهدلين داخليا وخارجيا
ومتفقة معاكى فى كل نقطة فى اللى بيحصل لشبابنا بره سواء قرف من كفيل او من غيره
لكن تفتكرى حقوقهم بترجع
السفارة بتعبرهم
مبيحصلش
يقا لما تروح لهم خادمة تقولهم صاحب البيت اغتصبنى او ابنه ده مش بعيده اللى بيتلقى شكوتها يغتصبها هو كمان
يا عزيزتى للاسف احنا محتاجين مسؤلين يراعونا ويتقوا الله فينا
لعل وعسى نلحق جزء من حقوقنا
مودتى يا جميل
لا حول و لا قوة إلا بالله
بقى النت يقطع عندي يوم واحد بس فأتكحور في الآخر كده
حبايبك كتير يا ستي و تعليقاتهم أكتر

إنتي عمالة طول البوست تطلعي إشاعة على عيشة عبد الهادي إنها بإعدادية
لا يا أختي دي بإبتدائية بس و خرجت من المدرسة من تانية إعدادي يعني ما خدتش إعدادية و بطلوا إشاعات بقى
:)
كل كلامك صح و أنا موافق على كل حرف منه
إنتي عارفه ان 60% من المهندسيين المصريين شغالين بره مصر
و نسبة الأطباء أعتقد أعلى من كده
أنا ليا واحد صاحبي خريج آداب دمنهور قسم إجتماع بتقدير جيد جداً و مش لاقي شغلانة أخصائي إجتماعي حتى
شغال ايه دلوقتي ؟
عامل في فورم الجبس
بتاعة ديكورات الشقق
حاول يفتح محل فكهاني و فشل و إندين لأنه مالهوش في التجارة و كان حيخش السجن و ربنا ستر و رجع لشغل الجبس تاني
ده لو لقى ربع فرصة في أي شغلانة تتناسب مع مؤهله حيرضى بس فين و إزاي و إمتى
ربنا ينتقم منهم
قولي آميييين
والله انا كتبت موضوع عن الحكايه دى
بس انا برضه عندى صراع داخل الراى والراى الاخر عندى راى بيقول لازم يكون فيه عمال وصنيعه لو كله اتعلم هنقعد ناكل ورق ولو كل البلد بقيت صنيعه هتبقى البلد ليصه وضايعه بس زاى ما اشار بعض الزملاء هنا كل تفكير الشباب الى الوظيفه والزواج وخلافه فبيعملوم المستحيل علشان يجمعوم فلوس يسافر ويموتم يعملوم اى حاجه ومعلش فى الكلمه برده التعليم عندنا سئ للغايه عشان بلدنا تقف على رجليه صح لازم نتدارك اخطائنا
dina said…
هقولك حاجه بسيطه جدا
انهارده فى ايام الكمبيوتر والانترنت
لو انتى بنت وزير او رئيس او لواء او اى حد مهم وعنده نفوذ
خلاص اتحققت كل امنياتك
لكن لو انتى بنت الشعب
زيي وزى ناس كتير قوى
هتكرهى البلد اصلا
لان مفيش فيها حاجه صح
لاتعليم ولا صحه ولا امان ولا اى حاجه خالص
مصر لحاجتين
مصر لمبارك واللى معاه وللسياحه
ودمتم سالمين
تعرفى ياقطة انا بضحك قوى على سوزان
مكتبه سوزان
لول
لما يهتموا بالمدارس والطلبه ونظام التعليم ممكن ساعتها بس يبقى فى مكاتب
خسارتك يابلد
el_assel said…
اللي عاجبه كده عاجبه
واللي مش عاجبه يخبط دماغه في الحيط

مش كفاية حيشيلوا الدعم
وحيغلوا العيش
يقطعوا نفسهم يعني
لازم نسيبهم حنلاقيهم في حالة ابداع
مش موجودة في بلد تانية
el_assel said…
حتكوني معانا ؟؟
ياريت تدخلي عندي وتقولي رأيك
منى said…
بصى بقى يا قطه
انا رائى ان فعلا كل واحد لازم يتعلم حرفه او اى مهره يحترفها بعد التخرج وده مش عيب
العلم حاجه والعمل حاجه تانيه
يعنى مهندس الميكانيكا هيفتح ورشه زى الميكانيكى والاتنين لو اتوسعوا يبقى عندهم مصنع هنا العلم هيفيد صاحبه
البنات كمان انا خريجه تربيه انجليزى وبشتغل بمؤهلى بس وظيفه مش ثابته وحتى لو ثابته مش كفايه بتمنى اتعلم اى حاجه حتى لو شغل الابره ويبقى عندى مشروع خاص
انتى كمان على فكره عملتى كده لما فتحتى سيبر
نفسى كل مصرى يبقى ليه مشروع وكل واحد بشطارته يكبر مشروعه من غير حوجه للصنوق الاجتماعى
اما بقى اللى عايز يبقى عالم يسافر
تحياتى يا قطه
lastknight said…
يعنى هو انا كنت خلصت من التاج بتاعك لما تلحقى تصدمينى بأزمة النيله التعليم فى مصر ؟ عموما .. من فلك شرفينى عشان تاخدى اجابات التاج بتاعتك .. مسألة الزفت التعليم دى نبقى نتكلم فيها بعدين .. لكن كملخص .. مصر أفلست علميا و تعليميا .. مافيش طريقه غير أسلوب محمد على .. استقدام العلماء من الخارج و أرسال مبعوثين من الداخل .. عشان يمكن يبقى فيه أمل .. غير كده مافيش
Desert cat said…
مهندس مصري
المهم حمد الله على سلامة النت
ثانيا معلومة ان الست الوزيرة حاصلة على الابتدائية دى لسه معلومة
والله كنت فاكراها اعدادية
ربنا يسامحنى بقا علشان افتريت عليها
وقولت انها مؤهل اعدادى اد الدنيا
صاحبك مش حاجه فريدة من نوعها يا بشمهندس
انا ابن عمى خريج هندسة ميكانيكا باور ومخلص جيش بقاله 4 سنين ولحد النهارده مش عارف يشتغل
كل لما يقدم فى شغل يترفض اصله بيروح من غير كارت ووالده مدير ادارة تعليمة يعنى مش وزير علشان يعرف يعمله حاجه
الشباب دى لما تترمى فى الشوارع مش ده اسمه انهيار دولة برضه
لنا الله
تحياتى
Desert cat said…
محمد صالح
انا مش بقول كلنا نشتغل استاذه وبشوات والحرف تتلغى او تنتهى
لكن مش احل مشكلة بمشكلة اكبر
دلوقتى لو كل البلد حرفيين وانت او انا تعبت حنروح لمين يعالجنا
ما هى دى المشكلة
تحياتى
Desert cat said…
dina
تعرفى يا دينا لو راجعتى ردى على مهندس مصرى هتلاقينى باكد على كلامك
وضربت نموذج حى قدام عنيا 24 ساعه
عموما مبروك لآل مبارك مصر واحنا
لنا الله
تحياتى
Desert cat said…
el_assel
هههههههههه
هو فعلا احنا شكلنا كابسين على نفسهم ومش عارفين ياخدوا راحتهم
خليهم يبدعوا هو احنا نقدر نتكلم
امال حبيب العادلى بيعمل ده مش علشان يكممنا
تحياتى
Desert cat said…
el_assel
اه طبعا معاكو ونص
بس فين يعنى
معتقلات لالالالالاء
سجون مبحبهاش
مارينا او شرم جاية حالالالالا
Desert cat said…
منى

انتى مش فهمانى خالص يا منى يا خالص
انا وجه اعتراضى يا جميل مش على الشغل والله العظيم ما على الشغل ولا اشتغل فى مجال مختلف عن تخصصى
ما انا تخصصى مساحة جوية
وشغلى نت وخلافه
يعنى مفيش اى وجه شبه بين مجال دراستى وبين شغلى فرق السما من الارض
وبحترم جدا اى حد بيشتغل اى شغلانه مهما كانت اسمه بيسعى وبيشتغل مش قاعد ايده على خده مستنى حسنة
انا وجه اعتراضى انى مش اجيب خريج جامعه واجيب صنايعى واقوله ده احسن منك .. بعمل دعوة لترك التعليم ..
لما بلدنا كلها تبقى حرفيين ... حنفضل زى ما احنا ناجحين فى مجال الصناعات بس متخلفين عقلنا متمركز فى الشغل ... ولما يكون عندى كل البلد دكاترة ومهندسين ومدرسين يبقا مش حنلاقى ناكل علشان مفيهاش فلاحين ومش حنلاقى اللى يبنى لنا بيوتنا ومش حنلاقى اللى يصلح لنا عربياتنا ...
العملية نسبة وتناسب
مش اجى فى المنطقة اللى انتى ساكنة فيها واقول كل المنطقة دى مهندسين ومفيهاش عمال نظافة
حيبقا فيها مستويات عالية بس سورى المنطقة زبالة ... ما هو محدش هيتكرم وينضفها مستواه لا يسمح
فهمتى قصدى ..
اوضح لك اكتر
قصدى لما احل مشكلة يبقا عندى بدائل مش ازيد المشكلة بمشكلة اكبر

تحياتى
Desert cat said…
منى
نسيت اعلق على نقة اللى عايز يبقا عالم يسافر
طيب ليه علمائنا مش يفضلوا فى بلدنا على الاقل يفيدوا البلد اللى صرفت عليهم
ولا انتى من وجهة نظرك خسارة
علمائنا يسافروا ويفضل لنا الحرفيين
يا جميل راجعى نهضة التعليم فى مصر وهتلاقى ان ملوك عرب اتخرجوا من جامعات مصرية
سيبك من دول
عندك العقاد وطه حسين والطهطاوى وغيرهم وغيرهم
يبقا جاية تقولى لى علمائنا يسافروا بره

وجهة نظر ممتازة اهنيكى عليها

هو مين اللى كان بيقول بلدنا بتتقدم بينا
ااااااه
اعلان برضه
Desert cat said…
lastknight
اولا الف شكر على اجابات التاج
ثانيا هو التعليم فى مصر مش املة يعنى علشان حرقة الدم اللى احنا فيها دى كلها
بس برضه منبقاش اميين
على الاقل نلحق ما تبقى لنا بدل ما نضيعه خالص
تحياتى
منى said…
قطه يا قطه
بصى انا معاك فى حكايه انا احنا محتاجين ده وده
وعارفه انك مش قصدك تنزلى من قدر الحرفى
كنت اقصد اقول ان المتعلم وعنده مهاره اى مهاره يبقى احسن من متعلم بس
اوحرفى بس
عن العلماء والسفر اقصد ان المجال هنا دلوقتى مش هيرضى طموح واحد عايز يبقى عالم كبير وقصدى انه يتعلم بره ويا ريت لو يرجع ومعاه فلوس ويبدا نهضه علميه هنا عشان الاجيال الجديده تلاقى فرصه للعلم الحقيقى هنا
لكن لو استنى لحد ما الحكومه تهتم بالعلم يبقى هيضيع وقت كتير
فهمتينى يا جميل
منى said…
على فكره اللى ذكرتيهم ادباء مش علماء
والادب او الفكر مش محتاج معامل
وذره وتجارب
لكن قوليلى العلماء اللى مسافروش عملوا ايه هنا
د/زويل لما فاز بنوبل قالوله هنعمل جامعه للعلوم تشرف عليها
هى فين دلوقتى؟
انا طبعا مش بكره بلدى او مستخسره فيها جهد ولادها بس لما يبقى فيه الاول مكان او استعداد رسمى للتعاون عشان كده بتمننى ان علمائنا وبعض رجال الاعمال الشرفاء يحاولوا يعملوا حاجه
Desert cat said…
منى
طب ما انا عارفه ان دول ادباء
هو انا كنت قولت لك عليهم علماء ذرة
ولا هما مش معروفين مين اساسا علشان يبقا فى المجتمع من يجهلهم
يا جميل يا قمر ياريت تركزى شوية علشان تقدرى تستوعبى
انا محور كلامى هنا وتركيزى على العقول
انا ماليش دعوة بالتخصص
لسبب بسيط اننا محتاجين لكل التخصصات
الناس اللى ذكرتها دى كانت مجرد نموذج مثال بضربة علشان تقدرى تفهمى بس
بالنسبة لزويل هو لاقى فى بلده اللى ينمى مهارته العقلية وسابها ومشى
لاقى فى بلده اللى يستفاد بيه علشان يقدر يفيد
ده معروف ان مصر البلد الوحيدة اللى بتطرد علمائها
ركزى شوية فى البوست وفى الردود علشان يوصلك المضمون بسهولة
تحياتى
Desert cat said…
اسكندراني اوي
فعلا خير الكلام ما قل ودل
وعجبى
تحياتى يا فندم
انا سمعت انهم فتحوا عنبر حالات حرجه للمسئولين عن التعليم فى مصر
ونصف سكانه ضحايا تدوينه فرنسا هانم عن التعليم
قلت امال النصف التانى جه ازاى
دلوقتى عرفت
ضحايا تدوينه القطه الغاليه
اموااااااااااااه
kaed said…
ديزيرت
واللة الواحد مش عارف يعمل إية شهادة وخدناها حرفة وإتعليمنا وفى الأخر شوية ملاليم
اللة يولع فى اللى كان السبب
العزيزة قطة الرمال
تحياتي
الحقيقه أنا أعتقد أنه الحكومه كلها معاها بالكتير نحو الأميه ويا دوب بتعرف تكتب أسمها ولو أن غالبيتها شغاله بالختامه
قبل ما يقولوا للناس روحوا أشتغلوا أساألوهم على المرتبات الحقيره المعروضه والتي لا تغطي حتى حق المواصلات
وعن شروط العمل العبوديه من ساعات غير قانونيه، وأنعدام الحق في الأوفر تايم، وتحريم تكوين نقابات وغيره وغيره
دي أعلانات لطلب عبيد مش عمال

ثم لما نشغل الجامعيين عمال كان لزمته أيه ما أنفق عليهم من مال ووقت في الجامعه؟
صحيح الحكومه الزباله تجيب لشعبها اللعنه

تحياتي
على فكره
قط الرمال
sand cat
هو أصغر القطط البريه التي تعيش بمصر حجما
وهو يستوطن الكثبان الرمليه للصحراء الغربيه ويتخصص في أصطياد الأفاعي والسحالي
وهو ليلي النشاط عموما
ودي صورته
http://www.photographyblog.com/gallery/data/510/2325sand_cat_small.jpg

تحياتي
:-)
Heart Beat said…
عزيزتي

طبعا الحكومة بعيدة كل البعد عن محاولة ابعاد الشباب و الاجيال الصاعدة عن التعليم و التثقيف زي ما هي بعيدة كل البعد كده عن غلاء الاسعار و ان التجار الوحشين الطماعين اللي قلبهم زي الحجر هم السبب

الحكومة الطيبة بتكتفي بشوية الغوغاء قصدي العلماء اللي موجودين في الدايرة بتاعتها اللي يخترع كماوي يحطوا في الزرع و اللي يكبر السحابة السودا عشان تضلم علينا اكتر و اللي يصبح بفتوى و ينام بعكسها تماما

طبعا الحكومة عشان تنجدنا من الناس دي تقول ايه ... بلاش نعلم الناس و يتخرجوا علماء و بيفهموا خليهم كلهم نجارين و سباكين و سمكرية على الاقل السباكين اللي في الحي هايصلحوا البلاعات لما تتسد و الميه تغرق الشوارع و يتلم عليها حشرات عمرنا ما سمعنا عنها يبقى على ايه بلاش يتعلموا احسن و ياخدوا حرفة كويسه كده تنفعهم و تنفع اللي حواليهم

و تيجي الحكومة تقول ايه كمان ... يعني ما هو مستوى التعليم هابط و ناس كتير من اللي اتخرجوا مابيعرفوش يكتبوا يبقى نعلمهم على ايه احنا نقفل الجامعات احسن او نبيعها هي كمان و اهي فلوس تروح للغلابة الوزارء و اللي مشغلهم اللي طول الليل و النهار مجتمعين و مشغولين بحاجات منها هايعملوا ايه في الجثث اللي بيلاقوها كل يوم في وسط البحر للناس اللي هربت من البلد عشان تشتغل و ماتوا في السكة و جايبين لهم وجع راس و مخلين منظمات حقوق الانسان مفتحة عينها على البلد

وتلاقيهم دلوقتي بيقولوا اما امر الشعب ده غريب و الله يعني لما مايلاقوش شغل يزعلوا من الحكومة الطيبة و لما نقولهم سيبوكوا من التعليم بلا هم و اتعلموا حرفة يدوية احسن عشان تشتغلوا و تكسبوا برضه يزعلوا

و على راي فرح كفر الهنادوة

يا معالي الوزير الشعب كله مبسوط من الفرص اللي الحكومة عماله توزعها عمال على بطال على الشباب عشان يشتغلوا احسن من التعليم اللي هايجبهم لورا و يتخرجوا فاهمين و عارفين ايه اللي بيحصل بالظبط و بعدين يعملوا مظاهرات تيجي على تليفزيونات الدنيا بيشتكوا فيها من الحكومة الطيبة دي و نتفضح بقى اودام الناس فعلى ايه يعني ... اصل الواد ابن ابو سويلم ابو لسان زالف عمال يتكلم و يقول ان الحكومة النظيفة دي مش عايزه حد يكون مخه نظيف غير واحد بس اسم النبي حارسه و صاينه عشان يبقى هو الوحيد اللي عارف المركب رايحه بينا لفين المرة دي ايطاليا و لا تركيا و لا هاتخدنا على المحيط عشان نغرق كلنا و يخلصوا منا ... و يجعله عامر
son's egypt said…
السلام عليكم
الواحد لما بيشوف الاعلان بيقعد يضحك علي الخيبة اللي وصلنا ليها
علي اساس ان الاعلان هو اللي حيحل مشكلة البطالة كلها من جدورها
واجمل حاجة في الاعلان المضحك الحق القطر قبل ما يفوتك
Desert cat said…
فرنسا هانم
تعليم ايه بقا يا حبيبتشى
قولى نجارين حدادين زبالين
هو اينعم كلها مهن شريفه وليها احترامها
لكن مش البلد كلها تبقى كدا
قلبى عندك علشان الحالات الحرجة دى
اموااااااااه
Desert cat said…
Alexandrian far away
ما هو الحكومة عايزانا نوفر المصاريف بتاعه التعليم كلها ونشتغل من البداية
يعنى الواحد يخلف له عيلين ولما يوصلوا اربع سنين يسرحهم فى الشارع بوفط يمسحوا عربيات ولا علب مناديل اسوة باطفال الشوارع
وعظيو يا مصر يا ارض مين ؟؟؟؟؟
وقال اجدانا الفراعنه والنبى لو موجودين فى العصر ده كانوا استعروا مننا دلوقتى
ده ان مكانوش بيلعنونا فى ترتبهم دلوقتى
تحياتى
Desert cat said…
Alexandrian far away
طبعا قط الرمال معلومة اول مرة اعرفها
بس علشان تعرفوا اننا قطط مفيدة وبنحمى البلد من الافاعى هى افعى واحده ممكن اوجهها على قصر القبة
اشكرك جدا على المعلومة
Desert cat said…
Heart Beat
المشكلة يا حبيبتى ان فى ناس بتقتنع بالكلام ده
انا مش قادرة افهم الناس دى بتفكر ازاى ... شكلهم كدا ناس حزب وطنى بيحبوا الحكومة موت طحن
بيقولوا لك غلاء الاسعار فعلا التجار هما السبب فيه
وان الحكومة عندها حق تقول للناس سيبوا التعليم وروحوا اشتغلوا اصل زويل لما بقا عالم ساب مصر ورجال الاعمال بيسرقوا مصر
يا حلولى بقى بالذمة ده منطق
ما هو من الطبيعى لمال السايب بيعلم السرقة
وزويل لاقى حد يعبره وسابنا ومشى
ده لاعيبة الكورة مبارك بنفسه راح استقبلهم فى المطار
وزويل لما جه مصر ولا حد عبره ولا حد جاب سيرته
ولا حد افتكره اصلا
وعلى راى كفر الهنادوة
مش هكررها بس عجبتنى جدا
اموااااااااه
Desert cat said…
son's egypt
اه قطر الشغل هيفوتك لكن قطر التعليم بلا تعليم بلا ارف
هو لسه فى حد بيتعلم
الحكومة همها مصلحتنا
نبقى كلانا اميين بس صنايعية قد الدنيا
يلا بينا بقى نلحق القطر
تحياتى
Desert cat said…
son's egypt
اه قطر الشغل هيفوتك لكن قطر التعليم بلا تعليم بلا ارف
هو لسه فى حد بيتعلم
الحكومة همها مصلحتنا
نبقى كلانا اميين بس صنايعية قد الدنيا
يلا بينا بقى نلحق القطر
تحياتى
Heart Beat said…
عزيزتي

معلش رجعت اعلق تاني على الموضوع ده لاني لسه شايفه الاعلان على شاشة التليفزيون من شوية و لاحظت انهم في اخر الاعرن بيقولوا ان

البلد بتتحرك

بس مافهمتش هما يقصدوا ايه بأنها بتتحرك

هل ده معناه اننا هانقوم من النوم بعد شوية نلاقي مصر بقت مكان السودان مثلا على الخريطة على اساس ان البلد بتتحرك للوراء يعني

او نلاقيها بتتحرك للامام فتغرق في البحر المتوسط

كنت اتمنى انهم يقولوا هي بتتحرك لفين بالظبط
Desert cat said…
بتتحرك على نفسنا علشان تخلص علينا
هو مش القطر فاتنا
يبا البلد تدوس علينا ما هو كله بيتحرك
واحنا الضحية

Popular posts from this blog

قميص دهشور

كل تحرش وانتوا طيبين