المعاكسات والمشاكسات


كان زمان اللى بيعاكس بيحلقوا له شعره وبتبقا كل الناس عارفه انه كان بيعاكس وكان بيبقا عار زى البنت اللى عامله عاملة سودة .. لكن دلوقتى مع التقدم التكنولوجى .. اصبح اللى بيعاكس بجح ... ولو حد قاله عيب يقف ويرد عليه ويشتمه كمان .... يعنى مخالف لتعاليم دينه من " غض البصر وكف الاذى " لاء وكمان بجح وقليل الادب
ماشية فى حالى ولا بيا ولا عليا وفجأة طلع لى واحد مش عارفه بصراحة من انهى مصيبة تاخده ... هو شكله مش كبير ولا صغير يعنى شاب فى بداية العشرينات او بيتمحك فى العشرين .... ولاقيته ماشى ورايا ومش ماشى ساكت كنت قولت بودى جارد ولا حاجه ... ماشى بيتلفظ بالفاظ اقذر من القذارة بشوية ... مع انى والله بلبس كويس جدا يعنى لبس فضفاض وكمان محجبة .. ومشيتى بالظبط مشية عمو محمد المخبر اللى على اول الشارع ... جاله عمى الوان الواد ده ولا ايه ... فضلت ساكته لحد ما بدأت اوصل المنطقة بتاعتنا .. وهنا بقا قولت اكيد فى حد يعرفنى هنا وهيدافع عنى بدل ما كنت اقف له فى مكان ما اعرفوش الناس تتفرج عليا وخلاص ما انا جربت قبل كدا .. الناس الايام دى بتتفرج وبس اكبر مجهود ممكن يعملوه يسالوك هو فى ايه مع انهم شايفين كل حاجه من الاول بس بيحبو يستعبطوا .. واول ما حسيت انى فى امان وقفت له
انا : ما تحترم نفسك يا حيوان ... ده ايه القرف ده
الحيوان : طب والله ما انا سايبك وهلف وراكى فى كل الشوارع
انا : اصلك قليل الادب وهتترد لك فى امك او اختك .. حسبى الله ونعم الوكيل
ومشيت طوالى
لاقيته كمل المسيرة ورايا ...
شوفت واحد جارنا وهنا قولت دى فرصتى ده مهما كان جارنا يعنى ...
انا : ما تمشى بقا يا مهزئ ده ايه قلة الادب دى
هو : وقف قال كمية الفاظ عمرى ما سمعتها
وهنا تدخل جارنا مالك يانانا
انا : الحيوان ده ماشى ورايا من بدرى وعمال يقول كلام قذر
جارنا : اتقى الله فى بنات الناس ... انت مش عندك اخوات تخاف عليهم
هو : لاء مش عندى وامى ماتت
وانا عايش بمزاجى ومالكشى دعوة يلا امشى من هنا
جارنا : طيب انا هعلمك ازاى تعيش وازاى تحترم الناس غصب عنك .. تعالى بقا على القسم .. وبالفعل وقف توكتوك علشان يوديه القسم
الواد شاف الموضوع بجد مش هزار قعد يعيط ويقوله اسف يابيه
انا اسف يا ابله ... بس قسم لاء
جارنا : انت ساكن فين ياض وبتشتغل ايه : انا ساكن فى ............... ومخلص دبلون زراعة ومش بشتغل
والله ما فى جيبى تمن علبة السجاير
انا فى سرى طبعا: يا حرام قطعت قلبى يا بن الـ؟؟؟؟؟؟
جارنا : ما تروح تتنيل على عينك وتشتغل بدل قلة الادب على الناس
هو : حاضر يابيه هشتغل ان شاء الله
جارنا : عندك اخوات بنات
هو : اه عندى اتنين
جارنا طيب مش تخيلت واحده من اخواتك مكان الاخت اللى انت ماشى وراها دى ليه
لو شوفتها فى المنظر ده هتعمل ايه
هو : انا اسف يا بيه والله ما هعاكس حد تانى
جارنا : طيب انا حفظت شكلك ولو شوفتك بتعاكس حد تانى مش هسيبك
هو : لا والله يابيه خلاص انا حرمت
جارنا : طب يلا غور من هنا وقبل ما تفكر تقل ادبك على حد افتكر محارمك وحطهم فى مكان اللى بتقل ادبك عليها دى
هو : خلاص يابيه انا اسف ..وجرى
خلاص يا نانا معلشى قدر الله وما شاء فعل
انا : اشكرك جدا يافندم ... وانا والله مش هنسى لحضرتك الموقف ده ابدا
جارنا بتشكرينى على ايه يا بنتى ... ده واجب علينا وابقى سلمى لى على الحاج ... ( والدى طبعا ) يلا فى رعاية الله
ومشى جارنا وانا كمان مشيت
بس دماغى فيها الف حاجه
ياترى واحد نايم طول النهار وصاحى طول الليل علشان يعاكس البنات ويقل ادبه على خلق الله .. بيستفاد ايه
ده حتى المعاكسات مش مقتصرة على سن معين علشان نقول البطالة ...
دى اصبحت زى فيرس منتشر فى الجو .. فى اى وقت وفى كل مكان
ده الاطفال بيعاكسوا والشيوخ بيعاكسو والشباب العاطل واللى بيشتغل كمان
ايه وجه الاستفادة لما تأذى واحده ماشية فى حالها بكلمة
طيب ليه فعلا مش بتتخيل اختك او امك فى مكانها وبتتناسى انه " كما تدين تدان "
وايه ضمنك ان مش واحده من اهل بيتك ماشيه فى شارع تانى وواحد بنفس السفالة ماشى بيعمل اللى انت بتعمله فى واحده تانية
" حد هيقولى لبس البنات وعمايلهم "
انا ماليش دعوة باللى بتلبس من غير هدوم
انا ليا دعوة باللى بتلبس كويس ومحجبة تتأذى ليه
واحدة ماشية فى حالها مش عملت لك حاجه تعمل انت كدا ليه
وحد يقولى هو بيستفاد ايه غير اهانته وقلة قيمته

Comments

3abdo me7tas said…
موضوع جميل
ليا تعليق بس مش دلوقتى
متزعليش يا نانا
للاسف غياب الوازع الديني
وانقراض حاسه التفرقه بين الصح والغلط بيخلي الشباب يتصرفو بالسلوب الهمجي ده
انعدام الاحساس بالمسؤليه كمان سبب مهم
ظاهره في منتهى السوء
لكن الله ايها السيدات والبنات

حمدا لله على السلامه وربنا يحرسكن جميعا
غاليتى
بقى انا امبارح اجى الاقيكي متلطشة من البت المعقدة الى بتهددك والنهادرة الاقيكي متعاكسة من الواد حموءة .. مش بعيد تكون هى بعتاه وراكي :)

بس هتقولى ايه
لا فيه قدوة ولا دين

ويطلعلك فى الافلام البطل طالع بيعاكس ويقابل بنات وعايش حياتة بالطول وبالعرض وفى الاخر كله يبقى خفيف الدم ومفروض تجبيه وتتعاطفى كمان معاه

وتخيلي بقى واحدمعاه دبلون وبالعقلية الى انتى اتكلمتى عنها ممكن لما يشوف امناظر دى تعمل فى صواميل مخه ايه

لنا الله

خلى بالك بقى ده انتى طلعتى قلق :))))

تحيياتي الغالية
ايوية said…
عندك حق والله
الموضوع مش موضوع لبس او محجبة او غير محجبة او بطالة او عدم شغل او فراغ
لا الموضوع اكبر من كدة لان فعلا المنقبة بتتعاكس وشفت دة بعينى
الموضوع اننا بعدنا عن ربنا ومبقاش فية بيت بيربى ولادة على الصح والغلط والحلال والحرام
ربنا يرحمنا
Desert cat said…
3abdo me7tas
فى انتظار عودتك يا محمد
Desert cat said…
اسكندراني اوي
الله يسلمك
طيب الحل ايه فى الموضوع
هنفضل كدا عرضة لكل واحد معندوش ضمير
يعترض طريقنا ويتلفذ بالفاظ قذرة
ما هو لازم يكون فى حل
ربنا معانا جميعا
Desert cat said…
بنوتة من وسط البلد
حبيبتى
شوفتى بقا غيابك عنى بيعمل ايه
شوية اتهدد وشوية اتعاكس
ااااااااااااااااه
نعبت خلاص
ما هى المشكلة يا بنوتة فى الاعلام الفاسد
والافلام اللى ملهاش هدف وبتسمم العقول
جعلت منا عرضة لكل انسان قذر
والمشكلة انك تلاقى الناس بترمى اللوم على البنت
يعنى لو واحد شاف واحده بتتعاكس يقولك يا عم ما هى اللى عايزة كدا خارجه من بيتها ليه
المفروض نتحبس بقا علشان الزبالة دى تتلم
حتى لو اتحبسنا واللى هتفضل الزبالة دى مالية الشوارع
لانه خلاص زى ما ذكرتى لا فى وازع دينى ولا قدوة
بقا قدوتهم تامر حسنى وعمرو دياب
معلشى بقا سمحينى فى القلق اللى عماله لكو ده
تسلمى يا غاليه
Desert cat said…
ايوية
فعلا يا ايوية كلامك سليم
دلوقتى الام تقعد فى وسط جيرانها تفتخر بابنها اللى كان واقف بيعاكس على ناصية الشارع بالليل
والواد حماده مخلاش ولا واحده معدية الا لما عاكسة هيهيهيهيهيييييي
طب واحد بيشوف امه بتقول كدا وبتفتخر بقلة ادبه
يبقا مالهاش تلوم نفسها لما تلاقيه مرمى فى اى حجز من الصبح ما هو النهارده بيعاكس بكره هيشرب مخدرات والبقية تاتى
ما هى بتفتخر بيه بقا
نورتى البلوج يا حبيبتى
agamoo said…
وزعلانة انك اتعاكستى
ولا زعلانه ان الواد اللى عاكسك معاه دبلون
ولا من الراجل اللى طلع لك وبعده عنك
ولا من الالفاظ اللى كان بيقولها
اصلها تفرق
Desert cat said…
لاء انا زعلانة علشان قلة الأدب والمرض اللى انتشر فى المجتمع يا فندم
المجتمع اصبح ذكورى من الدرجة الاولى
كل حاجه البنت الغلطانة
ومدين نفسهم الحق انهم يعملوا اللى هما عايزينة فى اى بنت ماشية
خلاص اصبحت حق مكتسب
طالما مش اخته
يبقا يقول اللى هو عايزه ويعمل اللى هو عايزه
وطالما مفيش رقابة يبقا من حقه
طبعا لازم يكون فى حل وعلاج للمرض المنتشر ده
Islamist Bloke said…
الكلام معروف ومكرر

مفيش دين ولا تربية ولا ولا ولا

بس فيه حاجة كمان

سنن الحياة اتغيرت

وهقول كلام متفهميهوش غلط

الاصل فى المرأة : المنزل واعمال المنزل(الا التى تعول) ودي وضعها تانى

الاصل فى الرجل: السعي لجلب الرزق

لو مشينا على الاصول الحياتية دي اية اللى هيحصل؟

العدد المهول من البنات اللى بتشتغل ....هيقعدوا فى البيت وهيكون فيه شباب بيشتغل مكانهم

الشباب هيبقى مشغول ومعاه فلوس ويقدر يتجوز

البنات هتقبل بالعرسان ومش هتتأمر على كل واحد ييجي

الشباب هيتجوز ويغض بصره

لكن المعادلة الحالية

كل اصحاب الشغل عايزين موظفة حسنة المظهر او بائعة انيقة الشكل

مفيش شباب بيشتغل

البنات رايحة جاية فى الشوارع

الشباب مفيش معاه فلوس ووقع فى بير المخدرات والتحرشات

البنات معاها فلوس ومش هترضى باى عريس مرتبه 400 جنيه لانها لامؤاخذة بتقبض اكتر منه

تزيد حالة العنوسة و تزيد التحرشات وتزيد المخدرات ويبقى الحال على ماهو عليه

طبعا مش معنى كلامي انك غلطانة او ان المفروض تقعدوا فى بيوتكوا وكدة

والله ابدا

بس رؤيتي للموضوع

لما اختلت الاصول

اختلت الثوابت والمعاصرات

ارجو تكوني فاهماني صح

ده مجرد تحليل وكلامي خطأ يقبل الصواب




والسلام
TE said…
حد هيقولى لبس البنات وعمايلهم
انا ماليش دعوة باللى بتلبس من غير هدوم
انا ليا دعوة باللى بتلبس كويس ومحجبة تتأذى ليه

و اللي بتلبس من غير هدوم برضة تتأذي ليه و انا مالي ماشية بحجاب و لا من غير او اسدال او جينز و بادي انا امشي في حالي غاضض بصري و مليش دعوة بدي و دي بغض النظر لبسها ازاي دي حياتها هي و لبسها و اسلوبها في حياتها مش شغلي يعني انت معندكيش مانع العوطلية دول يعاكسوا اللي لابسة جينز و بادي وان شالله يغتصبوها كمان علشان تتربي بسم الله ما شاء الله
Desert cat said…
Islamist Bloke
اوكى انا فاهمه وجهة نظر حضرتك
بس مش ذنبى انه عاطل
والله يدور على حاجه يشغل بيها وقت فراغه غير انه يلف ورا البنات فى الشوارع
الدين والاخلاق ما قالوش ان الولد علشان مش بيشتغل يبقا خلاص محلل ليه انه ينتهك حرمات الناس
من حقى انى امشى فى امان
امشى من غير ما اخاف ان اللى جاى فى وشى هيقول كلمة تاذينى
مش مشكلتى انه بيتشغل او مش بيشتغل
مش مشكلتى انه مش متربى
مش مشكلتى انه عارف دينه بيقوله ايه
مشكلتى انى من حقى اعيش فى امان
Desert cat said…
TE
لاء يا فندم عندى مانع ونص انهم يعاكسو
وانا اتفق جدا جدا مع وجهة نظر حضرتك
بس حبيت اذكر الجملة اللى حضرتك اقتبستها دى
لانى عارفه ان فى حد هيطلع يقولى البنات بيستفزونا بلبسهم
مع انه شئ ما يخصوش
تلبس اللى هى عايزاه
ماشيى بهدوم او من غير هدوم ربنا وحده هو اللى يحاسبها
ومفيش حد بيحاسب مكان حد
مش يحلل لنفسه انه يقرفها طول ما هى ماشية
احترامى وتقديرى لوجهة نظر حضرتك
سجدة said…
فرااااااااااااااغ
فراغ عقلى كبير وقلة وعى دينى
تخيلى واحد مفيش فى دماغه حاجة اصلا
مفيش هدف
مفيش فكر
مفيش وعى
تقليد اعمى وبس
3abdo me7tas said…
يا عينى يا عينى يا عينى
يا عينى على الولد
warDaya said…
استحملي رغيي بقى..اصلك فكرتيني بموقف
:)

عارفه...انا حصللي موقف زي ده
كتييييييير اوي بس بقالي بتاع سنتين ولا حاجه مش بيحصل حاجه من الكلام ده عشان مابقيتش اتحرك كتير منا لبيت ولو نزلت بيبقى بالعربيه بقى..
المهم اني لما اشتغلت باقيت مواصلات وكده
ف فمره كانت السنه اللي فاتت في الشتا والدنيا مطرت جامد جدا
انا ساكنه في امتداد شارع اسمه السجلات العسكريه يعني مليان عساكر ومباني اداريه للجيش وكده

العساكر دي اساسا مش بترحمنا في الروحه والجايه لااااااااازم يقرفونا..المهم في اليوم ده الناس كلها كانت بتجري عشان يستخبوا من المطره اللي مبهدلانا..
ولما قربت من الشارع بتاعنا لاحظت ان في واحد ماشي ورايا..قولت تهيؤات..فشلت ماشيه ولاقيته عمل زي الاخ ده عمال يقول الفاظ منيله بنيله...الدم غلي في عروقي لأني عامله زيك تقريبا محجبه ولبس فضفاض وكده ..وقعدت بقى اربت واخطط كله في دماغي..وهازعق اقول ايه واشتمه بأيه وهاضرب ولا لا هههههههه
ومستنيه بس شارع فيه نور ويكون فيه ناس ...مش مهم حتى يعرفوني ولا لا..بس ناس وخلاص..
وقربت من شارع العساكر ده وفاضللي مترين بس ولسه هالف..قام هو اول ماشاف ناس..حود ودخل شمال
ياااااربيييييييي
ده انا كنت هابهدله..وبردو حرقة دمي دي راحت هدر

بس بجد دلوقتي مش بس المعاكش بيبقى بجح..لا ده صحابه بيعتبروه واد كوول
وبيعرف يعلق البنات مثلا او يعرف يعاكسها من غير ماتصده

يلا ربنا يهدي بجد ويبعد عن البنات كلها ولاد الحرام...
Desert cat said…
سجدة
فقدوا القدوة الحسنة يا سجدة
دلوقتى قدوتهم تامر حسنى وعمرو دياب
ايه اللى بقوله ده تامر وعمرو مش بيقبلوا بعض
قدوتهم مصطفى قمر
تامر حالق شعره ازاى
يحلق زيه
مصطفى قمر فاكك كل زراير القميص امر من البلطجية
برضه زيه
ربنا يهديهم او يهدهم
خلينا نخلص من الاشكال دى بقا
Desert cat said…
3abdo me7tas
اممممممممم
فاهمه قصدك
بس مش زى ما حضرتك فاهم
هو الولد اللى من النوعية دى عايز قطم رقبته بس
Desert cat said…
warDaya
يا حبيبتى انتى ترغى براحتك
ده كفاية اوى انك منورة البلوج

والله يا اختى الواحد زهق من الاشكال دى
الواحد كل يوم يشوف الاشكال الغبية دى مش عارفه لحد امتا هنفضل فى الانحطاط ده دون مراعاة لمشاعر الناس
والغريب ان الظاهره فى انتشار
وموضوع امناء الشرطة ولا العساكر ده منتشر هو كمان
فى يوم ماشية انا واحده صحبتى من قدام القسم اللهم احفظنا
والاقى امين شرطة واقف انت يا جميل ياللى هناك والكلام الفاضى ده
بصراحة مقدرتش اسكت
قولت له ده احنا لما شخص عادى بيقل ادبه علينا بنقوله هنجيب لك امين الشرطة
فما بالك بالشرطة هى اللى بتعاكس بعد كدا هنقوله هنجيب لك مين
على العموم
لينا رب موجود
بصراحة طلع زوق
وقالى انا اسف
احتجتوا اى حاجه انا تحت امركو

Popular posts from this blog

قميص دهشور

كل تحرش وانتوا طيبين