Desert Cat Search
قطه الصحراء: بسم الحب

Thursday, February 13, 2014

بسم الحب

بسم الحب وبسم كل احساس جميل بين كل عاشقين 
بسم اول كلمة حب قولتها وعشتها وبسم اول لمسة حسيتها معاك حبيت فى اليوم ده اقولك انا 
بعشقك
بحاول اكتب لك واعبر لك لكن اكيد احساسى واصلك 
عارف انك بتكون جنبى وبشتاق لك 
عارف انك اول ما بتقولى خلاص الوقت عدى ولازم امشى قبل ما تتحرك من جنبى بافتقدك 

عارف انى بيك نسيت الدنيا كلها لانك بقيت انت الدنيا بالنسبة لى 
عارف احساسى بالوحدة وانت بعيد عنى هو اللى خلانى اعترف لك بأنى بحبك 
كتير بتمنى لو يكون عندى جناحين علشان اقدر اطير واوصل لك فى اى مكان انت فيه 
عايزة دايما عينى تكون شايفاك 
مش عايزة اعيش غير معاك وجواك حتى لو للحظات 

عارف احساس لما يظهر لك فى وسط الضلمة حب يخطفك من بين كل الناس حتى من نفسك ؟ يعرفك يعنى ايه راجل بيحب حبيبته ومالية عنيه مش شايف غير ها وراضى وسعيد بيها ؟!!
طيب عارف لما واحد ميبقاش ناقصه حاجه وشايفك انت كل حاجه ويسيب اى حاجه علشان يسمع صوتك ويطمن عليك  او يشوفك ان شا الله نص ساعه وانت وبس اللى فى حياته ؟!
طيب عارف لما حد مينفعش ينيمك زعلان مهما عملت ومهما حصل بينكم .. بتبقى خايف لزعلك منه يزعله لانه مش يستاهل منك كدا ؟! عارف الحنية دى والدفا ده ؟! 
عارف مش هقولك بحبك لان الكلمة كل اتنين حبوا بعض بيقولوها
لكن انا عايزة اقولك كلام خاص
بلغة مش يفهمها إلا انت


 



10 comments:

nada emam said...

من فترة مش بتكتبى غير فى السياسة يا حنان لما جالنا احباط ، ياريت كل يوم يكون عيد حب علشان نعيش معاكى الحالة الروعة دى

eman said...

عارفة قريت كلامك اكتر من عشرين مرة يا حنونة وفى كل مرة احس بمشاعر مختلفة واللى حسيته اكتر الكلام المخغى بين السطور

احمد على said...

العزيزة حنان الشريف
خلينى اعترف لك انى بتابع المدونة بتاعتك من فترة ليست بالقليلة مرة كتبتى انك لما بتشوفى منقبة بتحسى انك شايفة كيس زبالة اسود مربوط من فوق .. كنت عايز اشتمك لان زوجتى منقبة
من 3 سنين البلد كلها كانت مولعة وكله عايز مبارك يمشى بنظامه وانتى بتنزلى مظاهرات ابناء مبارك وتجيبى لنا صور للمظاهرات وتنزليها هنا وقتها كان نفسى اخنقك لكن دارت الايام واثبتت انك كنتى صح وبقينا نقول ولا يوم من ايام مبارك .. وفى كل مرة ادخل اقرا لك حاجه اشوفها وامشى من غير تعليق لكن النهاردة لاقيتنى لما قريت كلامك بسقف لك بجد ولكل انثى تجيد لغة المشاعر

ام ليلى said...

يااااه فكرتينى يا حنان بالمشاعر الجميلة وضغطتى على وجعى قوى
انا متزوجة من 3 سنين وقبلهم 3 سنين بحب جوزى حب عبادة كل الحب اللى عشناه قبل الجواز اتحول لروتين بعد الجواز كنا متواعدين اننا نعيش فى حب وسعادة ونخلى بيتنا ده جنة كل الحب والوعود دى اتحولت لروتين يومى لحد ما بقيت حاسة انى عايشة فى بيت من التلج مفيهوش روح ولا احساس === انا النهاردة بشكرك انك حسستينى ان لسه فى حاجه اسمها حب وقلوب بتغنى

Anonymous said...

انا محرر فى اليوم السابع
وكنا بنعمل تقرير فى الموقع عن المدونين اللى كتبوا عن عيد الحب وبصراحة ملقتش اجمل من المشاعر دى ممكن تضاف للتقرير
استاذنك فى نشرها طبعا باسم المدونة واسم حضرتك

نيرة عبدالغفار said...

يا نونة انا حاسة ان روحى بتطير فوق السحاب
يا بخت الحبيب المجهول ده بيكى على الاقل بتعرفى تعبرى له عن اللى جواكى
انا بكون نفسى اتكلم واقول حاجات كتير لحبيبى لكن بتلخبط والاقينى بخبط دبش
والنبى يا نونة هاخد منك اخر جملتين ابعتهم له فى رساله وعارفه ان كلك زوق ومش حترفضى شكرا مقدما يااحلى نونة

عارف مش هقولك بحبك لان الكلمة كل اتنين حبوا بعض بيقولوها
لكن انا عايزة اقولك كلام خاص
بلغة مش يفهمها إلا انت

Anonymous said...

ممكن استاذنك ابعت لك مراتى تقعد معاكى كل يوم بس ولو نص ساعة ؟ والنبى نفسى اسمع كلمة واحدة من ده فى البيت

مصرى said...

هى الحاجات الحلوة دى مش بتطلع الا فى عيد الحب بس ؟ طيب بدل ما انتى هارية اللى جابونا سياسة خليكى حلوة كدا على طول
ده حتى ساعه لقلبك

sara fahmy said...

انتى عارفه انا اللى نفسى فى ايه دلوقتى يا حنان
اخدك فى حضنى علشان احس بكل الحب والدفا اللى جواكى ده

صافى said...

انتى عارفه اللى يوصلك للاحساس ده وانتى تعبرى عنه بكل المشاعر الجياشة دى يكون ايه ؟
يكون انسان محترم لان هو صانع كتلة المشاعر والاحسايس دى
ربنا يخليكو لبعض وكل يوم وانتوا فى حب متجدد وسعادة