Desert Cat Search
قطه الصحراء: هو ابن المورصى بيدى تعليمات بصفته ايه ؟!!

Wednesday, November 14, 2012

هو ابن المورصى بيدى تعليمات بصفته ايه ؟!!

واحد ماشى فى الشارع زيه زى اى مواطن يقف يدى تعليمات لعسكرى المرور بصفته ايه ؟ ولما مش عجبه كلام الراجل جرى على بابا فى قصر الرئاسة يشتكى ويالف كلام الواد يا عين امه مش عمل حاجه غير انه اتوسل لامين الشرطة انه يشوف شغله  اوووم ايه امين الشرطة شتمه من غير سبب خالص لما عرف انه ابن المورصى ؟؟ طبعا الكلام كدب والرواية اللى بيقولها كلها كدب لكن هفترض ان فعلا الكلام ده حصل مش يروح يشتكى فى النيابة ليه  زيه زى اى مواطن مصرى محترم  ولا ناخده بئا قدوة ولما يحصل لنا اى حاجه نجرى على الرئاسة نشتكى وهل ياترى الرئاسة هتامر بسرعه التحقيق ولا السرعه دى مع ابن المورصى بس 
-------------------------------------------------------------------------------------

مصدر أمني: «الرئاسة» تكلف «الداخلية» بالتحقيق مع أمين شرطة «سب الدين» لنجل مرسي

 

كشفت مصادر أمنية بوزارة الداخلية أن رئاسة الجمهورية كلفت الوزارة بإجراء تحقيق عاجل مع أمين شرطة بالإدارة العامة للمرور، بعد مشادة حدثت بين الأمين و أحمد نجل الرئيس محمد مرسى، على طريق منيا القمح ــ الزقازيق، موضحة أن قيادات الوزارة تلقت تعليمات من رئاسة الجمهورية بسرعة التحقيق فى الواقعة، وقال نجل الرئيس إن الأمين سب له الدين عندما علم أنه ابن الرئيس، وردد ألفاظاً نابية وتعمد إهانته، وقدم رقم الدراجة البخارية التى كان يستقلها الأمين.
وقالت مصادر أمنية إن قطاع التفتيش والرقابة بالوزارة والإدارة العامة للمرور بدآ تحقيقات موسعة مع الأمين «إسلام. م»، بتهمة الاعتداء على نجل الرئيس، أثناء قيادته سيارته على طريق منيا القمح ــ الزقازيق، حال عودته من القاهرة إلى الشرقية.
وأضافت المصادر أن الجهات الأمنية بدأت التحقيق فى رواية نجل الرئيس، الذى أدلى بأوصاف الأمين، وقدم رقم الدراجة البخارية، الخاصة بالإدارة العامة للمرور، ولفت أحمد مرسى، خلال التحقيقات، إلى أنه بادر «إسلام» بقوله: «هتفضلوا لغاية إمتى واقفين.. شوفوا شغلكم أرجوكم»، فاستوقفه الأمين وسأله عن هويته، وحال علمه بأنه نجل الرئيس سبه وردد: « إيه يعنى ابن الرئيس.. ارحمونا وبطلوا افترا»، ووقعت مشادة انتهت باعتداء الأمين عليه.
وأكدت مصادر مقربة من الأمين أنه كان عائداً من عمله، فى وقت الراحة، ولم يعتد على نجل الرئيس الذى وجه له اتهامات بالتخاذل والتقصير عن أداء واجبه، رغم أنه أخبره بأنه فى الراحة

 

17 comments:

Reham Abu Leila said...

يعني هو يسب دين نجل الرئيس حرام و سب دين الشعب حلال؟؟ الموقف ده بيحصل كل يوم ايه الجديد؟ انه ابن فخامة ابن الرئيس؟ مش قولتولنا عصر مبارك خلاص بح؟؟؟؟؟؟؟ و كلنا سواسية؟ ولا ده كلام انتخابات؟

Abdalla Sheham said...

فكرنى باللى عمله هو واخوه من سنه فاتت لما اعتدوا على ظابط مرور وقالوله انت مش عارف بتكلم مين ، اما المرادى فهو ابن الرئيس ازاى يوقفه ولا حتى يكلمه . لو كان اتعاقب المرة الاولى او حتى حد قاله عيب مكنش كررها مرة تانية

اسلام said...


اليس من باب اولي ان تكلف الرئاسة وزارة الداخلية في حوادث قطع الطرق و القطارات و الانفلات الامني ؟

علاء وجمال said...

طبعا تلبيسه للامين الغلبان وبعدين اما الامين يقول بطلوا افترا كان يقصد ايه يامفتري

mjeeem said...


فمعذرة با أمين الشرطة ... يابن مصر
واللعنة ...كل اللعنة ، على التافه الذى حاول اهانتك
وبصراحة ، هو كان عاوز واحدة حلوة فى عين أمه
من ابن مصر الحقيقى ... محمد صبحى الشناوى !!!

redrose said...

الوزارة تلقت تعليمات من رئاسة الجمهورية بسرعة التحقيق فى الواقعة!!! انما مبيحققوش بسرعه فى البنات اللى بيتقص لهم شعرهم فى المترو، ولا فى حالات البلطجة اللى كل يوم ناس منها بتموت ، ولا ال 16 جندى من ورد شبابنا اللى اتقطف بدرى وهم بيفطرو فى رمضان على الحدود ولا ولا ولا والله الواحد قلبه موجوع

N61 said...

هل التحقيق مع أمين الشرطة
1- لأنه سب الدين ؟
2- لأنه سب الدين لابن الرئيس ؟
3- لإبن الرئيس ؟

lsoueif said...

هو ده اللى عرفم يتشطروا عليه
انما ضباط البوليس والامناء اللى كل يوم يقتلوا أو يعذبوا مواطن غلبان دول ما بيعرفوش يحققوا معاهم ولو حققوا معاهم برضه بيسيبوهم طايحين فى الناس

khalil said...

عن اى تهمة نتكلم
هل سيتم التحقيق مع امين الشرطة على انه سب ابن الرئيس ام على سب الدين لو على سب ابن الرئيس فهذا حال الدنيا فالرئيس عندنا اغلى من الدين اما على سب الدين فسادلكم يوما على آلاف من المسؤلين من شرطة وغيرهم يسبون الدين كما يلوكون اللبانة ولم يهتم بذلك احد فللدين رب يحميه اما ابن الرئيس فله اب يحميه

samy said...


ابن ملكه الدينمارك اوقفه عسكرى المرور ووجده شارب خمره اثناء قيادته سياره ...فتم الحقيق معه...ليه امين الشرطه شتمه.؟...... وهل تم النحقيق مع سيادته لماذا شتمه الامين ؟

atramedhat said...



بدايه لو هذا الامين سب الدين فيجب محاكمته لاعتدائه على الدين الاسلامي لان سب الدين قد يدخل في دائره الله اعلم بها وهذا يفتي به علماء الدين

اما ان الاخ اللي مش عارفين هو شغال ايه في البلد فمش من حقه انه يوجه اي مواطن ولا ان يوجه له اي نقد حتى ولو بناء فما هو الا مواطن مصري له ما لنا من حقوق ووعليه ما علينا نت واجبات عيب يا حاااااااج يا ابن الرئيس

miro said...


المفروض بعد الثوره انهم يكافئو الامين لاثبات ان البلد اتغيرت مش عشان ابن الرئيس يتحكم فى اى مواطن مصرى

sayed said...

ارحمونا شويه
ياريت الرئاسه تكلف وزارة النقل والسكك الحديد بتحقيق في الحوادث الي بتحصل كل شويه بدل ما انتو سايبين البلد كده ولا عارفين تدخلو جنيه ولا عارفين تحمو االبلد احنا خلاص ابتدينا نزهق

brave said...

كل يوم خبر عن أبناء مرسى. أمس خبر تقديم أحمد باشا أوراقه للتجنيد والنهاردة خبر تكليف الرئاسة للداخلية التحقيق فى سب أمين شرطة لحمد باشا مرسى, احنا اللى بنصنع الفرعون بايدينا والخرفان بيبرروا الكلام ده

shalaby said...

ولاد مبارك مسمعناش عنهم غير في أخر عهده ولما أتمكنوا خربوها . ولاد مرسي ماشاء الله بنسمع عنهم من قبل ما يكون رئيس . وبعدين مش من حقه يحاسب أي حد ماشي في الشارع لو هو منظم وأبن رئيس يأما ينصحه بالحسنى يأما يبلغ عنه الجهات المسئولة وبعدين تبقى كارثه لو الرئاسة طلبت الحقيق الفوري في الحادثه في حين أن كل البلاوي اللي بتحصل في مصر ماشفناش التصريح وأقربها حادث القطار

الصعيدى said...

هو لازم اى حاجة يقولها ابن الريس نصدقها؟؟هو فية امين هيعرف ان ابن الريس الى بيكلمة و هيسب لة الدين؟؟؟ارجوكم احترموا عقولنا

magdy said...

بيشتغل اية احمد مرسى عشان يقولة شوفوا شغلكم وبعدين الامين فى راحة