وبدأ رجالة 25 ابريل من ماسبيرو


كنت المفروض مرتبة حاجات تانية خالص ليوم شم النسيم واللى هو فى الحقيقة عيد ميلادى بس انا تكرما وتفضلاً منى بعمل للشعب المصرى كله اجازة يوم 25 ابريل علشان يحتفلوا مش بعيد تحرير سيناء لالالاء هى سيناء اينعم ارضنا الحبيبة اللى طلعت على الدنيا لقيتها رجعت لينا ولأننا بوكستنا هنضيعها ومعاها اغلب اراضينا ان مش كان احتلال اجنبى يبقى احتلال سلفى وده هيبقى محتل لكل اراضينا فنقول الاجازة الرسمية دى علشان عيد ميلادى انا شخصياً .. وعلشان تفضل سيناء ارضنا الطيبة حبيبتنا نزلنا يوم 25 ابريل قدام ماسبيرو نطالب بمحاكمة عادلة للرئيس مبارك علشان مش عايزين يحاكمه جرابيع التحرير اللى معروف ان مكانهم الطبيعى فى الميدان اللى كانوا بيناموا ويعملوا تواليت فى نفس المكان اللى بيناموا فيه .. ايه بقى اللى جاب لنا البلطجية والجرابيع دول قدام ماسبيرو ؟؟؟ ده اللى ممكن يجاوب لنا عليه عمرو واكد وبثينة كامل أو كل السفلة اللى بيأجروا البلطجية الواحد منهم بـ 7 جنيه .. البداية خالص كان المفروض اروح مع الناس اللى نازلة من الشرقية لكن بما انى مش بعرف اصحى بدرى فرحت انا لوحدى بعدهم .. وانا ماشية اتمشى على الكورنيش . راحت موقفانى مذيعه شنيعة خالص بتقولى ممكن اعمل معاكى حيوااار .. قولتها الاول مين حضرتك ؟ قالت لى احنا قناة الاوربت قولتلها اتفضلى بس الموضوع هيبقى عن ايه ؟ قالت لى عن مظاهر الاحتفال بشم النسيم .. قولت لها بس انا مش جاية احتفل بشم النسيم انا جاية متضامنة مع اصحابى للمطالبة بمحاكمة عادلة للرئيس مبارك مش بتوع التحرير اللى يحاكموه .. قالت لى قولى اللى انتى عايزاه .. وفى اثناء ماكانو بيجهزوا الكاميرا لاقيتها ماسكة ايدى بحنية منقطعة النظير وبتقولى .. بصى قولى احنا جايين نحتفل بشم النسيم واحنا سعداء خصوصا بعد الوضع السياسى اللى حصل فى البلد .. قولت لها اوكى هقول اللى انتى عايزاه .. بدأ الحيوااار .. وراحت بتسألنى ايه مظاهر احتفالك بشم النسيم ؟ وياترى السنة دى مختلف عن قبل كدا ؟ قولت لها طبعا مختلف جداً .. لأن انا عادة بحتفل بشم النسيم مع اصحابى فى الشواطئ المصرية فى اى مدينة ساحلية .. لكن السنة دى نظراً للتغيرات السياسية فى البلد فكان لازم نواكب التغيرات دى ونحتفل بيه برضه بطريقتنا الخاصة .. علشان كدا احنا النهاردة عاملين وقفة احتجاجية قدام ماسبيرو للمطالبة بحرية الرئيس مبارك الراجل اللى عيشنا فى سلام 30 سنة رمز مصر بلدنا ... راح اللى ورا الكاميرا قال هااااايل اللى بعده ؟!!! طبعا بعدها كلمت منار حكيت لها اللى حصل ودخلنا فى وصلة ضحك هايله برضه .. وصلت الوقفة الاحتجاجية وبدل ما اروح اقف مع اصحابى اتلخبطت ورحت عند الاعداء اللى كانوا واقفين ماسكين جذم فى ايديهم وبيشتموا بالفاظ ابيحة وبيعملوا بايديهم اشارات سافلة وقليلة الادب .. انا قولت يالهوى بقى العيال صفوة المجتمع اللى انا مصحابهم انقلبوا فجأتاًًً كدا .. رحت متصلة بمحمود قولت له انا مش عارفه حد من الناس دى مين العيال السافلة دى ؟؟ قالى احنا على الكورنيش اللى قدام ماسبيرو على طول دول بتوع التحرير .. قولت له طمنتنى يابنى الهى يطمن قلبك .. مش امشى بقى مؤدبة .. روحت تافه عليهم .. ولاقيت ناس بتجرى ورايا والهتاف اتغير جيبولنا البت بنت مش عارف ايه دى .. مش ينفع اقول الباقى بقى علشان كانوا تقريبا بيرموا زبالة من بؤهم والجيش مكردن عليهم وناس بتزق فى الجيش علشان يجيبونى وانا بجرى جه ظابط امور شوية وقالى انتى بتفى عليهم ليه ؟ قولت له عيال سافله قالى طيب تعالى لما اعديكى .. وراح وصلنى لحد اصحابى والنبى انت راجل زووووووووء ... روحت عند اصحابى العدد مش كان كتير وكلمت منار قولت لها انا زعلانة كل اللى موجودين شباب الاقاليم واسكندرية والوقت ده كانت الساعه 2 تقريبا اتارى بقى الناس كانت لسه بتجمع نفسها .. و بعد ساعتين بالظبط كان الكورنيش متقفل والأعداد فعلاً كانت رهيبه وكان فى ناس بتنزل من الاتوبيسات تنضم لينا .. جت قناة الجزيرة مباشر تصور الشباب قعدوا يهتفوا الجزيرة فين المصريين اهم .. وجت الفراعين الشباب كانوا هيضربوهم ومش رضيوا يصوروا معاهم .. والاعلام الفاسد بتاعنا واقفين يتفرجوا علينا من البلكونات .. فى خلال الساعتين اللى وقفتهم هناك جم البلطجية بتوع التحرير علشان يضربونا والجيش اتدخل .. راحوا يواصلوا قلة ادبهم قدام ماسبيروا بالايحاءات القذرة اللى بيعملوها بايديهم والشتيمة السالفة بتاعتهم .. وكل لما يلاقوا عددنا احنا بيكبر وعددهم بيتناقص يتجننوا فى عقلهم وتزيد قلة ادبهم ... شوية وراحوا جابوا ازايز يحدفونا بيها واحنا واقفين ولا معبرينهم .. مش عاجبنى ان البلد اتقسمت فريقين ومصريين واقفين ضد مصريين حتى لو كانوا بلطجية او ناس متأجرين .. بس ليه الاجرام ده ؟ وليه الحقد والغل اللى فى القلوب والسفالة دى كلها .. هى دى بقى الديموقراطية اللى بنطالب بيها ؟؟ وقفت انا و محمود حبيب قلبى نعمل حوارات ولقاءات وكان فى شاب زعلان اوى وواقف يقول ليه بنعمل فى بعض كدا هو الرئيس مبارك مش بنى ادم ؟ ليه كلنا جايين عليه وبنشتمه انتوا عايزين منه ايه .. قولنا له احنا مش بنشتمه احنا جايين النهاردة نأييده .. قابلت نشوى ومنال وناس كتير اوى جميلة .. يااااه فى فرق بين الناس النضيفة اللى بجد وبين الناس اللى بتنام فى الشوارع وبتقعد شهر مش بتستحمى ... بعد كدا كان لازم انسحب واجرى واللى حصل بعدها بقى اجمل حاجه حصلت فى حياتى واجمل وقت قضيته مع ناس غالية عندى اوى وجميلة وبحبهم كللهم وبقولهم ربنا يخليكو ليا



هما دول بقى العشرات اللى الإعلام الفاسد والصحافة المصرية القذرة بيقولوا عليهم ؟؟ العدد أكتر من 5000وده كان الساعه 4ولحد الساعه12الاعداد كانت اكتر من الضعف والاعلام القذر يقول العشرات بس ولا بيهمنا قولوا عشرة قولوا مية هى برضه مليونية

Comments

Anonymous said…
برافو يا حنان انتى بجد بنت هايلة
ربنا يكلل مجهوداتكو بالنجاح
واحد معدى said…
اخيرا طلع لكو صوت
زهقنا من صراخ اللى فى التحرير لدرجة بقينا نقفل ودانا
اتكلموا وربنا هينصركو
سكوتكو بيضع حقوقكو فى بلدكو وبيضيع القائد الكبير اللى ما يستاهل غير حب وتكريم
mohammed said…
كنتى منورة الدنيا يا حنان وبجد هلكت من الضحك وقت اللقاء اللى اتعمل معاكى انتى بنت زى القمر
ربنا يحفظك
مصرية بالخارج said…
هو ده الشباب المصرى المحترم الحقيقى اخيرا ظهرتوا للنور
وطلع صوتكو لو بايدى كنت جبت ولادى وجيت وقفت معاكو لكن اهلى هينزلوا فى كل مرة تنزلوا فيها
marwa said…
الراجل ده ميستاهلش مننا غير كل حب واحترام علشان كدا الناس السافلة اللى كنت قصادنا لا تنتمى للمصريين الشرفاء فى اى حاجه متزعليش عليهم هما مش مصريين زينا واسالى امريكا على نشطاء 6 ابريل
maro said…
مجهودنا عمره ما هيضيع
تحياتى يا احلى قطة
farmaseutti said…
http://www.facebook.com/pages/ام-بطه-الست-اللى-قدام-ماسبيرو/215915621767287

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز