لا للترقيعات الدستورية



ما الفرق بين دستور71وما تم ترقيعه من مواد فى2011كنا بنصرخ باعلى اصواتنا من المادة 167سيئة السمعه ومن ترزية النظام اللى كل يوم والتانى يأيفوا لنا قوانين تتماشى مع الأغراض والمصلحة الخاصة علشان لما نقول الاخون والحزب الوطنى وجهان لعملة واحدة مش يطلع علينا كلاب الاخوان يقلوا ادبهم ماهما كمان بيقتصوا من القرآن ما يناسب هواهم وعندهم استعداد يألفوا احاديث المهم مصلحتهم الشخصية لأن دينهم هو دين المصالح .. ونرجع للدستور الذى اشرف على ترقيعه المستشار طارق البشرى بالاضافه ل3 اخوان اللى كانوا داخل لجنة ترقيع الدستور فى مصلحة مين المادة 175والتى تحظر ترشيح اى شخص مزدوج الجنسية لمنصب رئيس الجمهورية حتى وإن تنازل عن الجنسية الأخرى غير المصرية .. افرضوا انا عايزة زويل مثلاً يبقى رئيس جمهورية ؟ تمنعوه لأنه يحمل جنسية امريكية + المصرية ؟ انتوا مجانين ولا ايه ؟
ثم احنا مش قولنا ان بعد كدا اى حد يمثل الشعب او يتكلم باسم الشعب لازم يكون باختيار الشعب ؟ امال المادة 189مكرر دى مناسبتها ايه فى الحوار يعنى ايه يكون الحق لأول مجلسى شعب وشورى منتخبين إختيار لجنة من داخلهم وخارجهم تضم 100 عضو مهمتهم صياغة دستور جديد ؟ هو إحنا حنسلق بيض علشان باقصى سرعة نروح ننتخب اعضاء مجلس شعب وشورى يكون الناتج عنهم مجلس معاق ذهنياً ؟ عملنا ايه فى المواطن اللى بياخد 50جنيه ويروح يبيع صوته قولنا له انت كدا عندك وعى وروح انتخب ؟ علمنا ايه فى الاعضاء اللى بيدخلوا المجلس ينسوا اهالى دوائرهم الانتخابيه اللى ادوهم اصواتهم امانة علشان يتكلموا باصواتهم لكن بمجرد دخوله المجلس طز فى كل ده المهم انه يقلب فى البلد ازاى ؟ عملنا ايه فى العصبية القبلية ؟ ثم مين رئيس اتجنن مهما كانت الثقة فيه هيقوم بتغيير مواد دستور تديله الحق فى التحكم فى الشعب ؟ وليه اصلا المجلس الاعلى للقوات المسلحة جاب لنا الاخوان المقرفين فى لجنة تعديل الدستور بالاضافة لطارق البشرى اللى العالم عنده اجماع على عنصريته ؟ الناس اللى بتقول هنقول نعم للتعديلات الدستورية لانتهاء حالة الفوضى فى البلد تعديل الدستور مش سبب الفوضى اللى فى البلد سببها الكلاب اللى عايزة تعتلى عرش السلطة وفاكرين بترقيعهم المزرى ده لدستور مهترئ هيحكموا ويعقدوا على نفسنا مدى الحياة . ثم لو قولت لا للتعديلات الدستورية مهمة المجلس العسكرى هو العمل على ترتيب انتقالى صحيح للسلطة بالاضافة لدستور مطلق الصلاحيات لازم يكون فى جمعية تأسيسيى لتشكيل انتخاب حر مباشر لإعداد دستور جديد لمصر بدل من الاخوان المسلمين اللى جايبهم المجلس لترقيع الدستور بما يناسب الاهواء اللى رايح يقول نعم ده اعرف انك رايح تبيع نفسك وبلدك وباقى الشعب يبقى من الاخر انت واحد جبان

Comments

Ms Venus said…
طبعا لا لا لا
نهب البلد بلا رحمه said…
كل هذه البلايين من دم الشعب الجائع
...عصابة الحكم تنهب مصر بلا رحمه..
كيف نمنع تكرار مص دم الغلابه
كيف نمنع عصابات الحكم من سرقة اموال كانت يمكن ان توفر العمل والحياه والعلاج للملايين؟
مبارك يسرق 31 ونصف بليون
كما اعلنت اميركارسميا وهذا مايملكه فى بلد واحد
وشعبه لا يجد الماكل او العمل او العلاج
هل يخجل من تعاطفوا مع اكبر سارق فى تاريخ مصر
من البلهاء او السارقين الصغار؟
marwa said…
ده دستور عم حنفى البواب يا نونا
mag said…
انا غير موافق يا قطة
انا هقول نعم خلينا نخلص والبلد ترجع لاستقرارها
nor said…
انا محتارة يا حنان لو قولت نعم يبقى بوافق على كل الكلام اللى قولتيه
ولو قولت لا يبقى بوافق على دمار البلد اكتر واكتر
محتارة
mohamed said…
اروح اقول نعم علشان اغير ديكتاتور بفرعون
طبعا لا والف لا
Anonymous said…
انتى بتجيبى العناوين بتاعتك دى منين
Anonymous said…
هو انتى على طول معارضه يا قطة لاى حاجه وكل حاجه
انتى اخرتك حتموتى مقتولة او مشلولة من الغيظ اللى ماسكك ده
مصرية said…
الاخوان يا حنان بيوزعوا ورق على البيوت وفى الشوارع وفى كل مكان علشان الناس تقول نعم للتعديلات الدستورية ولو تمت الموافقه فعلا عليها اعرفى ان الاخوان من الصبح هيحكموا البلد لان كل كلامهم هيروح مهب الريح وبدل ما كانوا بيقولو هندخل المجلس 35% هتلاقيهم بقوا الحزب الوطنى رقم 2 ويدخلوا بنسبة 100 % ووقتها هيختاروا الحاكم منهم
يارب خليك مع مصر وابعد عننا الاخوان وشرهم
Desert cat said…
تبقى تنزلى تقوليها فى اللجنة يا فينوسة ودورك كل اصحابك وقرايبك تقنعيهم يقولوا لاء
Desert cat said…
نهب البلد بلا رحمة

انت قاعد تتكلم كلام على الفاضى وكل همك هو الفلوس
عملت ايه ايجابى علشان تنقذ اللى باقى من البلد ده اذا كان لسه فيها باقى ؟
سيك من الكلام والفلوس اللى بتعيط عليها واعمل حاجه ايجابية لبلدك
Desert cat said…
marwa

ولا محصله حتى يا ميرو
دستور عم حنفى البواب ليه قيمة عن ده
Desert cat said…
mag

مش هترجع يا مجدى
راجع المواد اللى رقعوها وانت تعرف ان اى نعم معناها انك بتركب الاخوان على دماغنا
Desert cat said…
nor

نور احنا لما قعدنا امبارح واتكلمنا اظن اقتنعتى بوجهة نظرى
وعليه لازم تقولى لاء واى حد من معارفك اقنعيه يقول لاء باى وسيلة واى تمن
Desert cat said…
mohamed

برافو يا محمد
Desert cat said…
Anonymous

بجيبها من التلاجة
Desert cat said…
Anonymous

الله يسامحك
مش مهم اموت مقتولة او مشلولة بس مش اموت من الحسرة الاخوانجية المهلبية البتناجنية لما تحكم البلد
Desert cat said…
مصرية

انا عارفه الكلام ده يا مصرية
ربنا يستر
انا ايدى على قلبى
Boneta said…
معاكي يا قطه في كل كلمه قولتيها لالالالالالالالالالالالالالالالالا لترقيع دستور سقطت شرعيته
ونعم نعم لدستور جديد يليق بالمصريين ويحفظ كرامتهم.
هانزل بكره علشان اقول اقول لالالالالالا للتهريج والاستخفاف بعقولنا .
Desert cat said…
برافو يا بونيتا
حبيبتى انتى بجد بموت فيكى
فساد خنق مصر said…
كانت مهمته محاربة الفساد.. واجه قضايا وملفات صعبة أثناء توليه منصب مساعد المدعى العام الاشتراكى، من بينها قضايا فساد تخص عصمت السادات، ورئيس جامعة عين شمس، إلى جانب ملفات تجار العملة، وقضية لقبت وقتها بـ«سيد الجمارك المصرية»، ورغم ذلك وصف المستشار حسنى عبدالحميد الفساد الذى كان يواجهه فى الثمانينيات بأنه كان مجرد «طفل» مقارنة بالفساد الذى زخر به عصر مبارك.
تطاول المجرمين على مصر said…
لا أعرف إذا كان مبارك قد أخذ أموالا من بعض الحكام العرب أم لا، لكن ما تبجح به «المجرم الليبى الصغير» سيف الإسلام القذافى بأن «مصر كانت تشحت منا» جدد الجراح، ومصر بالنسبة لهذا «السفاح قاتل شعبه» هى الرئيس والحكومة. مرة أخرى لا أملك دليلا قانونيا يدين مبارك وأركان حكومته فى هذا الصدد، لكن المؤكد أن تجرؤ كثير من «الصغار» على مصر لم يكن ليتم إلا عندما فرط هؤلاء المسئولون الحكوميون فى سمعة بلدهم من أجل حفنة دنانير أو دراهم أو ريالات.

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز