من مظاهرة الإسماعيلية جبت لكو ؟! ممكن نتعرف على الاشكال دى سوا ؟

بما إن كلنا من يوم الجمعة 28يناير عايشين حياة ما قبل عصر المعادن فالطبيعى كان لازم أتأخر فى نزول البوست ده .. ورغم إنى من محافظة مختلفة خالص غير الإسماعيلية لكن أنا إنتمائى الأول والأخير للمحافظة دى علشان كدا كان لازم اكون متواجدة هناك يوم الجمعة .. الخميس بالليل نسقت مع مجموعة من أصدقائى اللى هناك والجمعة الصبح نزلت قابلنى وائل عند الموقف اول ما بص فى وشى قالى ايه ده هو ده لبس مظاهرات يا هانم ؟ لا بسه لى أحمر قولت له المرة الجاية ألبس لك بنفسج روحنا نقابل نشوى ونلاقى المفاجأة الغير متفق عليها تماما هى كمان لابسه أحمر مشينا احنا التلاته ومفيش حاجة اسمها شبكة موبايل علشان نجمع بعض احنا كنا بنتقابل حسب اتفاقنا فى حالة لو حصل اى ظروف هنكون فين والساعه كام ، شوية وقابلنا سامر وندى كملنا لحد شارع الإستاد وهنا كانت أعداد رهيبة من البشر لدرجة انى شكيت ان مصر كلها اتجمعت فى شارع الإستاد .. ولفت نظرنا اول لما وصلنا لاقينا ناس بتصلى فى الشارع مش عارفه ايه موضة صلاة الشوارع فى المظاهرات دى وقفنا بعيد شوية ناكل جلاكسى ونحكى قصص من الخيال العلمى مش وقتها خالص لسه الناس مش انتهت من الصلاة ولاقينا واحد ينادى بصوت عالى أوعو حد يمشى كله يخلص صلاة ويستنى بدأ الشباب يهتفوا .. مصر فى الوقت ده كان كله اتفرغ من الصلاة تماماً وتعالت عليها هتافات الله أكبر .. الله أكبر .. الشباب وحد هتافه وبالطبع كان لازم انضم لهم فى الهتاف ده وهو مصر .. ثوانى ويرجع تانى هتاف الله أكبر .. لكن إحنا لحد دلوقتى الأقوى والأكتر وغيرنا الهتاف وهو الشعب يريد إسقاط النظام .. انضم لنا مظاهرة جاية من شارع التلاتينى وبدأ العدد فى الزيادة الرهيبة ووجوه غريبة وشكلهم مخيف وكله جاى فى ايده طوب وحجارة وبدأوا يحدفوا فى الأمن ويشتموا يا كفرة يا ولاد الكلب .. وانا واقفه حاسة ان صوتى مش طالع ليه هما مش عملوا فينا حاجه دول واقفين ساكتين واحنا بنهتف محدش يحدفهم بحاجة لاقيت خبطة جت فى كتفى مش عارفه مصدرها ايه لحد دلوقتى مش حسيت بألمها لأن الموقف كان أقوى من أى ألم بدأت الشرطة ترد على الحجارة بالقنابل المسيلة للدموع .. الشباب المصرى الجميل اللى كلنا من حقنا نفخر بيهم كانوا بيعملوا قدامنا دروع بشرية علشان يبقوا حاجز بينا وبين غازات القنابل .. الأشكال الدخيلة المخيفة بدأوا يتحرشوا بينا .. راحوا الشباب عاملين حوالينا دايرة واتغير الهتاف لاء إخواتنا .. بناتنا شرفنا .. على الرغم من هول اللى بيحصل ناس بتحدف طوب فى الأمن والأمن يرد بقنابل لكن منظر الشباب كان حاجه تفرح القلب .. عرفتوا بقى مين اللى بيتحرش بينا فى الشوارع ؟ عرفتوا مين اللى بيتسافل ويقل أدبه علينا ؟ لو تفكروا من أمتا تحديداً بدأ إختراع التحرش والسفالة هتعرفوا بنفسكو ؟ اتحول الهتاف تانى لمصر والمجموعة المندسة تحدف الأمن بالحجارة والأمن يرد بالقنابل لدرجة إن السما كانت عبارة عن كتلة ضبابية دخلت فى مرحلة إنى خلاص مش قادرة أتنفس لاقيت ناس مش عارفاها لكن نشترك كلنا فى مصريتنا اللى بيدينى بصل واللى بيدينى كيلينكس فيه خل وكل لما تزيد حدة التوترات كل لما الشباب يعملوا دواير حوالينا .. الساعه 3.15 بدأ تكسير العربيات اى عربية ماشية وشوفت ناس بتحرق فى عربية واقفه فى الشارع وانا بقولهم طيب ذنب صاحبها ايه ؟ حرااااااااام .. ردد الشباب سلمية سلمية لا خراب ولا تدمير سلمية سلمية ، قوات الأمن بدأت فى التزايد وتوهنا انا واصحابى من بعض بس مش كنت خايفه ولا قلقانة لأن كان فى شباب مصرى مثقف واعى بيحمينى انا وغيرى بعد ما اتصدى الشباب لعمليات تكسير العربيات وحرقها فى الشوارع راحوا ولعوا فى الحى .. طيب ايه وجه الإستفادة من التخريب ده لحد دلوقتى مش عارفه .. فى مشهد رهيب يجسد الروح المصرية الواحدة كان المواطنين فى البلكونات بيهتفوا باسم مصر .. وكان كل لما قنبلة تنضرب كنا نلاقى البصل بيتحدف علينا من البلكونات على الساعه 5 الإسماعيلية كانت عبارة عن مدينة أشباح لا وجود فى الشارع غير للأمن والطوب والحجارة اللى عامل طبقة فوق الأسفلت .. كنت ماشية فى الشارع وكل واحد يسألنى رايحه فين فى التوتر ده ؟ كنت بقولهم انا رايحة شارع المستشفى كانوا يقولوا لى طيب خدى بالك علشان لو فى قلق قدام وانا ماشية شوفت ناس بتنزل للمجندين ازايز ميه من البلكونات واولاد فى عمر 15 و 17 سنة منزلين لهم شاى وواقفين معاهم .. وقدام بنك سوستيه كان فى ظباط بملابس مدنية وحواليهم مجندين كتير سألنى واحد رايحه فين قولت له رايحة شارع المستشفى .. قالى فيكى اصابات ولا اى حاجه قولت لا خالص بس ده طريقى وانا بكلمه وصوتى مش طالع قالى انتى مضروب فيكى قنابل ؟ قولت له انا شبعت قنابل .. قالى طيب تعالى وراح مدينى ازازة مياه معدنية وقالى اشربى منها واغسلى وشك شكرته وقالى لو مش عرفتى توصلى ارجعى لنا تانى واحنا هنحاول نوصلك .. لكن قدرت اكمل واوصل والساعه 8 كنت فى بيتنا ... دخلت البيت لا شايفه قدامى ولا قادرة اتكلم دخلت اشوف الاخبار لاقيت الجزيرة مش قادرة تستغنى عن حقارتها ووساختها المهنية ده اذا كان يستحقوا انه يطلق عليهم من أول الإدارة لحد اصغر عامل فيها إنهم اساساً مهنيين .. شغل تحريض على شماته على وساخة منتهى الإنحطاط مش قادرين حتى فى ظروف زى دى إنهم يمثلوا دور الإحترام .. الرئيس طلع القى بيانه هو متأخر جداً فى ظهوره وكلنا متفقين لو كان ظهر من يوم 25 وخاطب الشعب مش كنا وصلنا للدرجة دى من النهب والسرقة وبلطجة راكبى الموجة بعد خطاب الرئيس راحوا جابوا منافقين الإخوان زى عبدالمنعم ابو الفتوح ومحمد عمارة و عصام سلطان يقولوا ليته سكت خطابه لم يتضمن انه هيحل مجلس الشعب ويترك الحكم .. كل اللى عايزينه انه يترك الحكم ؟ كل اللى عايزينه انه يحل مجلس الشعب ؟ والشعب فين ؟ رغم الإجهاد اللى كنت فيه للساعه 4صباحاً بأتابع صرخات واستغاثات المواطنين من سكان شارع المهندسين على التلفزيون المصرى إرحمونا من البلطجية الناس اللى بتكسر المحلات وتسرقها دى مش الشباب المصرى الواعى .. الشباب المصرى اللى عملوا دروع بشرية قدام المتحف المصرى لحمايته من الحرق والنهب لحد وصول الجيش المصرى اللى إستقبلوه بالورود والهتافات المتضامنة معهم.. عرفتوا مين اللى من غبائهم وقذارتهم بيكشفوا عن نفسهم مين اللى داير يقرفنا الآثار حرام ودى اصنام وصناعها كفرة واللى يزورهم عبدة أوثان ؟ الشباب الجميل اللى إتحد مع الجيش فى منظر حضارى راقى للحفاظ على أمن المواطنين والقبض على البلطجية جماعة العصابات والميليشيات العسكرية أصحاب أقوى جناح عسكرى على حد قول مهدى عاكف فى 2006 واللى كان عنده إستعداد يرسل 10.000 مقاتل يحرروا لبنان من إحتلال إسرائيل .. الشباب الجميل اللى بيتوا فى الشوارع لمساعدة الجيش فى اطول واسود ليلة مرت على كل بيت مصرى من إرهاب وترويع آمنين .. مصر غالية علينا اوى أما المجموعة القذرة اللى طلعت تركب الموجه ومن مصلحتها النهب والقتل والخراب وسفك الدماء يمكن يفوزوا بالتورتة كاملة بما انكو بتتكلموا باسم الشعب المصرى فانا كمان هتكلم باسم الشعب المصرى واحب اقول لكو كلنا بنحتقكركوا اوعوا تتكلموا وتقولوا احنا بنعبر عن المصريين وموتوا بغيظكم اللى شوفته بعينى طول الايام العصيبة اللى مرت بينا يطمنى اوى على مستقبل وأمن وطن اسمه مصر شباب مصر الحقيقى الشريف اللى نايم فى الشوارع ايام متتتالية علشان يحمى بيته وارضه شباب مصر الشريف اللى طفى الحرايق اللى اشعلتوها وحمى تاريخ وآثار بلده الصايعة اللى فى ميدان التحرير دول عددهم كام ؟ المصريين كلهم 88 مليون لو نزل منهم مليون عملاء وسفلة وخونه فا 87 مليون شرفاء وكلنا مصر مبارك الأشكال دى لا تمثلنا ولا تنتمى لنا ولا تعبر عن كل شريف يهمه امن وأمان وطنه .

ودى فديوهات صورتها من مظاهرة الإسماعيلية وركزوا فى الوجوه شوية علشان تعرفوا الفوضى جت منين ؟ وعلشان تعرفوا العيال دى مين اللى جايبها لخراب مصر





وده فيديو لما سمعنا عن الخونة والزبالة اللى للأسف بيسموا نفسهم مصريين ولعوا فى الحى وكل الشباب الشرفاء بيجروا رغم القنابل المسيلة للدموع اللى كانت فى عيون الجمبع لكن مش مهم هما بيحصل لهم ايه الأهم انهم يلحقوا يطفوا النار اللى فى الحى قبل الخراب

Comments

Boneta said…
حبيبتي
سامحيني انا ما شوفتش الفيديوهات لاني مش قادره دلوقتي
المهم اني اطمنت عليكي الحمد لله
الكلام اللي كنت بقوله وبنقوله كلنا ان مصر هاتولع ومصر بتموت ومصر بتتخنق ومفيش حد سمعنا
اهي ولعت واتحرقت واتخنقت واحنا اللي بندفع التمن دلوقتي
انا مقهوره انا حاسه ان امي بتموت قدام عينيا وانا مش عارفه اتصرف
انا بتخنق يا عالم حرام اللي بيحصل للمصريين انا ضد مبارك وضد المظاهرات وضد الخراب المستعجل ده انا مع مصــــــــــر
قلبي واجعني عليكي يا بلدي
ارحمنا يارب
مناشدات لكل صاحب ضمير حى said…
مناشدات لإنقاذ الجرحى الذين سقطوا في المواجهات الدائرة في ميدان التحرير
فضيحه وانكشف المستور said…
المتظاهرون يعثرون على بطاقات هويه امنيه مع المهاجمين على متظاهرى ميدان التحرير ويعرضوها على الفضائيات
ELVIRA said…
اه يا حنان كدة أقدر أقول أن انا و أنتى أخر عقلاء البلد
الناس دى طالعة و هى باصة تحت رجليها و النص التانى عينه عالتورتة و مش مهم البلد تخرب
حسبى الله و نعم الوكيل
Desert cat said…
Boneta

كل الشرفاء قلبهم بيتحرق عليها
شوية المرتزقه هما اللى لا يهمهم خرابها ولا يهمهم بكام يبيعوا ارضهم
Desert cat said…
مناشدات لكل صاحب ضمير حى

اللى سقطوا فى ميدان التحرير تتقصف رقابيهم ورقاب اللى خلفوهم عالم مش متربية
روح ناشد بعيد عن هنا
Desert cat said…
ELVIRA

للأسف يا اوليفا كل اصحاب المنافع الشخصية عملوا من شوية العيال المأجورة دول ثورجية لألأسف باعو مصر بالرخيص اوى بس مش هتعدى حق مصر عمره ما هيضيع بس بعد كدا يستحملوا
Kontiki said…
هتافات الله اكبر و تحيا فلسطين و صلاة فى موعد عجيب و حى على الجهاد ضد قوات الاحتلال من الشرطة المصرية !!!!
ربنا يستر من الفوضى
انا عاوزة كل حد عاقل يسأل نفسة هل الاخوان بعد كبت اربعين سنة فى السجون و المعتقلات وبعد ما انتشروا فى الشارع زى السرطان حيفوتوا فرصة الفوضى دون محاولة للانقضاض على الحكم ؟ طبعا لا
ربنا يستر على مصر

Popular posts from this blog

قميص دهشور

كل تحرش وانتوا طيبين