Desert Cat Search
قطه الصحراء: عقبال القاعدة كدا لما يشرفونا

Tuesday, February 15, 2011

عقبال القاعدة كدا لما يشرفونا

وبدأت الأقنعة فى السقوط والفيران تخرج من جحورها
اولاً الاخوان المنتفعين تقدموا بطلب لتعديل المادة الثانية من الدستور لاء لاء محدش يفرح اوى كدا دول عايزين يعدلوها لأيه بقى يا حلوين يا اللى فرحانين ومبسوطين بالفوضى والجماعة الحلوين اللى بيقولوا لازم يمشى حالاً علشان هو السبب فى قتل اخواتنا فى كنيسة القديسين على اساس ان مبارك كان متنكر فى الكنيسة وفجرها وركب الموتوسكيل الصينى وطلع طيراان على القصر الجمهورى ولا من شاف ولا من درى .. عايزين الإسلام هو دين الدولة الرسمى وجميع التشريعات والقوانين تبقى اسلامية وطززززززز فى كل اصحاب العقائد المختلفة اللى عايشين فى مصر هما لازم ينصاعوا للمادة التانية من الدستور
وعلى ضوء ما تقدم فقد خرجت الجماعة الإسلامية من جحرها وعقدوا اجتماع منذ عشرون عاماً واخدوا بعض بالأحضان يا إرهابيين بلدنا بالأحضان واى حد يعترض هيتقتل هو واللى خلفوه وجيرانه وجيران جيرانه كمان هو حد يقدر يعترض على اوامر الجماعات الاسلامية ؟ اللى يعترض عليها بيعترض على الشرائع السماوية انتوا كفرة ولا ايه ؟ ألا حد يعرف امير الجماعة أخباره ايه ؟

افعص هون نص الخبر

الا هو صبحى صالح الاخوانجى بيعمل ايه فى لجنة تغيير الدستور وكمان طارق البيشرى رئيس اللجنة ؟ يا ألف أهلاً وسهلاً بالتعصب والعنصرية مش ناقص غير انهم يضموا لهم سليم العوا علشان تكمل .. وفى إنتظار القاعدة يشرفوا عندنا هما كمان ولو طالبان عايزة تيجى ينوروا ولو جيش الجهاد السودانى فكر يجى ياريت ينفذ من غير تفكير واعتقد بتوع حماس مش مستنيين عزومة دول حتى يوم خطاب التنحية للرئيس مبارك كانوا عاملين فرح وقاعدين يضربوا نار على الحدود بينا وبينهم صحيح اللى اختشوا ماتوا اول مرة اشوف حكومة غير شرعية فرحانة فى تنحية رئيس دولة تانية فعلا السفاله والبجاحة ليها ناسها

زادى القرداوى كمان بالفديو يغنى ويبتهج بخبر تنحية مبارك هو الغناء مش حرام يا قرداوى لا وبيتكلم عن الحقوق فى الغناء النشاز بتاعه ؟
ومش قولت لنا اخبار اسماء البنت الجزائرية اللى اتجوزتها ليله وعدت ايه ؟ اديت لها حقوقها ولا دى فى نظرك كانت ليلة حمرا ومش ليها اى حقوق ؟
اخص عليك راجل ناقص

http://www.youm7.com/News.asp?NewsID=352563

14 comments:

amr said...

وما يفرحوش ويغنوا ويبتهجوا ليه يا حنان والساحة فاضية دلوقتى قدامهم وغسيل المخ اللى بيعملوه للناس من سنين اخيرا حيكون له نتيجة وحينفعهم

ramez said...

البوست ده كله صادم يا حنان حرام عليكى خبطتين فى الراس توجع ودول 3 ورا بعض كله الا البشرى ده كمان

Anonymous said...

انا من اول ما شوفت الكلام بتاعك وانا قاعدة اصوت بالحيانى
انت فين يا مبارك تشوفنا فى الوكسة اللى بقينا فيها

Anonymous said...

ما تسبيهم يا حنان الشعب مش غبى الناس فاقت لهم واى حد يفكر يلعب بديله ميدان التحرير موجود وهننزل الشارع

M HELMY said...

المادة التانية لا هتتشال ولا هتتحط...هتفضل زي ماهي.. على الاقل لمدة سنة او اتنين قدام

Don't Worry :D:D

Menes said...

يا قطه بلوجك واحشني بجد

المهم, ردا علي كلام السيد المحترم "انونيموس", تفتكر يعني فاتت عليهم دي؟ ميدان مين بقه..هأو أو..ابقي قابلني

لازم الكلام عن الماده اتنين (او اي شبيه مقنّع ليها قد يتم دسه)
يبقي ناااااار قايده في المجتمع
أنا عايز أشوف كل قنوات التليفزيون بتتكلم عن الموضوع ده, و اسمع عن مظاهرات و أقوم اعمل واحده, و اسمع كمان عن اشتباكات عشان يبان الوش العكر بتاع المتعصبين , اخوان كانوا او مجرد جهله من النوع اللي بيتغذي عليه طفيليات الاخوان

أنا مش عايز الماده رقم اتنين, مش عشان أنا مسيحي لأني مش مسيحي, بس الفكره ان أنا مش مسلم
أنا مصري و حر في عقيدتي و مايصحش أبدا القوانين المدنيه بتاعت بلدي تتسن علي أساس ديني و يكون الدين ده مش ديني,
دي مش ديموقراطيه بالمره

أرجو كل الناس تتكلم في النقطه دي,
عايزين بدايه جديده بمعني الكلمه

Asbany said...

مش عارف إحنا دايما نحط نفسنا أمام خيارين أسوأ من بعضهما
أما حكم ديكتاتورى إستبدادى زى مبارك أو حكم دينى متعصب ؟؟

مفيش حتى بصيص أمل للديمقراطية، الشباب الواعى اللى خرجوا للمناداة بالحرية المدنية مش أمل

الإخوان دورهم زى اى حد شارك فى الثورة دى، يعنى مش ذوى أغلبية ولا قيادة علينا علشان يفرضوا آراءهم وأفكارهم، ولا معاهم عصى سحرية علشان نصحى فى يوم نلاقى مصر دولة إسيلامية

مفيش شك إن الإخوان هيحاولوا يفرضوا سلطتهم الدينية ولن يقتصر على المادة الثانية من الدستور اللى عليها خلاف دلوقتى خصوصا معارضة من الأقباط

لكن الأغلبية لها مسار ديمقراطى بعيد عن التخلف الدينى
أنا لا أتحدث عن المادة الثانية من الدستور تحديدا لكن اتكلم عن فزاعة الإخوان اللى إحنا للأسف بنقويها وبتعود علينا بنتيجة عكسية
احنا بعد ما حقناه من إنتصار على النظام الديكتاتورى أمام مرحلة مهمة للديمقراطية بجد أو بداية ديمقراطية نتحدى بيها الإخوان وغيرهم

مع تحباتى النبيلة،،

Desert cat said...

amr

وجهة نظرك صحيحة يا عمرو واعتقد انهم فعلا قربوا يوصلوا لأن زى ما انت عارف اغلب الشعب المصرى خريج محو الامية وكلمة توديه وكلمة تجيبه

Desert cat said...

ramez

اعمل ايه يا رامز ماهم ولاد الكلب فاكرين نفسهم ثورجية وهما قاعدين فى التحرير مقضينها حفلات ورقص وغنا وبالمرة خراب للبلد

Desert cat said...

Anonymous

دلوقتى فينك يا مبارك ؟
عجايب

Desert cat said...

Anonymous

والله هو وقتها فعلاً حد
يقدر يفتح بؤه ؟ هو حد يعترض على اوامر الله غير الكافر وهما معينين نفسهم مكان الله على الارض والى يفكر فى كلمة لاء من غير ما ينطقها سوف يقام عليه الحد
زمن ميدان التحرير خلاص رحل وولى

Desert cat said...

M HELMY

وجبت الثقة دى منين ؟

Desert cat said...

Menes

ه فاكرينها سايبة اى حد عايز يعترض هينل ميدان التحرير ده مش بعيد ميدان التحرير ده يبقى هو المكان اللى هينفذوا فيه الحد على اللى يفكر يعترض عليهم يعنى الكافر اللىي قولهم انتوا ظالمين
بجد عالم دماغها مهلبية خالص

وانت كمان وحشت البلوج

:))

Desert cat said...

Asbany

يادى الكلمة اللى مش حافظين غيرها الاخوان الفزاعة اللى عملها النظام
تسمى رقصهم واجتماعاتهم وفرحتهم دى ايه ؟
فزاعة برضه ؟
ما تفكروا شوية وتشغلوا علقكو الغباء الى فى العقول ده ضيع البلد وخلاها ملطشة لكل زبال