Desert Cat Search
قطه الصحراء: موعدنا6يناير

Monday, January 3, 2011

موعدنا6يناير

تحديــــــــــــــث
أولاً أنا سعيدة جدا جدا بالتفاعل اللى حصل فى البوست ده من ناس لا أعرفهم ولا يعرفونى الناس اللى سابت لى أرقام تليفونها أو اللى سابوا لى إيملاتهم وعايزين ينسقوا معايا هنتقابل إزاى المكان مكتوب يا جماعة فى البوست يعنى الوقفة هتبتدى من قدام محافظة الزقازيق لحد الجامعة يوم الجمعة الساعه4 .. أما الناس اللى مش من الزقازيق وعايزة تيجى ومش عارفين المحافظة فين ولا الجامعة اللى جاى من القاهرة هينزل المحطة يعنى بينه وبين المحافظة أقل من خمس دقايق مشى أما الناس اللى جاية من محافظات تانية فأنت ممكن تاخد تاكسى من أى مكان تنزل فيه يوصلك للمحافظة ولو إنى أشك فى سهولة المواصلات فى اليوم ده .. لأى إستفسار للأسف مش هينفع أكتب رقم تليفونى لكن هكتب إيملى واللى يحتاج يسأل على أى حاجه يبعت لى رساله .. الناس القريبة منى عارفين هيتواصلوا معايا إزاى
بجد مش عارفه أعبر لكو إزاى عن سعادتى بيكو وسعادتى الأكتر لما عرفت حملة الدروع البشرية اللى عاملينها طلاب جامعة الزقازيق بالتنسيق مع الأمن بمعنى إن الطلبة هيوزعوا نفسهم على كنائس المحافظة لحماية المصلين المسيحيين فى الكنائس طيب أقول أيه أكتر من إنى فخورة أوى بيكو هما دول بجد المصريين اللى فى المحن بيبانوا واللى بشكره بجد من كل قلبى المصرى افندى اللى حمل على عاتقه حماية المقدسات المصرية بصرف النظر عن اسمها مسيحية او مسلمة الاهم ان كلنا فى مركب واحد هو مصر
nana_catofdesert@hotmail.com




مش مهم مين مسلم ومين مسيحى الدين فى القلب وكل واحد بطريقته بيعبد الرب
مش مهم انت اسمك ايه ولا ابن مين المهم اننا اسمنا إنسان ممكن نكون ساكنين جنب بعض وممكن تكون قاعد جنبى فى المدرسة وفى الجامعة وفى الشغل وفى المصالح الحكومية وفى المواصلات المهم إننا شهادات ميلادنا وأوراقنا الرسمية خانة الجنسية فيها مصرى وعلشان انا وانت واخواتنا وجيرانا وولادنا عايزين نعرف الأجيال اللى جاية يعنى ايه إنتماء يعنى أيه إنسانية


لازم كلنا نكون ايد بإيد يوم6يناير فى الكنائس المصرية كل سافل لازم يعرف إننا بيضمنا أرض واحدة وسما واحدة وان مهما كانت مشاكل بلدنا ومهما ضاقت بينا اى براح فيها بيقضينا لازم يعرفوا إن اللى بيأذي جرجس ومينا بيأذى محمد وأحمد

وكمان فى كل محافظات مصر

يوم الجمعة الساعه 4وقفة إحتجاجية مش علشان نطالب بوظيفة ولا علشان مرتبات متدنية ولا علشان مستوى معيشة غير آدمى لاء النهاردة دى وقفة إنتماء وحب وتسامح كلنا بنقول لكل إرهابى ومعتدى أنا مصرى الدم اللى على الأرض قدام الكنيسة فى نجع حمادى وإسكندرية ده دم اخويا وأختى ومهما عملت مش هتقدر تبعدنا أو تفرقنا هتكلم عن المحافظة اللى بنتمى ليها وهى محافظة الشرقية الوقفة هتكون امام مبنى المحافظة وحتى الجامعة كل واحد هيجى معاه مصحف أو إنجيل الوقفة سلمية صامته لا مظاهرات ولا شعارات ولا هتافات ولا مسيرات الالتزام بعدم التجمهر بعد انتهاء الساعة لتجاوز اي مشكلة مع الامن
اما باقى المحافظات التانية واللى عايز يعرف مكان الوقفة السلمية يدخل على اللنك ده
http://on.fb.me/1EgyptStand

انا هكون موجودة فى الزقازيق
قولتوا لى بقى مين جاى ؟

16 comments:

جهاد صلاح الدين said...

انا جاى يا حنان
انتى عارفه رغم لسانك طويل وفيه حتة زيادة عايزة القطع
لكن كتير بحس انك بنت جدعه وليكى موقف حقيقى وعقلك يحترم
جاى فى الموعد ومعايا كل اصدقائى وجيرانى
شكراً على إهتمامك يا أجرء بنت قريت لها

normary said...

hanoooon
ana gaya el sharkia ya gamil
ha atesl beky w ashoof hanzabt ezey

Desert cat said...

جهاد صلاح الدين

ماشى هتغاضى عن قلة ادبك اللى فى الأول وبعدين مش أنا اللى عاملة الوقفة دى انا مجرد عضو غير فعال كمان

ميرسى لكلامك يا استاذ جهاد
وتشرف انت واصدقائك وجيرانك

Desert cat said...

normary
لووووول
دى الشرقية هتولع قصدى هتنور
اتصلى فى اى وقت يا قمراية

dr.lecter said...

انا اصلا من الزقازيق
لو مكنتش في القاهره هاجي الوقفه في الزقازيق

Boneta said...

قطه الصحراء
انتي بنت جدعه جدا واصيله جدا وانا بحترمك وبحبك مش لانك قولتي كلمتين في حق المسيحيين لأ انا بحترمك لانك انسانه بتحترمي انسانيتك وعقلك وضميرك
سامحيني لاني مش لحقت اعلق علي البوست اللي قبل ده لكن انا متابعه معاكي كويس جدا وانتي اكتر واحده كنت مستنياكي تتكلمي وقلت في باللي هي البنت دي راحت فين لدرجه اني قلقت عليكي اصل مش عوايدك يا قطه عودتينا تكوني سباقه وطبعا كنت متأكده انك هاتقولي اللي يمليه عليه ضميرك وانسانيتك وده اللي عملتيه فعلا
انا لسه مش شوفت اماكن الاحتجاج وباذن الله هانزل انا وكل عيلتي واصحابي اذا قدرت اخدهم معاياوكنت اتمني اشوفك بس للاسف انا عمري ماروحت الشرقيه بس اعرف ان الشراقوه ناس بيشتهروا بالكرم
حنون مش ينفع تعتصمي في القاهره :)؟
ربنا يحميكي

Desert cat said...

dr.lecter

انا عارفه يا دكتور انك من الزقازيق
من ايام رساله

:))

حاول تبقى فى الزقازيق يوم الجمعة
انا بحاول دلوقتى اتصل بالناس اللى كنت عارفاهم فى رسالة قبل ما اسيبها
والاهم دلوقتى يوم6يناير
نلتقى الجمعة بقى

Desert cat said...

Boneta

بونيتا يا حبيبة قلبى
انتى بتشكرينى على ايه بس هو انا قادرة اعمل اى حاجه
انا كل اللى بعمله بحاول اجمع المعارف والصحاب وان شاء الله تيجى بنتيجة

انا ينفع جدا احضر فى القاهرة بس انا هيبقى عندى فى محافظتى والعدد عندكو هيبقى كبير بما فيه الكفاية وانا يهمنى كل المحافظات يبقى فيها الاعداد كبيرة علشان نثبت للناس كلها اننا فعلا كلنا شخص واحد وايد واحدة
علشان كدا مينفعش خالص اجى القاهرة وفى نفس الوقت فى وقفة فى الشرقية
بس هنتقابل أكيد وفى أقرب وقت ممكن

Anonymous said...

انا عمرى ما نزلت الشرقية يا قطة
ومعرفش المحافظة فى الزقازيق فين
وعايزة اجى احضر معاكى اتصل بيكى ازاى
قولى اى طريقة اتواصل معاكى بيها

مريم

Desert cat said...

مريم

أنتى تشرفينا فى الشرقية
انتى عارفه انا عاملة مودريشن كومنت ممكن تبتعتى ايملك او رقمك وانا هكلمك

elmasryeffendi said...

انا عندى خدمة من يوم 6 يناير بحى شبرا و المهمة حماية المقدسات المصرية

Desert cat said...

elmasryeffendi

حقيقى انت انسان رائع جدا
قولت لك قبل كدا نفسى اعمل منك كوبى فى كل مكان فى مصر
ياريت كان ينفع

Anonymous said...

حقولك إيه أنا مش مستغربة من موقفك. إنسانة شجاعة ودوغري شكرا لك وشكرا لكل مصري ظهر معدنه الاصيل في وقت المحنة. كان نفسي اكون معاكم بس حاروح كنيسة هنا وأصْلي مش بس لارواح الشهداء لكن لمصر كمان علشان ربنا يحرسها من كل شر. اللي بتمناه منكم مش حماية المسيحيين من اعتداء تاني لكن حماية البلد من أي حد يستغل المناخ المشتعل ويندس بين الشباب اللي في حالة غليان ويولعها.

المصري افندي. مش عارفة اقولك إيه. كل ماكون على وشك افقد إيماني بالإنسان المصري تطلعولي وترجعولي إيماني بالخير والجمال في مصر. قريت تعليق في المصري اليوم أو اليوم السابع مش فاكرة أعتقد إنه لك. كنت بترد على واحدة لها تعليق برده. ردك كان في مقتل وبخفة دم رهيبة. ابتسمت في وسط دموعي.

شكرا احبائي.

مصرية من كندا.

Desert cat said...

مصرية من كندا
انتى بتشكرينا على ايه ؟
اللى بيحصل فى مصر ده بسبب تخاذلنا واللى عمله النظام وخلانا مش عندنا انتماء هو السبب فى اللى وصلنا له ده
اللىب يحصل ده مجرد بداية لاصلاح ما افسدته ايدينا

ذو النون المصري said...

تحياتي للجميع من خارج مصر
سعيد بمجهودكم و تمنيت ان تكون الاوضاع في مصر افضل حالا
و ان يكون استفتاح العام افضل من الصورة التي تم استفتاحه بها

Desert cat said...

ذو النون المصري

ومين كان يتمنى ان الصورة فى اول ايام السنة تكون بالشكل القميئ ده
يمكن اللى بنعمله دلوقتى يكون بداية لتصحيح مسار الصورة فيما بعد

تحياتى