Desert Cat Search
قطه الصحراء: اللى يقابله مسيحى يقتله

Wednesday, November 24, 2010

اللى يقابله مسيحى يقتله

المصريين فى مصر بلدنا المصريين اللى فلقونا بالاسطوانة المشروخة مصر بلد الأمن والأمان بقت مصر بلد المصالح والمنتفعين ... وبما ان المشايخ على مختلف أنواعهم وألوانهم وجنسياتهم وزعوا الأفيون على الشعوب والناس تقبلته بصدر رحب لدرجة انهم دخلوا فى الغيبوبة فبقى الجهاد دلوقتى هو بقتل المسيحيين .. اللى هما زينا مصريين واللى هما برضه زينا المفروض ان ليهم حقوق فى البلد وعليهم واجبات زى ما علينا بالظبط بس لأ ابو اسحاق الحوينى قال عليهم كفرة واوعى يوم عيده تقوله كل سنة وانت طيب لانك كدا بتساعده على الكفر ولو قابلك فى طريق اوعى تبتسم فى وشه وضيقوا عليهم فى الطرقات علهم يعودو الى رشدهم ويدخلوا فى دين الله افواجا او نهججهم من البلد فاصبح المسيحى فى مصر عليه واجبات ومالوش اى حقوق .. اصل يعنى ايه ناس تفرح بالعيد وتروح تصلى ده لازم يتحرق قلوبهم على اولادهم علشان نقتل فرحتهم اهو ده اللى ناقص كمان انهم يبقى لهم اعياد ويفرحوا بيها .. علشان ايه يبنوا كنيسة بفلوسهم مش عاملين صناديق فى الشوارع وكاتبين عليها العبارة الخالدة تبرعوا لبناء المسجد .. مجانين دول عايزين يبنوا كنيسة فى مصر اللى دمرت حضارتها وارتدت ثياب البداوة وبقت وهابية مع سبق الإصرار والترصد ؟؟ لكن لما يتقال لهم فى امريكا حددوا مكان تانى ابنوا فيه مسجد يصرخوا ويصوتوا ويقرفوا الدنيا نواح وياريتهم اتمنعوا دول مسموح لهم بالبناء لكن الاختلاف على المكان .. شوفتوا بقى امريكا الكفرة ولاد الكلب اللى عايزين يفسدونا وبيعملوا علينا مؤمرات بيحترموا انسانية ازاى وحرياتهم الشخصية ؟ لكن فى مصر ازاى المسيحيين اللى هما مصريين يفكروا يبنوا كنيسة فى بلد مش بتاعتهم وبتعتبرهم عاله علشان كدا بقوا ملطشة لوعضو مجلس شعب عايز يستفيد يسلط بلطجية عليهم عادى وهما مين هيعبرهم اصلا ويقف جنبهم .. داخلين على انتخابات نخترع اى مصيبة نحطهم فيها مفيش مشاكل وبما ان الاخوان والحزب الوطنى وجهان لعلمة واحدة وعلى علاقة سرية غير شرعية اذن الاحداث اللى حصلت النهاردة فى العمرانية للمسيحيين لا تخلو منها يد الإخوان .. اشمعنا فاقوا فجأة بعد ما المبنى قرب يتشطب ؟ رايحين يهدموه ويرموا قنابل مسيله على المسيحيين العزل ويحدفوهم بالطوب وكان غزة اتفتح لها فرع جديد فى العمرانية ؟ واشمعنا الكنائس اللى عليها حظر وبيتعمل عليها كل الضجة دى حتى لو فكروا يرمموا سور الكنيسة ؟ واشمعنا المساجد والزوايا منتشرة اسفل كل البيوت والعمارات وفى كل شارع وزقاق وبالرغم من كدا برضه بيقفلوا الشوارع وقت الصلاة ده غير الاصوات المزعجة اللى بتطلعها المكرفونات 5مرات فى اليوم ؟؟ ولمصلحة مين قانون البناء الموحد مرمى حبيس الادراج ؟
ويعنى ايه مستشفى الهرم عنده اوامر بعدم استقبال المصابين واسعافهم .. طيب كنتوا اعتبروهم جرحى غزة .. اه سورى نسيت انهم مش مسلمين وبالتالى لازم يتعاملوا معاملة الكلاب نعاملهم بانسانية على اساس ايه ؟



فى حد يرضى يشوف ابنه بيموت قدام عينه بالشكل ده يا ظلمه

19 comments:

dr.lecter said...

والله مبسوط في الداخليه مبسوووط مووت
مبسووط جدا

الرجاله اللي عملت مظاهره دول جدعان ورجاله من ظهر رجاله

خلي بقي حسني يعملها علي روحه

Kontiki said...

:( :(
مفيش تعليق علية العوض :(

ELVIRA said...

انا يدوب فتحت لقيت الخبر بس لسه مجمعتش معلومات كافية عنه
لكن اللى فهمته انه لازم اوراق علشان يبقى قانونى بناء الكنائس
و بما انه فيه تلكيك فكان الافضل انه يكملوا الاوراق على انها كنيسة مش مجمع خدمات بس او يصححوها
ياما يلغوا بند التصاريح دى لبناء دور العبادة كلها فى البلد

emy said...

المرة دي ياقطة,إتفضح دور الدولة, إللي بتلعب بورقة الفتنة الطائفية في كل أزمة. المرة دي الدولة ماكانتش ذكية زي كل مرة, ودفعت لشوية بلطجية عشان يقتلوا المسيحيين أو يحرقوا بيوتهم,ويبان الحادث إن فيه إحتقانات بين مسلمي ومسيحيي مصر. واضح إن ده إسلوب الدولة لمحاولة الغلوشه على أحداث مش عايزه المصريين يشوفوها (زي إنتخابات مجلس الشعب دلوقت).. منهم لله. ويحمي مصر المحروسة شر سياساتهم الهدّامة

Boneta said...

انا بجد معجبه جدا بصراحتك مع نفسك ومع الناس مش كتير ناس زييك كده
ربنا يحميكي
وتعليقي هايكون جزء من ترنيمه:
"مالي غيرك ألجأ ليه ربي وانا تعبان
مالي غيرك أحتمي فيه لو ضاع الامان
انت الضامن بكره ويومي
انت بتعطي راحه نومي
انت وحدك بس
اقدر ألجأ ليه
============
وبما ان مالناش ملجأ غير ربنا
فا احنا بنطلب منه يرفع عننا ظلم البشر اللي مات ضميرهم وانعدمت انسانيتهم
ربنا موجود
تحياتي لك وللجميع

elmasryeffendi said...

اللى بيحصل ده مهزلة بمعنى الكلمة و مش وليدة اليوم و لكنها بدات منذ ما يقرب من 50 سنة و مش فاهم ايه المشكلة انهم يفعلوا قانون بناء دور العبادة لكن المشكلة مش فى ده ، اللى مستغربه ايه البلطجة و الهمجية دى لو حتى طلعت اشاعة عن قطعة ارض هاتتعمل كنيسة تلاقى الاخوة المتاسلمين جرى نصبوا فيها السجاد و لموا التبرعات عشان يبنوها مسجد ، و هى المساجد ناقصة و بعدين ماذا يضيرنا اذا بنيت الاف الكنائس ، لا الاسلام هاينقص و لا المسيحية هاتزيد، بجد حاجة اخر مسخرة و مش هاينفع تمشى الامور كده لانها حتما ستنفجر فى وجهنا جميعا

ALHBALABADY said...

اكيد ربنا مش ح يضيع حق اولاده
ربنا موجود

Desert cat said...

dr.lecter

حسنى مش هيعملها على روحة وعامل نفسه مش واخد باله والموضوع شوية وهيعدى لان ده العادى فى بلد شعبها كله جبان

Desert cat said...

Kontiki
فى احيان كتير قلة الكلام بتكون ابلغ من اى كلام

Desert cat said...

ELVIRA

انا شايفة انك فعلا تقرى الاخبار علشان الكلام ده غلط

Desert cat said...

emy
حينما يحكم نظام تخطى الثمانون عاما فتاكدى ان كل فعل ماهو الا مسمار فى نعشه الاخير

Desert cat said...

Boneta
تصدقينى لو قولت لك انى متملكنى احساس بالعجز حتى مجرد شكرك على كلمات الثناء مش قادرة اكتبها لانى مش عملت اى حاجه

شكرا على الترنيمة اتمنى انه تكون عزاء لكل انسان حاسس بالظلم

Desert cat said...

elmasryeffendi
الله يجحمه ناصر
قام بانقلاب هو وشوية عواطلية بيدفع تمنه شعب باكمله من كره وتعصب وفساد وسفالة وانحطاط
لو الدين قال للعالم الوسخة اللى بتقتل فى ابرياء وبتمنع ناس من انشاء بناء لعبادة الله فيه يبقى انا مش عايزة الدين ده

Desert cat said...

ALHBALABADY
ربنا يصبر اهالى ضحايا نجع حمادى وضحية العمرانية

Ms Venus said...

ربنا موجود


ومسيرها تنتهى

الاسلام هو الحل: لتحليل الحرام said...

الاسلام هو الحل: للنصب والاحتيال

الاسلام هو الحل: لقتل كل من هو ليس مسلم ونهب ماله ونساءه

الاسلام هو الحل: لاحتلال البلد وهدم اهرامها وتاريخيها وتراثها وتحويلها الى مزبلة المتاسلمين الطامعين بتحويلنا الى سوق جواري وعبيد

الاسلام هو الحل: لتحليل قتل المسيحي والبهائي واليهودي والسائح والعلماء والكتاب والمفكرين

الاسلام هو الحل: لاحلال هالة من القدسية على الشر والاشرار وتحليل الاغتصاب

اهو كله باسم الدين وفالاخر لما نتكلم بييجو البقر والهمج ويتهمونا بالاسائة للاسلام

وليه باقول بقر وهمج؟؟؟
علشان ميعرفوش حاجة عن الاسلام غير انهم اتعلمو انهم بلبسو اشرارهم ووساختهم بهالة من قدسية الاسلام

اخ بس لو احكم البلد بقبضة يدي الغاضبة

SERVANT OF JC said...

أشكرك يا قطة علي مشاعرك الجميلة وروحك الطيبة اللي فعلا افتقدناها الأيام دي..

الحكومة المصرية بتعطي تراخيص لبناء الكباريهات والخمارات بطول شارع الهرم وعرضه لكنها لا تسمح ببناء كنيسة علشان الناس تصلي وتتقرب لربنا لأن هذة البيوت في نظرهم بيوت كفر وشرك بالله لكن الكباريهات والخمارت أماكن بتروج للسياحة والدخل القومي من أشقاءنا الخليجيين

هي الناس فاكرة انها كدة بتحارب المسيحية بالتضييق علي بناء الكنائس.. ياريت الناس دي تقرأ التاريخ وتعرف انه بالرغم من اضطهاد المسيحيين في زمن الإمبراطورية الرومانية إلا إن المسيحية لم تنقرض ولم تندثر وانتشرت في العالم كله..

مرة تانية بشكرك جدا علي كلامك ومشاعرك االجميلة

تحياتي :)

Anonymous said...

عارفة يا قطة في وسط همي وحزني على خالد سعيد ومكاريوس والعسكري المصري اللي استشهد بإيد حماس مابقتش شايفة أي منطق ولا عارفة مين اللي بيعمل كده. كل اللي فاهماه إن إنسان مصري في عمر الزهور بيموت قبل اوانه. الضلمة جامدة قوي ومش شايفة أي بصيص نور. صوتي مكتوم وحاسة إني بعيش كابوس بحاول أتكلم وصوتي مش طالع.
في وسط كل ده إنتي وكل اللي بيعلقوا في مدونتك اقوياء جدا وفي منتهى الشجاعة. حقيقي مش عارفة بتعملوا كده إزاي وبتجيبوا القوة دي منين.

والله انتي صعبانة علي said...

مرارتك يا حبيبتي مرارتك