Desert Cat Search
قطه الصحراء: ولو انه قرار متأخر

Tuesday, October 12, 2010

ولو انه قرار متأخر

ولو انه قرار متأخر بس كويس انه حصل
تم قفل قناة الناس والحافظ والخليجية والصحة والجمال وتحذير لقنوات السحر والشعوذة والعلاج بالحبة الخضرة والبنفسجى وعسل السدر الجبلى اللى يشفى من كل الامراض ان شاء الله ده غير اعلانات اللحاف الاسلامى لكن البطانية كفر والرنة الاسلامية والموبايل الاسلامى .. اما البرامج فحدث ولا حرج عن الفتاوى المهلبية البنتنجانية وفى الاخر تطلع صنية مسقعة بطعم الكوكونت ياخدها المهابيل فى عقولهم وينزلهوا الشارع يقلوا ادبهم اصل الشيخ قال المرأة عورة وفتنة وتنقض الوضوء زيها زى الكلب يبقى انا اقرف المراة فى عيشتها وان اتحرشت بيها يبقى جهاد ايوا ما هو الشيخ قال كدا .. والمسيحى حرام تقوله كل سنة وانت طيب فى عيده اصل كدا بتساعده على الكفر برضه الشيخ قال كدا .. يبقى اقابل مسيحى اتف فى وشه على طول علشان ادخل الجنة وانعم بالحور العين اللى مستنيين هناك .. وان قولت له القرآن قال يقولوا لك يا كافر الشيخ قال .. يعنى الشيخ ولا القرآن يا ابو جهل يقولك ماهو الشيخ بيتكلم بالقرآن .. وبعدا ما بقى تقديس الشيوخ هو السائد ورمى العقول فى المراحيض وتسليم كل اعضائهم للشيوخ السائد .. أصبح الانحدار والانحطاط الاخلاقى فى كل مناحى الحياة برضه هو السائد
بجد تحية شكر وتقدير لكل اللى اخد القرار .. وسعيدة بان جهودنا لم تضيع هباءاً فقد كانت بدايتنا من الفيسبوك

الحملة المصرية لاغلاق قنوات التطرف الناس -نسائم الرحمة - الحافظ

ولا زالت جهودنا مستمرة للقضاء على التطرف والتخلف ومروجيه

4 comments:

elmasryeffendi said...

فعلا هو قرار متاخر قوى لان السم انتشر فى جسد الوطن لكن يا خوفى لا تكون حركة بس عشان الانتخابات و الذى منه لان الاستثناءات ما فيش اكثر منها فى بلدنا و هايلاقوا سكة يطلعوا بيها تانى ، دول عصابة كبيرة و فيها الحجر و العجينة و كله مسجون فى اوضة الوطن

BenBaz said...

داخل مدونتك وعارف انك هتكتبي عن دا هههههه ... تموتي انتي في الاخبار دي .. تحياتي يا بنت الناس المحترمه

Desert cat said...

elmasryeffendi

حتى لو طلعوا تانى هيلاقوا اللى يقف فى وشهم لانهم الاعيبهم كلها بانت وورقهم بقى كله مكشوف خلينا نتفائل بس شوية

Desert cat said...

BenBaz

يا عزيزى ما انت عارف ده انا مفشية نفسى ليهم يا انا يا هما فى البلدى دى
ههههههههههههه