وكان خصوصيات الاخرين مشاع

هل يؤمن الجميع بان هناك حياة اخرى بعد الموت فيها العقاب والحساب ؟
ام اصبحت العبادة مزايدات على حياة الأخرين الشخصية مهما سجلوا من فديوهات ؟
معرفش باى بجاحة وباى حق وفى اى عرف وفى اى دين يقوم مجموعة من المرتزقة المتخلفين عقليا المنحلين اخلاقيا بمظاهرات لمطالبة اطلاق سراح كاميليا .. يعنى الست سجلت فديو قالوا لالالالا دى مش كاميليا فين الحسنة اللى كانت فى وشها .. يعنى انت يا سلفى يا متعفن رايح تبحلق فى وش الست هى يعنى النظرة مش سهم من سهام جهنم يا مدعى منك ليه ؟
ونطالع الخبر ونشوف الوجوة اللى فى الصور وكل واحد همه يطلع فى الكادر علشان القوادين بتوعه يرضوا عنه

عشرات المصلين يتظاهرون عقب صلاة الجمعة بمسجد ''الفتح'' للمطالبة بإطلاق سراح كاميليا شحاته


مش شوفنا الاشكال دى عملت مظاهرات بسبب الغلاء الفاحش فى الاسعار ؟ سواق الميكروباص بيقول للركاب امبارح اللى انا كنت من ضمنهم الطماطم بعشرة جنيييييه .. حسبى الله ونعم الوكيل
هما الجرابيع اللى فى الصور دول مش حاسين بالمعاناة اللى الشعب بقى بيعانى فيها ؟
مش من باب اولى يعملوا مظاهرات ضد اللى سارقينهم وناهبينهم ؟
مش من باب اولى لو يهمهم الدين كانوا قالوا كلمة حق فى وجه سلطان جائر ؟
ولا فى دى ميقدروش واللى بيندفع ليهم لعمل الفتنة وقلة الادب فى المساجد والشوارع مكفيهم
الست خرجت واعلنت انها مسيحية
وطالبت من الجميع يبعدوا عن حياتها الشخصية .. حد من الجرابيع دول يرضى ان حد تانى ينتهك حياة زوجته او اخته او اى حد يخصه بالشكل الفج ده ؟
مين اللى طلب منهم يكونوا اوصياء على الناس
مين اللى طلب منهم انتهاك حرمات الناس
لو معاهم توكيل من ربنا ياريت يطبعوا منه نسخه ويوزعوه زى ما كانوا بيوزعوا فى مظاهراتهم المشبوهه منشورات لعمل الفتنة اصل البلد ناقصة حرايق

Comments

Ms Venus said…
مين يسمع ؟
Desert cat said…
مصابين بحالة صمم جماعى لا يسمعوا الا اوامر قوادهم
Anonymous said…
أنا بجد مش فاهمة إنتي عاوزة إيه بالظبط. غلاء إيه وحريات إيه وفوضى وأمية إيه. كل ده كلام فارغ المهم نعرف كاميليا اسلمت ولا لسة مسيحية وساعتها كل مشاكلنا تتحل. احنا بعون الله مانهزش طولنا ونطلع مظاهرات علشان حاجات فارغة. احنا نتحرك علشان نولع البلد ونخربها وساعتها الفقر والجهل حيبقوا أقَل مشكلة عندنا جنب مصايب الفتنة الطائفية والخراب اللي ممكن تعمله فينا. مين بيحركنا وفي أي اتجاه مش مهم المهم نتحرك ونضيع الامل الباقي في مستقبل بلدنا.

إنتي عارفة في بلاد الغرب الكافر كام واحد كل يوم بيعتنق البوذية والبهائية وحتى بيعلن إنه ملحد؟ ولا شفنا بوذي بيهلل ولا مظاهرات بتطلع علشان واحد نقص من هنا وزاد هنا. تخيلي مش بيكتبوا الديانة في البطاقة ويسموها قال إيه حرية عقيدة وفكر ودولة مدنية. شفتي الكفر؟ ماهو علشان كده ربنا غضبان عليهم واحنا في تقدم وازدهار.

ومش عاوزانا نطلع مظاهرات؟ طب بالعند فيكي مش حنبطل مظاهرات وحنخربها ونقعد على تلها ونبقى فرجة العالم.

معلش يا قطة أصل قلبي وجعني من منظر المصريين وهم ناسيين مشاكلهم الحقيقية ومتفرغين تفرغ كامل للكره وعدم الثقة ونظرية المؤامرة. حاجة محبطة جدا لما تشوفي شعب بيدمر نفسه بنفسه.

ياترى حنفوق قبل المؤامرة دي ماتقضي على الباقي من ادميتنا وحضارتنا؟

مصرية من كندا.
emy said…
الدولة هيا إللي عايزة كده. وواضح إن مافيش فايده ف الشعب ده.. من يوم قطار الصعيد ماإتحرق والتلات آلاف مصري ماتوا ومحدش إتحرك, من يوم حادث العبارة والألف والمتين ماغرقوا ومحدش إتحرك, ومن يوم ماحصلت أزمة رغيف العيش والناش دبحّوا بعض في الطوابير وماحدش إتحرك. وبعدها بأيام طلعوا مظاهرة عشان الإخوان!!!!!وأنا بقول مافيش فايدة
Kontiki said…
الاسلام نزل فى ارض القبائل و العصبيات القبلية :) وتلاقى فى مصطلحات مثل الغيرة على الدين وضيفى لدة ان الناس مشحونة كل واحد مشحون بمشاكلة فطبيعى كل واحد عاوز متنفس واحسن وسيلة للتنفيس وعدم الشعور بالذنب و الشعور بالفخر والحماس انك تدافع عن الدين لا المسلمين حيزيدو حاجة ولا المسيحين حينقصوا من غير كاميليا هى بس عصبيات و اسلوب الجاهلية والعنصرية من الطرفين والحق مش على اللى اتظاهروا بس الحق على اللى ساب الاعلام يشحن و ساب بيشوى يلك و يصرح و كاميليا انجيلينا جولى تسيب البيت و تفرح بالشو الاعلامى وتطلع تقول الكنيسة دى الجنة بلا غم مصريين هم و غم
elmasryeffendi said…
بجد عالم مقرفة و اعتقد اننا كدولة متخلفة نستاهل كل اللى بيحصل لنا بسبب هلؤلاء المرتزقة الذين احتكروا كل شئ حتى الحق فى الكلام، ماذا يضير الاسلام او يفيد المسيحية ان هى اعلنت انها مسيحية ؟ دى امور خاصة بين العبد و ربه
Ameerov said…
بصراحة لما اتفرجت على الصور دى مش قدررت أمسك نفسى من الضحك
واللى ضحكنى أكتر ان واحد من المعلقين شكله بيتمنى إنها ترشح نفسها فى السوق (أقصد البرلمان) بشكلها الاسلامى

(الحل الوحيد للرد على اللامنطق هو السخرية
والحل الوحيد للرد على ما يحدث فى مصر هو الشخرية)
:)
تعليق بجريدة الشروق يستحق التفكير said…
الحل الوحيد ان يطبق القانون على الجميع
...
الفتنة الطائفية تمر بمرحلة خطيرة ولكن التاريخ يشير الى ان عندما تكون الدولة ضعيفة تنتشر الفتنة-ليس فقط بين المسلميين والاقباط ولكن الاخطر الفتنة بين المسلميين انفسهم التى نشعر بها الان الجميع متربص الى الاخر والاجهزة الامنية لها زراع طويلة تطولنا لينما ذهبنا حتى فى منازلنا مما حول الانسان المسلم المسالم الى مشروع ارهاب… إقرأ المزيد ..ى لان الظلم يكسر النفس -الحكومة هى التى كسرت الناس مسلميين واقباط [
جذور الفتنه said…
قطه
الموضوع
ليس كاميليا ولا وفاء الموضوع هو كما سماه علاء الأسوانى التحيز الأيجابى
لفئه او كما تشرح صحيفة العرب
جريدة العرب فقد اهتمت بموضوع الفتنة الطائفية في مصر، حيث ذكر الكاتب شريف عبد الغني، أن حالة الاحتقان الطائفي في مصر سببها غياب الديمقراطية فضلا عن سياسة التعذيب لدى بعض العناصر الأمنية والتي يمر بها المواطن المسلم دون أن تطال المسيحيين خوفا من ردود الفعل الدولية، مما يشعر المسلم بأن الدولة تستأسد عليه دون غيره فيوجه غضبه للمسيحيين لعدم قدرته على مواجهة الأمن. ويشير إلى أن الطرفين في حاجة إلى توحيد مطالبهم بوجود ديمقراطية حقيقية للحصول على كافة حقوقهم بدلا من التفرغ للتصريحات النارية بينهم ومقاطع الفيديو التي تتحدث عن إسلام أو تنصير أفراد.
جذور الفتنه said…
قطه الموضوع ليس كاميليا ولا وفاء ولكن التحيز الأيجابى لضعف الدوله كما سماه علاء الأسوانى وتشرح صحيفة العرب
....
جريدة العرب فقد اهتمت بموضوع الفتنة الطائفية في مصر، حيث ذكر الكاتب شريف عبد الغني، أن حالة الاحتقان الطائفي في مصر سببها غياب الديمقراطية فضلا عن سياسة التعذيب لدى بعض العناصر الأمنية والتي يمر بها المواطن المسلم دون أن تطال المسيحيين خوفا من ردود الفعل الدولية، مما يشعر المسلم بأن الدولة تستأسد عليه دون غيره فيوجه غضبه للمسيحيين لعدم قدرته على مواجهة الأمن. ويشير إلى أن الطرفين في حاجة إلى توحيد مطالبهم بوجود ديمقراطية حقيقية للحصول على كافة حقوقهم بدلا من التفرغ للتصريحات النارية بينهم ومقاطع الفيديو التي تتحدث عن إسلام أو تنصير أفراد.
Desert cat said…
مصرية من كندا

انا بس كنت بقول الناس اللى طالعة عاملة مظاهرات علشان كامليا اللى بتقولهم مش تتدخلوا فى حياتى الشخصية يعملوا مظاهرات علشان عيالهم يعيشوا كويس ويتعلموا كويس يمكن يحسوا بادميتهم شوية
لكن واضح انهم مش عايزين يبقوا بنى ادمين
وبعدين هى لسه مش خربت
ماهى خلاص بقت رماد
Desert cat said…
emy

وده وان دل يا ايمى فيدل على تحالف الدولة مع السلفيين والاخوان ومدى استفادتها منهم لان بعد كل كارثة وكارثة تلاقى واحد طالع لك يقولك المظاهرات حرام زى الزبال اللى اسمه يوسف البدرى
Desert cat said…
Kontiki

طيب مش بدل ما يثوروا علشان واحدة اصلا رافضاهم يتدخلوا فى حياتها يثوروا علشان يعيشوا حيلاة ادامية ولا هما مبسوطين بعيشة الحيوانات وحقوقهم المهضومة المهم مين راحت فين
Desert cat said…
elmasryeffendi

ازاى تقول انها امور خاصة بين العبد وربه امال انت كافر
هما معاهم توكيل يحاسبوا بيه الناس
Desert cat said…
Ameerov

انت شوفت التعليقات ؟
هههههههههه
دول محسسنى انهم راجعين من غزوة بدر
Desert cat said…
جذور الفتنه

الريس جاى يقولك النهاردة لن اسمح للمساس بوحدة الوطن
امال اللى بيحصل فى البلد ده ايييييه ؟
مفيش دكتور اذن كويس يوصل قصر القبة ويجى يطمنا على سلامة السمع عند الريس

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز