Desert Cat Search
قطه الصحراء: فى انتظار فتاوى ديلفرى

Saturday, July 31, 2010

فى انتظار فتاوى ديلفرى

بدأت فضائية إسلامية في التحضير لإطلاق أول برنامج من نوعه في مجال الفتاوى الدينية، وذلك عبر نظام الإكسبريس، أو الفتاوى السريعة، والتي ستعرض خلال شهر رمضان المبارك، بهدف الإجابة عن أسئلة المستفتين واستفساراتهم، من خلال الاتصالات الهاتفية والرسائل القصيرة (sms)


واضح ان تجار الدين شغالين على قدم وساق استعداداً لشهر السبوبة شهر رمضان شهر القرآن شهر العبادة سابقاً
هو مش المفروض ان الفتوى تتم عن بحث ودراسة لكبار العلماء ؟
هو مش المفروض ان الفتوى دى تعتبر قانون شرعى لازم يلتزم بيه جميع المسلمين ؟
كنت بسمع ان فى رمضان تسلسل الشياطين امال الشياطين من تجار الدين بينشطوا وينتشروا ويتوغلوا فى رمضان ليه ؟
دول حتى قاعدين يستعدوا له من قبل ما الشهر يبتدى ويحسبوا حساباتهم ويعدوا العدة لطبق الفتة
والمضحك بجد فى الموضوع ان اسم البرنامج فتاوى اكسبريس ؟
ده الرسول نفسه يا جهابذه الدين كان لما حد يسأله سؤال فى الدين مش يجاوبه غير لما ينزله الوحى
مش سمعنا عن حد من الصحابه كان شغال مفتى إكسبريس
بس انا بعد كل ده مش شايفه اى غلط عند مرتزقة الفضائيات الغلط كله عند البقر اللى لاغيين عقلهم ومش بيعرفوا يدخلوا الحمام الا بفتوى وبما ان المعاتيه كتير يبقى اللى يلاقى عبيط ومش يستعبطه حرام عليه عيشته
وبعد الفتاوى الاكسبريس فى انتظار الفتاوى الديلفرى
يعنى بعد ما الزبون يبعت اس ام اس يسأل فيها
بعد كدا مش بعيد لما جرس الباب يضرب نقوم نفتح نلاقى عمه وجلابيه واقفين قدامنا وجاى يعرفك بنفسه ويقولك انا المفتى الديلفرى عندك اى سؤال فى الدين .. ولو مش عندك ممكن يفتح الشنطة ويعرض لك بضاعته بس الفصال فى الحساب ممنوع
امال فين حديث الرسول
استفتى قلبك وان افتوك "
امال فين من يفتى غلط فى شئون المسلمين يهوى بفتواه سبعين خريفاً فى النار

وانا اللى كنت مستغربة اوى لما قريت الخبر ده

القبض على مشرف بدار أيتام يصور الأطفال في أوضاع مخلة بالموبايل


هو مش اللحية والنقاب انتشروا فى الشوارع ؟ دى حتى الفتاوى بقت اكسبريس
طز بقى فى الأخلاق

22 comments:

اقتراح بعد ان كبرت المهزله الأفتائيه said...

قطه
على خطورة هذه المهنه ان كان يجوز تسميتها مهنه -لا تحتاج لأكثر من لحيه وجلبابا ابيض وطرحه وشوية جعير
وتكرار كلمة حرام
ولا اعرف لماذا لا تتبنى جهه كالجامعه العربيه مهمة اصدار تصريح لمن يتصدى لهذه المهنه
طبعا سيتحايل المرتزقه ويظهرون برده ولكن فى هذه الحاله يكفى ان نذكر للناس ان هذا المرتزق لا يحمل تصريحا للتحذير

محمود المصري said...

مرحبا قطة الصحراء


مش من حقك يا قطة تقطعي رزقتهم , وأهو برضو الجماعة بينتظروا هذا الشهر للاسترزاق , وياما قالوها رزق الهبل على المجانين , فخلي الهبل يسترزقوا يا حنان

dr.lecter said...

شفتي انت الفتوي الجديده بتاعه الكرسي حرام وحرام تبصي له؟

المدونه عندي محتاجه تددخليهخا بالفاير فوكس لان القالب الجديد تقيل علشان

ELVIRA said...

أخلاق ايه بس ماكلنا عارفين الفولة
نظرة واحدة من البلكونة تعرفك الاخلاق اختزلت فى ايه

مؤنس فرحان said...

دى تجارة يا قطة
برامج وقنوات دينية
برامج وقنوات رياضية
طبيخ وموضة وأزياء
سياسية واخبارية
كارتون ومسابقات
اغانى وكليبات

أيا كان المسمى فالهدف واحد هو الكسب بكل شكل ولون وطريقة
موش مهم الصح من الغلط الحلال من الحرام .. لكن المهم ازاى نقدر نجمع اكبر قدر من الدولارات والريالات والجنيهات والدينارات

شوف ايه البضاعة اللى ( البقر ) عايزينها وهاتهالهم

وهما بقر لأنهم لسه فى مرحلة الإنقياد والتبعية بدون أدنى قدر من التفكير

Kontiki said...

:) فتاوى اكسبريس LOL
انا حاسة اننا قريب حنحتاج لشهادة فى ايد كل واحد من مفتى واتنين شيوخ اننا موحدين بالله
جتهم البلاوى شيوخ البيزنس على الامخاخ الوسخة المغيبة اللى ادتهم الفرصة يعملوا فيها بنى ادمين

elmasryeffendi said...

عجبتنى قوى شهر العبادة سابقاً لانه مع هؤلاء المرتزقة لم يعد شهر العبادة بل شهر السبوبة و الرزق بالنسبة لهم ، اعتقد انهم ركبوا و دلدلوا رجليهم و ساحبين الهطل و المعاتيه وراهم و ماكينة البنكنوت شغالة على ودنه، الله يحرقهم بجاز وسخ هما و اللى ماشيين وراهم

متساءل said...

قطه
لماذا يتزايد هؤلاء المرتزقه كالفطر يوما بعد يوم
طبعا اول ما يخطر على البال هو الأرتزاق وهذا صحيح
ولكن صحيح ايضا ان لهم جمهور
وهذا هو السؤال لماذا يقبل الناس على هؤلاء
المرتزقه الذين يعقدون حياة الناس بفهمهم المريض للنصوص
من تحريم اى شىء طلبا للظهور الى الدعوه الى القتل والنسف وسفك دماء الأبرياء مثل عمر عبد الرحمن
المسجون فى اميركا لتحريضه على نسف اماكن فى نيويورك
او المغربى محمد الفزازى المسجون فى المغرب لتحريضه على تفجيرات الدار البيضاء
ومباركته على اليوتيوب لقتل فرج فوده
فى محاضره له فى ايطاليا التى يعتبرها دون حياء بلد كفار مثل كل بلاد النصارى
وهو الذى يعتبر الديمقراطيه كفر

karim said...

رمضان كريم بقى يعى الممثلين يكسبوا اد كدة و الشيوخ اللى هم اولى و اللى بينولروا طرقنا يشحتوا مش عيب بردواا, هو مسلسل زهرة و ازوجها الخمسة معادةة امتى,و لا برنامج الشيخ و الفتاوى الخمسة, تحياتى و رمضان كريم

Anonymous said...

تصوروا
الى اى حد ذهب الخبل بالعقول
تحت تاثير مرتزقة البترودولارات
على يوتيوب 2مليون ونصف يشاهدون لقطه تقول انبعاث دخان كثسف من قبر عبد الحليم حافظ من شدة التعذيب
http://www.youtube.com/watch?v=QyAlO6unXPs
هؤلاء المروجون لمثل هذه الجوعبلات عار على البشريه
لأنهم لم يصلوا بعد لمستوى البشر

spider woman said...

Airline security probe after veiled women board Heathrow-bound flight without showing their faces

Read more:

http://www.dailymail.co.uk/news/worldnews/article-1299914/Airline-security-probe-veiled-women-board-Heathrow-bound-flight-showing-faces.html

Desert cat said...

اقتراح بعد ان كبرت المهزله الأفتائيه

اعتقد ان الفوضى وتشتيت الناس مقصود
اقول قولى هذا والله اعلم

Desert cat said...

محمود المصري
وانا قولت حاجه
طالما فقى سذج بيصدقوهم وبيجروا وراهم ده حتى يبقى حرام عليهم عيشتهم لو مش استغفلوهم

Desert cat said...

dr.lecter
شوفتها
بس انا منتظرة فتوى عن الكنبة حرام ولا حلال

Desert cat said...

ELVIRA
لووووول
الفولة اتقسمت نصين وظهر الفساد من جواها

Desert cat said...

مؤنس فرحان
ماهو يا استاذ مؤنس انا مش ضد التجارة لكن توصل اننا نتاجر بالدين ونغيب عقول الناس علشانكل لما يزيد عدد المغيبين كل لما يزيد الدولارات
الحاجه اللى بين الانسان وربه اصبحت للتجارة ومين ناس بيقولوا على نفسهم رجال دين
غريبة الشغلانة الجديدة دى اصلا

Desert cat said...

Kontiki
هو انتى بس مجرد ما تذكرى اسم الشيخ يبقى انتى كدا خلاص معتمدة
فعلا المشكلة مش فيهم المشكلة فى المغيبين اللى بيصدقوهم

Desert cat said...

elmasryeffendi
وتلاقيهم شغلهم الشاغل اقناع الناس بالزهد والتقشف وهما عايمين فوق طبق الفتة

Desert cat said...

متساءل
لان المغيبين تخدعهم المظاهر وطالما التاجر من دول لبس الجلابية والطرحة وكشر عن انيابه وقعد يشرشح ويشتم فى المختلف فى الرأى والفكر مش بس اختلاف فى العقيدة يبقى خلاص ده اصبح شيخ وغيور على دينه يبقى نتبعه سبحان الله مع انهم بيقولوا ان الدين يدعو للسماحة والمحبة .. واعتقد مش فيهم واحد يعرف معنى الكلمتين دول ايه

Desert cat said...

karim
ياريتهم يسيبوا طريقنا ضلمة اصل قبل ظهورهم كان الناس عايشة فى ود ومحبة مع بعضها

Desert cat said...

Anonymous
اى اشاعات بيجروا وراها المهم يثبتوا انهم مؤمنين على حق

Desert cat said...

spider woman

Wrong the country which allows entry of these