واتارينى مكنتش عارفه



لما كتبت بوست ولسه ايه مش صادروة عن تقديم مجموعة من المحاميين الاسلامجية بلاغ للنائب العام لمصادرة رواية ألف ليلة وليلة مكنتش عارفه ان بعد ساعه بالظبط من كتابة البوست هيتم مصادرتى انا شخصياً بالاكونت بتاعى من الفيسبوك
بحثت على سبب منطقى لقفل الأكونت من قبل ادارة الفسيبوك الجامدة اوى خالص بصراحة مش لاقيت انا مش عارفه حد فى الادارة وكمان عندى استعداد احلف على اى حاجه عايزينها انى مش شتمت حد فى الادارة المبجلة .. طيب يقفلوا حسابى ليه ؟ وعليه رحت باعته رسالة للإدارة الهمامة اسالهم عن سبب قفل الاكونت بتاعى وكان الرد ان ان اننننننن تششششش دى الموسيقى التصويرية مش تقلقوا ..

A lot of people had sent reports of the bad use

وكانت الاجابة ايه بقى وياريت عشرة او عشرين خط تحت الجملة الجامدة وهى العدد من الاشخاص قاموا بارسال تقارير ان حضرتى بستخدم الفيسبوك استخدام سيئ ... وبرضه بعدها قعدت افكر معلشى انا عارفه كلمة قعدت افكر ده اتكررت كتير فى البوست اصلى مقضية يوم الجمعة وهو اليوم البركة اللى اتقفلى فيه الاكونت من اوله لاخره تفكير فى الفيسبوك وفى ادارة الفيسبوك لدرجة انى لو كنت بفكر فى الجواز مش كنت ها اخد الوقت ده كله فى التفكير .. لاقيتنى مش بعمل حاجه غير انى بنزل لينكات من مواقع اخبارية .. او صور وبرضه صور عادية مش خادشة للحياء العام ابدا حتى عمو عصام عارف الكلام ده كويس او نوتااااااات وعند النوتاااااات دى وقفشت خطأى هو النوت اللى جاب الكافية أيون هو النوت الـ اخد 147 كومنت ده واغلبهم بلا حسد وخمسة وخميسة فى عين اى حد مش دخل وشتمنى هو كمان بالمرة تمت شخصنتى انا فيهم وكل الناس قالت لى ايه ده ؟؟؟؟؟؟

مش هينفع اكتب النوت هنا دلوقتى علشان لو الجماعة اياهم بتوع المصادرة بعتوا للحاج بلوجر هو كمان وطلعت فى عقله يلغى المدونة بتاعتى خالص من عنده ومصادرة حاجتين فى وقت واحد فى الراس توجع لكن لو رجع الاكونت ده لو يعنى وبركة دعاء الوالدين وانتوا كمان معاهم يرجع انشاء الله ابقى انزله هنا
ولا اراكم الله ريبورتات من الجماعة اياهم فى اكونتات لديكم ابدا ابدا ابدا

Comments

Tears said…
بصراحة يا قطة انا مش فهمت من كلامك همه قفلوا الاكونت ليه بس على اى حال الفيس بوك اصلا موقع ممل اوى و مش عارفه عاجبكم فيه ايه

ربنا يخليلك المدونة تعبرى فيها براحتك

على فكرة بتوع الفيس بوك شكلهم مش بيفهموا عربى لان فيه واحدة اعرفها عشان نشرت بحث لشيخ ازهرى جاء فيه شوية اراء مش على هوا الاخوانجية قفلوه و لما سألت قالولها بتنشرى مواد اباحية
!

مع ان ده كان الموضوع الوحيد اللى هى نشرته و كانت جايباه من ورق رسمى من داخل الازهر
Desert cat said…
Tears
قفلوه علشان ولاد الحلال بلاش الكلمة التانية كتبوا ريبورتات لادارة الفيسبوك
وبعدين الفيسبوك مش بوظه غير من يوم ما دخل فيه ادارة عربية
يعنى
فيهم بهايم عرب وبيفهموا عربى كويس اوى كان قبل الادارة ما يبقى فيها عرب الموقع ده كان رائع
لكن اى حد ممكن يكتب ريبورت فى حد تانى مش عاجبه ومن غير ما يفهموا حاجه يقفلوا لك الاكونت عادى خالص
هو بالنسبة لك موقع ممل يمكن علشان مش بتدخليه لكن عو بالنسبة المكان اللى بتجمع فيه مع كل اصحابى
Sahran said…
قطتنا الحبيبة مرحباً بك

بالنسبة لإدارة الفيسبوك , فقد صارت على ما يبدو سلفية وهابية أكثر من اللازم , وأنا لا أهتم كثيراً بصفحتي على الفيس بوك , وأتوقع أنه قد يتم إقفالها في وقت ما ,,

بالنسبة للمدونة , فحذفها يكون من خلال الشكوى عليها , وذلك من خلال البار العلوي الذي يكون في المدونة

ادخلي هنا وستجدي طريقة جيدة لإخفاء البار العلوي , كما فعلت في مدونتي منذ فترة


تحياااااااااااااااااااتي لك


ودمت سالمة
Desert cat said…
Sahran
اه يا سهران الوهابيين اخترقوا كل حاجه حلوة فى حياتنا وبوظوها
ميرسى على اللنك سهران
ماثيو said…
You can appeal on facebook.

http://www.facebook.com/help/contact.php?show_form=disabled

حاولي مش هاتخسري حاجة. و اكتبيه كله بالانجليزي علشان مايروحش لاخواننا الاشاوس بتوع الادارة العربي
Desert cat said…
ماثيو
من امبارح بحاول يا ماثيو ومش ببعت لهم غير بالانجليزى
Mathew said…
حاجة تفقع

Which note do you think that got you in trouble?
elmasryeffendi said…
عزيزتى القطة
من مساوئ الفيسبوك هو موضوع الريبورت و للاسف الظلاميين صاحيين قوى ع الفيسبوك و النت و بيمارسوا ارهابهم اليكترونيا مش بس ارضياً لكن انتى تقدرى تبعتى لادارة الموقع و تعملى شكوى و تشرحى لهم ان فى طيور ظلام و ارهابيين بيمارسوا ارهابهم على حرية الكلمة و هدديهم بانهم بكده بيرسخوا للفكر الارهابى و يا ريت تترجمى البوست بتاعك و توضحى الامور، ده ممكن ما يرجعش الاكاونت لكن لازم تشرحى وجهة نظرك

تحياتى
Mathew said…
هاتابع اللي بيحصل في الجروب بتاعك لغاية لما ترجعي من المنفي
عصام said…
مشكلتك أنك تكتبين فى موضوعات لاتناسب من يرفعون رؤوسهم من الرمال ليقرأوا عنوانا ثم يضعونها فى الرمال مره أخرى قبل أن يستكملوا المقال أو يعرفوا أهدافه ويمكنك-إذاأردت الإستمراردون مشاكل-أن تكتبى فى موضوعات تافهه (وهى كثيره)وطبعا شخصيتك المقاتله بطبيعنها لن تقبل ذلك وعليك الإستمرار فى فتح نيران الحقيقه على الواقع المر الذى نعيشه وشخصيا أعتذرلعجزى عن تقديم يد العون إلا بكلمات تشجيع (لا تودى ولا تجيب)وعزائى أنك تعرفين مدى محبتى وإحترامى لجرأتك خاصة فى المقال الذى تسبب فى المشكله
AHMED SAMIR said…
حكاية الريبورتات لقفل الاكونتات دي حق يراد بها باطل
هي طبعا معمولة علشان الاكونتات الاباحية الا انه و للأسف يتم استخدامها لمصادرة كل الأراء و الأفكار المخالفة
معلش
دي ضريبة الرأي
تحية طيبة يا قطة :)
هنا مملكتك ولن يُجبرك أحد على النزوح منها أو هجرها،أما بشأن الكائن المدعو face book
فمفترض أن إداراته أُناس يأتيها من ورائه أموال طائلة فبموجب هذا أن يتحروا الدقة أولاً فى البلاغات التى تأتيهم حول حجب هذا أو مصادرة ذاك،فالأمور لاتؤخذ إعتباطياً هكذا.وعلى الرغم من إختلافى معك فى بعض مما تطرحينه إلا أنه حقك أن تبوحى بما تودينه.دون أن يقوم أحدهم بمصادرته.
عجبت لبشر حسبوا أنفسهم أوصياء على الخلق !!!!
حافظى على موقعك هنا أولاً وأمنيه جيداً وإن دُمرحتى بإمكانك صُنع غيره.
خالص تحياتى؛
elmasryeffendi said…
هو ليه كل ما ابعت بوست ما يتنشرش ما انى غالبا ما اتفق معك ، على فكرة اوعى تكونى فاكرانى حد تانى لان فى كذا واحد مسميين نفسهم المصرى افندى ، على العموم شكرا على ذوقك على اى حال لان دى مش المرة الاولى و لا الثانية و لا حتى الثالثة مع انى حاطط مدونتك فى المتابعات و فى المفضلات عندى ، بصراحة مش فاهم فى ايه ؟ هل هو تعالى مثلاً

على العموم شكرا و تحياتى
Kontiki said…
يا عينى يا قطة
معلش
اصل الجماعه الاجانب توقعوا الحيادية المطلقة و الموضوعية يعنى لما حد يبعت ريبورت فى اكونت تانى بيبقى عندة اسباب موضوعية لدة
انما هنا ثقافة الاسافين والمختلف عنى انا عاوز احرقة مش اسمعه ولا اناقشة
عشان كدة ادارة الفيس بوك العربية ماشية بمزاجها واحتمال بكرة يقلب قناة للمشايخ وللتعصب والتسلط
جتهم البلا
متابع said…
قصة المعتقل المصرى فى السعوديه


أعلنت الشبكة العربية لمعلومات حقوق الانسان الاحد ان السلطات السعودية تعتقل منذ 11 شهرا اكاديميا مصريا من دون محاكمة او تحقيق.
السعودية

اسرة المعتقل المصري اعتقدت أن اعتقاله تم على سبيل الخطأ

وقالت المنظمة الحقوقية في بيان اصدرته إن الاجهزة "الأمنية السعودية تعتقل الأكاديمي المصري، الدكتور عبد العزيز كامل منذ 13 يونيو 2009 في سجن الحائر من دون اجراء اي تحقيقات قضائية معه".

واضافت المنظمة ان "اسرة الاكاديمي المصري فضلت الصمت اعتقادا منها ان اعتقاله خطأ وأنه سيتم تصحيح الخطأ على نحو سريع".

وتابعت الشبكة في بيانها ان السلطات السعودية قدمت "وعودا متكررة باطلاق سراحه ولكنها لم تنفذ" بينما "التزمت وزارة الخارجية المصرية الصمت وامتنعت حتى عن تقديم طلب توضيحات من السلطات السعودية عن اسباب اعتقال هذا المواطن المصري".

واكدت المنظمة ان عبد العزيز كامل يعمل في السعودية منذ ثلاثين عاما بعد حصوله على درجة الماجستير في الشريعة الاسلامية من جامعة الامام في المملكة.

واوضحت انه عمل محاضرا في جامعة الملك سعود قبل أن يبدأ في كتابة مقالات لبعض الصحف والمجلات كانت اخرها صحيفة البيان.

كما كان مشرفا على موقع "لواء الشريعة" على شبكة الانترنت مشددة على انه "غير معروف بانتقاده او معارضته للحكومة السعودية".
المهم:::ايه اخر الاخبار
لسه ملغي برضه؟؟
Tears said…
بقولك ايه يا قطة ما تحطى الموضوع اللى تسبب فى حجب صفحتك على الفيس بوك هنا نشوفه

عشان نفهم الموضوع اكتر و نشوف بيفكروا ازاى و لو خايفة على حجب مدونتك هنا فممكن تحطية يوم واحد و تشيليه بس نفهم


تحياتي
Ms Venus said…
ارهاب فكررررررى


وخوف رهيب من الكلمة

اد كده الكلمة بتوجع وبتيجى على الجرح يا قطة
khalil said…
انة لامر مشين المدونة مقرؤة اكتر من الفيسبوك انا متابعك ولا اعلم انك لك كتابات فى الفيس بوك
Tarkieb said…
ياستي افتحى واحد جديد امال قطة ازاى....مش بسبع اكونتات....وبعدين حيبقى شهرة ليكي يابختك حتتشهري بقى؟....
لاديني said…
ولا يهمك يا قطة
أنا أيضاً أغلقوا لي حسابي على فيسبوك
وعندما راسلتهم أجابوا بنفس العبارة

ماذا كنتُ أنشر على صفحتي يا ترى يا هل ترى؟
صور إباحية؟..أفكار إرهابية؟..شتائم وقذف وتشهير لشخصيات محترمة؟

لاشيء يذكر..فقط برمجت الصفحة لتنقل تحديثات مدونتي
وتركت التعليق متاح للجميع
بما في ذلك من يشتمون ويلعنون سلسفيل أبويا
ومع ذلك لم يرضيهم ذلك ورفعوا تقارير أنني أنشر أفكار هدامة
بصراحة
لم أهتم أن أفتح حساباً جديداً
ربنا يخليلنا البلوقر وكفاية
واطمئني فلن يغلقوا لكِ مدونتك خصوصاً إذا أخذتِ بنصيحة سهران وأزلتِ الشريط العلوي

وما تخافيش من حاجة
لأن أنا بدعيلك معايا
:)


تحياتي
متابع said…
ماذا تتوقعين
بعد ان تقرئى
ان اخوانهم المجاهدين فى طالبان تهاجم مدارس البنات فى افغانستان بالغازات السامه
لقتل البنات لمنع تعليم البنات
وتجاسرهم على تجاوز دورهم كفرج للمتعه
واذا لم يفلح وئدهم تحت خيمة متحركه فعقوبتهم هى القتل
وربنا يحمى بلادنا من مثل هؤلاء الهمج
Desert cat said…
Mathew
النوت قبل الاخير يا ماثيو لأن الاخير تقريبا الاكونت اتحذف فى نفس تزامن نزولة
Desert cat said…
elmasryeffendi
بعت وعملت كل حاجه والنهاردة كدا 5 ايام ولا حس ولا خبر
Desert cat said…
Mathew
بجد انا مش عارفه اشكرك ازاى ماثيو
ميرسى جدا ليك
Desert cat said…
عصام
عمو عصام كلماتك الاخيرة وجعتنى اوى عجز ايه اللى بتعتذر عنه .. كلنا مش قدامنا غير اننا نقف مكتوفى الايدى امام ادارة غبية لا تتحقق من صحة كلام ظلاميين
تحياتى
Desert cat said…
AHMED SAMIR
للاسف احنا اجدع ناس نستخدم اى حاجه استخدام سيئ ولدفن اى حاجه مش على مزاجنا
تحياتى
Desert cat said…
مذكرات كشكول المورق
ميرسى جدا لكلماتك الطيبة وشعورك الجميل

تحياتى
Desert cat said…
elmasryeffendi
مفيش ولا مرة حجبت لحضرتك تعليق حتى اللى بيختلفوا معايا بنشر تعليقاتهم
بس واضح ان حضرتك اللى مش بترجع تانى علشان تراجع الرد او الكومنت
عموما شرفت
Desert cat said…
Kontiki
غلطة الجماعة الامريكان الكبرى هى ادخلهم للعرب فى ادارة الموقع
وبكدا اثبت العرب انهم ما دخلوا فى شيئ الا افسدوه

تحياتى كونتا
Desert cat said…
متابع
هما لا عايزين عندنا آثار ولا طايقين يبقى عندنا علماء علشان كدا بيجلدوا اطبائنا ويسوسوا فى عقول الاغبياء بهدم الاثار ويسجنوا العلماء
الحقد وحش
Desert cat said…
ذو النون المصري
لسه برضه
Desert cat said…
Tears
اوعدك انزله واسيبه على طول بس هما يرجعوا الاكونت تانى
Desert cat said…
Ms Venus
مكنتش عارفه انى جيت على الجرح يا فينوسة
ومش عارفه مش رجعوه ليه لحد دلوقتى
Desert cat said…
khalil
انا ليا فى كل مكان
Desert cat said…
Tarkieb
معلشى دايما الاصلى بيكون له معزة خاصة انا عندى واحد غيره بالفعل
Desert cat said…
لاديني
كل هم الطيور الظلامية ارهابنا باى شكل علشان نسكت
لكن ده بعدهم
Desert cat said…
متابع
اللى حصل للاكونت برضه نوع من انواع الارهاب اعتقد انهم لو يعرفونى شخصيا مش كانوا اتاخروا ثانية يعملوا اللى بيعملوه مع البنت اللى تفكر انها تتعلم
انا كمان اخدت بلوك
بس الفرق بينى و بينك انى لما بعتلهم مردوش عليا

منهم لله
انا دعيت عليهم
ههههههههههههههههه

بسهى حملة ديسيبل على فكرة لأن كتيييير من صحابي اتعملهم ديسيبل قريب

و دى هتكون بداية انهيار الفيسبوك

تحياتى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز