ومفيش طهور إسلامى ؟


دخلت بابتسامتها العذبة .. وبالرغم من انى بحبها جداً وبحب ابتسامتها دى الا ان اكيد بيكون وراها طلب .. سلمت وقعدت .. وانا قاعدة استنى ايه هو الطلب .. وبعد السلامات والتحيات

عايزة اقولك حاجه

بستناكى تقولى لى الحاجة دى من الصبح يا روحى

بصى بقى .. انا عايزة اروح فرح اخت صحبتى وانتى اللى هتيجى معايا ..
فرح ايه يا اوختشى فى الحوسة اللى انا فيها دى انا ورايا شغل وكمان من اول مارس كل يوم اقول هروح اعمل الاقرار الضريبى مش اروح .. جاية على اليوم اللى اخد فيه القرار الحازم وتقولى لى نروح فرح ..
انتى تروحى الاقرار براحتك اصل مفيش كوافير ولا سوارية ولا اى حاجه خالص ..
هو انتى قولتى لى رايحة فين ؟؟؟

بلعت ريقها بصعوبة وقالت لى فرح .. طيب لما مفيش اللى بتقوليه ده فى فرح الناس بتعمله فين فى العزا ؟؟

قالت لى يا بنتى اصل ده فرح اسلالالالامى

اه وهيتعمل فين بقى الاسلامى ده ؟

فى قاعة كبيرة بس هما قاسمينها نص للستات والتانى للرجالة علشان الاختلاط حرااام ...
علشان ايه نياهاهاها
قولت لها انا جاية يابنتى بلا اقرار بلا ضرايب بلا وجع قلب . المهم نشوفهم بيعملوا ايه فى الفرح الاسلامى
روحنا الفرح زى اللى لسه صاحيين من النوم ودخلنا القاعة بتاع الستات بامانة فى مخيلتى هلاقيهم كلهم متكفنين بالسواد والعروسة قاعدة فى النص مربعة رجليها وقاعدين يلفوا حواليها الدور الدور موعودوة يا اللى عليكى الدور ... الا الاقى العروسة لابسه حاجة بيضه لا بيانه يعنى هو فستان فرح ولا جلابية بيضة .. ولافة طرحة اسبانيش ووشها فيه الوان الطيف السبعة هربانين من بعض بطريقة عشوائية .. شوية ولاقينا الدى جى اشتغل .. يا حلولى ده الاسلامى ؟ والبنات جوا عند العروسة يرقصوا والستات قاعدة تضحك واللى بكلمتين من نوع اقرصيها فى ركبتها علشان تحصيلها فى جمعتها .. وشوية البنات سابوا الرقص واتسحبوا واحدة ورا التانية يبصوا من الفاصل اللى بين القاعتين على مش عارف مين الياااااااااااى بدلته شيك مووووز .. ومش عارفه مين التانى اللى يالهوى عنييييييه دباحين .. وشوية ستات ورا قاعدين هاتك يا تقطيع فرو فى جتة العباد اللى اطلقت واللى حماتها ملطعه على عنيها البلا الازرق واللى لابسها كويس واللى لابسه وحش ومش راحمين نفسهم .. شوية بطل الدى جى واشتغل 3 شباب عاملين دقن خفيفة لزوم الشغل استعراضات واستكشات وهاتك يا حركات ..

انا فى وسط اصحاب دودو .. هو ايه الفايدة من عزل فريق للستات وفريق للرجالة زى اللى عندهم عدوى وخايفين تتنقل ؟؟ ردت اخت بامانة مش سابت ودن اللى جنبها من اول القعدة البعد عن شبهة الاختلاط ...
طيب والغيبة والنميمة اللى من الصبح يا اختى ؟
وتفتكرى مفيش اختلاط والبنات بيروحوا يبصوا من وقت للتانى على فريق الرجالة والعكس كمان بيحصل ؟ ردت حيزبونة كبيرة فى فرق بين نظرة عابرة وبين قاعدين فى وش بعض طول الوقت النظرة الاولى ليك والتانية عليك ؟
يعنى شغل الجواسيس اللى بيحصل ده بتسميه نظرة عابرة ..
انتى زعلانة ليه ؟ هو حد من الرجالة اللى بيبصوا عليهم دول قريبك ؟؟
لا انا زعلانه على استغلال الاسلام فى فرح اسلامى مع ان الفرح اللى مش اسلامى الناس فيه بتتعامل بطبيعتها مش زى الجواسيس والحرامية .. ومش استغلوا اسم الاسلام فى التربح والضحك على الناس ..
عقبال كدا لما نشاطركم السبوع الاسلامى والطهور الاسلامى .. ورزق الهبل على المجانين

Comments

طبعا مش هرد عليكى ان هو اسلامى ولا لا
فكل ابن ادم خطاء وخير الخطائيين .............؟ كملى انتى بقى (بأى)؟
صلى على النبى
1. الفرح الاسلامى الانتى اتكلمتى عليه مش احسن من الفرح الللى فيه بوس الرجاله للنساء بلا استحياء
2. ولا انتى عايزة المراءة والراجل يكونوا على سرير واحد فهمينى لانى مش بهم زيك يا مثقفة يامسلمة
3. ايه انتى عايزة خمرة وسجاير والراجل يقعد جنب المراءة ويبوسوا بعض بلا استحياء قلى لى ايه
اللى انتى عايزاه
متابع said…
نموذج صارخ للبلاهه
هذا نمودج صارخ للبلاهه والعبط
حيث ان بلاد الفضيله الوهميه واللعب خلف ابواب مغلقه كلما سنحت الفرصه
يحاولون التخلص من تخلفهم بالسماح بالأختلاط فى جامعه جديده
بينما البلاهاء هنا يستوردون التخلف والهطل سلعه رائعه يستغلها الفهلويه
فنسمع عن استخدام كلمة اسلاميه فى مجالات عجيبه
مثل الشركه الأسلاميه لأبادة الصراصير او الشركه الأسلاميه لتوريد الشغالات
وهو ما يمكن ان يندرج تحت مسمى الغش التجارى
ولا اعرف لماذا لا تصدر الحكومه قانونا لمنع هؤلاء من اضافة كلمة اسلاميه على اى شىء وكل شىء
مما يهين الأسم مقابل جنى الأرباح على حساب البلاهاء
متابع said…
عزيزتى
الله يكون فى عونك من امثال المعلق الأول
....مصيبه ان يكون من بين مستخدمى النت امثال هذه العقليات وكل هذا التشوه العقلى والنفسى
مره اخرى الله يكون فى عونك وعون بلادنا
دا واحد مش فاهم حاجه فى الدنيا خالص
ولا نعرف فى اى كهف يعيش
مسكين
يحتاج للعرض على الطب النفسى
ومن الحطر تركه طليقا بين الناس
متابع said…
تكمله
عزيزتى
نكمل التعليق على صاحب اول تعليق
هذا مشروع ارهابى
يذبح الأبرياء وهو يصيح الله اكبر كالمجنون
وهو بهذا التشوه العقلى مجنون فعلا
Ms Venus said…
العفة والاحترام بتبقى من جوة الانسان


لو جيبتى حد وحبستيه فى قمقم وهو من جوة وحش

لازم بردو هيغلط


والعكس


لكن بالصورة دى يبقى اسمهم مرائئين


على رأى المثل اللى بيقول

من برة هلا هلا ومن جوة يعلم الله


تحية ليكى يا قطة والله يعينك على اللى انا شيفاه ده هههههههههه

مافيش فايدة اصل العقول مش سهل تنضف وتفهم

متعودين على العصايا والخرزانة
Tears said…
تقريبا يا قطة هو كان عزاء بس انتى مش فهمتى كويس...مش بتقولى قاعه رجال و قاعه نساء؟

شوفى المجتمع غارق فى الشكليات انما زى ما قلتى بيجسسوا و فيه غيبه و نميمة و كله...الناس من كتر الكبت بقى عندهم شيزوفرنيا و كل اللى بيهمهم الشكليات و بس

روحى المنتزة فى اسكندرية بعد تسعه باليل و شوفى البنات بالخمار مع الرجالة على ارض الجنينه اللى ورا السلاملك بيعملوا ايه...ده و لا كأنها شقه مفروشة

طيب ح قولك انا حضرت فرح خليجى و برضة كانت قاعه ستات و قاعه رجالة ما اصلا احنا اخدنا ده منهم و دى ثقافة البدو

المهم انا طبعا داخلة لابسه طبيعي جدا و معايا والدتى و برضة لبسها طبيعي و فى الممر كان كل الستات الخليجيات لابسين ملايات سوداء و كتير مغطيين و شهم الى ان دخلنا قاعه النساء....و هنا المفاجأه

اتضحلى ان احنا أكتر ناس حشمة فى القاعه لان اتارى تحت الملايات اللى رموها اول ما دخلوا فيه لبس مش ح اقدر اقولك عرى انما هو قلع صريح و بشكل غير مبرر...يعنى كتير اوى المناظر دى..ده انا ست و اكسفت و بقى وشى فى الأرض و حسيت ان انا منقبه بلبسى اللى بنص كم ده...و بجد مش فاهمه ليه عاملين كده بس ده شىء مش طبيعي خالص
karim said…
عزيزتى اولا اللى انتى كنتى فية دة مش فرح اسلامى, دة فرح عادى بس مقسوم علشان الاختلاط ودة مش وحش على الاقل افضل من العادى, انا حضرت فرح اسلامى و هو بيكون حاجتين لايما الناس فى القاعة عادى و اللى شغال ادعية و اغانى اسلامية و بس و دف و كدة و كلة متسمر فى مكانة و بس, لايما الناس مقسومة و بردوا اغانى اسلامية وبس, لكن اللى انتى روحتية دة ناس مسكت العصايا من النص هههههههههههههه, تحياتى
Mai Zamalkweya said…
وحياتك انتي حتي الافراح اللي مش اسلاميه بيبقي فيها فصل للجنسين عن بعض ودي بقت تحصل بطريقة لا ارادية تلاقي الستات راحوا قعدوا مع الستات و الرجاله مع الرجاله كل فريق في ناحيه
غير اللي بيتنطط ويفرح ويرقص هما الشباب و البنات قاعدين في القاعه بيتفرجوا عليهم
Lone Virgo said…
إلى الأخ بلال مؤخره /قلب فارس
بوس إيه يا إبن العبيطة إللى في الأفراح المصرية؟
بوس/بوس/بوس؟
إنت عبيط ياد؟

أنا طول عمري بروح أفراح من زمان
والناس كلها طبيعية ومحترمة ومافيش حد بيبص على حد ولا عمري أنا فكرت أبوس أو أتفحص في أي واحده نهائياً

بجد: حتكم نيله يا أولاد الكلب... خليتونا أغراب في بلادنا وسودتوا عيشيتنا

وأنا آسف يا قطة
strategicalone said…
اهلا يا قطة
طبعاً هما حرين يعملوا اللى عاوزينة بس المشكلة بتبتدى كدة ناس يعملوا حاجات عبيطة وبعد شوية تكون الحاجة دى هى الطبيعى ، واللى هو طبيعى دلوقت بيقى قلة ادب بعدين , زى موضوع الحجاب وبعدية النقاب .
على فكرة احنا لسة فى اول الفترة السودة ، دة احنا ها نشوف ايام اسود من قرن الخروووب (ولكم فى الصومال اسوة حسنة) امتى نهرب بقى من السجن الكبير اللى كان اسمة مصر وما نشوفش الناس دى تانى .
تحياتى
هي بجد حاجة غريبة واشتغالة المفروض إننا مسلمين يعني نمارس حياتنا بشكل عادي وفق تعاليم ديننا يعني المسلمين زمان ما كانش عندهم كلمة متدين الغريبة دي وكانوا عايشين حياتهم بشكل طبيعي ما فيهوش نفاق ولا ضحك على نفسهم ولا حد تاني من الآخر المحترم محترم واللي بيخاف من ربنا هيخاف منه قدام الناس ولوحده كمان ويا ريت نبطل نلزق تخلفنا وأفكارنا المتناقضة في الإسلام، عايزين تكونوا مسلمين اعملوا فرح عادي وافرحوا بس مش لازم يبقى تهريج ورقص ومياعة عادي اسمعوا أغاني عادية من اللي بنسمعها وكونوا طبيعيين زي كل البني آدمين وبلاش اشتغالات
بجد بلاش نلزق كل حاجة في الإسلام افرحوا عادي وخليكوا طبيعين بس باحترام
Kontiki said…
يخرب عقلك يا قطة
حيغنوا للعرورة الدور الدور
:)
هى الفكرة العامة سخيفة ومقرفة فكرة فصل الجنسين فى مكان عام وكأن فى اجتماعهما الموبقات يعنى مش شرط الاختلاط فى مكان عام يبقى مقترن بحدوث الفواحش
زى الشاب بلال مين هيأله فى انهى حلم يقظة مرضى وبه نسبة هوس جنسى عالية ان الستات و الرجالة بيدوروا البوس فى بعض لما يروحوا فرح
ومين قال ان الفرح المختلط بيبقى فى خمور يا محترم فى فرح كان العريس فرنساوى عارف يعنى اية فرنساوى يعنى غير ناطق العربية يعنى النضافة و التحضر ولا طلب خمور وكان الفرح مفيهوش كحوليات
ولا رقاصة كمان
فى بقى جيران افاضل العيلة كلها دقون ونقاب ورب العزة بشوفهم بعينى من البلكونة بيشربوا حشيش يوميا و
فاتحين الشباك
يبقى نستفيد اية من القصص دى نستفيد ان العبرة مش فى الفصل و المنع و المجتمع يبقى منفصل والتمسك بالقشور والمظاهر واطلاق اسم اسلامى لاضفاء الشرعية على تصرفات غبية بتزود نسبة الكبت و عدم التحضر و بتحولنا لمجتمع اشبة بمرضى ادمان الجنس فى اى مكان وزمان وفى اى تجمع .
Anonymous said…
ايه البلاهه اللى بيتكلم بيها اخينا قلب الفارس ..والله بقى كل تقليعة والتانية باسم الاسلام ..ماطول عمرنا افراحنا مختلطة ومفيش مشاكل ومحترمة
الله يرحمنا من المصايب والاشكال دى وباين لسه حنشوف تقاليع اكتر على رأيك يا قطة
متابع said…
قطه
محتاجه العمليه حمله ضد لزق صفة اسلاميه على اى شىء حتى لو كان ابادة الصراصير
لا اعرف لماذا لا يطلق هذا الأسم الا بعد تدقيق منعا للغش والضحك على السذج
وليست ماساة نهب الأموال فى ماساة توظيف الأموال ببعيده باسم الأسلام
فضاعت اموال الغلابه وفقد البعض حياتهم كمدا
هذا موضوع خطير يحتاج لوقفه
متابع said…
لماذا حمله ضد استخدام كل من هب ودب لوصف اسلاميه بغرض التربح وغش السذج
ان اطلاق وصف اسلاميه ينطوى على نوع من الفتوى تبرر بشكل غير مباشر العمل او النشاط
الذى تلصق به صفة اسلاميه علاوه على ادخحال نوع من الثقه الكاذبه فى نفوس من يتعامل معهم
اى ان المخالفه هنا مزدوجه
فمن يجمع الأموال مثلا فى حالة توظيف الأموال هو قد اصدر فتوى ضمنيه بان مايقوم به جائز
وياتى هذا فى غمرة اسهال الفتاوى العلنيه ليزيد الطين بله
وعلينا ان ننتبه لهؤلاء الذين تجردوا من كل قيمه او شرف
جزى الله الجميع خير الى كل من شتمنى وسب فى
الله يسامحكم
والى البيقول ان انا عايش فى كهف لا انا مش عايش فى كهف ولا حاجة
انا عايش فى فيلا على 8 قراريت هل هذا كهف ولا عايزة يكبر شوية
الله يسامحك
وعايش فى اكبر قرية على مستوى ابوحماد
هاااااااا
الله يسامحكم
Tamer Nabil said…
ازيك قطة

انا راى ياقطة

انى مش ضد الفرح الاسلامى وايضا مش ضد المختلط بس الاهم الفرح يتعمل بدون مشاكل ولا حاجة تخالف تعاليم الدين الاسلامى

والاسلام يسر مش عصر وربنا رحيم بنا لازم نكون على خط مستقيم نرضى بالقران وسنة الرسول

بسماحة ومحبة وليس كما يفعلها البعض بتزمت اكثر من الازم

مع خالص تحياتى
أحمد.خ said…
أستاذتى الفاضله لو أردت أن أعلق على كلماتك فسيكون تعليقى بكلماتك التى لا أجد أبلغ منهافإسمحى لى بالإستعاره مستغلا كرم أخلاقك (لا انا زعلانه على استغلال الاسلام فى فرح اسلامى مع ان الفرح اللى مش اسلامى الناس فيه بتتعامل بطبيعتها مش زى الجواسيس والحرامية .. ومش استغلوا اسم الاسلام فى التربح والضحك على الناس)وأخيرا أشكرك على هذه الإستعاره المجانيه
أحمد.خ said…
أستاذتى الفاضله لو أردت أن أعلق على كلماتك فسيكون تعليقى بكلماتك التى لا أجد أبلغ منهافإسمحى لى بالإستعاره مستغلا كرم أخلاقك (لا انا زعلانه على استغلال الاسلام فى فرح اسلامى مع ان الفرح اللى مش اسلامى الناس فيه بتتعامل بطبيعتها مش زى الجواسيس والحرامية .. ومش استغلوا اسم الاسلام فى التربح والضحك على الناس)وأخيرا أشكرك على هذه الإستعاره المجانيه
Migo Mishmish said…
مش عارف ياقطه الناس دى بتعمل ليه كدا ؟ هى الرجاله والستات ماشيين يريلو على نفسهم ....انا مرة واحد زميلتى شكلها يقطع الخميرة من البيت وكمان اكبر منى ببتاع 10 سنين يعنى زى خالتى ..جيت اسلم عليها مرضيتش تمد اييدها ...على اساس انه رجس من عمل الشيطان ..حاجه تفقع ..دا كويس انى عبرت واحده زيها ..خلاص يعنى اول ماهاسلم عليها هاروح البيت افكر فيها ..دى حتى ايديها مقشفه وزى ايدن صحابى الرجاله بالظبط
تحياااتى
ميجوووووو
متابع said…
قطه
اسمحيلى ارد على ميجو مشمش
والصوره الكاركاتيريه التى قدمها
هو لا يعرف ان مثل هذه الحركات المضحكه تدخل فى نفسها قدرا من الرضا الزائف على اساس انها تمنع الفتنه وطبعا حسب مفهوم هؤلاء الناس ان الفتنه مرتبطه بالجمال
وان الرجال يقعون صرعى امام اى امراه جميله الى آخر هذا الهبل والتخلف العقلى الفاضح
اى ان خالته تقوم بهذه الحركات العبيطه بنوع من التعويض عن مستوى جمالها المتدنى
بهذا الصخب والضجيج
Anonymous said…
سؤال
ماذا ستفعل المنتقبات عند السفر بعد بداية استخدام ماسحات الأجسام فى المطارات...هل سيعودون الى استخدام الدواب ام يمتنعن عن السفر
هههههههه
يبيصو على الرجالة؟ معلش لو نسال فين الاية "وقل للمؤمنات ان يغضضن من ابصارهن" وكمان الموسيقى محرمة وكمان حصلت للدي جيه؟

يمكن دي جيه اسلاامي؟
ولما يسمعوه عند الجيران هيقولو دة اسائة للاسلام
Desert cat said…
قلــ"بـــلال"ــــــب فارس

يعنى بصراحة الناس اللى ردت عليك قالت كل اللى فى نفسى
Desert cat said…
متابع
الجماعة اللى بيقلدوا هنا علشان بيقلدوا بطريقة عبيطة دايما تلاقى كلامهم يثير القئ لانه مجرد متلقى بس للاسف يتلقى بمنتهى الغبااااء
Desert cat said…
متابع
ياريت كلامه مش يخرج بره النت كان بقى سهل لان مستخدمى النت اكيد مش كلهم زيه وفى ناس بتعرف تشغل عقلها لكن المشكلة الاكبر نشر فكره بين البلهاء والعشوائيين
Desert cat said…
متابع
ازيدك على جنونه فكرة الجهاد التى تجعله يفجر نفسه بين آلاف الابرياء ليفوز بالحور العين
Desert cat said…
Ms Venus
وخير مثال صارخ للمراءة فينوسة انزلى اتمشى وقت العصارى على الكورنيش وابقى تعالى قولى لى رايك فى المنقبات واللى لابسين اسدال وكل واحدة لازقة فى حضن واحد
Desert cat said…
Tears
تقريبا يا تيرز اى تجمع فيه جنس واحد بيحصل فيه زى اللى حصل فى الفرح الخليجى اصل كان من وقت للتانى كل واحدة لابسه طقم لانجيرى جديد تلاقيها رافعها العباية وتفرج اللى جنبها
حسسونى اننا قاعدين فى حمام التلات
بجد مجتمع مقرف منافق بيتظاهر بحاجه وجواه كوم من الزبالة
ربنا يتوب علينا بقى
Desert cat said…
karim
الفرح الاسلامى اللى عرفته انه يكون على هوا الزبون
يعنى لو العريس سلفى بتلاقيه مش فيه حتى زغروطة وتلاقيهم قاعدين يذكروا الله زى اللى فى حلقة ذكر لكن لو العريس اخوانجى بيبقى زى اللى مسكو فيه العصاية من النص ده
Desert cat said…
Mai Zamalkweya
بسبب الترجيع على العقول فى قنوات التطرف يا مى
كل فريق بقى خايف من التانى الراجل خايف اصل الست اللى هيدخل بسببها النار تفتنه والست خايفة احسن يتحرش بيها
ولسه هو احنا لسه شوفنا حاجه من الغباء
Desert cat said…
Lone Virgo
ماهو انا بصراحة استغربت من حوار البوس ده
بس معلشى ليس على الاهطل حرج زى اللى بيقولك عكس النقاب العرى الناس خلاص مخها ضرب
Desert cat said…
strategicalone
بلظبط كلامك صح كدا الحاجة بتبتدى كل واحد حر يعمل اللى عايزة بعد كدا تلاقيه بيفرضها عليك وفعلا ده اللى بشوفه دلوقتى من ردود افعال البعض فى الافراح العادية تلاقي ناس تقولك مش كدا حرام والنبى لو كان اتعمل اسلامى
Desert cat said…
كتاب الأغاني للأستاذ فرجاني
الكلام اللى حضرتك بتقوله ده كان لحد 15 سنة فاتوا من بعد قنوات الهجص اللى موجودة فى العرب سات بقت اللى حاطة قطعة قماش على شعرها متدينة حتى لو لابسه من غير هدوم واللى عامل دقن متدين حتى لو بينصب عليك
Desert cat said…
Kontiki
انا فعلا ده اللى تخيلته يا كونتا انى هلاقيهم بيغنوا للعرورة الدور الدور لكن اخلفوا ظنى
الشبا بلال ده لا حرج عليه لانه مجرد متلقى
Desert cat said…
Anonymous
انا بجد عمرى برضه ما شوفت اى فرح مختلط فيه رجالة وستات بيبوسوا بعض يمكن هو الافراح عنده فيها كدا
Desert cat said…
متابع
ماهو علشان اصحاب البيزنس السهل يكسبوا بسرعه بيشتغلوا على المغيبين اللى اى كلمة اسلامى ممكن يجروا وراها .. لذلك احنا محتاجين حملة للتوعية علشان لما واحد يقولهم اشتروا دوا اسلامى يقولوا له وفره لنفسك
Desert cat said…
قلــ"بـــلال"ــــــب فارس
ماهو لسانك اللى جايب لك الكافية
روح اقرا كدا وشغل عقلك ووقتها هتكتب كلامك معقول مش بوس ومش عارف ايه
Desert cat said…
Tamer Nabil
انا ماليش دعوة مين ضد او مع انا اللى يهمنى استغلال الاسلام فى التجارة والتربح
لو الاسلام الشغل بيه كدا ليه الرسول والصحابة مش عملوا زى مرتزقة الايام دى ؟
Desert cat said…
أحمد . خ
استعير براحتك يا احمد
المهم نقدر نوصل صوتنا
Desert cat said…
Migo Mishmish
تصدق انا شوفت النموذج ده وفين ؟ فى المسرح ؟
الاستاذة جاية تمثل وكل لما تسمع واحدة بتضحك تقولها لمى نفسك لو واحد من الزملا جاى يسلم عليها تقوله مش بسلم على رجالة وبالرغم من كدا كان بيبقى ادائها مويس لكن من خنقتها على الناس اغلب الفرقة قالوا يا احنا يا هى والطبيعى كان هما طبعا
Desert cat said…
متابع
المدونة مدونتك
رد براحتك
Desert cat said…
Anonymous
مش ممكن يكون الماسح ده فتحة خير
هاهاهاها
Desert cat said…
عواصف رملية
ده الطبيعى حالة التناقض اللى عايشين فيها حلال لينا حرام على غيرنا

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز