Desert Cat Search
قطه الصحراء: معرض الكتاب .. من حال إلى حال

Sunday, February 7, 2010

معرض الكتاب .. من حال إلى حال



فى كل عام بكون حريصة كل الحرص على انى لازم اروح معرض الكتاب لأن اكيد ولازماً وحتماً ولابد حلاقى فيه كل الكتب اللى تتقرى والكتاب اللى بحبهم حتى واللى مش عرفاهم بتعرف عليهم برضه من خلال الكتب بتاعتهم .. لكن لما رحت معرض الكتاب من يومين بجد وبمنتهى الامانة حسيت انه سوق للروبابيكيا .. عينة الكتب المعروضة فيه كلها عبارة عن بول الإبل والعلاج بالحبة السودة والحمرة والخضرا والفحلقى وتفسير ابن الحلمنتيشى فى الفلابنتيشى وطرق السعادة الزوجية وكيف تربين طفلك على الخط ميلخبطوش يا شابه .. ده غير يا لهوووى كل لما افتكر يا دى المصيبة السودة لعب الأطفال اللى مالية المعرض ولا الأدوات المنزلية يا نهار اسوود ولا الناس اللى فارشة فى الجونينة وقاعدة تاكل كشرى غطينى وصوتى يا صفية .. صفية مين ؟؟ ما علينا انا مش عارفاها اصلا تبقى مين .. ناهيك بقى على المناظر المنتشرة هناك امير الجماعة اللى لابس جلابية مينى وعامل دقن مترين وساحب
وراه الـ4 معيز اللى على زمته ومن حواليه الرعية كلهم مطقمين زيه والمنظر ده منتشر بشدة هناك .. انا كل شوية اسأل صحابى انتوا متأنكدين يا جماعة إننا فى معرض كتاب فى مصر مش أفغانستان ؟؟ يحلفوا لى وحياة طنط زيزى اننا فى مصر برضه انا معرفش مين طنط زيزى دى المهم اهو اى حاجه والسلام .. هو ايه اللى بيحصل فى مصر ؟؟ مفيش دار نشر محترمة ناشرة كتب لكتاب محترمين ؟؟ ما عدا كام دار نشر مش يجيبوا 3 فى العدد من صوابع الايد الواحدة ومش هذكر اسماء علشان مش تبقى اعلانات بقى وحوارت ؟ فريق الكورة بقى اسمه الساجدين .. هو السجود ماله باللعب ؟ المعرض تعرعر وبقى كله كتب تحتوى على وصفات من عند العطار وطز فى كليات الطب واللى بيدخلوها .. بلا ادب بلا ثقافة بلا تقدم بلا تحضر بلا كلام فارغ .. الدور على مهرجان السينما باذن واحد احد نلاقى الفنانات داخلين لينا بالنقاب وحاطين الفنانين فى قاعة خاصة والفنانات فى قاعة خاصة والى اسفل السافلين يا مصر طالما العراعير عايزين كدا


يعنى لما يبقى ده منظر كل دور النشر يبقى بلاه برضه معرض الكتاب ويقلبوه سوق للكانتوا وربنا ينعم عليهم بالادوات المنزلية ولعب الاطفال هتكسبهم اكتر من الكتب ده حتى الناس بطلت تتثقف هما معاهم فلوس يشتروا رغيف عيش لما هيشتروا كتب

25 comments:

عمو عصام said...

عزيزتى قطه...أتذكر تعليقا لصلاح جاهين يقول فيه أنه زار (الوسعايه اللى فى مدينة نصر اللى مليانه كتب)ولم أد فى نفسى الشجاعه لآية إضافه غير الترحم على الإثنين..صلاح جاهين والمعرض.

Sahran said...

ههههههههه

قطتي العزيزة

كلامك ذكرني بسوق السمك في غزة , وإلى جواره يوجد الباعة المتجولين بائعي الكتب الدينية , وكتب الجن , وكيف تسعدي زوجك على الفراش أختاه ,,,,
مش ناقص معرض الكتاب تبعكم غير كام عربة كارو يجرها حمار , ويقلب سوق خضار


أسفي وحسرتي على حالنا يا قطة , وفعلا شر البلية ما يضحك


تحيااااااااااااااتي لك


ودمت سالمة

Tears said...

طبيعى حبيبتى ان تنعكس ثقافة الشارع على كل شىء

دى باظت و خربت و جابت جاز

لاسع افندى said...

مش بس المعرض
بس عموما هو ده اللى بيتباع وهو ده اللى بيأكل عيش



تحياتى

Mai Zamalkweya said...

ماهي كل حاجه في مصر اثر عليها الفكر ده اشمعني معرض الكتاب اللي مش هيوصله و اطمني كلها كام شهر و هتلاقي مصر كلها بقت افغانستان مش معرض الكتاب بس

Anonymous said...

ثم توزيع الثروة هو الأهم وهو الهم الحقيقي، فهناك طغمة متحكمة ومجموعة من خمسين أو ستين عائلة تملك وتدير ثروة مصر كلها، وهناك تقسيم يشرحه أكثر من تقرير اقتصادي مستندًا إلي هيئات مالية منها البنك الدولي يؤكد أن عشرين في المائة من المصريين يحصلون علي ثمانين في المائة من حجم الدخل أو الناتج القومي للبلد، ولكن عندي أنا حسبة أخري لتوزيع الثروة وحجم الغني والفقر في مصر تؤكد لي أن النسبة غير كده فعلاً، حسبتي تستند إلي أن ثلاثة وتسعين في المائة من التلاميذ والطلبة المصريين في مدارس الحكومة بينما سبعة في المائة فقط في مدارس خاصة وأجنبية، تنفع دي؟!، طيب حسبتي أيضًا أن خمسة وتسعين في المائة من مشتركي المحمول في الشركات الثلاثة كارت بينما خمسة في المائة فقط خط اشتراك، كذلك حسبتي أن استاد القاهرة الدولي كراسي المقصورة فيه واحد في المائة بالنسبة إلي كراسي الدرجتين الثانية والثالثة، وإذا أدخلنا مع المقصورة الدرجة الأولي الممتازة يمينًا وشمالاً تصبح النسبة حوالي عشرة في المائة!

و بتقولي معرض كتاب
إيه يا قطة حاليا و ذئب في المستقبل ان شاء الله ... كل شيء في البلد من سيء إلى اسوء

أبو ريشة

Anonymous said...

يوم الجمعة تجمع المئات عند باب معرض الكتاب و قال إيه لازم الناس تستنى لبعد صلاة الجمعة المباركة
طيب الأقباط و اليهود و لي ملهمش دين يستنو ليه .... معرض كتاب إيه إلي مصادرين و منعين فيه نص الكتب المشورة

و الله يا قطة حاليا و ذئب في المستقبل جولة يومية عند باعة الكتب المستعملة في الحواري و الشوارع أحسن بكثير من بهدلة معرض القاهرة لي ملهش تصنيف عالمي ملوش اثر في الثقافة العلمية و بعدين النات موجودة و شكرا للحكومة على حجب و مراقبة كل المواقع

يلعن ابو دي بلد

ابو ريشة

Kontiki said...

ازيك يا قطة مش قلتلك عندى مش حتلاقى كتاب الرحلة فى معرض الكتاب يا بنتى معرض الكتاب لما بيكون فى ارض كوتة فى اسكندرية نفس المناظر اللى انتى شوفتيها بتكون بالظبط هنا تقريبا هو معرض كتب فى الدين انما مترجمات ادبية او كتب قيمة تستاهل صعب عموما مكتبة الاسرة لها انتاج مميز ورخيص حاولى تتابعية وكمان فى المكتبات الامريكية بيكون فيها انتاج مميز وسيبك انتى مفيش احلى من معرض كتاب عم مجدى بتاع كليوباترا ولا معرض كتاب سور المعبد فى النبى دانيال الكتب القديمة هناك من سنة 30 ونجيب محفوظ بقى والمازنى ومترجمات والكتاب الغالى بيكون بجنية وربع
:)
تقبلى مرورى وتحياتى

مواطن مصري said...

تصدقي بالله انا سئلت نفس السؤال لصاحبي

و سئلت صاحبي قولتلة هما الجماعات احتلو المعرض

هو احنا في المعرض كل ما اروح في حتة الاقي صور ل ابراهيم الفقي

و حمبية صور لشيوخ قناة الناس


اشتري اللاهوت العربي و اصول العنف الطائفي لدكتور يوسف زيدان كتاب اكثر من رائعععععععععع

أحمد.خ said...

أستاذتى الفاضله تحياتى لك ولمحاولاتك البريئه والجريئه لعمل شئ من أجل هذا البلد وربما أسمح لنفسى بإضافه ولو متواضعه لهذا البوست الرائع وبإعتبارى متخصص فى البحوث الإنسانيه والإجتماعيه بحكم عملى بالمركز القومى للبحوث أود أن أطمئنك بأن هناك مؤشرات إيجابيه للغايه لعودة القراءه كهوايه للكثيرين ولذلك لاداعى للدخول فى مناقشات غير مجديه حول طريقة عرض الكتب ولكن الأهم هوأسعارها التى يجب أن تكون فى متناول الطلبه والموظفين مع تخفيف الرقابه على الكتب السياسيه وليتك تركزين على هذه النقاط الهامه لأنها ستتيح القراءه كمورد هام للمعلومات والمتعه الذهنيه للجميع مع منحنا الأمل فى عودة اللغه العربيه السليمه لألسنتنا التى إعوجت ولأقلامنا التى تخطئ فى قواعد اللغه والإملاء ولك تحياتى وإعتذارى رغم ثقتى فى حسن إدراكك وعدم غضبك منى لمخالفتى لك فى الرأى وشخصيا سعيد بمعرفتك وبمدونتك الرائعه وأتمنى أن أتواصل معك ومع ضيوفك الأعزاء وأعتذر لو كان تعليقى قد تكرر لوجود عيب فى النت ولم أكن متأكدا من صحة إرساله من عدمه ورجاء مراعاة ذلك

Anonymous said...

ن مطالب الأقباط يجب أن تكون وطنية لا طائفية.. إن مكان الأقباط الصحيح ليس أبدا فى أروقة وزارات الخارجية الغربية.. مكانهم الصحيح هنا، فى مصر، مع إخوانهم المصريين الذين يناضلون من أجل العدل والحرية.. عندما يزول نظام الاستبداد، وينتزع المصريون جميعا حقهم الطبيعى فى اختيار حكامهم بحرية.. عندما ينتهى قانون الطوارئ، وتزوير الانتخابات والقمع والتعذيب.. عندئذ فقط، سيحصل المصريون جميعا ــ المسلمون والأقباط ــ على حقوقهم المهدرة
من مقال علاء الأسوانى بجريدة الشروق
ياريت الكل يقراه.

كافى خيرى شرى said...

لو كان ده معرض للكتاب يبقى اللى جنب بيتنا معرض للسمك والتانى للخضار

Desert cat said...

عمو عصام

وياترى لو كان ابو صلاح شاف المنظر دلوقتى كان بقى ايه كلامه

Desert cat said...

Sahran
المناظر دى منتشرة فى الشوارع وجميع وسائل المواصلات مش حارمينا من حاجه ولله الحمد

Desert cat said...

Tears
يبقى نعمل حسابنا انها هتتحول لافغانستان قريب اوى

Desert cat said...

لاسع افندى
ماهو انا برضه بقول انه كله مساير الموضة والموضوة دلوقتى البس جلابية مينى والسواك فى جيب والمصحف فى الجيب التانى واعمل ما يحلو لك بس فى الخفاء

Desert cat said...

Mai Zamalkweya
الموضوع مش هياخد كام شهر ولا حاجه يا مى بالمنظر اللى شوفته ده

Desert cat said...

أبو ريشة
ماهو تغييب عقول الناس وصدأ عقولها اللى وصلنا لكدا يا عزيزى

Desert cat said...

ابو ريشه
انا رحت الساعه 4 علشان كدا مش وقفت بس شوفت الخبر تانى يوم على الناس ومدى استياء الناس وكالعادة الناس بتدخل الجنة والنار بمزاجها كتبوا ردود ليها العجب

Desert cat said...

Kontiki
يارتينى سمعت كلامك
وادى جزاء اللى ميسمعش كلمة كونتى تقولها
انا خلاص هعمل بنصيحتك بعد كدا بلا معرش كتاب بلا معرض جزم

Desert cat said...

مواطن مصري
وعايزة اقولك ان ده طلع رأى اغلب رواد المعرض مش انا وانت بس
حتى شوف تقرير المصرى اليوم

http://www.almasry-alyoum.com/article2.aspx?ArticleID=243381&IssueID=1676

Desert cat said...

أحمد . خ
والله يا احمد انت بتدينى امل
بس بعد اللى شوفته فى المعرض مش عارفه ليه مش متفائلة باللى جاى
ربنا يستر

Desert cat said...

Anonymous
ياريت حد من المسؤلين يقرا مقالات دكتور علاء الاسوانى بضمير
وساعتها يمكن تتحرك المياه الراكده

Desert cat said...

كافى خيرى شرى
دى مجرد صور
الحقيقة ازفت من كدا

فرعون said...

اهو معرض والسلام زى مهرجان السينما اهو مهرجان والسلام