هو القرضاوى بقى نبى ومحدش عارف ؟

مقال قريته فى موقع اليوم السابع بعنوان
فتوى الكريسماس للقرضاوى .. تتهم عمرو خالد " بالشهادة الزور "
طبعا القرضاوى العالم العلامة بالقوى يقتى فتوى صريحة مانعه باتة بعدم تهنئة الإخوة المسيحيين فى أعيادهم والإحتفال بالعام الميلادى الجديد وخد بالك انت وهو وهى لو قولت لواحد زميلك مسيحى فى الشغل كل سنة وانت طيب فى العيد بتاعه يبقى انت كدا بتساعده على الكفر .. ولو انت يا مسلم اشتريت شجرة الكريسماس فى ليلة راس السنة وفرحت انت واهل بيتك بسنة ميلادية جديدة تبقى انت كمان كافر وعلى العرب المسلمين المقيمين فى بلاد الكفر والفسوق لا يحتفلوا معاهم باعياد الميلاد ولا يشتروا الشجرة ولا يهنوهم هما يروحوا يعيشوا عالة عليهم .. ياخدوا منهم معونة بطالة ويستفيدوا بعلمهم ويشتموا فيهم .. وعلى اللى يشوف مسيحى يوم العيد بتاعه يتف فى وشه على طول علشان يعرفه انه كافر وانه مش من مستوانا نقوله كل سنة وانت طيب .. وكل ده ليه رداً على منع سويسرا بناء المآذن بناء على قرار ديموقراطى جداً .. الديموقراطية اللى القرضاوى واخوانه بيعتبروها كفر .. اى إنحطاط ده وقلة قيمة واى عار يلحقه القرضاوى بالإسلام والمسلمين ؟ يا شيخ وانت واضح فعلا شخت وخرفت .. الإسلام غير كدا تماماً .. النبى محمد كان جاره اليهودى بيأذيه ويرمى له الزبالة فى طريقة وهو رايح يصلى الفجر .. ولما فى يوم مش لقى زبالة سال عليه لاقاه مريض راح زاره .. يا شيخ إذا كنت تعرف ابسط حقوق دينك عليك .. كنت عرفت ان الرسول الكريم مات ودرعه مرهون لدى يهودى يبتاع منه الطعام لأهل بيته ؟
يا شيخ .. مين اللى قالك ان المسيحيين كفار ؟ هو القرآن الكريم مش خص السيدة مريم العذراء بسورة باسمها كمان واسمها سورة مريم ولا انت مش بتقرا قرآن ؟ انت تعرف ان مريم تبقى ام السيد المسيح اللى انت بتقول على اهله كفار ؟ ومين اللى قالك يا قرضاوى انك هتدخل الجنة وانت المسلم والمؤمن اللى قاعد ينشر الكره بين الناس وبعضها ؟
المشكلة الأكبر بقى فى التعليقات اللى فى المقال الذى تم ذكر نص الفتوى فيه .. وكأن الناس اصبحت حفنة من الثعابين السوداء تغرس انيابها فى المجتمع وكأنهم اصبحوا جميعاً اتباع الديانة الفتشيشة وهى الديانة التى تقدس الاشياء المادية للأعتقاد بوجود قوى سحرية بداخلها أو لأنها قادمة من عالم الآلهة فى السماء
قاعدين يقدسوا فى القرضاوى وكأنه نبى مش بشر يخطئ ويصيب
ولسه بتقولوا اشمعنا احنا اللى عايشين فى الضنك ده وبناكل اكل مسرطن وبنشرب مية مجارى وماشيشين فوق اكوام زبالة .. ماهى من عقولكوا اللى صدت من عدم التفكير .. ورميتوا بمفتحاها فى اقرب مرحاض صادفكو
الله محبة
وكل الاديان دعت للحب والتسامح ونبذ العنف
ومن النهارده لحد آخر العمر يا كل إخواتى المسيحيين فى العالم كله صلوا وتعبدوا ومارسو طقوسكو واللى مش عاجبه يشرب من البحر الميت .. كل سنة وأنتوا فى حب وخير وسعادة
كل سنة والدنيا منورة بيكو ... كل سنة وكل العالم من شرقه لغربه لا يهم اسمه لا يهم دينه لا يهم جنسه فى حب وتسامح ووئام .. اما اللئام فإلى الجحيم جميعاً والهى لا تشوفوا يوم سعيد دنيا ولا آخرة قادر يا كريم يا بتوع الفتن يا كلاب

Comments

كل سنة و أنتي طيبة
Anonymous said…
من قال ان المسيح بن اللة كفر يظهر يقطة محتاجة مزاكرة كتير
عمو عصام said…
قطتى العزيزه..تكفينا كلماتك بلسما يمسح عنا جراح الأحبه وكل سنه وإنتى بخير وصحه وسعاده ومنبرك الجميل يصحح المفاهيم وينشر بذور الخير فى دنيا إمتلأت بالشر ولفضيلة الشيخ القرضاوى نقول:وإنت بالصحه والسلامه على تهنئتك المتوقعه بأعيادناوالحمد لله (ربنا بيقطع من هنا ويوصل من هنا)وشكرا على كل حال
Wanda said…
قطة خير من الف اسد فعلا
صح كلامك

بس من عشمى حقولك قولى و مياو
بس منغير متهزقيه و تقللى من قيمة كلامك بالكلمات ده

انا بقى فى نفسى اهنى كل المسيحين فى عيد المسيح بس حكتبها فى راس السنة علشان تكون وسط بين المسحين الشرقين والغربين
:-)))

و صباح المياو
shalimar said…
يسلم تمك عزيزتي

فعلا ريحتيلي قلبي من قاعدين بنشوفوا وبنسمعوا كل يوم عن هذا الاضطهاد الغير مبرر والذي ان دعا الى شيئ فهو يدعو للحزن فعلا

بشكرك على معايدتك الحلوة وكلامك المليئ بالفرح والمحبة وفعلا الله محبة

ربنا يحفظك بسلامو ويديكي الفرح

تحياتي
ماجد said…
اللى انت بتقولية دة ولا هو من قبيل الشهرة صدقينى الكلام دة عيب وقلب للحقائق وكمان على فكرة مش مقنع على الاقل ليا
karim said…
احسنتى القول فى كل كلمة سيدتى, بس مش ممكن واحد زية يقول كدة و الناس بتعتبرة قدوة لو دة حقيقى تبقلى مصيبة كبرى ومش هانبقى ابداا مسلمين بجد طول ما الكلام دة بيتقال بس اعتقد ان الناس دلوقتى بقت تفكر اكتر و تعرف الصح من الغلط, وربنا يستر علينا,و كل عام وانتى بخير سيدتى
Anonymous said…
اسلوبك فى الحديث عن عالم جليل يظهر مدى الانحطاط الفكرى والحقد المريض على رموز الاسلام
舞 Zamalkweya said…
كنت لسه من كام يوم بتخانق مع واحد علي الفيس بوك علي نفس الموضوع اقوله يابني ماهما بيعيدوا علينا في ايعادنا
يقولي ماعلشان احنا اعيادنا حق وهما اعيادهم باطل يبقي هما يعيدوا علينا واحنا لا وكمان احنا المفروض منردش عليهم
احنا بس لينا اننا نواسيهم في حالات الوفاه وكمان منطلبش الرحمه للي مات
اقوله ده ربنا قال لكم دينكم ولي ديني
يجيبلي لينكات فيها كلام ابن عثمينين و كلام شويه شيوخ مكتوب فيهم انه حرام
اقوله طيب انا اصدق القرءان اللي بيقول لكم دينكم ولي ديني ولا كلام الشيوخ يوقولي ربنا يهديكي بس انا خايف عليكي وكل الشيوخ بيقولوا كده
تقريبا الناس عقلها لسع

وبردو كل سنه وكل اخواتي المسيحيين طيبيين
Mai
عمو عصام said…
مقدرتش اقاوم دخول المدونه وكتابة تعلق تانى بعد مالاحظت الهجوم عليكى ومع ثقتى فى قدرتك على صد الهجوم لقيت انى لازم اشكرك على شجاعتك وعلى تصديكى للاراء والاوضاع الغلط..شدى حيلك انتى قدها وقدود
Anonymous said…
رموز الإسلام؟
بل خراء الإسلام
ابو احمد said…
كل سنه وانتى طيبه
سيف الإسلام إبن تيمية said…
أدعوكي يا قطة الصحراء لدخول الإسلام .

اللهم إهدي قطة الصحراء لدخول الإسلام

اللهم إجعل مدونتك للدعوة الإسلامية بدلا من هذه الأفكار المغلوطة
Desert cat said…
على باب الله
وانت طيب وفى افضل حال
Desert cat said…
Anonymous
ما تروح تذاكر انت وتعرف المقصود ايه بابن الله ؟
يمكن تقدر تتعلم قبل ما تتكلم
Desert cat said…
بابا عصام
كل سنة وانت اطيب قلب فى الدنيا
محبتى ليك يا بابى يا حبيبى
Desert cat said…
Wanda
بجد اسفه على اسلوبى لو ضايقك
بس البتاع ده اسلوبه مستفز لانه بيعمل فتنة بين الناس وبعضها فى الوقت اللى البلد بتغلى فيه اصلا ويعنى ايه شركاء الوطن نكفرهم فى عيشتهم بجد عالم مقرفه

ميرسى ليك يا قمر
Desert cat said…
shalimar
ميرسى اوى ليك وكل سنة والجميع فى افضل حال
ويارب عيد سعيد عليكو
Desert cat said…
ماجد
هو ايه اللى من باب الشهرة هو انا قولت لك انا نجمة وعايزة اتشهر علشان المخرجين والمنتجين يجروا عليا دى مدونة مش ضربتك على ايدك تدخل تكتب رد فيها ؟؟
مش تبقى عاقل كدا وتحكم عقلك قبل ما ترد ؟
ثم ابسط حقوق الانسان على نفسه احترامه لعقله
كان قبل تعليقك اللوذعى ده ممكن تاخد بعضك وتطلع على جوجل تعمل سيرش وتشوف بنفسك
ولا انت القرضاوى واخد عقلك وبتكدب نفسك
Desert cat said…
karim
هو قال الكلام ده يا كريم فى خطبة الجمعه اللى فاتت من مسجد عمرو بن العاص بالدوحة وناس كتير جدا استنكروه على فكرة حتى اللى كانوا بيسمعوا له هاجموه
Desert cat said…
Anonymous
طريقتك فى الرد توضح مدى انحطاطك الاخلاقى مش الفكرى بس
ولو القرضاوى رمز للاسلام يبقى لا داعى للاستغراب من كم الناس المتحولة للمسيحية والملحدين طالما الرموز تجار دين وبتوع فتن وعوالم بصاجات
Desert cat said…
舞 Zamalkweya
حاولى مش تجادلى مع الغبى يا مى لأنه مسير لا يملك المنطق ومسلم عقله لتجار الدين لحد ما عقله صدى

محبتى يا جميلة
Desert cat said…
بابى عصام
دى عالم منحطة مش تستاهل طريقتك الطيبة يا حبيبى دول يستاهلوا ضرب الجزم القديمة
شكرا ليك بجد على مشاركتك الطيبة دى
Desert cat said…
ابو احمد
دكتورنا العزيز
كل سنة وانت طيب وفى افضل حال
Desert cat said…
سيف الاسلام ابن تيمية
طيب ايه رايك استغل انا وجودك هنا واهديك للاسلام الصحيح
مش الاسلام بتاعك انت والقرضاوى
اسلام الفتن والسلاح والمراة العورة
انا عايزة ادعوك للاسلام الصحيح دين السماحة والمحبة واحترام الاخرين
الاسلام اللى بمعناه الصحيح
المسلم من سلم المسلمون من لسانه ويده

ايه رايك بقى تتقى الله كدا وتخليك مسلم بجد
وتسيب الناس فى حالها

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز