قمة التفاهة والإسفاف

خبرين مثيرين للإشمئزاز والإشمئناط .. بل لو قولت قمة التفاهه والهيافة شوية عليهم الحقيقة
الخبر الأول قرأته بالأمس فى جريدة اليوم السابع ..
الخبر بيقول ايه بقى يا سادة خير اللهم اجعله خير كدا
ان السيد عضو مجلس الشوعب المحترم حمدى حسن عضو المجلس عن الاخوانجية اللى الناس اعطته صوتها امانة
تقدم ببيان عاجل إلى رئيس الوزراء حول مصافحة شيخ الأزهر للرئيس الإسرائيلى شيمون بيريز فى مؤتمر حوار الأديان
يا اخى لا مؤاخذة يعنى كلمة مش ولابد كان نفسى اقولها بس الرقابة
الا هو مش شاف العاهر السعودى وهو جالس جنباً إلى جنب ايهود اولمرت .. ولا ده مش يقدر ينطق ولا يجيب سيرته ؟؟؟
النكتة الكبيرة بقى فى الخبر بتقول ايه ؟؟؟
كما طالب شيخ الأزهر بالاعتذار للمسلمين على هذه المصافحة المرفوضة وغير المعقولة
سيادة النائب الاخوانجى مش سمعنا صوته وهو بيتقدم ببيان بالتحقيق فى احداث الفتنة الطائفية المفتعلة فى عين شمس ...
ولا اتقدم بطلب احاطة لوزير الخارجية من اجل نجدة الطبييبن المصريين ... خايف احسن التمويل اللى بيوصلهم من عند الوهابيين يقل ؟؟؟ مش بدال التعليمات اللى بينفذها داخل المجلس كان من الاولى انه يبحث عن مواضيع تهم أهل دائرته ومعاناتهم بدل التفاهات اللى رايح يتقدم بيها للمجلس ويضيع وقت ممكن يتم فيه مناقشة بيان مفيد لعضو آخر ؟؟؟؟
الخبر التانى وده من المصرى اليوم
«الإخوان» ينظمون ٤٦ وقفة احتجاجية ومؤتمرات جماهيرية للتضامن مع «غزة» فى ٤ محافظات
هما الاخوانجية دول مش عايشين فى مصر باين ؟؟؟
الا مش فى حد سمع لهم صوت من اجل الغلاء والفقر والبطالة
الا مش فى حد سمع لهم صوت وكل يوم والتانى اكتشاف مافيا لتجارة للاعضاء
الا ما مش فى حد سمع لهم صوت من اجل الدويقة اللى وقعت فوق راس سكانها
ولا اطفال الشوارع اللى ماليين الاشارات ماشيين حافيين غير التحرشات اللى بيتعرضوا لها من اشخاص المفروض انهم محترمين
بيقولوا على نفسهم اقوى قطيع سياسى معارض .. لما بيقولوا على نفسهم سياسيين ليه بيلبسوا عباية الدين ؟؟؟
ولما بيقولوا على نفسهم معارضين ؟؟؟
طيب ياترى هما بيعارضوا مين ؟؟ وهما كل كل همهم التباكى على فلسطين ومن اجل فلسطين ... اما مصر فطز فى مصر وشعبها .. وبالطبع هذا وان دل فانما يدل على انهم تنظيم دولى كل يوم ينظموا مظاهرات ومؤتمرات من اجل غزة ووزة عايزين يثبتوا وجودهم عايزين يعرفوا رؤسائهم ومحركيهم الممولين الكبار ليهم انهم بيعملوا شغل مش نايمين يعنى .. هما بالفعل وان كانوا صدقوا فى شيئ فانهم صدقوا بانهم قطيع .. بس مكانهم مش وسطنا مكانهم صحرا يرعوا فيها وراعيهم الكبير يبقى يوايلهم من وقت للتانى بشوية برسيم

Comments

sigon1977 said…
الاخوان يقفزون من واقعة لاخرى من أجل المصلحة و اتذكر ان عصام العريان تحدث عن استمرار الوضع الحالى مع دولة اسرائيل لو وصلوا للحكم ، المصلحة هى محرك الاخوان
Soooo said…
اما انك غريبه غربنه ياقطه

يابنتي افهمي .. هم بيتعاطفو مع غزة وضد السلام مع اسرائيل .. ليه بقى .. لأنهم ضد ماهو غير عربي اسلامي
شاخدالي بالك .. عربي اسلامي

يعني الحوار بتاع الدكاتره اللي اتحبسو واتجلدو في السعوديه .. ده عادي .. ليه بقى .. لأن مصارين البطن بتتعارك .. وبعدين هم ماعملوش اي سياح ولا زيطه لبتوع الدويقه ليه بقى .. لأنهم كانو عايشين سبعتاشر نفر في اوضه او في عشه .. وده مخالف للشرع والعزل
!!! مش عارف عزل ايه .. بس عزل يعني

يلا انا هامشي .. عايزه حاجه من السوبرماركون؟؟؟




سلاموووووووووووز
Mohamed Hamdy said…
يا ستى اهى استبيانات وبتتقدم ولا حد بينظرها ولا حاجه .. ربنا يخلى الاخوان ولا يقطعلهم عاده سريـ.... قصدى ولا يقطعلهم إستبيان

سلام
micheal said…
هيافة وتفاهة ومتاجرة بشعارات عفا عليها الزمن
ايه يا قطقيطوا انتي غريبه جدا نازله خربشه في ده وده مالك بس يابنتي براحه شويه
عموما انا مش عارفه ليه انتي متعارضه اوي كده مع الاخوان وليه بأسلوب حاد اوي كده عارفه لو انتي مش متعارضه مع حد يبقي مع الافكار بس مش الشخص نفسه وخالي بالك فيه الكويس وفي الوحش في كل الدنيا

انا معاكي في موضيع كتير وبختلف معاكي بردو في موضيع كتير بحترم رأيك لان كل انسان حسب فكره واراه ممكن نختلف مع بعض في الاراء فقط في الاول والاخر كلنا اناسين واخده بالك انتي من

اناسين دي يعني عباد ربنا سبحانه وتعالي
والله مافي حاجه مستهله امال ازاي هنبقي ايد واحده بقي والشعب هيرتقي بقي



كمان في حاجه انا زعلانه منك فيها جدا جدا او مش منك من رأيك رغم اني بحترمه جدا بس زعلت في الموضوع ده لانك جبتيه بصوره وحشه جدا علشان كده تلاقيني لو حاجه متعارضه معاكي فيها مش بعلق

ياريت متزعليش مني بجد بس اتمني لو متعارضه مع حاجه ممكن تقولي رأيك بس بلاش تجريح او بدون اسلوب يزعل حد كله يقول رأيه
وفي الاول والاخر

الحلال بين والحرام بين
معلش اني طولت بس مش عايزه حد يزعل من حد وكلنا عايشين ضيوف في الدنيا ويا عالم مين الصح ومين الغلط محدش ضامن
اللي ربنا أمرنا بيه ان احنا نأمر بالمعروف وننهي عن المنكر وياريت نفهم الدين صح ونطبق شرع ربنا سبحانه وتعالي وياريت نحب بعض ونخاف علي بعض اكتر من كده
عشان بلدنا ترتقي ويبقي في ساحه للحوار والمناقشه ونحل مشكلنا مش كل يشتم في كله
سمحيني علي الاطاله
يا قطه
تحياتي
أولاً : اختلف معك

في موضوع البيان اللي قدمه حمدي حسن بخصوص شيخ الأزهر لرئيس الوزراء
وإنه مقدموش ضد ملك السعودية ..

لسبب بسيط إن ملك السعودية لا يتبع رئيس الوزراء

ثانياً: أتفق معك

طبعا أن معاكي أن تنظيم احتجاجات بخصوص غزة مش كفاية لازم يكون في بخصوص كل شيء أنت أشارتي إليه

تحياتي
وليد
الحان said…
في مثل عربي بيقول
البعرة تدل على البعير, والاثر يدل على المسير
بمعنى ان الاعتراض على مصافحة بيريز (بصفته يهودي. يعني شيئ بديهي انهم اعداء ومفيش نقاش) فهذا ليس اعتراض على المصافحة وانما استغلال كل فرصة لابراز نفسه على حساب اخطاء غيره علشان يوصل لهدفه في الوصول الى الحكم وساعتها ممكن ياخد بيرز بالاحضان على راحته

ربنا بيقول قي القران:- واذا جنحو للسلم فاجنحو لهم

اما بالنسبة للناس الى سكنين على الجبل المايل وتعب فهذا موضوع لا يخدم مصلحة شخصية زي المصافحة مع "العدو بيرز"
او غزة المحتلة, ايوة بس الاحتلال خرج منها من زمان, يعني موش محتلة وانا كنت بافتكر ان التسمية فلسطين تعني غزة, ولكن بالاخر اتضح ان محدش عارف هي فين فلسطين وان باقي مدنها مفتوحة ومافيهاش حصر ولا احتلال علشان مافيهاش حماس الي موش عايز يتنازل عن السلطة تلبية لنداء الدول العربية وموش عايز يكمل المناقشات في مصر وغير عن كدة في مصدر بيقول ان حماس ملى علاقة مع الموساد علشان يفضل بالحكم

يبقى احنا كمصريين هنعرف منين كل الاخبار دي طالما مبنعرفش نقرا ونكتب اللغة العبرية ولا حتى العربي كمان, فيبقى سهل على الاخوان يدحكو علينا ويجندونا لصالحهم علشان احنا موش راضيين عن الحكومة فنقع تحت استغلال اي حد بيطمعنا باحلام وردية وبيحرضنا باي شكل

يعني الرئس السابق المرحوم انور السادات اللي رجع سينا ورفع عليها علم مصر قتلوه, الجدع دة وقف هناك وقال انا اهو في عقر دارهم ورجع فاكر انو عمل حاجة لمصر بس قتلوه

اخوان واسلام ايه بس اللي عاملين مراكزهم الرئيسية في الغرب الكافر, في امريكا
tamer.sala7 said…
انتي بقي جيتي علي الجرح

للاسف الكلب ابن الكلاب ده عضو عن الدائرة بتاعتنا في اسكندرية

وعايز اقولك ان حضرته مش عامل اي حاجة لأهالي المنطقة ومش عايز يخدم اي حد غير لما بيكون في مصلحة حتي القوافل الطبية اللي بتتعمل لازم اللي يكشف فيها يكون له جذور اخوانية ولما شرطة المرافق نزلت مساعدش حد خالص غير تجار الخشب وتجار المخدرات حتي لما الراجل الغلبان اللي اتضرب اللي اسمه حمادة عبد اللطيف بتاع مدرسة الجزيرة حمدي حسن مصعدش الموضوع ولا عمل اي استجواب ولا مؤتمر صحفي غير علشان الراجل اللي اتضرب ده عضوا في الجماعة هو ومراته وبناته يعني من الاخر مش بيخدم غير الجماعة الاسلامية مش اهل الدايرة بتاعته

علي فكرة انا طلبت اقابله اكتر من مرة بصفتي مدون رفض وبصفتي مدير شركة برده رفض
واحد صاحبي في الجماعة عرف اني عايز اقابله قالي انا حاخدلك منه معاد قولتله بصفتي ايه قالي بصفتك صاحبي
Migo Mishmish said…
وحشتيني يا قطة
انا واخدة اجازة صغيرة من ساندو قولت اما اشوف ايه اللي بيحصل
بقالي 21 يوم لا قريت جرنان ولا اتفرجت على نشرة لاني غرقانه في اللبن والبامبرز والذي منه
عموماً السيد العضو ينطبق عليه المثل بتاع الواد اللي قال لابوه علمني الهيافه قام ابوه قاله انت كدة كويس
هو كدة قشطة جداً مستوى ذكاؤه يساوي مستوى ذكاء اللي انتخبه
Love,
MishMish
MaNoO said…
لا يصح ان نقول عنهم انهم مجموعة للمعارضة لان المعرضة بيبقى شغلها الشاغل حب البلد مش حب الكرسى ولا السلطة انا بجد بشكرك على طرح الموضوع للنقاش وبحييكى والنقطة المهمة جدا بعد الاخوان عن المملكة واعتبارهم منطقة محرمة واللى مرتبط ببعدهم عن مشاكل البلد وبعتبروها حاجة فرعية يااخواننا يااصحاب العزة كما تقولون فوقوا بقى وعيشوا بين الناس انتو كده مفيش بينكم وبين الحزب الوطنى فرق
شوفتي حماس بتعمل اية في الحجاج مناعهم و ضربت حجاج فتح

فعلا حماس قمة في الزبالة و سبب من اسباب حصار غزة و انشقاق و هي المسئولة عن انشقاق الصف الفلسطيني
و على رائيك لما ملك السعودية قعد مع بوش و شرب ويسكي معاة و النبي لو عندك الصورة دي اعرضيها عندك

مقدمش طلب احاطة لية و قال لازم يعتذر قالة مش ملك السعودية بيقولو انو خادم الحرمين الشرفين و لما يقعد مع
الست كوندي

معلش يا قطة يمكن النائب عاوز يعمل منظر عشان ياخد زيادة من التمويل الي بيجي في السعودية انتي عارفة العيد جاي بقى
انونمس2 said…
رد على مدافعه عن النقاب وهى غير منقبه
معك فى ضرورة المناقشه الهادئه الرصينه ولكن اسمحى لى لان اعترض على تناولك لهذا الموضوع لأنه لم يغادر سطخ

الأمور ولنبدا بالنزول الى تحت السطخ
اولا من الخطا ان يقارن النقاب باى ملابس اخرى ...الملابس لا تخفى الشخص تماما هكذا عن الأنظار فتلغى وجوده وتميزه

بملامحه عن الآخرين هو ينطوى على الغاء لوجود الأنسان وهو فى منتصف الطريق الى بقاء المراه مختفيه فى بيتها مثلما

نادت ونفذت ذلك طالبان باسم الأشلام ومن تخرج تشوه او تقتل ولو للدراسه او العمل ...النقاب رمز لثقافه بدويه ذكوريه

المراة فيها مجرد اداه لأمتاع الرجل جنسيا...لعبه يلهو بها ويجب ان يخفيها كاى شىء يمتلكه ومع انتشار هذه الفكره الوافده

وعن طريق شيوخ فضائيات النفط وجدنا التحرش يطول ختى المنقبات وبالتالى لا علاقة بين النقاب والفضيله او العفه ولك ان

تسالى عن المجتمعات المغلقه ماذا تفعل نساءها عند اول فرصه يغيب فيها الرقيب ومصر قبل هوجة التقاب الوافد كانت النساء

فى اغلبهن محتشمات دون مبالغه ودون ان ترتدى اى منهن ثيابا طويله تمسح بها الشارع ببركها وترابها مع ان النظافه من

الأيمان ولم نكن نسمع عن التحرش بل كانت العلاقات بين الجنسين فى الجامعه مثلا فى منتهى الرقى ....تقطه اخرى غريب

ان تدافع النساء او واحده منهن عن الغاء وجود المراه بصفتها لأسباب تارخيه هى الأضعف والنظر اليها كمجرد أله لمتعة

الرجل ...وهذا المفهوم اى التركيز على المراه كمجرد آله للمتعه تفعله المنقبه كما تفعله مرتدية الملابس المثيره ولكن

بطريقتين مختلفتين ....والنقاب ليس من الملابس ولكن هو رمز لثقافه كامله كما قلت تود لو استطاعت ان تحجم المراه او

تبقيها فى بيتها وبقليل من التفكير والخيال نتصور انه من المستحيل ان تظهر مذيعه وهى منقبه او ممرضه او مدرسة اطفال

لأن كل هذه المهن تحتاج الى النظر الى ملامح الوجه ولذلك فالنقاب حطوه الى منع المراه من العمل او الخروج او التعليم كما

تحت خكم طالبان لأنها ستحتاج ان تبرز بطاقتها وتكشف وجهها فى الظريق او فى الأمتحان
والموضوع اكبر من مجرد قطعة قماش واندهش بل افزع ان واحده تقول حاصله على الماجستير فى احد العلوم الأنسانيه

يخفى عليها كل هذا وهو قليل من كثير لأن الموضوع يحتاج لصفحات ...هذا فى حد ذاته مؤشر يدعو للقلق على مستقبل

مصر الذى حلعت فيه المراه الحجاب فى غمرة ثورة 19 لتبدا صفحة جديده فى تاريخ كرامة المراه نصف المجتمع واليوم

تفلد مجتمعات منعت رجال المطافىء من اطفاء حريق فى مدرسة بنات ختى لا يختلط الجنسان وتركوا البنات لمصيرهم

المفزع....طالبان اخرى
انونيمس2 said…
عزيزتى
ارجو الا ننسى مصرى محترم جدير بكل احترام وتقدير هو المسؤول الكبير السابق فى وزارة الخارجيه الذى ابى ضميره الا ان يتجه للقضاء لوقف مهزلة تصدير الغاز لأسرائيل باتفاقيه سريه عجيبه
هو السفير ابراهيم يسرى
وحتى نعرف ان بمصر لايزال شخصيات تستحق الأعجاب والتقدير
Desert cat said…
sigon1977
ده المعروف يا عزيزى للقاصى والدانى ولكن المغيبين فقط او المشتكرين معهم فى المصالح هم من يسيسون الدين
Desert cat said…
Soooo
اه اخيرا خدت بالى يا سوو انت كدا وضحت لى الرؤية خالص
عايزة زبادى من فضلك من السبر ماركون
Desert cat said…
Mohamed Hamdy
يعنى هى الناس انتخبته واديتله صوتها علشان يتكلم نيابة عن غزة وعن حماس
اهى مرة والناس اتعلمت
وربنا ما يقطع لهم عادة يا عزيزى وادينا بنتفرج على السيرك اللى بيادوا عليه ادوارهم
Desert cat said…
micheal
انا بضه من رأيك
:)
Desert cat said…
سمكه وحده
فين الشخص اللى انا متعارضة معاه ده هو انتى جمعتى كل الاخوان فى شخص واحد
اوعى تكونى فاكرة انى ضد عضو المجلس المؤر اللى قدم الاستبيان انا اصلا مش عارفاه معرفة شخصية ولما كتبت البوست كان بناء على كلام تافه هو مقدم عنه استبيان .. يبقى ازاى متعارضة مع اشخاص ؟؟؟
اما اتفاقك او اختلافك مع باقى البوستات فده شيئ يرجع لك والطبيعى اننا كلنا مش زى بعض فالعادى انه يكون فيه اختلاف ... بالنسبة للمنقبات الفاتنات فاحب اقولك ان مش بيتخفى غير المجرمين اللى هرباينين من احكام او المجرم اللى عايز يرتكب جريمة .. المنتقبة تتخفى ليه ؟؟؟ هترتكب جريمة ؟؟؟
شرفتى يا قمر
Desert cat said…
!!! عارفة ... مش عارف ليه
معلشى يا وليد انا مش طالبت من عضو الاخوان انه يقدم استبيان بخصوص ملك السعودية انا كان كلامى ليه صوتهم مطلعش بخصوص الطبيبين اللى فى السعودية ولا حتى تكرموا باى تعليق على اللى بيحصل للمصريين فى السعودية يعنى نقضى للوضع ككل

تحياتى
Desert cat said…
الحان
حبيبتى الاخوانجية لا يهمهم شيخ الازهر ولا يهمهم مصر .. ماهو قالها كبيرهم من زمان طز فى مصر وشعب مصر
انما يهمهم يدعموا حماس اللى حطمت الجدار العازل بينها وبينا وبيفكروا دلوقتى بشكل جادى فى احتلالنا واعتقد ان كل ده بمخطط من شيخ المنصر اللى اسمه مهرى عاكف
السادات راح اسرائيل قالوا عليه عميل وادى الاخوانجية الحلوين اللى مش يهمهم غير مصالحهم وتمويلهم وتنظيمهم
Desert cat said…
tamer.sala7
مش عندك انت بس يا تامر فى جميع الدوائر الانتخابية على مستوى المحافظة اللى النواب بتوعها اخوانجية مش بيخدموا غير مصالحهم فقط لا غير
وعلشان قلة ادبهم وعدم احترامهم للناس اللى اديتهم اصواتها امانة يبقى يشوفوا حلمة ودنهم بعد كدا لو دخلوه تانى
Desert cat said…
Migo Mishmish
مشموشه الف حمد الله على سلامتك
وانا بقول الدنيا منورة ليه
اتارى ساندو شرفتها ونورتها
بوسيها لى بوسة كبيرة اوى
اهو المثل ده ينطبق على التفاهه والهبل بتاع العضو الغير محترم
الف حمد الله على سلامتك مرة تانية يا قلبى
Desert cat said…
MaNoO
يا عزيزى دول مجموعة للمعارصة على بعض وليس للمعارضة
هما مش يقدروا ينطقوا باسم السعودية يخافوا على التمويل ده مهما كان مصدر رزقهم برضه يا مانو
Desert cat said…
مواطن مصري
وآدى الاسلاميين اللى بيقولوا لك عايزين نطبق شريعة ربنا
مانعين الفتحاوية اداء فريضة ربنا
هو ده الاسلام الجديد عندهم ولا ايه
Desert cat said…
مواطن مصري
هو مش يقدر يجى جنب السعودية دول كانوا منعوا عنه التمويل وجلدوه .. حتى لو ملك السعودية قاعد مع مونيكا هيقولوا لك مصالح مشتركة
واهى كلها مصالح يا عمور
Desert cat said…
انونمس2
عزيزى دعنى اذكرك بالفتاة التى تم اغتصابها وبدلاً من رجم المعتدى تم رجمها هى
غريب جدا منطق من يدافع عن النقاب وكاننا نعيش مع مطاريد الجبل عندما ينزلون المدينة خوفا من ان يعرفهم العامة فيتم القبض عليهم
Desert cat said…
انونيمس2
بالطبع يوجد بمصر شخصيات تستحق الاعجاب والتقدير ولكن مع انتاشر التخلف والجهل اخشى ان تترك البلد ترعى بما هى فيه من فساد
MASRY said…
سعيد جدا بك وسعيد جدا بمدونتك
Desert cat said…
MASRY
ميرسى جدا يا فندم لزوق حضرتك
الحان said…
كل الاحترام والتقدير للاخوان في كل مكان, استطاعو ارغام شيخ الازهر الاعتذار على مصافحته بيريز

شوفو الخبر الرسمي
بس قبل ما تشوفو لازم نعترف ان مصر هي مجرد ملعب كورة... الخ

http://www.masrawy.com/News/Egypt/Politics/2008/december/2/azhrisrael.aspx
Anonymous said…
مساء النور
للاسف ياسيدتي في بلداننا العربية لا نحترم الاخر
المسيحي لا يحترم المسلم و المسلم لا يحترم المسيحي
العربي لا يحترم الامازيغي و الامازيغي لا يحترم العربي
بلداننا متعددة الثقافات و الديانات و الهويات و الوحدة المنشودة لن تتاتى الا بتكريس مبدا العلمانية و احترام الاخر
تكون مسيحي و لا مسلم و لا يهودي مصر ح تبقى مصرية
كن عربي و لا امازيغي المغرب لكل المغاربة
مودتي
دعوة للتواصل
مدونة احزان لا تنتهي
triste7.maktoobblog.com

Popular posts from this blog

قميص دهشور

كل تحرش وانتوا طيبين