جامــــد يا حامـــــد

صحيت من نومى حاسه بأرق يمكن علشان نمت الصبح وصحيت بعد الضهر مش عارفه .. عملت مكاملة فى السريع واخدت حمام دافى وقولت استمتع بمج نسكافيه فى البلكونه .. اول ما خرجت دخلت تانى مش بقول مزاجى مش رايق .. رحت فتحت التى فى وفى ايدى جرنان وفى التانية مج النسكافيه .. شوية والاقى اعلان جايب اتنين ستات بيوت واحده فيهم رفيعه والتانية تخينه .. الرفيعه تقريبا كانت قاعده بتشتكى همها للتخينة .. قامت التخينة قالت لها بس بس متكمليش .. انتى جيبى له الحبة الحمرا السداسيه .. وبعدها حامد هيبقى جامد .. انا عملت كدا مع جوزى .. راحت الرفيعه اللى بتشتكتى بترد تقولها اتاريه معادش بيقعد على القهوة زى الاول .. التانية ضحكت ضحكة نشوة وانتصار وقالت لها امال .. انتى بس عليكى وعلى الحبة الحمرا السداسية وحامد هيبقى جامد ... جه شكل كرتونى صغير يتنطط على الشاشه وبين دراعاته فعلا الحبة الحمرا السداسية .. راحوا الاختين الحلوين هناء وشرين ضاحكين بخباثه وقايلن فى صوت واحد الحبة الحمرا السداسية وحامد هيبقى جامد
ايه ده بقى !! ؟؟
يعنى التحرش والشذوذ وحالات الاغتصاب اللى فى مصر دى كلها وفى النهاية حامد مخلى مراته تشتكى منه على الفضائيات طيب لما هو حامد مش جامد ولا نيلة ليه بيخرج الشارع يطلع حقده وضعفه وغله على اى واحدة تقابله .. ما يتلهى على خيبته ويقعد جنب مراته يقشر لها البصل ... اعلانات المنشطات الجنسية زادت بشكل مقزز فى التى فى شوية يجيبوا لنا مسمار يدقوه فى الحيط وشوية تانية الحبة الزرقا ويا سبحان الله كل اعلانات العجز الجنسى ابطالها مصريين وكمان التحرش برضه زاد بشكل مقزز فى الشوارع ... هل ده ليه علاقه طردية او تناسبية ؟؟ فى الحقيقه نوعية الاعلانات دى اثبتت لى فعلا اننا نعانى من فقر فكرى وفقر نفسى وده اقسى بكتير جدا من فقر المال .... يلا بقى معلشى عموما اللى شايف فى نفسه حامد عليه بالحبة الحمرا السداسية بس برضه يحترم نفسه ومش يعاكس حد وهو هيبقى جامد ويبطل يقعد على القهوة كتير ومراته تبطل تشتكى منه وتفضحه على الفضائيات

Comments

ههههههههههههههههههههه بموت في بوستاتك السكر مش معقول الاعلان بالوقاحه دي ولا معقول حامد الخيخه ده
تحياتي يا اجمل قطه
حامد هيبقى جامد
والله الموضوع دا موضوع شائك اى ان التحليل فيه والكلام عنه هنوجع دماغنا وفى الاخر مش بنطلع بحل جذرى كلها بتبقى حلول سطحيه مش بتأدى لاى شئ اما بالنسبه لاعلانات الجنسيه فدى موجوده من السنه اللى فاتت
وتقريا كلها منتجات امريكيه من الواقى الذكرى والحبوب المانعه للحمل وحبوب الفياجرا او المنشطات وغيرها ولكن كل هذا فى ظل صمت اعلامى رهيب لان الحاجات دى بتجيب لهم مرتباتهم وعقبال لما حامد يبقى جامد يكون مات
وعجيبى
* said…
شوفى يا قطتى هو ممكن اكون معاكى فى ان نوعيه الاعلانات مستفزة وقليله ذوق لكن المقويات تعتبر نوع من الادويه والموضوع غير مستحب فيه التريقه او الضحك لأن دى مسئله محرجه ومعقدة وأقرب ما تكون لحرمات الناس
وبعدين الشئ دة أدق خصوصيات الناس ومش المفروض اعلاناته تبقى بالشكل المقزز دة
An Egyptian said…
هاها
ياجماعة كويس خلوا الرجالة المصريين يتلهوا فى مراتاتهم و يمكن موضوع القوة الجنسية ده يهديهم شوية لان اعتقد ان رجاله كتير بيتحرشوا جنسيا لانهم مابيعرفوش قوم عشان يثبتوا لنفسهم انهم رجاله يعني

بس حلوة حكاية المسمار و الحيطة دى طيب و المسمار فى العلان مش بيتني؟ :)
صفا said…
والله انتى زى العسل يا قطة
الحمد لله انى مش باتفرج على التليفزيون
mohamed ghalia said…
هو يمكن بيعمل كده نوع من إثبات الرجوله
نقول ايه بس ربنا يهدى
تحياتى
PrInCeSS BeRy said…
هههههههههههههه

ازيك يا قطتى وحشتينى دمك سكر حامد دة فظيع الحقيقة فطستينى على نفسى يا قطة تسلمى
OverForty said…
يا جماعه موضوع العلاقه الحميمه ده مهم جدا للرجل و الست على حد السواء و الادويه دى بتحل مشاكل كتيره يعنى لو فى اعلان عن دواء ضد الصداع او لعسر الهضم محدش بيقول انه مقزز و مقرف
المهم حامد يحط همه فى مراته مش فى حته تانيه
اما موضوع التحرش ده فلا يصدر من انسان سوى ابدا اكيد مليان عقد و كلاكيع و احباطات على جميع المستويات يقوم ايه يتحرش علشان يسقط كل البلاوى دى على شخص اضعف منه ولا اعتقد ان حامد لو بقى جامد حيمشى يتحرش فى الشارع بل العكس هو الصحيح شفتو بقى الاعلان طلع بيقاوم التحرش ازاى
Pink said…
What happened to Nawara's blog? It disappeared with a message of violation of usage terms.
momken said…
هههههههههههه
والله والواحد مكسوف
بس كده ببحث بسيط ممكن نكتشف ان الستات بتفقد الرجاله خصوبتها
او بيسموها ايه اه _فحولتها_ لان الى فى الشارع بيتحرشوا مش متجوزين

الى مش جامدين ومفضوحين متجوزين

يبقى اخى الراجل خالى بالك
زوجتك ممكن تفقدك اغلى ما تملك
وبعدين تفضحك على الفضائيات
ههههههههههههههه
هم يبكى وهم يضحك والله

تحياتى
maxbeta3zaman said…
طب ده كان اعلان أمال لما تشوفى برنامج كامل كانت تقدمه الطفشانه هاله سرحان تتكلم عن انواع المنشطات والميكانيزم بتاع كل نوعيه ...ولما أجابها أحد الأطباء الضيوف عن مدة استمرار مفعول الدواء كذا دقيقة ...علقت ضاحكة ضحكة ذات معنى ربع ساعة بااااااس؟؟...كان ذلك فى أحد حلقات التوك شو اللى كانت تقدمه قديما ..اول مره نعرف ان الزرقا بقت حمرا حديثا ...ربما لفوز الأهلى على الترسانه..أو الاسماعيلى
... amr said…
ههههههههههه
مبسوطة دلوقتي ... اهي مصر كلها مستنية حامد هيعمل اية مع البرميل

بلاش كلام عن الفكر و النبي و الكلام الكبير دة ... خلينا في حامد و بيبو و جيجي ... انما تقوليلي بقى فكر و اولويات و مش عارف اية ... سوري يا قطقوطة ... بتضيعي وقتك
----------------------
انا مشوفتش ردك على البوست اللي فات غير دلوقتي ... عشان كدة قلت اجي اعلق قبل ما اتعلق
صباح النسكافية
Founoon said…
هههههههههههههههههههههههههه

لا مش قادرة اصدق

اني كأنك كنتي قاعدة معانا انا وبنت مصرية من كام يوم

كنا بنتكلم في نفس الموضوع دا

اكتر من 10 ستات متجوزين بيشتكوا من نفس الشكوى

والاعلانات اللي من النوعية دي زادت بشكل ملحوظ

يبقى في حاجة صايبة الرجالة بقى

وفيلم التحرش دا مش اكتر من فيلم كبيييييييييير عشان يداروا خيبيتهم

والصراحة راحة وحاحا ما بيعرفش

ادخلي عندي وشوفي اعلان تاني مستفز جدااااااااااااااااااااااااااااااااا
ضحكتيني بجد يا قطة :)
Desert cat said…
مثلية تبحث عن ذاتها
تسلمى لى يا جميله
حامد مراته خلاص فضحته على الفضائيات
:)
شرفتينى جدا
Desert cat said…
محمد صالح
انا مش معترضه على فكرة على الاعلان انا معترضه على طريقة عرض الاعلان
وازاى اتنين ستات المفروض انهم محترمات يقعدوا على الفضائيات ويتكلموا بالطريقة المقرفة دى
ده كان كل الستات والرجاله فى مصر لاهم لهم سوى الجنس هى عايزاه قوى وهو بيهرب يقعد على القهوة
مش عارفه الحقيقة احنا ايه وصلنا للدرجة دى من اللامبالاة والاهانة فى نفس الوقت
Desert cat said…
*
يا صوفى يا حبيبة قلبى انا مش معترضه على الاعلان انا اعتراضى بس على طريقة عرض الاعلان
Desert cat said…
An Egyptian
تحليلك منطقى تصدق
المسامار على فكرة كان بينتنى
وكرر التجربه كذا مرة ولما الراجل اخد الحبة الزرقا المسامار دخل فى الحيط وبكل سلاسه والله العظيم منتهى قلة الادب والسماجه
Desert cat said…
صفا
ميرسى جدا لزوقك يا صوفى
انا كمان مش بتفرج عليه الا نادرا حتى بفكر ابطل نادرا دى خالص
Desert cat said…
mohamed ghalia
وهو من امتا اصلا الرجولة بان الشخص يستقوى على اللى اضعف منه
دى اسمها خيبة وقلة حيله
Desert cat said…
PrInCeSS BeRy
ازيك يا برنسيستنا يا قمر
انتى كمان وحشتينى جدا ووحشتنى طلتك الجميله
تعيشى لى يا قمر
Desert cat said…
OverForty
انا والله لما اتكلمت عن الاعلان مش قصدى المنتج نفسه انا قصدى طريقة الاعلان نفسها اسلوب مقزز وحقير فعلا
يعنى ايه واحده قاعده تشتكى لجارتها من جوزها اللى قدراته الجنسيه ضعيفه
والتانية تقولها انا جبت الحبة لجوزى وبقى جامد
وهاتيها وحامد هيبقى جامد
حقيقى طريقة مقرفة للغاية
اما الاخ حامد لو بقى جامد اعتقد انه برضه مش هيبطل تحرش لانه هيكون متخيل انه فى الشدة شديد وفى القوة قوى ومراته مش مكفياه
يمكن
Desert cat said…
pink
Nothing happened Nawara quoted flew blog as a movement word press
thanks
Desert cat said…
momken
صدقنى يا ممكن والله فى رجاله كتير متجوزة ومخلفه ومعدية الارعبين سنة وبتعاكس وبتتحرش
المشكلة ان اللى بيعمل كدا يا اما وحد صغير يا اما راجل كبير طيب الحل ايه بقى
انه يتلهى ويروح يشوف مراته اللى اكيد مشرداه بين الجيران وكل الناس عارفه انه اخييييييييييييه
ما عدا هو هههههههههههه
Desert cat said…
maxbeta3zaman
الاخت الطفشانه هاله بتنجان دى كانت متميزة فى نوعية هذه البرامج اللوزعية بصراحة مصر خسرتها عايزينها ترجع الرجالة فقدوا قدرتهم الجنسية بعد طفشانها من مصر وزادت اعلانات المنشطات الجنسية
على الاقل كانت بتستضيف دكاترة متميزين فى برامجها يدلوهم على الحل الصحيح من غير نعى ستاتهم عليهم فى الفضائيات
Desert cat said…
... amr
طيب انا مش اتكلم عن الفكر اتكلم عن بقى دلوقتى افرض عضلاتى مثلا
اوعى تفتكر ده تهديد بالتعليق انا اصلا مش بعرف العب غير بوكس بس
ههههههههههههههههه
صباح الشاى بحليب
:)
Desert cat said…
Founoon
ده واضح ان كلنا فى الهوا سوا
والاعلانات اللى من النوعية دى مستفزة للجميع
طيب ايه رايك يا فنون نعمل حمله
ويبقى مثلا عنوانها
حامد المتحرش لا هو جامد ولا هو متين
هههههههههههههههههههه
* said…
يبقى يا حبيبى مش مختلفين فى ان طريقه

العرض مقرفه وبشعه وغير مراعيه

للذوق العام
Desert cat said…
*
اينعم يا قلبى الاختلاف فقط لى طريقة العرض وليس على المنتج نفسه
An Egyptian said…
ده السبب الوحيد اللى ماحدش فكر فيه
بجد مش هزار ممكن يكون الرجاله اللى بيتحرشوا عندهه موتان جنسي و بينتقموا من الستات لانهم بيفكروهم بخيبتهم
انا شفت فى التلفزيون ان معدلات الخيبة الجنسية عالية جدا فى مصر مؤخرا فى نفس الوقت التحرش الجنسي فى ازدياد طيب منين كده و منين كده؟

ياشيخة جابوه و هو بيتنيي؟ يانهار اسود ده فلم سكس مش اعلان
تصدقي كان مفروض يقولوا كمان لو المسمار قصير عمره مايتنيي انما الطويل هو اللى بيتنيي

شعوب عقلها فى مساميرها صحيح
Desert cat said…
An Egyptian
بالظبط انا اول ما شوفت كمية الاعلانات المستفزة عن المنشطات الجنسية ربطت التحرش بعدم القدرة الجنسية
لان اعلب المتحرشين اما متجوزين او اطفال
وحياتك انت جابوا المسمار وهو بينتنى فى الحيط
فيحة ما بعدها فضيحه
اعمل سيرش على يتيوب يمكن تلاقيه
يخرب عقلك يا بنت
والله العظيم ضحكت زي عمري ما ضحكت قبل كده
يا مجرمة بتجيبي خفة الروح والدم دي من فين ؟
آه صحيح ما أنت شرقاوية بنت عمي يعني
لازم تطلعي زيي
ههههههههههههههههههههههه
يخرب عقلك بجد حقيقي
عموما الفضائيات فضحت حامد كده بجد
ولازم حامد ياخد موقف جامد
مش مهم يبقى جامد يعني قوي مع الست
كفاية إنه يبقى جامد جدا في موقفه من فضيحته اللي على الملأ
يخرب بيت حامد اللي دوشنا بفحولته وفشخرته وفي الآخر طلع مش جامد
هاهاهاهاها
Desert cat said…
هويدا صالح / عشق البنات
اه يا حبيبتى شوفتى الخيبة القوية اللى حامد فيها
هههههههههههههه
قاعد قارفنا فى الشارع وهو فى البيت خيبه اتاريه هربان من اللى فى البيت وجاى يطلع غلبه فينا احنا
خفة الدم دى بعض ما عندكم يا دودو يا قمرى
الف مبروك صدور عشق البنات
بالتوفيق الدائم والابدى يا بنت العم
:)
^ H@fSS@^ said…
والله يا قطتي نفس الكلام جه فبالي من يومين لما شفت الاعلان
حتى حطيت الستاتيوس بتاعي على الفيسبوك بنفس المقولة لاني كمان مندهشة و مذبهلة من نوعية و تردي مستوى الاعلانات
يعني حتى اعلانات برا لم عملوا اعلانات الفياجرا و غيره كان الاعلان معمول بمغزى و بشكل متحفظ
بس حامد الجامد ده سوقي سوقي سوقي بشكل مش طبيعي
Desert cat said…
^ H@fSS@^
احنا يا قلبى مش فالحين غير فى الاعلان بمنتهى الوقاحه والسماجة
يعنى من سنة تقريبا كا بيجى اعلان واحده ست لابسه قميص نوم اسود وقاعده مستنية جوزها لما يدخل من بره وهو يرجع لها متاخر ويدخل ينام جرى وهى تقعد تنفخ وتاكل فى ضوافرها ومصوفلكيش بقى سماجة اعلان المسمار اللى بينتنى
نخلص منه يطلع لنا حااااامد والطريقة السوقية لعرض الاعلان
حقيقة حاجه فجة جدا
شرفتينى جدا حفوصه
Zika said…
الاعلان ده اكبر مثال علي تخلف مجال الاعلان والاعلام في مصر
فعلا اعلان زباله زباله زباله
وحاجه اخر فضيحه
:D
ربنا ياخدهم كلهم في يوم واحد وياخد حامد اللي فاضحنا في كل حته ده

Popular posts from this blog

قميص دهشور

كل تحرش وانتوا طيبين