الحب حاجه والجواز حاجه تانية

منذ دقائق معدوده دخلت مدونة دكتور اياد حرفوش لانها من المدونات التى تتسم بالعقلانية والثقافة العالية وتستحق المتابعه
فوجدت فى أحدث بوست له وهو ( كلمات ليست كالكلمات ) هذه ... الجملة

تزوجت "ليلى" و جن "قيس"، تزوجت "جولييت" و انتحر "روميو" ، مازوشية الرجل مقابل واقعية المرأة ؟ أم واقعية الرجل مقابل مثالية المرأة؟
التى ما إن لمحتها حتى عادت ذاكرتى إلى سبعة أشهر مضوا
صديقتنا (أ) جميعنا نعرف تمام المعرفة مدى علاقتها وارتباطها بدكتور (ت) وكم من المشاكل التى حدثت لها بسببه وعندما تقدم لخطبتها تم رفضه وتقدم مرة اخرى وايضا تم رفضه لانها ذات المستوى الاجتماعى المرموق اما هو دكتور ومرتبه ميأكلوش عيش حاف ولا يملك غيره لانه لا يملك عيادة خاصة فمازال فى مرحلة تحضير الماجستير
فى يوم اتصلت بى وبعد الاطمئنان عن الاخبار فوجئت بها تخبرنى بان خطوبتها يوم الجمعه وهتتصل دلوقتى بباقى اصحابنا تعزمهم بالرغم من انها برضه اخبرتى بان الخطوبة عائلية ... بفرحة غامرة هو باباكى اخيرا وافق .. قالت لى لاء هتخطب لحد تانى ... نعم ازاى وحب السنين اللى فاتت دى كلها ... قالت معلشى نصيب ... قولت لها و (ت) عرف انك هتتخطبى قالت لى اه قولت له .. طيب وقالك ايه .. قالت افتكرنى بهزر ومن شوية كلمته علشان اعزمه وأأكد له إنى مش بهزر لاقيته قعد يفكرنى بكل القديم والجديد يقولى انا اتقدمت واترفضت ورغم انى حسيت بالاهانة اتقدمت لك تانى وبرضه اترفضت اشمعنا وافق على ده وايه يعنى مميزاته .. قالت له جاهز وعنده فلوس .. قالها بس انا دكتور .. اه بس مرتبك مش يكفينا يومين فى الشهر خليينا واقعيين هنعيش ازاى .. ثم الاخر ايضا دكتور ... وحكت لى كل التفاصيل اللى تمت فى المكالمة بينهم واللى انهوا بيها قصة دامت سطورها 4 سنين ... بالرغم من انها حاولت تتظاهر بانها سعيدة لكنى لم اصدق ابدا ضحكتها الزائفة التى انهت بها المكالمة ... وجه يوم الجمعه وروحنا انا وصحباتى نبارك لها ... مقعدناش كتير لانى اول ما دخلت حسيت بخنقة ... باركنا وخرجنا على طول ... يوم الجمعة هو اليوم المقدس لينا جميعا بنتقابل فى النادى نفطر مع بعض فى اليوم ده جت ولسه قاعدين مكملناش 10 دقايق ونلاقى حد هل علينا بوجه هينفجر من الغضب والغيظ مع بعض .. واول كلمة نطقها ازيك يا كدابة ... هى بانكسار انا مش كدابة غصب عنى والله غصب عنى .. قالها مش غصب عنك وانتى كدابة ... صحبتنا (ن) عيب يا دكتور ميصحش كدا فرجت علينا الناس .. هو حد لسه اتفرج على حاجه انا مش هسيب حقى ... هى حق ايه بس امشى من هنا دلوقتى وبعدين نتفاهم ميصحش كدا ... مفيش تفاهم ده انا هعمل لكو قعدة رجالة ... انا برخامة رجالة ايه اللى هتعمل لنا بيهم قعدة هو احنا هنحشش يا دكتور مش ينفع كدا ... هو برخامة اكتر .. اللى مالوش علاقة بالموضوع ميتكلمش .. انا طيب يا جماعه نستاذن احنا لما تصفوا الامور بينكو ونتقابل فى اقرب مستشفى طوارئ بعد نص ساعه على الاكثر .. هو بعصبية محدش حيتحرك من مكانه .. قعد مركز عينه فى عينها ويقول كلام كتير لدرجة انى حسيت من كلامه انه تايه مش عارف هو بيقول ايه ... مصدوم .. كانه مغروس فى قلبه سكينه بالظبط كان شبه طائر مدبوح وبيرفرف حلاوة روح او مزيج من كم الاحسايس دى كلها ... خلص كلامه ومشى .... كلنا بصينا لها (ن) سالتها انتى ايه احساسك دلوقتى .. هى إحساسى عادى .. نعم ... مش زعلانة .. قالت كنت .. بس دلوقتى خلاص انا مش هقضى عمرى كله حب واهلى رافضين لازم يكون فى استقرار ... معقول انتى اللى بتقولى كدا ... ردت قالت يا حبيابى الحب حاجه والجواز حاجه تانية
وزى ما بدأت كلامى بجملة دكتور إياد انهيه برضه بنفس الجملة بس هضيف لهم دكتور (ت)
تزوجت "ليلى" و جن "قيس"، تزوجت "جولييت" و انتحر "روميو" وتزوجت (أ) وترك دكتور (ت) البلاد .

Comments

هاي يا قطه
=========== معلش بقا لا طبعا الكلام ده مش مظبوط اللعبه دي لعبه الرجاله اصلا
يحب واحدة ويرهنها عشر سنين ويتجوز واحده عشان شبه امه
او شخصيه اخته
اعرف اتنين زمايل جامعه حبوا بعض وسافر هو السعوديه 10 سنين عشان يكون نفسه لما البنت عدت التلاتين امه طلبت منه يفسخ الخطوبه عشان العروسه كبرت علي الخلفه!!
وكتير كتير قصص
البنت لو سابت واحد بتحبه بيكون تحت ضغط جريان السنين بيها وشبح العنوسة
لكن الراجل بيسيب البنت تحت اسباب واهيه او غير مقنعه كمان الراجل اللي عنده 35 ممكن يخطب من سن 20 الي 35 لكن البنت لا
وده بقا الظلم بعينه معلش يا قطقوطه انتي بس متأثره ومتحيزة لعم ت المره دي
تحياتي
إزيك desert cat

قصة مؤلمة ,, بس أنا عايز أعرف موقفك إنتى إيه من القصة ورؤيتك للبنت,,,
وليه رديتى برخامة عليه فى النادى؟!!
هو مدبوح ودخوله النادى بالشكل ده , دى الفلفصة الأخيرة للطير المدبوح..

ليس هناك مبرر للقسوة , خاصة و انه قبل إهانات أهلهاورفضهم إياه , وشبح العنوسة ليس مبرر فهناك من هو مقدر ومتحمل..

فكرة الحب حاجة والجواز حاجة تانية تحيل حياتنا إلى بغاء نعم بغاء,,
فمن يدخل علاقة ويعلم مسبقا أنها ليست للزواج , وإنما بغرض الحب , فهى فكرة فى حد ذاتها,دنيئة...

الحب حاجة والزواج حاجة تانية فكرة رسخها بداخل جيلنا الذين فشلوا قبلنا فى الحب , ولو انهم قد نجحت قصصهم الشخصية ما كانوا قالوا مثل هذا الهراء,,,,
أعلم أن الجميع يتمنى الزواج عن حب وحين يفشل فقط يخرج عقده الشخصية فيمن يتحكم فى مصائرهم فلا ينصحهم بما يسبب لهم السعادة, بل ينصحهم, بمحدودية تجربته هو يقيس الحياة على قدره المتواضع,,

الحب حاجة والجواز حاجة تانية , هى السبب فى جعل أغلب بيوتنا معتقلات للأزواج, ويتمنى الجميع الخلاص منها, وهى السبب فى وجود العنف والكراهية بين الأزواج,,
وهى السبب فى جعل زوجة دون الثلاثين من عمرها تقول : أنا عايشة معاه عشان الولاد بـس...

تحياتى وقصة مؤلمة فعلا,,,
mohra said…
السبب فى الموقف ده اختيار غلط من البدايه و ناس عايزه تعيش قصه حب و السلام
يعنى فى احتمال مايكونش الاب متعنت و ان الولد مش مناسب فعلاو انها مش هتستريح معاه ...عامه ده مايبررش الموقف الغادر بتاعها و لو هى بتحكم العقل بس كانت اخدت الموقف ده قبل ما يجى العريس الجاهز
اظن انها شخصيه نفعيه و قاسيه لاقسى درجه

لكن انا اتفق مع بنت القمر ان ده موقف رجالى تقليدى
و ان المجتمع بيقسى جدا البنات
بجد القصه رومانسيه اوى
بس فعلا صحبتك فكرت صح مش هتقضى عمرها كله حب
اى بنت حلم حياتها الاستقرار والاحساس بالامان وان كان هذا الحب لن يعطيها الامان التى تود اى امرأة ان تشعرة والحمايه فانها تبتعد فورا لان المرأة تبحث عن الامان بس بردة الدكتور صعبان على اوى
تحياتى لكى
سنووايت said…
الحب حاجة والجواز حاجة تانية
سمعتها كتير
وهي صح في حالة ان الاختيار كان غلط من البداية
بس المشكلة ان الغلط مش بيكتشفوه غير في الاخر
وقت الجد
وهو عنده حق ينفجر من الغيظ
وهي عندها حق تختار حياتها بس للأسف انها كانت علي حساب شخص تاني
nody_1987 said…
الحب حاجه والجواز حاجه تانيه
دى كلمه لو نطقتها بنت
بينطقها قصادها الف راجل
البيه من دول يجب البنت ويوعدها ويخليها تحلم وتعيش فى السما وتمسك السحاب
وساعه الجد
اسف الحب حاجه والجواز حاجه تانيه

تخيلى بقى الاهانه لحظتها بتكون ازاى
ربنا يسامحك انتى وابى ياقطه
Meero Deepo said…
عزيزتى قطة الصحراء

أحييك على موضوع البوست ولكن كتعليق على رأيك فى الفتاة أطلب منك قراءة بعض أبيات صديقنا د.إياد حرفوش

قبيل الفجر ولًّت سندريلا هاربــــــة
بحذائها الماسي داست وجه جـــــنين
صرخ الجنين من الهـــــــــــــــوان
صرخ الحذاء .. من الجـــــــــــنين
فلرب طــــــــــــــــــاعن يكــــتوي
بالنصـــــــــل .. أكثر من طــــعين

ليس كل الحالات متشابهة ياعزيزتى ....وقبل أن نحكم على الفتاة إنظرى للمجتمع المحيط والذى يتحكم فى حياة تاء التأنيث فى العالم العربى كله مهما تصورنا أننا نتغير لايزال هناك فكر القبيلة مسيطر

الزواج ياسيدتى لا يزال هو الشكل الإجتماعى والدينى الوحيد المقبول لإحتواء قصص الحب والمساعدة فى نموها وإزدهارها وهذا ماتدركه النساء ويغيب عن عقل الرجال وبالتالى لن تستقيم قصة حب أو تكبر إلا فى إطار الزواج ومتى لم يتوفر ذلك ....فإقرأى عليها السلام

تحياتى للبوست
معلش انا عارف انك بنت بس في الحب البنات اصبحوا اكثر براجماتية من الرجال يمكن زمان كانت البنت اصدق في الحب لكن في زمنا المسألة اتعكست
"لا تحسبن الفراق ببعيد فاجلد او اتركه لغيرك"
من قصة "من اجندة الروائي" بقلمي
Miso soup said…
حب اه لكن لازم تكون واقعي ... اذا مكنش قادر يعيشها في المستوي المادي اللي هي عايشة فيه يبقي بيضحك علي نفسه و ميلومش غير نفسه
Miso soup said…
حب اه لكن لازم تكون واقعي ... اذا مكنش قادر يعيشها في المستوي المادي اللي هي عايشة فيه يبقي بيضحك علي نفسه و ميلومش غير نفسه
يعني هو لو حس انه مش ايسعدها وسابها يقولولك شفتي النداله .

ولو الراجل بعد ما هان كرامته عشانها واتقدم كذا مره تجي تقولك واقعيه وتنسي كل حاجه ...

بس عارفه انا شايف انه غلطان انه علق نفسه بحب مكتوب عليه الفشل حتي لو باباها وافق ,لان حكاية الشاطر الحسن اللي بيحب الاميره في الحوايت بس

اول مره اكتشف ان قيس كان حمار لما اتجنن عشان ليلي

تحياتي
Misrdream said…
موش عارف ليه البوست بتاعك ده
لو سمتيه حرب الدكاتره
وصورة حقنتين فوق هيبقي مناسب جدا للمضمون
لما الدكاتره مرتباتهم بقت موش بتكفيهم يومين فى الشهر امال الزبالين يعملوا ايه اللى ماليين الشوارع
تحياتي لليأس
الربان said…
تحياتي

الزواج قسمة و نصيب...بعض الاشخاص احبوا بعض و تم عقد قرانهم...و لاشياء
"هايفه او تافهه "...لم يتم الزفاف
نتيجة لهذه التفاهات....

و اعتقد ان اذا كانت المادة هي السبب
فهذا خطأ كبير...لان المال يأتي ..و يذهب....
لكن الباقي هو الاصل الطيب...و لين المعشر...و شخصية الانسان نفسه.

كما ان هناك نوع من التعود علي شخص
معين...قد يُفهم علي انه حب...لكنه في الحقيقة مجرد تعود علي سماع شخص معين او رؤيته...


تحياتي و تقديري
نهر الحب said…
عارفة سمعت المبدا دا من ابن عمى وانا طفلة صغيرة
الحب حاجة والزواج حاجة تانية
والغريب انى كمان شفت بنات كدة
حب لحب وزواج للاستقرار
قصة مؤلمة متكررة

دومتى بود
Desert cat said…
بنت القمر
هاى يا جميل
يا حبيبتى انا قولت القصة اللى بينهم كانت قصة حب دامية والبنت نفسها حصل لها مشاكل كتير جدا علشان تبعد عنه
وفى النهاية فعلا الحل كان الرضوخ
انا معاكى فى كل الكلام اللى بتقوليه وبيحصل فعلا مبنكرش الولد بيرهن البنت جنبه كام سنة وفى الاخر يجى يقولها مش عايز اظلمك معايا انا لسه بدرى مش عارف اكون نفسى لو اتقدم لك واحد مناسب وافقى
بعدها باسبوع تقابله ماشى مع واحده فى الشارع ولو سالت مين دى تطلع خطيبته انا فعلا متعاطفة مع (ت) لانى مش قادرة انسى منظرة بالرغم من ان الموضوع مر عليه 7 شهور بس لاول مرة اشوف نهاية قصة حب بالشكل ده
شرفتينى يا جميل
ضيفى للجمله بتاعت دكتور اياد
بعد اضافتك
ستتزوج (ا)و انا محبط
no comment
eslam
Anonymous said…
يا قطه الصحرا
تحياتى الجميله
وجودك وامثالك من العقلاء يدجعلنى اطمئن الى الزمن القادم حيث سيحيا ابنى ان شاء الله

ممكن اضم مدونتى عندك
وفى نفس الوقت كيف اضم مدونتك عندى

اسم مدونتى

kosasah.blogspot.com
شكرا لك
Desert cat said…
عمرو (مواطن مصرى)
انا الحمد لله ياعمرو
يارب انت تكون بخير وفى احسن حال

انا موقفى من القصة فى البداية وهى بتعزمنى على خطوبتها حسيت بذهول وانفجرت فيها بدون مبرر .. لكن لما حكيتلى كل التفاصيل وكل اللى حصل لها فى البيت وتصميم مامتها وباباها لازم اللى يتجوزها يبقى ابن بارم ديله لانهم مش اى حد ولازم يعيشها فى نفس المستوى المادى اللى هى عايشه فيه مش تتجوز وبعد كدا يتسولوا هما الاتنين هى البنت الوحيدة واخواتها الباقيين ولاد مفيش حد فى البيت قادر يفهمها حاولت تتكلم معاهم كلهم وكمان كلمت اقرب ناس ليهم علشان يتدخلوا فى الموضوع وهما كلهم يقولوا احنا عايزين مصلحتها مش عايزين بنتنا تتبهدل ومش عايزينها تعيش فى مستوى اقل من اللى هى عايشه فيه فى النهاية حست انها مجرد لوحة فى مزاد علنى معروضة للبيع للى هيدفع اكتر لما مالقتش حل قالت لهم خلاص انا موافقه على المشترى اللى هترضوا بيه .. تفتكر يا عمرو مين فهم جرحه اكبر اللى اتقدم مرتين واترفض ولا اللى قبل باول مشترى هيدفع اكتر وقتل جواه مشاعره واحساسيه ؟؟؟

بالنسبة ليه رديت برخامة فى النادى لانى عارفه ومقدره اللى فيه لكن لما حسيت انه عامل زى الطفل اللى تاه من اهله ومش عارف مصيرة ايه ولا رايح فين ولا جاى منين تعاطفت معاه جدا

نيجى للنقطة اللى بعدها شبح العنوسة مكانش مبرر فعلا يا عمرو لكن غرور اهلها هو اللى عمل فيهم هما الاتنين كدا واحد انطعن فى قلبه والتانية طعنتها مكانتش اقل منه يمكن ازيد لانها من اقرب الناس ليها .. لكن فى الاول وفى الاخر اهلها متقدرش تخسرهم ومتقدرش تغلط فيهم علشان كدا كانت بتقنع نفسها بكلامهم وبتكرره باستمرار الحب حاجه والجواز حاجه تانية يمكن لما تكرر الجملة كتير تصدقها وتقدر تستريح شوية

على فكرة هى اتجوزت دلوقتى وبتكرر جملتك الاخيرة

وهى السبب فى جعل زوجة دون الثلاثين من عمرها تقول : انا عايشه معاه علشان الولاد بس
بس (أ) بتقول انا عايشه معاه علشان المجتمع مبيرحمش واقرب الناس ليا زى ما قتلوا الروح اللى جوايا فى الاول هيمثلوا بجسدى فى الاخر

سعيدة جدا بتشريفك
احترامى وتقديرى
قطتنا العسل صاحبه اجرأ المواضيع و احلاها

تحياتنا للدكتور العزيز اياد اللي بنكنله كل الحب و التقدير

بخصوص القصه طبعا الفلوس بتيجي و بتروح لكن ساعات بيكون صعب علي بنت اتربت في مستوي اجتماعي معين انها تغيره بعد ماتتجوز حتي لو بتحب الشخص ده اوي و ماتقدرش تعيش من غيره لكن مانقدرش ننكر ان فيه بنات بتستجيب لنداء القلب و ممكن بعد كده تندم لما تلاقي الاختلاف بين المستوي اللي كانت عايشه فيه قبل و بعد الزواج

الحب مش كل حاجه و الفلوس برضه مش كل حاجه و كمان فيه حاجه مهمه ياقطه بتغيب عننا القناعه حتي مع محدوديه الدخل
الرضا بالمقسوم كمان مهم

بس فعلا اللي ملاحظاه ان اغلبيه قصص الحب الملتهبه انتهت نهايات مأساويه ربنا يستر علينا
مع محبتي ياعسل و دايما متألقه بموضوعاتك الجميله
Desert cat said…
mohra
يمكن هى غلطت فى الاول علشان محبتش الانسان اللى هيجى على مزاج اهلها لكنها اختارت زميلها فى الكلية بناء على احاسيسها ومكانتش عارفه النهاية هتكون ايه

تحياتى
Desert cat said…
رئـــــيسـة حزب الأحلام
هى اتجوزت بعد ما قتلت مشاعرها يا سلوى يعنى كائن يحيا ويعيش وينام دون اى احاسيس او مشاعر
الدكتور كمان صعبان عليا برضه
بس هو خلاص مبقاش موجود ساب البلد وسافر يمكن فى البلد الجديدة اللى سافرها يبتدى من جديد ويعيش من غير اى ذكريات ووقتها يقدر يفتح صفحة بيضة
اتمنى والله
تحياتى
Desert cat said…
سنووايت
كل واحد فيهم فرقته عن التانى ظروف مختلفة يا دكتورة بس بصراحة انا متعاطفه معاه هو اكتر
وبتمنى له التوفيق من كل قلبى
تحياتى
Desert cat said…
nody_1987
انا متفقه معاكى يا نودى
بس يمكن علشان عشت الموقف معاهم فلسه متاثره بيه
يارب ميحصل لحد تانى لانه اصعب مما اى حد يتخيل
محبتى يا جميله
Zika said…
الجواز من غير حب بيبقي محدود في حاجات معينه
يا اما اتنين مش طايقين بعض وفي الاغلب بيتطلقوا
يا اما اتنين مش عارفين بعض وبالتالي بتحصل خيانه
وبعدها طلاق بارضه
لكن الحب بيخلي في حاجه في الجواز زي رابط كده
اقول حتي من العشره

ملحوظه
انا قريت البوستات اللي تحت بس ماعلقتش
بس هفضي وراجع تاني
mohager said…
انا شايف في ردودك رد بتقولي فيه ... هي غلطت عشان ماحبتش انسان يوافق مزاج أهلها ..
ستوووووب
هو الحب فيه اختيار؟
يعني ينفع اقابل واحده واقول ... أنا قررت احب دي؟

ولو الموضوع بإيدها كده ... خلاص تقرر تكره الشخص الأول وتقرر تحب خطيبها .
والشخص الأول يقرر ينساها .
والمسأله تبقي في غاية البساطه


تحياتي
Desert cat said…
Meero Deepo
عزيزى انا على علم تام باحداث القصة من الطرفين
واعمل تماما ما تعنيه
لكن تعاطفى معه كان اكثر لانى رايت انكسار فى عينيه وفى كلماته وفى خطواتة
انا لم الومها قط لانها ايضا ضحية
احترامى وتقديرى
Desert cat said…
محمد حلمي مخلوف
مش كل البنات والله يا استاذ محمد
انا معاك شوفت نموذج البنت اللى قلبها كبير يساع من الحبايب الف فى وقت واحد
لكن دول قليلين جدا وكمان فى ولاد برضه هوايتهم المفضلة ممارسة لعبة الحب اما عند الارتباط فظروفه متسمحلوش
احترامى وتقديرى
Desert cat said…
Miso soup
صديقى العزيز
هى كانت عايزة تعيش معاه فى اى مستوى لكنها كانت بتردد الكلام اللى سمعته من اهلها كتير يمكن تصدقه وتقدر تتغلب على احاسيسها
تحياتى
Desert cat said…
الفارس الملثم
تعرف يا محمد انا برضه قولت زيك لو اتجوزوا ممكن كان الزواج ده مينجحش لان المادة دلوقتى شيئ اساسى ماهو مبقتش موجودة دلوقتى اللى ممكن تتغدى جبنة وتنام من غير عشا لحد ما الفارس بتاعها ربنا يفتحها عليه من وسع وبعد كدا ياكلها كل يوم الوان مختلفة
تحياتى
Desert cat said…
Misrdream
ايه يا احمد هو انت متعرفش مرتبات الدكاترة ازاى
بيذاكر 7 سنين وايشى روندات على معامل على تشريح وفى الاخر بيتخرج يقبض 250 جنيه علشان لما يروح يتقدم لاى واحده باباها يحط رجل على رجل فى وشه ويقوله دول تشترى بيهم 2 كيلو لحمة وانت مروح
كان زمان كلمة دكتور ليها وضعها واسم فاعل
دلوقتى بقت مفعول به
تحياتى
Desert cat said…
الربان
استاذى العزيز اتفق مع حضرتك فيما ذكرت
فبطل قصتنا من عائلة طيبة من الى بنقول عليهم مستورين
لكن اهل من كانت فتاته لم ينظروا الى ذلك ونظروا الى المادة البحتة بصراحة انا متغاظة منهم جدا لحد النهارده
احترامى وتقديرى
Desert cat said…
العزيزة نهر الحب
انا كمان شوفت النموذج ده بس بصراحة مش كتير
او متوفر اكتر فى الولاد
مع احترامى لكل الولاد
علشان بس مش عايزة تحديف طوب
تحياتى
Desert cat said…
مواطن مصرى نايم
سلامتك من الاحباط يا اسلام
الف الف سلامة عليك
تحياتى
Desert cat said…
Anonymous
اشكرك جدا على الكلمات الجميلة
ويارب اكون استحقها بجد
وطبعا يشرفنى جدا وجود مدونتى عند حضرتك
احترامى وتقديرى
Desert cat said…
اجندا حمرا
صديقتى الغالية
أحلى اجندة فى الدنيا
طبعا انا متفقة مع كلامك الفلوس بتروح وتيجى لكن مش كل لها نفس المنظور هو يمكن يكون اهلها حسبوها انها لو عاشت فى مستوى اقل من اللى عايشه فيه عندهم ممكن تتعب ويبقى الجوازة فاشله
ويمكن لما تتجوز الدكتور الجاهز اللى عنده عيادة ورصيد فى البنك وايه يعنى اكبر منها شوية لكنه هيعيشها فى مستوى كويس علشان كدا مش مهم قلبها مش مهم مشاعرها المهم المستوى المادى

نورتى الدنيا كلها يا قلبى
دمتى بكل حب يا جميله
Desert cat said…
Zika
فينك من زمان يا زيكا
هو النت كان فاصل عندك انت كمان ولا ايه
عمواما حمد الله على سلامتك
بالنسبة للموضوع ممكن تلاقى اتنين ميعرفوش بعض قبل الجواز خالص ومع العشرة بيرتبطوا ببعض جدا وناس تانية ممكن يحصل بينهم خيانة
وممكن ناس تالته تستحيل الحياة بينهم
لكن فى الغالب لما بيكون فى حب من البداية بيكون افضل طيب فى حالة ابطال قصتنا الارتباط كان مستحيل يبقى الحل ايه
كل واحد يشوف حياته بعيد عن التانى لكن الطريقة اللى كانت مهينة للطرفين شوية
تحياتى
Desert cat said…
mohager
يا مهاجر كان قصدى من الرد انها مرتبطش نفسها بانسان عارفه مقدما انه مرفوض لانها ادرى الناس باهلها فى البداية فعلا بيكون بايدينا اننا نبدأ أو ننتهى
لان الحب مش بيكون حب كدا على طول
ده بيبتدى باعجاب وفى مرحلة الاعجاب دى تقدر تتحكم فى عواطفك
دى وجهة نظرى
تحياتى
desert cat
أنا بخير الحمد لله,,

القصة بالنسبة لى مؤلمة جدا ,,
ولكن أحاول أن أضع نقاطا تسمح لى برؤية الأمر جيدا,,

1_هى قبلت حب الطبيب بطل القصة , ودخلت معه فى تجربة حب (بغرض)ان تتم بالزواج وليس بغرض أن تكون مجرد تجربة,,,

2_أثناء الخطوات الأولى للتقارب بينهما من المؤكذ انها فكرت جيدا فى الإرتباط به , وقامت بحساب الأمر من مختلف جوانبه , وتعلم انه ليس فى مستواها الإجتماعى ,وانها إن تزوجته ستعيش معه فى مستوى أقل بشكل او بآخر من مستواها, وقد رضيت بهذا , ومن المؤكد أن شخصيته بها الكثير يعوض به الجانب المادى...لذا فهى لم تفاجأ يوما بشىء جديد طرأ عليه,,,,

3_ أثناء تجربة الحب, كل كلمة أو لقاء أو نظرة(أى من طقوس الحب) ليست عبارة عن أفعال مجردة وإنما هى تدعيم لهذا الحب ووعد يضاف من كليهما للآخر بإستمرار هذه العلاقة وإتمامها بالزواج, لذا فالنكوث فى هذا الأمر يعد هدم لصرح يتم بناؤه خلال مدة العلاقة, وكلما كانت العلاقة أعمق كلما كان هدمها أكثر ألما...

4_كلمة الحب ليست طقوس وعملية نشوة متبادلة تحدث فى لقاءات او مكالمات,, وإنما هى تحمل فى طياتها معان أخرى كفعل أى شىء من أجل الشريك وعدم التنازل عنه فى الأزمات , وربما التضحية من أجله إن لزم الأمـر...

والطرفين يفهون هذا تماما دون إعلان عن هذه المعانى , فكل تلك المعانى مما تفهم ضمنا بكلمة الحب إن قيلت من أحدهما للآخر,,

لذا فتنازل اى طرف عن الطرف الآخر , يعد نكوصا بمعان كثيرة , تتطلب من الطرف (المتنازل عنه) أن يفهم أن الآخر لا يعنيه كل المعانى السابقة فى حين أنه هو كان يعنيها تماما..

5_ الرقى الطبقى الذى تتباهى به أسرة الفتاة , لا يتناسب ومستوى تفكيرهم , فالتحضر يعنى أن يختار الإنسان حياته بنفسه دون خضوع لمسلمات يؤمن بها الغير ,, بشرط أن يكون متحملا لنتائج إختياره ,
وأراهم يفكرون كأى أسرة من ذوى المستوى الفكرى المتواضع,, فالأفكار لا تتقدم بالثراء..

6_رضوخها لأهلها فى حد ذاته جريمة , فكان عليها طالما إختارت شخصا ما ومقتنعة بها وتراه (رجلا) أن تتمسك به للنهاية وكلما إزداد تمسكها , كان سيأتى يوما يرضخ فيه الأهل لإختيارها,,
وفى إعتقادى ان الأمر لا يخلو من إقتناع منها بإختيار المادة بديلا عن الحب,,
فالأمر إختيارا فى صورة ضغوط!!!

7_ طالما أن الحياة أثبتت للفتاة أنه لا سعادة مع الزوج المرتاح ماديا, كما ذكرتى (انها غير سعيدة وستكمل حياتها لأجل المجتمع ونظرته) فعليها أن تعترف بسوء إختيارها وأنها إختارت الطريق الخطأ,, كما انها خانت عهدا كان عليها الإلتزام به,, وهذا يستدعى اتصالا صغيرا بالطبيب الذى سافر , لتقول لـه كلمتين بالعدد ( انت صواب) ثم تنهى المكالمة,, لأنه سيظل فى صراع دائم بسبب فشل تجربته نتيجة لحالته المادية التى ليس له دخل فيها...

8_ لنكن صرحاء مع انفسنا ,, الجميع يستطيع بسهولة ان ينطق كلمة (أحبك) وليس الجميع قادر على تبعاتها, الجميع يدعى الرومانسية ويظن أنها تسبيلة عين وليست رؤية كاملة للحياة...
,, وعليه تكثر التجارب والعلاقات بلا تحديد أدنى مفهوم لطبيعتها وللمطلوب من هذه العلاقة...

الأمر لا يعدو كونه صراعا بين من يرغبون فى الحب ودوام المشاعر النبيلة القوية, وبين من يريدون لمعدتهم إمتلاء,,

هو صراع أبدى بين تملك المادة والحب الإنسانى,,

وتجربة (الحب) إن هى إلا إختبار و صراع بين القوتين, من يستطيع تجاوز هذا الصراع , يستطيع أن يقول بعد سنين طويلة (لقد نجحت فى الحب وهاهى زوجتى مازالت حبيبتى!)

خالص تحياتى وعميق إحترامى
ايوية said…
اعتقد ان حبهم مكنشى قوى لدرجة انة يتحمل الصدمات
R.O.U.R.O.U. said…
2bl 2l gawaz allah allah
we b3d 2l gawaz ye3lam allah

group 2l facebook beta3 to7faa
keep it up ;)
فى ناس ماشية بالمنطق ده

بس هقلك حاجة هو المفروض كان يبقى واقعى شوية

اه الجرح اليم عليه

بس اعتقد صاحبتك قاسية كتير

وبعدين البلد مبقتش بلد شهادات فعلا

بقت بلد فلوس
Desert cat said…
العزيز عمرو
يارب دايما بخير وفى احسن حال
مش عارفه ليه يا عمرو من اول كومنت ليك حسيت ان الموضوع لمس جانب مهم فيك او يمكن انت حساس جدا
بالنسبة للنقاط اللى حددتها

1_هى قبلت بطل القصة وحبته بغرض الجواز مش مجرد تضضيع وقت لما تنتهى دراستها بالمناسبة هو اكبر منها بسنتين يعنى هى كانت فى نهائى طب وهو لسه بيبدأ أول سلمه فى الصعود

2_تعرف أنا سألتها نفس السؤال ده كان ردها عليا
الحب ده زى البركان اول ما بينفجر متقدريش تتحكمى فيه لانه بيكون احتل كل كيانك بيخليكى اسيرة بس الاسر اللى لو خيروكى بين حرية مالهاش اى حدود هتختارى انك تفضلى اسيرة لكن للاسف المجتمع فك اسرى غصب عنى
لانه يجحد حاجه اسمها حب ومطلوب انى ابقى اسيرة بعد كدا لافكار عقيمة يحكمها كلمة اسمها مادة والحجة الواهية هى مصلحتى

3_ مش عارفه يا عمرو انا احيانا بحس ان الحب ده ابتلاء
مبتكونش شايف اى صورة قدامك غير صورة اللى بتحبه مبتسمعش اى صوت غيره قلبين اتحدوا فى قلب واحد بيدقوا مع بعض بالتزامن ولبعض ...

4- مبيكونش تنازل يا عمرو قد ما هو بيكون استسلام لافكار ومسميات محدش من الطرفين ليه دخل فيها بالرغم من البعد القاتل بتلاقى كل واحد مازل بيشم ريحة التانى ... فى كل مكان بيشوفه فى منامة وفى احلام اليقظة متقدرش تحكم انهى طرف فى الاتنين اسعد حظ من التانى بعد الفراق .. هل اللى سافر وبدأ حياة جديدة فى مكان جديد مالوش فيه اى ذكريات ... ولا اللى فى كل مكان وفى طريق مشيوا فيه بتشوف فيه مئات الذكريات

5- بالنسبة للأسرة أنا بلقى بكل اللوم عليها مينفعش نقول مالهومش ذنب فى حاجه لانهم كانوا سبب لكل حاجه

6_برضه قالت مقدرتش اقاوم ضغطهم عليا ومقدرتش استحمل الاهانة ومقاطعتهم فكرت فى الهروب منهم وهو علشان راجل قالها انا بنفسى اللى هرجعك ليهم تانى انا مبسرقش حاجه من ورا حد!!

7_ النقطة دى بالذات انا مملكش فيها حاجه لكنى صدقنى علشان اثرت معايا انا شخصيا هنقلها لها بالحرف ولها حرية التصرف ...

8_ طبعا كلام منطقى لا غبار عليه

دمت بالف خير
احترامى وتقدرى
Desert cat said…
العزيزة ايوية
يمكن وسائل الهدم كانت فوق طاقته
اكبر من انه يتحمل اى صدمات
تحياتى
Desert cat said…
R.O.U.R.O.U.
ما هما متجوزوش
:)
ميرسى جدا على زوقك والجروبات جميلة علشان انتى شوفتيهم بعيونك الجميلة
تحياتى
Desert cat said…
مدحت محمد
ماهى البلد بلد فلوس من زمان اوى يا مدحت واللى يتكلم فى مشاعر واحاسيس بقى تافه ومش عارف مصلحته فين
تحياتى
enjy said…
حتى لو انا مش معاها فى انها تخلت عنه بالساهل بس هى كدة ظلمت واحد تانى مالوش ذنب.......... الحب حاجة والجواز حاجة؟ دة راى عقيم جدا
Desert cat said…
enjy
ده مكانش رايها يا انجى ده كان راى اللى حواليها هى بس كانت بتردد الكلام يمكن تصدق صدى الصوت
بس طلعت غلطانة
desesrt cat
تحياتى ,,

معلشى هطول الحوار معاكى أكتر ,
وسامحينى على إزعاجى


1_هى قبلت الحب بغرض الزواج وليس تضييع وقت ,, وحينماتنتهى القصة يتساءل الطرف الذى لم يختار الإنفصال , (أمال اللى كنا فيه ده اسمه ايه؟؟)
وتأتيه اول إجابة سواء من داخله او من صديق او قريب , كان تسلية واستمتاع وياعم مش كل الناس بتحسبها بضمير زيك كده, فى ناس بتعيش وخلاص, وردود من هذه الشاكلة,,

ويكون تقبل الإجابة فى حد ذاتها,بمثابة نار تلتهم أعصابه,ويحاول رفضها كثيرا ولكنها تفرض نفسها عليه بشكل ملح فليس دونها إجابة أخرى مقبولة......

فهذه النتيجة مفروضة من الواقع وسير الأحداث وليست مجرد تهمة موجهة للفتاة...

2_ رد الفتاة عليكى هو رد أى انسان (شاب أو فتاة) يتهرب من مسئولية العلاقة التى أقامها ومن عدم قدرته على الوفاء بما وعد,,هى ليست مراهقة أو صغيرة كى يكون كلامها مقنع,,
وإذا كان الحب كالبركان كما قالت فأين نار تلك البركان الآن!!

وبفرض أن تلك النار قد خبأت قليلا , فهناك إلتزام أدبى يجب الوفاء به, فليس بمجرد خمود البركان أن أبحث عن بركان آخر , أو طريق بديل,,,

* يتضح المعنى أكثر داخل علاقة الزواج حيث تخبت النار سريعا ,, فإذا تعامل الزوج بنفس المنطق فيذهب ليبحث عن زوجة أخرى,, يجدد بها ذاك البركان الوهمى,,, وندخل فى إطار آخر من التساؤلات ,,,
وهنا يتهم بالنذالة وخيانة العشرة , وهذا صواب , فأنا أراه نوعا من النذالة ,, ولكن مايحدث فى علاقات الحب يشبه تماما ما يفعله الزوج الذى يبحث عن امرأة أخرى ,, فلا أرى الزواج سوى علاقة توثيق لعهد أو لمشاعر فى أوراق رسمية,,,

* ورجاء إسالى صديقتك, ماذا لو تركها زوجها واستبدلها بأخرى لأن نار مشاعره نحوها قد انطفأت أو حتى قلت...
3_ كلامك فى البند الثالث سليم تماما , ولكن هذا لا يعنى أنه ابتلاء ,,فشىء يسعدنى لماذا أراه ابتلاء ولكى ان تتخيلى الحياة بدونــه فماذا ستكون النتيجة

4_بصى ياست الكل,, الأمر تنازل بالفعل , ولكل منا دوره فى الحياة وإرادة وضع الله قرارها بداخلنا ,,فإذا جعلنا الآخرين شماعة تصرفاتنا , فلماذا نحيا , طالما إرداتنا الشخصية يملكها غيرنا..

وإستسلامها لقرارات أسرتها لايعنى أنها لم تتنازل ,, أؤمن تماما أن من يريد شيئا ينفذه, لكنها خلطت ضغوط أسرتها بامنياتها الشخصية,

لا أعلم صراحة كيف تخاطب عريسها الجديد بكلمات الحب أو أن تمسك يده أو تعاشره كزوج ,, ومازال هناك طيف رجل آخر وليس هناك فترة زمنية بين العلاقتين,,, فهذا أمر يصعب فعله , إلا لمن وجد تعويضا في الشخص الجديد وقبله بديلا,,,

*بالنسبة لإن كل طرف بيشوف التانى فى أحلامه وذكؤياته فهذا فى حالة كون الطرفين متفقين على ان ما فرقتهم هى الأقدار ,, ولكن كما ذكرتى أول ماوجهها به فى النادى كلمة(ياكذابة)وسيظل يقاوم إحساسه بتلك الكلمة كثيرا , وسيتحول ماذكرتيه إلى خليط من المشاعر بين الرفض والكره والإحتقار وقد تصل للكراهية , واحيانا التذكر والحنين, ولكن تضارب هذه المشاعر فى حد ذاتها يرهق مشاعر الرجل ويجعله كاره لمن تسبب له فيها,,,
فما أصعب أن تقول فتاة لرجل : هناك من يستطيع أن يكون محلك....

5_الأسرة دورها جوهرى نعم, لكن دور البطولة للفتاة.

6_الهرب ليس فكرة جيدة , ولكن من يريد الصمود يستطيع أن يفعله , ولكن من الواضح ان هناك أيضا إغراءات , وليس مجرد ضغوط,,

فهى لن تترك حبيبا من أجل شخص لا يملك بدائل مادية , تستطيع تعويضها عن العاطفة التى فقدتها...

7_بالطبع أسعد جدا بنقلك هذه النقطة إليها..

واخيرا أشكرك على مناقشتك معى وآسف على إرهاقك فى قراءة تعليقاتى
الطويلة , وسعيد جدا بالحوار معك

دمتى بالخير والعافية , ولكى منى كل إحترام وتقدير
blue-wave said…
هوا دا بالضبط ما كنت اقصدة فى البوست اللى قبل اللى فات
بجد يا الف مليون خسارة
Sherif said…
عودة الى السؤال الازلى

هل نحب لاننا نريد أن نعيش فى حالة حب مستمرة؟

ام نحب لاننا نريد ان نرتبط بشخص معين فى النهاية ؟

المعنى هل صادقنا قبل ان تتحول تلك الصداقة الى حب ؟ فهنا يصبح الحب شيئا حقيقيا مجردا يقبل التضحية ويرفض الانانية

.. اعتقد ان الصديقة العزيزة اجابت وبوضوح .. ربما هذا مايفسر ايضا حالات الطلاق المتعددة المنتشرة وكثير منها كان قصة حب .. يعنى بدأنا بالحب .. فصرنا لانرى ..
totaaaa said…
بجد حاجة تزعل اوى ان قصة حب تنتهى بالشكل ده وماحدش يقدر يلوم اى طرف فيها لان كل حد عنده اسبابه المنطقية وكل واحد عارف مقدار التضحية اللى هيقدمها
حكاية شبح العنوسة دى مش منطق خالص وحرام يضيع حب زى ده انا متعاطفة مع (ت)جداااا
لكن مااقدرش ابدا الومها لان لديها اسبابها اللى اقنعتها بالتضحية بمثل هذا الحب
ربنا يسعد ويوفق الجميع
سلامى ليك ياقطة
Desert cat said…
معلشى يا جماعه سورى
انا بس فى الاول هرد على شيئ اسمه حماده
لما تحب تشرشح وتقل ادبك ما تغلفش كلامك فى الاخر بقال الله وقال الرسول اصل انا مش من اللى بيجروا ورا الدروشة واى حد يقول يقل ادبه ويشتم فى ناس بجهل ويدعى التدين وينهى قلة ادبه بقال الله وقال الرسول
وبعدين هو انت جاى بتوصية علشان تشرشح لى هنا وتعرفنى اخلاقك الجمة طيب كويس والله انك قولت لنا وعرفتنا انك من الناس اللى بتتبعت وحد بيوجهك شمال ويمين ومش مكسوف ولا محرج وانت جاى بتقول الكلام ده
وطالما اللى بعتوك هنا محذرينك انى مش هنشر الكومنتات بتاعتك يبقى تاعب نفسك وجاى ليه
ده انا دلوقتى مش هنشر الكومنتات بتاعتك بس
ده انا هبعزق كرامتك وأقولك متجيش هنا تانى لان امثالك مينفعش معاهم غير التجاهل
يعنى بعينك وعين اللى باعتينك اللى انت بتقول عليهم دول تشوف لك حرف هنا مش علشان مش عارفه ارد عليك
بس علشان مش انا اللى انزل لمستواك
تحب تسمع تانى لو سمعك تقيل
متجيش هنا تانى
dina said…
اه و الله كنت بفكر فى الموضوع دا..ليه دايما كل قصص الحب المشهورة اوى فى التاريخ مش بتنتهى بالجواز ابدا انما لازم البطلة تتجوز واحد تانى او البطل ينتحر مش فاهمة ليه و بردو مش حعرف اجاوب على سؤال اذا كان الحب حاجة و الجواز حاجة تانية ولا لأ لان دا اللى حاصل فى المجتمع انما اكيد مش هو اللى اى حد بيتمناه...
تحياتى
العراف said…
اولا ازيك يا جميل وانا اسف لانى اتاخرت عن الزياره بس انت عارفه الامتحانات وشتنى مواضيعك موضوعك جميل جدا وانا اقولك حاجه(سهل جدا تلاقى الحب بس العب انك تحافظ عليه)
Desert cat said…
blue-wave
انا قريت بوست حضرتك فعلا يا دكتور
من الواضح ان الموضوع منتشر جدا
تحياتى
Desert cat said…
Sherif
العزيز شريف
الحب موجود داخل كل واحد فينا
بس ياترى هل نهاية العلاقة بتكون زى ما احنا عايزين
بتكون نهاية الطريق زى اول خطوة بدأنا نمشيها فيه ورسم النهاية كما توقعنا ام كانت مجرد رماد سجارة تتطاير مع اول نسمة هواء تهب من الاتجاه المعاكس

احترامى وتقديرى
Desert cat said…
totaaaa
انا كمان متعاطفه معاه جدا
لكن الوقت نفسه مكانش فيه اى اختيار بين الحب او المادة
تحياتى
Desert cat said…
dina
بالفعل يا دينا محدش بيتمنى يكمل حياته بعيد عن الانسان الىل اختاره قلبه ساعات الظروف بتكون اقوى منه
تحياتى
Desert cat said…
dina
ميرسى جدا ليك يا عراف
المهم اخبار امتحناتك ايه
ربنا يوفقك ان شاء الله
اى حاجه مش بايدينا اعتقد انه نحافظ عليها
تحياتى
Desert cat said…
معلشى يا عمرو انا اضطرين احذف ردى الاخير عليك لان فى حد قريب منى اوى لامنى على كلامى فيه
اتمنى تكون شوفته
بس هضطر اعمل التعريفات الاولى اللى فيه بوست منفصل لانى محتاجاها بجد
تحياتى
في البداية طبعأ.. أحب أحيكي علي الأطروحة الجميلة دي .......
والله يا أختي يا قطة .... أنا بستغرب جدا جدا علي حاااااااال البنااات ( يقولوا كلمة بحبك بسرعة جداااااااا.. وينسوها بسرعة جداااااااااااااااااااااااااااااااااااااااااااااااااااا)..و هيه الهانم معرفتش ان مستواه ووضعه الإجتماعي مش كويس الا بعد قصت حب مدتها أربع سنين . المفروض أن البنت قيل ما تسمح لنفسها تخوض قصة حب . انهاا بتشوف المناخ عندها في البيت شكله ايه (( أكيد كل واحد بيكون عارف ظروف أهله ايه )) ؟؟ وهل هتقدر تقنع أهلها بالموافقة وهل هتقدر تقاومهم في حالة الرفض ... وبعد كده تقرر إذا كانت تخوض العلاقة ولا لأ ..أنما تفضل في علاقة حب 4 سنين وكل عواطفها ومشاعرها وأحسيسها خلال أربع سنين بتكون موجهة لشخص معين . وأكيد طبعا خلال الفترة دي علي الأقل خالص كان فيه كلام معسول وكلاب في الحب والحاجات دي ... وبعد كده بمنتهي البساطة يجيي واحد تاني يتقدملها ولمجرد أن أهلها وافقه عليه هيه برضه بمنتهي البساطة أستسلمت كما لو كان المدة اللي فاتت دي كلها عبارة عن أوقااااااااااااااااات فرااااااااااغ ..... (( طب لو عندها الشجاعة تصارح خطيبها أو جوزها الحالي بالعلاقة اللي فاتت ))) ده لو عندها الشجاعة !!!!!!!!.. وانا متأكد انها مش هتقدر تعمل كده .... وده ببساطة علشان هيه عمرها ما حبت أصلا.... وأن العلاقة اللي قاتت ما كانت الا عبارة عن أوقااااااااااااات فرااااااااااااغ ....
طب انا راضي زمتك وضميرك يا أخت قطة؟؟ ده أسمه كلام ؟؟!! .... أحب واحد أربع سنين ... وبعد كده أتجوز واحد تاني خااااااااالص في أربع أسابيع ..... المشكلة ان الست هانم ظلمت واحد تاني من غير ما تقصد وهو خصيبها الحالي .. وانا وجهة نظري انها لازم تصارحه ده لوكانت فعلا مقتنعة بان الحب حاجة والجواز حاجة .... إلا بقي إذا كانت (((( متعووووووووووودة دااااااااايماً)

جتنا خيبة ...... جتنا ستين خيبة ...... جتنا ستة ألاف خيبة ....... ؟؟؟؟!!!!!!!!!

إذا كنا مبنقدرش نوااااجه وناخد قرار في أهم مسألة متعلقة بحياتنا ... ومبنقدرش نقاواااام من اجل الحاجة اللي مقتنعين بيها ....

أمال هنقاووم الفسااد ازاي هنقاوم الظلم أزاي هنقول لأ أزااااي ؟؟؟؟؟؟؟؟؟؟؟؟ علي الأقل خالص انا لما أقاوم البيت عندي مش هيضربوني ولا هيكهربوني ولا هيعتقلوني ولا هيعلقوني في الفلكة .... كبيرها خااالص هيزعلوا مني شوية وبعد كده الأمور ملها هتكون تماام..

قال مستواه مش كويس قاال .... بعد أربع سنين خدمة في ثانوي بتقولي الحب حاجة والجواز حاجة ..ههههههههههههههههههههههههههههههههههههههههههههههههههههههه (((( مدرسة المعاتيه ))
في البداية طبعأ.. أحب أحيكي علي الأطروحة الجميلة دي .......
والله يا أختي يا قطة .... أنا بستغرب جدا جدا علي حاااااااال البنااات ( يقولوا كلمة بحبك بسرعة جداااااااا.. وينسوها بسرعة جداااااااااااااااااااااااااااااااااااااااااااااااااااا)..و هيه الهانم معرفتش ان مستواه ووضعه الإجتماعي مش كويس الا بعد قصت حب مدتها أربع سنين . المفروض أن البنت قيل ما تسمح لنفسها تخوض قصة حب . انهاا بتشوف المناخ عندها في البيت شكله ايه (( أكيد كل واحد بيكون عارف ظروف أهله ايه )) ؟؟ وهل هتقدر تقنع أهلها بالموافقة وهل هتقدر تقاومهم في حالة الرفض ... وبعد كده تقرر إذا كانت تخوض العلاقة ولا لأ ..أنما تفضل في علاقة حب 4 سنين وكل عواطفها ومشاعرها وأحسيسها خلال أربع سنين بتكون موجهة لشخص معين . وأكيد طبعا خلال الفترة دي علي الأقل خالص كان فيه كلام معسول وكلاب في الحب والحاجات دي ... وبعد كده بمنتهي البساطة يجيي واحد تاني يتقدملها ولمجرد أن أهلها وافقه عليه هيه برضه بمنتهي البساطة أستسلمت كما لو كان المدة اللي فاتت دي كلها عبارة عن أوقااااااااااااااااات فرااااااااااغ ..... (( طب لو عندها الشجاعة تصارح خطيبها أو جوزها الحالي بالعلاقة اللي فاتت ))) ده لو عندها الشجاعة !!!!!!!!.. وانا متأكد انها مش هتقدر تعمل كده .... وده ببساطة علشان هيه عمرها ما حبت أصلا.... وأن العلاقة اللي قاتت ما كانت الا عبارة عن أوقااااااااااااات فرااااااااااااغ ....
طب انا راضي زمتك وضميرك يا أخت قطة؟؟ ده أسمه كلام ؟؟!! .... أحب واحد أربع سنين ... وبعد كده أتجوز واحد تاني خااااااااالص في أربع أسابيع ..... المشكلة ان الست هانم ظلمت واحد تاني من غير ما تقصد وهو خصيبها الحالي .. وانا وجهة نظري انها لازم تصارحه ده لوكانت فعلا مقتنعة بان الحب حاجة والجواز حاجة .... إلا بقي إذا كانت (((( متعووووووووووودة دااااااااايماً)

جتنا خيبة ...... جتنا ستين خيبة ...... جتنا ستة ألاف خيبة ....... ؟؟؟؟!!!!!!!!!

إذا كنا مبنقدرش نوااااجه وناخد قرار في أهم مسألة متعلقة بحياتنا ... ومبنقدرش نقاواااام من اجل الحاجة اللي مقتنعين بيها ....

أمال هنقاووم الفسااد ازاي هنقاوم الظلم أزاي هنقول لأ أزااااي ؟؟؟؟؟؟؟؟؟؟؟؟ علي الأقل خالص انا لما أقاوم البيت عندي مش هيضربوني ولا هيكهربوني ولا هيعتقلوني ولا هيعلقوني في الفلكة .... كبيرها خااالص هيزعلوا مني شوية وبعد كده الأمور ملها هتكون تماام..

قال مستواه مش كويس قاال .... بعد أربع سنين خدمة في ثانوي بتقولي الحب حاجة والجواز حاجة ..ههههههههههههههههههههههههههههههههههههههههههههههههههههههه (((( مدرسة المعاتيه ))

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز