يموت الراجل المصرى وهو بيعاكس


من كام يوم كان فى اعلان لحملة على مصراوى بعنوان لما عاكست استفدت ايه منظمها المركز المصري لحقوق المرأة حملة لوقف التحرش الجنسي بالشارع المصري
ولاقيت الردود ما شاء الله تشرح القلب اللى داخل يقول البنات هى اللى بتلبس عريان
واللى داخل يقول هى البنت اصلاً بتنزل الشارع مخصوص علشان تتعاكس اصلها لو مش عايزه تتعاكس مش هتخرج من بيتها ... وانت تبقى مين ان شاء الله كدا بسلامتك علشان تحكم على البنت بالشكل ده الا اذا كنت واحد مش متربى اساسا وفاقد لكل معانى الاخلاق ... ومن كثرة الردود اللى عمال تقول اصل البنت بتمشى عريانه ومش لابسه قولت يمكن مصر اتحولت لوس انجلوس .. ولا تكساس ولا حاجه لما اقوم ابص فى الشارع كدا اشوف ... لاقيت والله الدنيا لسه بخير والبنات لابسين لبس كويس بل نسبة اللى لابسين اسدال ونقاب اكتر بكتير جدا من اللى لابسه جيبه او بنطلون يعنى رجعنا لورا 100 سنة ولله الحمد ... يعنى مش فى حد عريان ولا حاجه ... وكعادة الشباب المصرى لما يحب يبرر لنفسه عمل سئ يلقى اللوم على البنت اصلها وفصلها اصل ذكروته ما تسمحلوش يعترف انه شاب وقح وقليل الادب ... بالطبع باستثناءالشباب اللى بتعرف تحترم نفسها وتتقى الله فى محارم الناس ....
النهارده كان عندى تمرين ايروبك وكان ناقص واحده من صحابتنا مش جت ... اتصلت بيها اطمن عليها قالت ان حصلت ظروف ومش عرفت تيجى بس عايزه تقابلنى ... المهم قولت لها نتقابل فى النادى ... ورحت انا وعبير صحبتى فعلا علشان نقابلها هناك ... دخلنا وقعدنا نستناها اتصلت بيها اشوفها فين واعرفها اننا موجودين ... وانا بكلمها لاقيت عبير بفزع بتقول يا لهوووووووووى الواد خبط البنت فيييييييييييين ... ايه ده خبطها فين ... قالت لى فى مكان حساس وسكتت ... نهى معايا على التليفون ايه ده فى ايه .. ومين خبط فى مين .. قولت لها عبير بتقولى الواد خبط بنت فى مكان حساس بس انا مش خدت بالى ... قفلت مع نهى اللى قالت لى عشر دقايق بالكتير وهكون عندكو ..... بكلم عبير والاقيها مش معايا خالص وعينيها بتبص فى اتجاه تانى .. فى ايه يابنتى عبرينى ... قالت لى اصل الولد ده شكله مستقصد البنت اصله راح قعد على الترابيز اللى فى وشها على طول ... قولت لها يمكن يعرفها ولا حاجه ... قالت لى بكره الكلام اللى من النوع ده اصل مفيش واحد بيعرف واحده وبيعمل معاها كدا ده لو شاف حد بيرخم عليها هو اللى بيتعرض له .. قولت لها وجهة نظر برضه ... بصيت لاقيت البنت قاعدها لوحدها وشكلها كانت فى انتظار حد وشكلها محرج جداً .. قولت لعبير تعالى نروح لها .. قالت لى افرضى احرجتنا وهنروح نقولها ايه .. قولت لها نجيبها تقعد معانا لحد ما نهى تيجى او اللى هى مستنياهم يجوا ... روحنا لها فعلا .... وسلمنا عليها واحنا مش عاريفنها اصلا واستاذناها نقعد معاها وافقت على الفور .. سالتها انتى تعرفى الولد ده .. قالت والله ولا عمرى شوفته بس هو لازق لى اللزقة السودة دى ... عبير قالت لها وانا شوفته وهو بيخبطك لاقيت البنت اتحرجت وحطت وشها فى الارض وسكتت .. قولت لها بس انتى غلطانة وعليت صوتى لانه كان لازق فى قفانا بمعنى اصح حبيت اسمعه ... قولت لها كان المفروض تقلعى اللى فى رجلك وتظبطيه بيه ... امال انتى لابساه ليه مش علشان الاشكال دى .. قالت لى والله عندك حق ... وقتها شوفنا نهى واقفه بتدور علينا شاورلنا لها وجت وهى جاية علينا نفس الولد عاكسها بس بكلمة ابيحة .. ردت عليه نهى قالت له انت شكلك بتدور على اختك او مامتك اوصحبتك اصل انا مش ينطبق عليا الكلمة دى .. رد عليها ... قومنا له كلنا بما فينا البنت اللى هو كان بيعاكسها فى الاول .... كام واحد من اللى كانوا موجودين لاقيناهم جايين وبيطلعوه بره قال ايه اصلهم متابعين الموقف من الاول وشايفين انه واد قليل الادب ومينفعش يقعد فى وسط الناس المحترمة ... طيب كنتوا فين من الصبح لما انتوا شايفينه بيعمل كدا .... ولا كنتوا معجبين بذكورته اللى من فرط اعجابه بيها مش سايب ولا واحده فى حالها ..

على ما اظن برضه وقتها البنت كانت لابسه عريان .. الدكتورة نهى صحبتى كانت لابسه عريان .... ولا هى نازلة من بيتها علشان تتعاكس .... انت كبنى ادم فرحان بنفسه ازاى ترضى على نفسك وكرامتك بنت تهزأك ... للعلم الناس دى بتكون نازلة من بيتها اساسا مبيتة النية علشان تعاكس يعنى لا لبس البنت ولا مشية البنت ولا اى حاجه اساسا من الحجج الواهية دى ... بيكون نازل من بيته ومحدد لنفسه هو رايح يقف على انهى ناصية شارع وانهى منطقة اللى بيمشى فيها بنات اكتر .... بدليل ان المحجبات بتتعاكس واللى لابسه نقاب بتتعاكس واللى بتهزأة مش عايزه تتعاكس ولا طيقاه ... المشكلة انه بيبقى انسان جبان جدا .ومقرف جدا جدا .. لانى لما بشتم حد الصدفة ساقته فى طريقى بلاقيه عامل زى اللى اتدلق عليه جردل مليان من مخلفات الحمامات وبيدور له على مكان يستخبى فيه ...

دلوقتى الراجل المصرى بالرغم من طحنته فى الشغل ليل نهار الا انه اول ما بيشوف واحده فى الشارع بيحصله حالة هوس ولازم لسانه يتبرى منه ويعاكس ووالله الحاجات دى بتحصل ومن رجاله كبيرة ومتجوزة ومخلفة وولادهم مخلفين كمان مش هقول الشباب ..... حتى العيال الصغيرة بيشوفوا قدوتهم بيعملوا كدا .... الأدب والإحترام مالهومش علاقة لا بالبطالة ولا بعدم الزواج ولا بوقت الفراغ ....
غياب الوازع الدينى
وفرحة الام بابنها اللى بيعاكس والاب بابنه اللى مقطع السمكة وديلها
جعلت منه حيوان بيجرى ورا غريزته ونسته ادميته ... عايز قلة الادب روح اشتريها من مكان ما هى موجودة ... اصل اكيد انسان باخلاقك الزبالة دى عارف ممكن تلاقيها فين .....
بس خليك فاكر
كما تدين تدان والديان لا يموت

تعليقات

‏قال محمد صالح
والله انا بتعجبنى مواضيعك جدا لانك بتقفى على الجرح وتقولى اهو
بصى الوقت مع الانفتاح والعوالمه اللى مصر لمستها فى العشرين سنه اللى فاتوم دول دخل لنا معها اضرارها وسلبيتها
فمنها دخول الكمبيوتر باضراره كالمواقع الاباحيه ومواقع الاختراق وغيرها الكثير والقنوات الاعلاميه الفنيه المخله بالاداب العام والقنوات الاباحيه ودا بيزيد من شهونية الرجل بطريقه غريبه وكبيره ممكن يعمل اى حاجه عشان يفضى الشهوه دى وكمان الراجل ليس ملاما لوحده فهذه الاضرار جائت على عاتق المراءه ايضا فترأ برامج الموضه وتقلد نساء الغرب فالان يوجد المنى جيب اللى اختفى من 40عاما ودخول عصر البنطلون الذى لا يكاد يخفى شئ والفساتين الشفافه
يعنى المجتمع المصرى كله ملاما والموضوع دا لا له علاقه ببطاله ولا بديوله
ياريت مصر تعمل زاى ماليزيا
صادرات ماليزيا هذا البلد الصغير 4اضعاف صادرات مصر يعنى ناس حطه دماغها فى حاجات تفيدهم مش فى حاجات...
ويارب يصلح حال الكل
‏قال ملك الكبدة
اطلعي من دول

انا عارفك كويس

انتي بس متغاظة عشان لما بيعاكسوا بيقولوا بس بس

و طبعا انتي و انتي ماشية تبقي محتارة بيعاكسوا دول ولا بينادوني
اه يا لئيمة
ده تلاقيه واد عنده عقدة نقص
اللى عمل كدة فى البنت واللى قال لنهى كلمة ابيحة
بنات ايه اللى عريانة وبنات ايه اللى نازلة مخصوص علشان تتعاكس
ده تلاقيه بيقصد البنات اللى هو اساس متربى وسطهم
بلا قرف
عالم وسخة

تحياتى
اختك خيخة
ارجع تانى واقول المشكله مش فى بنت لابسه عريان ولا بنت لابسه حجاب او نقاب لا المشكله فى مجتمه ذكورى بحت بيدى لنفسه الحق يعمل الى هو عايزه دون التفكير فى حق الطرف الاخر
الاخ الى نازل من بيتهم علشان يعاكش مفكرش انه اخته فى يوم حتنزل الشارع برضه وممكن تتعاكس
ليه الراجل بيعاكس بكل ثقه ولو سمع فى لحظه انى واحده قريبته اتعاكست عنده استعداد يسيح دم الى عاكسها
هى البنت الى انت عاكستها بنت جايه من الشارع وقريبتك بنت ناس بس
المشكله انى لو حد ادخل بيكون عايز يضبط البنت حتى لو مجرد قال انى كده عيب
سلام بقاء يا قطه الحق الناصيه بتاعت الشارع
‏قال Unknown
اكتر حاجه عجبتنى بصراحه رد نهى صاحبتك
بجد جدععععععععه
مع انى لو مكانها هطنش ولاكاني سمعت حاجه
اصلى بعتقد لو الواحد رد يبقى بينزل لمستواه او ان فى بعض العقليات المريضه بتفكر ان ده قبول للمعاكسه وطلب للاستمرار فيها
تحياتى ليكى يا قطتى
وكل سنه وانتى طيبه
‏قال غير معرف…
el gamiela desert cat:
walahy ya fandem kalemek sa7 100% bas ana 3ayza 2awada7 7aga i live in los angeleos and walahy el banat lebsaha mo7taram geda2 ya3ny lebs 3ady a jeans and a t-shirt
bosy 2aslan mesh ba2a feh regala 7'alas bcoz the act like animals,i hate them,no offinse but i cant find a guy that i can res[pect i only see an animal his desire moves him
ana walahy yeslem denko 3ashan 3amalto keda o rad el dr noha bardo kan gamed ya fandem ya rab kol el mareyeen yet3alemo ba2a el 2egabeya 3ashan el balad tendaf mn el manazer deh\
salamz ya basha
‏قال Unknown
فى معاكسة بس مش بالصورة الغامقة دى

الصورة لسة فاتحة
بصى يا أخت هريرة

أنا متفق معاكى فى حاجة .. و مختلف معاكى فى حاجة

أولا: اللى أنا متفق معاكى فيه إن مجتمعنا دة مجتمع بن ستين فى سبعين .. ذكورى بشع .. الرجل فيه هو محور الكون .. لا يخطئ .. بل و يشعر الرجل فيه بقدره العالى كلما نزلت المرأة بقدرها.. عشان كدة ممكن نسمع عبارات من قبيل "هم البنات اللى عايزين يتعاكسوا" و ما إلى ذلك باعتبار إن الولد كدة عداه العيب و أزح

ثانيا: أختلف معاكى فى دور البنات ..البنات بالفعل ليهم دور كبير فى اللى الشباب بيعملوه دلوقتى .. بس نفرق بين المعاكسة و التحرش .. المعاكسات كتير .. أنا معاكى .. لكن التحرش مش كتير زى المعاكسات

سلوكيات الكثير من البنات بقت غاية فى الاستفزاز و دة بغض النظر عن كونها محجبة أو منقبة أو لأ .. لأن الحجاب و النقاب أمر ظاهرى بشكل كبير .. و العبرة فى الأول و الآخر بسلوك البنت .. يعنى البنت تبقى لابسة حجاب و فى نفس الوقت لابسة بنطلون "رش" (إشارة إلى قد ايه هو ضيق كأنه مرشوش عليها) .. معلش هنا الحجاب أو غطاء الرأس مالوش لازمة .. و للأسف النماذج دى كتيرة .. خصوصا مع وجود هذا الكم الهائل من بنات الإعلانات و الفيديوكليبات اللى بيمثلن نموذج مغرى للبنت العادية إنها تقلده .. بلاش يا ستى .. روحى بصى على محلات بيع ملابس البنات و شوفى نسبة الهدوم المنيلة بنيلة إلى الهدوم المناسبة أو المقبولة ..هاتلاقى الهدوم المنيلة بنيلة كتيرة قوى .. دة معناه إن عليها طلب كبير .. و المشكلة إن حتى محلات الملابس فى الأحياء الشعبية بقت تقريبا منيلة بنيلة كلها

يا أختنا العزيزة .. أنا من سكان القاهرة الكبرى ..و فى رمضان باحس بأزمة لأن الواحد بيبقى حريص على غض البصر بشكل أكبر من الأيام العادية .. و المشكلة إن النظرة الأولى بقت تحدث تأثيرها فى النفس من غير ما ننظر النظرة الثانية أو الثالثة

أمر آخر .. أنا باشوف الكثير من البنات الغير محجبات .. و لكن هى بسلوكها المنضبط بتفرض على الآخرين احترامها .. دة مش تقليل من أمر الحجاب .. و لكن وضعا للأمور فى نصابها الصحيح

مش عيب إن البنت تبقى جميلة .. و أنا أعتقد إن سبب المعاكسات مش كون إن البنت جميلة .. أنا أعتقد إن سبب الكثير من المعاكسات هو إن الولد بيبقى محفز إنه يلتقط أى بادرة تظهر من سلوك البنت .. إلى جانب إن البنت بتتراخى فى موضوع إلتزام الآداب العامة فى الطريق أو المواصلات

طبعا فيه عينة من الولاد الكلاب (معلش فى اللفظ) دول مابيفرقش معاهم بنت كويسة من غيرها .. لكن أعتقد دول مش غالبية

معلش طولت
‏قال oceaneyes
والله انتى عندك حق فى كل كلمة قولتيها

انا بستغرب انا من الناس اللى عشان تغطى على مصايبها ترمى اللوم على البنت (بإعتبارها الجنس الضعيف وحمال القسية ) وغير كدة اصلا لو تيجى تبصى هاتلاقى ان اى لوم بيقع عليها فى الاخر ..ومجتمعنا الشرقى على طول ظالمها

الاسلام ادالنا حقوقنا اه ..بس المجتمع مش بيتعامل مع الحقوق دى صح ..وعشان كدة ده سمح للفكر الغربى انه يأثر علينا بجمعياته اللى اتكونت وبمطالب النساء فى كل بلد شرقى اتأثر بالفكر الغربى


واللى طبعا مخالف لمبادىء ديننا

طبعا الموضوع ده فى حد ذاته كبير ويطول شرحه اوى

بس بجد فعلا اللوم مش على البنت ..لانه لو كان على البنت ما كنش المحجبات والمخمرات والمنقبات نفسهم اتعاكسوا

ماعدش فى واحد بيسيب بنت -حتى لو منقبة - فى حالها من غير ما يقول كلمة ولا اتنين ..سواء معاكسة او تريقة ..مش هاتفرق كتير

زى ما يكون هايجيلهم مرض لو ماقالوش كلمة ولا اتنين


ونسيوا باين ان اللى بيعملوه ده ممكن اوى واكيد يعنى بيتعمل فى اخواتهم البنات ..اللى المفروض ما يقبلوش عليهم كدة


بس تقولى ايه بقا

!!!!!!!



تحياتى يا جميل

وكل سنة وانتى طيبة وبخير وسعادة يارب


:)
‏قال AMRO .O. ABDELHALIM
عزيزتى قطة الصحراء
يعانىاغلبنا من حالة كبت جنسى رهيب
انا برجع الموضوع لاسباب كثيير
تراجع قيمة الحب فى المجتمع ، والانهيار الاقتصادى الى بيودى لتاخر سن الزواج وهذه الحالة من الشعور بعثية الاشياء وان مفيش فيدة مهمن تعمل هتكون فاشل
دا شعور مقيم بين الشباب
اضف الى ذلك الثقافة الذكورية المتخلفة التى ما زالت تسود حياتنا
المعاكسة تودى بالبنت الى انها تفقد القدرة على فهم نفسها والتعامل السليم مع روحها
فى الشارع احنا كاولاد بنتكلم على ان مفيش بنت متحبش تتعاكس
يترى دا صح؟
عموما انا من انصار المعكسة الخفيفية التى بتشبه الهزار
يترى دا موجود الوقتى؟
بوست متميز
تحياتى لك
‏قال Heart Beat
عزيزتي

اصبحت الحجج بتاعت اصل البنت هي اللي لابسه كذا و اصل البنت هي اللي ماشيه مش عارفه بطريقة ايه كلها بقت حجج قديمة بدليل معاكسة الشباب اللي زي الورد ده للبنات المحجبات و اللي لابسين اسدال

عارفه عندنا هنا بقة بيعاكسوا اللي مش باين حاجه منها خالص و لا حتى عينيها و المصيبة انهم بيعاكسوا دي بالذات مش اللي عبايتها مثلا مفتوحة و لا مش مغطية وشها

لا دول يجوا عند اللي وشها متغطي و عبايتها واسعة و يعاكسوها و طبعا هنا بيعملوا ايه ... يجي يقف اودام البنت الشاب الحليوة و يروح رامي ورقة اودامها على الارض عليها رقم موبايله او تعالي شوفيهم في اشارات المرور لما يشوفوا عربية فيها بنات يفضلوا ماشين وراها و يكتبوا ارقام موبايلاتهم على ورق اسمه ايه ده الكبير و بخط كبير جدا عشان البنات تشوف الرقم و تكلمهم ده غير بقى انك تلاقي نص جسمهم طالع بره العربية و عمالي يكلموا و يعاكسوا في البنات

و بسبب المعاكسات السخيفة دي بتحصل حوادث كتير لان سواق عربية البنات بيكون عايز يهرب من المعاكسة السخيفة دي فيسوق بسرعة و ساعات فعلا بيخبط في عربية تانية او تحصل حاجه اكبر من كده

يعني ما شاء الله نسبة التخلف و عدم الحياء عند الشباب العربي عندنا كبيرة جدا

على العموم كل سنة و انتي طيبة و عيد سعيد عليكي يارب

هو انتي صحيح هاتاخدي اجازة في العيد و لا برضه هانسعد بصحبتك طوال ايام العيد؟
‏قال Desert cat
محمد صالح
يا فندم المجتمع المصرى كان فى الستينات بيلبسوا المينى جيب والكت والبنطلونات ومكانش فى الجهل والتخلف ده فى اشلارع المصرى بالعكس كانت البنت بتمشى فى امان
انما دلوقتى رجعنا لورا اكتر من 100 سنة والشارع انتشر فيه النقاب والاسدال وبالرغم من كدا قلة الادب فى ازدياد احنا محتاجين ثاقفة فكر ووعى
تحياتى
‏قال Desert cat
tar7elba7r
ليه بس هو انا بفترى عليهم
‏قال Desert cat
ملك الكبدة
وهو لسه فى حد بيقول بس بس ده انت برئ اوى
‏قال Desert cat
بت خيخة وأى كلام
والله صدقتى فعلا عالم وسخة ومش لاقيه حد يربيها
تحياتى يا ام شريف
‏قال Desert cat
رئيس جمهوريه نفسى
يا فندم الموضوع مش موضوع لبس
الموضوع غياب وازع دينى وعدم وعى وعدم تربية
تقريبا الاهالى نفسهم بيكوناو عايزين يتربوا
اصلك تلاقى الام فرحانه بنفسها وقاعده فى وسط الجيران عمال تقول ابنى 7 رجاله فى بعض وبيعاكس البنات
بدل ما تربيه وتقوله عيب اتقى الله فى بنات الناس
تحياتى
‏قال Desert cat
لماضة
ما هو اللى خلاهم يزيدوا عن حدهم اننا بنطنش وبنقول مش حننزل للمستوى ده بيقولك دى ضعيفة مش حتقدر تعملى حاجه لكن لما يتهزئ وتتهان كرامته ده اذا كان عنده كرامة بيبقا عبرة لاى حيوان غيره غير انه هيفكر الف مرة قبل ما يعمل حاجه زى كدا تانى
تحياتى
‏قال Desert cat
Sola
a3ta2ed tool ma elnas belga6l dah o fa2da llwa3y elskafy o el faekry 7anfdl daowla motkhalefa
ta7eaty
‏قال Desert cat
واحد مش فاهم حاجة
لا والله وفى اغمق من كدا كمان
مش سمعت عن التحرش ولا ايه
‏قال Desert cat
ابن حـجـر الـعـسـقـلانـى
اوكى انت اتكلمت عن فشئة البنات اللى بتلبس البنطلون المرشوش طيب المنقبة اللى بتتعاكس يا عزيزى دى بتكون عاملة ايه
برضه بتدور على مبرر فى الستينات لما كانت البنت بتلبس مينى جيب وكت ومكانش فى اشباه الرجال اللى موجودين دلوقتى بالشكل ده للاسف احنا جيل مغيب ثقافيا وفكريا ودينيا
محتاجين صحوة فى كل حاجه ضمير وغض بصر وفكر وثقافة دلوقتى انت لو اديت لواحد كتاب وقولت له اقراه تلاقيه بيقولك انت فاضى اقرا ايه وهو انا عندى دماغ فعلا عنده حق ما هو مش فاضى ومش علشان بيشتغل اصله نازل يعاكس
لووووووول
تحياتى
‏قال Desert cat
oceaneyes
تعرفى احنا اللى بنضيع حقنا بايدينا المفروض اللى يضايق واحده يكون رد فعلها اقوى منه انا اؤيد انها تضربه بالقلم وتسيبه وتجرى من اقرب شارع ... ههههههههههه لانه اكيد هيجرى وراها
نتكلم جد
حقيقى لو كل بنت عرفت تاخد حقها الاشكال دى حتنقرض ... يعنى لو واحد زنقك فى الاتوبيس او اى مواصلة عموما هزأيه واللى يتكلم برضه هزأيه اصلك اكيد هتلاقى انصاف الرجال اللى قاعدين يقولوا وهى بتسيح لنفسها ليه قولى له عقبال اختك كدا او مامتك لما تتزنق زى ووقتها ابقى شوف انت هتعمل ايه وابقى قابلنى لو حد قدر يجى جنبك تانى لانهم عالم جبانة اصلا
محبتى
‏قال Desert cat
amro
استاذ عمرو اتفق مع حضرتك قلبا وقالبا
بس مش المفروض يكون فى حل للوضع المذرى دة ولا خلاص اللوم هيفضل على البنت فى كل حاجه حتى وهى قاعدة فى بيتها
بالنسبة للمعاكسة الخفيفة اللى بهزر مش موجودة للاسف يا استاذى .. ده بقى الهزار عندهم من نوعية ما تيجى نروح نلعب كوتشينة طبعا الكلمة ما ببتقالش كدا بس انتوا اكيد فاهمين
المعنى بتاعها
تحياتى
‏قال Desert cat
Heart Beat
طيب ما هو كدا ليهم حق الغرب يقولوا علينا همج ومتخلفين
المفروض اننا مسلمين لكن مش بنطبق بمبادئه ولا حرف لا فى الادب ولا الاخلاق ولا النظام ولا النظافة ولا اى حاجه خالص
هنيئاً لنا العرب بالتخلف والهمجية والبعد عن القيم والمبادئ
كل سنة وانتى بالف خير يا جميل
طبعا انا موجودة معاكو فى العيد هو انا اقدر اسيبكوا انتى متتخيليش انا لما بغيب يوم بتوحشونى اد ايه ...
محبتى يا جميل
‏قال محمد صالح
هو فعلا غياب الوعى الدينى اول هذه الاسباب ولكن البعض تجاهل الدين ويعيشون على هواهم واكن الله لم يجدهم والعياذ بالله يعنى الاقليه من الشعب المصرى ناس محترمه والباقى بيعاكس واديكى مثال انا كنت ماشى فى منطقه عندنا فى المنصوره واذا بعربه ربع نقل بصندوق الراجل اللى جانب السواق عاكس واحده وقالها....والبنت دى ردت عليه وجمعت الشعب المصرى دا شعب زباله وما الى ذالك
وبالنسبه للبعض ان قال ان البنات بتحب المعاكسات فىدا شئ غير صحيح بالمره ولكن اخلاقيات البنات هى من تدفعها للرد فى الموقف دا فى فتاه ترد على الشاب وتسبه وفى فتاه تمشى وكانها لم تسمع شئ وفى فتاه بمجرد ما تتعكس تضحك وتعطى فرصه للشاب للتحدث معه ودى ظاهره جديده وغريبه على المجتمع المصرى وهى انعدام اخلاقيات العبض مما يؤثر على الباقيه
‏قال Soooo
لا فض فوكي يا قطة الصحرا
بجد يوم عن يوم بالاقي ظاهرة المعاكسه زادت وباخت وبقت لا تتطاق
طب والله العظيم انا شايل هم بنات اخويا الصغيرين دول لما يكبرو من اللي باشوفه من المعاكسات دي

بس تعرفي .. لو بنات اخويا طلعو بنات جدعان زيك انتي وزي صاحباتك .. والله ابقى متطمن عليهم وخايف على اللي هيفكر يعاكسهم

بقولك ايه .. ماتيجي تديلهم دروس خصوصيه في كيفية محاربة المعاكسات والتحرشات الجنسيه


كل سنه وانتي طيبه


سلامووووووز
‏قال Desert cat
محمد صالح
طيب احنا متفقين على غياب الوعى الدينى
بالنسبة للموقف اللى حكيته تفتكر فى بنت بتكون عايزه تتعاكس او نازلة من بيتها علشان تتعاكس وبتقف تشتم اللى يقل ادبه عليها
مش ده فعلا خير دليل على انه انسان حيوان لانه لاغى عقله وبيجرى ورا غريزته
كما تدين تدان
بس ساعتها اللى بيعمل كدا لا يلومن الا نفسه
تحياتى
‏قال Desert cat
Soooo
شكرا يا فندم وان شاء الله بنات اخوك يطلعوا اجدع منى ومن صحباتى
العملية مش محتاجه دروس خصوصية هى محتاجه شوية وعى وجرأة وانها تفهم ان اللى بيعاكس او بيتحرش ده ميفرقش شئ عن الحرامى فى جبنه وان شاء الله جيلهم يكون افضل حال من جيلنا
تحياتى
‏قال زعيم كمورا
ونتى كنتى منتظرة ايه من واحد
جاهل ومتخلف زى دة
كنت منتظرة ايه من واحد لا عنده دين ولا عنده اخلاق
ولا عندهع حتى عزة نفس
انا نفسى واحد فيهم يحط امه او تخته فى الموقف دة
كان حيبقى احساسه ايه ساعتها
وهما بيتعمل فيهم الى هو عمله
انتى عارفه انا الى نرفزنى فى المووضع دة ايه
الباس الى وقفه وشايفه الى يحصل ولمحدش اتكلم
غير لما انتى اتكلمتى
عجبى على زمن ضاعت فيه الانسانيه
وماتت فيه الرجوله

الله يرحمك يارجولة
‏قال غير معرف…
الغاليه قطه الصحراء

فعلا لما بسمع الحاجات اللي بيقولوها الشباب حاجه تنرفز بجد و كلو اكيد بيرمي اللوم علي البنت مش ممكن يعني حيطلع نفسه غلطان

ده يامؤمنه بقم بيعاكسوا حتي المنقبات تقولي ايه بقه في دي؟
يعني المنقبه مخبيه وشها يعاكسها ليه؟بس اعتقد بقه لو سألوا شاب من الشباب اللي بيعمل كده حيرد برضه زي الشباب التانيين بحاده مستفزه

ربنا يصلح الحال

تحياتي ليكي ياقمرايه و كل سنه و انتي طيبه
‏قال Layla
عارفة لو البنات كلها عملوا زيكوا وماسكتوش...العيال دي هتتلم وهتقعد في بيوتها
‏قال Desert cat
زعيم كمورا مورا
مش بيفكروا فى امهاتهم لاو اخواتهم لانهم لو فكروا للحظة ان اللى بيعمله فى الناس هيتعمل فى اهل بيته مش هيعمل كدا انت بنفسك قولت جاهل ومتخلف يبقى منتظر منه ايه
تحياتى
‏قال Desert cat
زعيم كمورا مورا
بالنسبة لناس اللى بتتفرج وساكته فده بقى الطبيعى لان النخوة والرجولة انعدمت من زمان اوى
‏قال Desert cat
اجندا حمرا
ما هى الغير محجبة بيقولوا عليها ماشية عريانه والمنقبة بيقولوا مشيتها مغرية
هههههههههههههه
مينفعش ابدا يقولوا غلطانين وناقصين تربية
لازم البنت اللى فيها كل العيوب
الله يرحم الرجاله ماتوا فى 73
محبتى يا قمرى وكل سنة وانتى طيبة
‏قال Desert cat
Marvel
والله ده كان اقتراحى وقت الحملة اللى على مصراوى لان المجتمع اساسا ذكورى ومحدش هيعمل حاجه
ربنا يهدى الجميع
تحياتى
جدعة يا قطة انتي و صاحباتك
العالم الزبالة دي عايزة اللي يديها بالبلغة القديمة على ادمغتهم
و لو كل واحدة ردحت للي يعاكسها ما كانش واحد إستجرى يعاكس بعد كده
أنا متفق معاكي إنهم ناس مش متربية ولا عندهم ذرة إحترام
و فعلا اللي بيعملوه لازم يترد في إمهاتهم أو إخواتهم أو بناتهم
لأنه إفعل ما شئت كما تدين تدان
‏قال Desert cat
مهندس مصري
ا هو الطبيعى ان شخص زى ده مكانة الطبعى اقرب سلة مهملات
كل سنة وانت طيب يا فندم
عيد سعيد
‏قال basma saghir
هو انا كنت عايزة اقلك كلمة بسيطة جدا الي هي ..ينصر دينك
الكلام ده كان محشور في زروي بقاله كتير ولو كنت قلته مكنتش هقوله احسن منك

يسلم كي بوردك :)
‏قال Desert cat
بيسوو
شكرا يا جميل وربنا يرحينا من الاشكال دى
تحياتى
‏قال SKOBL- Little Lazy Me
بصي دي أول زيارة بس الموضوع فعلا محتاج مناقشة .. مين الغلطان الولد ولا البنت .. لا ده ولا دي .. اللي احنا اتربينا عليه .. الموروث الشعبي اللي زي ما علمنا صح علمنا غلط .. و زي ما بيصححلنا حاجات كتير .. بيخفي ملامح كتير حلوة
الموضوع أنا حأقوللك اللي فيه .. أنا أولا رافض كل صور المعاكسات من اساسه .. اتمنى لو يعاقب المتحرش بافقاده رجولته ..
لكن مين الملوم .. سيكولوجيا .. أو من وجهة نظر علم النفس ان في حاجات من ضمنها الجنس .. لما احنا نزود الحاجات دي باننا نديلها المثيرات في حين انه يستحيل اشباعها .. تبقى هي دي المصيبه .. زي مثلا واحد عطشان .. بس مشغول بيفكر في حاجة .. لو لقى كباية ميه أول حاجة حيعملها يقف يشرب ..اذن الغلط على البنت اللي بتلبس مش محترم ..؟؟ اه و لا .. لأن الغلط نسبي يعني هي اللي من حي الكفار و الولد اللي عاكس ده من المبشرين بالجنه؟؟
لأ طبعا .. لأن الدين كله بينهى عن التعدي على حقوق الغير و كم من اية في القران الكريم حثت على العفاف و العفة .. اذن الولد غلطان .. اه .. بس برضه مش الاتنين دول بس .. الاهل و المجتمع .. اللي انشغلوا بجمع المال .. و تحقيق كلمة عايز لأبنائهم و نسوا أهليهم ربتهم ازاي و خلتهم رجالة و ستات محترمين ازاي .... طيب و دول ماهم بيعملوا اللي يقدرهم ربنا عليه .. بس مش كل حاجة فلوس .. الأب و الام مش محافظ و بنوك بتمول رغبات الأبناء
الجهل برضه و الموروث الشعبي .. واحدة أعرفها حكتلنا أن في مدرسه أعدادي الولد غلس على زميلته البنت .. تحرش بيها على خفيف يعني .. البنت اشتكت .. اهي واحدة من ألف عندها الشجاعة .. و الناظر اداله استدعاء .. اهه واحد من ألف خد موقف .. و بعدين الأم جت .. لما الناظر حكالها زرغدت و قالت يا حلاوة يا ابني .. كبرت و بقيت راجل .. دي بتحمسه لكده .. يا حلاوه .. أهه ده لو أغتصب ما عليهوش لوم !.. طيب مين المسئول عن كل ده؟؟ مين اللي بوظ كل حاجة .. الوضع الأقتصادي اللي خلى الولد مش لاقي يتجوز و مع كل البلاوي اللي بيشوفها بينفجر كبته من دون قصده .. الوضع الاقتصادي اللي خلى البنت تشوف ان البنت اللي عايشة حياه رومانسية سعيده هي البنت الغربية .. أو البنت المايصه في الأفلام راحت ماشية من غير هدوم .. الوضع الاقتصادي اللي خلى الأهالي بقر في ساقية بيدوروا علشان لقمة العيش و تلبية شطحات و ليس طلبات الأبناء .. الوضع القتصادي اللي خلى الناس ما تتعلمش و ما تقراش .. و ما تلاقيش وقت تعرف الحلال من الحرام .. اللي قلب الموازين و خلى كله في سبيل المال يهون .. اللي خلى أم تزرغد لما ابنها اتحرش بزميلته .. مع أن أم الست دي الحاجة الجاهلة اللي لا شافت علام و لا سمعت عن أحكام دين .. لما كان ابنها بيتكلم عن ست تقولله .. ترضاها لأختك ؟؟ دي ناس ربنا سترها معاها لأن كان كل واحد عنده دم .. و كل واحد ماشي بالفطرة .. عايزة تلاقي مصر مصر تاني .. صلحي حال البلد خمسين سنه أد اللي أتخربتهم و بعدين تعالي قوليلي و سناني أنا بلاش أنتي تكون مكسره .. كلامك كان صح .. يلا سلام .. يا ريت البنات ترحم .. و الولاد يكونوا فعلا رجاله .. و الأهالي تفوق.. و اللي فاهم يقول للي مش فاهم .. يا ريت الجنيه يرجع عمله .. يا ريت الدولار يبقى ب 2 3 جنيه بس .. يا ريت .. سلام
‏قال Desert cat
SKOBL- Little Lazy Me
والله انا شايفه ان ردك بيعرض المشكلة وحلها
لا املك سوى ان ارفعلك القبعه احتراما وتقديرا
خالص تحياتى
‏قال A long distance
موضوع جميل
ومشكله فعلا بقيت منتشره كتير اوي
ومش عارف ايه الحل
mrgkiller2020
شكرا على الموضوع الروعة دا

وفعلا معاكي حق بصراحة دا مش بس في مصر في كل حتة
ودا مش بس لغياب التربية الدينية
حتى التربية العائلة مش موجودة من اصلو
ولما الام تفرح بابنها كبر اهو وصار بيعاكس
يبقى هاذ جهل وانحطاط تربوي كمال للولد يعني رح يتمادى اكثر واكثر
ولما يصير ما يصير يجي الغلط كلو على راس البنت وهيا اللي غلط وهيا اللي لبسا مش صح
طيب فرضنا البنت لابسا مش نص عريان او لابسا بلا هدوم انت بتبصلها ليييييييييه؟
والله غريب
تحياتي ليكي على البوست الرائع دا
‏قال Desert cat
A long distance
الحل فى زيادة الوازع الدينى
والتربية السليمة
‏قال Desert cat
DamnGirl
ده من الواضح انها ظاهره عالمية
المفروض يكون فى رقابة من جانب الاسرة
والمفروض يكون فى حزم من الدوله
ده الغريب دلوقتى انك تمشى فى الشارع تلاقى الشرطى هو اللى بيعاكسك
ربنا ياخدهم ويريحنا
تحياتى
اه معاكي حق هو الشرطي بيعاكس
حنلجأ لمين طيب ههههههه الله اعلم
‏قال Zika
للاسف بقي كلامك صح
انا عن نفسي بلاقي في الشارع وفي الاشارات بلاوي زرقا
حتي الرجاله العواجيز كمان مبهدلين الدنيا
بس انا عندي حل
البنت اللي يحصل معاها حاجه لو بس علت صوتها وقالتله يت حيوان
كله هييجي يعمل فيها راجل وهيتخانق مع اللي عاكسها باعتبار انه ال يعني مكانش عايز يعاكسها الاول
وبهذا تبقي لبستهم في بعض
ومشيت هي
وتوته توته ...فرغت الحدوته
تحياتي
‏قال غير معرف…
Hi there, its pleasant paragraph about media print,
we all understand media is a enormous source of data.



my web page - マークジェイコブス 時計

المشاركات الشائعة