شر البلية ما يضحك

داخله اشوف المصرى اليوم ومش فى دماغى اى حاجه اشاسا
والاقى الخبر ده فى وشى وفى الصفحة الرئيسية
شباب الإخوان يتمردون علي قيادات الجماعة..... ويتجهون لإنشاء «مكتب إرشاد مواز»
آل أيه شباب الإخوان انفصلوا عن القيادات العليا وبدأوا بالفعل نشاطهم المنفصل
وكمان ناويين ينتخبوا مرشد اخوانى شاب حليوة كدا روش طحن
يلبس احدث بدل مستورة .... ويسرح شعره هبابه يمين وهبابه شمال
اصل الكبار اتهموا الصغيرين بالتخلف و بالتفاهه
قام الصغيرين مسكتوش عملوا مكتب ارشاد لوحدهم وبيلفوا على القرى والنجوع يوووووووه قصدى يعنى على المحافظات وحيبقا مولد سيدى العريان
اخوان كبار واخوان صغار .... والكبار يكتبوا فى موقعهم اخوان اون لاين عن التخلف والتفاهه بتاعه الصغار
والصغار يكتبوا فى موقعهم اخوان اوف لاين عن الافعال الفاضحة للكبار
وناس تشتم وناس تفضح
وانقلب السحر على الساحر
وادينا بنتفرج

Comments

ده ان دل على شى انى الاخوان زى الحزب الوطنى مش عايزين يصلحو كما امر الله ورسوله لا عايزين الحكم للحكم مجرد الحكم بس عن طريق الاتجار للدين ونسيو انى مكتب الارشاد يبقى هما اولى الامر ووجب طاعتهم ولا نسيو الايه
( اطيعو الله والرسول واولى الامر منكم )
تحليل وتحريم على هواهم بس
bota said…
لا ده انا محظوظه بقى اجي هنا مرتين النهارده

بس شكلك مش بتحبيهم
انا عن نفسي بحب الاخوان الصغيرين اللي لسه مش فاهمين
بس اول ما بيفهمو مبحبهمش
ههههههههههههههههههههه

سيبك ادعيلي بقى عندي امتحان بكره ربنا يستر
لو ملحقتيش تدعي في الماده ديه عادي ولا يهمك ادعي في اللي بعدها واللي بعدها الخير كتير والحمد لله
ده انتي حطيتيهم ف دماغك بقى
:D
عزيزتى
الاختلاف بين الاشخاص لا يقلل من قيمتهم
واكيد مفيش شئ اسمه شباب الاخوان وعواجيز الاخوان ده كلاام جرايد زى الحرس القديم والجديد بتاع الحزب الوطنى
على الاقل شباب الاخوان او بعضهم لما اختلفوا عملوا جبهه تانى وانفصلوا اما الفكر الجديد عمل ايه ما هو عايش مع الفكر القديم ومتحد وصعب يفكر ينفصل عنه
تحياتى يا قمر
سلام
عزيزتى
رجعت بعض مواضيعك السابقه لقيت تحامل غير طبيعى على الاخوان واقولك ليه غير طبيعى وغير منصف
مفيش ولا كلمه عن المحاكم العسكريه اللى بيتحكموا فيها ولا انتى مع المحاكم العسكريه
مفيش ولا كلمة عن انتخابات اتحاد الطلبه اللى اتشطب فيها الاخوان
ولا انتى مع شطبهم
كفايه المثلين دول علشان اقولك انك مش مع الحريه كحريه انتى بتشوفى الاشخاص مين وتقولى رائيك لو المحبوس اخوانى كويس غير اخوانى ظلم وقهر
شوفى المبادئ لاتتجزأ سواء المظلوم او المعتقل اخوانى او لا
واديكى شوفتى صاحب المطبعه علشان بذقن عملوا ايه
خدى بالك انا ولا اخوانى ولا سلفى ولا شئ
انا بس احب العدل على الكل سواء مع رائيه او اغالفه الراى
تحياتى يا قمر
سلام
عزيزتى
معلش استحملينى
اول شئ ليه حجب التعليقات واختيار بعضها وحذف البعض ده ديمقراطيتك ومبدئك مهما قولتى مش مبرر
تانى شئ انا علقت على موضوع
يقولون ما لا يفعلون
فين تعليقى مش موجود
مستنى ردك الا لو حذفتى التعليق
سلام
وادينا بنتفرج فعلا ..
Desert cat said…
رئيس جمهوريه نفسى
طبعا ياباشا
هو يعنى حضرتك عمرك شوفت اصلاح بسيفين وباستخدام القوة
انت مش معايا يبقا انت ضدى يبقا تستاهل اقيم الحد عليك
هما مش يمهم يطيعوا حد
كل واحد يمه كلمته تبقا هى العليا
واللى يقول عليا تافه ده انا حوريه شغله وافضحه واعمل موقع مناظر ليه وافضح افعاله وتصرفاته
ناس زى دى مش عارفين يحترموا بعض يبقا لو مسكو الحكم حيحترمونا
طيب بامارة ايه ؟
اللى بيحصل ده خير دليل
Desert cat said…
bota
انا اللى محظوظة بزيارتك
هو انا فعلا مش بحبهم مش علشان حاجه شخصية بينى وبين حد لانى من الطبيعى مبحبش اعرف حد منهم
انما تصرفاتهم وافعالهم اللى كلها همجية
برفضها رفض تام
بالنسبة لامتحاناتك
ربنا يوفقك ويارب تحلى كويس النهارده وبكره وبعده
ولما تنجحى تعزمينى على
بيبسبى كنز
ربنا يوفقك يا جميل
Desert cat said…
آلام وآمال
هههههههههههههههههه
انا مش بحط فى دماغى غير الحاجه اللى ممكن استفيد منها
حد يعلمنى حاجه مهمة
انما بالنسبة للاخوان مع نفسهم بئه
بس والله الخبر لاقيته فى وشى كدا لوحده
قولت ادينا بنتسلى ورانا ايه
Desert cat said…
احساس برضوا حى
انت مقتنع بالكلمتين اللى كتبتهم دول
مفيش اخوان شباب ومفيش اخوان عواجيز
لكن فى فكر جديد وفى فكر قديم
ياباشا انت مش ملاحظ انك بتناقض نفسك
حاول تظبط كلامك وتعالى نتناقش
Desert cat said…
احساس برضوا حى
فعلاً انا موافقاك على ان المبادئ لا تتجزأ
تعالى بئه
انت لو كنت بالفعل راجعت مواضيعى كويس
كنت اخدت بالك انى قولت انهم مش اخدوا صاحب المطبعة لوحده
ده صاحب المطبعة ده كان النهاية
ولو راجعت كويس كنت لاحظت انى قولت كان من ضمن الناس اللى اتبهدلت بنوتة مجرد عاملة فى سيبر لا تملكه ولا تملك فيه اسطوانة مش جهاز كمبيوتر
ولو راجعت مواضيعى كويس اللى لاحظت فيها التحامل كنت برضوا اخدت بالك انى مش سبتهم بما فيهم بتاع المطبعة اللى كان قارفينى فى عيشتى وانى فضلت معاهم لحد ما خرجوا كلهم تانى يوم بلا استثناء ....
بالنسبة بئه للى بيتقدم منهم محاكمات عسكرية واللى بتتاخد اموالهم .... فالاموال دى اساسا مجمعينها منين ؟؟
وارثه عن المرحوم ابوه
اشتغل وتعب وبئه ملياردير
ده الاخوانى من دول بيدخل المعتقل بيطلع منه من اغنى الاغنياء ... دعم من مكتب الارشاد غير الدعم اللى من الخارج .... ده غير انه بيخرج بطل قومى .... ضحى بنفسه علشان خدمة الدين يا ولاد ... اتسجن علشان الحق يا ناس ... هو فى دين ولا حق بيقول اضرب واحرق واخرب ....
ولا انت راضى عن الهمجية اللى طلاب جامعة عين شمس افتعلوها السنة اللى فاتت ولا الهمجية اللى بتحصل حتى يومنا هنا فى بلدنا
ياباشا الناس دى بتخرج من المعتقلات اغنى من الاول بمراحل غير بئه عالم الشهره اللى بيدخله وتسليط الاضواء على الاخ المجاهد
Desert cat said…
احساس برضوا حى
يا عزيزى اذا كان تعليقك فى حدود الأدب والذوق فالطبيعى انه يتنشر اما خارج عن حدود الادب والاحترام يبقا متسالنيش فين
لان عالم التدوين مليان ناس محترمة وناس تستاهل تنداس تحت الرجلين .... وبالتالى المحترمين مالهومش ذنب يشوفوا قلة ادب الناس التانية ده اولا

ثانيا انا مش بحجب تعليقات
علشان تقولى مهما قولتى مش مبرر ... لسبب بسيط مش من حقك انى ابرر لك اصل معلومة بس احب اوصلها لك
كل واحد حر فى بيته ... يلعب فيه يصوت فيه يقفل الشبابيك والابواب يفتحها ... ومش من حق جاره يقوله ما تعملش كذا والا يبقا جار فضولى وقليل الادب ....
ثالثا بئه انا عن نفسى مشوفتش ردك عن يقولون مالا يفعلون علشان بسرعة البرق توجه اتهام انه اتحذف او ما اتحذفش وطالما ردك فيه كان فى حدود الادب خايف انه يتحذف ليه
حاول تتاكد انك بعته بالفعل
وبالمناسبة انا مش ببرر لك برضه
وبعدين فى حاجه لفتت انتباهى فى نهاية كل رد ...
تحياتى يا قمر وسلام يا قمر ومش عارف يكونش احنا صحاب وانا مش واخده بالى

جايز
Desert cat said…
المهـ إلي الله ـاجر
فكرونى بالموظفين اللى الموظف الكبير بيتهم الموظف الصغير بالتخلف يقوم الصغير مش يسكت يستلكمه شكاوى ويطلع يسيح بين زمايله بكل افعاله وتصرفاته المشينة والاتنين تبئه فضيحتهم بجلاجل
lastknight said…
مش قلتلك الفوضى جايه جايه .. عموما و بغض النظر عن وجهة نظرك الخاصه فى الأخوان التى أختلف معها جزئيا و ليس كليا .. لكن لو مزجنا بين مقالتك و تعليق أحساس لسه حى .. أعتقد يمكننا أمساك طرف خيط .. خيط يقود فى نهايته الى الفوضى و التفكك و الأنهيار .. و أوله دائما ممسوك بيد فرد واحد .. كان مرشد أو رئيس جمهوريه أو رئيس حزب .. المهم ان القاسم المشترك بين فوضى الأخوان و فوضى الحزب الوطنى هى .. أحادية التفكير و تأليه الفرد

طبيعى أن ينهار الأخوان و يتفككوا .. و أظن بداية انهيار الوطنى التى سبقتهم كل هذه الأنهيارات نتيجه طبيعيه لأحادية التفكير .. و قد أذهب فى ظنى لأن ميول المصريين الليبراليه الطبيعيه و التى استيقظت ألى حد ما فى السنوات الخمس الأخيره كان لها دور فى بدايات هذا الأنهيار

أشكرك ... و طمنينا على اللى اتقبض عليهم فى المقال قبل السابق
Desert cat said…
lastknight
ما هو دائما وابدا التمسك براى الفرد سبب فى الانهيار حتى لو كانت قوة يحتذى بها
كل واحد عايز ينفرد برايه وم قابل اى تدخل فى شؤن الجماعه بزعم انه القائد يبقا هو صاحب الراى الاول والاخير وغير مهم راى الجماعه وتناسوا " وامرهم شورى بينهم "
علشان كدا اى مركب قائدها بيتمسك برايه ولا يهمه راى الاخرين من الطبيعى انها تغرق

احترامى وتقديرى لشخصك الكريم
Desert cat said…
بالنسبة لزمايلى
هما خرجوا يوم الجمعه الساعه 7 بالليل بعد ما اتعرضوا يوم الخميس على النيابة العامة
واتحجزا علشان يتعرضوا فى اليوم التانى على نيابة امن الدولة
والقسم عمل لهم اخلاء سبيل بس بعد ما قسموهم وشوية لبسوا قضية اموال عامة وشوية تانين مصنفات ... غير انهم اتحفظوا على الاجهزة والبرنترات
لما يعملوا لهم فحص
واللى جهازة مش عليه حاجه حيستلمه واللى عليه يبقا هو اللى جنى على نفسه بقا
اشكرك جدا على السؤال
oceaneyes said…
ههههههههههههههههههههه

مش معقولة ...بجد مش قادرة ابطل ضحك على حالنا الغريب ده ...غريب ايه بس ؟!!...ده احنا حالنا ده يصعب على الكافر والله

.....

وبعدين يا جميل ادينا قاعدين ...خلينا نتفرج على اللى بيحصل ...وكل جهة لها انقساماتها ...واحنا اللى تايهين فى النص ..وفى مننا اللى مكبر دماغه

....

ماتحطيش فى بالك ...هى عادتهم ولا هايشتروها

!!!!!


تحياتى ليكى


:)
Desert cat said…
oceaneyes
يا حبيبتى واحنا فى ايدينا ايه نعمله غير اننا نتفرج
بس على رايك احنا اللى بنتبهدل فى النص
الاخوان يطبعوا منشورات والحزب يطاردهم واحنا اللى نشيل القضايا ونتحبس
ممكن كده الحكايه تسخن قوى
ونشوف جيل الوسط انفصل
وجيل مش عارفه ايه انفصل وووووووووو
سر قوه الاخوان فى ترابطهم
وصدقينى يا خيتى
لو ده حوصل
يبجى الاخوان
عيطلعوا فى الروح
جصدى حركه الاخوان نفسها
فوتوكم بخير
سايبه البصاره على الكانون
وعماله احكى اهنه
Desert cat said…
فرنسا هانم
ما هو يا حبيبتى كل حاجه سر قوتها فى فى ترابطها
الـ funny فى الموضوع ده انهم
عمال يشردوا لبعض
كانهم كانوا بيلعبوا استغماية فى الشارع وضربوا بعض
وكل واحد بيسيح للتانى
الا قولى لى اخبار البصارة ايه
أنا زهقت من الفرجة..مفيش أحسن من الفشار..تاخدي شوية؟
عزيزتى
اكيد لما بكتب شئ مقتنع بيه
وانا بقول ان دول على الاقل بيختلفوا بينهم والاختلاف دايمن بيكون بسبب مبدئ
وبقولك اما الفكر الجديد والقديم بتاع الحزب الوطنى عمره ما بيحصل بينهم انفصال علشان المصالح
وضحت الرؤيا
انا اه قريت كلامك وعرفت انك اهتميتى وروحتى مع الناس وده واجب يخصك وملهوش دعوى باللى بتقوليه وانا بعلق عليه
يعنى انتى شايفه انهم يستهلوا محاكم عسكريه علشان الاموال نعرف جيبنها منين طيب كويس يبقا البلد كلها لازم تتحط فى المحاكم العسكريه علشان نعرف كل انسان جايب الاموال منين
بدل المحاكم المدنيه مش عجباكى
ده كلامك صح
بصراحه مسمعتش عن اخوانى فى غنى احمد عز ولا ساويرس ولا صاحب العباره ولا الف واحد مش اخوانى دول صحيح مش ناويه تعملى موضوع عنهم وعن المفروض يتقدموا للمحاكم العسكريه
ودول صحيح مدخلوش معتقلات
معاكى حق همجيه طلاب عين شمس والجامعه كلها لازم يتحطوا فى المعتقلات كلهم بدون محاكمه مش البلد باظت على ايدهم
وبصراحه شكلك مش من البلد سواء الاخوان او السلفين كلهم شباب متوسطين ماديا واقل من المتوسط ولو فيها ناس اغنياء زى كل الناس فيهم الغنى والفقير ولا مينفعش يكون اخوانى وناجح فى شغله ويبقا غنى حرام يمكن
صحيح سؤال ممكن
الفساد اللى قتل اكتر من الف واحد بتوع العباره ولا الاخوان اللى قتلوا كام مش عارف انتى ادرى بتاريخهم ممكن تحسبيهم كده خلال الخمسين سنه
لو طلعوا الف واحد قوليلى
طبعا تعليقاتى فى حدود الادب بس افهم الادب يعنى ايه ما كل انسان ليه تصور لحدود الادب ممكن سخرية من بوست ليكى اساءه لحدود الادب فى رائيك ده اولا
انا معاكى كل انسان حر فى بيته
بس بدل قبل ضيف يخش بيته يبقا بلاش يكممه ويخليه يتكلم افضل امال فاتح بيته ليه لكل الناس ولا عاوز الناس اللى بتايده بس يقول علشان نعرف ده ثانيا ماشى معاكى بنفس ترتيبك
انا موجهتش اتهام ولا اى شئ اصل حجب التعليقات دى لما ببعت تعليق مش بشوفه ادامى نزل ولا لا وانا بعته وبدل مش موجود يبقا اتحجب ولو مخدتيش بالك منه وده احتمال يبقا برضوا حجبتيه بدون قصد سهوا
واكيد انتى مش بتبررى تسميها بتوضحى كأن لو بررتى جريمه وشئ ينقص من قدرك
اما نهاية كلامى بياقمر نقول تعود يمكن وعلشان احسسك ان كلامى ليكى مفهوش اى شكل شخصى هو بس اختلاف فى الراى واظهار لحقايق يمكن تايهه عنك واكيد احنا مش صح دايمن
اتمنا منك تردى على نقطه نقطه زى ما عملتى فى التعليق اللى فات علشان انا طرحت اساله كتير لو عندك اجوبه جوبى
تحياتى يا افندم
سلام
Esmat said…
حلو هى كل حاجة بتتقسم دلوقتى
كل مجموعة بتبقى اتنين جديد وقديم
ياترى ممكن يبقوا 3 و4
اصلها ناقصة تقسيمات
كله بيحارب بعضه
حتى ذوى الفكر الواحد إنقسموا على أنفسهم
عمار قصدى خراب يا مصر
تفتكرى يا قطقوطة ممكن نتجمع كا مصريين
إزى ضد الفساد والاستبداد والاحتكار و..و
ونقف ادام النظام الفاسد
إذا كان كل مجموعة ماشية فى سكة
من الواضح يا أختى العزيزة
إن الانحدار شغال بسرعة البرق
ولكى بوسة كبيرة
ronnata said…
هنعمل اية
ادينا هنشوف اية اخر الانفصاللات
بس بجد مدونتك حلوة جدا و كفاية صورة القطة الى فيها
انا بمووت فى القطط
العزيزه قطه الصحراء

واحشاني يابنتي عامله ايه؟انشاء الله تكوني بخير

شوفتي بقه حتي الأخوان النونو اتمردوا علي الأخوان الكبار و انشقوا عنهم و ياما حنسمع و نشوف بس ياتشبيهاتك ياقطه هبابه علي المين و التانيه علي الشمال لول
استاذه و الله

تحياتي ليكي ياقمرايه علي البوست المميز

صباحين و حته و يانيولوكاتك ياباشا روعه
Desert cat said…
أحمد المصري
نا من الصبح ببص على الكيس اللى فى ايدك بقول يمكن تعزم
اخيرا اخدت بالك ان انا كمان زهقت ومحتاجه شوية فشار
ايدك على الكيس كله بئه
Desert cat said…
احساس برضوا حى
وانت شايف لما الكبير يشتم الصغير ويقوله انت تافه ومتخلف والصغير يفضح الكبير باعماله الحاكاية دى فيها أى مبادئ
ده انت ما شاء الله عليك رؤية ثاقبة للمبادئ محصلتش
ههههههههههههههههه
وبالمناسبة
مش واجب عليا انى اروح ورا صحابى
ومش فرض كمان
علشان تقولى حاجه تخصك
انما لانى اتربيت انى اكون جنب اى حد فى شدة واخلاقى ومبادئ متسمحليش اسيب حد ولو تفتكر ده كان ردى عليك وانت بتقولى شوفتى عملوا ايه فى بتاع المطبعه علشان ملتحى
يعنى الكلام ده مش جه من الباب للطاق علشان اعرفك انى صاحبة واجب لانه ميهمنيش انك تعرف من عدمه
بالنسبة لغناهم فهما فيهم وفيهم اللى اغنى من احمد عز بمراحل بس الظاهر انت حاطط شريطة سودة على عنيك ومش عايز تشوف سلبياتهم
مش عايز تعوف الارهاب اللى بيرتكبوه فى حق ناس ابرياء مالهومش اى ذنب
مش عايز تشوف سلبياتهم اللى تتمثل فى الانفراد براى الكبير واللى يخالفنى الرأى ارد عليه برصاصتين يخلصونا من قرفه من الاخر شغل عصابات
شيل بئه الرباط الاسود اللى على عنيك لمدة ثوانى وتعالى شوف مصادر تمويلهم
وبعد كدا حطه تانى للابد
الجماعة تشترط على كل أخ عضو بها أن يدفع من ماله الخاص 8% من دخله إجباريا تبرعا للجماعة
بالإضافة إلى ما سبق فإن هناك معارض التى سيطرت عليها شركات المهندس خيرت الشاطر النائب الثانى للمرشد العام، التى تخصصت فى إقامة معارض للسلع المعمرة فى النقابات المهنية ؟! نقابتى المهندسين والأطباء ولأن عدد الأعضاء بهما يجاوز المليون كان المكسب كبيرا جدا للناشط الإخوانى
وده غير المعارض التى تقام فى الأندية الخاصة بنقابات المهندسين والأطباء التى احتكرها رجال أعمال إخوان
ولكن ما تحصل عليه الجماعة فى داخل مصر لا يفى بمتطلباتها فهى تعتمد على دعمها كلياً على أموال تأتيها من الخارج
من دعم خفى من رجال أعمال مصريون ينكرون دائما صلتهم بالجماعة
البعض الآخر من التنظيم الدولى للجماعة الذى يحدد نسبة كبيرة للتنظيم الأم فى مصر
البعض الآخر من خلال إخوان أمريكا والدول الغربية وأستراليا التى شاهدت خلايا نائمة فى هذه الدول منذ الستينات حينما هربوا من بطش جمال عبد الناصر فى حادث المنشية
لو مسمعتش عن حادث المنشية ابقا جيب كتب واقاها علك تستفيد
وهذه الجماعة لا يهمها أقتصاد مصر فقد اتجه الإخوان لشركات توظيف الأموال ودخلوا بأموال التنظيم فى شركات عبداللطيف الشريف واستثمر فيها الإخوان أموالهم بداية من الثمانينيات ، وكان هناك نوع من الاطمئنان على أموالهم لوجود من يحميها وينقل للجماعة كل المخاطر التى من الممكن أن تحيط بشركات الشريف، حيث كان المستشار الاقتصادى لهذه الشركات «إسماعيل الهضيبى» المحامى وهو الأخ الأصغر للمستشار مأمون الهضيبى مرشد الجماعة السابق فكان الإخوان يستثمرون فى شركات توظيف الأموال ما يجنونه من أرباح من إقامة معارض السلع المعمرة فى النقابات المهنية. عندما فطنت الدولة لمخالفات شركات توظيف الأموال وواجهتها سحب الإخوان أموالهم بالكامل من شركات الشريف، وكانوا أحد الأسباب فى توريط الشريف وعدم قدرته على سداد مستحقات المودعين، وعندما طلب من الإخوان جدولة حصولهم على حقوقهم حتى يتمكن من رد أموال باقى المودعين رفضوا ذلك بشدة بعد معلومات أكدها لهم إسماعيل الهضيبى . بعد فضيحة الإخوان
وقام الإخوان المسلمين إافتتاح أسواق لها فى مدينة دبى ودخل الشاطر كشريك لبعض رجال الأعمال الكبار فى دول الخليج، وبالتحديد فى دبى وقطر، وهما حاليا المكانان الرئيسيان اللذان يستثمر فيهما الإخوان أموالهم. وتتم إدارة مال الإخوان عن طريق خيرت الشاطر وحسن مالك أحد قيادات الإخوان الحاليين من خلال المضاربة فى البورصات العالمية وفى مدينة دبى على وجه التحديد عن طريق شركة عالمية لإدارة المحافظ المالية ويضخ سنويا «إخوان مصر» فى هذه الشركة ما يوازى 100 مليون دولار ،ولا تتم المضاربة على إجمالى المبلغ، بل هناك أقسام منه جزء للاستثمار فى المبانى والعقارات وأسهم فى شركات وجزء آخر موضوع فى أحد البنوك الفرنسية الكبرى فى دبى باسم بعض قيادات الإخوان فى الخليج العربى، ويتحكم ألأخوان فى هذه الأموال من توكيل لإدارة الأموال والسحب منها صادر لعدد من الإخوان بعضها معروف إعلاميا ، والبعض الآخر مجهول لكل واحد من حملة التوكيلات الحق فى إدارة الأموال والسحب منها هذا الجزء مودع فى البنوك تحت بند «الإيداع المطمئن» وجزء آخر فى البورصة والباقى يجرى استثماره فى شركات الكمبيوتر والهدايا وشركات الإلكترونيات بصفة عامة
ولسه فى الكتير والكتير
بس انا هكتفى بالجزء ده لد ما تركز فيه وتفهمه كويس
وبعد كدا لو حبيت اجيب اذكر لك الباقى
بالنسبة بقا كون انى مش عايزه استقبل غير الضيوف اللى تدخل تمجد فيا فيما معنى كلامك
على ما اعتقد ان من الذوق والاخلاق والواجب وحسن المعاملة وعلشان صاحب البيت يقدر يستقبلك كويس اوى فى بيته انك تدخل باحترم وادب .... مش ادخل بيتك واقعد اقولك انت ترتيك للبيت زباله
الفازة اللى هناك دى مكانها مش حلو ... انت مش بتعرف ترتب بيتك ... وقتها الرد المفروض من صاحب البيت انك ضيف قليل الادب وما تستهلش الضيافه واتفضل اطلع بره وهيرزع الباب وراك كمان دليل على انك كنت ضيف اتقل من التقل ....
وبالنسبة للرد اللى انت موصر عليه ... فانت مش موكل بالحساب من رب العالمين علشان ابرر لك واقولك ان الرد ده بالفعل موصلنيش ... ولو كان وصلنى وشوفت فيه ما يشينى كنت نشرته ورديت عليك بالكلمة كلمتين
لانى من الناس اللى مبتسبش حقها ...
Desert cat said…
Esmat
حبيبتى ما هو من الواضح من الانقسامات وضح النوايا .... لانى كنت بسمع دايما ان هدفهم الاصلاح ... طيب اى اصلاح فى ظل الانشقاق واللى بيحصل بينهم ده
الاستبداد بالرأى وفرضه على الاخرين = خراب ... وده حتى بيحصل داخل محيط الاسرة
المكونة من كذا فرد
احترامى وتقديرى
Desert cat said…
ronnata
بس ربنا يستر علينا بئه فى الانفصالات دى لان فى النهاية لام بيتاخد حد بذنبهم
بالنسبة للقطط شكلنا هنبقا صحاب جدا
اتفضلى القطة اللى فى الصورة بئه ما تغلاش عليكى
Desert cat said…
اجندا حمرا
حبيبتى انتى اللى وحشانى والله
وبجد نفسى اعرفك عن قريب
بالنسبة للاخوان الصوغننيين فهما اللى غلط هو حد بيناقش البوب
الناس دى ايه على اخر الزمن يتدخلوا فى آرائه
يستاهلوا بئه اللى يحصل لهم

سيبك منهم انتى
المهم ان النيو لوك نال اعجابك يا جميل
كل حبى ليكى
و الله الاخوان دول حالتهم عجيبة و تصوري ان الخطوة دي جاءت مبكرة في سيناريوهاتهم التقليدية فقد كنت اتوقع ان تطفوا خلافاتهم للسطح فور تمكنهم من الحكم و لكن بقى الاقدار حطت الخلافات دي عشان تعطلهم عن مشروع حكم مصر اللي هو بعيد عن اتخن شنب فيهم كلهم
Desert cat said…
ملك الكبدة
والله الاخوان دول قرفونا فى عيشتنا هنا
وكل شوية مشاكل
وكل يوم شوارع متقفله
هيحكومنا ازاى الهمج دول
مش لما يحكموا نفسهم الاول
تحياتى ياباشا

Popular posts from this blog

قميص دهشور

كل تحرش وانتوا طيبين