طفـــو النـــور

ايوا طفوا النور ومحدش يشغل حاجه بالكهربا
يعنى المكواة مثلا بتستهلك كهربا كتير
بلاها .... مالها يعنى المكوة الرجل حتى بتطلع الهدوم ملحوسة ومهببة وبرضه مكوية
وما تضربيش طماطم فى الخلاط انتى تقطعيها مع الخضار وهى حتتسبك لوحدها ولا لايه اساسا طماطم ملهاش لزوم واهوا برضه توفير والاكل من غير مسبك صحى دى الحكومة عايزه مصلحتنا
اى حاجه داخل فيها الكهرباء لازم نقتصدها ده ان مش بطلناها خالص
اصل حكومتنا النظيفة بقيادة الباشا احمد نظيف قصدى الرشيدة لا مؤاخذه ياباشا مخدتش بالى
رفعت امبارح اسعار الكهرباء
يعنى ياباشا هى الناس لاقيه تاكل لما حتدفع كهربا زيادة
ودى تفاصيل الخبر
الحكومة ترفع أسعار الكهرباء في سرية تامة

اللى غايظنى انهم بيرفعوا الاسعار فى سرية ولو رفعوها فى العلن حد يقدر يفتح بؤه اصلا
و يقولهم مينفعش
اكتر من نصنا امنية حياته يوصل لخط الفقر ومش طايل
ولا ولادنا عايزين يهربوا باى طريقه مع انهم بيرجعوا فى صناديق بس ارحم من الفقر والجوع
ولا الخبر اللى ينرفز على مصراوى ده
عصابة لتسفير الفتيات المصريات وإجبارهن علي ممارسة البغاء بالخارج
تفتكر ياباشا بيطفشوا من ايه دول كمان ... علشان يلاقوا رغيف العيش ويعرفوا يعيشوا ولا علشان يتبطروا على النعمة اللى هما فيها فى ام الدنيا .... ولا علشان طماعين يا سيادة المفتى
عادى ياباشا منك ليه ولا يهمكو
ارفعوا اسعار كمان وكمان وفى العلن مش فى السر
وجوعوا فى الغلابة كمان وكمان
دى بلدكوا واحنا رعايا عندكو
هو من امتا يعنى الرعايا ليهم حق يتكلموا
انتوا ذلوا فينا واحنا حنقول كوماااااان

Comments

بسم الله
احب اقول زاى ما حضرتك قولتى ان يرفعوها فى العلن او فى السر مش هتفرق كتير غير اننا هنعمل واقفات احتجاجيه وخلاص ولا حاجه هتم ولموضوع هيمشى وهيبقى فى زياده مستمر وهندفع
وانا عندى مبدأ ماشى عليه الحكومه غلت رخصت انا عايش وطالما عايش احمد ربى واشكر فاضله والاكل ناكل خفيف وننام والاكل الصحى بيوفر ويديك طاقه اكبر بس مبيشبعاشى اااااااااه يا بطنى
هههههههههههههههههههههه
متخفيش حكومتنا الفقدة الاهليه سورى قثدى الرشيده ليها يوم تقع فيه ومصر فى تطور دائم حسب اكاذيب التلفاز المصرى اللى واخدينه مقوله لصالحهم واستثمار انا هقولك مقوله واحد البلد نازله لتحت مش طالعه لفوق
وياريت تبقى تراسلنى على ايميلى
nile.boy@hotmail.com
يا فتاح يا عليم يا رزاق يا كريم
اصتبحنا واصتبح الملك لله
جردل ميه صغير ياله علشان توفير الميه ورش قدام باب المدونه
غلوا الكهرباء ؟
مانا كنت حاسه
مانا كنت عارفه
مانا كان قلبى دلييييييييييييلى ؟
الواد بتاع النور وهو بيدينا الوصل من كام شهر قالى
انتم لسه شفتم حاجه ؟
وادينا شفنا يا روح مامتك
كان ناقص الكهرباء كمان
سك يا بنى على جردل الميه
وبلاها رش
علشان هيغلوا الميه كمان
3ala asm masr said…
سيادته قال أن فى أصلاح والشعب مش حاسس بيه
والنبى حد يقوله كفايه أصلاح
وربنا خلاص حسينا
والله العظيم حسينا
coca said…
يارب احمنا
يعني تقريبا انتي بتكتبي البوست وامي بتزعق علي النور والكمبيوتر والتليفزيون اللي والع
والكهربا جاتلنا كتير الشهر دا
تقوليش كانت قاريه كلامك
والله انا ماعارفه الناس علي راء الاخ بوحه محطوطين في خلاط والحكومه مشغله الخلا طعلي اخر سرعه الناس اتفرمت
يعني هما لو يبطلوا رشاوي
اوي ما يسمي بالرشاوي السياسيه اللي حرقت دمي من شويه
لو اخدوا الفوس اللي بتروح في كورووش الاخوه الوطنين
اهو يرحموا الناس شويه
ياقمر انتى مش فاهمة نظرية الحكومة دى بتحبنا وبتفهم اكتر مننا وعايزانا نحب بعض ولما الدنيا تسود والنور ينقطع ترد علينا بحب وعيون مسبلة وتقولنا نوركم يا شعب كفاية
يا جماعة كل حاجة الحكومة .. الحكومة

لأ .. لازم نعتمد على نفسنا شوية .. يعنى بدل ما نستهلك الكهربا فى التدفئة و الشتا اهى داخلة علينا .. نستخدم الحطب أو الفحم

و لو بقينا ننام بدرى من الساعة 7 مساءا مثلا .. هانوفر كهربا الإضاءة بالليل

ثم إن الحكومة مالية الشوارع نور .. يعنى اللى عايز يقعد شوية فى النور ينزل يقعد فى الشارع و يسيب بيتهم مضلم

و مش عيب لو كل خمسة آلاف فرد اشتركوا فى تليفزيون واحد

أو كل عشرة آلاف فرد اشتركوا فى راديو

يعنى لو شغلنا مخنا شوية هانحل مشكلة الطاقة العالمية من غير ما نحمل الحكومة حاجة .. عشان هم عندهم حاجات أهم يتشغلوا بيها عن إنهم يتشغلوا بمصالح الناس
طفي النور يا بهية.......كل العسكر حرامية....
agamoooo said…
قالوها زمان فى الاغانى
طفى النور يابهية
كل العسكر حرامية
Esmat said…
قطقوطة الجميلة لا على راسنا الباشا
الصغنن وباقى البشوات كلهم يرفعوا الكهربا
يرفعوا الضغط والسكر مبسطين منهم اوى
مش كده اختى
عارفة احنا هنا بندفع متوسط 200 ريال كهربا شهرى
اما البنات اللى بتهرب بره
ده بقى المرار كله يا قطة
الشباب ماشى الحال لكن وصلت للبنات يطلعوا يشتغلوا فى الدعارة ربنا يستر
الناس طهقت ومستعدين يعملوا اى حاجة علشان
يخرجوا بره مصر
شوفتى بلدنا قصدى اللى مسكين بلدنا وصلزا الناس لايه
ربنا يسترها مع الجميع يا رب
واحلى تحية لكى يا قطقوطتنا الجميلة
hamsaa said…
عارفة خالتي عندهاعقدةالكهرباء دي كل حاجة تقول انهابتستهلك كهربا بس انامبتفرقش كتير
افكارك جميلة بجدبجد
وكالعادةيعني الحكومةتفعل ماتريدةولا صوت يعلوصوتها
Anonymous said…
ههههههههههههه
هى جت على الكهربه
لسه التقيل ورا ياحاجه لسه لسه انتى مستعجله على ايه
بكرهنقف عهلى شط اسكندريه ونصطاد سمك ونملى جرادل ميه نشرب الميه وناخد الملح نرشه على السمكك وهو بيتشوى على اشاعه الشمس اهى برده حاجحه نحافظ بيها على البيئه
بس تبقوا تلحقوا قبل ميخلوا الصيد بفلوس
خخخخخخخ
وعجيبا يامصر
Desert cat said…
محمد صالح
حتى الوقفات الاحتجاجية بيستفيدوا منها
ايوا بيستفيدوا فى ضرب وسحل الشباب فى الشوارع
ما هو ده عمل والعمل عباده
تحياتى ياباشا
Desert cat said…
فرنسا هانم
والله لو رشيتى مية النيل كلها فى الشارع
برضه حيغلوا الاسعار
يا حبيبتى خلاص مبقاش ينفع لا رش مية ولا توليع بخور
احنا نولع فى نفسنا ونريحهم مننا
تحياتى يا منورانى
اموااااااااه
Desert cat said…
3ala asm masr
وانتى عايزه اصلاح ايه اكتر من كدا
ده اصلاح وفايزه وماهيتاب كمان
تحياتى
Desert cat said…
coca
بالنسبة للرشاوى احب اعرفك انى لسه دافعه الصبح 100 جنيه غرامة
والموظف بعضمة لسانه لاقيته بيقولى هاتى 5 جنيه مصاريف
قولت له الغرامة مش عليها مصاريف
جايه لى 100 جنيه ماسكة بعضها
وقالى واحنا مش لازم حاجه كدا يا استاذه
قولت له انا مش الشئون الاجتماعية
هات الايصال
اقسم بالله بصلى بصة كان حياكلنى فيها
ولو مش غرامة ما كان خلص لى اللى انا عايزاه
وادى موظفين البلد
تحياتى
Desert cat said…
coca
نسيت اقولك ابقى اقفلى التلفزيون والكمبيوتر مش تستخدميه اكتر من 10 دقايق فى اليوم يا دوب يحمل تروح قفلاه تانى
دى الكهربا غليت يا بنتى والعيشة بقت نار
Desert cat said…
كلاكيت تانى وتانى
ههههههههههه
عسل يا نرمو
بيعيشونا الجو الرومانسى
شافوا الناس مطحونة فى الشغل ليل نهار
قالوا نعلمهم الرومانسية
amro said…
عندك حق
كل يوم الاسعار بتزيد، الحياة بقت نار
الحياة بقت صعبة اوى فى مصر
ومحدش بيعمل حاجة
تحياتى
هههههههههههههههههه
حلوه اوى بتاعت الغرامه دى
هههههههههههههههههههههه
حاجه لينا دا لو يجمع من كل واحد يروح له 5 جنيه هيروح فى جيبه ولا 500جنيه فى اليوم يعنى شغال شغلانه ميه ميه
احسن من اى حد فى مصر
زاى عسكرى المرور عمال يلم من بتوع الميكروباز زاى المنشار رايحين واكل راجعين واكل
انا راكب فى عربيه مره 3 عساكر اخدوم من صاحب العربيه اللى انا راكب فيها 3 جنيه فى 3 محطات مختلفه سعنى بتوع الميكروباز شغالين لبتوع المرور
Desert cat said…
ابن حـجـر الـعـسـقـلانـى
اصلا هما اللى دلعونا ياباشا
عودونا على الترفيه منذ نعومة اظافرنا
من تعذيب فى السجون لرشاوى لتعدى من اى نوع يحبوه
هما اللى دلعونا وجايين دلوقتى نقول الحكومة
بصراحة شعب طماااااااع

تحياتى
Desert cat said…
واحد مصرى
دلوقتى طفى النور يا بهيه كل الكبار حرامية
Desert cat said…
agamoooo
ما هو الاغانى بتعبر عن واقعنا دلوقتى
Desert cat said…
اسكندراني اوي
امين يارب
ربنا يسترها معانا جميعا
Desert cat said…
Esmat
ما هو انا برضه بقول زيك كدا يا قلبى احنا عمايلهم على راسنا من فوق
يعنى يرفعوا اسعار براحتهم يطفشونا من البلد براحتهم مفيش اى مشاكل

بالنسبة للنبات مبقتش فارقه بنات ولا ولاد المهم الناس تطفش من هنا وخلاص
والله ما عارفه اخرتها ايه ولا المسلسل البايخ ده حينتهى امتا
والله العظيم انا تعبت جدا
من اللى بيحصل ده
ربنا يتولانا
تحياتى ليكى يا حبيبتى
Desert cat said…
hamsaa
ما هو بعد كدا لازم تفرق
اصلك حتشتغلى علشان تدفعى فلوس كهربا
نورتى البلوج ويارب دايما مشرفانى
Desert cat said…
Anonymous
اتقل من كدا ايه بس
خلاص تعبنا مبقناش قادرين نشيل
Desert cat said…
amro
ولا حد هيعمل حاجه
لسبب بسيط جدا
ان اللى بيفكر بس يعنى مش بيعمل ده مجرد لسه بيفكر
على المعتقل
الناس عندها تجوع وتسكت
لما خلاص
ربنا يتولانا
Desert cat said…
محمد صالح
للاسف الحاجات دى منتشرة وفى كل مكان
مودتى
ربنا على الظالم والمفترى وابن الحرام
Desert cat said…
بت خيخة وأى كلام
اللهم امين
ماطفتيش النور ليه لغاية دلوقتى
تعليقك على التدوينة الأخيرة له قيمته واحترامه .. وعمري ما أرد أقولك زي ما قلت للتاني عارفة ليه يا قطة الصحرا
لأن التاني بكل بساطة كان بيقول كده عشان يرضي اللي حواليه
بقيت الرد هتلاقيه عندي على التدوينة
شرفيني
Desert cat said…
يوميات عيل مصري
اه شوفته
بس لما السيئ بيكون طاغى على الحلو
بالتالى بيداريه عن العيون
خصوصا اذا كان الحلو ده حاجات نادرة مش موجودة فى كل الاماكن
الا ما رحم ربى
أشكرك .. بس ده مش هيمنعك من زيارة المدونة
Desert cat said…
يوميات عيل مصري
اه طبعا يا فندم
اصلا انا مش مختلفة مع حضرتك كتير بس كان مجرد حروف وبحط عليها نقط
لقيت حضتك كملت اللى انا نسيته
احترامى وتقديرى لشخصك الكريم
نحن ولسوء حظنا نعيش في فتره تهوى فيها مصر الى هاويه سحيقة بفضل المماليك الجدد ولا امل فى شىء اذاظل هؤلاء رابضين على مقدرات هذا الشعب .فولاء هؤلاء المماليك هو فقط للمنفعة ولو على أجساد العباد.
U C ,,, I payed a lot of effort 2 write that In arabic .....2 B good Understood..
best regardes
Desert cat said…
مصرى وبدرجة مواطن
اصل فلوسى كتير وعايزه ابقشقش على الحكومة
يعني هما يغلوها في السر وانت تفضحي الدنيا كدة
فين الوطنية
فين الانتماء
فين الي يقدر ياخد الحكومة على جوانتينامو
Desert cat said…
a Dreamer with feet on the Floor
طيب والحل ايه ؟
كله بيقولك مصر فى فترة انتقالية ومصر بتسقط للهاوية
ومصر اتحولت من الجمهورية للملكية بس ياترى حنفضل نقول كدا لحد ما نموت وندفن تحت الانقاض
son's egypt said…
السلام عليكم
كل يوم الاسعار بتزيد ومحدش بيتكلم علي اي حاجة
زمان ايام السادات لما لاغي الدعم البلد كلها قامت
دول لا محدش حيقوم
وبعدين مش فرقة سر ولا علن
واللي بيرفعوا الاسعار مش عارف ليه انهم مش حاسين انهم عايشين في بلد اكتر من 45 % منها عايشين تحت خط الفقر
لماضة said…
يا شيخه خضتينى
فكرت ماما طلعت عندك فى المدونه
اصلها كل ما تشوفنا تقول كده لا الفاتوره بتجيلنا عاليه قوى صراحه بشكل مبالغ فيه ممكن تتعدى 200 جنيه ليه معرفش عندنا مكن فى البيت باين ولا ايه
فى حاجه واحده بس نسيوا انهم رفعوها
نسيوا انهم رفعوا ضغط 20 او 30 مليون
استر علينا يارب
alaa salim said…
السلام عليكم

صحيح ليه يرفعوها في السر
دا ولا كأن الشعب هايعترض ولا حاجه لا سمح الله


ربنا يحلها من عنده

انا و انتى القدر جمعنا على غير ميعاد فى المكان ده و باللون الاحمر اللى بيعبر عن مكنون حبى و هكذا من الكلام اللى
بيثبتوا بيه البنات...

خلينا مع الصور اللى كشفته و و هو لا يعلم ان هناك كاميرا تراقبه و تراقب تصرفاته

تابع

قصة حب

عمر افندى على موقعه


www.omarafandy.com

Desert cat said…
son's egypt
علشان كان زمان ايام السادات فى بنى ادمين عندهم كرامة وعزة نفس بجد
انما دلوقتى الذل بقا السمه السائده
الناس اللى بترفع الاسعار مش حاسين بالفقرا لان ميهمش الفقرا همهم يبقا رصيدهم كام فى بنوك سويسرا
تحياتى
Desert cat said…
لماضة
ده 200 جنيه كدا رحمة يا دوك
جارنا بقاله شهرين بتيجى له 600 جنيه برضه مش عارفه ليه
فى مرة صاحية سمعت ان الراجل حينتحر علشان 600 جنيه الشهريا بتوع الكهربا دول
تقوليش بيقبضوا الموظفين من فاتورته
وده كان قبل ما يرفعوا سعرها
دلوقتى بقا ممكن تيجى له الف جنيه
ربنا يبعدهم عننا انا بدفع 150 جنيه
بس عايشه وسعيده وراضية ولا اقدر افتح بؤى اهلى عايزنى
Desert cat said…
alaa salim
معلشى ميعرفوش ان الشعب بيحبهم
وحيدعى لهم ربنا يوطى مراتبهم ويخسف بيهم الارض
Desert cat said…
عمر افندى و ابوه
من العنوان شكلها متميزة
انا حدخل حالا الموقع علشان اقراها
تحياتى
dr.nour said…
يعنى من جمله المصائب الى بتحل فى بلادنا


المهم فى ده كله ان محدش بيعترض محدش بيتكلم واخرنا ان احنا نكتم فى قلبنا ونحرق دمنا


ربنا يرحمنا برحمته


مدونتك جميله

تقبلى تحياتى
Desert cat said…
اسكندراني في الغربة
لاء ما هو ده برضه سر بينا
ما احنا صحاب ومش حنقول لحد
ده مهما كان حكومة بلدنا اللى كل يوم والتانى يرفعوا الاسعار
واللى بيزعلهم بياخدوا اقرب قسم يخلصوا عليه
ومظبطينا اعلى تظبيط
لازم نستر عليهم ونحفظ اسرارهم برضه

تحياتى
Desert cat said…
dr.nour
ما هو انا اللى مضايقنى يا حبيبتى مش انهم رفعوا الاسعار
الل مضايقانى انهم رفعوها فى السر
طيب وفى السر ليه هو احنا حنتكلم ولا حنقول حاجه
طبعا الاجمل من المدونة انك نورتيها
احترامى وتقديرى
osama said…
يمكن بيرفع سرا عشان يهدي الجو وسيناريو التوريث يعرف يمر ... اصل لو علناً والشعب قال ايه دا في سره طبعا مش في العلن هيسبب قلق ودا مش لصالح جيمي ولا الملكة الجديدة ولا الملكة الام ....

واهم شيء متنسيش محدودي الخل .. دا اهم شيء عندهم اقصد معدومي الدخل...

دمت بكل ود..
خالص تحياتي
Desert cat said…
osama
ياباشا فى السر ولا فى العلن محصر بعضه
ما احنا عرفنا اهوه عملنا ايه يعنى
ولا حاجه
ده حتى الشعب بقا اليس ومستأنس خالص
تحياتى

Popular posts from this blog

قميص دهشور

كل تحرش وانتوا طيبين