مصر وإسرائيل .. يا حلولى



مصر واسرائيل توسعان نطاق اتفاقية لزيادة الصادرات الي الولايات المتحدة

زغرطى يا ام فاروق .. وحياة ابنك فاروق لتزغرطى

اصل مصر واسرائيل

خلاص تعاونوا مع بعضيشهم ووقعوا على اتفاقية ان اللى بيع التانى عليه ربنا ومنه لله ..

والبنت لابن عمها ولا يمكن غريب يدخل العيله ابدا .. سعودية مين دى اللى نتعاون معاها ولا كويت ايه دول حتى بيشتمونا ..

احنا نتعاون مع اشقائنا اللى خلاص وقعو اتفاقية بينهم وبين مصرنا المخروسة لتوسيع نطاق المناطق الصناعية المصرية .. اصل المناطق الصناعية المصرية ضاقت بيها الدنيا كلها والدول كلها ماعدش غير اسرائيل اللى نوقع معاهم الاتفاقيات وقال أيه تتضمن نسبة مكون اسرائيلي من اجل زيادة الصادرات الى الولايات المتحدة

احنا من كام يوم كنا عمال نقول 6 اكتوبر على اساس ايه ,, انهم بقوا اصدقائنا ورفقاء دربنا والبزنس ما يحلى الا معاهم .. طيب ما كانوا فضلوا قاعدين عندنا بالمرة .. ولا اتيتم اطفال ولا اترملت نساء ولا انحرقت قلوب امهات على ولادهم اللى ضاعوا طول فترة الاحتلال

يعنى امبارح نحتفل بانتصارنا عليهم والنهارده نوقع معاهم عقد بيزنس

بصراحة انا ماليش حق ازعل ولا اتضايق ولا اتفرس بالشكل ده ولازم ابطل حقد على اسرائيل الشقيق .. ما هم خلاص بقوا اشقائنا واخواتنا وحبايبنا

وانا من موقعى هذا اهني السادة المسؤلين وعلى راسهم السيد وزير التجارة / رشيد احمد رشيد

ونظيره الاسرائيلى الشقيق / ايلي يشائي على هذه الاتفاقية المذهله

ويجعلها فتحة خير يا اخوانا علينا وعلى الاشقاء الاسرائيليين ومنورين مصر يا اشقائنا وحبابينا من شرقها لغربها

واهلا وسهلا بيكو فى بلدكو الاول مصر

وربنا يزيد من اتفقياتكو واحنا بنمد لكو ايدينا بالسلام ومفيش حروب نوهائى البلد بلدكو برطعوا فيها براحكتوا ولو وجودنا مضايقكو عبارة واحده تلم الخمسة و سبعين مليون ونخلصكوا من ازعاجنا

ونأمل باذدهار بلدنا على ايديكو ان شاء الله

والله والخير حيعم علينا يا مينزززز

Comments

وبعدين بقى ف اخبار مصراوي اللي جابتلك الضغط دي
:D :D
ارحمي نفسك شوية منها الله يخليكي
هو احنا ناقصين مرار وغلب

:S
ايه يا قطه شكلك مش عايشه فى البلد دى ولا ايه زعلانه على اتفاقيه توسيع الصادرات
ليه هو انتى متعرفيش انى مصر موقعه اتفاقيه تصدير غاز طبيعى لاسرائيل لمده 15 سنه قابله للزياده وانى سعر الوحده فى التصدير 1.5 دولار على الرغم من انى السعر العالمى 6.5 دولار للوحده
وانى 14 رخصه لمصنع اسمنت علشان مش عارفين يجيبو من فين غاز يشغلهم وانى طن الاسمنت وصل 450 جنيه مصرى يعنى البلد محتاجه الغاز الطبيعى وزعلانه على اتفاقيية زياده صادرات صباح الخير بالليل
Desert cat said…
آلام وآمال
انا فعلا هعمل بنصيحة حضرتك وابطل اشوف اخبار مصراوى
بس انا صعبان عليا الحال اللى وصلنا له ده
Desert cat said…
رئيس جمهوريه نفسى
انا كنت سمعت عن الموضوع ده
من فترة بعيدة شويه
وبعدين مش مهم ياباشا طن الاسمنت يوصل 450 جنيه الحديد 800 جنيه
مش مهم خالص احنا
المهم اسرائيل تعيش وتبقا غنية كدا اصل سعادتهم تهمنا
mohamed said…
حسبى الله ونعم الوكيل فى الناس اللى بتعمل كده انا مش عارف رشيد ده لما بيروح يقعد مع عياله ويسئلوه ع الاتفاقيه بيقولهم ايه الناس دى للاسف باعت دينها وضميرها واديها بتبيع البلد
Desert cat said…
mohamed
هو تلاقى ولاده فاضيين يسالوه
ولاده بيصرفوا فى اموال الغلابة
للاسف البلد خلاص مبقتش بلدنا
بقت بلد الناس اللى بتبيع وتشترى فيها بالاتفاق مع اعدائنا
تحياتى
osama said…
هههههههههههههههههههه. الاشقاء الاسرائيليين ...
ومتنسيش لا للتطبيع بالمرة ... احنا مستمسكين متمسكين متمكنين مستمكنين من موقفنا ...
وانا بهنئ الشعب الاسرائيلي بهذه المناسبة بعيد الفطر المبارك
دمت بكل ود
خالص تحياتي
Desert cat said…
osama
اه طبعا الاشقاء الاسرائيلين دول اخواتنا
كل سنة وانت طيب

Popular posts from this blog

قميص دهشور

كل تحرش وانتوا طيبين