ما ترسى على بر يا استاذ نظيف حتبيع ولا مش حتبيع .. عايزين نتريش بقا


طبعا بمناسبة هوجة البيع اللى ماشية فى البلد فترددت اوشاعات مغرضة ان بعد بيع بنك القاهره فحكومتنا المؤرة ناوية واحنا طبعا الرعية مش بنتعامل بالنوايا احنا بنتعامل بما يرضى الله حتى لو بعتوا هدومنا ياباشا مش حنفتح بؤنا ... المهم الاوشاعات اللى ترددت بقا انهم ناويين يبيعوا البنك الاهلى وبنك مصر ... طيب احنا نصيبنا فين ...
وفى تصريح للدكتور احمد نظيف انه فى مصر قال المقاولين العرب فى طريقها هى كمان للبيع ... وفى امريكا قال لاء مش حنبيع ...
يعن ايه ياباشا احنا كدا متلخبطين .. بيع يا لطفى
قصدى بيع ياباشا وهو حد كان قالكوا لاء قبل كدا علشان نقول بعد كدا
بيعوا ولا يهمكوا
بس بلاش بيوتنا ياباشا تتباع اصل هى اللى بتأوينا لو بيوتنا اتباعت حنروح فين
ولا حتعملوا لنا مصر غير مصرنا
طبعا انا ماليش دعوه بالكلام اللى فوق ده كله
الكاركتير من مصراوى
والكلام ده بتحريض من عبده محتاس والمكالمة متسجلة
مش بيقولى الكلام ده حيوديكى فى داهيه
مش حروح لوحدى ياباشا ده حتى ضميرك يوجعك لو رحت من غيرك

Comments

ايوية said…
فية اية يا قطة هتودى الراجل فى داهية كدة

والله انا خايفة لحسن اصحى الاقيهم باعونا احنا شخصيا
shahy said…
انا فاتحة بؤي وباكل فيشار
لما يرسوا على بر ابقي قوليلي علشان اعرف هافضل اكل فيشار لحد امتى

اما بقى بخصوص الواد عبدة حرام عليكي دة غلبان وبعدين لازم يبقى واحد برة وواحد جوة لو اتمسكتوا انتم الاتنين نعمل احنا اية بقى؟

سلام يا قطة مياووو
Marvel said…
كالعادة هيبييعوه بعد ما يقولوا انهم جربوا كل الحلول وفشلت..وكالعادة هيقولوا ان الفلوس هيصرفوها في دعم السلع..وكالعادة الناس هتقول انها مش حاسة بأي دعم من الحكومة للاسعار.. وكالعادة الحكومة هترد وتقول ان الدعم لا يصل لمستحقيه

لا جديد..نفس المسلسل الممل..وادينا قاعدين بنتفرج وبناكل فشار على رأي شاهي
Desert cat said…
ايوية
ما تقلقيش يا قلبى
عبده ما يتخافش عليه
بالنسبة لصفقة البيع اللى هى احنا
فاحنا لو يضمنوا اننا حنجيب سعر حلو مش كانوا اترددوا لحظة
Desert cat said…
shahy
لاء شكلك مش حتاكلى فشار كتير يا شاهى يا حبيبتى
اصل القرارات دى بتتاخد وبتتنفذ فى وقت اقصر مما تتخيلى دى فلوس يا جميل
عبده بقا فا انا اوعدك حيكون هو جوه وانا اللى افضل معاكى بره مش تقلقى
Desert cat said…
Marvel
اه كل الحلول دى اللى هى كيفية زيادة الرصيد فى بنوك سويسرا
لنا الله
Desert cat said…
MAKSOFA
من ناحية البيع فهما بايعين يعنى بايعيين
بايعين القضية كلها
الاهم من البيع بتاع البلد بقا
انك شرفتى المدونة
قطه الصحراء
انا طبعا متفق جدا انهم يبيعوا كل حاجه فى مصر حتى قناة السويس
لانهم لما يخلصوا بيع فى المؤسسات هيدوروا على الشعب و يخصخصوا فى الشعب
و يبيعونا لدوله محترمه لا بتعذب مواطنيها و لا بتهجرهم و لا بتطلع عنيهم و لا بتمص دمهم
يبوهم بئه يبيعوا بسرعه لانى حاطط عينى ع حته دوله نفسى اتباع لها
و طبعا طبقا للديقراطيه المزيفه كل مواطن هيختار دولته
شكرا ع مرورك الكريم بمدونتى
والله انتى عشا اوى بجد واسلوبك بجد ساخر بطريقة حلوة
بس هنعمل ايه يا بنتى ده شوية شوية هنلاقى الشارع اللى بنمشى فيه نصحى تانى يوم يقوللنا ده اتباع ومحدش يمشى فيه
بجد حاجة آخر مهزلة وبعدين البنك الاهلى ده من البنوك اللى بصراحة كويسة بس منهم لله بقى الناس بتاعة الكوس اللى بتسهل فى اعطاء قروض لناس معندهاش ضمير ولا بتسدد ولا بتهبب ويخلعوا
وتلاقى البنك بيصوت خلاص بقى راح فطيس ولا بقى فيه سيولة ولا الناس بقى عندها ثقة فى حاجة
حاجة بقت تقرف اوى
Desert cat said…
محمد مارو
اوعى تكون حاطط عينك على نفس البلد اللى انا حاطة عينى عليها
المهم بس يبقا لنا حق الاختيار
مش يبيعونا فى فلسطين ولا العراق ويوقلك اصلنا عملنا انتخابات ونسبة الاصوات 99.9%
سعيدة جدا بتشريفك المدونة
Desert cat said…
رحيق الحب
حبيبتى رحيق
حتى لو فى سيولة وعايزين يبيعوا حيبيعوا اصل حكومتنا بتحب التجديد
البنوك والمؤسسات دى ما هى موجودة من زمان اوى ومفيهاش اى تغيير فالحكومة الله يكرمها حست بينا مفيش تجديد والحياة مملة قالوا نجدد بقا علشان الشعب يحس بالتغيير راحوا بايعين البلد
المفروض نشكرهم بقا
بالمرة يا نانا انا عندي اوضتين وصالة كنت عايز اتصرف فيهم
ماتكلميلناش لطفي.يبعهوملي

رمضان كريم
محمد سمير
Desert cat said…
غمض عينيك
ما تستعجلش يا محمد
لطفى عينه عليهم
ده حتى لسه قايلى بس انا كنت فاكراك عايزهم
ااااااااااااااه
ربنا يرحمنا
وكل سنة وانت بالف خير
رمضان كريم

Popular posts from this blog

قميص دهشور

كل تحرش وانتوا طيبين