Desert Cat Search
قطه الصحراء: والتهمة ازدراء الدين

Thursday, October 4, 2012

والتهمة ازدراء الدين

مش عارفة دين ايه ده اللى ممكن يضعف من مجرد ان حد يذكر اسم الرسول وهو بيشرح حصة دراسات اجتماعية زى ما حصل للاستاذة نيفين جاد .. وراح واحد من التلاميذ اللى ميعرفش حاجه عن الدين ولا التربية ولا الاخلاق لأنه كداب واحنا كلنا عارفين ان الكداب بيروح جهنم اذا كان سمع عنها هو وابوه السلفى اللى اخده وراح يعملوا محضر فى  مدرسة الدراسات الاجتماعية اللى ابنه اساسا كان غايب فى حصتها ؟! انهى دين اللى امر الناس بالكدب واتهام  غيرهم وحبسهم فى السجون من غير داعى ؟! وانهى دين اللى قال لوكيل نيابة يسجن سيدة حامل فى شهرها الأخير لمجرد ان تلميذ كداب وقليل التربية هو واهله اتبلوا عليها ؟! 
وانهى دين اللى امر بسجن طفلين  واحد عمره 9 سنوات والتانى 10 سنوات لمجرد انهم مسيحيين وقالك ايه ازدراء اديان ايه الدين اللى  بالهشاشة والضعف ده اللى يخاف من اطفال لسه بيلعبوا فى الشارع ؟! مين اللى بيطبق الدين فى مصر وطول اليوم السفالة والانحطاط مالية الشوارع بل وصلت لبيوتنا من غير ما ننزل منها .. تخيل تبقى نايم فجأة تلاقى نفسك بيتقبض عليك بتهمة ازرداء للدين اللى  لمجرد ان فى واحد متغاظ منك او غيران منك سهل جدا يروح يعمل فيك محضر ازدراء ويسجنك الموضوع بقى بسيط جداً .. فى الثورة الفرنسية كان ممكن اى مواطن عادى يعمل محضر فى واحد متغاظ منه والتانى ياخد اعدام مفيش اى مشكلة .. النهاردة  لو حد مضايقك روح اعمل فيه محضر وقول عليه بيزدرى الدين بس خد بالك مش اى دين لازم تحدد انه الدين الاسلامى لانك لو عملت محضر ازدراء اديان لاى دين تانى حيتسب  لك الدين انت واهلك واللى جابوك واللى يتشددوا ليك كمان .. زى ابو اسلام الراجل الفلة الشمعة المنورة اللى قطع الانجيل وداس عليه برجله وهدد انه هيعمل  عليه بيبى وكبيره راح اتحقق معاه فى امن الدولة وروح  نام فى بيتهم على فرشته هادئ قرير العين وبكرة يطلع منها زى الشعرة من العجين  ابو اسلام بتاع قال الله وقال الرسول اللى مبهدل مرات ابنه فى المحاكم وخطف منها ابنها 3 شهور لاء وكمان مش بيدفع لها نفقة يعنى طز فيها وفى ابنها اللى هو حفيده يعنى مش عيل جاى من الشارع حتى لما الست قالت له مش عايزة من وشك حاجه وراحت تشتغل علشان تلاقى مكان يلمها هى وابنها بعت لها كلابه تهدد صاحب المكان اللى كانت بتشتغل فيه علشان يطردها وهددها بانه حيبهدلها لانه يمتلك المال والسلطة .. هو ده بقى راجل الدين المحترم بتاع قال الله وقال الرسول .. لكن كل الناس اللى اتسجنت بتهمة ازدراء الدين كانوا كلهم اقباط خد عندك البير صابر والاستاذة نيفين اللى اتحجزت يومين وبطنها مترين قدامها والطفلين اللى كبيرهم عنده 10 سنين شوفت اد ايه الدين بقى بيعيل ؟! النهاردة السجن مبقاش لتجار المخدرات ولا المغتصبين والمتحرشين والسفلة ولا الحرامية والنصابين وقتالين القتلة الناس دى كلها فى الشارع حرة النهاردة السجن بقى لاى حد غير مسلم ممكن اى مسلم يروح يكتب فيه ورقة معفنة والتهمة انه يزدرى الدين لو مؤمنين ومسلمين بجد وهمكم الحفاظ على الدين طهروا البلد من حقارة ووساخة تجار الدين

26 comments:

Khalid Mahdy said...

العقل ياجماعة بيقول أن يبادر أولياء أمور الولدين بالاعتذار علناً أمام عقلاء القرية من المسيحيين والمسلمين معاً

Īḹ Ḋồň said...

تهمة إزدراء الاسلام بقت أسهل وسيلة لاضطهاد و تعذيب المسيحيين . أنا ضد إهانة المقدسات حتي لو واحد بيعبد ورقة فاضية.
أبو إسلام فيه أدلة على وقاحته .... تطلع أدلة على جريمة الطفلين دول أهليهم يعتذروا غير كدا يبقي إذلال غير مبرر

Masry Awy said...

هل الاطفال مكلفون يا حكومة؟؟الاطفال رفع الله عنهم التكليف لان عقولهم لم تكتمل --و الحكومة توديهم السجن؟؟؟؟؟بس حنقول ايه --ما هي الحكومة الظالمة اللي بتحبس الاطفال في السجن الحربي عشان في مظاهرة و لا معديين بالصدفة تحبس اي حد --بس فيه اخرة و فيه اله و حتتحاسبوا يا حكومة علي كل انسان في المعتقلات

عبد الحميد القداح said...

تجار الدين الذين يتخذون من الدين سببا لسب الناس وبث الكراهية والازدراء هم افة وسيكونون سببا فى نهاية دولتهم

محمد said...

هم دول رجال الدين فى مصر يقولو ملا يفعلون كلهم كده انظرو الى هذا الشيخ ومدى غضب ربنا عليه وعلى وجهه
اتقى الله فى البنت ارحم كفايه الفلوس ال بتتحولكم من بره

فيلوباتير said...

كل اناء ينضح بما فية ومن ثمارهم تعرفونهم ياتونكم بثياب الحملان وهم ذئاب خاطفة

روز said...

نفسي حد يقول ليا هيا دي الرجوله يا جماعه ؟ النفوز و السلطه و المال ؟ و الازيه و الحقد و — و الكراهيه — فعلا فرق كبير بين بشر و شر , مجرد حرف يفرق

elewa said...

كل دى بلاوى يا ساتر

الا التربية و التعليم said...



مثل هذه الأمور تعالج مدرسيا أى داخل المدرسة بين أدارة المدرسه وزملاء وزميلات المدرسه وزملاء الطالب ولا يصح أن يخرج أبدا خارج المدرسة ، و الا أنتشرت فى كل المدارس وكل المحافظات وهذا يدعى كذا وفلان يقف مع فلان ضد علان وهكذا ويكون العام الدراسى فشل ويفشل ويمتد الى سنوات وسنوات ، مع أن الأمر لا يعدو الا أن يكون كلام طفل صغير كذبه زملائه بينما زملاء المدرسة قاموا بالتهويه على الفحم ثم تدخل الادارة التعليمية بأسلوب غير تربوى بالمرة ثم وضع معلمه وحامل فى الشهر التاسع ليلتين فى التخشيبة هذا ما لايصدقه عقل ـ لاهذه هى مصر ولا هذه هى وزارة التربية والتعليم وأحذروا من الفتنه فهى أشد من القتل ـ حفظ الله مصر من كل سوء

بصراحة تامه said...

التلميذ أتهم المدرسة المسيحيه بأنها لم تصلى على الرسول ! فهل يجبر المسيحيون على الصلاة على النبى ويجبر المسلمون على تمجيد المسيح ؟ ثم ثبت بعد كل هذه الهيصه أن التلميذ أصلا كان غائبا فى اليوم الدراسى أو على الأقل فى حصه التاريخ ؟ يعنى هلس فى هلس لايصح نعمل من الحبه قبه ومرة أخرى أحذر من وصول هذه الفتن للمدارس والا فهذا مخطط من الفلول لأفشال العام الدراسى كله والدراسة كلها فى مصر ويجب ألا تسكت وزارة التعليم أبدا على مثل هذه الأمور وعلى رأى المثل يعملوها الصغار ويقعوا فيها الكبار !

هيه إيه الحكاية؟ said...



الظاهر إنها عملية إرهابية مُمنهجة من أغبياء الوهابية ضد المسيحيين ولكن هذه المرة بطرق قانونية ألا يجب عقاب من قدم هذا البلاغ الكاذب؟

واحد من الناس said...

عيل يتهم .. من المؤكد أنه لا يعرف معنى .. أزدراء الأديان .. بلاغ كاذب .. لا عقوبه كالعاده .. و لأنه عيل و قاصر .. من قدم البلاغ .. فاسق جاء بنبأ .. هكذا وصفه القرآن .. و هكذا البير الأول .. شديد العقاب له .. و غفور رحيم لمن أذاع الفيلم و شاهده الملايين .. يا ساده .. الله هو العدل .. لا داعى لحرق سماحة الدين .. كى نشعل .. سيجاره

رومانى said...


يارب انت شايف ومطلع على الظلم اتصرف انت سواء كان التعليق هيتنشر ولا لاء ينفع يحصل كدة لسيدة حامل ربنا ينتقم

الاسد الناصري said...

وتتوالي كشف الحقائق
سقوط تجار الدين في مصر
في بئر الخطايا و الحرمان والرذيله والنفاق

امل سيد said...

هكذا رجال الدين البعض يتمسح في الدي وهم ابعد مايكون عن اللاسلام والمسلمين وواخدين الموضوع بالفهلوه للاسترزاق سواء م الداخل او الخارج

مهزلة أم حقارة؟ said...



ماذا يعني هذا الخبر لأي شخص يقرأ عن مدرسة مسيحية حامل في شهرها الأخير تقضي ليلتين في قسم للشرطة مع وعينا لما يعنيه قسم الشرطة بسبب بلاغ كاذب وافتراء محض وحقارة من مسؤلين لم يراعوا اي مبادئ انسانية؟ بل تصرفوا بحقارة وخسة بداية من مدير المدرسة والإدارة التعليمية ووكيل الوزارة والحيوانات الآباء للطلبة الكاذبين والمفترين؟ كفاكم كذبا! فضائحكم باتت على الملأ. ثم حفظ التحقيق. معنى هذا ان كل مسيحي ينتظر حبسه بسبب التجني والإفتراء كذابا من أحد الدجالين والرعاع ويقضي ليلتين في قسم الشرطة ثم يخرج لبيته ويحفظ التحقيق من البهائم المسؤلين. أليس هذا تهجير عرقي! ما اروع سماحة المصريين!

John Macenley said...

طبعاً عشان القرآن هو اللي اتدنس أمام مسجد كل الناس هاتقول هبل وتفاهة وماسكين في حاجات هايفة .. لكن لو كان الإنجيل اللي حصل فيه كده قدام كنيسة كانت الدنيا قامت ومقعدتش ومليون واحد رفع قضية علي الإخوان والسلفيين وعلي مرسي لأن هما السبب طبعاً وإحتمال تقوم ثورة بسبب كده

ياتري أطفال عندها 10 سنوات عندها شجاعة إنها تعمل حاجة زي كده قدام 15 أو 20 مسلم علي الأقل من غير ما حد يحرضهم أو يوعدهم بمكافأة كبيرة ؟؟ وياتري جابوا المصحف منين ؟؟

Atifhedia Youssef said...

يعملوها الصغار ويوقع فيها الكبار بس الصغار من الاخوه المسحين فى سن التاسعه من العمر دنسوا القران ولكن ابو اسلام رجل كبير فى السن ويعى ما يفعل ومزق الانجيل وداس عليه هل وصل شعب مصر لهذا الانحطاط فى الاخلاق فعلا انما الامم بالاخلاق ما ذهبت فان هم ذهبت اخلاقهم ذهبوا ولقد ذهبنا بالفعل حيث لا نعلم

رابح said...


يتمثل منهج الدراسات الاجتماعية الذي تشرحه ميس نيفين وغيرها من مدرسي مادة الدراسات الاجتماعية في وحدتين الأولي "حياة محمد صلي الله عليه وسلم.. قصة بناء أمة" والوحدة الثانية "الخلفاء الراشدون"، أتسائل , ما علاقة حياة الرسول و الخلفاء الراشدين بمنهج الدراسات الإجتماعية ؟ و هل يأتي مثل هذه الموضوعات في منهج التربية الدينية أم الدراسات الإجتماعية ؟ ليس من المستبعد أن نجد هذه الموضوعلت يتم تدريسها في منهج الرياضيات و الكيمياء و الفيزياء !

gody said...

اطفال وصلت المهزلة انهم يحبسوا اطفال مش فاهمين حاجة فى الدنيا

ربنا يحمي مصر من الفتن said...

محمد صلي الله عليه وسلم نبي المسلمين , وعيسي صلي الله عليه وسلم نبي المسيحيين . وموسي صلي الله عليه وسلم نبي لليهود ... لماذا نفرق بين الرسل لابد من احترام جميع الانبياء .. هذا اول درس يجب تعليمه للاولاد في المدارس .. حتي لما يكبروا يصبحوا مدرسين ومدرسات يحترمون ما يدرسونه وليس في ذلك حرج . وربنا يهدي الجميع ويجب الا يأخذ الموضوع اكبر من حجمه

Aiat Oraby said...

أحيانا يعجز قلمي عن التعبير و هذه مرة من المرات التي أجدني فيها عاجزة عن التعبير من هول الصدمة , مين فيكي يا بلد تبلغ به الجرأة أن يتقدم ببلاغ مثل هذا ... أي عقل و أي قلب الذي يجعل أي شخص يتقدم ببلاغ ضد أطفال ابرياء 9, 10 سنين لم يبلغا الحلم بعد لتكون النتيجة ايداعهم دار أحداث...... مطلوب محاسبة سريعة و تفعيل لروح القانون .... ممكن جدا يكون القانون أعمي و العدالة معصوبة العينين و لكن كل أعمي له قلب و عقل و روح فنحن لا نعيش فقط بعينين

Maged Elnopy said...

امر غريب ولو اتبعنا الطرق التقليديه فى البحث الامر مش حينتهى لآن فيه حد بيعبث بالبلد فعلا لكن اود عدم البحث فيه وتمريره نظرأ لظروف البلد فقط وان كنت ضد هذا الاسلوب لكن ما مالبيد حيله

د ايهاب بكر said...

الوضع في مصر أصبح ملهاة. الجهل بلغ مداه

Tamer Shwky said...

هيا الناس الى ماسكين البلد دى فاضيين للدرجه دى كل المشاكل والازمات الى فيها البلد وعاملين هيصه عشان طفلين 10 سنوات و 8 سنوات والله خيبه على شويه اطفال وجهلاء مساكين دوله

Tamer Nabil Moussa said...


ازيك
ياقطة عاملة اية

ادعوكى لحضور حفل توقيع ديوانى الاول

يسعدنى حضورك

التفاصيل فى المدونة عندى

مع خالص تحياتى