وفاء عامر × كاريوكا


كلها ايام وينتهى رمضان طبعا مع الكم الهائل  الذى تتشبع به الفضائيات من المسلسلات والبرامج مش تابعت غير مسلسلين هما كاريوكا وطرف ثالث .. هتكلم عن كاريوكا لانى لمست في حياة الفنانة تحية كاريوكا رحمها الله الجانب الانسانى البحت للفنانة الجميلة وفاء عامر ربنا يديها الصحة وطول العمر 
تابعت المسلسل من اول حلقة 
تحية كاريوكا فى طفولتها كانت عايشة حياة مرفهة فى وجود والدها لكن بعد وفاته اتبهدلت واتهانت بسبب اخوها الكبير 
 وفاء عامر  بصراحة معرفش حاجه عن طفولتها او عاشتها ازاى او كانت ايه
تحية كاريوكا اتظلمت اوى فى بدايتها تعبت واشتغلت وكانت كل لما تقابل مشكلة او تتصدم فى حاجه كانت بتدى شغلها وفنها لحد ما وصلت وبقت النجمة المشهورة تحية كاريوكا 
وفاء عامر فى اول مشوارها الفنى كانت لسه بتقول يا هادى لكن ازاى واحدة من اول عمل وتتعرف وتبقى اسم وفاء عامر يتردد اتدبرت لها مصيبة بكل خباثة ودهاء كان المقصود منها انها تتكسر لكن رغم حبكة التلفيق فربنا كبير  ومطلع وعارف انها مظلومة وان الايد اللى لفقت لها البشاعة والانحطاط ده ما هى الا ايد الحقد والغل والخبث والجبن فكان الله معاها ونصرها .. وفاء مش استسلمت بالعكس اتحدت وعاندت وقالت يا جبل ما يهزك ريح وقفت وصمدت  ادت شغلها وعاشت لفنها وموهبتها لحد ما بقت النجمة وفاء عامر اللى لما بتمشى فى اى مكان الجميع بيتمنى يكلمها ويسلم عليها 
تحية كاريوكا لما عرفت ان صديقتها عيانة بمرض خطير راحت لها لحد عندها ومنعتها تنزل الشغل وقالت لها مرتبك هيوصلك اول كل شهر وعلاجك اللى بيجى من الخارج هيوصلك برضه مع مرتبك كل شهر 
وفاء عامر فى وقت مش بعيد كنت انا واصحابى بنحضر لمشروع العمر   ، حلم وحياة ، مستقبل وأمل  .. للأسف حصلت أزمة ووقفنا الفلوس خلصت صديقة مننا كتبت استيتوس على الفيسبوك مشروعنا هيضيع بسبب تعرضنا لازمة مفتعلة بايد الغدر والخيانة  خسرنا فيها كل اللى عملناه ونقدر نعمله تانى لكن محتاجين خمستلاف جنيه ... كانت اول  واحدة  رفعت سماعة التليفون وكلمتنى هى الفنانة وفاء عامر وقالت لى بالنص  اوعو حاجة توقفكوا انا معاكو وفى ضهركو اى فلوس محتاجينها  مهما كان المبلغ قولى لى ابعته لك فين وازاى ؟ انا قفلت مع الفنانة وفاء وقعدت اعيط معقول لسه فى ناس بالاخلاق دى ؟ لسه فى حد عنده كم الانسانية ده كله ؟ مش هقولها اى حاجه غير ان جميلك على راسى من فوق .. لكن للاسف تأتى الرياح بما لا تشتهى السفن حلمنا ضاع وحرقوا لنا كل حاجه
تحية كاريوكا وقفت جنب السادات وهو لسه ظابط وكان فى الوقت ده هربان ..  شافت واحد بيجرى فى الشارع  وقفت له بالعربية من غير ما تعرف مين ده والبوليس بيجرى وراه ليه ؟ كان كل همها انها تنقذه من ايد اللى بيطارده حكى لها القصة انه قضى على الخيانة بيساعد فى تحرير مصر من الاستعمار ساعدته واخدته هربته فى الاسماعيلية 
وفاء عامر  فى احداث ثورة يناير رغم انها مش نزلت  مظاهرات التأييد اللى كانت فى مصطفى محمود لكننها مش سلمت من الغباء وحصل لها كل اللى حصل للفنانيين فى الوقت ده من هجوم وتطاول وقلة ادب .. وفاء اتهاجمت بشدة رغم انها كان دايما كل كلامها انا مع مصر انا هدفى هو امن مصر انا مش عايزة غير مصلحة مصر لكن ازاى مش  تركب الموجة  وتسقف وتهلل اتشتمت واتبدهلت ورغم الهجوم اللى حصل عليها كانت من اوائل الناس اللى بعتت مساعدات للمستشفيات الميدانية ومن غير ما حد يطلب منها لكن كانت بتقول دول ولادى دول الامل والمستقبل 
مواقف كتير وحاجات كتير لو اتكلمت عنها مش هيكفينى صفحات المدونة لكن اللى اقدر اقوله امتعتينا يا فنانة بس مش عارفة اقولك يا وفاء ولا يا كاريوكا اصلى حاسة انكو  واحد كل سنة وانتى  بصحة وخير واسعدك الله زى ما اسعدتينا على مدار الشهر .. عيد سعيد يا ام عمر

 

تعليقات

‏قال amirgren
شكرا يا قطة انك عرفتينا على الفنانة وفاء عامر
‏قال حسام
حاسس انك بتوصفى فى ملاك
‏قال مصريه
انتى تعرفى وفاء عامر ؟؟؟ يا بختك
‏قال Sagas
كل ادواها بحس فيها انها طيبة ومظلومة بس مكنتش اعرف انها فى الحقيقة انسانة كدا
ربنا يوفقها للخير دايما
‏قال mido
انا كمان بشاهد كاريوكا من اول حلقة فعلا اداء وفاء عامر فوق الممتاز
‏قال خالد
من كلامك حاسس انك بتحبيها حب غير عادى ياترى الحب ده كله علشان هى الفنانة وفاء عامر ولا علشان وفاء عامر الانسانة
‏قال شروق
هو انا معرفهاش زيك لكن انا بحب كل ادوارها خصوصا ابن الارندلى
‏قال Nora Ahmed
فنانة كبيرة نعتز باننا عندنا فنانة كبيرة زى تحية كاريوكا وبعدين المسلسل مش بتكلم عنها كارقاصة للناس اللى مش عارفه مين تبقى تحية كاريوكا الفنانة دى كانت مناضلة سياسية ونقابية مهمة وكانت تدافع عن رايها حتى ولو كانت هتعتقل لمن لا يعرف تحية كاريوكا فى مهرجان كان تطاولت الممثلة الهوليودية سوزان هيوارد علي العرب فاندفعت تحية كاريوكا تجاه سوزان هيوارد وضربتها بالحذاءويقال أنها بصقت في وجهها.
‏قال ramy ahmed
مبدأ عمل مسلسل لفنانة ومناضلة كبيرة مثل تحية كاريوكا والرقص كان جزء من حياة الفنانة الكبيرة اللى لا يمكن اغفالة ولقد ابدعت وفاء عامر وجعلتنا نحب ونحترم الفنانه المنسيه وجسدت طيبتها وعفتها بشكل مذهل
‏قال أم حبيبة
اسلوبك فى الكتابة وطريقة سرد الاحداث والمقارنة بين الشخصيتين حلو يا قطة
‏قال Max Payn Teto
وفاء عامر انتى حاجه جميله
‏قال abo ahmed
اختيار لمياء الامير تكون ام لوفاء عامر ممتاز لانهم شبه بعض
‏قال sanoo
كاريوكا عامل ضجة جامدة واضح انه هياخد جايزة احسن مسلسل فى رمضان 2012
‏قال محمد سليمان
بما انك قريبة من آل عامر ما تكلمينا شوية عن آيتين انا بعشق اسمها وشكلها بنت زى القمر واعتقد انها اجدع من وفاء
‏قال فاروق
بعد ما شوفت المسلسل تمنيت انها لسة عايشة لكن اللة يرحمها وربنا يبارك لنا فى وفاء عامر ويديها طول العمر لانى من قراءة الموضوع حست ان وفاء نسخة تانية من تحية
‏قال كل التقدير…
كل التقدير وفاء لانكم وهبتم حياتكم لاسعاد كل الناس من القلب شكرا
‏قال سيناوى
ارى ان وفاء عامر تستحق تكريم من الدولة على هذا المسلسل وتستحق تكريم الشعب كله على كل الكلام اللى قالته القطة
‏قال هانى
عجبنى المسلسل ولكنه ظالم للملك فاروق كفي ظلم للملك فاروق الناس لم ترحمه وهوعايش ولا هو ميت
الملك فاروق مظلوم وكفي افتراءات عليه
‏قال شريف
انتى فنانه قديره ولك منا كل تقدير واحترام
‏قال افتراء
معروف مين صاحب تلويث سمعة هذا الملك بانه زير نساء وبتاع خمرة وكل العبر اللي مش هيا
‏قال محمود علاء
ألف تحية لنجمة سطعت فى سماء الفن المصرى
‏قال غير معرف…
(ناصر) افندى ضيع ثروات مصر وخيرها على الدول العربيه النكره للجميل لكى يكون زعيم ولكنه فشل فى كل مكان
‏قال sara
كل سنة والفنانة وفاء عامر بصحة وسعادة
‏قال ام عمر
هى وفاء عامر عندها ولد اسمه عمر انا كمان ام عمر يا بختى علشان طلعت شبهها فى حاجه
‏قال Ayman Sydelahl
والله اتبسطنا معاها واتبسطنا اكتر بكلامك عنها اصل الجدعنه والطيبة بقت نادرة اليومين دول
‏قال مصطفى البنا
كل سنة وانتوا الاتنين طيبين وعيد سعيد عليكو
‏قال سعيد الشيمى
وفاء عامر شكلها زى القمر خصوصا عينيها وصوتها جميل جدا
‏قال د.احمد حسنى
هى حلوة فى الشكل بس مش دلوعة زى آيتين
‏قال عنود
انا عنود من السعودية ومن اشد المعجبين بالنجمة وفاء عامر نجمة تتميز بالابداع والفن الراقى
‏قال غير معرف…
احبك يا وفاء
‏قال مهدى
انا نفسى اتواصل مع وفاء عامر واقولها انا بحبها وبحب طريقتها فى التمثيل
‏قال نهله
فنانة جميلة تستحق كل الحب والاحترام
‏قال فنان من زمان فات…
اول عمل لوفاء عامر كان الزوج اخر من يعلم ومن وقتها تنبات لها بمستقبل مشرق
وصدق ظنى
‏قال nagwa
انجح عمل فى رمضان هو كاريوكا واضح انه مبذول فيه مجهود جامد تحياتى لفريق العمل وللمخرج الشاب عمر الشيخ
‏قال Alhassan Hammad
عمل ممتاز والفنانين كلهم كان رائعين جدا واخص بالذكر وفاء عامر وحسناء سيف الدين
‏قال غير معرف…
للاسف لم تسمح لى الظروف بمتابعة الا بعض الحلقات من المسلسل لكن ستاباعه فى الاعادة بعد العيد مباشرة
‏قال عاشق كاريوكا…
انا من عشاق تحية كاريوكا وكنت من المقربين لها وكل ما وصفتينه يا عزيزتى هو الحقيقة من الطيبة والجدعنة وشهامة ولاد البلد ولا اعرف وفاء ولكن نتفق سويا فى انك قريبة منها وتعلمين من صفاتها ماهو متطابق مع كاريوكا لذلك انحنى احتراما بعد رؤيتى لهذه الكلمات والتى توضح الشبه بين فنانتين من العمالقة تحية من القلب لنجمة النجوم وفاء عامر
‏قال fouaad
كل عام ونجومنا الكبار فى افضل حال
‏قال ramy
قطة انتى بتشتغلى صحفية ؟
‏قال nadin
كاريوكا مسلسل الموسم تستاهل عليه وفاء عامر احلى بوسه
‏قال شاهين
كل سنة ووفاء عامر الانسانة الطيبة الجدعة بصحة وسلامة وبخير وربنا يعيد عليكى وعلى زوك وابنك الايام بكل خير وسعادة عيدك سعيد يا وفاء
‏قال مروان
عيد سعيد يا وفاء كل سنة وانتى طيبة
‏قال غير معرف…
كل سنة وانتى انسانة يا وفاء
‏قال Unknown
انا قبل ما أشوف المسلسل ما كنتش بحب تحية كاريوكا خااااالص لكن لما شفت المسلسل حبيتها اوي الله يرحمها و لا أزال أترحم عليها رغم ان المسلسل ناقص و فيه الكثير من الأخطاء منها على سبيل المثال لا الحصر علاقتها بسامية جمال لم تكن بهذة الصورة بل على العكس كانوا اصحاب و مثلوا مع بعض فيلم حبيبي الأسمر أيضاً الصورة اللي طلعت فيها شادية اثناء تصوير فيلم شباب أمرأة غلط خالص حيث اظهر لنا المسلسل ان شادية تخاف من الظهور امام الكامرا وكانت تحية تشجعها و هذا غير صحيح فإذا عدنا لتتر شباب امرأة ستشاهد ون ان اسم شادية يسبق اسم تحية بل ان تحية شالت الجميل لشادية لانها وافقت ان تمثل دور ثاني فقط من اجل الصداقة التي تجمعهم ببعض كما ان المسلسل فيه شخصيات وهمية مثل جمالات يا ريت لو تم استبدالها بثريا حلمي التي كانت صديقة مقربة لكاريوكا و عاشت معها ست سنوات بالمنزل لترعاها كما لم يتناول المسلسل قصة بنتها بالتبني عطية اللة أيضاً لم يتناول المسلسل تفاصيل خلافها مع فايز حلاوة و كيف انه كان يضربها و يهينها بل طردها من شقتها الى ان قامت سيدة فاضلة من الاسرة الحاكمة الكويتية بإعطاء كاريوكا شقة قي الدقي لتعيش فيها بإختصار المسلسل أضاف كثيرا لوفاء عامر لكنة لم يكرم السيدة الفاضلة تحية كاريوكا و دمتم سالمين
‏قال Unknown
انا قبل ما أشوف المسلسل ما كنتش بحب كاريوكا أبدا لكن لما شفتة حبيتها اوي الله يرحمها و لا أزال أترحم عليها كثيرا المسلسل انا تابعته من اول لآخر حلقة فيه الكثير من الأخطاء منها على سبيل المثال لا الحصر علاقتها بسامية جمال فقد كانوا اصحاب و مثلوا مع بعض فيلم حبيبي الأسمر أيضاً الصورة التى ظهرت فيها شادية اثناء تصوير شباب امرأة غير صحيحة إطلاقا إذ كانت خائفة من الوقوف امام الكاميرا و تحية تشجعها فهذا غير صحيح لان شادية كانت نجمة كبيرة و اذا رجعنا لتتر شباب امرأة ستشاهدون ان اسم شادية يسبق كاريوكا بل ان الحقيقة تقول ان كاريوكا فضلت لسنوات شايلة الجميل لشادية انها وافقت تمثل في هذا الفيلم دور ثاني فقط من اجل خاطر صديقتها كاريوكا و التي كانت شادية تعتبرها أخت كبيرة لها كما ان المسلسل به شخصيات وهمية مثل جمالات يا ريت لو استبدلت بثريا حلمي التي كانت صديقة عمر تحية و عاشت معها في المنزل ست سنوات أيضاً لم يتم ذكر بنتها بالتبني عطية الله و أيضاً لم يتناول تفاصيل خلافها مع فايز حلاوة و كيف انه كان يضربها بل و طردها من شقتها و قامت سيدة فاضلة من الاسرة الحاكمة الكويتية بإهداء تحية شقة في الدقي لتعيش فيها بإختصار المسلسل اضاف كثيرا لوفاء عامر لكنة لم يكرم كثيرا السيدة الفاضلة التى صرت اعشقها كثيرا تحية كاريوكا و دمتم سالمين
‏قال Unknown
انا كمان من عشاق الست العظيمة تحية كاريوكا بس كان نفسي اعرف ما هي تفاصيل الخلاف الذي وقع بينها و بين فايز حلاوة لأن المسلسل لم يتطرق لأي تفاصيل و كأن هذا الموضوع منطقة محظورة لا يجوز الاقتراب منها فنحن جمهورها من حقنا ان نعرف التفاصيل
‏قال Unknown
انا أيضاً من عشاق هذة السيدة العظيمة و لكن كان بودي ان اعرف عن تفاصيل خلافها مع فايز حلاوة إذ ان المسلسل لم يتطرق للتفاصيل و كأن هذا الموضوع منطقة محظورة لا يجب الإقتراب منها!!!!!! نحن كعشاق لهذة السيدة العظيمة من حقنا ان نعرف فهل من مجيب؟

المشاركات الشائعة