عندما تخوض أقذر تجربة انتخابية



لالالالا محدش يفهم غلط انا مكنتش مرشحة للانتخابات البرلمانية ولا اى حاجه لكن لما يبقى فى عيلتك مرشح خصوصا لو كان شخص قريب من نفس سنك لو شخص انت عارف انه طموح وانه فعلا فى برنامجه الانتخابى الفائدة للجميع بتتمنى ان هو اللى يمثلك نظرا لعقله وطموحه وقوة شخصيته بخلاف انه صوت للشباب اللى اتمنينا نشوفهم طول عمرنا ويمثلونا ويتكلموا باسمنا فكان لازم اشارك بدورى حتى لو بوجودى خارج اللجان الانتخابية ، لكن اللى حصل من اول يوم بل من اول ساعه فى الانتخابات البرلمانية كان ينبئ دى ليست انتخابات وانما مسرحية هزلية حيث توجد لجنتى الانتخابيه لاقيت عائلة كاملة لمرشح اسمه نبيل العطار بالدائرة الرابعة لجنة مدرسة الشهيد فاروق نجم منتشرين من اول الشارع اللى فيه المدرسة حتى اخر الشارع وبيجروا وراك فى كل الاتجاهات علم على رمز السهم حيث الرمز الانتخابى للمرشح مش مهم ان الاشكال دى بره اللجنة لكن اللى حصل جوا اللجنة كان حاجه تانية خالص المندوبين داخل اللجنة ماسكين الورقة وصوباعهم على رمز السهم وتلاقى واحد بيقولك على فكرة انت ممكن تعلم على الرمز ده وجنبهم الاخت المندوبة عن لجنة حزب النور فى ايديها ورق الاحزاب وماسكة الورقة تقولك صوتك امانة للاسلام علم على حزب النور ، سالتهم فين يا جماعه القاضى اللى هنا شاوروا لى على شاب فى العشرينات قاعد فى جنب وفاتح الفيسبوك على اللاب توب وقاعد يشرب شاى بلبن ولا فى دماغه الهوا روحت اقوله اللى حصل من السادة المندوبين

ابتسم بهدوء وقالى طبعا دى مخالفة كبيرة ميرسى انك بلغتينى ... طبعا مشيت من قدامه متغاظة ورحت اتصلت باللجنة العليا للانتخابات واتصلت بمركز المخالفات الانتخابية والاتنين كانوا مهتمين جدا بسماع شكوتى وكل واحد وعدنى انه هيعمل اللازم لكن واضح ان عمل اللازم ده بينتهى بعد ما تقفل معاهم السكة ... توجهت للجنة مدرسة الثانوية بنات الدائرة الرابعة ايضاً .. وكان المنظر الغير متوقع تماماً كميات النقاب والخمار اللى بتدعو لحزب النور والحرية والعدالة فوق الوصف .. لكن يفوقهم فى عدد المجندين لمرشح فئات اسمه حسن ابو الناس وكلهم ستات واتنين ملبسهم نقاب واقفين يدعو له فى وسط الاخوات بتوع حزب النور .. عايزة واحد ابن كلب يقولى ان الرشاوى الانتخابية انتهت ؟ انا بعينى شوفت انصار حسن ابو الناس بيدفعوا لكل منتخب 50جنيه والمرشح نفسه داخل خارج داخل اللجنة وبيتنطط وكأنه ضمن المجلس فى جيبيه الشيمين وبالصدفة البحتة سمعنى بتكلم مع واحدة بقولها ليه مش ننتخب الشباب المفروض هما اللى فى ايديهم نهضة مصر لو مش فى دماغك مرشح معين ممكن تنتخبى رمز النسر راح لافف بسرعه البرق وراجع لى انتى ازاى واقفه توجهى الناس لمرشح معين قولت له حقى زى ما انت مجند كتيبة ستات والسادة الاخوان وحزب النور نازلين برجالتهم وستاتهم وولادهم انا كمان من حقى اتكلم فى اللى يخصنى كان رد السيد المرشح المحترم هو سب الدين ويحلفنى بامى وحياة امك لاوريكى مش بصيت ليه خالص لكن وجهت كلامى للناس اللى كانت واقفه وقولت لهم هو ده المرشح اللى هيمثلكو فى مجلس الشعب ؟ دى اخلاق مرشح محترم .. كان واقف شخص رد قاله لما موقف زى ده مش عارف تتصرف فيه وانت اللى مفتعله امال لما تدخل المجلس ويحصل مشكلة كبيرة هتعمل ايه فكان رده انه وقف لى اتنين شباب وقالهم خليكم وراها وان اتكلمت عن رمز النسر اعملوا اللازم معرفش ايه هو اللازم لانى رحت لظابط الجيش وبالطبع اتباعه ورايا وقولت له الشباب دول بيقلوا ادبهم وماشيين ورايا من الصبح وانا جايه انتخب ومش عارفه بسببهم .. تم احتجازهم ولاقيت غيرهم ظهروا بسرعه البرق .. فى نفس الوقت اللى انصار الحرية والعدالة رجالة وستات واطفال شايفين شغلهم بكل ذمة وضمير فسالت واحدة منهم انتوا عددكو كتير كدا ليه ؟ هو كل دول قرايبهم مرشحين ؟ قالت لى ولا واحد ليه مرشح بس جميع الاخوة والاخوات فى الجماعة عائلة واحدة واى مرشح من الجماعة فهو اخ لينا ولازم ندعى له .. قولت له ما تدعى لنا معاكى قالت مينفعش لو انتى دعيتى لنا عادى لاننا لا نتعارض معاكى فمرشحكو فئات فردى ولم يتبع اى حزب اما احنا لينا مرشحين فئات ولو دعيت لمرشحكو ابقى خائنة للجماعة التى انتمى لها ونعم الانتماء يا اوختشى ... خلصت الانتخابات الساعه9مساءاً وانتقلت الصناديق لمكان الفرز .. فكان من الجماعة اتباع حزب النور السلفى والحرية والعدالة الا انهم تقريبا نقلوا محل اقامتهم امام لجنة الفرز واخدوا بطاطينهم واكلهم وشربوهم وراحوا ناموا فى الشارع لكن المفاجأة الكبرى اللى حصلت جوا اللجنة هى خروج جميع المرشحين الغير تابعين لا لحزب الحرية والعدالة او حزب النور بما فيهم اللى وقف وسب لى الدين وهما مش مصدقين نفسهم ازاى كل الصناديق جوا حرية وعدالة ؟ ومين اللى له مصلحة فى تبديل الصناديق ؟ ومنين جت البطاقات الانتخابية المقطعة والبطاقات الفاضية اللى كانت فى ايديهم ولما صوروا الورق اللى يدل على المهزلة اتجمعوا حواليهم واخدوا موبايلاتهم وحذفوا من عليها الورق المقطع والورق الفاضى وقالوا لهم لو رجالة اثبتوا انكو شوفتوا حاجه !! علشان ايه شريط اخبارى على التلفزيون تزوير فى اللجان الانتخابية لصالح حزب الحرية والعدالة ؟ وعلشان ايه لما يبقى مرشح ضامن على الاقل عدد اصوات نص دايرته مش يلاقى ولا ورقة ليه فى الصناديق الانتخابية ؟ بعد المهازل اللى حصلت واللى لسه بتحصل نار الحزب الوطنى ولا جنة الاخوان والف مبروك ياشعب على العرص الديموقراطى المحلى بالخازوق الاخوانى

Comments

sanaa said…
انتى لسه شوفتى حاجه
ده انتى حتشوفى ايام سودة
مراد said…
ما انتى رايحه تدعى لمرشح ضده كويس انه سب لك الدين بس
تجربة حقيقى فانتاستيك
هى تجربة قذرة على حد قولك لكن يكفى مدى الاستفادة منها
masrawy said…
المرشح اللى وقف قل ادبه عليكى ده معملتيش له محضر ليه ؟ ده كان ممكن يتشتطب خالص
Anonymous said…
انا انتخبت هانى من السعودية
صوتى راح فين
صوتى راح فين
ده انا اخدت اجازة يوم كامل علشان خاطره والنبى يا حنان خليه يدور على اسم مهاب علي اصل صوتى ده امانة ولازم يلاقى الامانة
خلصنا من تزوير الحزب الوطنى طلع لنا تزوير الاخوان ربنا ينتقم منكو يا كلاب
Tamer Mohamed said…
هى الدعاية لانتخابية دى مش ممنوعة فى ايام الانتخابات ؟ ازاى الاخوان والسلفيين كانوا هاجمين بالشكل البشع ده على اللجان ؟
امال صمت انتخابى ايه اللى فالقينا بيه ده ؟
ahmea kamal said…
انتى قاعدة تعيطى على تزوير الانتخابات والاخوان اللى راعبينك
فينك يا بتاعة حقوق الانسان من اللى بيحصل قدام مجلس الوزراء مسمعناش صوتك يعنى
والله حتى لو شديتى فى شعرك ولو قلعتى هدومك زى علياء المهدى

والله هي ايام الاسلام باذن الله
مسلمة said…
خير ان شاء الله واضح جدا ان الاخوان والسلفيين سوف يكتسحوا فى المرحلة الثانية اكثر كثيرا من المرحلة الاولى الحمد لله وعقبال المرحلة الثالثة
يارب احفظ مصر دولة عربية مدنية بمرجعية اسلامية
amany shalby said…
حسن ابو الناس ؟
والنبى ده اسم مرشح ولا واحد من بتوع اصلح بوابير الجاز انا ؟
ان شاء الله الاخوان و السلفين مكتسحون ومنورين برلمان الاسلام
ان طعنوا في ذكاء الشعب المصري و قالو امي لا يقراء فهل هكذا الاطباء حين اختارو الاسلامين لنقابتهم و كذالك المهندسين و العلميين و المدرسين و الصيادله و.................. افيقو يا ليبرالين
اليوم عيد لوكان لنا عيد ثالث لكان اليوم عيد
ايه ده كله حريه وعداله ما فيش حد تاني
ما اشبه الليلة بالبارحة ولا عزاء للعلمانيين واللبرالييين
محمد said…
المهم ان يجتمع المصريين علي قلب رجل واحد لأن التنازع يؤدي الي الفشل كما قال الل تعالي (ولا تنازعوا فتفشلوا و تذهب ريحكم ) يجب انا تتوحد كل القوي من اجل مصلحة واحدة هي انقاذ مصر من كبوتها لكي نرجع الي الصدارة و ارجو من الأسلاميين ان يكونوا قدوة صالحة للمجتمع و ان لا يفرحوا كثيرا بهذا النصر لان المسئولية كبيرة جدا و المعركة شرسة
alaa said…
ياأخوان وياسلفيين :اعذروا الليبراليين والعلمانيين والشيوعيين والمسيحيين.. لهجومهم الاعلامى عليكما ..فالهزيمة قاسية ..ولم يتوقعوا أن المصريين مسلمين لهذه الدرجة
maher said…
مش مهم مين سلفين اخوان ليبرالين عفريت ازرق المهم انه اللي يدخل البرلمان يتقي ربنا في كل الناس وفي مشاكلهم وميبقاش همه علي كرشه
zina amer said…
نبيل العطار مين اللى اهله عايزينه يدخل المجلس الراجل عنده مليون سنة وممكن يموت بعد 6 شهور يبقى نعمل انتخابات وندور على واحد مكانه من تانى فاضيين له احنا ورانا بلد عايزين نبنيها
الف خسارة يا هانى كم كنت اتمناك وجه مشرف لبرلمان شبابى محترم
ربنا يستر انا خايف علي مصر
Anonymous said…
‎1- اذا اردت الغاء السياحه .........اختار ........ الاخوان والسلفيين
2- اذا اردت عوده عصر الجوارى ....... اختار ......... الاخوان والسلفيين
3- اذا اردت الغاء العلم والتعليم ....... اختار ......... الاخوان والسلفيين
4- اذا اردت محاربه كل وسائل التكنولوجيا .....اختار ..........الاخوان والسلفيين
5- اذا كنتى يا عزيزتى عوره وناقصه عقل ودين .......اختارى ........الاخوان والسلفيين
... 6- اذا اردت استخدام الناقه والجمل فى الترحال ....... اختار ........ الاخوان والسلفيين
7- اذا اردت الحياه فى الخيام ......... اختار ........ الاخوان والسلفيين
8-اذا اردت الغاء الطب .........اختار.......... الاخوان والسلفيين
9-اذا اردت الرجوع لعصور الجاهليه والارهاب .......اختار ........ الاخوان والسلفيين
10- اذا اردت الديكتاتوريه وتكميم الافواه .....اختار ......الاخوان والسلفيين
اللهم انى بلغت .......اللهم فاشهد
Kontiki said…
كانت تجربة مرة لدرء الفوضى والتخلص من ثورة الفوضى لكن واضح اننا بقينا بين شقى الرحى

Popular posts from this blog

قميص دهشور

كل تحرش وانتوا طيبين