الراجل الشرقى هو !؟



لما سألت السؤال ده فى ناس قالت لى الرجالة ماتت فى 73و ناس قالت لى هو اللى بيقف فى الباص للمرأة ليس من باب الإتيكيت ولكن من اسس الاخلاق وناس تالته قالت شوفى مسلسل بين القصرين هو ده بقى الراجل الشرقى فى كل معانية من غير ما تسألى كتير ولا تدورى .. بس انا ماليش دعوة ب73والباص مش فيه حد بيقف لا الشاب الصغير بيقف للراجل الكبير ولا الراجل بيقف للست لا من باب الاتيكيت ولا من باب الاخلاق ولا حتى من باب زويلة .. واحنا دلوقتى ملناش علاقة بسى السيد لان من زمان اوى اختفت من الشاشه صورة امينة الست الضعيفة المغلوبة على أمرها .. حتى ولو كان فى منها بقايا لازالت موجودة لازم يتم محوها .. انا ليا دعوة بواقع بنعيشه ونتعايشه .. والواقع ده بيقول ان
الراجل الشرقى هو اللى كل نظرته وتقييمه للمرأة من جسمها وشكلها وطولها ولون شعرها وليس من عقلها وثقافتها وطريقة تفكيرها .. الراجل الشرقى اتربى على ان التعبير عن مشاعره ضعف ودموعه يااااى كدا بقى زى الستات والرجالة منه مستعرين وبالتالى باتت نظرته للمرأة انها الضعيفة اللى اتخلقت لخدمته وتنفيذ كل رغباته ومتطلباته مهما كانت وأياً كانت ..
الراجل الشرقى تم تلخيصه فى عضو ذكرى وبالتالى باتت معاملتة مع المرأة على أنها مجرد عضو تناسلى خلق له ومن اجله
الرجل الشرقى هو اللى لو شريكته اشتكت منه يكون دايما هو الى على حق مش كفاية يعنى عبر لها عن شعورة وقالها بحبك يوم لما قابلها هى اسطوانة كل يوم هيقولها بحبك دى حاجه تقرف
الراجل الشرقى هو الى يفضل يلف حوالين تفسه السبع لفات لمجرد انه يسمع كلمة بحبك ومجرد ما يسمعها خلاص دى بقت حاجه سهله يروح يدور على الاصعب
الراجل الشرقى اللى لو مسك ايد الانسانة اللى ارتبط بيها فى اى مرحلة قبل الجواز يكون الناتج إنه يسيبها اصل ايه ضمنه انها مش عملت كدا مع حد قبله ؟ ويمكن تبقى فى بيته وتعمل كدا مع حد بعده
الراجل الشرقى اللى بيروح يدفع فلوس لفتاة ليل وبعد ما تمشى يقول على نفسه سبع الرجال ويقول عليها عاهره الراجل الشرقى اول ما يعرف واحدة بدل ما يتكلم عن عقله وثقافته وطموحه بيعرفها انه يعرف قبلها 20واحدة
الراجل الشرقى هو اللى فاهم فى السياسة وفى الدين وفى الثقافة وفى الهندسة وفى العلوم وفى كل حاجه ولما تتكلم معاه تلاقيه ولا اى حاجه
الراجل الشرقى هو اللى لما يتحرش تقوله بتعمل كدا ليه ؟ يقولك هى اللى عايزة كدا ولما تقوله لوعايزة مش كانت هزأتك ومسحت بيك الارض يقولك ما تشوف طريقة لبسها او يبرر بانه عنده كبت ومش عارف يعمل ايه ؟
الراجل الشرقى هو اللى قام بثورة قبلها كان بيخاف من ظله ولو شاف عسكرى مش امين شرطة تلاقيه بيعمل بيبيى على نفسه ولمجرد انه نزل الشارع ولقى جنبه اتنين او تلاتة تلاقيه بيقول انا اللى ضربت الظابط اللى قبض عليا يوم ما كنت بسرق او ببلطج او ايا كان نوع الجريمة اللى عملها
الراجل الشرقى هو اللى بيمشى يتلفت حواليه ولما يشوف عمه وجلابيه تلاقيه قلب راجل دين ولما تكلمه عن 25يناير يقولك انا اللى عملت لمبارك المشنقة فى ميدان التحرير وانا اللى عملت له بانر عبارة عن صورته وعليها جذمة وانا اللى كتبت له ارحل بقى يا ابن المتناكة وبعدها رحل
الراجل الشرقى هو اللى صوته عالى ويتشاجر لاتفه الاسباب وفى اى وقت واى مكان ولو رديتى عليه تبقى مش متربية اصل البهايم اللى ربوه قالوا له ان صوت المرأة عورة وانه راجل من حقه يقل ادبه فى اى وقت وكل وقت ومفيش مانع طول الوقت
الراجل الشرقى اللى فاكر الرجولة تتلخص فى غرف النوم وعليه اصبحت كل اعلانات التلفزيون عن الحبة الزرقا والخضرا وحامد اللى بقى جامد
الراجل الشرقى اللى عايز يعيش دور الواعى الفاهم والروش والكوووول وفى نفس الوقت متربى ومؤدب ومحافظ لحد ما اصبح كالماء لا لون ولا طعم ولا ريحة
الراجل الشرقى هو الشيئ ونقيضه حتى اصبح كالأجسام الغريبة التى دائماً ما تكون مصحوبة بالصديد والتقيحات

تعليقات

‏قال mag
يا مفتريييييييية
الراجل الشرقى مفيش اى حسنة ليه خالص يا قطة يا مفترية يا قوية
‏قال غير معرف…
مين مبعزقك جاية تطلعى غلك فينا
‏قال مصرية
ربنا يكرمك ويبارك لك زى ما انتى واخدة لنا حقنا
‏قال مصرية فى الخارج…
التربية يا حنان يتوقف عليها كل حاجه يعنى لو واحد متربى كويس ومتربى ان مفيش فرق بينه وبين اخته بيطلع يحترم المرأة لكن لو متربى على انه الولد المدلل ولابد يأمر فيطاع تشوفى منه جميع ما ذكر واكتر مما ذكر كمان
‏قال karim
انتى اية حكايتك يا قطة لية ديما تظهرى الاشياء الوحشة حتى لو كتير, ما احنا ناس متجوزة و متربيين وولاد ناس و محترمين ورجالة, بطلى تشوفى الوحش بس,كل احجات دية موجودة فى كل زمان و مكان بس الفكرة انها بتظهر بنسبة اد اية, انا لازلت على موقفى احنا شعب مش بتاع حريات و لا الكلام دة , التاريخ بيقول كدة لازم نتمسك من حديد, علشان احنا فوضويين من زمان, واسالى سعد زغلول واللى قبلة وشوفى التاريخ و انتى تعرفى, بجد ربنا يسترها
‏قال Ms Venus
كل اللى قولتيه موجود فعلا يا قطة

وجايز فى الاغلبية


لك بردو فى ناس كويسة

ده لازم
‏قال Desert cat
mag

لالا خالص يا مجدى هو انا اقدر اغلط فى جمال ورقة وشياكة واناقة الراجل الشرقى ياريته ينقرض بس
‏قال Desert cat
Anonymous

لا عاش ولا كان اللى يبعزقنى يا كابتن مجهول
‏قال Desert cat
مصرية

هههههههههههه
اى خدمة يا قمر انت تؤمر
‏قال Desert cat
مصرية فى الخارج

التربية احيانا بتكون كويسة لكن بيخرج للمجتمع يتعلم منه جميع ما ذكر واكثر يا قمر
‏قال Desert cat
karim

المفروض اظهر ايه طيب يا كريم لو الحاجة الحلوة فعلا موجودة مش هدور على الوحش علشان اظهره ما هو مش معقول يبقى عندى قطعة جاتوة فى نصها ملح واتغاضى عنه لازم اصلحها واخليها كلها بالطعم الحلو اللى على حسب المذاق
مقدرش انكر ان فى ولاد ناس ومحترمين لكن دول عددهم كام ؟ وغالبا مش بيستمروا فى البلد بيهربوا منها
‏قال Desert cat
Ms Venus

انا ما نكرتش الاغلبية يا فينوسة لكن فى نفس الوقت الاغلبية هى اللى فوق السطح

المشاركات الشائعة