صاحبى وخريطة الأمن العام

المفروض كنا نتكلم فى موضوع مختلف خالص لاقيته بعد ما سلم بيقولى ممكن ورقة وقلم ؟ قولت له نعم ؟ هو انا ها اخد درس الاملاء دلوقتى ؟ قالى مش بهزر ورقة وقلم وركزى معايا .. قولت له حاضر ياريس .. قالى فعلاً إحنا حنبدأ بالريس ... اترسمت على وشى 20 علامة تعجب ومحدش يسألنى عرفتى عددهم إزاى هو كدا وخلاص .. واسترسلت فى الكلام انت ناسى يا حبيبى اننا عايشين اصلا من غير ريس ؟ قالى طيب ما تيجى نرسم خريطة علشان لما يجى لنا ريس نكون عارفين هو بيعلم ايه وموجود هنا ليه ؟ قولت له خلينى وراك لما نشوف .. قالى طيب احنا دلوقتى لو هنبص على قمة الهرم هنلاقيه مقلوب .. قولت له بمعنى ؟ قالى عندك نموذج مثلاً كوزارة الداخلية ... المخبر فيها بقى اعلى من الظابط ... والناس بتقوله يا بيه وياباشا سيبك من اللى حصل فى الفترة الاخيرة لأن لو فضلنا على كدا تأكدى ان كلها ايام وهنرجع كما كنا ... قولت له ياريت نرجع كما كنا .. قالى انتى باصه لنفسك فى مراية وبتتكلمى فى ناس اغلب من الغلب الناس دى لازم تتساوى بغيرها ... اوك كمل انا معاك .. قالى لو عايزين فعلاً نظبط الهرم ونخلى قاعدته تحت وقمته فوق ... يبقى نبتدى بالرئيس وده منصب شرفى هو رمز للدولة ووجهة للتعامل مع العلاقات الخارجية ... بالنسبة لرئيس الوزراء ده بيكون من اختيار الرئيس .. ليه مش يكون بالإنتخاب ؟ قولت له كل لما نيجى نغير حكومة هنعمل انتخابات كدا مش هنخلص .. قالى ماشى خليه بالاختيار بس لازم يبقى عندى وكيل اول وزارة للصادر ووكيل اول وزارة للوارد الصادر يبقى انتخاب والوارد يبقى اختيار او العكس ... فى الحالة دى اللى جاى بالانتخاب هيراقب اللى جاى بالاختيار والاتنين مش هيقدروا يسرقوا .. بنفس التسلسل الهرمى فى عندك وكيل تانى لكل منطقة واحد اختيار والتانى انتخاب وبكدا الوزارة بتحكمى نفسها وبتحافظ على الصادر والوارد بنفسها ... نروح لوزارة الداحلية ونبتدى بامن الدولة .. قولت له مالهم دول ناس محترمين قالى مقدرش اغلط فيهم علشان فعلا محترمين لكن ليه يروح يجيب المختلف فكرياً ويحجزه عنده ؟ قولت له مش يمكن افكاره دى تكون مخربه وتاثر فى غيرة والبلد تولع فى بعضها ؟ قالى وليه بدل ما يحجزة لحد ما يغير فكره مش تكون مناقشة افكارة دى علنيه بمعنى ان كل 3 شهور او 6 شهور يكون فى برنامج تلفزيونى يتعرض فى مواعيد مختلفة واوقات مختلفة تتيح للجميع انه يشوفها ونناقش الفكر اللى ظهر جديد ده لو فكر مخرب الناس بنفسها اللى هتبعد وهتطلب بمحاكمة الشخص ده ولو فكره كويس ليه مش يكون فيه خير للغير ؟ قولت له ده لو فى شعب مثقف وواعى مش شعب اهبل كلمه توديه وكلمة تجيبه .. قالى انا مش معارضك لكن لازم يبقى فى برامج توعيه وتثقيف للناس قولت له ووعيناهم وثقفناهم بس ده امن قومى ازاى كل قضية امنية اعرضها للناس والدنيا كلها تتفرج علينا ؟ قالى الامن القومى يتمثل فى التجسس ودى مش شغلة امن الدولة دى شغلة المخابرات .. قولت له معلشى لو احنا الاتنين بنشتغل دكاترة وجه فى المستشفى حالتين فى وقت واحد وانا جيت اساعدك وقتها انت هتقولى لاء دى مش شغلتك ؟ قالى لو انت نفس تخصصى هشكرك لمساعدتى ونخلص الضغط ده سوا لكن مش تتسلى عليا كل شوية تيجى انتى تعالجى لى الناس .. قولت له وافرض انت اللى حبيت تريح دماغك وقولت هتفرغ انا للأمن الحارجى وخليكى انتى فى الداخلى وبدل ما كنت باساعدك بقيت بتفرضها عليا ؟ قالى فى الحالة دى تروحى قايلة لى انا مهمتى تتلخص فى مهام معينة ... نروح للنبتشطية .. لو واحد داخل القسم يعمل محضر لو دفع لامين الشرطة 20 جنيه بيظبطه لكن لو خلينا استمارات عبارة عن اسطامبا واحدة ومكتوب فى الترويسة الاسم والعنوان والمشكو فى حقه برضه اسمه وعنوانه .. وقصاد نوع الجريمة مربعات فراغ ويتعلم صح قصاد الجناية اللى انا جاي اشتكى بسببها يعنى مثلا خطف او اغتصاب اعلم فى المربع اللى قصادها بعد كتابة البيانات اعلاه وبكدا اتساوى المواطن العادى مع المواطن اللى بيدفع .... نروح لوحدة تنفيذ الاحكام .. هو مين اللى بيصدر الاحكام دى ؟ قولت له المحكمة قالى حلو طيب ليه مش تكون المختصة بيها المحكمة ؟ ليه بتنزل المباحث مع تنفيذ الاحكام ؟ قولت له علشان المباحث بتكون عارفه المنطقة لكن اغلب حملات تنفيذ الاحكام بتكون من اماكن مختلفة ... قالى وكمان لزيادة عدد القوة المرافقة يبقى انا مش محتاج عدد كتير وهنزل تبع المحكمة يبقى مش محتاج للمباحث فى حاجه .. يبقى كل واحد كدا هيلتزم باختصاصه .. قولت له ياريييييت اصل ظباط المباحث دول اكتر ناس مظلومين ممكن ينام فى الشغل 4 ايا متواصل قالى ماهو الغرض تخفيف الضغط علشان تعامله مع المجرم يكون افضل ... نيجى لحوارات التحرى اللى بتبتقى فى الشارع دى .. بقى جنب علامات التعجب اللى على وشى استفهام .. قالى هوضح لك انا مثلا نازل اشترى كيلو لبن قابلنى بوكس فى الشارع بطاقتك طيب تعالى بتاخد ابيت عندهم 24 ساعه واتسجل عندهم تحرى . قولت له وايه اللى منزلك من غير اثبات شخصية ؟ قالى ما انا تحت البيت .. قولت له خلاص اطلع جيبها من البيت .. قالى مش مدينى فرصه اعمل ايه ؟ قولت له تبقى غلطان وتستاهل تتسجن ... الحوار كدا خلص بينا انا عجبنى التسلسل الهرمى فعلاً لحد تساوى المواطنين فى اقسام الشرطة لما يحصل تعدى او اى جريمة لاحدهم فيما حلاف ذلك حسيت انه استهلاك محلى ... ياترى مين رأيه ايه ؟

تعليقات

‏قال marwa
صاحبك ده دماغه حلوة يا قطة
سلامتنا لزوما
‏قال غير معرف…
امن الدولة ناس محترمين
ده انتى عندك فيران فى عقلك
‏قال samir…
حلو التسلسل الهرمى دى بس انا معترض على اختيار اى مسئول
احنا مش بهدلنا نفسنا علشان يتفرض علينا حد تانى بعد كدا اى حد لازم يكون باختيار الشعب
‏قال روقان…
انا شايف ان الكلام ده كبير ومفيد لكل الشعب المصرى ليه صاحبك ميقدمش اقتراحاته دى للمجلس الاعلى للقوات المسلحة يا قطة
‏قال Desert cat
marwa

كل اصحابى دماغهم حلوة يا مروة
بس على فكرة ده مش زوما عموما سلامك وصل يا قمر
‏قال Desert cat
Anonymous
ميرسى لزوقك يا زوق
انت بقى عقلك فيه بقر ولا ايه الحوار
‏قال Desert cat
samir

هو انا يا استاذ سمير اصلا ضد اغلب الكلام المذكور فى البوست لسبب بسيط جدا ان الشعب ده اصلا شعب لسه قاصر ميعرفش يعنى ايه ينتخب اللى فى مصلحته
‏قال Desert cat
روقان

صدقنى قولت له نفس الكلام ده
بس هو مش ينفع يقدمه طبيعة شغله ما تسمحش

المشاركات الشائعة