ميـــ6ـــدان التحرير



احب اوجه الشكر لكل القابعين فى قاعدة التحرير العسكرية حيث أنهم الهمونا الأفكار لمشاريع إستثمارية ضخمة سوف تعود على البلد بالنفع العظيم .. فمنذ اليوم لم يقتصر ميدان التحرير على المظاهرات فقط .. كلا نوو البته بل كل من يريد الاحتفال باى مناسبة ( خطوية - زواج - سبوع - طهور )مش حتفرق فالميدان ميدانا هو حد ليه عندنا حاجه .. و بعد عقد القران الذى تم اليوم حيث كان اليوم مكرر للصلاة على روح الشهداء بس مش مشكلة هذه نقرة وهذه نقرة أخرى احنا نصلى وبرضه خلونا نفرح ونهيص وبعد ان اجرى العروسان اليوم عقد القران فى انتظار الخبر القادم وهو ليله الدخلة برضه بس بلاش ميدان التحرير يا جماعه خلوها عبدالمنعم رياض .علشان الدولة تساعدكو بتخصيص مكان صغنون كدا فى قلب الميدان لعمل الدخلة وزى ما كان شهود كتب الكتاب مائة من الألف مصرى وأجنبى عايزين يوم الدخلة بقى مظاهره مليونية علشان الشعب المصرى كله يبقى شاهد ... وزغروطة للعروسين ... وعلي ضوء ما تقدم انا اطالب وأهيب بالمسؤلين سرعة البدء والعمل الفورى فى إنشاء مكتب لتلقى طلبات الزواج وتوفيق راسين فى الحمام قصدى فى الحلال ؟ ألا بمناسبة ذكر الحمام صحيح بتوع قاعدة التحرير العسكرية بيعملو حمام فين ؟ نرجع للمشروع بدل الريحة المقرفة دى .. وكمان مسجد صغنون ومأذون ديلفرى لعقد القران وبجواره كنيسة نظراً لتجسيد الوحدة الوطنية لعمل اكليل او ماشبه من العابدات لأى من الجانبين .. وقد أتانا إقتراح بأن أحدهم يريد أن يأخذ توكيل صناعة العلم المصرى .. كما افادنا مراسلنا من قاعدة التحرير العسكرية اونكل عبدو بتاع الشاى انه عايز السادة المسؤلين يعملوا له كشك صغنون بدل ماهو قاعد على الرصيف كدا لعمل الشاى والقهوة للسادة المتظاهرين .. فراحت طنط ام محمود قالت انها مش اقل منه علشان دلوقتى فى مساواة وعدالة وانها لازماً وحتماً ولابد يتعمل بوفيه كبير بقى علشان تعمل للعيال اللى هناك شندوتشات حلاوة بالقشطة وتعهدت انه فى حالة موافقة السادة المسؤلين البوفيه هيتفتح 24ساعه على مدار اليوم أوم ايه راح المعلم عكوة قال انه لازم يتوافق له على عمل قهوة هناك علشان الشيشة والذى منه فراح اونكل عبدو قاله انت بتقطع عليا ولا ايه ؟ وقامت خناقة ولم يتدخل الجيش لفض هذه الخناقة حيث أن الاتنين مصريين زى بعض .
نتيجة حوار الإخوان مع نائب رئيس الجمهورية انهم مبسوطين وفرحانين ومظأططين ان حد عمل لهم قمية واعتبار وراحوا متنهدين تنهيدة كبيرة ما تسمعونا بقى تسقيفة امال ... وراح طالع محمد مرسى المتحدث الرسمى وهو فى قمة الانشكاح ويقول هذه بداية خطوة جديدة وان لم يكررها بقى النظام مرة تانية فيهنضموا من تانى للشعب هيهيهيهييييييي يعنى مجرد ا حد يقول لكو بستك عليه تجروا تاخدوا العضمة اللى اترمت لكو ؟ وفى سياق اخر اكد برضه على عدم إنسحابهم من الشارع حيث أن الشارع بتاعهم وناسبنا الحكومة وبقينا حبايب

تعليقات

‏قال للتخفيف من تقل دم كتاباتك اليومين دول…
عاجل : قصر العروبه : نظرا لحالة الرفض القائمة في الشارع المصري. الرئيس مبارك يطالب الشعب المصري بالرحيل.
‏قال strategicalone
احسن حاجة يا قطة ان اللى كنتى فاكراهم احلى ناس طلعوا اوسخ ناس وشيلتيهم من الهامش
برضة الايام السودة بتعرفنا على الناس وحقيقتهم
‏قال غير معرف…
حد يفهمني علشان مش فاهمة أي حاجة. اللي أنا فاهماه هو إن الغالبية العظمى مع التغيير والاصلاح بس الاتهامات على اخرها بين كل اللي اتفقوا على إن مصر تأتي أولا. ناس بتقول إن اللي في ميدان التحرير عملاء وناس بتقول إن اللي رجعوا لشغلهم وحياتهم خونة.
طيب اختلفنا في الرأي حول التعامل مع المرحلة القادمة. بس ليه بنشتم بعض؟ شباب 25 يناير مع كل احترامي لهم وتقديري. عمرنا ماحننسى اللي عملتوه وعمر الشهداء مادمهم حيتنسي. بس أنتم بتموتوا علشان رايكم يتسمع ليه بترفضوا الرأي الاخر؟ الناس اللي بتقول كفاية كده برضه مصريين ووطنيين. ليه رافضين تسمعوهم؟ أنتم مش شايفين إن ده ضد كل اللي بتنادوا بيه؟
على فكرة أنا مش ضدكم أو ضدهم. أنا حيرانة علشان ماعنديش كل الحقائق وبعيدة عن مصر. مش عارفة اكون راي واضح.
أختي زعلانة جدا من وصف الجيل السابق بالجبن وبتقولي لولا اللي عملناه ماكانوا يقدروا يثوروا. بتحكيلي عن زمايلها في الجامعة اللي كانوا يومين معتقلين ويوم بره. بتحكيلي عن حفلات الشيخ إمام اللي كانوا بيحضروها ومش عارفين حيباتوا فين. زعلانة من وصف ثورة 19 بأنها تافهة بالمقارنة بما يحدث الان. بتقولي لولا إلهام ثورة 19 ماكانت ثورتنا الان. زعلانة من وصفها بالجبن والعماله لانها ترى ان كرامة مصر تستدعي خروج رئيس مصر بصورة مشرفة. بتقولي ده رأيي غلط أو صح ممكن لكن يبقى أول حاجة أسمعها من الثورة الجديدة هي مصادرة رأيي؟ بتقولي ليه المطالبين بالديمقراطية والحرية ما عندهمش مساحة للديمقراطية والحرية اللي بينادوا بيها؟ أختي اللي بحكيلك عنها إنسانة جميلة مصدر حب واحترام وإلهام لكل اصدقائها وجيرانها.

في خلال رحلتي لمحاولة الفهم وتحديد الاتجاهات اجد نفسي ممزقة بين الاشاعات والاتهامات. اعترف بقصوري الشديد في فهم مايحدث بصورة واضحة. للأسف أنا - كما وصفني أحد اصدقائي - I'm flip flopping. أنا كنت أتمنى أكون واضحة ومحددة زيك يا قطة. بس أنا مش عارفة اتخذ راي محدد. ماينفعش يكون رأيي مع مصر امنة وحرة وبس؟ لازم اختار بين إني أكون خائنة أو عميلة؟ طب أعمل إيه لو أنا مش ده ولا ده؟
‏قال غباء المشوهين…
في بادئ الأمر، أجمعت وسائل الإعلام هذه -إلا القليل منها- على انتقاد المحتجين بل والسخرية من حركتهم واتهامهم بإثارة القلاقل والشغب رغم الطابع السلمي الواضح لحركتهم، لكن الأمر سرعان ما تغير ولكن ليس بوتيرة واحدة، حيث يمكنك أن تلمس في وسائل الإعلام الحكومية تغيرات شبه يومية ترتبط بالموقف ومدى تقدم الثورة أو قدرة النظام على التقاط الأنفاس.

بعد أيام من اندلاع الشرارة وبعدما ظهرت قوة الثورة وإصرار الشباب القائمين عليها، غيّر التلفزيون المصري كثيرا من لهجته إزاءها، وبدأ يظهر تفهما لها، لكن ما إن هجم "البلطجية" على المتظاهرين حتى عاد ليتحدث عن الثوار كأنهم بعض المارقين ليس إلا.

لكن ما حدث صبّ في النهاية في قوة وصمود الثوار، فتغير الإعلام الحكومي مجددا وبدأ التلفزيون يستضيف عددا من الشباب الثائر في برامجه الشهيرة بدعوى منحهم الفرصة للتعبير عن مطالبهم والاستماع لآرائهم.
‏قال مفقوع من البهايم…
الحقى ياحنان

دى مابقتش نوارة نجم لوحدها..ولا أبوها اللى قال على مبارك من يومين انه رئيس عصابة....دى أمها كمان الست "المفكرة"...أنا مش متأكد اذا كانت مفكرة ولا أجندة...أمها كمان عملت مدونة و بتشتم لجنة الحكماء وبتتهمهم انهم خونة وبتقول على أحمد زويل صاحب جايزة نوبل انه غبى ولابد من محاكمته

اقرى كده واتسلى

http://skazem.blogspot.com/
‏قال مفقوع من البهايم…
ياحنان

حتى منى زكى بتهاجم مبارك

http://www.elbashayer.com/news-127900.html

مش منى زكى دى كانت واحدة من وفد الفنانين اللى قابلوا مبارك من 4 شهور ؟
http://www.egyfilm.com/NewsDetail.php?ItemID=7494&Highlight=عزت العلايلى

كانت فين الشجاعة دى يومها؟

خالد يوسف رفيق يوسف شاهين وبعد ماشاهين مات بقى رفيق سمية الخشاب ومنة شلبى وغادة عبدالرازق بقى قائد ثورى؟

خالد أبو النجا اللى اتظبط متلبسا بالشذوذ هو ومجموعة من الفنانين والنظام ستر عليه وحبس له الصحفيين اللى نشروا الخبر بقى مناضل ثورى وظل للبرادعى؟

عبدالرحمن يوسف الشيعى ابن القرضاوى اللى كل يوم يبدل محظية بقى زعيم ثورى؟

سهير المرشدى مدمنة الهيروين وصديقة الخلايجة بقت زعيمة ثورية؟

نهى العمروسى مدمنة البانجو اللى موتت جوزها من الادمان بقت زعيمة ثورية؟

خالد الصاوى بتاع عمارة يعقوبيان اللى بيخاف يعرف الناس انه مسيحى بقى زعيم ثورى؟

عمار الشريعى اللى مافيش موسيقار اتكرم قده فى البلد واللى كان بيعمل أوبريتات أكتوبر ويروح يبوس ايد مبارك وسوزان بقى زعيم ثورى؟

محمود سعد صحفى الفنانات اللى بقى مليونير فى عهد مبارك واللى مايعرفش يكتب كلمتين من غير خطأ املائى واللى مصاحب الأفاق خالد الجندى بقى زعيم ثورى؟

حتى تامر أمين صنيعة النظام واللى كان بيلقب بمذيع أمن الدولة واللى كان بيشتم الاخوان ع السبحة..طالع امبارح يقول لك كلمة المحظورة دى كانت كلمة مايعة وكنا بنعمل زى أغنية أنا عايش ومش عايش والثورة حلوة وجميلة والشباب محترم وراقى وزى الفل

أأأأأأأأأأأأأأأأأأأأأأأأأ يابلد

أأأأأأأأأأأأأأأأأأأأأأأه من تبديل المواقف

أأأأأأأأأأأأأأأأأأأأأأأه من أشباه الرجال

كلهم أكلوا من خير النظام..والأن بيخربوا البلد لكى ينافقوا الوضع الجديد
‏قال Boneta
انا هاتكلم عن نفسي علشان اكون مسئوله عنه .هاقول ان شباب 25 يناير ده شباب وطني وشباب محترم وشباب كلنا بنحبه جدا جدا لانهم فعلا اثبتوا وبجداره قدرتهم علي تغيير حاجات كتيره في مصر ماحصلتش من عشرات السنين ده حقيقي ولازم كلنا نتفق عليه ..وكمان مش عاوزين نتجاهل ان السبب الرئيسي في كل الخراب اللي احنا فيه دلوقتي هو استخفاف النظام بالشباب ده وتجاهل مطالبهم اللي هي بتمثل مطالب الشعب المصري كله من عيش ...حريه ..عداله اجتماعيه نتج عنه اصرار الشباب علي موقفهم والتظاهر مقابل توحش من جهاز الامن اللي نزل قتل في الشباب وبطريقه همجيه ودي حقيقه مش نقدر ننكرها لحد هنا كويس اللي حصل بعد كده هو اللي مش كويس لما استجاب مبارك اخيرا وبعد 3 ايام كامله من تظاهر الشباب وقال انه طلب اقاله الحكومه كلها طبعا وزير الداخليه وكل اللي في منصب اتغاظوا ونتج عنه ان وزير الداخليه السفاح امر رجاله بالانسحاب من كل الاقسام والشوارع وفتح السجون ده طبعا كان رد علي اقالته من الوزاره ماهو ازاي يعني الشعب يتحداه ؟ ماتعودش علي كده الشعب دايما ينضرب علي قفاه وينخرس ومش بعيد يقول كمان ..لما خرج البلطجيه علي البلد حصل اللي حصل من خراب ودمار وحرق وتكسير للمتحف ولغيره من الاماكن المهمه في البلد وطبعا كل واحد عنده مشكله مع البلد حب يخلصها في الوقت ده يعني اللي عنده قريب مسجون راح يخرجه واللي له خصومه مع حد راح ولع له في مصنعه ولا شركته وهكذا حصل انفلات امني رهيب عمرنا لا شوفناه ولا سمعنا عنه لا في مصر ولا في اي دوله محترمه وكان يوم اسود علينا كلنا بدون استثناء ولكنه قلب بملحمه حب بين الشعب المصري كله .المهم ان بعد ده بدأت تظهر علي الساحه اشخاص انتهازيين حاولوا وبكل شراسه سرقه مجهود الشباب اللي اتقتلوا غدر من الامن وبكل بجاحه عملوا لنفسهم حق ومطالب كمان دا غير ان في بلاد كتيره جدا من زمان نفسها مصر تتخرب وتولع دخلت علي الخط طبيعي في الاحوال اللي زي كده كل واحد بيحاول يلعب في البلد بطريقته .فا احنا عندنا نوعين من الناس في التحرير ناس فعلا اصحاب قضيه .وناس دخلت عليهم علشان يتسلقوا علي مجهودهم سواء من بعض الاحزاب او الجماعات لكن ده مش ذنب الشباب . ولكن اللي انا عاوزه اوضحه ان في محاولات لتشويه صورتهم عن طريق مثلا ان بيقولوا عليهم بياخدوا فلوس او اكل او او وده ممكن يكون موجود فعلا لكن من الاطراف اللي قولنا عليها متسلقه ومندسه في وسطهم زي الناس اللي انتي عارفاهم واللي استغلتهم الحكومه لتشويه صوره شباب 25 يناير فا للامانه لازم نفرق بينهم وبين اللي قاعدين في التحرير لمجرد الشو او لتمرير اجنداتهم الخاصه وانا لما كتبت عندي ان الشعب يريد اخلاء الميدان ده مش معناه اننا عاوزينهم يرجعوا بيوتهم علشان احنا مع مبارك ..خالص ..انما لان حياتنا واقفه بقالها 13 يوم وناس كتيره اتأذت من حظر التجوال وناس مش عارفين يروحوا اشغالهم وناس مش لاقيين العيش دول لازم نفكر فيهم ومانحصرش كل مطالبنا في رحيل مبارك ان كان عليً عاوزاه يمشي امبارح قبل انهارده لكن لازم نفكر بعقل ونقول للشباب :مصر دي لينا كلنا ولازم تكون مصر اولا لا رئيس ولا وزير ولا مصالح نفكر في مصر ونشوف هل وقف حال الناس واشغالهم من مصلحه مصر؟ ولا بيسببلها خراب وخساره في كل المجالات؟ ان كان مبارك وحكومته اتسببوا في خرابها علي مدار ال30 سنه اللي فاتت فا احنا لازم نحافظ عليها لانها بلدنا واحنا بنحبها ومش عاوزينها تقع
يعني كل همنا هو مصلحه البلد يا جماعه
نرجع مصر تقف علي رجلها تاني وبعد كده نفوق لمبارك والعادلي وكل العصبجيه اللي اتسببوا في خراب بلدنا.ده رايي واكيد ناس هاتتفق وناس هاتختلف بس انا أؤمن جدا بان الاختلاف في الراي لا يفسد للود قضيه .
‏قال Desert cat
للتخفيف من تقل دم كتاباتك اليومين دول

شكرا على تقل دم ردك
لكن مصر مش العروبة اولا لان مصر مصرية
مصر لا ليها اى انتماء ولا دين مصر بلد الجميع لانها ام الدنيا
اما رحيل الرئيس من عدمه البلد فيها 88 مليون لما كلهم يعملوا لك توكيل رسمى ابقى اتكلم باسمهم
‏قال Desert cat
strategicalone

فيهم ناس كنت مكتشفه وساختهم من زمان بس كنت سياباهم لحد ما تسقط جميع الاقنعة
‏قال Desert cat
Anonymous

حقولك انا ليه الناس مقسمة نفسها مع او ضد لأن كل واحد فاكر نفسه هو بس اللى صح وغيره هو اللى خطأ رأيه بس هو اللى لازم يتنفذ وغيره مش من حقه يبدى برأيه
انا شوفت حوار لاسراء عبدالفتاح منتهى الوقاحة والسفالة فى كلامها اسراء اللى كانت امها بتتوسل للسيد الرئيس ولو طالت التراب اللى بيمشى عليه كانت باسته وهى لما قعدت يومين فى الحجز وخرجت تعيط وتقول والله ما عملت حاجه واستخبت فى جحرها مش خرجت منه الا لما طلع شباب 25 فى بداية الحوار خيرى بيقدمهم على انهم شباب 25 قالت له انا 6 ابريل كان ناقص تقوله اخوانجية وافتخر
‏قال Desert cat
وكان طول الحوار كل لما حد يتكلم ومن الضيوف كان خالد صلاح تقطاعه فى الكلام وترد بمنتهى السماجة .. تخيلى ناس زى دى قاعدة تتكلم باسم شعب كامل واخلاقهم بالسفالة دى ؟ فما بالك لو فكروا فى تقرير مصير فعلا لحد بعد كدا ؟
‏قال Desert cat
غباء المشوهين

هو مين اللى غبى يا مشوه انت ؟
واعلام مصرى ايه اللى بتتكلم عليه ؟ هو علشان استاذف خالد صلاح والبت اسراء يبقى كدا غير من لهجته ؟ الاعلام المنصرى كان محايد من البداية مع انى بصراحة مش من اللى بيتفرجوا عليه .. لكن الاغبياء المشوهين اللى زى حضرتك كدا اللى بيسلموا ودانهم للقنوات المأجورة زى الجزيرة واخواتها .. ارحم نفسك شوية من الهبل
‏قال Desert cat
مفقوع من البهايم

ده لو كان حسن نصر الله ولا خامنئى كان زمانهم قاعدين يطبلوا له ويرقصوا له دلوقتى انت لو متابع من زمان مش هتتفاجأ بالشكل ده ؟ اصل من امتا صافة ناز كانت ولائها لمصر ؟ هى اصلا عراقيه ومن الحاقدين على مصر حتى راجع كل كتابتها وشوفها بتتكلم ازاى طول عمرها .. معلشى الغل لما يتمكن من القلوب بيعمل اكتر من كدا
‏قال Desert cat
مفقوع من البهايم

ماهم دول بقى شوية المعرصين اللى لو كان حسنى مبارك من شهر بالظبط دعاهم لحفلة كانوا يتكعبلوا فى السلم وهما طالعين يسلموا عليه
لكن سقوط الاقنعة بتوالى
وظهر مين المنافق والكداب
وبتوع عاش الملك
مات الملك
واعتقد اللى جاى مهما كان هو مين هيعمل حساب كل من سقطت اقنعتهم بالتوالى
‏قال Kontiki
كويسة الاقتراحات دى و نزيد مثلا ممم تصميم علم مصرى خاص ببتوع التحرير بما انهم خلاص غيروا اسم الميدان الى ميدان الشهداء عشان يفضل الاحتقان موجود و البلد متهداش ابدا
اما الاخوان فبكرة العلمانيين و الليبراليين يضربوا نفسهم بستين جزمة على نزولهم فى الميدان
‏قال Desert cat
Boneta

طيب مفيش حد فى مصر كلها مش قال ان شباب 25 مش محترم بس شباب 25 كان اخرهم 28 اللى موجودين فى الشارع المصرى دلوقتى لا وينتموا من قريب او بعيد لشباب 25 اللى موجود من بعد يوم 28 شوية اخوان على العيال بتوع 6 ابريل على شوية يساريين على شوية عواطلية مش بيعملوا حاجه اصلا ونازلين يضيعوا وقت واهو اسمهم مجاهدين وثورجية
ثم انتى مين اللى قالك ان العادلى السبب فى اللى حصل فى السجون ؟
علشان نكون منطقيين فى الكلام ومش نصدق اى كلام بتقال وخلاص لمجرد اننا بنكره شخص لسبب ما .. ولازم احرض الناس كلها على كراهيته .. اولا انا العادلى ده لا صاحبى ولا من بقيت عيلتى ولا اعرفه لكن العقل موجود والمنطق برضه موجود .. السجون كلها اتفتحت والبلد اتحرقت فى وقت واحد الكلام ده كان يوم 28 الجمعة الساعه 6 مساءاً فى الوقت ده انا واحدة من الناس اللى كانوا فى مظاهرات الشجيش نزل الشارع بعد انسحاب الشرطة وهنا حصل الفراغ الامنى لان كان المفروض ان الشرطة مش تنسحب الا بعد نزول الجيش مش قبل .. العادلى مش هيقتل 300 ظابط ومجند من ولاده علشان البلطجية والحرامية والقتالين القتلة اللى فى السجون يطلعوا يستولوا على الاسلحة ويقتلوهم ويولعوا فى القسم .. العادلى لحد يوم الاحد 30 يناير كان لسه وزير لأن التشكيل الوزارى محصلش غير الاحد الساعه 3 مساءاً يبقى ازاى بينتقم وهو لسه وزير ؟ وهينتقم من مين ؟ من ظباط ومجندين وناس كانت بتنفذ أوامره ؟ اظن بعد حالة الرعب اللى حصلت للناس المفروض بق تحترم نفسها وتعرف قيمة الشرطة المصرية اللى كل واحد بيبقى نايم فى بيته فوقه 5 بطاطين وجنبه دفاية لكن الناس دى رباط جزمة الصغير فيهم برقبة كل واحد بيتكلم عليهم وكل همه هو عدم وجودهم علشان يمارس فساده وسفالته وبلطجته
‏قال Desert cat
Kontiki

كوكو اللى قاعدين فى الميدان دلوقتى يا حبيبتى بتوع 6 ابريل والاخوان وشوية عواطلية وشوية من بتوع العشوائيات علشان كدا مش على بالهم خراب البلد .. اما اللى هيضربوا نفسهم بالجذمة فهما ضربوا من اول ما شافو الخراب اللى فى البلد اللى اتحرقت على ايديهم
‏قال nor
ـ هل يعقل واحد زى البرادعى يرأس مصر ... البرادعى لايعلم عن مصر شيئاً فقد عاش بعيداً عنها ثلاثون عاما ومتزوج من أجنبية وقام بخراب العراق وأنتهت مدته كرئيس لهيئة الطاقة الدولية وأراد أن يكون له مكان فى مصر ... مصر ليست لقمة سائغة فى أيدى أحد ... هل يعقل واحد زى البرادعى أبنته تلبس البكينى فى أوروبا وزوجته أجنبيه ولايفقه شيىء فى قيادة بيته فهل يعقل أن يقود مصر . وصدق الشعب المصرى عندما قال له فى مظاهرات التأييد ( يابرادعى ياجبان ياعميل الأمريكان ) .
2ـ الى السادة الذين يفهمون فى القانون وقرأوا الدستور المصرى جيداً لايصلح أن يترك الرئيس مبارك مصر ويتنحى لعدة أسباب:
أ ـ أحزاب المعارضة تريد تعديل الدستور فى المادة 76 ، 77 فمن يحيل الى مجلس الشعب الأمر بالتعديل فلابد من وجود رئيس للجمهورية.
ب ـ أحزاب المعارضة تريد من الرئيس مبارك أن يقوم بحل مجلس الشعب ، وبالتالى سيتم أختيار نواب جدد وهذا الأجراء سيأخذ أكثر من ثلاثة شهور فى أختيار أعضاء جدد لمجلس الشعب والشعب أيضاً يريد عمليات للأصلاح الأجتماعى والأقتصادى فمتى يستغرق هذا ومدة الرئيس تنتهى فى شهر سبتمبر 2011
ج ـ إذا تنحى الرئيس مبارك فوراً والآن فطبقاً للدستور سيتولى أ.د/ فتحى سرور رئيس مجلس الشعب رئاسة الجمهورية لمدة ستين يوماً لحين أختيار الشعب رئيساً للجمهورية وبالتالى سنخسر السيد/ نائب رئيس الجمهورية عمر سليمان ، وبالتالى سيكون الدكتور فتحى سرور له صلاحيات رئيس الجمهورية لمدة ستون يوماً سيفعل فيها مايريد وأول مايصدره من قرارات الغاء قانون الأحزاب السياسية والقبض على جميع أعضاء الأخوان المسلمين والأحزاب الأخرى .
د ـ إذا تنحى الرئيس مبارك فوراً والآن ستحدث فوضى فى مصر لأن الغالبيه الكاسحة من الشعب المصرى تحب الرئيس مبارك وتريده البقاء فى السلطة .

3 ـ الشعب المصرى 85 مليون نسمه ولم ولن يقبل أن يخسر المكاسب التى حققها له الزعيم الخالد جمال عبدالناصر والزعيم الراحل أنور السادات والرئيس محمد حسنى مبارك .
4 ـ الرئيس مبارك بطل الضربة الجويه الأولى فى حرب أكتوبر.
5 ـ الرئيس مبارك رفض رفضاً باتاً أن تكون هناك قواعد عسكرية أجنبية فى مصر.
6 ـ الرئيس مبارك هو رمانة الميزان فى الوطن العربى.
7 ـ الرئيس مبارك أستطاع بالقانون وبالصبر أسترداد سيناء بالكامل بما فيها طــابــــا .
8 ـ الرئيس مبارك قام بتجنيب شعبه ويلات الحروب على مدار 30 سنه .
9 ـ الرئيس مبارك يسبب قلقاً بالغاً للولايات المتحدة الأمريكية وأسرائيل وبالتالى فهو زعيم للعالم العربى وجميع رؤساء وملوك الوطن العربى يرجعون فى قضايا بلادهم بعد مشاورات مع مصر .
10ـ القوات المسلحة المصرية هى عاشر أقوى قوات مسلحة فى العالم .
11ـ المخابرات العامه المصرية من أقوى أجهزة المخابرات على مستوى العالم .
12ـ الأعلام المصرى أقوى أعلام على مستوى العالم .
13ـ ألا تلاحظون أخوتى فى العالم العربى أن جميع دول العالم وأولهم الولايات المتحدة الأمريكية تقوم بتجنيد فضائياتها وجرائدها يومياً فى تناول الأخبار عن مصر على مدار 24 ساعه . أليس هذا دليل على مكانة وقوة مصر .
14ـ لذا فأعداء مصر كثيرون فى الداخل والخارج ففى الداخل على رأس أعدائها الأخوان المسلمين وفى الخارج على رأس أعدائها أسرائيل .
15ـ لذلك لاأحد يعلم مافى عقول المصريين ال 85 مليون نسمه ماذا ستفعل لو شعرت أن مكاسبها ستنهار.
مصر بها قيادات سياسية وعسكرية قادرة على التفكير وإدارة الأزمة بإقتدار شديد ولن يستطيع كائنا من كان أن يخترق وحدة الصف المصري وكل المصريين من السياسيين والبسطاء يعرفون من معهم ومن عليهم ومن يتربص بهم ومن يساندهم
‏قال Desert cat
nor

برادعى مين ده ولا برادعى ايه اللى يحكم بلد بحجم مصر ؟ ولا شعب عريق زى الشعب المصرى
البرادعى ده انا كنت من المخدوعين فيه فى البداية لكن فعلاً الأزمات هى اللى بتبين الناس لان فى الازمات تسقط جميع الاقنعة

اما بقى بالنسبة للدستور والحاكم بعد مبارك الاغبياء اللى فى التحرير فاكرين اول لما مبارك يمشى هيعتلوا الكرسى مباشرة ميعرفوش ان فى تشريعات وقوانين واحكام بس للأسف الجهل لما بيسيطر على حد
‏قال mohamed
المفروض ولاحد يسال عنهم تهملوهم وهمه لما الجوع يقرصهم حيروحوا لبيوتهم والله العظيم ناس فاضيه وصايعه كمان خربتوها وقعدتوا على تلها انتظروا البطاله والفقر عن قريب يا من اغتلتم رئيسك وقهرتهم رئيسكم ووضعتم السم لملكم والان تريدوا خيانه رئيسكم الحالى انتبه ايها الرئيس القادم لانك ستموت مقتول لامحال مع هذا الشعب فرصه الحبيب يلاقى حبيبته هناك وفرصه يا عم
‏قال Boneta
يا قطه يا حبيبتي
انا كلامي موجهه للناس اللي بيقولوا علينا عملاء وخونه لاننا بنطالبهم يرجعوا بيوتهم ومتخيلين ان كل واحد عاوزهم يروحوا هو مدفوع له فلوس يقول كده مش فاهمين او مش عاوزين يفهموا ان في حاجه اسمها(مصر) غير (مبارك والمتظاهرين والتحرير) ودي الاهم بالنسبه لينا كلنا
اما بالنسبه لرأيي في العادلي فهو لاسباب مش وقتها دلوقتي وانا معاكي طبعا ومش معني ان فيه شخص من الداخليه اخطأ ده معناه ان كل اللي بينتموا لوزاره الداخليه مش كويسين لا طبعا فيهم ناس كويسه جدا ومحترمين وبرضه منهم ناس بيستغلوا مراكزهم وبيبهدلوا في الخلق زي خالد سعيد كده اللي اتفشفش علي ايدين بعض منهم
وانا بطبيعتي مش من الناس اللي بتحب تعمم وخلاص لاني واثقه جدا ان في كل مكان وزمان وجنس ومله ودين ناس كويسه وناس لأ والانسان طول ماهو عايش يا ما هايقابل ناس هايختلف معاهم مره ويختلف عليهم مرات
.معلش انا وجعتلك دماغك بكلامي بس احنا اخوات وبنتبادل الافكار
وزي ما قولتلك ده مجرد رايي مش اكتر ولا اقل
تحياتي يا قطه
‏قال Desert cat
mohamed

انت اصلا بتشوف الاشكال اللى هناك لما بتطلع فى البرامج مناظرهم عاملة ازاى ؟ يعنى فى كل الاحوال دى ياا ما العواطلية يا امنا العشوائيين وفى كل الاحوال مش فارقه معاهم بس اهى البرامج بتسلى الناس وخلاص
‏قال Desert cat
Boneta

انا كمان يا جميل كلامى مش موجه ليكى لاننا اتناقشنا فى الموضوع ده قبل كدا وكل واحد فهم وجهة نظر التانى انا كلامى للناس اللى بتطلع اشاعات وعايزاها كل لما تهدى تولع اكتر تحقيقا لاهدافهم واغراضهم

المشاركات الشائعة