Desert Cat Search
قطه الصحراء: وقفة صامتة تحت المطر واااااو

Friday, January 7, 2011

وقفة صامتة تحت المطر واااااو

ورجعنا بالسلامة ونبتدى من الأول خالص وهو ليلة القداس روحنا الكنيسة الساعه8.30فى البداية لاقينا أمن كتيييير وجينا ندخل راح واحد فيهم قال دول لاء قام راعى الكنيسة دخل نادى البابا وجه قابلنا بوجه بشوش جداً ورحب بينا وقدمنا له ورد أحمر وورد روووز وقعد يشكرنا كتير دخلنا جوا لاقينا الدنيا زحمة جدا ولسه فى ناس بتيجى فقولنا احنا جايين نهنى ونبارك يبقى مش ناخد مكان غيرنا وقولنا نمشى بقى وإحنا خارجين البابا لمحنا جه قالنا انا سعيد أو باللفتة الإنسانية دى ومش عارف اشكركو إزاى قولنا له لا شكر على واجب يا أبونا راح قال ياريت لو تشرفونا الصبح الساعه10علشان المحافظ يشوفنا مع بعض ويشوف اواصر الحب والمودة اللى بينا .. فى سرى بقى ونجيب ورد تانى ؟ وخرجنا من الكنيسة وإحنا خارجين نلاقى فى وشنا أعضاء مجلس الشعب متجمعين وسلموا علينا ومبسوطين أوى بينا وعايزنا ندخل تانى معاهم بس كان جاى ناس كتير جدا وراهم والناس دى كلها فضلت واقفة بره لأن الكنيسة فعلاً مش كبيرة وقفنا سلمنا على الناس اللى نعرفها منهم وبعدين جه ضابط حليوة كدا بيقولنا عايزين تدخلوا ؟ قولت له إحنا ماشيين بس هنيجى الصبح هتبقى تدخلنا ؟ قالى طبعا .. قولت له هو حضرتك ظابط فى القسم قالى انا ظابط فى أمن الدولة .. قولت له اللهم أحفظنا راح ضحك وقالى انا معجب بالحركة بتاعتكو دى اوى .. قولت له مش أنت اللى قولت فى الاول وإحنا داخلين دول لاء قالى معلشى دى إجراءات أمن وشغلنا كدا بس لو جيتو الصبح هدخلكو من غير اجراءات اصل بصراحة اللى حصل ده حاجه رخمة انا مسلم بس قرفان من اللى بيحصل فى البلد .. راحت حنين خبطتنى فى رجلى هو خد باله راح ماشى لوحده .. قالت لى الراجل بيقولك ظابط فى امن الدولة وبدأ يفتح كلام مين دراكى أنه مش بيحاول ياخد معلومات ؟ قولت لها معلومات عن أيه يا ماما هو انا عارفه اللى فجر نفسه المهم بعدها مشينا وخلص الليل ودخلنا فى يوم الجمعة وأصحى على تليفون الساعه9من مدام فادية مسئولة المرأة تقولى اصحى بقى يا حنون ألبسى إحنا هنروح الكنيسة علشان نقابل المحافظ .. انا حاضر خلاص صحيت أهوه ومعرفش رميت الموبايل فين وكملت نوم صحيت لاقيت الساعه12والموبايل عليه 8ميسد كول كلهم من مدام فادية اتصلت بيها وقعدت اعتذر أنا أصلاً الساعه9دى ماليش فيها خالص .. الساعه 3نزلت الوقفة الصامته على ما وصلت لأن المسافة بعيدة شويتين تلاته كانت الساعه4.20قوم أول ما دخلت لاقيت البوكس فى وشى


قولت إستعنا على الشقا بالله شكلنا كدا رايحين بلا رجعة و
بما إن الوقفة المفروض إنها بالملابس السوداء لاقيت اغلب الناس اللى واقفة لابسه ابيض او هافان قولت ما يضرش إلا يطلع ده كله أمن عدد الناس اللى حضرت مش كانت كتير وصهيب كل شوية يتصل بيا من إسكندرية ويقولى الأخبار عندك أيه ؟ أقوله انا ماشية أتعكبل فى أمن تقريباً بمعدل 10أفراد أمن لكل واحد قالى إحنا عندنا عاملين ثكنة عسكرية قولت له علشان تعرف أهميتنا يا بنى



شوية ولاقيت ريماس جايبة لى فى ايدها3أشخاص وجاية تقولهم هى دى حنان الشريف قولت إشطة شكلى هتسلم النهاردة ألا ألاقى مريام ودى أتعرفت عليها بعدين تبص لى من فوق لتحت على طريقة إنت جيت يا رمضان شهقه يا رمضان وتقولى تصدقى كنت فاكراكى واحدة كبيرة .. قولت لها نعم يا أوختشى وانا صغيرة ما انا كبيرة قالت لى لاء يعنى 50سنة كدا قولت لها مش تستعجلى الايام بتجرى ممكن الاسبوع اللى جاى تلاقينى 50سنة قالت لى يابنتى انتى طلعتى حاجه الواحد يطبقها ويحطها فى جيبه .. هو لازم الإحراج ده ؟ حكمة ربنا يا ستى أعملك أيه أنا ؟
صهيب تانى الدنيا عندك عاملة ايه يا حنون ؟ ما تفكك منى يا صهيب شوية انا لسه بتعرف رحت عملت حوار فديو مع راجل كوبارة كدا واقف كنت متخيلة هيقولى كلام يضايقنى لأن وانا رايحه له كانت نظرته مش ولابد .. عرفته بنفسى فى البداية أنا حنان الشريف مواطنة مصرية دينى هو دين الإنسانية علشان كدا مش هسألك عن دينك ولا أنت هنا بتعمل أيه وليه .. الراجل ابتسم لى إبتسامة كلها طيبة وحب وراح معرفنى بنفسه وقالى انا هجاوبك على السؤال اللى مش سألتيه أنا هنا علشان انا راجل مصرى حضرت حروب وعرفت يعنى ايه إننا دم واحد ممكن كانت تحصل غارة اروح استخبى مع جارى المسيحى وكان ساعات بيحصل حظر تجول وأكلى يخلص كان بيدينى من أكله كان ممكن أنصاب وهو يتبرع لى بدم قولت له وآيه رأيك فى اللى بيحصل فى البلد فى أخر 10سنين من قنوات تطرف لشيوخ بتسترزق باسم الدين لناس مغيبة ممكن تعمل اى حاجه لمجرد انهم اتقالهم هتدخلوا الجنة قالى اللى بيحصل ده اسمه قلة ادب وجهل وعدم إحساس بالإنسانية ولا المسؤلية جت رانيا تقوله برافو عليك يا حاج بس الاخت على فكرة تبقى مسئولة لجنة الإعلام عن حزب مصر الفتاة فى الشرقية .. الراجل سمع الكلمتين دول وقعد يتنطط لى اوعى الكلام ده يتنشر انا عندى ولاد فى جامعة عايز أربيهم وافرح بيهم قولت والله الكلام ده مش هيخرج من النت قالى كمان نت ارجوكى احذفى قولت له إحتراماً لرغبتك مش هنشر حاجه روحنا اتمشينا شوية قدام الجامعة ونلاقى فى وشنا مستشفى الجامعة واصدقائى الحلوين عايزين يدخلوا يزوروا المرضى .



قولت لهم أنا مش داخله مش بستحمل اشوف الناس العيانة .. يابنتى إكسبى ثواب .. قولت ابداً مش عايزاه ده أنا سبت جمعية رسالة مخصوص علشان الزيارات اللى كانوا بيعملوها كنت أروح الزيارة من دول أرجع عيانة من هناك أنام لى أسبوعين تلاته
قوم كان فى حد كدا نفسه فى شيشة قولت إشطة أهى دى أموت أنا فى الثواب بتاعها وطلعنا على كافيه مش هقول لا عنوانه ولا إسمه علشان مش يبقى إعلان غير مدفوع الأجر الكافية اسمه الباتروس جنب مجلس المدينة وبعدها كل واحد عاد إلى منزله سالماً آمناً

الخلاصه بقى
مع إن العدد كان غير توقعاتى تماما وكان قليل جداً إلا إنى برضه سعيدة بالناس اللى جت وبشكر جداً الحاضر الغائب الأستاذة أمينة أباظة اللى كانت معايا على التليفون أول ما وصلت ولمجرد إنى قولت لها أنا خلاص قدام المحافظة وشايفة فى ناس قدامى كنت حاسة إنى سامعة دقات قلبها فى التليفون وقعدت تقولى كلمينى من هناك يا حنان ولما خلصنا ومشينا واحنا رايحين الباتروس كلمتنى وعرفت إننا خلاص ماشيين كانت مبسوطة أوى إنها عدت على خير ومش كان فى أى حاجه طيب أقولك ايه بشكرك جداً على إهتمامك ؟؟ مهما شكرتك مش هقدر أوافيكى حقك بس على فكرة انا بحبك اوى كمان أحمد كلمنى وأنا جاية فى الطريق وكان قلقان أوى .. قولت عيب يا ابو حميد ده انا قطة يعنى بـ7أرواح بجد ميرسى أوى لسؤالك يا أحمد
بتمنى مش يكون ده مجرد شوية حماس ونرجع تانى كأن لم يكن
بتمنى كمان إننا نفضل كدا بنحب بعض وبنخاف على بعض وبنحترم بعض

كل تحياتى للجميع

23 comments:

Ms Venus said...

انتى انسانة جميلة اوى يا قطة بجد


انا مش هشكرك على كل اللى بتعمليه

لانى عارفة ومتأكدة انك بتعمليه من جواكى ومن قلبك ومش محتاجة اى شكر من حد


انتى بنت جدعة اوى

ربنا يحافظ عليكى

Ms Venus said...

انا غصب عنى مش بتابع المدونات الفترة دى

لكن حسيت انى لازم ادخل اقولك اللى جوايا بجد

merette said...

صحيح دي اول مرة اسيب تعليق عندك بس انا متبعاكي من فترة لا باس بها ... بجد انا عايزة اشكرك و اشكر كل الناس اللي جم الكنيسة امبارح الروح كانت جميلة اوي و انا شخصيا كنت سعيدة سعادة مش طبيعية .. ممكن اقول انه احلى قداس عيد حضرته في حياتي بالرغم من الظروف ..... اما بقى بالنسبة للوقفة الاحتجاجية .. انا رحت في الاسكندرية و اتاثرت جدا منها .. بجد انا مش عارفة اقول اية غير ان ايماني في البلد و في ناسها رجعلي من جديد

merette said...

صحيح دي اول مرة اسيب تعليق عندك بس انا متبعاكي من فترة لا باس بها ..... بجد انا عايزة اشكرك و اشكر كل اللي جم الكنيسة امبارح بجد الروح جميلة و كنت سعيدة سعادة مش طبيعية .. اقدر اقول انه احلى قداس عيد قضيته في حياتي برغم الظروف ........ بالنسبة بقى للوقفة الاحتجاجية انا حضرتها في الاسكندرية اتاثرت جدا جدا بيها .. بجد مش عارفة اقول ايه غير انه رجعلي ايماني في بلدي و ناسها

Boneta said...

حمدلله علي سلامتك يا قطه انا يا اوختي كنت قلقانه عليكي علشان عارفه حبايبك كتيير :)
ومش عاوزاكي تتعصبي ولا تتنرفزي لان امبارح اختك نايمه الصبح ومش قدرت انزل طبعا كنت في غيبوبه ومش لحقت انزل الساعه 4 للاسف طبعا انا في نص هدومي من نفسي ومنك طبعا لاني طلعت عيله :(
المهم الحمد لله انك بخير

Kontiki said...

الايجابية كويسة المرض و الارهاق منعنى من المشاركة لكن انتى عارفة انا بحارب العرعرة و الجهل و التطرف بالثقافة و الفن ياانا يا هم فى اسكندرية :) تسلمى يا حنان و يسلم كل اللى نزل معاكى الوقفة فى كل المحافظات

Anonymous said...

انا سعيدة بمقابلتك يا حنان
واتمنى اول ما تنزلى القاهرة تكلمينى زى ماوعدتينى انتى بجد بنت جميلة فى كل حاجه وسبورت جامدة اخر حاجه
روحك الجميلة نشرت بهجة فى المكان كله
يشرفنى لقاءك ومقابلتك فى اى وقت يا اجمل اخت وصديقة


مريم

normary said...

ya hanooon shokrn 3la el shesha hehehehe
enty e7la ledar wagmd ledar nazem wakfa
bamooot feky ya nano

elmasryeffendi said...

برافو عليكى
انا بقى خدتها كعب داير لانى اكتشفت انه حصل ترتيبات جيدة و مواعيد قداس اتغيرت فى بعض الكنائس فعملت زى ما قلت لك و خدتها من اول الخط لحد ما وصلت لمارجرجس بالخلفاوى و هناك اتصلت بميلاد صديقى اللى ما صدقش و خرج لى يسلم على و هرانى ضحك و تريقة من عينة طول عمرك صاحب فكر و دماغ بس قضيت وقت جميل معاه هو و عيلته و بعدها خدت العربية اللى كنت راكنها بعيييييييييييييييد قوى و رحت على الظاهر عشان اقابل سامح زميلى فى الشغل هو و عيلته ، الحمد لله تمت على خير بس زعلت انى فى ناس كانت عاملة حداد و ما راحوش القداس

جهاد صلاح الدين said...

هو انتى مش قد كدا يا حنان
لكن انتى بت جبارة
الخمس دقايق اللى شوفنا فيهم طلتك البهية خيلتينا رايحة جاية
لكن اتشرفت بمعرفتك يا حنون

Anonymous said...

الراجل السلفي اللي مربي دقنه اللي اسمه سيد بلال اخد جزاؤة ومات

Anonymous said...

شاطرة يا كلبة الصحراء
مبسوطة وكلك انشكاح وانتى رايحة تقدمى الورد الرووووز قريب نقدموه على قبرك ان شاء لله اصل انتى واحدة سافلة وقليلة الادب محدش سمع لك صوت يعنى ولا عملتى وقفات ولا جبتى ورد احمر ورووووز واطفال فلسطين بينضربوا بالنووى ده زى ما يكون كانوا اعداءك وكل يوم ادخل الاقيكى بتردحى لهم
اثبت لنا كلنا بالدليل القاطع انك صهيونية عميلة وسافله وكل الكلاب اللى داخلين يطبلوا لك يهود خسارة فيكى الواحد يضيع وقته فى الرد وفى زيارة المدونة النجسة دى

Boneta said...

Anonymous said:
الراجل السلفي اللي مربي دقنه اللي اسمه سيد بلال اخد جزاؤة ومات
اسمح لي او اسمحي لي اقول مفيش داعي نشمت في الموت ومش معني انه مربي دقنه يبقي هو اللي عملها ثم انه انسان في الاول والاخر ولو افترضنا انه مسئول او له يد في التفجير ففي حاجه اسمها القانون والقانون بيقول المتهم بريء الي ان تثبت ادانته فا انا ضد انهم يقتلوه حتي ولو كان هو الجاني لاننا لو طبلنا وفرحنا انهم قتلوه ومن غير مانعرف ايه تهمته بالتحديد يبقي هايمشوا في الشارع ياخدوا اي واحد ويموتوه جوه اقسام الشرطه ويقولك كان مشتبه به في قضيه .طبعا ده غير مقبول انه يحصل مع اي حد مهما كانت ديانته اوالتهمه الموجهه له ففي الاول والاخر كلنا مصريين .ده رأيي بصراحه وبعتذر لو ضايق حد منكم

Desert cat said...

Ms Venus

انا مش محتاجة شكر يا فينوس
لان اللى بعمله ده واجب المفروض ان اى مصرى يعمله
ميرسى لزوقك يا جميله

Desert cat said...

merette

انتى شرفتى المدونة
سواء كتبتى تعليق او لاء
فعلا رد الفعل اللى شوفته فى اليوم ده فى جميع محافظات مصر رجع لى جزء من الامل
مقدرش اقول كل الامل علشان مكونش كدابة
:))

Desert cat said...

Boneta

لا تقلقى يا جميل الحماية كانت متوفرة كويس
المهم كل سنة وانتى طيبة

Desert cat said...

Kontiki
مش مهم تنزلى يا كونتا مجرد احساسك لوحده قمة المشاركة

Desert cat said...

Anonymous

ميرسى اوى يا مريم لزوقك انا كمان سعيدة جدا بمقابلتك
بالتأكيد يا جميل اول لما انزل لازم نتقابل

Desert cat said...

normary

ههههههههههه
فضحتينا الراجل بتاع الكافيه كان ناقص يجرى ورانا فى الشارع ويقول والنبى ابقوا تعالو كل يوم
وحشتينى بجد يا مروة

Desert cat said...

elmasryeffendi

انا مبسوطة وسعيدة اوى بيك
تصدقنى لو قولت لك ان لما كنت فى الكنيسة يوم الخميس كان كل اللى بيدور فى عقلى هو كلامك انك حملت نفسك مسؤلية حماية المقدسات المصرية
بجد انت نموذج ايجابى رائع
وانا شخصيا فخورة اوى بيك

Desert cat said...

جهاد صلاح الدين

تانى برضه يا جهاد انا يومها كنت هقتلك بس قولت الراجل جاى يجامل يعنى خلينا مؤدبين شوية
كل شوية تقولى خدى لى جنب يا شاطرة خليت الراجل اللى جبنك يزعقلى ويقولى ما تقعدى لك فى مكان بقى
ينفع كدا
انا كمان سعيدة انى اتعرفت عليك
سلامى لجيجى

Desert cat said...

Anonymous

فى ستين داهيه تاخده
عقبال باقى السلفيين لما يحصلوه

Desert cat said...

Anonymous
وانت ايه اللى جايبك مدونة نجسة يا حمار انت النجاسة دى فى بيتك مش فى البلوج
انت واحد حقير اقل من انى انزل لمستواه او ارد عليه
بس يلا غور مش تيجى هنا تانى