حتى لو الشعب كله ولع فى نفسه

فى البداية قالوا عاطل عن العمل وراح عند مجلس الشعب علشان يطلب شغل وبعدين قالوا صاحب مطعم فى القنطرة غرب وولع فى نفسه علشان عايزهم يزودوا لهم 20رغيف من العيش المدعم للمطعم بتاعه والسبب التانى هو الصح
لكن اللى انا عايزة أفهمه ان اى حد يعمل مصيبة تطلع مراته تقول عليه مختل عقلياً
يعنى الشرطى اللى أطلق النار على أسرة مسيحية فى قطر سمالوط زوجته واهله طلعوا قالوا عليه مختل وبيتعالج
ونفس الحوار مع عبده عبدالمنعم اللى حاول يولع فى نفسه قدام مجلس الشعب النهارده
الغريب والمثير بقى ان زوجته واخوه بيقولوا انه دخل مستشفى العباسية فى 79وكان يعانى من اكتئاب وقعد فيها شهر وخرج قوم ايه بقى بقدرة قادر تروح الشهادة بتاعة الشهر ده تطلع فى سنة 1998هو لما كل واحدة هتطلع مراته تقول على جوزها مختل عقلياً كنتوا بتتجوزوهم اساساً ليه ؟ ولا علشان تخلفوا معاتيه والبلد توصل بالمتخلفين اللى فيها للحال اللى وصلت ليه دلوقتى ده ؟
والأخ اللى راح يحرق نفسه فاكرها تونس ؟ ده لو الشعب كله ولع فى نفسه ولا حد هيتحرك
ولو راح جاب كل عيلته ولعوا فى نفسهم كل واحد هيقولك وانا مالى اصل ده شعب مات فى وطن مات من 52انقلاب البكباشى ناصر وشوية الزبالين اللى كانوا معاه وكل واحد بعد كدا ادى نفسه رتبه عاليه اوى ماهى بقت بلد ابوهم بعد كدا
واذا كانت ثورة تونس الجبهة اللى ملزقة نفسها فى الازهر عنوة ومسمين نفسهم جبهة علماء الأزهر قالوا لك يجوز الخروج على الحاكم لو زاد ظلمه وفسادة
لا يا راجل منك ليه بجد يعنى يجوز ؟ هو الثورة على الظلم والطغيان كمان محتاجه فتوى ؟ بس معلشى بقى المرتزقة يقلبوا فى طبق الفتة إزاى ؟ إذا كان يوسف البدرى طلع فى فتوى لولبية خزعبلية يقول يجب طاعة الحاكم حتى لوفاسد .. عايزين وساخة أيه أكتر من كدا ؟
وواحد تانى يقولى مستحيل نبقى زى تونس اصل لو بيقنيا زيهم ده معناه خطر على الإسلام .. يا حلولى طيب مش عندك دكتور كويس يعالج الإسلام بتاعك الضعيف الهش ده اللى خايف عليه من غضب الناس على الظلم والطغيان ؟
سمعت عن مستشفى حلو بيعالج الاسلام الضعيف بالصدمات الكهربية ويرجع فيه الروح من تانى بس المهم تنقطنا بسكاتك علشان الناس اللى عايزة كرامة وحرية تقدر تحقق هدفها الناس اللى إسلامها فعلاً قوى .. الناس اللى إسلامها نزل بيه النبى محمد بين أشد الناس كفراً ورغم كدا باقى من آلاف السنين .. أما إنت وإسلامك اللى خايف عليه من تونس ممكن تاخدوا مضادات حيوية وفيتامينات وربنا يشفيه ويقومه بالسلامة .

وبما إن تونس ألهت الجميع على إستفتاء السودان إلا يوسف القرضاوى راح قعد مربع رجليه وأخد نفس عميييق راح جاى له فى وقتها الفتاء على طول وقالك إيه بقى إن إستفتاء السودان ده حرام شرعاً
لا يا راجل ؟ يعنى لو كان حاجه تخص الحكام كنت قولت حلال ويجب ويجوز واللى مش يدلى بصوته هيروح جهنم وبئس المصير ؟
عرفتوا بقى فين ومين هما الآكلين على جميع الموائد ؟
مش القرداوى ده برضه اللى الكورة كمان دخلها فى الدين وقال انا دعيت ان دبى تفوز بتنظيم كأس العالم وربنا إستجاب لدعائى ؟
طيب بقولك آيه ما تدعى لنا دعوة مستجابة من بتوعك دول ربنا يخرس لسانك ولسان محمد حسان وابواسحاق والبدرى وكل تجار الدين اللى موجودين فى العالم خلى الدنيا تنضف بقى والعالم العربى يتطهر من نفاقكو وعهركو السياسى

تعليقات

‏قال Boneta
لو البلد كلها ولعت الحكومه مش هاتتحرك لانهم هما اللي جننوا الناس ووصلوهم يولعوا في روحهم قال يعني ال 20 رغيف هايهدوا اقتصاد البلد
طيب طالما هما حلوين قوي كده مايروحوا يحاسبوا الحراميه الكبار اللي ناهبين البلد بالملايين
دي حكومه عندها خلل نفسي
وانفصام كمان
ربنا يشفيهم
‏قال Ramy
احنا صعب جداً نبقى زى تونس

تونس طيب ناس بتفهم

أحنا هنا عموماً الناس عندها تخلف عقلى
‏قال غير معرف…
ده كمان يا قطة القرضاوى افتى ان الشاب اللى مات فى تونس مات شهيد علشان كدا واحد تانى ولع فى نفسه النهاردة
انا متفق معاكى يا حنان فى كل كلامك
لكن زى ما قولت لك لما اتقابلنا انتى بتتكلمى فى مواضيع مهمة وحساسة جدا لكن كلامك كله صادم واحنا شعب متدين بالفطرة غير القنوات الدينية او اللى بتسميها انتى قنوات الارهاب زودت عند الشعب حاسة الدين لدرجة ان كل حاجه بيقولوا الشيخ قال والشيخ عمل فتخيلى واحد بتصحيه من النوم بكباية مية ساقعه
انتى بقى بتدلقى كوباية المية الساقعه
الشعب المصرى معندوش الوعى الكفاية يا حنان علشان يستوعب كلامك فلازم التعامل يبقى بالهدوء
انا مع صاحب الراي الاخير
،،،،
لكن ليه مصر اختلفت عن تونس
هل انقلاب البكباشي هو من اوصل البلاد و العباد الي حالته التي هي عليها الان؟
انا نفسي مقتنع ان كل التغيرات النفسية التي اصابت المصريين و انحدرت بقواهم و اخلاقهم لاسفل تبدا بانقلاب يوليو 52
‏قال آخر انجاوزات حماس التقيه الورعه…
اجتمع مجلس وزراء حماس ساعات طويله وبعد مناقشات حاميه قرر...تفتكروا ايه؟
منع عرض ملابس نسائيه على المنكانات
فى المحال لأنه لم تكن موجوده فى صدر الأسلام
ولا عزاء لقضيه كان اسمها القضيه الفلسطينيه
‏قال Elmasryeffendi
مش فاهم ليه كل حاجة يدخلوا فيها الاسلام و هما اساسا مش فاهمين يعنى ايه اسلام ، بس اعتقد كده ان حكومتنا الموقرة بتعمل استمارة انضمام لمستشفى العباسية اول ما المواطن يروح يطلع بطاقة
‏قال Desert cat
Boneta

صح البلد كلها مختلين عقلياً لحد النهاردة (4) ولعوا فى نفسهم وكلهم مختلين
انا بجد بقيت خايفة اصل الخلل بقوا كتير وفى ازدياد مستمر
‏قال Desert cat
Ramy

ايوا طبعا يا رامى هنكون احنا اصدق من الحكومة اللى كل واحد يعمل حاجه يقولوا عليه مختل هما صح
‏قال Desert cat
Anonymous

ناقص اللى صوباعه يتعور يبقى شهيد الصوباع
خليهم يولعوا فى نفسهم علشان الزحمة اللى فى البلد دى تخف شوية
‏قال Desert cat
جهاد صلاح الدين

طيب ماا قولت لك برضه يا جهاد انى ماليش فى حوارات السياسة واخد كل واحد على اد عقله دى
احياناً الصدمات بتفوق
وإلا اللى بيموت إكلينيكياً مش كان أتعمله صدمات علشان تساعد قلبه على النبض لكن برضه فى النهاية بيموت
عموماً هحاول اكون هادية شوية
‏قال Desert cat
ذو النون المصري

فعلاً انقلاب البكباشى ناصر خلا مصر مزبلة بعد ما كانت رائدة فى كل شيئ وابسط شيئ الشوارع القى نظرة عليها فى افلام الثلاتثينات وشوف جمالها
ودلوقتى شوف كميات الزبالة عاملة ازاى
‏قال Desert cat
آخر انجاوزات حماس التقيه الورعه

احتلال ايه وفلسطين مين بس
الاهم هو اجساد النساء
‏قال Desert cat
elmasryeffendi

محسسنى ان الاسلام ده بقى حاجه زى كرة القدم كدا
يشوف الاتجاه اللى هو عايزة ووقت ما يحب
‏قال توظيف الدين…
ارتدى كتاب الحكومة زى الوعاظ وأطلقوا لحاهم وتحولوا إلى مفتين يحرمون الانتحار وقتل النفس التى حرم الله قتلها، وأفردوا الصفحات الأولى لرجال الدين ــ مسلمين ومسيحيين ــ للحديث عن حرمة الانتحار والنهى عنه فى كل الأديان السماوية.

وهذه طريقة قديمة وتقليدية للغاية فى توظيف الدين لمحاصرة أى ظاهرة سياسية أو اجتماعية تؤرق السلطة وتزعجها، وكأن إقدام مواطنين من مختلف الأعمار على الانتحار قضية دينية فقط، مقطوعة الصلة بعديد من المشاكل والمساخر السياسية والاقتصادية، التى أوجدتها سياسات حكومية مختلة وفاسدة.

يريدون أن ينشغل الجميع بالنصوص الدينية والفتاوى والأحكام، بحيث ينصرف المجتمع كله إلى مناقشة حكم الدين فى المنتحر، دون التطرق من قريب أو بعيد إلى الأسباب التى تدفع المواطنين إلى الانتحار على الطريقة البوعزيزية التونسية، التى أشعلت ثورة غير مسبوقة فى بلد كان خارج التوقعات الثورية تماما.
‏قال خطب الجمعه تشجع على الفساد…
اختزال من يشعلون النار فى انفسهم
لقضيه دينيه فقط بامر الحكومه فى الخطب الجمعه
والدعوه الى الصبر على المكاره لدخول الجنه
وليعش الفساد فى امان
‏قال Kontiki
فعلا محدش حيتحرك لان التوانسة متعلميين و ثقافتهم عربى و فرنساوى و عددهم اقل و بلدهم نضيفة فالشاب لما عمل كدة كانت نكبة بالاضافة انه اكيد كان فى ارهاصات سابقة ادت لانهيار النظام انما هنا فى مصر الوضع مختلف تماما احنا متعودين ع البلاوى وصعب يحصل اى انتفاضة للشعب
‏قال Humman being
احنا للأسف بنقلد تقليد أعمى لأى حدث من غير ما نعرف نتيجته هتكون ايه ولا هتوصلنا للى احنا عايزينه ولا لأ.. بس "مختل عقليا" بقت طوق النجاة من أى مشكلة ومش بنتكسف أو نتحرج من تكرارها الى يوم القيامة ان شاء الله

معاكى ان محمد حسان وأبو اسحاق والبدرى "تجار دين" وضيفى عليهم كمان "خالد الجندى" لا اختلاف
بس الشيخ القرضاوى مش كدة ... ده شيخ جليل وعالم ده مش راجل قرأ كتابين زيهم وجاى يسمعهم لأ ده ليه تاريخ ودارس أصول دين صح

أنا أول واحدة مؤمنة ان الدين مش مظاهر وجلباب ومشايخ بتنوح طول الليل والنهار فى الفضائيات .. دايما بقول ان الدين سلوك وتنفيذ بس للأسف الشعب المصرى ضعيف من ناحية الدين ... وأى جانب ضعيف بيبقى سهل جدا اختراقه

ده رأيى والاختلاف لا يفسد للود قضية
‏قال غير معرف…
القرضاوى
فتوى القرضاوى توقعتها منه رغم ان اغلب الفقهاء يجرمون ويكفرون من انتحر لكن القرضاوى يتتبع ارى الشارع ويسوق نفسه من خلال الجماهير وقد اكون مخظىء
وكسة 52
الانقلاب العسكرى كان منعطف اومنحدر لمصر الليبرالية الى الديمتاتورية وحاليا السلفية التى تناسب كل حكم استبدادى لانها حشيشة ذات صنف عالى العال
ولو ولع الشعب المصرى فردا فردا لما غير شى لان ليس ما اسقط بنى على انتحار الشاب بل الوعى الجماهيرى الذى وصل اليه الشعي التونسى من خلال ثقافة علمانية بحتة جعلت الجميع يحلم بتحقيق الجنة على الارض وليس فى السماء

تحياتى
كلب من الصحرا
هوهوهوهوهوهو

المشاركات الشائعة