Desert Cat Search
قطه الصحراء: 9/1/10 - 10/1/10

Tuesday, September 28, 2010

المغضوب عليهم


سمعت ذلك الافاق العابس الوجه يكشر عن انيابه على احدى قنوات التطرف وجلس ينعت كل ماهو غير عربى بالكفر والالحاد والفسق والفجور ونحن العرب يا ضنايا طيبين قوى وزوق لابعد الحدود ومن شدة احترمنا وادبنا الغرب الكفرة كلهم عاملين مؤامرة علينا علشان يدخلونا جهنم وبئس المصير لذلك وجب الحذر اصل هما المغضوب عليهم اما العرب فهم خير امة اخرجت للناس .. فكرت فى مدى دلالة كلمة المغضوب عليهم وتساءلت هل يمكن ان يغضب الله على الذين نأخذ منهم فائض إختراعاتهم من كافة أنواع التكنولوجيا والذين نتداوى من نتاج أبحاثهم وتجاربهم بينما من يستهزئون بهم ليل نهار فى قنوات التطرف لا يجيدون سوى العلاج بحبة البركة وعسل النحل حتى الرجولة اختزلوها فى الحبة الزرقة ؟ هل شبابنا العربى عندهم بهذه الأهمية ليتركوا جميع اهتمامتهم ويقضون اوقاتهم فى عقد المؤامرات لغزو عقولهم .. عقولهم التى لا يوجد بها سوى المرأة عقولهم التى لا تفقه سوى أن شرفهم معناه الأعضاء التناسلية لنسائهم مهما إرتكبوا من موبقات وزبالات موجودة فى قاموس الرذائل فإن وضعت نسائك الف حاجز وحاجز على أعضائها التناسليه إذن أنت شريف واسرق واغتصب وارتشى وانصب واحتال على الجميع اما اذا كنت طاهر اليد ولكن احدى نسائك استخدمت حقها فى جسدها الذى هو ملكها لوحدها ويخصها برضه لوحدها يبقى انت راجل غير شريف .. ولذلك يطبق شيوخنا الأجلاء الشرف بحذافيرة فيتزوجون اربعه ويحثون ايضا المواطنين الذين لا يجدون قوت يومهم بالزواج باربعة اصل الشرع قالهم كدا وكم من اشخاص تم تغييب عقولهم وسلب اموالهم فالدين اصبح طريق للجنة وطريق لتورم الارصدة فى البنوك وكل تاجر وشطارته فان الجمهور الكئيب يبحث عن محمد حسان واخوانه من يكشرون عن انيابهم عابثى الوجه ولاصحاب البشاشة يوجد عمرو خالد المتانق دائما ومع تعدد الفضائيات تعدد مرتزقة الدين الذين يعطون للبلهاء شيكات بلا رصيد فى جنة الخلد . من هم المغضوب عليهم ؟ الذين يحترمون عقولهم وينهضون بانفسهم ومجتماعتهم ؟ ام الذين ألقوا بعقولهم فى المراحيض وعلى الرغم من انهم تربوا على ان الشرف بين افخاذ النساء يكرسون كل حياتهم للجرى خلف كل من تحمل تاء تأنيث فتارة يشترونها بنقودهم تحت مسمى زواج مسيار على مصياف على شتوى على باقى فصول السنة وزواج متعة وزواج سفر وفى زواج برضه لمدة نص ساعه طالما الفلوس موجودة وان كان ليس فى الامكان يبقى الاغتصاب هو الحل يا خير أمة أخرجت للناس .. يا محترمين يا اللى هتدخلوا الجنة أفواجاً اصلكم عرب والقرآن بلسان عربى لذلك انتوا اولى فى دخول الجنة بس اجتهدوا انتوا وحرموا كل حاجه فى الحياة وحرموا على الناس عيشتها فالفن دعارة والمفكر ملحد وكافر اما المرتزق باسم الدين اللى عايش عالة على غيرة اللى بيسرق فلوس الناس وعقولها وقلوبها باللعب على وتر العواطف الدينية فده هيدخل جنة الخلد ... وبالرغم من هذا العجز البين يتغنون بانهم خير امة اخرجت للناس وان الغرب الكافر يعقد عليهم المؤامرت ليبعدهم عن الجنة .. فاى تعاسة تضاهى تعاسة الإنسان حين يفقد بصره على الرغم من أن له عينين ؟

Thursday, September 23, 2010

جريمتى


جلست اتابع فى صمت ما يحدث حول مشروع مدينتى ... ذلك المشروع الفضيحة بكل المقاييس واخترت المتابعة فى صمت لأنى بصراحة شطورة وبسمع الكلام اصلهم اثناء نظر الدعوى قالوا لا توجد صفة لاى مصرى لإقامة دعوى ببطلان العقد ولكن كان هناك صوت اقوى واعلى ومعرفش بامانة ايه مصلحة رئيس هيئة المجتمعات اللواء عادل نجيب ووزير الإسكان أحمد المغربي في الطعن على الحكم ببطلان عقد فاسد يضيع على هذا البلد ومواطنيه حوالي 300 مليار جنيه؟ و هل يعقل أن يعيد القضاء لجهة ما 300 مليار ضائعة وترفضهم هذه الجهة؟ ما مصلحة رئيس الهيئة ووزير الإسكان (لا مؤاخذة المصريان) في عدم تصحيح أوضاع خاطئة ربما حدثت قبل مجيئهم ولم يشاركوا في صنعها- فإذا بهم يتمسكون بالخطيئة وليس الخطأ بل و يصمتون على تهديدنا وإرهابنا بطلب التعويضات وبإقامة دعاوى قضائية جنائية بدعوى تأثيرنا سلبا على البورصة! إذا فلتقاضوا من أصدر الحكم بالبطلان وليس نحن! خيبة وفجور وانعدام للحياء exclusiveفيمن يدعون (مسئولي مصر).يجيلك 300 مليار ياللي عمال تعيط علشان مش عارف تدبر موارد للناس المعتصمة والمحتجة, وحيرانين تزودوا البنزين ولا الأسمنت ولا الحديد ولا الخشب ولا الزيت ولا السكر ولا الرز ولا تحطوا ضريبة عقارية ولا رسوم قضائية ولا ولا ولا...وترفضهم! يخرب بيوتكم.. واستمراراً في عرض الهرتلات التي أفحمونا بها (يا مامي) قالوا "ما فيش شركة وطنية كان عندها القدرة على تنفيذ مشروع بهذا الحجم" قلة الحياء تعمل كده وزيادة... لما يعترفوا بأن إمكانيات فرد أكبر من إمكانيات دولة كبرى زي مصر... خربوها وقعدوا على تلها فعلاً، ونبحث عن اجابة في أي آية في القرآن الكريم أو أي سفر من الإنجيل أو التوراة أمر الله أن تباع ال 33مليون و600 ألف متر مربع على بعضها لشخص واحد؟ هاه؟ وأين ومتى بالضبط حرم الله تقسيمها على عدة أفراد لإنجاز المشروع في وقت أقصر (من ال30 سنة اللي فرحانين بها) وما دليلهم بالضبط على حرمة وجود أكثر من مستثمر ومستفيد ومفيد من تقسيم الأرض على أكثر من شركة؟ والسؤال الأهم كما فعلت هيئة المحكمة الموقرة التي أصدرت حكمها ببطلان هذه الفضيحة- هو (أين دليلهم - هم - على أن هذه ال 7% من ربح المشروع كانت أفضل عرض ممكن الحصول عليه؟

Monday, September 20, 2010

إحنا نأخذ من كل رجل قبيلة




فى تعليق ظريف خفيف لطيف لواحد استنجالينا طحن على الخبر ده

الجارديان: سلاح تكنولوجى لمواجهة التحرش الجنسى فى مصر

بيقول ايه بقى الكابتن مهما عملتوا مش هيتمنع التحرش من مصر الا اذا منع الإختلاط بين الجنسين فى شتى مناحى الحياة وعمل مواصلات خاصة للستات ومواصلات خاصة للرجالة وهنا أقوله جتها نيلة اللى عايزة خلف من عينتك .. اصل عينتك واتمنى انها تنتهى على خير بعد عملية التحليل للعقل لتبين هل يحتوى على مخ ام على نخاعات مسلوقة هى اللى لابسه نقاب مش بيعتدوا عليها فى الشارع بمنتهى الوقاحة والسفالة برضه ؟ هى دى مش تعتبر برضه معزولة عن العالم ؟ هى سيدة كفر الشيخ مش طلعوا لها بيتها نزلوها منه تحت تهديد السلاح واخدوها اغتصبوها ؟ دول المصريين يا عم الحاج الشعب الفتك الفهلوى اللى فاهمين وعارفين كل حاجه فى كل حاجه يفتى لك فى الدين والسياسة ويشتغل سباك وكهربائى وزبال ونجار وحداد ودكتور ومهندس فى وقت واحد لما نفصل الستات عن الرجالة مش هيحصل تحرش ولا اغتصاب ابداً البتة ده ممكن يحصل حفلات جماعية على شرف الضحية وبدل ما بنسمع عنها كل اسبوعين تلاتة هنسمع عنها كل ساعه ثم ان الناس بتوع منع الاختلاط دول عندهم عمى فى قلوبهم جنبنا بلد مانعين الإختلاط فى كل حاجه برضه حتى المواصلات .. وكل يوم والتانى نسمع عن جرائم اغتصاب اخرهم الفتاة الجزائرية اللى كانت رايحة تعمل عمرة برفقة والدها وتم اغتصابها وقتلها فى مكة .. شوفتوا فييييييين ؟؟

Thursday, September 16, 2010

كوكتيل بنكهة الغباء

للمرة اللى مش عارفه كام تهب المواقع الالكترونية وتقف وقفة رجل واحد فى وجه الاعداء اللى هما بالطبع فرنسا لاتخاذهم قرار بات ونهائى فى حظر النقاب من الاماكن العامة .. وقولنا مراراً وتكراراً بدل ما تقعدوا تصوتوا وتلطموا وتقولوا هى دى بقى بلد الحريات اللى ضد الحرية ؟ طيب واى حرية فى فرض حاجات مش مفروضة اصلاً فى بلاد احترمتكو واستقبلتكو وعملتكو بنى ادمين وشغلتكو وسكنتكوا وبتاكلكوا فا ما تحترموا قوانينها وتنفذوها واما ترجعوا لبلادكو اللى طردتكو وبتعاملكوا معاملة الكلاب الضالة ويا دار ما دخلك شر .. ثم ان النقاب لا فرض ولا فضل علشان تقعدوا تعيطوا وتتباكو بالطريقة المثيرة للشفقة دى .. وكالعادة اللى عاملين الهيصة والضجة دى مدونين فى خانة النوع فى شهادة الميلاد ذكور .. بس انا شايفة ان الذكر اللى يتم اثارته من خصلة شعر او دراع او رجل باينه يبقى لامؤاخذة ده راجل اندر وير وكبيرة خصلة الشعر دى ولو اتجوز ممكن يحصل له اللى حصل لاونكل اللى رمى نفسه تحت القطر ليلة فرحة فى فيلم النوم فى العسل


اما بقى الجماعة بتوع جبهة هوبلاء الازهر معرفش باى بجاحه بينسبوا اسمهم للازهر اصلا اذا كان الازهر متبرى منهم
وحصل على حكم قضائى نهائى لحل الجبهة المشبوهة دى عام 1999م ولكن اللى اتعود على الفتنة والوقيعة وقلة الادب ميعرفش يعيش فى النور محترم بين الناس وبالتالى راحوا الكويت وبدأوا يبثوا سمومهم من هناك واخر زبالة تقيؤها هى مقاطعة المسيحيين على اساس ان المسيحيين دول غزاة محتلين البلد ولازم نقاطعهم ونقرفهم فى عيشتهم علشان يمشوا منها طيب انا مش حتشرى حاجه غير من مسيحيين بالعند فيكو فعلا دول اللى ينطبق عليهم وجوه بالنعال تضرب فتصيح النعال بماذا ضربتمونى


اما بقى تقسيم السودان فده بشرة خير جامدة اووووى ومؤشر هاااااايل للوضع فى مصر بعد التفتيت الحاصل بفعل فاعل بين المصريين وبعد ما كنا كلنا لا نتعامل الا على اساس انك مصرى وفى السنوات اللى هجمت علينا فيها الوهابية والسلفية من بلاد المهلبية اصبحنا نتعامل انت مسلم ولا مسيحى فانتظروا تقسيم مصر لجمهورية الصعيد وجمهورية القاهرة وجمهورية الدلتا وانا من موقعى هذا وانتوا شاهدين عليه انا برشح نفسى من النهارده لرئاسة جمهورية الدلتا وابقى غطينى وصوتى يا صفيه

Friday, September 10, 2010

كل تحرش وانتوا طيبين

نزلت بوست للتهنئة بالعيد ومش كان ليا نفس اقول عيد سعيد لانه كما هى العادة عند المصريين عيد يعنى تحرش وكالعادة والهى ربنا يقطعهم واحد واحد وينتقم من كل سافل مجرم مش متربى ومش قادر يربى ولادة ويعلمهم الادب ومخرجهم زى الكلاب الضالة فى الشارع يقلوا ادبهم على اى واحدة مقابلاهم وكانهم حيوانات مع الاعتذار للحيوانات اصل بصراحة اللى بقى بيحصل فى مصر ده كتير وبزيادة اوى قولتوا لبس البنات معرفش ماله شوفوا الصور وشوفوا لبس البنات ومش ليكو حجة ولا مبرر يا مرضى .. قولتوا اصل الشباب مكبوت ومش لاقى يتجوز .. والعيال الصغرة كمان مكبوتة ؟ والشيوخ اللى عندهم 50سنة كمان عندهم كبت ؟ نعدم البنات علشان تستريحوا يا مرضى يا مهووسين .. كفاية نشر الصور دى علشان العار يطول البلد شرق وغرب اكتر من العار اللى هى فيه شعب عايز يتربى من اول وجديد







الخبر كامل على موقع اليوم السابع

بالصور... تحرشات جماعية بالبنات فى الحدائق العامة تفسد فرحة المصريين بالعيد.. و"الصبية" يدخنون السجائر بحديقة الفسطاط فى يوم حظر التدخين بالأماكن العامة


Thursday, September 9, 2010

اهلاً أهلاً بالعيد


فات رمضان بكل احداثه وبدرجة الحرارة العالية وبكل تفاصيله الكبيرة منها و الدقيقة وبعد ساعات سيؤدى المسلمين صلاة العيد .. العيد يعنى الفرحة والبهجة للجميع من الصغير للكبير .. بس تحديداً من 2006اصبح العيد مرتبط بكلمة التحرش الجنسى الجماعى إرتباط غير شرعى لينتج مكان البهجة وفرحة العيد الغضب والسفالة والانحطاط
المفروض ان رمضان شهر العبادة شهر الروحانيات لكن حتى ده مكانش ليه احترامه اصل من اول الشهر بدات حوادث القتل فى تزايد والخناقات فى تزايد اكتر والسفالة وقلة الادب توغلت وانتشرت بشكل مبالغ فيه وبعد صلاة العيد ينطلق الشيطان اللى هو اصلا كان مطلوق من البداية وينطلق معه السفلة والمنحطين والعشوائيين والزبالين للتحرش باى انثى ساقتها اقدارها اللى مش حلوة خالص للنزول من بيتها .. هما الولاد اخدوا البلد حكر ليهم ولا ايه ؟ محدش عارف يمشى ولا يروح ولا يجى من سفالتهم وقلة ادبهم .. هو ليه الولاد اللى متربيين عددهم قليل جدا والسفلة فى ازدياد ؟
فضحتونا وعريتونا فى العالم كله مصر واخدة المركز الاول فى التحرشات الجنسية على مستوى العالم يليها افغانستان وايران يالهوى على الغباء وقلة الادب
هما دول اللى قاعدين يتشدقوا باسم الاسلام ليل نهار
هما دول اللى كل لما حد يفتخ بؤه يقولوا له شوف المادة التانية من الدستور .. طيب ما تحترموا انتوا المادة التانية من الدستور وتسيبوا الناس فى حالها شركات السياحة فى دول اوربا بتوزع على السياح الوافدين لمصر نشرات توعية من المتحرشين يتصرفوا ازاى لو عيل سافل قل ادبه عليهم او سواق تاكسى منحط .. بكرة العيد مش قادرة اقول عيد سعيد اصلى قلقانة اوى ومش قادرة اقول للبنات مش تنزلوا من بيوتكوا علشان الكلاب المسعورة اللى هتبقى مالية الشوارع لان ده حقنا الطبيعى حقنا نمشى فى بلدنا فى امان حقنا ننزل ونفرح بالعيد وبغير العيد حقنا نتحرك براحتنا فى البلد اللى كان اسمها بلد الامن والامان
بس كل واحدة بقى تاخد بالها من نفسها وياريت يبقى فى شنطتها اى وسيلة حماية
وكل سنة والجميع فى شتى بقاع الارض من اى جنس واى دين وحتى اللى مالوش دين بالف خير وسلام وسعادة وربنا يبعد عن الجميع اذية الكلاب المسعورة

Monday, September 6, 2010

إلى هواة التقليد هلموا

الجماعة الى قارفينا بحبابيهم الوهابيين
الجماعة اللى بيقلدوا اللى بيعملوه حتى لو عطسوا يعطسوا زيهم
فى مجتمعات زى عند حبابيكو الوهابيين انتشر الشذوذ والفديو الهايل ده يوضح لكو مدى الانحطاط اللى وصلت له المجتمعات المغلقة
عايزين مصر تبقى كدا ؟؟
خيام متحركة واكياس زبالة متنقلة فى العلن وفى السر عايشين حياتهم هيئة للامر بالمنكر والنهى عن المعروف فى الشوارع وبالليل مقضينيها مع الغلمان برضه مش بيعملوا حاجه غلط اصل الستات مع بعضشيهم والرجالة برضه مع بعضشيهم .. وبيقولوا اللى عندهم فى السوق هناك خلص وبيدوروا يستوردوا دلوقتى بس بشرط اللى يستورودهم يكونوا ناس لاغيين عقلهم وماشيين على نهجهم وبيقلدوهم حتى فى طرقعة الصوابع يا لا يا حلوين يا بتوع الفضائيات طلعوا فتاوى حللوا الفلوس اللى بتقبضوها من اسيادكو علشان تبعتوا لهم اكبر قدر ممكن من الغلمان

Sunday, September 5, 2010

كفـــرت بالحيــاة


لم تعد لدى القدرة على المواصلة .. سجنت نفسى بين كيبورد وعالم افتراضى فلم تفلح محاولاتى للهروب فدائماً تضطرنى الظروف للخروج فتتلطخ قدماى بفضلات الشوارع وتتلوث اذناى بقذورات الكلمات ، حاولت التمرد بشتى الطرق إخترقت كل الخطوط الحمراء صدمت فى العديد وبان الذهب الحقيقى من التقليد ولكن لازالت القاذورات تملأ الطريق .

مددت يدى بالسلام – السلام اللى كنت مطمنة إنى ممكن ألاقيه فى الصداقة ولكن يالا سخرية القدر حتى ده مبقتش قادرة ادور عنه فيها ومش عارفة السبب فى إن الغدر بيحولك لمتأمل غير قابل للإستمرار ؟ ولا السبب هو الحرمان الطويل من الدفئ الإنسانى الكافى ليمنحك الإطمئنان والقوة ؟

حاولت مواجهة هذا العالم عارية دون أوراق توت فصعقنى بظلمه وعدم منطقيته فكفرت به هو الآخر .

حاولت الإندماج مع الواقع ولكنه كان مصر على السخرية من إيمانى الحصين فى قلاعه الحقيقة واللى ظنيت إنى ممكن أحتمى بأحضانها من قساوته كل ما تعضنى فكفرت به .

تمهلت وفكرت قليلاً حاولت أن أقنع نفسى فى وسط هذا العالم الموبوء بأن القوة والضعف رحلة ومسار مش قدر و مش هبه وحاولت ابنى علاقتى بالحياة ولكن فشلت نظريتى وكانت النتيجة وساخة بعد الأخرى ليتراكم اكوام زبالة على جدار الذات من الحياة اليومية .

كررت المحاولات ولكنى لم أزداد إلا خيبات بين أشخاص لا يكذبون حين يعلنون أن العدم هو دينهم الأخير .

لم يعد لدى سوى شعور قاتل بظهر مكشوف دون حماية من لطشات البرد رسمت فى أعلاه أظافر وهميه ودمعة متحجرة احاول مداراتها عن الجميع وصوت مبحوح احبسه دائما ونزيف داخلى لا يشعر به غيرى ولا يؤلم أحد غيرى .

لا اريد الشفقة من أحد ولا أريد العفو من أحد فكثيراً ما أشعر بأن الله ظالم لأنه أوجدنا فى هذا العالم الظالم وبين هؤلاء الأشخاص معدومى الإحساس لا يشعرون بمدى وجع أذاهم لحياة الآخرين