Desert Cat Search
قطه الصحراء: 6/1/10 - 7/1/10

Tuesday, June 29, 2010

كان فى شعب


فى ايام دراستى تحديداً المرحلة الابتدائية والاعدادية كان لما يدخل مدرس التاريخ ويبتدى شرح ويكلمنا عن أبطال وزعماء شعب كرامته كان فى عنان السماء لم يتحمل المعاملة القاسية ولا الاحكام العرفية اللى اصدرتها بريطانيا وبمجرد نفى سعد زغلول انفجرت ثورة 19وبدأً من ثورة 19مروراً بانتفاضة الطلاب ثم معاهدة 36ثم جلاء الإنجليز عن مصر كان الشعب هو العامل الأساسى والمحرك الرئيسى شعب لا يخاف سوى على خدش كرامته كنت أشعر بالفخر والعزة والشموخ أنى أنتمى لهذا الشعب العريق واحمل تلك الجنسية العظيمة بل كنت وكل ابناء جيلى ذاك الوقت فخورين باننا من نفس محافظة البطل احمد عرابى البطل العسكرى وزعيم الثورة العرابية كان يدب فى عروقنا الحماس عندما نردد بصوت جهورى مقولة الزعيم السياسى مصطفى كامل لو لم اكن مصرياً لوددت ان اكون مصرياً .. أين ذهب الزعماء ؟ هل كان لابد من وجود احمد عرابى وسعد زغلول ومصطفى كامل حتى لا يتم انتهاك شرف فتاة فى نهار رمضان يا شعب صايم متدين كل كلامه حتى فساده يدعمه بايات قرآنية واحاديث نبوية ؟
هل كان لابد من وجود احمد عرابى وسعد زغلول ومصطفى كامل حتى لا يتم انتهاك شرف صحفيات على مرأى ومسمع من الجميع فى أكبر ميادين العاصمة لا لشئ غير لانهم يقومون بعملهم فى تغطية اعتصام القضاة و تغيير المادة سيئة السمعة من الدستور المصرى ؟ هل كان لابد من وجود احمد عرابى وسعد زغلول ومصطفى كامل وقاضى يتم وضعه اسفل الحذاء للمطالبة بابسط حقوقه وحقوقنا معاه ؟
هل كان لابد من وجود احمد عرابى وسعد زغلول ومصطفى كامل حتى لا نرى الشعب بجميع فئاته يطلب قوت اولاده من الحكومة على رصيف مجلس الشعب حتى وصلت بهم الدرجة لتعرية اجسادهم وحمل نعوشهم بايديهم وكانهم يطلبون حسنة قليلة تمنع بلاوى كتيرة وبدل من حفظ ماء الوجه وتلبيه طلباتهم النائب المحترم اللى المفروض انه صوت الشعب امر بضربهم بالرصاص ؟
هل كان لابد من وجود احمد عرابى وسعد زغلول ومصطفى كامل حتى تسير نسائنا فى أمان خوفاً من حفلات التحرش الجماعى التى يقوم بها البلطجية والمنحلين اخلاقياً ؟
هل كان لابد من وجود احمد عرابى وسعد زغلول ومصطفى كامل حتى كان يتدخل الشعب السكندرى واتنين مخبرين بيضربوا شاب اعزل مسالم حتى الموت ولم يستطيع احدهم ان ينطق كلمة واحدة لانقاذ حياة هذا الشاب المسكين ؟
هل كان لابد من وجود احمد عرابى وسعد زغلول ومصطفى كامل حتى لا تطالعنا الجرايد كل يوم والتانى بوجوه شباب منتحرين هرباً من البطالة والفقر وآخرين القوا بنفسهم داخل مراكب متهالكة فى عرض المحيطات ؟
هل كان لابد من وجود احمد عرابى وسعد زغلول ومصطفى كامل .. حتى لا تقوم أم بقتل طفلها الوحيد هرباً من الفقر بل ومحاولتها الانتحار حتى تلحق به بعد ما اتخلى عنها الجميع حتى اقرب الناس ليها رغم ان كلهم اصحاب مناصب مرموقة ؟
ياترى كتب التاريخ هتدون ايه ؟
وهندرس للأجيال اللى جاية تاريخ نقولهم فيه ايه ؟
تخاذلنا فى حقوقنا لحد ما ضاعت ؟
هنا على نفسنا وبناكل فى بعضنا والقوى بيدوس الضعيف تحت رجليه والمقهور بدل ما يدور على حقوقه ويطالب بالجزء الباقى له من كرامته بيشوف فين اللى اضعف منه علشان يطلع قهره عليه ؟
هنقولهم اتقتلت فينا النخوة وماتت الكرامة والشجاعة كلمة ملهاش محل من الاعراب بينا ..والشهامة كلمة كنا بنسمع عنها من اجدادنا وحل مكانهم الفساد والبلطجة والبرود والقهر والجبن والخوف من مخبر معدى ولا بلطجى شايل فى ايده مطوة بيتحامى فيه ولا متشرد بنتفرج عليه بكل بلاهه وهو بينتهك حقوق ده وبينهش فى شرف دى .. هنقولهم اتقلت فينا الرجولة وبقينا بنربى ولادنا على امشى جنب الحيط لحد ما الجبن قتلهم وبقوا زى الحشرات ماشيين جوا الحيط ؟
هنقولهم جدودنا وقفوا فى وجوه المحتل وماتوا حفاظا على ارضهم وكرامتهم وعرضهم لكن احنا اللى بننتهك كرامة بعض وبناكل حقوق بعض وبندوس على بعض وبننتهك اعراض بعض وان كنا قاعدين فاضيين شوية مفيش مانع نطلع اشاعات على بعض .. مساكين الاجيال اللى جاية ممكن يموتوا من الحسرة وهما بيقروا ويسمعوا عن مزبلة التاريخ اما الاجيال الحالية فجميعهم يرددوا لو لم اكن مصرياً يبقى اشطة حتى اسألوا الاطفال الصغيرين

Saturday, June 26, 2010

المهم حتة اللحمة

ايون شهيرة قالتها باللفظ كدهون المهم هو حتة اللحمة .. فى برنامج الجريئة الذى تقدمه المخرجة أيناس الدغيدى بصرف النظر ان فى ناس مش بتحبها او بتكرهها يعنى اهو الاتنين بمعنى واحد .. وفى ناس بتقول ياااى دى بجحة اوى اصلها دخلت غرف النوم بالكاميرا .. معلشى يا حبايبى دلوقتى التقدم التكنولوجى مخلاش لا غرف نوم ولا حمام .. وان جبت طفل عمره 10سنين وسالته ايه اللى فى غرفة النوم هيقولك سرير يا عمو .. نرجع لموضوعنا فى حوار جريئ جداً كشفت فيه الفنانة شهيرة النقاب عن ما يحدث فى منزل الحاجه هناء ثروت .. وازاى الفنانة بتدخل متبرجة وبئس المصير بتخرج محجبة وداعيه اسلامية .. نفسى اعرف ايه نوع مسحوق الغسيل اللى بيتم استخدامه .. لدرجة ان حنان ترك فى اتصال تليفونى فى احد البرامج بتقول انا لو بقتل قتيل وسمعت الادان حسيب القتيل واروح اصلى وارجع أكمل .. يا حلولى يعنى هو القتل مش حرام لكن الصلاة فرض يا حاجه حنان ؟ شطورة يا نونا برافوا .. ونرجع لمدى التناقض اللى بيتمتع بيه الجماعة الإسلاميين .. فى سؤال لولبى حلزونى لأنوس هو الشعر بيعمل فتنة ؟ ردت عليها الحاجه شهيرة قالت لها لاء المهم هو حتة اللحمة .. ولما سالتها امال انتى اتحجبتى ليه .. طالما مغطية حتة اللحمة الاخت غرقت فى شبر مية وقعدت تلف وتدور فى الكلام .. وبالفعل لا يتم اثارة شخص من مناطق لا علاقة لها بالاثارة الا مرضى الفيتيشية واللى ياريت يروحوا يتعالجوا بدل ما يقرفونا ويفرضوا حاجات ملهاش علاقة بالدين من قريب او بعيد بدل من الاعتراف بمرضهم ... وننتقل من الفنانة شهيرة وايناس الدغيدى لسؤال هايل رائع لشيخ على قناة الناس .. وهو يا شيخ هل كلمة آلو حرام ؟؟ الشيخ بمنتهى البلاهة طبعاً .. ولما ترفع السماعة لازم تقول السلام عليكم علشان تفوز بالحسنات وتدخل الجنة .. لكن آلو ليست من الدين فى شيئ بل هى بدعة أبتدعها الغرب .. هأوو يا شيخ يعنى هو ربنا قاعد فى السما علشان يشوف مين بيقولوا الو ومين بيقول السلام عليكم ؟؟ ده انت راجل عايز إبادة من الوجود بأمانة ... فى تعليق على اخر بوست لصديق بيقولى السعودية تمنع الاختلاط فى الأماكن العامة ؟ طيب وماذا يا سادة يا مشرعين هيئة الامر بالمنكر والنهى عن المعروف عن الأماكن الخاصة ؟ ولا النقاب بيحل المشاكل ؟

Monday, June 21, 2010

شرشوحة دوت كوم


غالباً لا أهتم كثيراً بكل من هب ودب بل غالباً اطبق نظرية دع الكلاب تعوى والقافلة تسير ولأن مصر قد ابتلاها الله بكل من يتمتع بغباء منقطع النظير وتخلف عقلى لذلك رجعت إلى الخلف مئات السنين فمن ظلم وفساد فى الإدارات العليا ويليها تعسف وروتين قاتل فى الحياة العامة ولكن من الملام ؟؟
هل مصر الوطن ؟
ام المسئولين ؟
ام الشعب ؟
اللوم كل اللوم على الشعب فمنهم المنافق ومنهم المتملق ولولا وجود الراشى ما كنت وجدت المرتشى كل هذه ظواهر مرئية ولكن مع طفرة الانترنت بدأ المرضى النفسيين يطفون فوق السطح فتجد المتسولة عقلياً المريضة نفسياً تطلق على نفسها دكتورة وتنبرى فى الكذب ولكن سرعان ما ينكشف الزيف وتقع الاقنعة لتلقى الزبالة من فمها لتظهر حقيقتها القبيحة فهى فى الحقيقة شرشوحه عزيزى الانترنتى لا تنخدع كثيراً فللشراشيح عدة وجوه وأقنعة مزيفة سرعان ما تسقط مع أول نسمة هواء لتظهر حقيقتهم القبيحة والتى وان دلت فانما تدل على بيئة عفنة تلقى من بطنها من يتمتعون بقذارة منقطعة النظير

Sunday, June 20, 2010

leve me present one the it


على الرغم من أن أفكارى أكتبها من داخل وجدانى تعبر عن أيام حياتى التى عشتها
كان لابد لى أن أعترف أنه لا ولن يوجد فى هذه الحياة سواك يستحق فيمتو ثانية من وقتى
كان لابد لى أن أعترف أنى لازلت فى طور المراهقة حينما استعذبت الشكوى ولم اتحمل انشغالك رغم رؤيتى لمدى ارهقاقك
لم أحتمل الصبر كنساء البحارة وقتها فقط وددت التعرف على إحداهن لتعلمنى الصبر
كان لابد لى ان اعترف وددت الصراخ بأعلى صوتى وأعلن مدى إحتياجى إليك وكأن صوتى الهامس قطع مسافات وحينها لم تتردد ان تعلن عن مدى وحشتك لى ...
افتقدك فالآن فقط علمت بمدى المؤامرة التى عقدها عقلى وقلبى وتركانى وذهبا إليك
أفتقدك حتى وأنا بجانبك ويداك تحضن يداى
حينما أنظر فى المرآة لا أرى إلا صورتك
حينما أتحدث لا أنطق إلا إسمك
حينما ذكر أحدهم إسمه امامى وكان يتطابق مع اسمك فضلت الابتعاد بعيدا حتى لا يسمع دقات قلبى التى بدأت تصل إلى مسامع الجيران
اشعر بالذنب لما ارتكبته تجاهك من حماقات فاغفر لى
لم اقوى على مواجهتك ووضع عينى فى عيناك فاصفح عنى
حينما احتضنت يدك يداى اردت ان اعانقك ان احيا ما تبقى من عمرى بين ذراعيك انت دون سواك
كل شيئ حولى أصبح جامداً لا حياة فيه صامتاً صمت القبور لا حياة ولا شعور
أنت الوحيد فى هذا العالم الذى تملك مشاعرى
قد أتوه فى هذه الدنيا بدونك
اعشقك وأذوب وأنا أسمع صوتك
أعشق همسك أحيا بك ولك يا من تفهمنى أكثر من نفسى

Wednesday, June 16, 2010

شراشيح ومنافقون

النموذج الأول
وهابى متباكى قاعد يشرشح زى ستات الحوارى حتى فى سفالته غلب الشراشيح لاء وكمان قاعد يترجى ربنا يخليه يروح يحارب ما تروح تحارب حد ماسك فيك
ودى عينه من قذارته

هو فى مدعين للاسلام والايمان بالسفالة دى ؟
أللهم عليك باليهود الملاعين..أللهم ماأسقط طائراتهم..اللهم مادمر دباباتهم...اللهم ماجمد الدماء في عروقهم...الللم مايتم أطفالهم...اللهم مارمل نسائهم...اللهم سلط عليهم الأمراض والأوجاع ...اللهم ماسلط عليهم السرطان..اللهم إرزقنا الشهادة بأرض فلسطين...أرجووووووك..أرجوووووك.....(إهئ إهئ)..أرجوووووك...حد حايشك تروح فلسطين ياشيخ؟؟حد حايشك تستشهد ياعم روح وريح



نموذج آخر لواحد بيقول على نفسه دكتور
ولو اتعاملت معاه تلاقيه فى الحقيقة تور معندوش اوبشن اسمه عقل لأنه اختذله بين رجليه فقط
مش عارفه منين جاله ايحاء انه ابن ناس مع ان ولاد الناس المحترمين لا بيخونوا زوجاتهم ولا فى العروض بيخوضوا والمضحك بل المهلك من الضحك بيقولوا على نفسهم مؤمنين ومسلمين ومحترمين ولبيت الله حاجين ... عذراً على عدم نشر فديوهات مع ان موجود منها على كل شكل ولون ايشى مكالمات على محادثات لكنها مش حتتنشر الا فى مواقع البرونو اصل المدونة دى طاهرة وحتفضل طول عمرها طاهرة ياترى بعد كل اللى بنقراه ونسمع عنه فى الجرايد من دكتور قلب بيصور مريضاته على دكتور اسنان على صيدليات بقدرة قادر تتقلب لغرز مخدرات ...مين عيان ممكن يآمن على نفسه يروح لدكتور وفيلم اطباء السى دى لا تزال فى جيبى مستمر على كل التخصصات وقاعات المحاكم بقى كل شغلها على الاطباء والمدرسين لسه فيكى ايه يا مصر لم يصيبه الفساد اذا كان دى اخلاق اللى عينوا من نفسهم مدافعين عن الدين ؟؟ اذا كانت دى اخلاق اطباء على حياة بشر تؤتمن ومدرسين على تنشئة اجيال مسؤلين

Monday, June 14, 2010

من حكمدار بوليس العاصمة

نرجع بالذاكرة لسنة 54 قبل ما حكم العسكر يسيطر على حياتنا وقبل انقلاب 52 ما ينقلب على الاخضر واليابس فى مصر ويحول حياتنا لعيشة بالحديد والنار
فاكرين فيلم حياة او موت بطولة عماد حمدى ومديحة يسرى لما الصيدلى اللى هو حسين رياض قلب الدنيا علشان تركيبة دواء غلط وراح للشرطة والشرطة مش هديت ولا استريحت بل وزعت منشور ووقفت جميع مواد الاذاعة علشان كلها تذيع بيان الشرطة .. من حكمدار بوليس العاصمة الى احمد ابراهيم القاطن بدير النحاس لا تشرب الدواء الذى احضرته لك ابنتك فالدواء فيه سم قاتل .. ولما وصلوا لاحمد ابراهيم فعلا مديحة يسرى بتشكرهم على انقاذ حياة زوجها .. راجل الشرطة قالها بتشكرينى على ايه يا هانم احنا واجبنا السهر على حياة المواطنين ؟
الكلام ده كله كان سنة 54 ومحدش يقولى ده شغل افلام لان الافلام بتستمد المادة الدرامية منين ؟ ماهو من الواقع ؟
طيب خلونا النهاردة فى 2010 هو مش المفروض ان الدنيا بتتطور والحياة بتتقدم بينا ؟
عندنا فى بلدنا بعد سنة 54 لما كانوا بيسهروا لانقاذ حياة مواطن النهاردة بيسهروا لتظبيط وتأييف وتفصيل حياة مواطن .. يعنى يكسروا له فك .. يكسروا له مناخير يكسروا رقبته والله ما هى فارقه المهم الزبون يتظبط ...
خالد محمد سعيد شاب ممكن يكون ابنى او ابنك او اخويا او اخوك او صديقى او صديقك .. المهم انه شاب زى اى شاب مصرى نزل نت كافيه .. وايه المشكلة ؟
لكن مخبرين يدخلوا نت كافية علشان يفتشوا اللى قاعدين فيه .. جيش العدو نفسه مش بيعمل كدا ؟
ان مخبرين يسحبوا شاب لمجرد انه بيسالهم انا بتفتش ليه ويضربوا فيه لحد ما يموت .. وحتى بعد ما يموت يكملوا فيه ضرب ويقولوا اصله بيمثل ؟ زبانية جهنم نفسهم مبيعملوش كدا
ان المجرمين يبقى معروف اسمهم وشخصهم وعلى الرغم من ذلك يخرجوا من النيابة بعد مالفقوا للولد اللى قتلوه وهو بين ايدين ربنا الف تهمة وتهمة ؟
ان الداخلية كلها تتستر على اتنين مخبرين وكل شوية يطلع بيان مختلف عن اللى قبله
شوية خالد كان تاجر مخدرات وشوية هربان من الخدمة العسكرية وشوية هربان من احكام .. ابليس اللعين نفسه ميفكرش فى كدا
لصالح مين بيانات الداخلية المتفبركة ؟ وعلشان ايه الداخلية كلها تطلع الولد بعد ما قتلوه شيطان يستحق الرجم ؟
من سنة 52 لسنة 2010 قتلوا فينا النخوة حتى أصبحت كل أنثى ماشية على الأرض مشروع سرير مهما ارتكب فى حقها من اخطاء برضه هى اللى غلطانة .. شاب يتعذب ويتقتل على مرأى ومسمع من الجميع وكأنه سيرك منصوب الكل بيتفرج
خالد اتقتل على ايدين مجرمين ولو حقه ضاع واللى قتلوه مش اتحاسبوا يبقى الدور الجاى عليا وعليك وعلى اولادى واولادك ... ووقتها اوعدكو برضه الكل هيتفرج



الحكاية كاملة وشهود عيان من موقع الحادث

Wednesday, June 9, 2010

الوجه الحقيقى لعصابة حماس

لكل اللى بيقولوا الاخوانجية مظلومين
لكل اللى بيقولوا الاخوانجية مضطهدين
لكل اللى بيقولوا ياريتهم يحكمونا اصل هما بس المؤمنين اوى والمسلمين
استعدوا يا حلوين وشوفوا اخوانهم اللى اسمهم حماس بيعملوا ايه فى فلسطين
عايز تبقى قاعد فى بيتك تلاقى عصابة هاجمه عليك وتسحب كل اللى فى البيت من الصغير للكبير تعذبه وتبهدله اصلهم بيطبقوا الشريعة وانت بتسمح لقرايبك يزوروك فى بيتك ليه .. يعنى ايه اهلك يزوروك انت لازم تقاطعهم وتعيش لوحدك علشان حماس تتبسط وتبطق شرع الله
لكل اللى تفكر تصيف اقعدى فى بيتك مش مشكلة صيفى فى البانيو لانهم ممكن يقبضوا عليكى بحجة انك بتضحكى فى البحر
لكل اللى بيفكر فى الجواز لبس العروسة النقاب الاسود واسحبها وراك وروح على بيتك بلا فرح بلا معازيم بلا وجع قلب
اما اسرائيل ؟؟؟؟ وبدلاً من علامات الاستفهام طبعا اتضح التحالف العظيم
والآن اترككم مع الوجه الآخر لعصابة حماس

Sunday, June 6, 2010

ده الموضوع طلع كبير ؟؟ إهداء لكل المخدوعين

الإخوة الحلوين اللى بيلبسوا طرحة بيضة وجلابية ودقن مترين لزوم عدة الشغل طلعوا كلهم اكبر نصابين .. ياريت الجماعة المخدوعين يقروا المقال ده علشان يعرفوا بجد مين اكتر حد بيشوه صورة الاسلام والمسلمين .. علشان لما الناس المحترمة تمشيكوا من بلادها بسبب الغباء المستعصى وانتوا مركزين اوى مع بتوع التمويل البترودولارى مش تيجو تعيطوا وتقولوا اصلنا مضطهدين .. اذا كانوا بيطلعوا على بعض اشاعات وبيدوا اسافين فى بعض والاسم قال ايه رجال دين

القنوات الدينية باعت الشيخ حسان بعد إغلاق "الرحمة"



كشفت أزمة قناة الرحمة النقاب عن أسرار عالم شيوخ السلفية، والانشقاقات العميقة بينهم فى مصر، وعن الصراع الخفى بين القنوات السلفية، حيث تعد الأزمة مثالا حيا لاحتدام الخلاف الذى يصل إلى حد القطيعة بينهم، فعندما أصدرت إدارة النايل سات قرارا بحجب قناة الرحمة من على قمرها بسبب معاداتها للسامية. لم تتحرك أى من القنوات السلفية، والدينية لدعم الرحمة.

ولم يكن موقف القنوات الدينية يختلف كثيرا عن موقف قناة الرحمة من إغلاق بعض القنوات الدينية مثل الأمة، والبركة، والحكمة. حيث أغلقت قناة الأمة لأسباب مادية، والتى كانت تتصدى للشبهات التى تثار حول الإسلام، ولم يسجل الشيخ محمد حسان موقفا تجاه تلك القناة، بل لم يقدم يد العون يوما لقناة الأمة التى أسسها أبو إسلام أحمد عبد الله وكانت تبث من خارج مصر على القمر الصناعى نور سات.

و كانت قناة البركة قد أغلقت فى مطلع العام 2008 دون أن تسجل الرحمة، أى موقف من قريب أو من بعيد للتعاطف مع قناة البركة.

وجاء إغلاق قناة الحكمة فى 27 فبراير 2008 مفاجأة للجميع، ومع ذلك لم يكن لقناة الرحمة أى موقف لمساندة «الحكمة»، التى كان الشيخ حسان أحد أعمدتها ونجماً من نجومها قبل الإغلاق مباشرةً.

بل إن شريط الرسائل الذى يوجد أسفل شاشة «الرحمة» لم يمرر أى رسائل كان يكتب بها اسم الحكمة. كما يؤكد الإعلامى هانى الديبانى، مشيرا إلى أن هذه المواقف تكشف عن صراع خفى بين تلك القنوات.

وقال الديبانى «هذا ليس تنافسا، فالتنافس أحيانا يكون شريفا ومطلوبا ولكن هذا صراع».
وأرجع الديبانى هذا الصراع إلى أهواء شخصية ومصالح خاصة وبيزنس خاص لبعض الشيوخ الذين تربعوا على عرش الفضائيات السلفية.

وقبل أن يؤسس الشيخ محمد حسان قناة الرحمة، طلب أن يكون شريكا بحصة كبيرة فى قناة الحكمة، مع وسام عبدالوارث رئيس مجلس إدارة القناة ويكون هو المشرف العام ورئيس اللجنة العلمية عليها.

وبعد رفض عبدالوارث لهذه الشراكة، بدأ فى التأسيس لقناة الرحمة التى انطلقت فى يوليو 2007.

وسبق ذلك انسحاب الشيخ حسان من قناة الناس، التى كانت سبباً فى شهرته، ونجوميته من خلال برنامج أحداث النهاية وبرنامج فضفضة.

وكانت الذريعة التى ترك الشيخ حسان بها قناة الناس هى ظهور الداعية عمرو خالد على القناة أثناء حملته ضد المخدرات. وهو صاحب منهج منحرف عن الإسلام ويظهر فى قنوات تظهر بها النساء وبها موسيقى كما يرى الشيخ حسان.

واللافت فى الأمر أنه فى نفس العام ظهر الشيخ حسان على شاشة «اقرأ»، التى كانت من أدلة اتهامه لعمرو خالد.

وفى العام التالى ظهر الشيخان حسان ومحمد حسين يعقوب على شاشة قناة الرسالة، التى كانت تعد أيضا من القنوات التى يتم التحذير منها، وأبرزها التحذير الصريح للشيخ من الدكتور طارق سويدان، الذى قال عنه بالحرف (نحذر من فتنة جديدة اسمها طارق سويدان).

ويتساءل الديبانى كيف للشيخين يعقوب وحسان أن يظهرا على قناة وصف رئيسها على أنه فتنة وعلى شاشات قنوات بها نساء وموسيقى وهى معقل ومركز عمرو خالد؟ مشيرا إلى أنه من هنا يأتى التشويش على البسطاء من المسلمين وفتنتهم بحق من يصدقون وإلى من يسمعون. والغريب أن قناة الرحمة كانت تبث عبر ثلاثة أقمار، هى النور سات والعرب سات والنايل سات. فى حين أن أى قناة تنفق على قمر واحد ترهق مالياً، رغم وجود إعلانات بها، فكيف لقناة الرحمة أن تنفق على ثلاثة أقمار الآن، وليس بها إعلانات بالمرة.

ومن الأمور الملفتة للنظر فى هذا الصراع، غياب الشيخ يعقوب عن مسرح الأحداث فى أزمة قناة الرحمة، رغم أنه كان أحد نجومها، بالإضافة إلى أن الشيخ يعقوب أيضا كان له موقف سلبى من إغلاق قناة الحكمة.

ولم يكن صراع شيوخ السلفية على كعكة الفضائيات هو الأول من نوعه، بل سبقه صراعات أخرى، كثيرة، من بينها صراعات للسيطرة على المساجد بين أتباع شيوخ السلفية، وصلت إلى حد التراشق بين أنصار الشيوخ وتطورت إلى المشاجرات فى بعض الأوقات.

ثم تأتى مرحلة الكاسيت التى شهدت أيضا صراعا خفيا بين شيوخ السلفية محمد حسان ويعقوب وإسحق الحوينى وغيرهم، وهناك كثير من الخلافات التى حدثت أثناء هذه المرحلة، وبدلا من أن تتكامل هذه الشركات فيما بينها لتبليغ الدعوة التى يتبناها التيار السلفى، اتخذت أشكالا متعددة من المنافسة التى وصلت إلى الحرب فى بعض الأوقات حتى أنه تم إغلاق العديد من الشركات التى كانت تنتج الكاسيت لهؤلاء الشيوخ، خاصة التى كانت تنافس شركة الشيخ حسان. كما أن هناك قصصا من سرقة عناوين الشرائط التى كان يتم إنتاجها حيث يقوم شيخ ما بعمل إصدار بعنوان ما، وبعد التسجيل وهو ينتظر نزول الشريط الأسواق يفاجأ بنفس العنوان يصدر لأحد الشيوخ الآخرين، بالإضافة إلى المضايقات التى كانت تحدث للبائعين لو قام بعرض شريط لأحد الشيوخ فى درس الشيخ يعقوب أو حسان من أنصار الشيوخ واتهام الآخرين بأنهم مبتدعون.

وتأخذ المنافسة ذروتها بعد ظهور نجم جديد فى عالم السلفية وهو الشيخ محمود المصرى أبوعمار الذى كان إصدار شريط (أختاه وقفة مع النفس) . الذى كان يدعو فيه إلى الحجاب، وكان هذا الإصدار فتحا ً على الشيخ المصرى حيث أصبح الشيخ مشهوراً بالأوساط السلفية، مما أثار الشيخ حسان وشركته من أن إصدارا يتفوق فى الأسواق على شركتهم، وبدأت الحرب الخفية غير المعلنة بين الشيوخ التى مازالت رحاها دائرة إلى الآن ولا تعلمها ولا تشعر بها الجماهير العريضة لهؤلاء الشيوخ.

وانطلق الشيخ محمود المصرى بعد هذا الإصدار لشريط أختاه وقفة مع النفس وشق طريقه فى عالم الكاسيت وفى عالم الشهرة.

وظلت مرحلة شريط الكاسيت مرحلة من رحلة الصعود لهؤلاء الشيوخ وهذا التيار السلفى حتى كانت النقلة الكبرى التى كانت فاتحة الخير على هؤلاء الشيوخ جميعا وهى مرحلة الفضائيات.

Friday, June 4, 2010

دى مشيت تعيط


اتكلموا كتير وقليل عن البنت السافلة اللى كل ذنبها انها بتنزل من بيتها سواء بقى رايحه الجامعة او نازلة شغل او يمكن نازلة تشترى دواء لحد فى بيتها بين الحياة والموت .. اتقال اصلها سافلة خارجة من بيتها ليه اذا كان ولابد انها تخرج يبقى لازم تلبس الكفن المسمى مجازاً بالنقاب ولم يتلفتوا لحظة واحدة للمتسكعات على الكورنيش والكبارى فى احضان الشباب ومش فيهم واحدة توحد الله من غير حجاب .. الا فى جولة عابرة مع احدى الصديقات مشينا على كوبرى قصر النيل نعدهم لدرجة اننا اتلخبطنا فى العدد وكلهم منقبات ومحجبات ومرتديات الازلال الايرانى .. قولت لها اصورهم قالت لى عييييييب ان الله حليم ستار .. ونرجع لموضوعنا الاساسى وهو الفحل المكتمل الذكورة اللى قعد يفتخر فى الباص بسفالته وانحطاطه وانه ازاى دون من غير جوان وازاى مفيش واحدة تفلت من تحت ايده غير لما يعاكسها وازاى لما مرة بنت ردت عليه شتمها وشتم اللى جابوها لدرجة انها وقفت قدامه مش قدرت ترد ومشيت تعيط .. وصاحبه قاعد جنبه يهز له راسه بالايجاب وكانه يقوله الله الله اعد على مسامعى كمان وكمان ... ردت عليه واحدة ست قالت له وانت فى قمة سعادتك كدا مش بتفتكر اختك ؟ قالها انا اختى الكل عارفها تبقى اخت مين لو خرجت من البيت الف واحد يحميها .. قالت له يعنى انت مشهور ونار على علم كدا فى كل مكان مش بتروح جامعه ولا بتمشى فى شارع محدش يعرفك فيه ؟ قالها والله انا عندى اختين والاتنين منقبات ومخطوبين يعنى اللى يقرب من واحدة فيهم يبقى هو اللى لعب فى عداد عمره .. قولت له طيب قبل ما تتنفخ عروقك كدا وانت بترد على المدام اللى بتكلمك ابقى لما ترجع البيت اسال اختك المنقبة والمخطوبة هى اتعاكست فى الشارع النهاردة كام مرة .. وابقى انزل دور عليهم وشوف عدادات عمرهم تم استهلكها كام مرة .. ملحقش يرد عليا .. طلع صوت لواحد من قدام قاله اللى انت بتعمله ده بتقنن بيه كدا المعاكسة والتحرش .. يعنى انت ماشى تعاكس وبتحكى لصاحبك خليت البنت تعيط لمجرد انها ردت عليك .. يبقى مش تلوم على واحد تانى لما يخلى اختك او امك او بنت خالتك تعيط لما يقل ادبه عليها وترد عليه .. طبعا الحيوان مش راضى يعترف بالجرم اللى بيعمله وقال اصل المنقبات مش حد بيعاكسهم لكن البنات اللى بتنزل لابسه ومش لابسه وفى بنات بتنزل مخصوص علشان تتعاكس .. طبعا نفس المبررات ونفس الكلام المعاد من كل واحد سافل ومنحط .. عجبتنى اوى الست اللى كانت بترد وقالت له وانت لما بتلبس بنطلون وسط ساقط وبتوقف شعرك بالجيل حد بيتحرش بيك .. الولد قل ادبه طبعا فى الرد .. فما كان منها الا انها قالت له مع انى مش اتمناها لحد بس روح الهى ربنا يقعدها لك فى اعز الناس عندك علشان توجعك ونشوف كانت نازلة مخصوص علشان تتعاكس ولا لاء ... طبعا اللى لفت نظرى فى الحوار ده كله مش الحيوان اللى بيفتخر بمعاكسته وانه شتم البنت لدرجة انها كانت مشيت لما ردت عليه ... الى لفت نظرى تفاعل البعض وان كان فى ناس بترد بحماس وبتفهمه الغلط اللى بيعمله انه مردود عليه تانى .. ده معناه انه بجد اصبح فى صحوة وان الناس بدأت تفوق وتعرف ان السفالة لا تتجزأ ... عقبال ما يفوقوا بقى من غيبوبة يا مولانا الشيخ هل ادخل الحمام برجلى الشمال ولا اليمين

Tuesday, June 1, 2010

ده العمل بقى حرام

ضحكو علينا واحنا صغيرين وقالوا لنا العمل عبادة والنهاردة بس اكتشفت ان العمل فى البنوك حرام .. رحت البنك الصبح لاقيته زحمة جدا المهم اخدت دورى فى طابور طويل مش بيمشى اصلا ولما سالت هو الطابو ده واقف كدا ليه ... قالوا اصله بيخلص 2 رجاله وواحدة ست .. حتى فى ده تمييز ما علينا .. بس انا واقفه من ساعه ومش شوفت ولا ست وراجل طلعوا .. وايه الناس دى كلها وبيقولوا الازمة الاقتصادية مأثرة ... امال لو مش مأثرة كانت زمان البلد كلها فى البنك دلوقتى اللهم ما لاحسد .. رد عليا واحد مثقف قالى فى بلاد بره والدول المتقدمة كل واحد بياخد رقم وبيقعد معزز مكرم ولما يجى دورة رقمه بيبان على شاشه وفى حد مخصص بينادى عليه .. لسه مش رديت ولا لحقت انطق لاقيت صوت واحدة ست بتقول ماهو لو احنا راضيين بالمقسوم مكانش ده بقى حالنا .. احنا بنتمرد على النعمة اللى احنا فيها .. قولت لها طيب الوقفة الهباب دى فى عز الحر ده وبتقولى نعمة ؟؟ قالت لى فى ناس غيرك فى الصومال مش لاقيين ياكلوا قولت لها حاضر هبقى اروح اكلهم .. هو علشان فى ناس غيرى مش لاقيه تاكل المفروض انا اقف فى طابور زى ده واغنى له انا بعشقك .. هو الواحد لما يبقى اجابى ويتكلم عن سلبيات شايفها يبقى بيبطر على النعمة ؟؟ رد واحد بصوت جهورى وكأنه واقف فوق منبر بيخطب الجمعة .. وبيقول انتوا بتتخانقوا على ايه .. كل اللى واقفين هنا دول فلوسهم حرام .. الراجل بتاع فى بلاد بره والدول المتقدمه قاله والله طالع عينينا فيها حرام ايه بس .. قاله انت مش بتشيل فلوسك دى فى البنك وبتجيب لك ربح هو الربح ده انت تعبت فيه .. اذن انت بتكنز فى مال حرام .. والموظفين اللى بيسهلوا لك المال الحرام ده مرتباتهم من مال حرام الناس وقفوا يبصوا له وكأنه كائن خرافى لسه نازل من كوكب تانى وساله واحد منهم طيب الناس اللى بتودع فلوس وفهمنا ان الربا حرام مع ان فوائد البنوك مش ربا ومش حتناقش فى الموضوع ده علشان لا مكان ولا وقت نقاش لكن الموظفين مرتباتهم حرام ليه .. راح قاله الشيخ عطية صقر عليه رحمة الله قال أن مباشرة الاعمال التى تتعلق بالربا من كتابة وغيرها إعانة على إرتكاب المحرم وكل ما كان كذلك فهو محرم شرعاً ... الراجل قاله طيب الناس اللى بره مصر وبتحول فلوسها على البنك لاهل بيتهم يصرفوا دول كمان فلوسهم حرام .. قال يا استاذ اتقوا الشبهات لو انت فى مكان النشاط اللى فيه بعضه حلال وبعضه حرام فالعمل بها حرام .. اتسحبت من لسانى وقولت له معلشى احنا كلنا كدا فلوسنا حرام وراضيين بالحرام ده انت واقف هنا بتعمل ايه وواخد لك دور فى طابور ليه ؟؟ وكان رده مقنع جدا
حيث انه رفع نبره صوته لاعلى درجة وراح قايلى حسبى الله ونعم الوكيل
وبناء على كلام هذا المهرقط الكبير
فعلى كل من يعمل فى بنك بتقديم استقالته فورا اصل مرتبه من مال حرام و الله يرحم الشيخ بتاعه اللى قاله انه يحرم على الناس عيشتها وفى نفس الوقت يروح يعمل زيهم