Desert Cat Search
قطه الصحراء: 5/1/10 - 6/1/10

Sunday, May 30, 2010

رضعى زميلك يا شابه


كل يومين يتحفنا دعاة الوهابية بفتوة لولبية لوزعية مهلبية .. منذ عامين اثارها الدكتور عزت عطية ولكنه سرعان ما عاد الى رشده وتم فصله من عمله وقام بالاعتذار .. وما ان غابت عن الاذهان حتى عادت مرة اخرى فى ثوبها الجديد للشيخ العكبيان .. ولا ادرى ما سر هذا الإصرار الشديد على الرضاعة الطبيعية لشحط طويل عريض .. يعنى الناس دى بتخدع مين ولا بتضحك على عقول مين ؟؟ يعنى ايه قارفينا ليل نهار فى الفضائيات اتكفنى واتغطى وانتى عورة ومن ناحية تانية بيطالبوها تحط شحط طول بعرض على صدرها علشان ترضعه 5 رضعات مشبعات ؟؟
ولنفترض يا شيخ انها آنسة ومش بترضع .. ينفع اللبن الصناعى ؟

ولا ده من اختراعات الغرب الكافر ولو رضعت المحروس زميلها او السواق بتاعها او الخادم اللى عندها فى البيت لبن صناعى يبقى كفر ورجس من عمل الشيطان ؟؟
يعنى هى تغطى شعرها فرض وتعرى صدرها وترضع منه برضه فرض ؟؟
منين جيتوا بالفروض دى ؟؟
وياترى ستات الخليج هيجيبوا لبن منين لكل العمال اللى فى بيوتهم دول ؟
ولو مصلحة حكومية كلها رجالة وفى 2 موظفات يعملوا ايه المساكين ؟ يوقفوهم فى طابور ؟

فضحتونا وعريتونا فى وسط الناس المحترمة الله يكسفكوا .. روح يا شيخ قبح الله وجهم منك له اكتر ماهو قبيح

Thursday, May 27, 2010

كافر - جاهل - احمق

كلمات تنطلق كنثار الريق عند العطس دون وعى أو إدارك ممن ولوا أنفسهم أولياء على الدين ولا اعلم من اين اتوا بهذا الحق .. فالمسلم ليس سباب و لعان اذا كانوا حقاً كما يرددون انه يحافظون على الدين الاسلامى .. وهل من الممكن ان ينقرض الدين الاسلامى لمجرد ان تخلع المرأة نقابها بدلاً من انها متخفية على هيئة قطاع الطرق ؟؟ ولماذا لم ينقرض الدين الاسلامى فى العصور التى كانت فيها مصر هى منارة العلم وملكة الموضة .. هل الله خالق البشر غير قادر على حفظ دينه .. حتى يحافظ عليه النقاب ؟؟ لماذا الحرب الشعواء على كل من فكر فى أمن وأمان هذا المجتمع من الإرهابيين والجميع يعلم مدى معاناة مصر من الإرهاب من التسعينات وحتى فبراير 2009 .. الم ترتكب منقباتان جريمة تفجير الاتوبيس السياحى بعبدالمنعم رياض ؟ الم يتم القبض هلى رجل يرتدى النقاب ويقف بطابور السيدات للحصول على العيش ؟ الم يتم القبض على مئات من الذين يرتدون النقاب ويصعدون الى شقق عشيقاتهن ؟ الم تقف العاهرات مرتديات النقاب بشوارع الهرم وجامعة الدول .. الم يسير احد على كورنيش النيل ليرى المنقبات والمحجبات ومرتديات الازلال الايرانى فى احضان الشباب على مرأى ومسمع من الجميع ؟ لما كل هذا الهجوم الضارى على الدكتورة زينب رضوان

لا لشيئ سوى لأنها طالبت بقانون بمنع النقاب من الشارع المصرى لحفظ الأمن العام

وأترككم مع التعلقيات وده اقلها

اخرسى با فاجرة اخرسى يا فاجرة عليكى لعنة الله

فى طبعاً اللى كفرها وفى اللى شتمها بالأب والأم وحقارات كتير من عقول وان دلت فإنما تدل على مدى الزبالات اللى اترمت فيها على مر سنين مضت
{ ليس المؤمن بطعان ولا لعان ولا فاحش ولا بذيء } رواه أحمد والترمذي
هو فين الاسلام ده ؟؟ من الناس دى ؟ ده حتى لما شيخ الازهر مات كانوا شمتانين فيه والردود على خبر وفاته كانت كلها من عينة يروح يتشوى فى نار جهنم .. خلاص النقاب بقى هو جوهر الدين ؟؟ مش مهم تكدب مش مهم تسرق مش مهم تدارى فيه وترتكب الفواحش مش مهم تصل رحمك ممكن تاذى جارك طالما لابسه النقاب .. الغريب والمدهش ان الستات اللى كتبوا تعليقات كلهم اجمعوا ان اللى عايزة تتنقب تقعد فى بيتها او مش تخرج غير بمحرم طالما عايزة تقلد اسيادها بتوع السعوديه .. لكن تخرج وتتمشى فى الشارع وتتدلع وتعيش حياتها والاسم شريفة علشان حتة القماش فده مرفوض واغلب الشتيمة والسفالة وقلة الادب دايما من الرجالة .. طيب طالما الرجالة دى هايجة على نفسها مش تروح لدكتور ليه وتتعالج ؟ من امتا المريض بيطلب من السليم ان يتدارى عن عينيه علشان مش يأذيه ؟ وبعد ما كان النقاب عادة وليس عبادة بقوا بيقولوا عليه فرض


دكتورة زينب رضوان انتى بجد انسانة شجاعة دع الكلاب تنبح وكملى فى طريقك

Wednesday, May 26, 2010

كموج البحر


تتقلب بنا الحياة كموج البحر تاخذنا داخل منعطفها مداً وجزراً أحمق من يتخيل انها ستسير بنا فى طريق واحد فقط وهو اما السعادة الدائمة واما الشقاء الابدى يقولون انك لا تختار يوم موتك أو يوم مولدك ولكنك تحتار ما بينهما كاذبون ... فأسمك الذى هو ملكك يختاره لك الآخرون سائر المواقف الحياتية اليومية مشتركة أيضاً مع آخرون فمن يملك أمره ومن يعبث بقدر من المفترض أنه قدرنا ؟ أستمع إلى اغنية هذه ليلتى لتفاجأنى سيدة الغناء وسط زحمة الافكار بكلمة سوف تلهو بنا الحياة .. لم يكن كلام اغانى قط ان ايامنا بالفعل كالكرة التى تسقط من منحدر ليلتقطها اخر فيرفعها إلى أعلى عليين

حلــــــــــــم
معك أشعر بأننى ما زلت على قيد الحياة أكرر معك فقط أحلم أن نصنع دنيا ليس فيها إلا موسم واحد هو الربيع واتفاقية حب مشتركة حبى لك مثل الموج يتجدد كلما لمس قلبك ويتدفق بالمشاعر كل لحظة
ومع هبوط درجات الحرارة وانفعالات تتقاذفها الامواج فقد تبدل الحلم الى

وهــــــــــــــــــم
قد كان وهماً صدقنى لكتك رحت تطارده فتهاوى وهمك وتبدد فشعرت بشئ تفقده الخطأ الأكبر يا قلبى أن تسكن بيتاً من وهم كى تصنع نبضاتك فيه الخطأ الأكبر يا قلبى أن تسكن بيتاً من وهم وتفلسف كل معانية

حقاً مجنون من يعتقد انه يملك الحقيقة المطلقة
أحمق من يتخيل أنه ليس لعبه عبثية بين يدى القدر

Sunday, May 23, 2010

على مسرح مصر

مكان ليس له عنوان عروضه مستمرة وغير محددة البداية او النهاية
من يملك الحلم الحقيقى ؟
مين يجرؤ على نطق كلمة طموح فى ظل سوق نخاسة بأمر امير الأمراء ؟
من يستطيع المطالبة بأبسط حقوقه إذا كان عقابه هو السحل فى الشوارع والضرب بيد من حديد وسعيدة عليكو يا شعب مصر اليوم فى عيد
ولكن اى عيد ونيل بيتسرب من بين ايدينا
وساعتها حتى المثل الشعبى الصارخ اشرب من البحر هيبقى مجرد خيال علمى
اى مصر ومواطنيها ابسط حقوقهم بيطالبوا بيها وبدل من اعتراف نظام عاجز بفشله كان السحل والضرب والإهانة من نصيب عمال كل اللى طالبينه مش شقق على النيل ولا منتجعات فى السخنة ولا الساحل كل همهم هو تحقيق مطالبهم
مين يقدر يقول كلمة تغيير هتلاقى كدابين الزفة اعتلوا خشبة مسرح خيانة الوطن وقاموا بثرد حكايات واقاويل ايشى عميل والتانى كان جده السابع عشر قتال قتله ومن المساجين واللى نعرفه احسن من اللى منعرفوش وعلى الاقل اللى موجودين دلوقتى سرقونا وبسرقيتهم دمنا وقوت عيالنا شبعانين
اضرب الشعب فى بعضه وطلع سلفيينك على اخوانك على كدابينك ايشى يخسف بالمرأة سابع أرض والتانى يكفرها والتالت يأمر بوأدها ما هى اصلها ناقصة عقل ودين وهى برضه اللى هتدخله النار المسكين اصله مهما عمل ملاك ومبيغلطش ابدا لكن هى السبب اللى هتوديه اسفل سافلين
كلهم بهلوانات على خشبة المسرح بيأدوا أدوراهم ببراعة واللى بيدفع الثمن عامة الشعب المساكين
والبهوات الكبار فى قصورهم بيتفرجوا ومبسوطين بالذمة حد يلاقى شعب زى ده ويسيبه كدا هدية وبمنتهى البساطة لحد تانى يحكمه

Monday, May 17, 2010

المفروض يطردوا الهمج

هاج الجميع فى أنحاء الوطن العربى وماجوا حينما سمعوا ان هناك رسام سويدى قام برسم النبى محمد صلى الله عليه وسلم .. وكالعادة كثرت الإشاعات وتناقلها الجميع واكاد اقسم على جميع الكتب السماوية ان غالبية من يسكبون البنزين على النار لم يروا الرسومات التى يتحدثون عنها بل ان الدليل فى مثل هذه الحالات هو قالوا له .. وبعد عدة ايام نشرت المنتديات والمواقع الإخبارية بان الرسام مات محروقاً والجميع قالوا هذا هو انتقام الخالق لسيد الخلق .. وراينا السيارات تزينت بعبارة بابى انت وامى يا رسول الله .. والتشرتات لابسها شباب فداك اموالى يا رسول الله وهو كل اللى فى جيبه مش يكمل 2 جنيه فعادى فداه كل الاموال مش فارقه .. وتمر فترة من السكوت لينكشف الكذب وليعلم الجميع ان الرسام الذى انتقم منه رب العزة لانه قام برسم نبيه الحبيب واخذه اخذ عزيز مقتدر .. وانتقم منه شر انتقام .. حى يرزق ليتجلى الكذب ".. فقام البعض من الهمج بضرب الرسام اثناء ندوة كان يلقيها .. ولم يكتفوا بذلك بل فى اليوم التالى قاموا بإشعال النار فى منزله .. واثناء اشعال النار لم يكن الرسام موجوداً بمنزلة .. اى همجية التى يتصرف بها هؤلاء الغير مسؤلون عن تصرفاتهم .. ويصرخون ويتباكون بانه الا رسول الله .. هل لو كان موجود بيننا رسول الله كان سمح بكل هذا الغباء والإنحدار .. هل هناك مخطط من الإخوة المتأسلمين بتشويه الدين بكل ما استطاعوا ؟؟ هل هؤلاء المتطرفون حقاً يعلمون شيئاً عن الأديان السماوية الثلاث التى دعت إلى الحب والتسامح ؟؟ ام انهم يسيرون وفق مخطط سريع وموزعين نفسهم شوية فى قنوات التطرف ارهاب فكرى وصراخ وعويل باسم الدين وشوية دايرين عند الغرب الكافر يقرفوهم من كل ماهو اسلامى .. هو مش الدين المعاملة ؟ كل ما استغربه واستعجبه حقاً هو ليه الغرب سايبين الهمج دول عايشين عندهم

Friday, May 14, 2010

وليموتوا بغيظهم

ايوا بجد هيموتوا بغيظهم انشاء الله اصل الناس الصهاينة دول متغاظئين ومنكادين مننا على الآخر اصل مش عندنا جهل ولا تخلف ولا اعتصامات مالية الشوارع ولا فقر ولا جوع ولا بطالة .. الناس الصهيانة دول بيحقدوا علينا موووت على اساس ان المسلمين مش متخلفين لا سمح الله ولا موصومين بالارهاب فى جبينهم مكان ما يروحوا .. ده حتى فى الصومال مش بيجلدوا الست اللى بتلبس براه على اساس انها كدا بتغش البضاعة .. امال عم الشيخ يمتع نظرة ازاى وهى ماشية فى الشارع وصدرها بيتهز .. يعنى تلبس براه وتحرمه من المتعة دى ؟؟ لاء يبقى لازم جلدها السافلة دى ازاى يتحرم من متعة النظر اللى المفروض انه منهى عنه فى القرآن طبعا . بامر غض البصر .. ولا فى طالبان بيرموا مية نار فى وجوه البنات اللى بتفكر تنزل بس تتعلم ولا بيهدموا المدارس على دماغهم ودماغ اللى يتشدد لهم كمان .. ولا بيولوعوا فى اى محلات خلاف اللى بتبيع الجهل المدقع البخور واشرطة الارهاب اللى بيلزقوها فى الاسلام عنوة .. ولا فى مصر بيتحرشوا بالبنات وان اتكلمت يقولك مش شايف لبسها وان قالت لبسه نقاب يقولوا اصلها لابساه تتدارى فيه وان قالت لابسه محتشم وطالبت بحقها يقولوا عليها اسرائيلية .. يبقى ايوا فعلاً احنا الصهاينة حاطينا فى دماغهم .. واى فكر هجص انت بتتقاضى عليه فلوس وان فكر واحد يناقشك فيه قوله على طول انت عميل صهيونى .. وهو هيبعد عنك وانشر فكرك الغبى براحتك ماهو محدش يقدر يتكلم اصل اى حاجه مخالفه للى بيدولك فلوس على طول مؤامرة صهيونية

Thursday, May 13, 2010

تصويت بالاجماع ضد النقاب عقبالنا

فى خبر عظيم جدا جدا

البرلمان الفرنسى يصوت بالإجماع ضد النقاب


امتا بقى البرلمان المصرى يتحرك والشارع المصرى يتحرك علشان نلغى الهباب اللى اسمه نقاب ده
الناس بتتقدم وبتتطور واحنا كل همنا حتة القماشة اللى بتحجب الشعر والعقل معاه
المغيبين المتخلفين يدعون ان كيس الزبالة المسمى مجازاً بالنقاب من الاسلام على الرغم من الاجماع على انه عادة وليس عبادة ولكن لمصالح شخصية واغراض دنيوية بحتة تم تسيس قطعة القماش ليفرضها السلفيين والوهابيين على الدين بل جعلوها الركن السادس من اركان الاسلام .. وبصراحة انا اخر حاجه سمعتها ان النبى محمد هو خاتم الانبياء والرسل واركان الاسلام اللى نزل لنا بيهم كانوا خمسة ومش كان فيهم المدعو اللى اسمه حجاب او نقاب ده .. لو فى رسول نزل بعده ياريت حد ينورنا .. علشان ينهى الجدل القائم والجهل القابع فى الدول العربية
اللى كل همهم هو حتة القماش لحد ما وصل الحال بالعرب الى احتلال قائمة التخلف من فوق اما فى العلم والتقدم والرقى فهما ولله الحمد مش طايلين حتى ديل الامم .. ونظرة على دولة اسرائيل اللى ليها يادوب كام سنة .. ونظرة على ترتيب جامعتها وتدنى مستوى التعليم فى الوطن العربى .. ده غير موافقة منظمة التعاون والتنمية الاقتصادية التى تضم الدول الأكثر ثراءً فى العالم على انضمام كل من إسرائيل وأستونيا وسلوفينيا إلى عضويتها .. وخلينا احنا فى حتة القماشة .. بلا نقدم بلا اختراعات بلا ابتكارات بلا ارف .. كفاية علينا محمد حسان والحيوان واخوانهم يشبعونا صراخ وعويل فى القنوات الفضائية

Tuesday, May 11, 2010

طوارئ كمان وكمان


لقد تفضل ومنّ علينا السيد رئيس الجمهورية
لالالالا مش بتخفيض الاسعار
ولا بتشغيل الشباب العاطلين
ولا بشقق لسكان العشوائيات
ولا بتوفير الرعاية الكاملة لاطفال الشوارع
ولا تلبية احتياجات المعاقين
ولا بتلبيه مطالب كل العمال المعتصمين
ولا بصيانة القطارات وترميم العبارات
ولا برصف طرق وعمل كبارى جديدة
ولا بتوفير حياة كريمة آدمية للمواطنين كل دى حاجات هايفة وتافهه رئيس الجمهورية مهامة اكبر من كدا بكتيييييييير ولما نقول قرار جمهورى يبقى اكيد هو مد قانون الطوارئ لمدة عامين
سامعة حد بيقولى ليه عامين ؟؟
طبعا الاجابة جاية من الكنترول حالاً
وهى الانتخابات الرئاسية يا حلوين وطالما فى طوارئ يبقى التوقعات معروفة رئيسنا القادم مين

Saturday, May 8, 2010

واتارينى مكنتش عارفه



لما كتبت بوست ولسه ايه مش صادروة عن تقديم مجموعة من المحاميين الاسلامجية بلاغ للنائب العام لمصادرة رواية ألف ليلة وليلة مكنتش عارفه ان بعد ساعه بالظبط من كتابة البوست هيتم مصادرتى انا شخصياً بالاكونت بتاعى من الفيسبوك
بحثت على سبب منطقى لقفل الأكونت من قبل ادارة الفسيبوك الجامدة اوى خالص بصراحة مش لاقيت انا مش عارفه حد فى الادارة وكمان عندى استعداد احلف على اى حاجه عايزينها انى مش شتمت حد فى الادارة المبجلة .. طيب يقفلوا حسابى ليه ؟ وعليه رحت باعته رسالة للإدارة الهمامة اسالهم عن سبب قفل الاكونت بتاعى وكان الرد ان ان اننننننن تششششش دى الموسيقى التصويرية مش تقلقوا ..

A lot of people had sent reports of the bad use

وكانت الاجابة ايه بقى وياريت عشرة او عشرين خط تحت الجملة الجامدة وهى العدد من الاشخاص قاموا بارسال تقارير ان حضرتى بستخدم الفيسبوك استخدام سيئ ... وبرضه بعدها قعدت افكر معلشى انا عارفه كلمة قعدت افكر ده اتكررت كتير فى البوست اصلى مقضية يوم الجمعة وهو اليوم البركة اللى اتقفلى فيه الاكونت من اوله لاخره تفكير فى الفيسبوك وفى ادارة الفيسبوك لدرجة انى لو كنت بفكر فى الجواز مش كنت ها اخد الوقت ده كله فى التفكير .. لاقيتنى مش بعمل حاجه غير انى بنزل لينكات من مواقع اخبارية .. او صور وبرضه صور عادية مش خادشة للحياء العام ابدا حتى عمو عصام عارف الكلام ده كويس او نوتااااااات وعند النوتاااااات دى وقفشت خطأى هو النوت اللى جاب الكافية أيون هو النوت الـ اخد 147 كومنت ده واغلبهم بلا حسد وخمسة وخميسة فى عين اى حد مش دخل وشتمنى هو كمان بالمرة تمت شخصنتى انا فيهم وكل الناس قالت لى ايه ده ؟؟؟؟؟؟

مش هينفع اكتب النوت هنا دلوقتى علشان لو الجماعة اياهم بتوع المصادرة بعتوا للحاج بلوجر هو كمان وطلعت فى عقله يلغى المدونة بتاعتى خالص من عنده ومصادرة حاجتين فى وقت واحد فى الراس توجع لكن لو رجع الاكونت ده لو يعنى وبركة دعاء الوالدين وانتوا كمان معاهم يرجع انشاء الله ابقى انزله هنا
ولا اراكم الله ريبورتات من الجماعة اياهم فى اكونتات لديكم ابدا ابدا ابدا

Thursday, May 6, 2010

ولسه ايه مش صادروه

فى طلب غريب عجيب من نوعه تقدم مجموعة عواطلية يطلقوا على نفسهم محامين بلا قيود خطأ ببلاغ إلى النائب العام لمصادرة كتاب ألف ليلة وليلة .. وعايزين يصادروه ليه بقى اصلهم بيقولوا الكتاب يحتوى على عبارات جنسية صريحة تحض على "الفجور"
وواضح اوى ان الجماعة شايفين شغلهم تمام وبيشتغلوا بكل ما اوتو من قوة لطمس التراث المصرى علشان اسيادهم اللى بيبعتوا لهم التمويل يزودوا شوية المرة الجاية
بدأوا بان الاثار عبارة عن أصنام وان الفراعنة كانوا عبدة أوثان علشان كدا لازم يتم هدمها وبعدها المرأة العورة ولازم تتكفن علشان الراجل الغلبان مش يدخل النار بسببها ودلوقتى عايزين يصادروا كتاب ألف ليلة وليلة لاحتوائه على عبارات جنسية ؟؟ بدل ما يروحوا لدكتور يعالجهم من مرض الهوس الجنسى عايزين يصادروا الكتاب ؟؟
التراث المصرى باقى يا عباد البتروريالات ومهما يقولوا لكو اسيادكو اللى بيمولكو هتفضل مصر باقية وتراثها الى اخر العمر
لو مش قادرين تتحكموا فى نفسكو روحوا اعملوا خيمة فى الصحرا وعيشوا عندهم هناك فى شبه الجزيرة

Tuesday, May 4, 2010

وللقذارة عنوان


حينما تراه تعرفه فوراً فهو إنسان يشعر بالدونية دائماً وابداً .. يرسم انه مثقف لمجرد انه قرأ كلمتين فى جرنان أو غالباً يستمد ثقافته من المسلسلات والأفلام .. كل كلامه تلاقيه ابويا قالى ابويا عاد لى .. ابوه مات مش لاقى حد ياخد من على لسانه كلام لدرجة انه اصبح زى الكلب الجربان فى كل المجتمعات ... يجرى وراك بالمشوار .. وان تكرمت وتواضعت ونزلت بمستواك للعطف عليه .. تلاقى كل كلامه اغتياب ونميمة والحقد هو الغنيمة اللى بيستمد منها الحياة .. يمثل الفضيلة وان لزوجته الحبيب الاولى .. وهو الخيانة حياته والضغينة اصل منبعه .. متجوزين على حب وهو واخدها سداد حق لكيلو جوافة .. حقير يقتات على الاشاعات وأعراض الآخرين .... ومتناسى لديه بنات والديان لا يموت وانه حسبى الله ونعم الوكيل .. او انه معتمد على ان بناته فى المنظر زبالة وفى المظهر بيلبسوا الوان الستارة .. لذلك يسمح لنفسه بكل هباله بالخوض فى الاعراض والكلام على شرف من هم ترفعوا عن حقارته وطردوه بعد ان كان يقبل احذيتهم ليل نهار حتى يشفقوا عليه .. فلحقارته وجهله ولم يجد بهم ما يعبيهم .. لجأ إلى الشرف .. ذاك الشرف الذى لن ينال منه مريض يتدرب كل يوم لسانه على الركاكة والحقارة حتى اصبح كالكلب يقتات على جيف الاسود هذه الشخصية اللزجة إذا تقابلت بها فى يوم فلا يغرنكم بها التودد وذلها وهوانها حتى تاخذكم بها شفقة او عطف .. اردت فقط ان اتعرف معكم على التجربة البشرية والتفرقة بين الشرفاء من يحترمون ذاتهم وكرامتهم ويحييون بعزة وكبرياء وشخصيات اخرى مريضة لا تعلم من الحياة سوى الغل والحقد على الشرفاء

Saturday, May 1, 2010

ياريته كان اتقتل فى المانيا


ليه تقتل اى شخص من اى مكان صحرا كان او بستان وتاخد اعدام .. ممكن تقتل اى مصرى وتمثل بجثته ومحدش هيكلمك بالعكس انت هتبقى شجاع طالما من بلد عربى مش فى بلاد الفرنجة حتى لو راجل مصرى فى بلاد الفرنجة واتقطع منه على مراى ومسمع برضه محدش هيسال بيتعمل فه كدا ليه .. ممكن يتسال امتا بقى لو واحدة ست بتتخانق على مرجيحة والجماعة بتوع نظرية المؤامرة اللى خايفين على الاسلام من اى نسمة هوا توديه شمال او يمين قالوا دى اتقتلت علشان حجابها مش علشان المرجيحة ولا علشان استانفت حكم لعاطل علشان تغرمه اكتر .. وليه تشتغل انما ممكن تتخانق مع حد على مرجيحة والمحكمة تحكم لك بمبلغ وقدره .. الشاب المصرى اللى تم التمثيل بجثته على الفضائيات والى القصص المتفبركة قالت اصله اغتصب وقتل 4 ومقيم هناك من 18 سنة .. فى حين ان ابوه وعمته قصة حياته كاملة وان امه اللى سابته من وهو عمره شهرين رجعت علشان تاخده كبش فداء لمشاكلها هناك .. والولد برضه مش كمل فى لبنان شهرين .. ياترى الخارجية هتخلص استنكار واستنفار واستحمار امتا وتطالب بحقه ؟ ياترى هيطلع نقيب المحامين ومعاه كام محامى للبنان علشان يرفعوا قضية على الهمج اللى قتلوه قدام الشرطة ومثلوا بجثته ؟؟
ياترى الاخوانجية هيرفعوا المصاحف فى جنازته ده ان رجعت اصلا جثته ويهتفوا باسم الله اسوة بشهيدة المرجيحة ؟ وياترى هيتعمله شارع باسمه فى القاهرة اسوة بشهيدة المرجيحة ؟ ياترى رئيس البلد ورئيس اللحكومة بعد كل الانتهاكات دى من شوية همج متخلفين .. هيفكروا فى حال المصريين اللى بيدوروا على لقمة عيش .. واللى بيتقدموا كبش فداء لاى حد وفى اى مكان .. ولا هيفضل مسلسل كبش الفداء المصرى شغال ؟ قتل فى لبنان - طرد من الكويت - جلد فى السعودية والبقية تاتى