Desert Cat Search
قطه الصحراء: 3/1/10 - 4/1/10

Sunday, March 28, 2010

علشان راجل

كلمتين ينطبقوا على اشخاص نادرين جداً فى مجتمع زى المجتمع المصرى تحديداً لكن بسمعهم كتير على لسان كل من هب ودب .. يبرر اى عمل قبيح أو فعل قذر لأى ذكر وكأنها الكلمة السحرية فى الهروب من اللوم أو العتاب ومش هقول العقاب .. لأن كلمة عقاب فى مجتمع يجعل من الذكر نصف إله ليس لها وجود
الرجولة من وجهة نظرى يعنى الشهامة ، يعنى إنسان عنده القدرة على العطاء ، عنده القدرة على إحتواء أى موقف مهما كانت صعوبته ، يعنى إنسان عنده إحساس وذوق كلمته سلاحه والاعتماد على الذات هو منهجة

من يناقش الطغاه فى عدلهم أو ظلمهم ؟

أن يتفق مجتمع بأكمله يفعل جميع الموبقات فى الخفاء .. يدور داخل دائرة مغلقة تغلفها المشاكل من جميع الاتجاهات على أن الأنثى فى جميع الأحوال وكل الظروف مخطئة .. لأنها كائن درجة ثانية
ليه خرجت تشتغل ماتسيب مكانها فى الشغل للشباب اللى قاعد على القهوة
مع ان الشباب اللى قاعد على القهوة اصلا مش عايز يشتغل غير وزير هو مش عنده وقت يبدء السلم من أوله ويقبض مرتب مش يكفى مصروف الكيف بتاعه ايا كان بقى

اذا كان القلب نظيفاً لا يمكن ان تلوث الشفاة

يعنى كل اللى بيعاكسو بالفاظ زبالة دول قلوبهم وسخة ؟
يعنى كل اللى بيتحرش فى المواصلات انسان منحط وقذر
لاء يا ستى البنت هى اللى بتستفزه طبعاً
بتستفزه ازاى حضرتك
يعنى واحدة ماشية بميوعة او لابسه عريان
هو فى حد بيمشى عريان ؟
اه البنات اللى ماليه الشوارع
معقول انا بشوف الشوارع مليانة منقبات الايام دى
يييييييه دول اسخم من اللى عريانين
طيب معلشى سؤال
هو انت لو شوفت واحد بيتحرش بواحدة فى مواصلات مثلا هتعمل ايه ؟
واعمل ليه مش يمكن عاجبها ؟
طيب افرض شتمته ومسحت بكرامته الارض ؟
واتدخل ليه لواحدة قليلة الادب البنت المحترمة مش بتعلى صوتها
يعنى لو سكتت يبقى عاجبها ولو اتكلمت تبقى قليلة الادب
طيب واللى قل ادبه عليها ده نسيبه كدا ؟
ايوا تسيبيه علشان هو راجل
عفواً مش هقدر اكتب ردى لانه كلام يعاقب عليه القانون خصوصاً وانا أنثى فى مجتمع جعل من الذكر نصف إله

Monday, March 22, 2010

بين الاحتفال بيها والمتاجرة فيها .. ( ربنا حيذله) واشياء اخرى


على الرغم من انى متابعة غير جيدة للتى فى لكن اهتمام وسائل الإعلام على مدار يومين متتاليين بعيد الأم اثار استيائى الحقيقة وجلست اتسائل ماذا لو خصصت وسائل الاعلام المرئية والمسموعة والمكتوبة نصف هذه البرامج والمقالات للتوعية بحقوق المرأة ومناهضة ايذائها سواء من جانب الزوج او الأب او التحرش بيها فى الشارع ؟ وأفقت من هذا اللوم الذى لم يسمعه احد غيرى على صرخة ام من دار المسنين تلتمس من ابنها الوحيد اللى عاشت عمرها علشان تربيه وتعلمه وبعد ما اتجوز رماها فى دار مسنين من غير حتى سؤال عنها وبتتمنى من كل قلبها انه يكون سامعها ... فالتقطت اخرى منها اطراف الحديث بانها لا تختلف عنها لكنها لا تبكى مثلها عليه بل زى ما ذلها ورماها الرمية دى ربنا حيذله .. مش قادرة اوصف شعورى وقتها ولحد وانا بكتب الكلمات دى برضه مش قادرة اعبر عنها .. لكن صالت افكارى وجالت حتى ذهبت الى امهات أخطأن أو طلقن او توفى ازواجهن وبدلاً من رعاية اطفالهم رموهم كمخلفات من ازواجهن السابقين يجالسوا الكلاب الضالة بجوار صناديق الزبالة باى شارع ياخذ ايضا من اى كوبرى سقف يحميه من قيظ الصيف وبرودة الشتاء ومن الارض وسادة ، يتوارى جسدة الذى تعلن عظامه البارزة باعلى صوتها عن مدى الجوع والحرمان الذى يعانيه خلف قميص مهلهل ... واذهب ببصرى مرة اخرى الى الشاشه التى امامى لارى الوجوه قد تغيرت ولكن هذه المرة ليست دار مسنين ولكن دار ايتام والحضور زوج وزوجة حرما من الانجاب لتبكى الزوجة وبجوارها الزواج وبينهم عدد لا بأس به من الأطفال وقاعدين يحضونوهم ويبوسوهم ويقولوا احنا بنيجى فى اليوم ده علشان نعوض حرمانا .. يا حلولى يعنى مش بتحسوا بالحرمان غير يوم عيد الام بس ؟؟ وقطع هذه المشاهد اللى مش عارفه لزومها ايه يعنى اعلان على اثرة رفعت حواجبينى حتى لامست شعر راسى وفتحت فمى بكل ازبلال وكان بودى لو اشوف مين صاحب فكرة هذا الإعلان لكى اتعرف على عقله الفذ من قرب هل ما يوجد بداخله بالفعل مخ ؟ ام نخاعات مسلوقة ؟ فالاعلان يا حضرات عبارة عن صديقة رايحة تزور صديقتها وواخدة لها هدية عبارة عن سكر الاسرة وكمان مفاجئة جيابة لها عريس .. صحبتها اتبسطت اوى و رايحة تعمل لها شاى ماهى مش جاية فاضية دى جايبة سكر وعريس كمان .. الصديقة اللى جايبة العريس بتسالها انى هتعملى الشاى بسكر ايه .. التانية قالت لها سكر عادى فضحكت التانية ضحكة خبيثة وقالت لها كدا هتطفشى العريس اعملى الشاى بسكر الاسرة وراحت مطلعاه من كيس جوه حضنها .. وقالت لها السكر ده نضيف والشاى يبقى رايق ويتم المراد بقى .. هو من امتا بنزور بعض بكيس سكر ؟ ومن امتا بنسال اصحاب البيت اللى هعملوا لنا شاى على نوع السكر ؟ ده كله مش قضيتى لكن فعلا اكثر ما ضايقنى هو استخفاف القائمين على الاعلام بعقول الناس .. ازاى قاعدين على مدار يومين نقولها ست الحبايب يا حبيبة يا اغلى من روحى ودمى ؟ وازاى بنصور منها انها جاهلة كل همها فى الحياة هو العثور على عريس دون السؤال عن مؤهلاته بقى ولا اصله ولا فصله المهم انه ازاى يتعكبل ومش هيجيبه غير سكر الأسرة ؟ ازاى الاستاذة فيفى عبده فى لقاء مباشر مع بناتها اللى بيحلفوا ان ماما حنينة اوى معانا بس مش خلتنى اروح الكوافير ولا احط منوكاير الا بعد ما روحت بيت جوزى اصل ماما ست محافظة خالص .. وفى نفس الوقت ام كل اللى باقى لها فى الدنيا ايام معدودة مش عايزة من الحياة غير ابنها يسال عنها ؟؟ ازاى الاستاذة نعم الباز قاعدة فى افخر ثياب وجنبها حفيدتها اللى بتغنى لها ست الحبايب يا حبيبة .. وفى نفس الوقت اعرض على المشاهد ام قاعدة تصرخ تدعى ربنا بحق ما ضحت بشبابها وحياتها علشان ابنها الوحيد ربنا يذله زى ما ذلها ؟؟ يعنى ايه علشان اسوق سلعة لازم اول ما افكر فيه هى الست من الاخت اللى جابت لحامد الحبة الحمرا اللى من بعدها بقى جامد للى عايز يسترجل يشرب بيريل للى عايزة تتجوز تعمل للعريس شاى بسكر الأسرة ؟ السادة القائمين على الاعلام رفقا بعقول الناس كام من دكتورة او مهندسة او مدرسة محترمة مش يهمها لا سكر ولا عريس المهم طموحها وتحقيق ذاتها .. كام من ام فقدت ابنها او بنتها رفقا بمشاعرها .. وكام من ابن او بنت فقد والدته رفقا بمشاعرهم ... كلامى ليس ابدا انكار لفضل الام ... ولكن اعزائى اى ا م التى يعترف لها الاعلام بهذه الضجة المفتعلة ؟ هل هى الام التى يصورها شيوخ البزنس على قناة الناس واخواتها بانها العورة ، ناقص العقل والدين ، ناقضة الوضوء ، الفتنة التى ستكون سبب دخول الرجل المغلوب على امرة جهنم وبئس المصير ؟ ام التى تستخدم كوسيلة لترويج حبوب المنشطات الجنسية والسلع التموينية ، ام الجاهلة التى كل همها فى الحياة الحصول على عريس واهو ضل راجل ؟ ام التى تم رفضها قاضية اصلها عاطفية ؟ وأى مشاهد اللذى يتم مخاطبته بكل هذا الكم من التناقض الصارخ ؟

Wednesday, March 17, 2010

وهكذا اصبحت المخدرات دليل البراءة

فوجئت بل فوجعت مثلما فوجئ الملايين من اهل مصر الحروسة بخبر الغاء حكم الاعدام عن الـ10 أفراد الذين قاموا بخطف سيدة كفر الشيخ من منزلها وتناوبوا اغتصابها فى الزراعات ومش بس كدا دول كانوا كمان بيعزموا اصحابهم عليها على اساس انهم بيوجبوا معاهم بكوباية شاى مثلا او كوز درة مشوى .. وبعد ان جاء حكم محكمة الجنايات رادع وهو الإعدام شنقاً وبالرغم من الحكم ألا انه لا يزال مسلسل التحرشات والاغتصابات شغال ومش هنوصل للحلقة الاخيرة الا بخصى كل واحد فاكر رجولته تكمن بين رجلية .. إلا ان الجماعة الرجالة اللى اتحكم عليهم بالاعدام بعد عملتهم المهببة تقدموا بنقض الحكم والغريب والعجيب والمذهل قبول النقض وهو ما يعنى التعامى العمد والمتعمد عن بشاعة الجريمة ... المشكلة بالنسبة لى لا تكمن فى قبول النقض من عدمه .. لكن المشكلة فى الاسباب اللى على اساسها تم قبول النقض وهى القصور فى التسبيب والفساد فى الاستدلال الجملة اللى اصبحت موضة الايام دى فى محكمة النقض ونشوف بقى النكتة الجامدة اوى من دفاع المتهمين ؟

وقال دفاعهم إن المتهمين كانوا تحت تأثير المواد المخدرة وقت ارتكاب الجريمة، كما أن الضحية هى التى دفعتهم لارتكاب الواقعة لما كانت ترتديه من ملابس. وأضافوا أن الجنايات تأثرت بالرأى العام ووسائل الإعلام فى تلك القضية فشددت العقوبة عليهم.

طيب يا حضرة القاضى المحترم يا اللى قبلت النقض نظراً لهذه الأسباب المنطقية والموضوعية جداً
هى المخدرات دلوقتى بقت دليل براءة ؟؟
الست اتخطفت من بيتها تحت تهديد السلاح .. هو الواحد مش المفروض انه بيته ده المكان اللى بيحميه ؟ يعنى يلبس فيه اللى هو عايزة ؟ ازاى الست اغرتهم ؟ بملابسها ؟ ولا بعتت لهم هاتف يوصف لهم ملابسها وهى فى البيت ؟
لو الجريمة دى حصلت لزوجة المحامى ياترى كان اترافع وطلع الاسباب الواهية دى ؟
لو حصلت لزوجة القاضى كان قبل النقض بناء على الاسباب الزبالة دى ؟
وبعد ان اصبحت المخدرات مبرر لانقاذ المجرمين من العقاب يبقى على كل المجرمين والحرامية والبلطجية وقتالين القتلة يتقدموا بجواب شكر لتجار المخدرات لأنهم هيكونوا فيما بعد المنقذ ليهم من حبل المشنقة .. وعلى كل انثى ان ترتدى كامل زيها وهى فى بيتها ولو حد خبط على الباب قبل ما تفتح تعمله تحليل دم علشان تعرف اذا كان تحت تاثير المخدر من عدمه لانه لو تم اختطافها تحت تهديد السلاح وتناوب 10 فحول عليها الاغتصاب برضه هى الغلطانة علشان تقعد براحتها فى بيتها ازاى .. هى يعنى مش كفاية انثى كمان تلبس اللى هى عايزاه فى بيتها ده ايه الستات الطماعة دى ده ايع الستات اللى تستاهل الخطف والاغتصاب دى

Sunday, March 14, 2010

ومفيش طهور إسلامى ؟


دخلت بابتسامتها العذبة .. وبالرغم من انى بحبها جداً وبحب ابتسامتها دى الا ان اكيد بيكون وراها طلب .. سلمت وقعدت .. وانا قاعدة استنى ايه هو الطلب .. وبعد السلامات والتحيات

عايزة اقولك حاجه

بستناكى تقولى لى الحاجة دى من الصبح يا روحى

بصى بقى .. انا عايزة اروح فرح اخت صحبتى وانتى اللى هتيجى معايا ..
فرح ايه يا اوختشى فى الحوسة اللى انا فيها دى انا ورايا شغل وكمان من اول مارس كل يوم اقول هروح اعمل الاقرار الضريبى مش اروح .. جاية على اليوم اللى اخد فيه القرار الحازم وتقولى لى نروح فرح ..
انتى تروحى الاقرار براحتك اصل مفيش كوافير ولا سوارية ولا اى حاجه خالص ..
هو انتى قولتى لى رايحة فين ؟؟؟

بلعت ريقها بصعوبة وقالت لى فرح .. طيب لما مفيش اللى بتقوليه ده فى فرح الناس بتعمله فين فى العزا ؟؟

قالت لى يا بنتى اصل ده فرح اسلالالالامى

اه وهيتعمل فين بقى الاسلامى ده ؟

فى قاعة كبيرة بس هما قاسمينها نص للستات والتانى للرجالة علشان الاختلاط حرااام ...
علشان ايه نياهاهاها
قولت لها انا جاية يابنتى بلا اقرار بلا ضرايب بلا وجع قلب . المهم نشوفهم بيعملوا ايه فى الفرح الاسلامى
روحنا الفرح زى اللى لسه صاحيين من النوم ودخلنا القاعة بتاع الستات بامانة فى مخيلتى هلاقيهم كلهم متكفنين بالسواد والعروسة قاعدة فى النص مربعة رجليها وقاعدين يلفوا حواليها الدور الدور موعودوة يا اللى عليكى الدور ... الا الاقى العروسة لابسه حاجة بيضه لا بيانه يعنى هو فستان فرح ولا جلابية بيضة .. ولافة طرحة اسبانيش ووشها فيه الوان الطيف السبعة هربانين من بعض بطريقة عشوائية .. شوية ولاقينا الدى جى اشتغل .. يا حلولى ده الاسلامى ؟ والبنات جوا عند العروسة يرقصوا والستات قاعدة تضحك واللى بكلمتين من نوع اقرصيها فى ركبتها علشان تحصيلها فى جمعتها .. وشوية البنات سابوا الرقص واتسحبوا واحدة ورا التانية يبصوا من الفاصل اللى بين القاعتين على مش عارف مين الياااااااااااى بدلته شيك مووووز .. ومش عارفه مين التانى اللى يالهوى عنييييييه دباحين .. وشوية ستات ورا قاعدين هاتك يا تقطيع فرو فى جتة العباد اللى اطلقت واللى حماتها ملطعه على عنيها البلا الازرق واللى لابسها كويس واللى لابسه وحش ومش راحمين نفسهم .. شوية بطل الدى جى واشتغل 3 شباب عاملين دقن خفيفة لزوم الشغل استعراضات واستكشات وهاتك يا حركات ..

انا فى وسط اصحاب دودو .. هو ايه الفايدة من عزل فريق للستات وفريق للرجالة زى اللى عندهم عدوى وخايفين تتنقل ؟؟ ردت اخت بامانة مش سابت ودن اللى جنبها من اول القعدة البعد عن شبهة الاختلاط ...
طيب والغيبة والنميمة اللى من الصبح يا اختى ؟
وتفتكرى مفيش اختلاط والبنات بيروحوا يبصوا من وقت للتانى على فريق الرجالة والعكس كمان بيحصل ؟ ردت حيزبونة كبيرة فى فرق بين نظرة عابرة وبين قاعدين فى وش بعض طول الوقت النظرة الاولى ليك والتانية عليك ؟
يعنى شغل الجواسيس اللى بيحصل ده بتسميه نظرة عابرة ..
انتى زعلانة ليه ؟ هو حد من الرجالة اللى بيبصوا عليهم دول قريبك ؟؟
لا انا زعلانه على استغلال الاسلام فى فرح اسلامى مع ان الفرح اللى مش اسلامى الناس فيه بتتعامل بطبيعتها مش زى الجواسيس والحرامية .. ومش استغلوا اسم الاسلام فى التربح والضحك على الناس ..
عقبال كدا لما نشاطركم السبوع الاسلامى والطهور الاسلامى .. ورزق الهبل على المجانين

Thursday, March 11, 2010

حملة تطعيم بالنقاب

مع بداية الاسبوع بدأت حملة تطعيم ضد شلل الأطفال من عمر يوم حتى 5 سنوات .. انا طبعا مش بعمل اعلان عن الحملة اصلها خلصت وكمان انا ماليش علاقة بوزارة الصحة لا من قريب ولا من بعيد ... لكن اللى حصل يا حضرات ..
فى حوالى الساعه 11 صباحاً صحيت من النوم على حد بيضرب الجرس .. المهم رحت افتح لاقيت خير اللهم اجعله خير 3 ممرضات بينهم كيس زبالة اسود .. يعنى اتنين بنى ادمين بصحبتهم هذا الكيس من الزبالة وفى ايديهم حاجه زى كولمن صغير كدا وعلشان الصباح بتاعها يزداد سواداً فاللى اتكلمت هى كانت كيس الزبالة الاسود ولاقيتها بتقولى السلام عليكم ورحمة الله وبركاته .. قولت له صباح النور ..
راحت بتقولى احنا من وزارة الصحة وتبع الحملة القومية للتطعيم ضد مرض شلل الأطفال .. فلو حضرتك عندك اطفال ياريت تصحيهم علشان نديهم الطعم .. قولت لها نعم ؟؟ انتى تدى اطفال طعم .. قالت لى ايوا انا من الوزارة وولاقيتها بتورينى بادج معلقاه على صدرها وتحت النقاب كمان مكتوب فيه اسمها .. قولت لها وانا ايه ضمنى ان انتى صاحبة الاسم ده ؟ وايه ضمنى اصلا انك من وزارة الصحة ؟ مش يمكن بتخطفى الاطفال ولا بتديهم طعم مسمم ولا حاجه ؟ وقتها اجيبك منين .. قالت لى ايه طريقة الكلام دى ؟ قولت لها اتكلم براحتى انتى مش جاية تعلمينى الكلام انا معرفكيش مين انتى واحدة مجهولة الهوية علشان ايه الناس تأمنك تطعمى أطفالها ؟ اتدخلت زميلتها وقالت لى احنا معاها واحنا معروفين الهوية ولو تحبى اى اثباتات انا معنديش مانع ؟ حضرتك بقى عندك اطفال ؟ قولت لها حضرتى لو عندى اطفال مهما كان ارتياحى ليكى وكشفك عن هويتك برضه مش هخليكو تطعموهم .. قالت يعنى نمشى قولت لها اتفضلى بس من فضلك مش تطلعى الشقه اللى فوق .. سالتنى ليه ؟ قولت لها علشان دى شقة اخويا وهو فعلا عنده طفل
عمره 4 سنوات .. بس مش عايزين نطعمه احنا هنطعمه بمعرفتنا .. ابتسمت وقالت لى انا مش شايفه اى داعى للقلق ده كله حضرتك دى الكارنيهات بتاعتنا ... قولت لها حضرتك انا بجد سعيدة بيكى بس مش سعيدة بكوم السواد اللى وراكى ده خالص .. قالت لى بس ده شغلنا .. قولت لها وانا من حقى احافظ على امن وسلامة اطفالنا .. كيس الزبالة اخد جنب بعيد وراحت بتقولى انتى بتتكلمى كانك شايفة عفريت قولت لها فعلا هو ده التشبيه الصحيح .. شرفتونا حضرتك .. ولسه مش اتحركوا ناديت على زوجة اخويا قدامهم قولت لها لو حد جالك لتطعيم الاطفال اوعى تطعمى ميدو انا هطعمه فى مكتب الصحة بنفسى .. ومن الواضح جدا انها سمعت الكلام ده كتير لان زميلتها اللى كانت واقفه ومش اتكلمت خالص قالت لها واضح ان الناس قلقانة ... اخدت ابن اخويا ورحت اطعمه .. قابلت هناك دكتور بساله اطعم الطفل فين ؟ بص فى بطاقته بتاعة التطعيم قالى المنطقة بتاعتك فيها ممرضات بيطلعوا لكو لحد البيت يعنى حضرتك مش كنتى تتعبى نفسك .. قولت له وجم فعلا بس كانت معاهم منقبة وانا اثق ازاى فيها واخليها تطعمه ؟ ضحك اوى وقالى يا شيخة دى الوزارة كلها بقت كدا .. قولت له وساكتين لهم ليه ؟ قالى بيصوتوا ويصرخوا ويقولوا مضطهدين .. قولت له يبقى ده واجبنا قالى ازاى قولت له الناس تحسسهم بالقرف وهما اللى يجوا يطعموا اطفالهم هنا .. قالى وانا هطعم لك الطفل ده بنفسى ..واثناء وهو بيطعم ميدو قالى على فكرة فى عدد من الناس عمل زيك كدا .. واطعم ميدو ورجعت البيت وطول الطريق بسال فينه السيد وزير الصحة من اكوام الزبالة اللى ملت وزارته الموقرة ؟ فين السيد وزير الصحة من مريض يدخل عليه كيس زبالة تديله حقنة هوا تجيب اجله ؟ ولا نقابها الحامل للبكتريا يلوث جرح مريض وهما فى الطبيعى بتكون ريحتهم معفنة ؟ فينه السيد وزير الصحة من كيس زبالة يطعم طفل وايه من عمر يوم حتى 5 سنواااااات لما طفل يشوف عفريت داخل عليه وبيقوله افتح بؤك ؟ ده مش بعيد الطفل يصاب بصدمة عصبية

Tuesday, March 9, 2010

فى بلد تطبيق الشريعة

من اسبوع كان الدكتور علاء الاسوانى فى ندوة واتكلم عن الوهابية ومدى تاثيرها على المجتمع المصرى .. وعن ندوة الاسوانى كتب الاستاذ سعيد الشحات بجريدة اليوم السابع ولحد هنا كويس اوى لكن فى رد على مقالة الاستاذ سعيد باسم داليا .. الحاجه داليا دى بقى داخله تقول ايه ومالها الوهابية ياريتنا كنا وهابيين وبنقيم الشرع فى بلادنا مش كان بقى فى سرقة ولا اغتصاب ولا قتل .. طبعا واضح من خلال كلام داليا انها كل معلوماتها عن اهل الوهابية انهم بس يحكموا بالشرع وبالتالى مفيش جريمة يعنى مش سمعت عن الشباب اللى خطفوا خدامة فلبينية وتناوبوا عليها الاغتصاب وفييييين فى مكة المكرمة .. الصبح بفتح الفيسبوك لاقيت فيه ايميل من صديقه عزيزة جدا على قلبى سايبه لى فيه لنك وبتقولى ايه رأيك ؟
دخلت بامانة حسيت بالازبهلال .. الخبر يتضمن الآتى :-

قضت المحكمة العامة في الدمام بسجن مواطن (45 عاماً) أربع سنوات بعد إدانته باغتصاب ابنته (16 عاماً).

ووفقا لخبر أعده الزميل عايض الحقباني ونشرته "اليوم"، وتعود تفاصيل القضية عندما تقدّمت معلمة بشكوى للجهات المختصة تفيد قيام ولي أمر طالبة لديها باغتصاب ابنته بالإكراه، وكشفت التحقيقات عن قيام الأب باغتصاب ابنته بالإكراه تحت تأثير المخدرات أكثر من مرة .. وبعد إحالة القضية إلى المحكمة العامة وبعد إثبات اغتصاب الأب لابنته من قبل تقرير الطبيب الشرعي أصدر القاضي الحكم بالسجن 4 سنوات على الرغم من مطالب المدعي العام بتغليظ العقوبة

وادى بلد الحكم بالشريعة والامن والامان - بلد مفيهاش كلية حقوق ولا فيها حد دارس حقوق وبيحكموا على الناس حسب هواهم الشخصى ويقولوا بيطقوا الشريعة ؟ قتل واغتصاب وسرقة لو الفاعل ابن ناس بيتكتم على الخبر لو الفاعل ابن كلب بيتجلد ويطلع دين اللى جابوه .. واللى لسه معجب بيهم ياريت يا حلوين تورونا عرض اكتافكو وتاخدوا بعضكو فى رحلة جماعية وتقعدوا هناك ومش ترجعوا تانى

Saturday, March 6, 2010

اليوم العالمى للمرأة == اليوم العالمى للنكبة


اى امرأة هذه التى حدد لها مؤتمر باريس النسائى الأول 8 مارس عام 1945 ليكون يومها العالمى ؟؟

اصدقهم القول بأن هذا الشعار صح 100% فى تلك الفترة الزمنية لأن المرأة كانت فى ذلك الوقت تحتل مكانه مرموقة فى جميع المجالات حتى وان كانت من لم تتعلم فى حياتها أ ب .. ولكن فى يومنا هذا أرى ان هذا الشعار فقد مصداقيته ووجب ان يقتصر على اليوم العالمى للمرأة الغربية التى يعاملها مجتمعها على انها كائن كامل متكامل وليست على أنها عورة .. المرأة الغربية التى عملت رئيسة وزراء ، ووزيرة دفاع ، وترشحت للرئاسة بكل قوة وديموقراطية ..

لا المرأة التى اقنعوها واقتنعت هى بدورها أنها عورة .. بل وتدافع باستماته على هذا الهراء .. ولا تترك فى حالها التى تعرف قدرها وتسرع فى الخطوات من اجل تحقيق طموحها والحفاظ على كرامتها ..

لا المرأة التى يعاملها مجتمعها على أنها مجرد فرج لإفراغ شهوات الذكر مهما كانت مؤهلاتها العلمية وحتى وان كان هو مجرد عواطلى لا يعلم من الحياة سوى ارتكاب الموبقات ما ظهر منها وما بطن ..

لا المرأة التى يعاملها مجتمعها على انها مجرد غواية وفتنة للذكر المغلوب على أمره الذى لا يستطيع ان يتحكم فى غريزته فبمجرد رؤية خصلة شعر منها يثار على نفسه .. وإن صمتت على افعاله التى لا يمكن اغفالها يقولوا بصوا اصل عاجبها .. وان اتكلمت ودافعت عن نفسها وعن كرامتها تلوكها الالسن ويكون اول كلمة يتلفظ لسانهم بها عاملة لها هوليلة ليه دى مش متربية ليصبح شرفها مضغة بين انيابهم وكأنهم يخافون الله فقط من المرأة ولكن التحرش بها والاعتداء عليها وشرفها الذى تلوكه الالسن حلال لهم ... ذلك الشرف الذى تأخذ منه شعوب مريضة ذريعة لوأد المرأة دون احترام لذاتها او عقلها او انسانيتها التى ميزها الله بها تلك الشعوب التى لا يأتى ذكر امراة فلا يترددوا لحظة فى اسالة سم زلق مريض من ألسنة عكرة تتدرب كل يوم على الركاكة والانحطاط فى الادب والاخلاق خوفا من ظهور عجزهم وتفوقها عليهم ويحتموا بعبائه الدين ، والدين من أفعالهم بريئ ...

اليوم العالمى للمرأة التى عملت نهضت بذاتها ومجتمعها حتى وصلت لعالم الفضاء ...

لا المرأة التى يضعون أمامها العراقيل تارة باسم الدين وتارة اصلها عاطفية اوى ومش تقدر تحكم بالعدل لانها بتيجى لها الدورة الشهرية وفى الوقت ده بيكون مزاجها مش ولابد يعنى ولا تتردد اقلام لابد من سحب الرخصة الشرعية لحاملها فى كتابة كلمات مغلفة بورق المحنة ساخنة بدم الجرح مفرغة من عمق التأمل الذى لا يأتى بعد مرور الحدث وبرود الجسد وشروع الجرح فى الإندمال والالتئام على قرحه وجروحه .. وكأنهم ليسوا ببشر

هنيئاً لكل امرأة فى مجتمع محترم بيوم المرأة العالمى .. وكل عزائى لنساء دول العالم الثالث بأيام النكبات المتوالية

Wednesday, March 3, 2010

لما تعرفوا حقوقكو طالبوا بيها

حضرت بصفتى الأمين الإعلامى المساعد لحزب مصر الفتاة مؤتمر ضم جميع الفئات من المهتمين بالشأن العام وتطرق الحديث لقرار مجلس الدولة منع شغل المرأة منصب قاضية الحوار كان يتسم بالموضوعية وهذا لا يمنع ان هناك من كان متفق قلباً وقالباً مع القرار ولكن حتى هذا الاختلاف ايضاً بموضوعية وحتى الآن كل شئ كان على ما يرام .. إلا أن قامت منتفضة من مكانها وانطلقت كالرصاص العشوائى .. يعنى ايه الست تشتغل قاضى ؟؟ انتوا ازاى دخلتوا مدارس واتعلمتوا ووصلتوا اللى بقى دكتور واللى بقى محامى واللى مهندسة وقاعدين تقولوا الست تشتغل قاضى واللى تستشهد لى بنساء يهوديات كافرات وتقول هما دول عندهم عقل والمصريات لاء ؟ لاء طبعا نساء مصر مش زيهم ولا عمرهم هيكونوا زيهم لان نساء مصر طاهرات عفيفات شريفات وازاى تقارنوا بين يهودية وبين مسلمة ؟ قاطعتها محامية مرشحة لعضوية مجلس الشعب عن مقعد المرأة .. حضرتك مش واخدة بالك انك بترمى الناس بالباطل ؟؟ ردت بعد ان اطلقت ضحكة سخرية يا ست المحامية اليهود دول انجاااااااس يبقى لما تقارنى قارنى بين مصرية ومصرية او اخت ليكى مسلمة من دولة عربية تانية لكن يهودية ده اللى مش هسمح بيه ابدا والساكت عن الحق شيطان اخرس وانا لا يمكن اسمع عن مقارنة مشركة نجسة باخت مسلمة عفيفة ابدا .. ثم ان رب العزة قال وقرن فى بيوتكن ... هنا والتقطت انا اطراف الحديث مع ان مش كان المفروض اتكلم ... انا مش هعلق على كلمة مشركة نجسة مع اننا فى القرن الواحد وعشرين ومفيش حاجة مشرك ونجس بس حضرتك لما تستشهدى بآية قرانية مش تقوليها كاملة اولاً الآية الكريمة تخاطب نساء النبى ؟؟ يا نساء النبى وقرن فى بيوتكن .. وطبعاً حضرتك لا زى نساء النبى ولا هما زيك علشان تقتصى من الآية الكريمة وتدى تعليمات بيها لان ربنا برضه هو اللى خاطبهم بقوله " يا نساء النبى لستن كأحد من النساء " نساء النبى محرم عليهم الزواج بعد وفاة الرسول لكن سائر النساء بتطلق اوا جوزها يموت وتروح تتجوز واحد تانى ونساء النبى الثواب ليهم مضاعف والعقاب ليهم مضاعف ... وكان عندى كلام تانى عايزة اكمله لكن تفضل دكتور محترم وقال لما الست تحترم عقلها وتعرف قدرها يبقى وقتها بس تطالب بحقها ده لو عرفته اصلا
بأمانة عنده كل الحق اذا كان فى العقول دى لسه موجودة بينا وبتدافع عن الغباء والجهل بكل ما أوتيت من طاقة
الست بتاعة وقرن فى بيوتكن مربية أجيال إذ أنها تعمل مدرسة بمدرسة إبتدائية

Tuesday, March 2, 2010

القطة فى السى ان ان


تفضل المدون العزيز مهيج الجماهير وكتب لى الكومنت ده

مهيج الجماهير said...
انا و انتى فى نفس الخبر على السي انا ان

http://arabic.cnn.com/2010/entertainment/2/28/blogs.28feb2010/index.html

:)


انا بامانة قلقلت شوية وقولت هى السى ان ان دى عايزة منى ايييه لالالالالا المدونة دى شريفه وشمعتها قايدة ولا يمكن ابدا تنزل الا فى الحوادث خلف الاسوار كدهون يعنى لكن السى ان ان قوم ايه خير اللهم اجعله خير كدا جيت افتح اللنك لاقيته مش بيفتح معايا فقولت له ياريت تكتب لى نص الموضوع قوم الراجل تفضل مشكوراً وراح كتب لى نص الموضوع وهو كالآتى :-


مهيج الجماهير said...
فعلى مدونة "قطة الصحراء" برزت شكوى من تعدد الفتاوى وتكاثرها في كل مجال من مجالات الحياة، فتطرقت المدونة إلى القضية تحت عنوان "رجم جوزة الطيب" داعية إلى وضع "علاج سريع لمرضى إسهال الفتاوى."

وقالت المدونة : "كنت أبحث (على الانترنت) عن النباتات العشبية، وعلى حين فجعة ألاقي فتوى بتحريم جوزة الطيب.. جوزة الطيب هي النواة الجافة لشجرة دائمة الخضرة، ولها رائحة قوية نفاذة ومذاق لاذع جدا.. واستخدمت في تحضير عدد كبير من الأدوية منذ مئات السنين، ومازالت تستخدم في تحضير العقاقير."

وأشارت المدونة إلى "فتوى الدكتور أحمد الحجي الكردي - في هذا الخصوص، والتي تشير إلى أن جوزة الطيب من المسكرات، ولهذا فإن أكلها محرم لدى أكثر الفقهاء."

وختمت المدونة بالقول: "نسيت يا شيخ يا عبقري أن تقول لنا ما حكم الشجرة؟ ستدخل الجنة ولا يتولع في السلالة بتاعتها يوم القيامة؟ ولما هي من المسكرات، لماذا لا تجرمها الدولة مثل الحشيش والبانجو وما شابه؟
"
===========================

انتهى الخبر

وميرسى لمهيج الجماهير اللى تعبته معايا فى نقل الخبر

وميرسى لكل اللى بيكتب كومنت سواء موافق او معارض واللى بتيفرج ويمشى حتى اللى بيشتموا ومش بنشر شتيمتهم واللى بيشتموا وساعات انشر شتيمتهم

فى النهاية اكيد كلكوا بتضيفوا للبلوج حاجه جديدة