Desert Cat Search
قطه الصحراء: 2/1/10 - 3/1/10

Saturday, February 27, 2010

رجم جوزة الطيب


كنت بعمل سيرش على النباتات العشبية والعشبية دى اللى هى ممكن تستخدم كأشعاب وعلى حين فجعة ألاقى خير اللهم اجعله خير فتوى بتحريم جوزة الطيب ... انا بامانة حسيت بازبهلال شديد وقولت اشوف جوزة الطيب الست الكومل دى محرمينها ليه ؟ دى حتى بتخلى للأكل مذاق خاص ولا هى علشان أنثى وجوزها اسمه الطيب يستهتروا فيها كدا ويحرموها على الخلق ؟؟ انا لازم اشوف جوزة الطيب دى عبارة عن ايه .. ودى المعلومات اللى طلعت عنها


جوزة الطيب هى النواة الجافة لشجرة دائمة الخضرة ولها رائحة قوية نفاذة ومذاق لاذع جدا. .
تنمو شجرة جوزة الطيب فى مناطق قليلة من العالم مثل أندونيسيا وماليزيا وسيريلانكا وغرب الهند، فوائد جوزة الطيب
استخدمت جوزة الطيب فى تحضير عدد كبير من الأدوية منذ مئات السنين ومازالت تستخدم الان على نطاق واسع فى تحضير العقاقير . .. الزيت الذى يتم استخلاصه من العشب يستخدم كمركب ضمن لوسيونات الشعر والمراهم ويستخدم كمضاد للتشنجات ومهدأ للمعدة فى حالة ,, الانتفاخ.
من بين اهم استخدامات جوزة الطيب المعروفة ما يلي:
اضطرابات الهضم. .. الأرق: .. الجفاف: .. الذى ينتج عن القىء والإسهال وخاصة فى حالة الكوليرا. اضطرابات الجلد ... علاج أمراض الجلد مثل الإكزيما والقوباء الحلقية
نشوف بقى الفتوى اللوزعية اللولبية المهلبية اللى طالعين لينا بيها بتوع حرام يا اخى
ووجب رجم وقتل كل من احل الكفر والعصيان يا كفرة


فتوى الدكتور أحمد الحجي الكردي - في هذا الخصوص
السلام عليكم
هل صحيح أن جوزة الطيب تسكر؟


بسم الله الرحمن الرحيم
الحمد لله رب العالمين، والصلاة والسلام على سيدنا محمد خاتم الأنبياء والمرسلين، وعلى آله وأصحابه أجمعين، والتابعين، ومن تبع هداهم بإحسان إلى يوم الدين، وبعد:
فجوزة الطيب من المسكرات، ولهذا فإن أكلها محرم لدى أكثر الفقهاء، لحديث النبي صلى الله تعالى عليه وسلم: (كل مسكر خمر وكل مسكر حرام) رواه مسلم،

نسيت يا شيخ يا عبقرى تقولنا حكم الشجرة دى ايه ؟ هتدخل الجنة ولا يهتولع فى السلالة بتاعتها يوم القيامة ؟
و لما هى من المسكرات بقى الدولة مش بتجرمها زى الحشيش والبانجو وما شابه ليه ؟؟ وياترى اصحاب محلات العطارة دول نسميهم عطارين ولا تجار مخدرات يا شيخ ؟؟

Wednesday, February 24, 2010

ياترى هيتعملوا الهيصة اللى اتعملت لشهيدة المرجيحة ؟


شيع ما يقرب من ألفى شخص من أهالى قرية الشيخ مرزوق بمركز البلينا، جنازة أشرف حامد حلمى «٣٥ سنة»، الذى لقى مصرعه منذ ١٢ يوماً بمنطقة حفر الباطن فى السعودية، بعد أن أطلق مواطن سعودى النار على رأسه
السعودى قتله اصله سمع ان شوية من المصريين اتخانقوا مع اخوه وراح ضرب النار عشوائى قتل اشرف واصاب اخوه وابن عمه وفى التحقيقات القاتل السعودى قال انه افتكر ان دول هما اللى اتخانقوا مع اخوه ، القاتل مش مسجون زى الدكتور رؤوف العربى وزميله اللى اتجلدوا واترموا فى السجن بحجة ان مدمنة سعودية مجهولة الاسم لحد دلوقتى اصل واضح ان اسمها حاجه ابيحه قالت انهم كانوا السبب فى ادمانها .. تهمة اتوجهت لناس واتسجنا واتجلدوامن غير تحقيق او دليل وقاتل حر طليق

وشهدت الجنازة موقفاً مؤثراً أبكى أغلب المشيعين بصراخ محمد «٨ سنوات» نجل القتيل وإلقائه بنفسه أمام الجثمان طالباً رؤية والده، وأثناء محاولة المشيعين تهدئته سقط مغشياً عليه.

مش شوفنا الجماعة بتوع طظ فى مصر وابو مصر والمعارض بالجزمة عاملين مظاهرات ونازلين يجعروا ورافعين المصاحف على اساس انهم طالعين غزوة بدر ويطالبوا بالقصاص العاجل من القاتل وان المسلمين مضطهدين ... ولا القاتل من حبايبهم اللى واخدينهم قدوة ؟؟ مفيش حد منهم ولا من هوات المزايدة على الدماء زايد على دم اشرف .. ولا القتيل اتقتل بيد سعودى مباركة والمفروض اهله يبعتوا برقيه شكر للقاتل ؟؟
محدش قال يا حرااام ده سايب وراه اطفال 8 سنوات و3 سنوات وابنه ووالدة القتيل اللى كانوا هيتجننوا علشان يشوفوه لكن للأسف حتى الرؤية الاخيرة اتمنعوا منها لبشاعه المنظر ... ولا ده مش يشبه لابن شهيدة المرجيحة ولا لازم يكون القاتل من الغرب الكافر ؟؟

Monday, February 22, 2010

على جثته وجثة اى حد بيفكر بالشكل ده

رئيس مجلس الدولة: (على جثتى) تعيين امرأة قبل الهيئات القضائية الأخرى

من مقال : جمال بنون

عمل النساء في محال الملابس الداخلية يثار في المجتمع السعودي منذ سنوات، وكأنه موضوع اختراع قنبلة نووية، أو بناء مفاعل لأسلحة الدمار الشامل، لهذا يأخذ حيزاً من الجدل والنقاش بين تيار ديني متشدد وآخر معتدل، ودخلت الملابس الداخلية النسائية في تصنيف المجتمع بين ليبرالي وصوفي وعلماني وشيعي ومسلم سني، انقسام رهيب وتعنت عجيب والتفاف للموضوع بشكل مثير!


جائزة نوبل في الآداب عام 2009 للألمانية الرومانية هيرتا مولر


باكستان: المقاتلون يعلنون حظر تعليم الفتيات في سوات

حرصت أكاديمية الطيران في الصين على تأهيل مجموعة من النساء ليتدربن للعمل كرائدات فضاء ، وذلك بعد إطلاقها لثاني مركبة مأهولة إلى الفضاء
معركة النقاب تشتعل بمصر بعد منع المنقبات من دخول جامعة القاهرة ...


مظاهرات في سويسرا احتجاجا على حظر بناء المآذن

تفجير إرهابي يستهدف المعبد اليهودي بالقاهرة وأجهزة الأمن تكثف جهودها لضبط الجاني


شتان بين مجتمع يحيا فى كرامة يعامل المرأة على انها كائن كامل وبين مجتمع لا يهمه سوى الفكر الذكورى المتعفن وكل شغله الشاغل تهميش المرأة تارة بتخئتها داخل اكياس من الزبالة السوداء وتارة بمنعها من التعليم ومن تملك الشجاعة والكرامة يعطلونها عن شغل المناصب الت هى بالطبع جديرة لها اصل البهوات خايفين من تفوقها عليهم علشان كدا اللى قال على جثتى تدخل القضاء واللى على جثته تتعلم واللى على جثته تخرج اصلا من البيت وان خرجت لازم تبقى خيمة متحركة اصله اقنعها انها عار وعورة

مظاهرات وجعجعه وقلة ذوق وقلة ادب فى بلاد لا ليها علاقة بالعقيدة ولا ليهم اصلا اى انتماء ليها وعايزين يفرضوا عليها معتقداتهم بالقوة الجبرية وفى نفس الوقت قتل وحرق المسيحيين وهدم دور العبادة لو حد فيهم فكر يجدد سور بس للكنيسه ودلوقتى رايحين يفجروا المعبد اليهودى اللى اساسا مش فيه يهود هو الكنيسة مش المسيحيين بيذكروا فيها الله ؟؟ والمعبد اليهودى اليهود بيعبدوا فيه الله ؟ ياترى لو عندنا الجماعة اللى بيعبدوا بوذا كنتوا عملتوا فيهم ايه ؟؟

Wednesday, February 17, 2010

ايها القضاة أفيقوا يرحمكم الله !!

فى خبر كالصاعقة شهدت الجمعية العمومية الطارئة لقضاة مجلس الدولة، أمس، التى دعا إليها المستشار محمد الحسينى، رئيس المجلس، لمناقشة أمر تعيين المرأة قاضية بمجلس الدولة، أجواء ساخنة.
رفض أكثر من ٨٠٪ من إجمالى من لهم حق التصويت دخول المرأة مجلس الدولة، بواقع ٣٣٤ صوتاً مقابل ٤٢ صوتاً وافقوا على دخولها. ... ولا أعلم إلى أى قانون وأى دستور وأى شريعة استندوا السادة القضاه فى إجماعهم على رفض دخول المرأة مجلس الدولة ... فالدستور المصرى ساوى بين الرجل والمرأة فى الحقوق والواجبات ولا فرق بينهم .. والقانون ساوى بين الرجل والمرأة فى العقاب ولا فرق بينهم .. والله سبحاته وتعالى قال فى كتابه الكريم " او ليس الذكر كالأنثى " ومفرقش بينهم ..
يبقى على أى اساس حدد حضرات السادة القضاة رأيهم ؟؟ وهل يمكننى بعد هذا الإجماع ضد المرأة أن اثق فى حكم قاضى بعد اليوم وهو الذى يتمتع بنظرة ذكورية حادة ؟؟
واين هو من الآية القرآنية التى تعلو قامته فى كل قاعة محكمة
" وإذا حكمتم بين الناس ان تحكموا بالعدل " ولكنهم تناسوا كلمة الناس ونظروا لمجلس الدولة نظرة ذكورية بحته فحددوا بالاجماع رفض دخول المرأة متناسين أن المرأة اليوم هى رب أسرة ..

وأنه بناء على دراسة أعدت كان نتاجها 40%من السيدات العائل للأسرة
السادة القضاة تناسوا ان كليات الحقوق لم تقتصر على الذكور بل درست معه وفهمت مواد الدستور ايضا معه الأنثى ..

السادة القضاة تناسوا أن سميرة موسى اول عالمة ذرة مصرية أنثى
وتناسوا ان بونظير بوتو قادئة باكستان كانت انثى
وتناسوا ان سارة بالين التى خاضت الانتخابات الامريكية بكل قوة انثى
وقديما شجرة الدر كانت أنثى

السادة القضاة اللى المفروض ان الدستور والقانون هو فكرهم والعدل هو ضميرهم افيقوا يرحمكم الله

=============================================
بيان هام
ليس من أجل النساء فقط بل من أجل مستقبل هذا الوطن

لقراءة البيان
http://www.nwrcegypt.org/CampContent.php?campid=62&Show=62&ID=0&show2=1


للتوقيع على البيان

http://www.ipetitions.com/petition/not4womenonly/


Tuesday, February 16, 2010

الشعب لازم يضحى علشان الوزراء يعيشوا


بامر رئيس الوزراء علاج غالى على نفقة الدولة وبما ان السيد الوزير غالى اسماً وفعلاً طبعاً على الوزراء زمايله وحبايبه فقد تم تخصيص مليون جنيه من جيوب الموظفين والفلاحين والعمال المطحونين لعلاج سيادته


وقفة احتجاجية للمعاقين امام مجلس الشعب للحصول على كشك وشقة


كشف النقاب والنقاب ياما بيخبى بلاوى عن وزير الإسكان السابق محمد إبراهيم سليمان الموجه إليه 20تهمة فساد حتى الآن من بينهم التربح الغير مشروع وإستغلال نفوذ ده غير اعتراف زوجته أولاده امام النيابة بالأراضى بعشرات الأفدنة اللى باسمهم طبعا الراجل لازم يضمن مستقبل افضل لاوده واحفاد احفاد احفاده هو مش وزير ولا اييييه ؟


مواطن عادى إن رجع بيته فى إيدة عشا لولاده بينام يبوس ايده وش وضهر على النعمة اللى هو فيها ويسأل الله انه يحفظها من الزوال
وان كان مفيش يبقى مش مشكلة اهو بكرة جاى برزقه ... ضاقت بيه الحياة عمل كشك صغير فى جنب من الشارع الحى زاله غير الغرامة اللى دفعها له اهل الخير .. اجر مكان يكاد يرى بالعين المجردة وقال يلم حاجته فيه ويوزع على العمال اللى فى المنطقة الشاى والقهوة لكن كانت فوق دماغه اكتر من 3جهات حكومية بالمرصاد من تانى يوم بدأ يمارس نشاطه فيه ومفيش حد يدخل الا وهو طالع مديله محضر غرامة ايشى امن غذائى على امن صناعى على بلطجية الحى كان منه انه قفلها وربنا يتولاه فى الغرامات اللى وقعت فوق دماغه
المسؤلين اللى فى البلد دول بقى مسؤلين عن مين ؟؟؟ اذا كان كل يوم اضراب او اعتصام ده غير الشباب اللى بيهرب من البطالة للموت فى المحيطات ده غير الأطفال العرايا فى برد الشتا وحر الصيف وسريرهم اى كوبرى يلمهم او مقلب زبالة جنب الكلاب الضالة .. عشرات من المواطنين الغلابة رايحين جايين على مكتب السيد وزير الصحة يمكن يحن عليهم بتأشيرة تنقذ حياة طفل ولا رب اسرة للعلاج على نفقة الدولة الميزة اللى سيادته بيتمتع بيها مع انه وزير ومش ناقصه ... المواطنين اللى بيناموا بمرضاهم فى طرقات المستشفيات العامة واللى باعوا اراضيهم ورهنوا بيوتهم لان المستشفى العام رغم قذارته الا انهم برضه خصخصوه ولحد شريط الشاش بيشتروه .. هو مين اللى بقى يستحق ومين اللى بقى مسؤول عن مين بالظبط ؟؟؟

Sunday, February 14, 2010

happy valentine

عيد حب سعيد بس هيكون أسعد من غير سرقة وفساد ورشوة
عيد حب سعيد بس هيكون أسعد لو هل علينا وكل مسؤل عارف ماله من حقوق وعليه من واجبات مش سارق وناهب اراضى الدولة وبيتحقق معاه دلوقتى فى نيابة الأموال العامة
عيد حب سعيد بس هيكون أسعد لو مفيش ازمة انابيب ولا اعتصامات عمال ولا اضرابات موظفين
عيد حب سعيد بس هيكون اسعد لو مفيش بطالة
عيد حب سعيد بس هيكون أسعد لو مش شوية عيال صايعه ماشية تلف ورا البنات فى الشوارع وان فكرت تفتح بؤها يعنى مش كفاية ان ربنا خلقك انثى كمان بتتكلمى ده انتى بجحة اوى المفروض الذكر اللى المجتمع عمل منه نصف إله يتحرش ويغتصب وانتى تقولى سمعا وطاعة روحى شوفى لك نقاب اتلفى فيه وبرضه هيتحرش بيكى وهيغتصبك
عيد حب سعيد بس هيكون اسعد لو مفيش فتنة طائفية ومفيش القاذاورات بتاعة الفضائيات اللى كرهوا الناس فى نفسها مش بس فى بعضها
عيد حب سعيد بس هيكون اسعد لو النايل سات والعرب سات قفلوا اباوابهم فى وجوه بتوع بول الإبل واكياس الزبالة السودا اللى مش معروف لهم وجه من قفا وبيجيبوهم يقدموا برامج على قنوات التقيح الذهنى
عيد حب سعيد بس هيكون اسعد ومصر من غير حوادث ولا تلوث ولا ارهاب ولا متسللين بيطلقوا على نفسهم مجاهدين
عيد حب سعيد بس هيكون اسعد لما مصر ترجع من تانى مصرية وربنا يستر ومش يطلع علينا النهاردة المكفراتيه بتوع هذا حرام يا اخى المسلمين مش ليهم غير عيدين فقط اما اللى يحتفل بالعيد الثالث فهو كافر وزنديق وبعد ما يقوم من البرنامج يمسك الموبايل ويطلع ارقام الكام جوازة الرسمى على العرفى على المسيار على المصياف على اللى لسه هيخترعوا لهم اسم ويبعت لهم اس ام اس

HAPPYVALENTINE,S DAY

Thursday, February 11, 2010

جريمة شـــرف


كل يوم اقرا خبر عن واحد قتل بنته لشكه فى سلوكها وان عدى اليوم من غير حادثة قتل نلاقى اللى بنته حامل منه
والثانية مش حامل لاء دى خلاص انجبت وجابت طفل والطفل ده اخوها وابنها فى نفس الوقت
واللى بيعاشر بنت اخته معاشرة الازواج من 7سنوات وهى دلوقتى عمرها 14 سنة يعنى البنت خالها يعاشرها معاشرة الازواج من وهى سنها 7 سنوات وبانتظام لحد برضه ما انجبت منه .. فين اهلها وهى خالها يعاشرها بانتظام يوميا على مدار الاسبوع ؟
فين اهلها لما مش حسوا بيها وهى حامل لاء دى لما تعبت نقلوها المستشفى واكتشفوا انها آلام وضع ؟؟
هى كانت بالعه الجنين ولا ايه ؟؟
واللى قتل طليقته برضه بحجة انه شك فى سلوكها .. يا حلولى طب وانت مالك ؟ هو انت مش طلقتها وخلاص ؟ تقتلها ليه ؟
واللى راحت اجرت فتوات وخلتهم يغتصبوا بنت اختها فى الشارع لانها رفضت تتجوز من ابنها ؟
واللى رمى زوجته من البلكونة واللى قتلها غلط اصلها كان بيهزر معاها بالمسدس
واللى بيتاجر فى بناته وهما فى سن 12 سنة تتجوز البنت 3 ايام جواز سياحة ولا جواز مصياف او الاسم اللى يحدده مشايخ الفضائيات ماهو الدين بقوا بيلعبوا بيه ويسموا الدعارة مسميات مغلفة بشعارات دينية ولا جدال فى الدين يا اخى هتكفر بقى وتقول حرام ولا حلال انت ايش فهمك طب دول علماء .. مش مهم التربية مش مهم الأخلاق الأهم انه يلبسها الحجاب والنقاب ويعاشرها معاشرة الأزواج .. او يتاجر بجسمها للى يدفع أكتر
وبعد ما كل مريض نفسى يعاشر بنته ويكتشف انها حامل ويقتلها يجرى يسلم نفسه ويقول اصله كان شاكك فى سلوكها
هنيئاً لمجتمع جعل رجولة الذكر بين فخذى النساء وتغافل عن السرقة والغش والرشوة والفساد وشكراً الف شكر للقانون اللى بيحمى المجرمين تحت مسمى اصلها جريمة شرف .. وبعد اهتمامنا بالتدين الشكلى والبعد عن التربية الصحيحة وكمان تخفيف العقوبات واضح انها حوادث مكررة يومياً وعمرها ابداً ما هتكون مجرد حادثة وتعدى .. ولا عزاء لأنثى ارتضت لنفسها الذل خوفاً من الفضيحة والعار عليها انتظار النهاية اللى بالتأكيد معروفة القتل اصل ابوها او اخوها او جوزها او ايا كان اللى قتلها شك فى سلوكها

Tuesday, February 9, 2010

اعترافات إرهابى سابق

المقال ده منشور فى موقع المصرى اليوم
هنشرة زى ماهو دون زيادة ولا نقصان


اعترافات إرهابى سابق فى معرض الكتاب: ربنا تاب عليا ولو ابنى ساب لحيته.. هحلقها له
كتب ياسمين القاضى ٩/ ٢/ ٢٠١٠

إنه الوقت المناسب للاعتراف، الذى لم يطلبه منه أحد، ففى غمار الحديث عن الإرهاب والتشدد فى الدين وخطورة التطرف على المجتمع، وقف طالبا الكلمة، مستعداً للإدلاء بأقوال خرجت قبل سنوات رغماً عنه أمام أحد الضباط، لكنه يقولها هذه المرة بكامل إرادته، بغرض الاعتراف أو الاعتذار، وكلاهما يؤدى الغرض.

ما رواه عماد الدين حسين على جمهور الندوة التى أقيمت عن التطرف فى معرض الكتاب لا يؤيده مظهره الذى بدا عاديا، فلا لحية يطلقها ولا زبيبة صلاة تتوسط وجنته، ولا سبحة يدير حلقاتها ذهاباً وإياباً.. فقط سيجارة فى يد وميكروفون يتحدث فيه فى اليد الأخرى.
لا يبدو أنه قصد من وقفته وطلبه الكلمة ولا من اعترافاته هذه سوى الفضفضة، إذ خرج الحضور من سياق الندوة واستمعوا إلى قصته، التى اعتبرها البعض عظة، وقد أدت اعترافاته المعنى كاملاً، خاصة أنه بدأ الحكاية من بدايتها: «كنت زمان منضماً لتنظيم من إياهم لكن الحمد لله ربنا تاب على وتبت لله وللحكومة والمجتمع».. إنها البداية التى اختارها لنفسه ليطمئن الناس من نواياه ويجذبهم إلى حواره، الذى أكد فى أكثر من نقطة فيه أنه تاب عن هذه الأفكار ولم يعد يعتقد فيها.
وواصل حديثه: «التزمت عام ١٩٩٣ وربيت لحيتى وانضممت إلى جماعة كانت بتقول إنها عاوزه تغير حال البلد للأحسن وكنا شايفين إن الشعب والحكومة كفار ولازم يتربوا.. لكنى كنت غلطان واكتشفت إن كل الكلام ده مالوش أساس من الصحة».
عماد ورفاقه فى التنظيم كانوا من الحرص الذى يمنع اكتشاف أمرهم، لكن مظهرهم وتجمعهم كان كافياً للفت أعين رجال أمن الدولة إليه، رغم أنهم لم يكونوا تنظيماً صريحاً له أمير كما تصورهم الأفلام، وكان منطقياً أن يستقر عماد ورفاقه فى المعتقل بعد ٥ سنوات من نشاطهم، استغل فترة المعتقل طوال ٤ سنوات فى القراءة والبحث فى الكتب عن أدلته فى تكفير الحكومة، لكن بحثه انتهى إلى هدم كل هذه الثوابت وبناء أخرى جديدة، مفادها: «الحكومة مش كافرة والشعب مش كافر، لقد كنت مخدوعاً لأن كلام الناس بتوع الجامع كان من بره حلو وصح، لكن اللى يفكر فيه صح يلاقيه كله غلط، أصلى لما بصيت لحالهم لقيتهم تخلوا عنى وقت القبض علىّ واللى كان بيعلمنى الزهد فى الدنيا كان أول واحد جرى وراها».
عماد انطلق فى قناعاته الجديدة من قراءاته، ومن اقتناعه بأن كل شخص حر، ومن أنه ليس قاضياً، وإذا أراد فعلاً التغيير فعليه أن يبدأ بنفسه أولاً.
عماد خرج من السجن بعد إعلان توبته لله وللحكومة، وأكد أنه قرر البدء بنفسه أولاً وأن يصلح فيها قبل أن يعلن نفسه وصياً على المجتمع، فحلق لحيته وحتى الصلاة أصبح يصليها فى البيت حتى فوجئ بالضابط.
يقول له: «إنت مابقتش تصلى فى الجامع ليه؟.. صلى وعيش حياتك بس من غير ما تإذى حد».. اقتنع عماد بنصيحة الضابط وأخذ عهداً على نفسه: «لو ابنى ربى دقنه هحلقها له وأقوله يا بنى الدين مش كده».

Sunday, February 7, 2010

معرض الكتاب .. من حال إلى حال



فى كل عام بكون حريصة كل الحرص على انى لازم اروح معرض الكتاب لأن اكيد ولازماً وحتماً ولابد حلاقى فيه كل الكتب اللى تتقرى والكتاب اللى بحبهم حتى واللى مش عرفاهم بتعرف عليهم برضه من خلال الكتب بتاعتهم .. لكن لما رحت معرض الكتاب من يومين بجد وبمنتهى الامانة حسيت انه سوق للروبابيكيا .. عينة الكتب المعروضة فيه كلها عبارة عن بول الإبل والعلاج بالحبة السودة والحمرة والخضرا والفحلقى وتفسير ابن الحلمنتيشى فى الفلابنتيشى وطرق السعادة الزوجية وكيف تربين طفلك على الخط ميلخبطوش يا شابه .. ده غير يا لهوووى كل لما افتكر يا دى المصيبة السودة لعب الأطفال اللى مالية المعرض ولا الأدوات المنزلية يا نهار اسوود ولا الناس اللى فارشة فى الجونينة وقاعدة تاكل كشرى غطينى وصوتى يا صفية .. صفية مين ؟؟ ما علينا انا مش عارفاها اصلا تبقى مين .. ناهيك بقى على المناظر المنتشرة هناك امير الجماعة اللى لابس جلابية مينى وعامل دقن مترين وساحب
وراه الـ4 معيز اللى على زمته ومن حواليه الرعية كلهم مطقمين زيه والمنظر ده منتشر بشدة هناك .. انا كل شوية اسأل صحابى انتوا متأنكدين يا جماعة إننا فى معرض كتاب فى مصر مش أفغانستان ؟؟ يحلفوا لى وحياة طنط زيزى اننا فى مصر برضه انا معرفش مين طنط زيزى دى المهم اهو اى حاجه والسلام .. هو ايه اللى بيحصل فى مصر ؟؟ مفيش دار نشر محترمة ناشرة كتب لكتاب محترمين ؟؟ ما عدا كام دار نشر مش يجيبوا 3 فى العدد من صوابع الايد الواحدة ومش هذكر اسماء علشان مش تبقى اعلانات بقى وحوارت ؟ فريق الكورة بقى اسمه الساجدين .. هو السجود ماله باللعب ؟ المعرض تعرعر وبقى كله كتب تحتوى على وصفات من عند العطار وطز فى كليات الطب واللى بيدخلوها .. بلا ادب بلا ثقافة بلا تقدم بلا تحضر بلا كلام فارغ .. الدور على مهرجان السينما باذن واحد احد نلاقى الفنانات داخلين لينا بالنقاب وحاطين الفنانين فى قاعة خاصة والفنانات فى قاعة خاصة والى اسفل السافلين يا مصر طالما العراعير عايزين كدا


يعنى لما يبقى ده منظر كل دور النشر يبقى بلاه برضه معرض الكتاب ويقلبوه سوق للكانتوا وربنا ينعم عليهم بالادوات المنزلية ولعب الاطفال هتكسبهم اكتر من الكتب ده حتى الناس بطلت تتثقف هما معاهم فلوس يشتروا رغيف عيش لما هيشتروا كتب

Tuesday, February 2, 2010

ذات مساء



ذات مساء مشرق .. وضعت كل خطوط الأرض خلف الشمس فى عزف حزين .. ربيعى تائه عن مواقعه .. أحاول رسم إشراقات جديدة لكى يأتى المساء المنتظر .. أضع خطوطاً عريضة لرسم قلب يغذى أعماق الأعماق .. عند إحتضانه بعيداً عن أعين حاقدة بل فى مواقع لا تحتوى سوى على أرض وقلب وسماء !

لكن .. ! وعلى الرغم من الإنطلاق كى اصل حيث هو إلا أن للطريق تعبه .. ولوصول ثمنه وللهدف تضحيته وللمسير أرقه

لذا أرسم فى خيالى عمق الوصول .. وكيف أن ذاك المساء المنتظر والعنيد فى مجيئه هو عنوان قمة الإبداع

وهو كل الحياة بالوصول إليه

بل هو آخر مساء أحضتنه ويحتضننى فى إزدواج عظيم لمشاعر فاضت عمقاً وحباً وفرحاً

بإنتظار لحظة بلا ميعاد

Monday, February 1, 2010

لما نقول الفراعنة يبقى تقف تسمعنا

عملوها الفراعنة واكتسحوا 4 فرق مؤهله لبطولة كأس العالم

عملوها الفراعنة واعطوا للهمج درس فى الأخلاق الرياضية وفى اللعبة النظيفة وفى الأهداف النظيفة واولهم 4 على قفاهم نظيفة والاهداف مبتكدبش

عملوها الفراعنة وجمعو 80مليون مصرى على احساس واحد وهو احساس الفرحة بالفوز والانتصار




ورجعت الخضرة من انجولا بس ياريت تكون اتعلمت الكورة

جدو يا جدو يا اسطورة .. علمهم لعب الكورة